Prologus
si in explanationibus omnium prophetarum sancti spiritus indigemus aduentu, ut cuius
instinctu scripti sunt, illius reuelatione pandantur; et in esaia atque apocalypsi signatum
legimus librum, quem scribae et pharisaei, qui legis litteras nosse se iactant, non possunt
legere, quia signatus est, nullus que inueniri potuit, nisi leo de tribu iuda, quem signauit deus
pater, qui eius posset reserare mysteria. quanto magis in explanatione osee prophetae orandus
est dominus, et cum petro dicendum: edissere nobis parabolam istam. praesertim cum
obscuritatem uoluminis in fine testetur ipse, qui scripsit: quis sapiens et intelleget ista,
intellegens et cognoscet ea? quod non pro impossibili, sed pro difficili debemus accipere,
iuxta illud euangelii: quis putas est seruus fidelis et prudens quem constituit dominus super
familiam suam?
quis enim non statim in fronte libri scandalizetur, et dicat: osee primus omnium prophetarum
meretricem accipere iubetur uxorem, et non contradicit? non saltim nolle se simulat, ut rem
turpem facere uideatur inuitus; sed exsequitur laetus imperium, quasi optauerit, quasi multo
tempore eum pudicitiae uacasse paeniteat; cum honestiora et absque peccato sanctos uiros
renuisse domino iubente legerimus. moyses mittitur ad pharaonem et dux israelitici populi
constituitur; et tamen non imbecillitate, sed humilitate respondit: prouide alium quem mittas.
hieremias puerum esse se dicit, ne peccantem arguat hierusalem. hiezechiel iubetur de omni
genere leguminis ac sementis unum subcinericium facere, et coquere illum in humano
stercore; et ait: nequaquam, domine, quia numquam immundum intrauit in os meum. et osee
audiens a domino: accipe uxorem fornicariam, non frontem rugat, non maerorem pallore
testatur, non uerecundiam, mutato genarum rubore, demonstrat; sed pergit ad lupanar et
scortum ducit ad lectulum. et non initiat illam pudicitiae matronali; sed se luxuriosum ac
nepotem probat. qui enim adhaeret meretrici, unum cum ea corpus efficitur.
haec igitur audientes quid possumus respondere nisi illud propheticum: quis sapiens et
intelleget ista, intellegens et cognoscet ea? unde et nobis dicendum est cum dauid: reuela
oculos meos et considerabo mirabilia de lege tua, ut introducat nos rex in cubiculum suum, et
uelamen quod ante oculos moysi positum fuit in lectione ueteris testamenti, tollat a nobis.
statim enim ut locutus est dominus: pater, in manus tuas commendo spiritum meum; et haec
dicens exspirauit, uelum templi scissum est et omnia iudaeorum secreta patuerunt. et fons qui
egrediebatur de domo dauid, ingressus est mare solitudinis; et uerus elisaeus aquas steriles
atque mortiferas sapientiae suae condiuit sale, et fecit esse uitales.
mara que legis, quae interpretatur amaritudo, ligno patibuli dulcorata est. intellegimus enim
quis sit iudas patriarcha electus in regem, nec miramur cur ad thamar quasi ad meretricem uir
sanctus introeat; quare samson, qui interpretatur sol, dalilam amauerit, quae transfertur in
pauperem; et propter eam irrisus et mortuus aduersariorum milia trucidarit; cur salmon uirum
iustum booz de raab meretrice generarit, qui ruth moabiten pinna pallii sui operiens, et
iacentem ad pedes ad caput euangelii transtulerit. quid causae sit ut cum dauid tot habuerit
uxores, nullum alium regni sui fecerit successorem nisi eum qui de bethsabee procreatus est;
ut non solum meretrices, sed etiam adulterae deo placere uideantur.
unde et in hoc ipso propheta legimus, quod iunctus primum meretrici, secundo adulterae
copuletur, dicente ad eum domino: adhuc uade, dilige mulierem dilectam amico, siue
diligentem mala, et adulteram. haec est mulier meretrix et adultera, quae in euangelio pedes
domini lauit lacrimis, crine detersit et confessionis suae honorauit unguento; indignantibus
que discipulis, et maxime proditore, quod non fuisset uenditum et pretium illius in alimenta
pauperum distributum, dominus respondit: quid molesti estis mulieri? opus bonum operata
est in me; pauperes semper habebitis uobis cum; me autem non semper habebitis. et ne
putaremus leue esse quod fecerat, et nardum pisticum, id est unguentum fidelissimum, ad
aliud quid, et non ad ecclesiam esse referendum, dat nobis occasionem intellegentiae; et
magnae fidei magna praemia repromittit, dicens: amen, amen dico uobis, ubicumque
praedicatum fuerit hoc euangelium in toto mundo, dicetur quod et haec fecit in memoriam
eius. haec est meretrix de qua loquitur dominus ad iudaeos: amen dico uobis, meretrices et
publicani praecedent uos in regno dei. uos enim missum ad uos filium patris familiae et
dominum uineae, qui plantauit eam, suscipere noluistis.
ista meretrix exploratores meos duos fortissimos iuuenes, quorum alterum in circumcisionem
misi, alterum ad gentes, humanitate suscepit, abscondit studio, leuauit in tectum, operuit lini
stipula. quae caesa persecutionibus, et lota in baptismate, mutat colorem, et de tetro in album
uertitur.
nec mirum si in figura domini saluatoris, et ecclesiae de peccatoribus congregatae, haec facta
memoremus, cum ipse in hoc eodem dicat propheta: loquar ad prophetas; ego uisiones
multiplicaui et in manibus prophetarum assimilatus sum; ut quicquid prophetae iubentur
operari, ad meam referatur similitudinem. cuius uxor aethiopissa est, contra quam aaron et
maria, carnale sacerdotium iudaeorum, et prophetia litterae seruiens, mussitant et offendunt
deum; quae dicit in cantico canticorum: fusca sum et formosa, filiae hierusalem. alioquin si
omnia quae praecipiuntur ob causas, ut in similitudinem fiant, uere facta contendimus; ergo et
hieremias accinctus lumbari, uestimento muliebri, inter innumerabiles nationes et assyrios
atque chaldaeos, gentes inimicissimas iudaeorum, iuit ad euphratem et ibi abscondit lumbare
suum, et post multa tempora reuersus, inuenit illud computruisse quod nulli esset usui.
quomodo exire poterat et ire tam longe obsessa hierusalem, exstructis per circuitum
munitionibus, fossa, uallo atque castellis? qui cum semel ad anatoth uiculum suum in tertio
miliario ab urbe situm uoluisset exire, in porta et captus, et reductus ad principes, quasi
proditor uerberatus in carcerem mittitur.
si illud in typo, quia fieri non potuit; ergo et hoc in typo, quia si fiat, turpissimum est. sed
respondebis: deo iubente, nihil turpe est; et nos dicemus: nihil deus praecipit nisi quod
honestum est, nec iubendo turpia, facit honesta quae turpia sunt. sed quia scimus nihil deum
uelle nisi quod honestum est, hoc praecepit quod honestum est. haec in principio prolixius
sum locutus, ut difficillimam primum soluerem quaestionem, et oppositum in ipso exitu
scopulum dei auxilio praetergrediens, ad tuta decurrerem.
ceterum non ignoro, pammachi carissime, a multis ecclesiasticis praetermissam; et qui
exponere sunt conati, apud graecos repperi apollinarem laodicenum, qui cum in adolescentia
sua breues et in hunc et in alios prophetas commentariolos reliquisset, tangens magis sensus
quam explicans, rogatus est postea, ut in osee plenius scriberet, qui liber uenit in nostras
manus; sed et ipse nimia breuitate ad perfectam intellegentiam lectorem ducere non potest.
origenes paruum de hoc propheta scripsit libellum, cui hunc titulum posuit: peri~g tou~g
pôs~g ônomasthê~g en~g tôi~g ôsêe~g ephraim~g; hoc est: quare appellatur in osee ephraim,
uolens ostendere quaecumque contra eum dicuntur, ad haereticorum referenda personam. et
aliud uolumen akephalon~g kai~g ateleston~g, quod et capite careat et fine. pierii quoque legi
tractatum longissimum, quem in exordio huius prophetae die uigiliarum dominicae passionis
extemporali et diserto sermone profudit. et eusebius caesariensis in octauo decimo libro
euaggelikês~g apodeixeôs~g, quaedam de osee propheta disputat. unde ante annos circiter
uiginti duos, cum rogatu sanctae et uenerabilis socrus, immo matris tuae paulae (illud enim
nomen carnis, hoc spiritus est, quae monasteriorum et scripturarum semper amore flagrauit)
essem alexandriae, uidi didymum et eum frequenter audiui, uirum sui temporis
eruditissimum; rogaui que, ut quod origenes non fecerat, ipse compleret, et scriberet in osee
commentarios; qui tres libros ad me, me petente, dictauit, quinque quoque alios in zachariam.
nam et in ipsum duo tantum origenes scripsit uolumina, uix tertiam partem a principio libri
usque ad uisionem quadrigarum edisserens. haec dico, ut noueris quos in prophetae huius
campo habuerim praecursores; quos tamen ut simpliciter et non superbe - sicut quidam
meorum amicorum semper insibilat - tuae prudentiae fatear, non in omnibus sum secutus; ut
iudex potius operis eorum quam interpres exsisterem dicerem que quid mihi uideretur in
singulis, et quid ab hebraeorum magistris uix uno et altero acceperim. quorum et apud ipsos
iam rara auis est, dum omnes deliciis student et pecuniis, et magis uentris quam pectoris
curam gerunt; et in hoc se doctos arbitrantur, si in tabernis medicorum de cunctorum operibus
detrahant. sed iam tempus est ut prophetae uerba ponentes, ea quae scripta sunt, disseramus.
Liber 1
Caput 1
uerbum domini quod factum est ad osee filium beeri. lxx similiter. uerbum domini (quod in
principio erat apud deum patrem, et deus erat uerbum) factum est ad osee filium beeri, ut
prophetam quoque deum faceret, saluatore dicente: si illos dixit deos, ad quos sermo dei
factus est, et non potest solui scriptura, quem pater sanctificauit et misit in mundum, uos
dicitis: blasphemas; quia dixi, filius dei sum. ut quomodo deus deos facit, et stat in synagoga
deorum, in medio autem deos diiudicat; et cum ipse sit uerum lumen, quod illuminat omnem
hominem uenientem in hunc mundum, ad apostolos loquitur: uos estis lux mundi, sic et ipse
saluator prophetam suum faciat saluatorem. osee enim, in lingua nostra, saluatorem sonat,
quod nomen habuit etiam iosue filius nun, antequam ei a deo uocabulum mutaretur. non enim
- ut male in graecis codicibus legitur et latinis - ause dictus est, quod nihil omnino
intellegitur; sed osee, id est saluator; et additum est eius nomini dominus, ut saluator domini
diceretur. iste ergo saluator filius est beeri, id est putei mei, quos puteos fodit abraham, isaac
et iacob, et allophyli eos semper obruere conabantur. inter puteum et lacum, id est cisternam,
hoc interest, quod puteus perpetuas aquas habet, et de uiuo fonte manantes. cisterna quae
refrigerat, aquas suas externas et aduentitias possidet. unde per hieremiam prophetam loquitur
deus: me dereliquerunt fontem aquae uiuae, et foderunt sibi cisternas, quae aquas non ualent
continere. de hoc fonte ad deum psalmista proclamat: apud te est fons uitae, in lumine tuo
uidebimus lumen. unde quidam putant beeri interpretari lumen meum; sed superior uera
translatio est. in diebus oziae, ioathan, achaz, ezechiae regum iuda; et in diebus ieroboam filii
ioas regis israel. lxx similiter.
azarias, qui uocatur et ozias, de stirpe dauid regnauit in hierusalem super duas tribus, quae
appellabantur iuda, annis quinquaginta duobus; cui successit in regnum filius eius ioatham,
qui et ipse regnauit annis sedecim; post quem filius eius achaz regnauit annis similiter
sedecim. post achaz regnauit filius eius ezechias annis uiginti nouem, cuius anno sexto decem
tribus, quae appellabantur israel, captae sunt a salmanasar rege chaldaeorum, et in medorum
montibus collocatae. ex quo perspicuum est, prophetante osee, esaia et ioel, et amos et abdia,
et iona et michaea, qui sugchronoi~g eius fuerunt, regnum decem tribuum esse finitum, quod
a primo rege ieroboam usque ad ultimum osee, permansit annis ducentis quinquaginta. eo
autem tempore, quo ozias regnare coepit super iudam, super israel regnabat ieroboam
pronepos iehu, cui dominus repromiserat usque ad quartam generationem sobolem illius
regnaturam, eo quod percussisset duos reges impios iuda et israel. hoc dicimus ut tibi breuiter
ostendamus, osee prophetam et ante captiuitatem israel et post captiuitatem eius uaticinatum,
et tam uicinam quam praesentem et praeteritam, et denuntiasse uenturam, et luxisse
ingruentem, et in emendationem iudae retexuisse praeteritam; quod in ipso propheta iuxta
historiam conabimur approbare. ozias interpretatur fortitudo domini; ioatham domini
consummatio atque perfectio; achaz uirtus; ezechias imperium domini. hi regnabant in populo
iuda, cuius nomen confessio est. porro in israel qui sibi idola fecerat, et a dei populo fuerat
separatus, regnabat ieroboam <filius ioas>, qui interpretatur chronismos~g, id est
temporalitas, siue mora; quod mundum amauerit, et in ipso morari diu, uitam putauerit
sempiternam, nequaquam futuris, sed praesentibus delectatus. principium loquendi dominum
in osee. lxx: principium uerbi domini ad osee. quia, ut supra diximus, et aliis prophetis
praeferuntur in titulo, ozias, ioatham, achaz et ezechias, quibus regnantibus prophetauerunt,
idcirco nunc dicit quod inter omnes hos primum in osee dominus sit locutus, et postea ad
ceteros. aliud est autem loqui dominum in osee, aliud ad osee. in osee, non ipsi loquitur osee,
sed per osee ad alios; ad osee uero loquens, ad ipsum significatur conferre sermonem. alii
autem non primum omnium prophetarum uolunt fuisse osee, ex eo quod dicitur: principium
loquendi dominum in osee; sed ostendi quod haec quae sequuntur, primum ad osee dominus
sit locutus. et dixit dominus ad osee: uade, sume tibi uxorem fornicationum ac filios
fornicationum quia fornicans fornicabitur terra a domino. lxx: et dixit dominus ad osee: uade,
tolle tibi uxorem fornicationis et filios fornicationis quia fornicans fornicabitur terra post
dominum uerbum hebraicum zanunim, non fornicariam et fornicationem, ut plerique
aestimant, sed multas fornicationes sonat. ex quo ostenditur mulier ista, quam propheta sumit
in coniugem, non semel sed frequentius fornicata, ut quanto illa sordidior est, tanto sit
propheta patientior, qui talem uxorem duxerit. quod que additur: sume tibi et filios
fornicationum; apo~g koinou~g enim subauditur: sume tibi uxorem fornicationum, et sume
tibi filios fornicationum. utrumque potest intellegi, quod et fornicariae priores de fornicatione
susceptos recipiat filios, et ipse ex meretrice generet liberos, qui idcirco fornicationis
appellandi sunt filii, quod sint de meretrice generati. nec culpandus propheta, interim ut
sequamur historiam, si meretricem conuerterit ad pudicitiam, sed potius laudandus quod ex
mala bonam fecerit. non enim qui bonus permanet, ipse polluitur, si societur malo; sed qui
malus est, in bonum uertitur, si boni exempla sectetur. ex quo intellegimus non prophetam
perdidisse pudicitiam fornicariae copulatum; sed fornicariam adsumpsisse pudicitiam quam
antea non habebat; praesertim cum beatus osee, non ob causam luxuriae, non libidinis, non
propria fecerit uoluntate, sed dei paruerit imperio, ut quod in isto carnaliter legimus, in deo
factum spiritaliter probaremus, qui suscepit synagogam, hoc est populum iudaeorum
fornicationi et libidini seruientem. ad quam dominus loquitur per hiezechielem: et tu
meretrix, audi uerbum domini. fractae enim sunt in aegypto mammae eius, et uolutabatur in
sanguine, et fuerat polluta usque ad uerticem, ut nulla pars corporis atque membrorum eius
esset, quae turpitudinis maculam non haberet. operuit talem dominus pallio, et suis iunxit
amplexibus, dedit ei mel et oleum et similam manducare, et induit eam uestibus
pretiosissimis; posuit in collo ornamenta gemmarum; aures ornauit auro et lapide
pretiosissimo, armillas quoque brachiis praebuit ut bonis operibus uteretur. et nihilominus
haec contempta largitate et bonitate uiri, prioris immemor turpitudinis amatores chaldaeos et
assyrios et aegyptios, qui magnarum sunt carnium, secuta est. de saluatoris et ecclesiae typo
in praefatiuncula diximus, quod sumpserit sibi uxorem fornicariam, quae prius idolis
seruiebat. si quis autem contentiosus, et maxime gentilium, noluerit figuraliter dictum
recipere, et irriserit prophetam fornicariae copulatum, opponamus ei illud, quod solet laudare
graecia, et philosophorum scholae concinunt. qua ratione praedicent uirum eruditissimum
xenocratem, qui polemonem luxuriosissimum iuuenem inter psaltrias atque tibicines et
impudicas mulieres ebrium et hedera coronatum fecit oboedire sapientiae, et adolescentem
turpissimum mutauit in sapientissimum philosophorum. cur socratem ad caelum leuent, qui
phaedonem, ex cuius nomine platonis liber est, de lupanari, ob crudelitatem et auaritiam
domini, multorum libidini seruientem, in academiam transtulerit?
et quicquid illi iam de philosophiae magistris responderint, nos ad prophetae defensionem
referimus. haec aduersum ethnicos et eos qui ethnicorum sunt similes, dixerimus. ceterum
nostris, qui tamen uolunt suscipere ueritatem, illud breuiter ostendamus, ex eo quod dicitur:
quia fornicans, fornicabitur terra a domino, non tam prophetam iunctum esse meretrici, quam
omne hominum genus a societate domini recessisse. potest quoque ex eo quod non est
additum 'omnis terra', nunc iudaea accipi, uel proprie samaria et israel, id est decem tribus,
quae eo tempore quo haec dicebantur, a domino recesserant. et abiit et accepit gomer filiam
debelaim; et concepit et peperit ei filium. et dixit dominus ad eum: uoca nomen eius iezrael,
quoniam adhuc modicum et uisitabo sanguinem iezrael supra domum iehu; et quiescere
faciam regnum domus israel. lxx: et abiit, et accepit gomer filiam debelaim; et concepit et
peperit filium. et dixit dominus ad eum: uoca nomen eius iezrael, quia adhuc modicum et
ulciscar sanguinem iezrael super domum iuda; et quiescere faciam regnum domus israel.
prophetae sic multa post saecula de aduentu christi et uocatione gentium pollicentur, ut
praesens tempus non neglegant, ne concionem ob aliud conuocatam non docere de his quae
stant, sed de incertis ac futuris ludere uideantur. itaque et haec gomer filia debelaim, quae ab
osee uxor accipitur, et concipit ex eo, et parit ei filium nomine iezrael, qui interpretatur semen
dei, in cuius sanguinis ultionem regnum subuertit iehu (siue, ut male error obtinuit, iuda) sic
ad uocationem referenda est nationum, ut illi tempori congruat, sub quo filium generasse
memoratur. et ne longo tractatu lectoris auiditatem differam, duae istae mulieres quarum una
uocatur gomer, et est meretrix; parit que tres liberos, primum iezrael, secundum puellam,
quae uocatur: absque misericordia, et tertium masculum qui et ipse appellatur: non populus
meus; et altera mulier quae conducitur argenteis quindecim, et coro, et dimidio coro hordei, et
uocatur adultera, referuntur ad israel et ad iudam, id est ad decem tribus quae erant in samaria
sub rege ieroboam, qui fuit de ephraim, et ad iudam, qui regnabat in hierusalem de stirpe
dauid. hae sunt duae mulieres, quae in zacharia upupae, siue milui, siue herodii pennas habere
dicuntur, et ire in terram sennaar, ubi babylon condita est. has mulieres sub nomine duarum
sororum oola significat et ooliba; hae in duabus uirgis quas hiezechiel in unam uirgam sociat,
demonstrantur. et quia commentarios, non lata uolumina scribimus, singulis capitulis
explanationes proprias in suis locis reseruantes, nunc tantum de praesenti capitulo
disputemus. gomer interpretatur tetelesmenê~g, id est consummata atque perfecta; alii
thôrakas~g, id est loricas, significari putant. sunt qui mensuram, siue amaritudinem
suspicentur, quod recte dicerent, si gimel litteram non haberet. debelaim palatas~g sonat,
quarum in palaestina permagna copia est, et quas esaias propheta ulceri ezechiae regis iubetur
apponere. est autem massa pinguium caricarum, quas in morem laterum figurantes, ut diu
illaesae permaneant, calcant atque compingunt. igitur et israel consummata in fornicatione
atque perfecta filia uoluptatis, quae fruentibus suauis uidetur et dulcis, in typo domini
saluatoris ab osee uxor accipitur; et primus ex ea dei filius generatur, id est iezrael; est autem
ciuitas metropolis decem tribuum, in qua interfectus est naboth, ob cuius sanguinem
suscitatur iehu, qui deleuit domum achab et iezabel. uerum quia et ipse iehu, ultor sanguinis
iusti, ingressus est per uias ieroboam filii nabath, qui fornicari fecit israel, et constituit uitulos
aureos in dan et bethel, regnum quoque eius dicitur subuertendum; sub cuius pronepote
ieroboam prophetare coepit osee; quo mortuo, filius eius zacharias successit in regnum; quem
sexto mense imperii sui occidit sellum de alia stirpe generatus. quam ob causam nunc dicitur:
adhuc modicum et uisitabo sanguinem iezrael, id est occisionem populi mei, super domum
iehu regiam, quae eo tempore praeerat israel. nec mirum si domus subuertatur iehu, cum
etiam regnum domus israel, hoc est decem tribuum, post non multos annos omnino delendum
sit. a zacharia enim filio ieroboam, cuius atauus fuit iehu, usque ad nonum annum osee, sub
quo decem tribus ductae sunt in captiuitatem, supputantur anni quadraginta et nouem. occiso
que zacharia, qui fuit ultimus de stirpe iehu, statim reges assyrii ceperunt ruben et gad et
dimidiam tribum manasse, quae erant trans iordanem; et deinde multas samariae ciuitates, et
deinde totam nephtalim, ad extremum omnes reliquas tribus. pro iehu in editione uulgata
legitur iuda; sed hoc mihi uidetur non uitio septuaginta interpretum, sed scriptorum inoleuisse
imperitia, qui ignorantes iehu, quod magis tritum erat, scripserunt iuda. typus autem seminis
dei, et ultio sanguinis eius refertur ad domini passionem, propterquam et domus iuda et
regnum uniuersi israel dicitur subuertendum. et in illa die conteram arcum israel in ualle
iezrael. lxx similiter. quando ultus fuero sanguinem iezrael super domum iehu, et regnum
israel, assyrio uincente, deleuero, tunc illa die et in illo tempore conteram omne robur
exercitus israel in ualle iezrael. supra diximus iezraelem, quae nunc iuxta maximianopolim
est, fuisse metropolim regni samariae prope quam sunt campi latissimi, et uallis nimiae
uastitatis, quae plus quam decem milium tenditur passibus.
in huc commisso certamine, ab assyriis caesus est israel, id est decem tribus, quae ob
ieroboam de tribu ephraim, qui primus schisma fecit in populo, appellatae sunt ephraim.
interdum propter ioseph, qui fuit pater ephraim, uocatur ioseph; nonnumquam samaria, quae
et ipsa altera urbs fuit metropolis decem tribuum, quae postea ab augusto caesare appellata est
augusta, id est sebastê~g; in qua ossa ioannis baptistae condita sunt. post diuisionem ergo
duarum et decem tribuum, ob maximam partem multitudinis quae ieroboam secuta est,
nomen pristinum israel remansit in decem tribubus. et propter tribum iuda quae regnauit in
hierusalem, aliae quae tribus appellatae sunt iudas; simul que et typi ueritas explicatur.
quomodo enim propter sanguinem naboth, qui effusus est in iezrael, deleta est domus achab,
ut eliae uaticinium compleretur; sic propter sanguinem ueri iezrael, hoc est seminis dei,
regnum destructum est iudaeorum. in omnibus quidem prophetis, sed praecipue in osee,
decem tribus referuntur ad haereticos, quorum maxima multitudo est; duae autem tribus quae
appellantur iuda, ecclesiae personam possident, quae sub dauid stirpe regnant. arcus igitur
haereticorum, de quibus scriptum, est: filii ephraim intendentes et mittentes arcum, conuersi
sunt in die belli, confringetur in ualle seminis dei, de quo humilia et terrena senserunt. et
concepit adhuc et peperit filiam; et dixit ei: uoca nomen eius: absque misericordia; quia non
addam ultra misereri domui israel, sed obliuione obliuiscar eorum. et domui iuda miserebor;
et saluabo eos in domino deo suo; et non saluabo eos in arcu et gladio, et in bello, et in equis,
et in equitibus. lxx: et concepit adhuc et peperit filiam, et dixit ei: uoca nomen eius: absque
misericordia; quia nequaquam addam ultra misereri domui israel, sed aduersans aduersabor
eis; filiorum autem iuda miserebor et saluabo eos in domino deo suo; et non saluabo eos in
arcu, neque in gladio, neque in bello, neque in equis, neque in equitibus. postquam contritus
est atque confractus arcus israel in ualle iezrael, et regnum decem tribuum destitutum, ita ut
ducerentur in captiuitatem, nequaquam iam iezrael, id est semen dei, nec masculini sexus
filius nascitur; sed filia, id est femina fragilis sexus, et quae uictorum pateat contumeliae, et
uocatur: absque misericordia. idcirco enim ducta captiua est, quia misericordiam dei non
habuit. et consideranda domini indignatio. quod nequaquam domui israel se dicat ultra
misereri, sed eos de memoria sua aeterna obliuione delere; quia usque hodie persarum regibus
seruiunt, et numquam est eorum soluta captiuitas. domui autem iuda misericordiam
pollicetur, et dicit quod eos saluet in domino deo suo, uel in seipso qui loquitur; uel pater
saluet in filio, iuxta illud quod scriptum est: pluit dominus a domino. saluauit enim eos
quando israel assyriis traditus est, de manu sennacherib, non in arcu et gladio et bello et in
equitum multitudine, sed in suo robore, quando misit angelum et percussit de exercitu
sennacherib regis assyriorum una nocte centum octoginta quinque milia. iuxta typum dicimus,
eos qui propter sanguinem seminis dei uocantur: absque misericordia, et dicere ausi sunt:
sanguis eius super nos, et super filios nostros, hucusque seruire romanis. domum autem iuda,
eos uidelicet ex iudaeis, qui dominum sunt confessi, non in exercitus fortitudine, sed in
euangelica praedicatione saluatos. quod in israel et iuda tam iuxta historiam, quam iuxta
typum, interpretati sumus, referamus ad haereticorum conciliabula; et ad ecclesiam domini
saluatoris, quod illis absque misericordia derelictis, regnum que perdentibus, ecclesia dei sui
uirtute superarit. et ablactauit eam quae erat absque misericordia; et concepit et peperit filium;
et dixit: uoca nomen eius: non populus meus, quia uos non populus meus et ego non ero
uester. lxx similiter. qui uocabatur semen dei uersus in femininam et propter imbecillitatem
uirium offensam que dei, ductus in captiuitatem, quia domini misericordiam non habebat,
nequaquam ablactatus dicitur sed ablactata; uir enim iam robur amiserat. qui ablactatur,
recedit a matre, parentis lacte non uescitur, alimentis sustentatur externis. ita et israel
proiectus a domino, et captiuitatis circumdatus angustiis, atque in babylone cibis sustentatus
immundis, uocatur non populus dei, et aeterna gentis alienae feritur sententia, ut dicatur non
populus meus, et abdicetur in perpetuum. quod recte intellegere possumus, et in omni populo
iudaeorum, qui propter offensam seminis dei captiuitati traditus, regnum perdidit et
prouinciam, appellatur que non populus dei, et in persona haereticorum. si quis autem
contentiosus interpres noluerit recipere ista, quae diximus, sed meretricem nomine gomer
filiam debelaim, primum et tertium masculos, secundam, quae media est, feminam
intellexerit procreasse, hoc uolens scripturam sonare quod legitur, respondeat quomodo in
hiezechiel illud exponat, ubi iubetur a domino portare iniquitates domus israel, id est decem
tribuum, et trecentis nonaginta diebus in uno latere sinistro dormire perpetuo, licet in lxx
centum et nonaginta scripti sint, et dormire ita ut numquam euigilet, nec mutet latus, nisi forte
sopore satiatus paululum aperuerit oculos ad sumendum sordidissimum cibum subcinericii
panis, qui de frumento et hordeo, et faba et lente et milio coctus sit in humano stercore. hoc
enim rerum natura non patitur, ut quisquam hominum per trecentos nonaginta dies in uno
semper latere dormiat. et rursum, inquit: suscipies iniquitates domus iuda, et diebus
quadraginta dormies in latere dextro. hi autem dies pro annis supputabuntur, quibus israel et
iuda obsidione et captiuitate longissima deprimentur, ita ut uicti et immobiles, de altero in
alterum latus se uersare non possint. si illa et cetera his similia, quae in scripturis sanctis
legimus, facta non potuerit approbare, sed aliud quid significare contenderit; ergo et meretrix
ista mulier, et alia adultera mulier, quae aut prophetae iungebantur, aut seruabantur a
propheta, non turpem stupri coniunctionem, sed sacramenta indicant futurorum.
et erit numerus filiorum israel quasi arena maris, quae sine mensura est, et non numerabitur.
et erit in loco ubi dicetur eis: non populus meus uos, dicetur eis: filii dei uiuentis. et
congregabuntur filii iuda, et filii israel pariter; et ponent sibimet caput unum et ascendent de
terra, quia magnus est dies iezrael. lxx: et erit numerus filiorum israel sicut arena maris quae
non mensurabitur, nec numerari potest. et erit in loco ubi dictum est eis: non populus meus
uos, uocabuntur filii dei uiuentis. et congregabuntur filii iuda et filii israel simul; et ponent
sibi principatum unum, et ascendent de terra quoniam magnus est dies iezrael. legimus
abiectionem decem tribuum, et non mensurabilem israel nec ultra populum dei, indignatione
perpetua condemnatum. nunc discimus quomodo filii iuda et filii israel pariter congregentur,
et ponant sibi caput unum siue principatum; et ascendant de terra, et in loco ubi prius
dicebatur: non populus meus, appellentur filii dei uiuentis; et hoc fieri, quia magnus sit dies
iezrael. ambigenti et in uarias sententias fluctuanti illud occurrit pauli apostoli ad romanos
scribentis: quod si uolens deus ostendere iram, et notam facere potentiam suam, sustinuit in
multa patientia uasa irae apta in interitum; ut ostenderet diuitias gloriae suae in uasa
misericordiae quae praeparauit in gloriam; quos et uocauit nos non solum ex iudaeis, sed
etiam ex gentibus, sicut in osee dicit: uocaui non plebem meam, plebem meam, et: non
misericordiam consecuta, misericordiam consecutam. et erit in loco ubi dictum est eis: non
plebs mea, uos ibi uocabuntur filii dei uiui. esaias autem clamat pro israel: si fuerit numerus
filiorum israel tamquam arena maris, reliquiae saluae fient. uerbum enim consummans et
breuians in aequitate, quia uerbum breuiatum faciet dominus super terram. et sicut praedixit
esaias: nisi dominus sabaoth reliquisset nobis semen, sicut sodoma facti essemus, et sicut
gomorra similes fuissemus. quid ergo dicemus: quod gentes quae non sectabantur iustitiam,
apprehenderunt iustitiam? iustitiam autem quae ex fide est: israel uero sectans legem iustitiae,
in legem iustitiae non peruenit. igitur beatus apostolus osee prophetae assumens testimonium,
et exponens illud super uocatione gentium et eorum fide qui ex iudaeis credere uoluerunt,
omnem nobis difficultatem interpretationis abscidit, asserens christi temporibus esse
completum; ut scilicet in israel eligantur duodecim tribus, hoc est omnis populus iudaeorum,
et in iuda hi qui ex gentibus imperium domini confitentur. si quis autem alienus a fide christi,
et non recipiens auctoritatem noui testamenti, sed de numero circumcisionis, responderit
filios iuda et filios israel duas tribus sonare et decem, de quibus crebro diximus, et in hoc
dantes manus, nihil fidei nostrae nocere monstrabimus. sed postquam fuerit numerus filiorum
israel quasi arena maris in toto orbe dispersus, et omnem supputationem uicerit populi
multitudo, tunc habebit licentiam israel, qui hodie quoque captiuus est; et qui prius dicebatur
absque misericordia et non populus meus, cum duabus tribubus, id est iuda et beniamin,
quarum magna pars in christum credidit, inire concordiam, ut corporibus separatos iungat
fides, et unum sibi caput ponant et principem; de quo scripsit hiezechiel: et princeps unus in
medio eorum, dauid seruus meus, et resuscitabuntur quasi ab inferis mortui, iuda scilicet et
israel qui in infidelitate mortui erant. et haec omnia fient, quia magnus est dies seminis dei,
qui interpretatur christus. ex quo perspicuum est, ideo in typo naboth iezraelitis sanguinem
praecessisse, ut ueritas compleretur in christo. in hoc enim et non in illo magnus est dies
iezrael, de quo dicitur: haec est dies quam fecit dominus: exsultemus et laetemur in ea.
interpretationis tertiae quam suscepimus, israel in haereticis, iuda in ecclesiae hominibus
exponendis, hic sensus est: ut postquam dominus in claritate sua uenerit regnaturus, hi qui
ante uocabantur non populus eius, uocentur filii dei uiuentis; cum iudae, id est ecclesiae dei,
fuerint copulati, et unum caput christum habuerint, et ascenderint de terra, id est de terrenis
sensibus et humilitate litterae, et susceperint magnum diem seminis dei. pro ouk~g
êleêmenê~g, id est absque misericordia, in quibusdam fertur exemplaribus ouk~g
êgapêmenê~g, id est non dilecta. sed ueriora sunt exemplaria, quae habent absque
misericordia; maxime quia ad distinctionem israelis, cui non miseretur infert deus: domui
autem iuda miserebor.
Caput 2
dicite fratribus uestris: populus meus, et sorori uestrae: misericordiam consecuta. lxx: dicite
fratri uestro: populus meus, et sorori uestrae: misericordiam consecuta. quia magnus est dies
iezrael, in quo iudas et israel unum habebant principem, et nequaquam dicetur israeli: non
populus meus; sed econtrario uocabuntur filii dei uiuentis. idcirco, o homines tribus iuda,
nolite desperare decem tribuum salutem, sed eas cotidie et sermone et uoto et litteris ad
paenitentiam prouocate, quia frater uester appellatur et soror; frater ex eo quod dicitur:
populus meus; soror ex eo quod appellatur: misericordiam consecuta. aliter: qui in christum
creditis, et estis tam ex iudaeis quam ex gentibus, dicite fractis ramis, et priori populo, qui
proiectus est: populus meus quia frater tuus est; et misericordiam consecuta quia soror tua est.
cum enim intrauerit plenitudo gentium, tunc omnis israel saluus fiet.
hoc idem nobis praecipitur, ne haereticos penitus desperemus, sed prouocemus ad
paenitentiam; et illorum salutem germanitatis optemus affectu. iudicate matrem uestram,
iudicate, quoniam ipsa non uxor mea et ego non uir eius; auferat fornicationes suas a facie
sua, et adulteria sua de medio uberum suorum, ne forte exspoliem eam nudam et statuam eam
secundum diem natiuitatis suae. lxx: iudicamini cum matre uestra, iudicamini, quia haec non
uxor mea et ego non uir eius; et auferam fornicationem eius a facie mea, et adulteria eius de
medio uberum illius, ut exspoliem eam nudam, et restituam eam iuxta diem natiuitatis suae.
hucusque ad israel populum, hoc est decem tribus, sermo directus est. nunc alterum caput
incipit, et praecipitur filiis, id est populo, ut ineant iudicium aduersum matrem suam, quae
eos genuit, quae de meretrice uxor effecta, mores pristinos non reliquit, et rursum fornicata
est cum amatoribus suis. et uide clementiam uiri. iam repudiata est, iam abiecta, iam ei
locutus est: haec non uxor mea et ego non uir eius; tamen praecipit filiis, ut nequaquam ad
uxorem patris quam ille dimisit, sed ad matrem suam loquantur quae eos genuit. loquantur
autem ad paenitentiam prouocantes, ut auferat fornicationes a facie sua, et adulteria sua de
medio uberum suorum. fornicaria est, quae cum pluribus copulatur. adultera, quae unum
uirum deserens, alteri iungitur. quorum utrumque est synagoga, quae si permanserit in
fornicatione et adulterio, auferet ab ea deus uestes et ornamenta quae dederat. de quibus
scribit hiezechiel: in die quando nata es, non ligauerunt mamillas tuas, et sale non es salita: et
transiui per te, et inueni te nudam, et deturpatam, et conspersam in sanguine. et post
paululum: indui te byssino et subtilibus, et ornamenta circumposui tibi, et dedi armillas circa
manus tuas, monile circa collum tuum. haec tunc ei dedit maritus largissimus, quando inuenit
illam in aegypto idololatriae libidine constupratam et diuaricantem omnibus pedes suos. et
nunc comminatur, si ad uirum suum noluerit reuerti, ita eam futuram absque deo et uiro, sicut
prius in aegypto fuerat. ne semper triplici explanatione tendamus uolumina, hoc raro
admonuisse sufficiat, quae dicta sunt conuenire et iudaeis negantibus christum, et haereticis
fidem domini relinquentibus, quorum fornicatio proprie inter ubera est; et in artificio
idolorum et uariorum dogmatum corde uersatur, qui reuertentur ad diem natiuitatis suae, ut si
non egerint paenitentiam, ethnicis comparentur. et ponam eam quasi solitudinem, et statuam
eam uelut terram inuiam, et interficiam eam siti. lxx: et ponam eam ut desertum, et statuam
eam sicut terram sine aqua, et occidam illam in siti. si noluerit ad meliora conuerti, faciam illi
quod feci in solitudine, ut ducti in captiuitatem cadant in terra aliena, patientes sitim bonorum
omnium, et ad patriam suam redire non ualeant. uel certe audiant in euangelio: relinquetur
uobis domus uestra deserta. et mittet eis dominus non famem panis, nec sitim aquae; sed
famem audiendi uerbum domini. de quo et esaias loquitur: erunt sicut paradisus aquam non
habens. haeretici qui abiecti sunt a domino, si non redierint ad pristinam domum, sic omnium
rerum patientur penuriam, ut etiam quod falsum habere uidentur, redigatur ad nihilum. et
filiorum illius non miserebor, quoniam filii fornicationum sunt, quia fornicata est mater
eorum. confusa est quae concepit eos, quia dixit: uadam post amatores meos, qui dant panes
mihi et aquas meas, lanam meam et linum meum, oleum meum et potum meum. lxx: et
filiorum eius non miserebor, quoniam filii fornicationis sunt, quia fornicata est mater eorum.
confusa est quae peperit eos; dixit enim: uadam post amatores meos, qui dant mihi panes
meos et aquam meam, et uestimenta mea et linteamina mea, et oleum meum et omnia quae
mihi necessaria sunt. hoc plus faciam ei cui dixi: non uxor mea, et ego non uir tuus, et ponam
eam quasi solitudinem, et faciam eam uelut terram inuiam. quando enim de aegypto eduxi
eam, interfectis parentibus, filii eorum terram repromissionis ingressi sunt. nunc autem
fornicariae matris liberi peribunt cum matre meretrice, quoniam filii fornicationis sunt, et
mali ex malis geniti.
quibus in euangelio dicitur: generatio uiperarum, quae in tantam uenit impudentiam, ut
audiret per hieremiam: facies meretricis facta est tibi; impudorata es tu. an non est hoc durae
frontis et meretriciae impudentiae, ut in suo scelere glorietur, et dicat: sequar amatores meos;
uadam ad idola quae mihi et ad uictum et ad uestimentum necessaria praebuerunt. omnia quae
propheticus sermo describit, spiritaliter a domino accepere iudaei. et quia dei filium
negauerunt, eligentes sibi barabbam latrocinii et seditionis auctorem, et crucifigentes filium
dei, propterea usque hodie sequuntur daemones, et dei beneficia ad illos referunt, qui
cultorum suorum animas perdiderunt. panes et aquas habent haeretici, quorum panis luctus
est, et aquae eorum caenosae, quae suffocant, et interficiunt baptizatos. habent et lanam de
scabidis ouibus, et linum in nigredine perseuerans, oleum que, de quo propheta dicit: oleum
peccatoris non impinguet caput meum, et potum aquarum aegypti de quibus clamat hieremia:
quid tibi et uiae aegypti, ut bibas aquam geon? et: quid tibi et uiae assyriorum ut bibas aquas
fluminum? breuiter cuncta percurrimus, ut ad reliqua transeamus. propter hoc ecce ego
sepiam uiam tuam spinis, et sepiam eam maceria, et semitas suas non inueniet, et sequetur
amatores suos, et non apprehendet eos, et quaeret eos et non inueniet, et dicet: uadam et
reuertar ad uirum meum priorem, quia bene mihi erat tunc, magis quam nunc. lxx: propterea
ecce ego sepiam uiam eius in sudibus, et obstruam uias illius; et semitam suam non inueniet.
et persequetur amatores suos, et non apprehendet illos; et quaeret eos et non inueniet; et dicet:
uadam et reuertar ad uirum meum priorem, quia melius mihi erat tunc, quam nunc est. dixerat
meretrix: uadam post amatores meos, qui omnium rerum mihi abundantiam praebuerunt.
respondit dominus: ego sepiam uiam tuam spinis, siue sudibus, ne possis ire quo desideras, et
interponam maceriam, siue murum et semitas tuas quas crebro triueras pede, non inuenies, ne
apprehendas eos quos tanto studio sequebaris, et rerum necessitate compulsa reuertaris ad
uirum tuum; et dicas illud de euangelio: quanti mercennarii in domo patris mei abundant
panibus, ego autem hic fame pereo. surgam et ibo ad patrem meum et dicam illi: pater,
peccaui in caelum et coram te, iam non sum dignus uocari filius tuus, fac me sicut unum de
mercennariis tuis. ex quo intellegimus quod prouidentia dei saepe nobis accidant mala, ne
habeamus ea quae cupimus, et uariis oppressi calamitatibus huius saeculi ac miseriis, ad dei
seruitutem redire cogamur. amatores autem hierusalem et gentis iudaeae, secundum historiam
illius temporis, assyrios atque chaldaeos et aegyptios nationes que ceteras intellegamus, cum
quorum idolis fornicata est, a quibus bellorum tempore, et prementibus malis frustra sperauit
auxilium. hos amatores iuxta intellegentiam spiritalem sequuntur haeretici, a quibus saepe
deserti, malorum pondere ad sinum matris ecclesiae reuertuntur. per omnia enim flagella
atque tormenta eruditur israel. et haec nesciuit, quia ego dedi ei frumentum et uinum et
oleum, et argentum multiplicaui ei et aurum, quae fecerunt baal. lxx: et ipsa nesciuit quia ego
dedi ei frumentum et uinum et oleum, et argentum multiplicaui ei; haec autem argentea et
aurea fecit ipsi baal. ad superiora respondit, dixerat enim: uadam post amatores meos, qui
dant panes mihi, et aquas meas, lanam et linum, et oleum et potum meum, quae uniuersa
susceperat, ut in dei cultum uerteret. illa uero panem et uinum, qui confirmat, et quod
laetificat cor hominis, et oleum quod illuminat omnem hominem uenientem in hunc mundum,
et argentum de quo saepe diximus: eloquia domini, eloquia casta, argentum igne examinatum,
probatum terrae, purgatum septuplum. et aurum de quo legimus: si dormiatis inter medios
cleros, pennae columbae deargentatae, et posteriora dorsi eius in uirore auri, uertit in idola, et
fecit baal, quod interpretatur superior et deuoratio, dum aut maiora se putat habere dogmata
quam ecclesiae, aut in ipsa falsae opinionis scientia deuoratur. quod autem iuxta litteram,
auro et argento et cunctis opibus abundauerit hierusalem, et fecerit idola baal daemoni
sidoniorum, siue, ut quidam rectius arbitrantur, babylonio, ex quo et bel dicitur, hiezechiel
plenius in suo ponit uolumine, et omnis prophetarum narrat chorus. idcirco reuertar et sumam
frumentum meum in tempore suo, et uinum meum in tempore suo, et liberabo lanam meam et
linum meum, quae operiebant ignominiam eius. lxx: propterea reuertar et tollam triticum
meum in tempore suo, et uinum meum in tempore suo, et auferam uestimenta mea et
linteamina mea, ne operiant ignominiam eius. grauior poena est, quando in tempore messis et
uindemiae speratae fruges auferuntur et uinum, et quodammodo tentae tolluntur e manibus.
sin autem in tempore areae et torcularis et preli, quando sterilitatem praeteritam nouis
frugibus terra fecundat omnium rerum penuria est, quid de reliquo anni tempore, quando et
uetera conseruantur, aestimare debemus? liberatur autem lana et linum, siue uestes et
linteamina, ne ultra ignominiam operiant meretricis; ut scilicet dei nudetur auxilio; et
omnium ab eo angelorum tutela discedat. unde et apostolus liberari dicit creaturam a seruitute
corruptionis in libertatem gloriae filiorum dei.
multi accepere aurum et argentum sapientiae et eloquentiae, de quibus facerent candelabrum
septem lucernarum ex auro purissimo, et mensam propositionis auream, et propitiatorium et
cherubim auri splendore radiantia, et bases columnarum argenteas, et triticum sermonis dei, et
uinum gaudium spiritus sancti; uestimenta quoque et linteamina quibus credentes uestirentur
in christo; quae uniuersa uerterunt in idololatriae cultum, uaria errorum dogmata
componentes, et decepti alios deceperunt. quae omnia aufert deus, ut qui ex copia datorem
non senserunt, sentiant ex penuria. et nunc reuelabo stultitiam eius in oculis amatorum eius;
et nullus eruet eam de manu mea et cessare faciam omne gaudium illius sollemnitatem eius,
neomeniam eius, sabbatum eius, et omnia festa tempora eius; et corrumpam uineam eius et
ficum eius de quibus dixit: mercedes hae meae sunt, quas dederunt mihi amatores mei; et
ponam eam in saltum et comedet eam bestia agri. lxx: et nunc reuelabo immunditiam eius in
conspectu amatorum illius; et nullus eruet eam de manu mea; et auertam omnes laetitias eius,
sollemnitates illius et neomenias eius, et sabbata, et cunctas festiuitates illius; et disperdam
uineam eius, et ficus illius quae dixit: mercedes meae istae sunt quas dederunt mihi amatores
mei; et ponam eam in testimonium et comedent eam bestiae agri. quod sequitur: uolatilia
caeli et reptilia terrae, obelo praenotandum est. pro saltu quoque, quod hebraice dicitur iar,
unde et cariath iarim interpretatur uilla siluarum, lxx transtulerunt testimonium, res et daleth
litterarum falsi similitudine. si enim pro res daleth legatur, testimonium dicitur, ita dumtaxat,
ut iod littera non praecedat. liberatis ergo ueste et linteamine, ne operirent ultra ignominiam
fornicariae, omnis turpitudo hierusalem, siue stultitia, per quam operata est turpitudinem,
reuelabitur in conspectu amatorum eius, ut quam uelatam desiderabant, apertam contemnant.
cum que tradita fuerit amatoribus suis assyriis, siue daemonibus, quibus et ipsa et assyrii
seruiunt, nullus, inquit, eam de manu mea poterit eripere, probata imbecillitate daemoniaca,
quod quos rebus omnibus abundantes receperant, oppressos malis liberare non possunt.
tradita autem babyloniae seruituti, nequaquam tres sollemnitates paschae et pentecostes et
tabernaculorum celebrare poterit. non neomeniae, id est kalendarum, non sabbati exercere
laetitiam, nec omnes festiuitates quas uno nomine comprehendit. uinea quoque et ficus et
rerum omnium abundantia corrumpetur; in uinea laetitiam, in ficu suauitatem et dulcedinem
intellege, quae auferuntur grauissimae seruitutis malis; et auferuntur idcirco, quia non a deo
sibi donata quasi coniugi; sed ab amatoribus suis quasi meretrici pro libidinis mercedibus
arbitrata est. tunc nequaquam habebit arbores pomiferas, sed omnia uertentur in saltum. et
quia semel metaphoram a siluis ceperat, finit in reliquo, ut hostes a quibus deuoranda sunt
omnia, bestias nuncupet. haec et iuxta historiam et iuxta tropologiam infelix iudaea perpessa
est, cuius omnis turpitudo in oculis gentium reuelata est, et nullus eam eruere potuit de
manibus dei. cessauerunt uniuersae caeremoniae, in luctum est uersa festiuitas; omnia quae
sibi putabat dari a daemonibus, nunc ob offensam dei ablata cognoscit. deuorauerunt eam
primum assyrii atque chaldaei, medi et persae atque macedones, ad extremum saeuissima
lacerauit bestia, imperium romanorum, cuius in daniele nomen tacetur, ut maior formido his
qui deuorandi sunt, augeatur. quae de iudaea diximus, refer ad haereticos, qui prima fronte
doctrinam et scientiam promittentes, egressi de ecclesia deseruntur a deo; et omnis eorum
ignominia in conspectu amatorum ponitur, quos prius deceperant, et traditi bestiis quas
propheta declinat, dicens: ne tradas bestiis animam confitentem tibi, earum morsibus
derelinquentur. et uisitabo super eam dies baalim, quibus accendebat incensum, et ornabatur
inaure sua, et monili suo; et ibat post amatores suos; et mei obliuiscebatur, dicit dominus. lxx:
et ulciscar super eam dies baalim, in quibus immolabat eis; et circumdabat sibi inaures suas et
monilia; et ibat post amatores suos; mei autem oblita est, dicit dominus. seruat personam
meretricis, quae auro ornatur et gemmis, ut placeat amatoribus suis, et quicquid pulchritudinis
non habet per naturam, arte conquirit. has inaures, quibus aures eius doctrina dei fuerant
adornatae, et has margaritas quae ex collo pretiosae pendebant, ita ut sponsus ad eam diceret
et maritus: collum tuum sicut monilia, misit ante porcorum pedes, et dedit sanctum canibus.
et impletum est quod in prouerbiis legimus: sicut inauris aurea in naribus suis, ita mulieri
pessimae pulchritudo. haec autem uniuersa faciebat, ut sequeretur amatores, et relinqueret
uirum. tantum que fuit desiderium uoluptatis ac libidinis, ut omnem memoriam amiserit
maritalem, et oblita sit fuisse se coniugem. quamobrem in ipsis sollemnitatibus quibus
incendebat thura daemonibus, uisitabitur in plagis, et corripietur in poenis. baal, numero
singulari, baalim pluraliter, eadem idola nominantur genere masculino. ubicumque enim in
fine hebraici sermonis im syllabam legimus, numero plurali est, genere masculino; ubi autem
oth, numero plurali, genere feminino. ergo seraphim et cherubim plurali intellegimus numero,
genere masculino. sabaoth autem quod interpretatur militiarum, uel exercituum, siue uirtutum
numero plurali, genere feminino.
itaque et baalim masculino genere, numero sunt plurali, licet quidam male têi~g baal~g et
tais~g baaleim~g legant genere feminino. quomodo autem decipiant haeretici amatores suos,
et componantur eloquii uenustate, structura que uerborum, ut mendacio simulent ueritatem, et
coniugalem pudicitiam derelinquant, et incendant baalim, id est idolis, quae de suo corde
finxerunt, cotidie cernimus. non enim habent curam simplicis rusticitatis quae meretricia
ornamenta non quaerit; sed artificis elegantis que mendacii, ut amatoribus suis diabolis et
daemoniis placeant. propter hoc ecce ego lactabo eam; et ducam eam in solitudinem, et loquar
ad cor eius. et dabo ei uinitores eius, ex eodem loco, et uallem achor ad aperiendam spem.
lxx: ideo ecce ego seducam eam et ponam illam quasi desertum; et loquar ad cor eius et dabo
ei possessiones suas inde, et uallem achor ad aperiendam intellegentiam eius. pro eo quod nos
diximus ad aperiendam spem, et lxx uerterunt ad aperiendam intellegentiam eius,
interpretatus est symmachus eis~g thuran~g elpidos~g, id est in ostium spei, theodotio
dianoixai~g tên~g hupomonên~g autês~g, id est aperire patientiam, uel exspectationem eius.
postquam reuelata fuerit ignominia hierusalem, siue iudaeae meretricis, in oculis amatorum
eius, et cessauerit uniuersa sollemnitas, uineam et ficum uel siccitas uel grando corruperit, et
redacta in siluas atque infructuosas arbores, a bestiis fuerit deuorata et reddiderit ei dominus
cruciatus atque tormenta; quia daemonibus baalim thura succenderat, et nequaquam se ultra
de cineribus ac fauillis putauerit posse consurgere, tunc, hoc est in aduentu christi filii sui,
aperiet spem salutis, et dabit locum paenitentiae, et blandietur ei; hoc enim significat, lactabo
eam; ut post poenarum magnitudinem dolores pristinos repromissione mitiget prosperorum. et
ducam eam, inquit, in solitudinem, id est educam ex malis, sicut et prius de aegyptiaca
eduxeram seruitute; et loquar ad cor eius uerba mollia, uerba consolatoria, ut tristitiam gaudio
temperem, iuxta idioma scripturarum, quibus uerbis et sichem locutus est ad cor dinae, et
ioseph in aegypto fratribus suis tristibus atque metuentibus, ut maeror gaudio mutaretur. quod
que sequitur: et dabo ei uinitores eius, ex eodem loco. qui blanditias et solitudinem in
praeteritae historiae exeuntium de aegypto similitudine praemiserat, in qua moyses et aaron
de eadem gente iudaeorum principes exstiterunt, etiam nunc pollicetur, quod uinitores eius de
eodem loco daturus sit. uineam intellegi israel, omnis et ueteris instrumenti et noui scriptura
testatur: uinea domini sabaoth, domus israel est. et: uineam de aegypto transtulisti. et in
euangelio: paterfamilias locauit uineam suam, fructus que non recepit. et interfecto filio suo,
nouissime locauit eam aliis uinitoribus. hoc igitur prophetalis sermo promittit, quod principes
huius uineae exeuntes de gentibus et de captiuitate hostium, siue uitiorum, de ipso sint genere
iudeorum, id est apostoli; et locus tumultus uallis que turbarum - hoc enim interpretatur achor
- mutetur in ostium spei, siue ad aperiendam spem atque patientiam, quod idcirco supplicia et
tormenta perpessa sit, ut per haec ad prospera perueniret. quod autem uallis achor, in qua
interfectus est achan, ob furtum eorum, quae deo fuerant consecrata, conturbatio et tumultus
interpretatur; non ut quidam putant diastrophê~g, id est peruersitas, ipse iesus interpretatur
loquens ad achan: quia turbasti nos, conturbet te dominus in die hac. unde appellatus est locus
ille emec achor, id est uallis conturbationis. simul que et hoc intellegimus, quod in principio
terrae sanctae, iuxta hiericho, quando de solitudine egressus est populus, propter fluenta
iordanis, in prima israelis uictoria, maeror in gaudium commutatus sit. ibi que aperta spes, ubi
fuerat disperatio. ut, punitis his qui peccauere in christo, et commisere sacrilegium, saluentur
ex eis qui blasphemantes iudaeos fuerint detestati, et quantum in se est interfecerint. haec
circumcisio et nostri iudaizantes ad mille annorum regnum referunt, quae in principio per
apostolos uinitores et credentium multa milia ex israel uidemus esse completa, et compleri
cotidie in his qui credere uoluerint. quod que nos diximus: lactabo eam, et lxx interpretati
sunt: seducam eam, ad antichristi tempus referunt, ut qui christi non receperint ueritatem,
illius recipiant mendacium, et postea, christo adueniente, saluentur. et canet ibi iuxta dies
iuuentutis suae, et iuxta dies ascensionis suae de terra aegypti. lxx: et humiliabitur iuxta dies
infantiae suae et iuxta dies ascensionis de terra aegypti. in eo loco ubi nos posuimus canet, et
lxx transtulerunt humiliabitur, in hebraico scriptum est anatha, quod symmachus interpretatus
est affligetur, theodotio respondebit, aquila obediet, id est hupakousei~g; nos ab hebraeo
kata~g lexin~g magis accipimus, id est: praecinet; ut, quia semel iactationem et eductionem
in solitudinem, et uinitores ex eodem loco, et uallem achor, posuerat, et totam historiam
exeuntium de aegypto et pergentium ad terram sanctam breui sermone perstringens, etiam
nunc historiae similitudinem conseruaret. ut quomodo eo in tempore, quando egrediebantur
de terra aegypti, submerso pharaone in mari rubro, arripuit maria tympanum, et praecinens
ceteris, exsultauit et dixit: cantemus domino, gloriose enim magnificatus est; equum et
ascensorem deiecit in mare. sic nunc quoque secundum dies iuuentutis suae, siue
adolescentiae suae, quando egressa est de terra aegypti, canat atque laetetur, et regnum christi
ac suam salutem inter ecclesiae choros concinat. et animaduerte quod quando eximus de
aegypto, et ad meliora transimus, dicamur ascendere, quia hierusalem in montibus sita est, de
qua qui in hiericho descendere uoluerat, uulneratus est. ad eos autem qui aegypti, id est
saeculi huius, quaerunt auxilia, dicitur: uae qui descendunt in aegyptum propter auxilium.
interpretatio aquilae et theodotionis, e quibus alter hupakousei~g posuit, id est audiet, alter
apokrithêsetai~g, id est respondebit, nobis cum facit, quod praecinentibus aliis, alii
respondeant concinentes. humiliabitur autem et affligetur, quod lxx et symmachus
transtulerunt, non conuenit tempori laetitiae, nisi forte imitabitur paulum, qui postquam
uocatus est apostolus, plangit antiqua peccata, et se dicit indignum uocatione apostoli, quia
persecutus sit ecclesiam dei; ut humiliatio et afflictio in conscientia praeteriti uulneris, non in
dolore malorum praesentium accipiatur. et erit in die illa, ait dominus, uocabit me uir meus et
non uocabit me ultra baalim; et auferam nomina baalim de ore eius et non recordabitur ultra
nominis eorum. lxx similiter. primum omni asiae regnasse ninum, beli filium, omnes et
graecae et barbarae narrant historiae; qui apud assyrios ninum sui nominis condidit ciuitatem,
quam hebraei uocant niniuen. huius uxor semiramis, de qua multa et miranda referuntur,
muros babylonis exstruxit. de qua insignis poeta testatur dicens: quam dicitur olim coctilibus
maris cinxisse semiramis urbem. hic aduersus zoroastrem magnum, regem bactrianorum, forti
certamine dimicauit; et in tantam peruenit gloriam, ut patrem suum belum referret in deum,
qui hebraice dicitur bel et in multis prophetis, maxime que in daniele iuxta theodotionem, sub
idolo babylonis, hoc appellatur nomine. hunc sidonii et phoenices appellant baal; eadem enim
inter beth et lamed litteras consonantes, ain uocalis littera ponitur, quae iuxta linguae illius
proprietatem nunc beel, nunc baal legitur. unde et dido sidonia regii generis, cum aeneam
suscepisset hospitio, hac patera ioui uina delibat, qua belus et omnes a belo soliti. didicimus
exordium daemonis, immo hominis in daemonem consecrati; omnia enim idola ex
mortuorum errore creuerunt. audiamus cetera: lingua hebraea et syra baal interpretatur
echôn~g, id est habens. si uoluerimus dicere: habens me, dicamus baali; et apud utramque
gentem uxores uiros suos uocant baali, id est uir meus, quod intellegitur: habens me; et est
sensus: qui me habet in coniugio. eadem hebraeorum lingua uocatur uir is, unde et uxor quae
de uiro sumpta est, in genesi appellatur issa, quasi a uiro: uirago. quod ergo dicit deus, hoc
est: cum utroque sermone, hoc est issi et baali appellatur uir meus, siue maritus meus, tantum
odi idolorum nomina, ut etiam quod bene dici potest, propter ambiguitatem et uerbi
similitudinem, nequaquam uelim dici, sed appellari me issi, magis quam baali, ne dum aliud
loquitur, alterius recordetur, et uirum nominans, idolum cogitet. ignosce obscuritati quae
tribus nascitur modis: aut rerum difficultate, aut magistri imperitia, aut discentis nimia
tarditate. neque enim hebraeum prophetam edisserens, oratoriis debeo declamatiunculis
ludere, et in narrationibus atque epilogis asiatico more cantare, sed auxilio orationum tuarum,
et incredibili discendi studio, aperire quae clausa sunt. denique aquila diligens et curiosus
interpres: uocabit, inquit, me uir meus, et non uocabit me ultra habens me, id est baal. et
percutiam eis foedus in die illa cum bestia agri, et cum uolucre caeli, et cum reptili terrae; et
arcum, et gladium, et bellum conteram de terra; et dormire eos faciam fiducialiter. lxx: et
disponam eis testamentum in die illa cum bestiis agri, et cum uolatilibus caeli, et cum
reptilibus terrae; et arcum, et gladium, et bellum conteram de terra; et habitare eos faciam in
spe. quando omnia religionis aduersae uocabula fuerint ablata de populo dominum confitente,
et uocauerit me, inquit, uir meus, et nequaquam baali, id est idolum meum, tunc percutiam eis
foedus atque concordiam cum bestiis agri, et uolucribus caeli, et reptilibus terrae. de hoc
tempore et esaias loquitur: habitabit lupus cum agno; et pardus cum haedo accubabit. uitulus,
et leo, et ouis simul morabuntur, et puer paruulus minabit eos. uitulus et ursus pascentur, et
simul requiescent catuli eorum; et leo quasi bos comedet paleas, nequaquam carnem
sanguinem que desiderans, sed mundis ac simplicibus uescens cibis. quando petro, ut
cornelium susciperet ex nationibus, reuelatum iussum que est ut comederet omnes bestias, et
nihil immundum esse cognosceret, quod cum gratiarum actione perciperetur, super quibus
audit postea: quod deus mundauit, tu commune ne dixeris. ergo in aduentu domini saluatoris,
post resurrectionis eius triumphos, et ascensum ad patrem, duo parietes angulari lapide
copulati sunt ab eo, qui fecit utrumque unum. et uocauit eam quae dicebatur absque
misericordia, misericordiam consecutam; et eum qui dicebatur non populus meus, populum
suum; pacatis que omnibus, arcus et gladius conteretur et bellum. non enim erunt necessaria
instrumenta pugnantium, cum qui pugnent, defuerint. iungetur israel gentibus, et implebitur
illud deuteronomii: laetamini gentes cum populo eius. notus enim in iudaea deus, in israel
magnum nomen eius.
et: factus est in pace locus eius et habitatio eius in sion, hoc est, in ecclesia, in qua confregit
potentias arcum, scutum, gladium et bellum, quibus fractis atque contritis, dormient credentes
fiducialiter, et sub uno pastore requiescent. siue sperabunt, in his quae oculus non uidit, et
auris non audiuit, et in cor hominis non ascenderunt, quae praeparauit deus diligentibus se. et
sponsabo te mihi in sempiternum; et sponsabo te mihi in iustitia et iudicio, et in misericordia
et in miserationibus; et sponsabo te mihi in fide, et scies quia ego dominus. lxx similiter. o
quanta clementia dei! meretrix quae cum multis amatoribus fornicata est, et ob crimen bestiis
tradita, postquam reuertitur ad uirum, nequaquam reconciliari ei dicitur, sed despondi. et uide
quid sit inter dei coniunctionem et hominum: homo cum uxorem acceperit, de uirgine
mulierem facit, id est: non uirginem; deus etiam meretricibus copulatus, eas mutat in uirgines,
iuxta illud quod adulterae dicitur per hieremiam: non ut dominum me inuocasti, aut patrem,
aut principem uirginitatis tuae. unde et apostolus post fornicationem et idolorum cultum
credentibus corinthiis loquitur: despondi enim uos uni uiro uirginem castam exhibere christo.
quaerimus cur tertio desponsionis nomen repetierit. promo enim ait: sponsabo te mihi in
sempiternum. secundo: sponsabo te mihi in iustitia et iudicio, et in misericordia et in
miserationibus. nec hoc fine contentus iungit et tertium: sponsabo te mihi in fide, et scies quia
ego dominus. primo despondit eam in abraham, siue in aegypto, ut uxorem habeat
sempiternam. secundo in monte sinai dans ei in sponsalibus legis iustitiam atque iudicium, et
iunctam legi misericordiam, ut quando peccauerit, tradatur captiuitati; cum egerit
paenitentiam, reuocetur in patriam, et misericordiam consequatur. de his sponsalibus in
diuersis locis psalmista decantat: misericordiam et iudicium cantabo tibi, domine. et:
misericordia et ueritas obuiauerunt sibi, et iustitia et pax deosculatae sunt se. quos duos
calices in septuagesimo quarto psalmo legimus: calix in manu domini uini meri plenus mixto,
et inclinauit ex hoc in illum; de iustitiae calice in calicem misericordiae, et rursum de calice
misericordiae in calicem iustitiae. si iniquitates, inquit, obseruaueris, domine, domine, quis
sustinebit? quia apud te propitiatio est. ista igitur meretrix quae primum uoto sponsi in
aeternos fuerat iuncta complexus, ut numquam a uinculo recederet maritali, quia recessit et in
aegypto fornicata est, rursum per legitima assumitur; quam quia praeteriit, prophetis quasi
sponsi sodalibus, qui ad se missi fuerant, interfectis, nouissime uenit dei filius, dominus
iesus; quo crucifixo, et a mortuis resurgente, desponsatur nequaquam in legis iustitia, sed in
fide et gratia euangelii, ut cum cognouerit unigenitum, cognoscat et patrem. dicit enim ipse ad
philippum: tanto tempore uobis cum sum et non cognouistis me? philippe, qui uidit me, uidit
et patrem meum; quomodo tu dicis: ostende nobis patrem? non credis quia ego in patre, et
pater in me est? qui in fide fuerit desponsatus et crediderit euangelio, statim sciet, quia ipse
sit deus, credens in eum quem prius negauerat. et erit in illa die: exaudiam, dicit dominus,
exaudiam caelos, et illi exaudient terram, et terra exaudiet triticum et uinum et oleum, et haec
exaudient iezrael, et seminabo eam mihi in terra, et miserebor eius quae fuit absque
misericordia; et dicam non populo meo: populus meus tu; et ipse dicet: deus meus tu. lxx: et
erit in die illa, dicit dominus: exaudiam caelum, et caelum exaudiet terram, et terra exaudiet
frumentum, uinum, et oleum, et haec exaudient iezrael, et seminabo eam mihi super terram, et
diligam non dilectam; et dicam non populo meo: populus meus es tu; et ipse dicet: dominus
deus meus es tu. in die illa et in illo tempore, quando te mihi in fide despondero, et
cognoueris quod ego sim dominus, exaudiam caelos, qui enarrant gloriam dei, et caeli
exaudient terram, ut eam caelesti pluuia irrigent, et terra, de qua orta est ueritas, et in cuius
agrum paterfamilias egreditur, ut seminet semen suum, exaudiet triticum et uinum et oleum,
de quibus supra diximus, et haec omnia exaudient iezrael, id est semen dei, ut intellegatur
omnium rerum abundantia atque fertilitas ob dei semen, qui christus est, condonari, quod dei
semen seminatur in terra, in multiplices fructus afferat, centenarium, sexagenarium, et
tricenarium. et illa meretrix quae deo fuerat copulata, et tres ediderat liberos, duos masculos,
et unam feminam; primum iezrael, secundam, absque misericordia; tertium, non populus
meus, uideat propter semen dei mutata esse rerum uocabula, et in christi fide consecutam
misericordiam, quae absque misericordia erat, et uocatum populum dei, qui prius non populus
uocabatur. ex quo prospicimus posse uniuersa quae dicta sunt referri et ad decem tribus, quae
israel uocantur, et sub nomine meretricis tres liberos ediderunt, et ad omnem gentem iudaici
nominis. de exauditione caeli et terrae, et frumenti, uini et olei, et iezrael, hoc quidam
sentiunt, quod postquam christus aduenerit, omnia suo currant ordine, et utilitati hominum
cuncta deseruiat creatura, ut ab initio condita est. quae omnia iudaei et nostri iudaizantes post
antichristum in fine mundi corporaliter praestolantur.
Caput 3
et dixit dominus ad me: adhuc uade, dilige mulierem dilectam amico et adulteram, sicut
diligit dominus filios israel; et ipsi respectant ad deos alienos, et diligunt uinacia uuarum. lxx:
et dixit dominus ad me: adhuc uade et dilige mulierem diligentem mala et adulteram, sicut
diligit dominus filios israel; et ipsi respiciunt ad deos alienos, et amant coctiones cum
uinaciis. priori mulieri in typum decem tribuum, uel totius iudaici populi fornicantis, propheta
coniungitur, et abiectos filios atque cruciatos tandem recepit in salutem; hic iubetur ut adhuc
diligat adulteram mulierem. quando dicitur: adhuc, ostendit quod prius amauerit fornicariam,
quae adultera, uel diligat illa mala, uel diligatur ab amico et proximo? re enim uerbum
hebraicum, uel malum legitur, uel amicus. et ne putemus dilectionem prophetae in adulteram,
aliud quid significare quam dei dilectionem in filios israel, intulit: sicut diligit dominus filios
israel. ergo quod propheta diligit adulteram, et tamen non ei matrimonio copulatur, nec
fornicatione coniungitur, sed tantum diligit delinquentem, typus dei est, qui filios israel
pessimos diligit, qui cum diligantur a domino, ad deos alienos idola que respiciunt, et diligunt
uinacia uuarum quae uinum non habent; et pristinam gratiam perdiderunt, sicut daemones qui
lapsi de propria dignitate, et nihil antiquae gratiae possidentes, aridi sunt, et ueteri siccitate
marcentes. unde pro uinaciis, quod hebraice dicitur: asise, aquila interpretatus est palaia~g, id
est uetera. symmachus akarpous~g, id est steriles; et non solum uinacia sunt, sed et uetera
uinacia, ut antiqua delicta testentur. et notandum quia haec adultera praesens tempus
significet iudaeorum, qui absque deo et notitia scripturarum et gratia spiritus sancti diligantur
a domino, qui omnium expectat salutem et aperit ianuam paenitentibus, nihilominus illi res
inutiles ament, traditiones hominum et deuterôseôn~g somnia diligentes, et nequaquam uuas
habeant et uinum et plena musto torcularia, sed uetera uinacia quae proiecta sunt. pro
pemmatibus, quae lxx transtulerunt, et comeduntur cum uuis passis, siue uinaciis, placentas
latine possumus dicere, uel crustula, quae idolis offeruntur, et graece appellantur popana~g.
filii autem israel in praesenti loco duodecim uocantur tribus; supra uero decem quae erant in
samaria, et possidebant metropolim, iezrael. et fodi eam mihi quindecim argenteis, et coro
hordei, et dimidio coro hordei, et dixi ad eam. dies multos exspectabis me: non fornicaberis,
et non eris uiro; sed et ego exspectabo te. lxx: et conduxi eam mihi quindecim argenteis, et
gomor hordei, et nebel uini, et dixi ad eam. dies multos sedebis mihi: et non fornicaberis, nec
eris alteri uiro, et ego tibi. pro gomor in hebraeo scriptum est omer quod omnes interpretes,
absque lxx, corum interpretati sunt, sermone graeco et maxime palaestino, qui habet triginta
modios. et pro nebel uini, in hebraico legitur lethech seorim, quod ceteri interpretes
hêmikoron~g hordei transtulerunt, id est: mediam partem cori, quae facit quindecim modios.
quod que iungitur in editione uulgata: neque eris alteri uiro; alteri in hebraico non habetur,
sed simpliciter non eris uiro. si enim ponatur alteri, subauditur quod a suo habeatur uiro.
quando autem absolute dicitur non eris uiro, intellegimus quod nulli iungatur omnino, et
absque coitu maritali sit. mensuram autem cori in hiezechiel legimus, et in euangelio. fodit
itaque eam sibi, id est adulteram, siue conduxit quindecim argenteis. quando dicit: fodi,
ostendit uineam, quae a domino plantata est, et in multis locis ponitur scripturarum,
significans populum iudaeorum. sin autem legerimus: conduxi, adulterae pretium est, non ut
cum propheta dormiat, sed ut contenta mercede sua, adulterare desistat, nec passim ceteris
copuletur. foditur etiam, siue conducitur coro hordei, et dimidio coro hordei, id est
quadraginta et quinque modiis, et hac mercede suscepta, audiuit a domino: dies multos
exspectabis me siue sedebis mihi; non fornicaberis nec eris uiro. hoc est, nec aliis amatoribus
turpiter te prostitues, nec mihi, uiro a quo conducta es, legitime coniungeris. ac ne putes
factam tibi iniuriam, quia dixi: exspectabis me, par pari referam: et ego exspectabo te. quinta
decima die illucescente mensis nisan percussa sunt aegyptiorum primogenita, et israelis de
aegypto eductus est populus, ac in seruitutem dei mercede conductus. denique pro
primogenitis israel quae plagam non sensere communem, quinos argenti accipe siclos, qui in
templi donaria conferuntur.
plerique nostrorum quindecim, ad hebdomadam legis, et ogdoadem referunt euangelii, id est
sabbatum et diem resurrectionis, quo exercetur circumcisio spiritalis. sed quomodo adultera
mulier quae hordeo pascitur, et a uiro aliena est, utrumque in mercedem accipiat
testamentum, explanare non possunt. quadragesimo quinto die ad montem sina peruenit
populus, statim que altero praecipitur die ut sanctificentur a coitu feminarum per triduum, et
se praeparent ad accipiendam legem dei. transactis tribus diebus, quinquagesimo die moyses
ascendit in montem, et decalogum suscepit. sedit itaque populus iudaeorum, qui quondam
quindecim argenteis, et quadraginta quinque hordei modiis est conductus, post aduentum
domini saluatoris, et uiri sui exspectat aduentum. quod que dicit: non fornicaberis, et non eris
uiro, hoc ostendit quod interim modo idolis non seruiat, nec tamen habeat deum, sed et
amatoribus et uiro spoliata sit. et quia uirum non habet, non uescitur cibo hominum, frumento
et legumine, sed hordeo irrationabilium iumentorum, ruminans uilitatem litterae quae
interficit, et non habens spiritum uiuificantem. unde et in lege mulier, quae a marito accusatur
adulterii, in potione elegmou~g, id est conuictionis, quando arguitur in peccato, farinam
accipit hordei, quae enim imitata est equos et mulos, quibus non est intellegentia, equorum et
mulorum sustentatur alimentis. pro dimidio coro hordei, nebel uini septuaginta transtulerunt,
quod penitus in hebraico non habetur. et possumus dicere: in nebel uini, hoc est mensura
plena atque profecta, inebriatam adulteram, et plenis afflictam esse suppliciis. unde et
hieremias calicem meri propinat gentibus et hierusalem. uir quoque sedet, immo exspectat
adulterae paenitentiam, ut postquam plenitudo gentium subintrauerit et nouissimus crediderit
israel, ita ut qui fuerat caput, uertatur in caudam, et cauda uertatur in caput, tunc fiat unus
grex et unus pastor. quia dies multos sedebunt filii israel sine rege, et sine principe et sine
sacrificio, et sine altari, et sine ephod, et sine teraphim. et post haec reuertentur filii israel et
quaerent dominum deum suum et dauid regem suum; et pauebunt ad dominum et ad bonum
eius in nouissimo dierum. lxx: quia diebus multis sedebunt filii israel sine rege, sine principe,
sine sacrificio, sine altari, sine sacerdotio, sine manifestationibus, - quae graece dicuntur
dêloi~g -. et post haec reuertentur filii israel, et quaerent dominum deum suum, et dauid
regem suum; et stupebunt ad dominum, et super bonis eius in nouissimo die. pro ephod et
theraphim septuaginta hierateian~g, id est sacerdotium, et dêlous~g, id est, manifestationes
interpretati sunt. sciendum autem, ut crebro diximus, ephod significare indumentum
sacerdotale, quod in exodo et leuitico a lxx epômis~g dicitur, id est superhumerale, ab aquila
ependuma~g, id est superindumentum. theraphim autem proprie appellatur morphômata~g, id
est figurae et simulacra, quae nos possumus in praesenti dumtaxat loco cherubim et seraphim
siue alia quae in templi ornamenta fieri iussa sunt, dicere. uerum quia septuaginta dêlous~g
interpretati sunt, pro quibus aquila phôtismous~g transtulit et haec ipsa sunt in logeiôi~g, id
est in rationali, hoc intellegimus, quae in pectore et corde pontificis alêtheia~g et
phôtismoi~g, id est ueritas debeat esse atque doctrina, ut non solum sciat rectam fidem, sed
quod nouerit, possit ore proferre. quod et apostolus paulus scribit ad titum, docens qualis
episcopus ordinandus sit: oportet enim episcopum sine crimine esse tamquam dei
dispensatorem; non superbum, non iracundum, non uinolentum, non percussorem et non
turpis lucri cupidum; sed hospitalem, benignum, sobrium, iustum, sanctum, continentem,
amplectentem eum qui secundum doctrinam est, fidelem sermonem, ut potens sit et exhortari
in doctrina sana, et eos qui contradicunt arguere. ephod ac theraphim et in iudicum libro
legimus, quae sibi fecerat leuites, qui postea cum sexcentis de tribu dan armatis profectus est.
post passionem domini saluatoris usque in praesentem diem, paulominus quadringentesimus
annus expletur, et quantum temporis resideat usque ad diem iudicii, nec angeli nouerunt, nec
filius. qui ideo ignorare se dicit, quia nobis non expedit discere. hi sunt ergo multi dies,
quibus infelix synagoga et mulier adultera hordeo pascitur, et sedit contracta, quia cum
christo stare non potest. sine rege de quo locutus est pater: suscitaui regem cum iustitia. et
ipse dicit in psalmo: ego autem constitutus sum rex ab eo super sion montem sanctum eius.
sine, principe uel ipso domino saluatore, uel certe pontifice, de quo scriptum est: principi
populi tui non maledices. et sine sacrificio, et sine altari. subuerso enim templo, et incensa
hierusalem, nec sacrificium, nec sacerdotium iudaica gens exercere potest. et sine ephod et
sine teraphim, id est instrumentis sacerdotalis habitus.
de hoc rege et iacob in benedictione iudae patriarchae loquitur: non deficiet princeps ex iuda,
neque dux de femoribus eius, donec ueniat cui repositum est; et ipse erit exspectatio gentium.
ergo postquam defecit princeps ex iuda, et dux de femoribus eius, et herodes alienigena et
proselytus suscepit imperium, intellegimus uenisse cui regnum repositum est, et ipse erit
exspectatio gentium. haec est caecitas quae ex parte accidit israeli, ut subintraret plenitudo
gentium, et tunc omnis israel saluus fieret; et multo post tempore reuertentur, et quaerent
dominum deum suum, et dauid regem suum, qui de dauid stirpe generatus est, et interpretatur
fortis manu. ipse enim soluit captiuitatem populi sui, et dedit uinctis remissionem. cum que
eum uiderint filii israel, qui a suis fratribus denegatus est, in patris et in sua maiestate
regnantem, pauebunt et stupebunt ad dominum et ad bonum eius. qui bonus filius, de bono
natus est patre, siue ad bona domini, de quibus sanctus loquitur: credo uidere bona domini in
terra uiuentium; haec enim quam incolimus peccatores, terra est mortuorum. praesens
capitulum, alii iudaeorum super babylonica captiuitate interpretantur, quando septuaginta
annis desolatum est templum, et altare et uictimae ac sacerdotium non fuerunt, et postea sub
zorobabel in sedes pristinas sunt reuersi. alii, ut nos, in futurum tempus differunt, et quae sit
causa tam grandis offensae, ut tanto tempore relicti sint, maxime cum idola non colant,
praeter interfectionem saluatoris, aliam non ualent inuenire.
Caput 4
audite uerbum domini, filii israel, quia iudicium domino cum habitatoribus terrae. non est
enim ueritas, et non est misericordia, et non est scientia dei in terra; maledictum, et
mendacium, et homicidium, et furtum, et adulterium inundauerunt; et sanguis sanguinem
tetigit. lxx: audite uerbum domini, filii israel, quia iudicium domino ad habitatores terrae;
quia non est ueritas, neque misericordia, neque scientia dei super terram. maledictio, et
mendacium, et homicidium, et furtum, et adulterium effusum est super terram, et sanguinem
sanguini miscuerunt. a principio prophetae usque ad hunc locum sub meretricis descriptione
et adulterae, quarum post grauissimas poenas et relictionem longissimam, postea fit in
pristinum, uel in meliorem statum restitutio, decem tribuum, uel duarum, et in commune
omnium peccata numerantur. nunc rursum ad israel, id est decem tribus, sermo conuertitur,
exponens non frustra iratum deum tam grauia comminari et inferre supplicia; ne forsitan non
ex iudicii ueritate, sed ex potentia dei iniuste uideatur in eos qui non peccauerunt, lata
sententia. audite, inquit propheta, uerbum domini, o filii israel; quia uult dominus cum suo
populo iudicari et exponere causas indignationis suae. non est ueritas, et non est misericordia,
et non est scientia dei in terra. nec ueritas enim absque misericordia sustineri potest, et
misericordia absque ueritate efficit neglegentes; unde alterum miscetur alteri, quae qui non
habuerit, consequenter et dei notitiam non habebit. sed e contrario pro ueritate mendacium, et
pro misericordia maledictio, homicidium, furtum, adulterium. non dixit, est, sed ut delictorum
abundantiam demonstraret, intulit: redundauerunt; et pro scientia dei quae non est in terra,
sanguis sanguinem tetigit, siue sanguinem sanguini miscuerunt, ut augerent peccata peccatis,
et nouis uetera cumularent. recte autem qui habitatores sunt terrae et non incolae, ad iudicium
prouocantur, quia a facie aquilonis exardescunt mala super habitatores terrae. et in apocalypsi
ioannis uae, uae, uae dicitur super habitatores terrae. qui autem potest cum propheta dicere:
aduena sum apud te, et peregrinus, sicut omnes patres mei; et pertransit mundum istum quasi
incola et peregrinus, ueritatem sequitur et misericordiam, et scientiam dei, ne inundatione
maledicti atque mendacii, homicidii et furti, et adulterii et sanguinis opprimatur. propter hoc
lugebit terra et infirmabitur omnis qui habitat in ea; in bestia agri et in uolucre caeli, sed et
pisces maris congregabuntur. lxx: ideo lugebit terra et minuetur cum omnibus qui inhabitant
eam: cum bestiis agri, cum serpentibus terrae, et cum uolatilibus caeli, et pisces maris
deficient. quia non est ueritas, et non est misericordia, et non est scientia dei super terram; sed
e regione maledictum et mendacium, et homicidium et furtum et adulterium inundauerunt, et
sanguis sanguinem tetigit. idcirco lugebit terra cum habitatoribus suis, et infirmabitur, ut non
habeat bestias agri, et uolucres caeli, et pisces maris deficient. cum enim captiuitas decem
tribuum uenerit, habitatore sublato, bestiae quoque et uolucres caeli et pisces maris deficient,
iram que domini etiam muta elementa sentient. hoc qui non credit accidisse populo israel,
cernat illyricum, cernat thracias, macedoniam atque pannonias, omnem que terram, quae a
propontide et bosphoro usque ad alpes iulias tenditur, et probabit cum hominibus et animantia
cuncta deficere, quae in usus hominum a creatore prius alebantur. sin autem uoluerimus, ut
quidam putant, feros homines bestias interpretari, et uolucres caeli eos, qui eleuantur in
superbiam, et omnia humana contemnunt, et pisces, qui irrationabiles sunt, et ita bruti, ut
nihil omnino sapiant, et aerem liberum caelum que non uideant; hoc non tam irati quam
clementis est domini, ut quae mala sunt, auferantur de terra. uerumtamen unusquisque non
iudicet et non arguatur uir; populus enim tuus sicut hi qui contradicunt sacerdoti; et corrues
hodie et corruet etiam propheta te cum.
lxx: ut nullus neque iudicetur, neque arguatur quisquam; populus autem meus quasi sacerdos,
cui contradicetur, et infirmabitur per diem, et infirmabitur etiam propheta te cum. secundum
septuaginta interpretes, hoc quod posuimus, ut nullus neque iudicetur, neque arguatur
quisquam, superiori capitulo coaptandum est. sed nos hebraeos sequamur. prouocati ad
iudicium dei, filii israel qui habitabant in terra ut causas dominicae indignationis audirent, et
praeterita peccata cognoscerent, propter quae hostibus traderentur, nunc quia in sceleribus
perseuerant, et impudenti deum fronte contemnunt, audiunt: non necesse est ut ueniatis ad
iudicium, ut in uestris flagitiis arguamini; quia tantae estis impudentiae, ut nec conuicti
quidem, pudorem habeatis et uerecundiam; sed contradicatis mihi, quasi si discipulus
magistro sacerdoti plebecula contradicat, quae non habet sacerdotii dignitatem. et quia tales
estis, ideo hodie corruitis, id est, ducimini in captiuitatem, et perditis regnum israel. quod
autem dicit: hodie, aut praesens tempus significat, aut non fraude et insidiis, sed clara in
captiuitatem luce ducemini, tanta que erit uestri infirmitas, ut etiam prophetae, qui uobis
solebant prophetare mendacium, uobis cum corruant, et sentiant captiuitatem. hic prophetas,
aut pseudoprophetas debemus accipere, aut certe omnem gratiam prophetalem. quamdiu enim
non sunt captae decem tribus, habuerunt et eliam prophetam et elisaeum, et ceteros filios
prophetarum, qui prophetauerunt in samaria. unde et amos propheta qui de tribu iuda erat, et
de uiculo thecue, cogitur redire ad patriam suam, ne in alieno regno et samaria prophetaret.
nocte tacere feci matrem tuam. conticuit populus meus, eo quod non habuerit scientiam; quia
tu scientiam reppulisti, repellam te et ego, ne sacerdotio fungaris mihi; et oblita es legis dei
tui, obliuiscar filiorum tuorum et ego. lxx: nocti assimilaui matrem tuam, et assimilatus est
populus meus quasi non habens scientiam; quia tu scientiam reppulisti, et ego repellam te, ne
sacerdotio fungaris mihi; oblita es legis dei tui, et ego obliuiscar filiorum tuorum. non quod
alia mater sit, et alii filii, matrem uocat et filios; sed quomodo dominus loquens ad populum
iudaeorum dicebat: hierusalem, hierusalem, quae occidis prophetas, et lapidas eos qui ad te
missi sunt, quotiens uolui congregare filios tuos, sicut gallina congregabat pullos suos sub
alas suas, et noluisti? non quod alia esset hierusalem, et alius populus eius; neque enim
absque populo ad caementa urbis et ligna et lapides loquebatur. sic mater uocatur populi
frequentia et omnis turba nationis hebraeae ad quam loquitur; filii autem, uel singuli ex
populo, uel per oppida uillas que dispersi. in nocte ergo ac tenebris captiuitatis et maeroris et
prementis angustiae traditur israel, et populus eius aeterno silentio conticescit; quia non
habuit legis scientiam, nec dei praecepta seruauit, recepit que quod fecerat. ipsa enim dei
reppulit legem, et ideo sacerdotium perdidit in aeternum, colens uitulos aureos in dan et
bethel; et quia oblita est legis dei et penitus aegyptiis se idolis mancipauit, idcirco et dominus
obliuiscetur filiorum eius, tradens eos aeternae captiuitati: qui enim ignorat ignorabitur; et in
psalmis legimus: nescierunt neque intellexerunt, in tenebris ambulant. omnia quae dicuntur ad
decem tribus, referre possumus ad haereticos, qui reliquerunt regnum dauid et hierusalem, id
est christum et ecclesiam; et ideo aeterna nocte cooperti sunt, nec habent scientiam dei, et
repelluntur a domino ne sacerdotio fungantur ei, et filiorum quos genuerint, numquam
meminit, quia filii alieni facti sunt ei. secundum multitudinem eorum, sic peccauerunt mihi;
gloriam eorum in ignominiam commutabo, et peccata populi mei comedent et ad iniquitates
eorum subleuabunt animas eorum; et erit sicut populus, sic sacerdos; et uisitabo super eum
uias eius et cogitationes illius reddam ei. lxx: secundum multitudinem eorum, sic peccauerunt
mihi; gloriam eorum in ignominiam ponam, peccata populi mei comedent et in iniquitatibus
eorum accipient animas eorum, et erit sicut populus, sic et sacerdos; et ulciscar super eum
uias eius et cogitationes illius reddam ei. quot homines habuit israel, tot aras exstruxit
daemonibus, in quorum uictimis peccauit mihi. propterea gloriam eorum, in qua gloriabantur
sibi, et deo idola praeferebant, in ignominiam commutabo, ut et sacerdotes capiantur et
populi. siquidem sacerdotes peccata populi mei comedunt, de quibus scriptum est: qui
deuorant plebem meam, sicut escam panis. et idcirco peccata populi mei comedunt,
consentientes sceleribus delinquentium; quia cum eos peccare perspexerint, non solum non
arguunt, sed laudant atque sustollunt, et beatos praedicant. de quibus et esaias loquitur:
populus meus qui beatos uos dicunt, seducunt uos, et semitas pedum uestrorum supplantant.
de his et psalmista conclamat: quoniam laudatur peccator in desideriis animae suae, et iniquus
benedicitur. unde aequaliter et populus et sacerdos indignantis dei sententiam sustinebunt;
quia non solum opera eorum uisitabit, quae appellantur uiae, in quibus ingrediuntur; sed et
cogitationes, quibus ut talia facerent, tractauerunt. non solum enim opus, sed et cogitatio mali
operis poenas luet. de haereticis facilis intellegentia est, quod quanto plures fuerint, tanto
magis delinquunt deo, et glorientur in populis; et idcirco decipiant infelices, ut peccata populi
comedant, et per dulces sermones deuorent domus uiduarum. cum enim uiderint aliquos
delinquentes aiunt: nihil aliud quaerit deus nisi fidei ueritatem, quam si custodieritis, non
curat quid agatis.
haec enim dicentes, in iniquitatibus eorum subleuant animas eorum, ut non solum non agant
paenitentiam, nec humilientur, sed gaudeant in sceleribus suis, et erecta ceruice gradiantur.
unde et populus et sacerdos, et hi qui docti sunt, et hi qui docuerunt, pari iudicio
constringentur. et comedent et non saturabuntur; fornicati sunt et non cessauerunt, quoniam
dominum reliquerunt in non custodiendo; fornicatio et uinum et ebrietas aufert cor. populus
meus in ligno suo interrogauit et baculus eius annuntiauit ei. spiritus enim fornicationum
decipit eos et fornicati sunt a deo suo. lxx: et comedent et non implebuntur; fornicati sunt et
non dirigentur, quia dominum reliquerunt, ut non custodirent; fornicationem et uinum et
ebrietatem suscepit cor populi mei; in auguriis interrogabant et in uirgis suis annuntiabant ei;
quoniam spiritu fornicationis seducti sunt et fornicati sunt a deo suo. uoluptas insatiabilis est
et quanto magis capitur, tanto plus utentibus se famem creat. econtrario beati esurientes et
sitientes iustitiam, quoniam ipsi saturabuntur. sicut iustitia saturat, sic iniquitas substantiam
non habens uana comedentes fraude deludit, et uteros deuorantium uacuos derelinquit.
fornicati sunt et non cessauerunt. uires in fornicatione deficiunt et fornicandi desiderium non
quiescit. fornicatae sunt et decem tribus cum idolis ieroboam filii nabaoth; et reliquerunt
deum suum, non custodiendo quae iusserat, dicens: dominus deum tuum adorabis et ipsi soli
seruies, emphatikôs~g autem legendum: fornicatio et uinum et ebrietas aufert cor. sicut enim
uinum et ebrietas eum qui biberit, mentis suae impotem facit; ita fornicatio ac uoluptas
peruertit sensum, animum que debilitat; et de rationali homine brutum efficit animal, ut
ganeas et lupanaria et libidinum lustra sectetur. cum que ita cor loco suo motum fuerit, ligna
et lapides deos putat et adorat opera manuum suarum. unde et propheta quasi stupens et
mirabundus eloquitur: populus meus qui quondam meo uocabatur nomine, lignum
interrogauit et uirgas; quod genus diuinationis graeci rhabdomanteian~g uocant. unde et in
hiezechiel legimus, quod uirgas suas miscuerit nabuchodonosor contra ammon et hierusalem,
et exierit uirga contra hierusalem; causa que huius amentiae fornicationis est spiritus, qui
decepit eos, ut fornicarentur a deo suo. fornicatio autem idololatriam sonat, iuxta illud quod
in hieremia legimus: et moechabantur in ligno et lapide et dixi: postquam fornicati sunt cum
his omnibus, reuertere ad me, et non est reuersa in toto corde sed in mendacio. et rursum: me
dereliquisti et dixisti: uadam super omnem collem excelsum, et diffundar in fornicatione mea
subter omne lignum frondosum. et in psalmo dicitur: perdidisti omnes qui fornicantur abs te.
principium enim fornicationis, idolorum inuentio. numquam haeretici suo errore satiantur,
nec cessant a fornicationis turpitudine, et cotidie non custodiendo legem et scripturas sanctas,
dominum derelinquunt, insaniunt et inebriantur; et perdito mentis iudicio, adorant idola quae
de suo corde finxerunt, fornicationis que spiritu possidentur. super capita montium
sacrificabant et super colles accendebant thymiama; subtus quercum et populum et
terebinthum, quia bona erat umbra eius. lxx: super uerticem montium sacrificabant et super
colles immolabant; subter quercum et populum et nemorosas arbores, quia bonum erat
umbraculum. in lege praeceptum est ut non sacrificetur domino, nisi in loco quem elegerit
dominus deus; et iuxta altare lucus et arbores non plantentur, ne scilicet passiua et uoluptuosa
religio austeritatem unius et uerae religionis euertat. econtrario israel sacrificabat in montibus,
et in collibus adolebat incensum, excelsa terrae diligens loco, quia excelsum reliquerat deum,
et umbram quaerens perdiderat ueritatem. hoc est quod legimus de singulis regibus:
uerumtamen excelsa non abstulit; adhuc populus immolabat et sacrificabat in excelsis, quod
hebraice appellatur bama. haeretici sublimitatem sibi dogmatum repromittunt, et sacrificant
subter quercum et populum et terebinthum, infructuosas arbores, ficum et uineam non
habentes, sub quibus sanctus requiescere dicitur. assumunt autem sibi interdum terebinthum,
quae iuxta esaiam folia non habet, ut abrahae imitari uideantur exemplum. ideo fornicabuntur
filiae uestrae, et sponsae uestrae adulterae erunt. non uisitabo super filias uestras, cum fuerint
fornicatae, et super sponsas uestras cum adulterauerint; quoniam ipsi cum meretricibus
uersabantur et cum effeminatis sacrificabant; et populus non intellegens uapulabit.
lxx: propterea fornicabuntur filiae uestrae et sponsae uestrae moechabuntur, et non uisitabo
super filias uestras cum fuerint fornicatae et super sponsas uestras cum adulterauerint; quia et
ipsi cum meretricibus miscebantur et cum initiatis immolabant; et populus intellegens
adhaerebat meretrici. uerbum cadesoth, quod aquila enêllagmenôn~g, symmachus
hetairidôn~g, septuaginta tetelesmenôn~g, theodotio kechôrismenôn~g interpretati sunt, nos
effeminatos uertimus, ut sensum uerbi nostrorum auribus panderemus. hi sunt quos hodie
romae, matri, non deorum, sed daemoniorum seruientes, gallos uocant, eo quod de hac gente
romani truncatos libidine, in honorem atys, - quem eunuchum dea meretrix fecerat -,
sacerdotes illius manciparint. propterea autem gallorum gentis homines effeminantur, ut qui
urbem romanam ceperant, hac feriantur ignominia. istiusmodi idololatria erat in israel,
colentibus maxime feminis beelphegor ob obscoeni magnitudinem, quem nos priapum
possumus appellare. unde et asa rex tulit excelsa de populo, et huiuscemodi sacerdotes, et
matrem de augusto deposuit imperio, sicut scriptura testatur, dicens: et fecit asa rectum ante
conspectum domini, sicut dauid pater eius, et abstulit effeminatos de terra, purgauit que
omnes sordes idolorum, quae fecerant patres eius. insuper et maacham matrem suam amouit,
ne esset princeps in sacris priapi, et in luco eius quem consecrauerat; subuertit que specum
eius, et confregit simulacrum turpissimum, et combussit in torrente cedron. excelsa autem
non abstulit; uerumtamen cor asa perfectum erat coram deo cunctis diebus suis. sciendum
autem quod in praesenti cadesoth, meretrices, hiereias~g, id est sacerdotes, priapo mancipatas
uocet. in aliis autem locis uiros exsectos libidine, cadesim legimus, esaia dicente: et illusores
dominabuntur eorum, pro quo in hebraeo scriptum est: et cadesim dominabuntur eorum, quod
nos in effeminatos uertimus. aquila autem enêllagmenous~g interpretans, id est mutatos, hoc
ostendere uoluit, quod suam naturam mutauerint, et de uiris facti sint feminae. symmachus
hetairidas~g proprie meretrices appellauit. septuaginta tetelesmenous~g, id est consecratos et
initiatos, ut cultores idolorum ostenderent. theodotio kechôrismenous~g, id est a populo
separatos, qui sibi uidebantur a uulgo aliquid plus habere. de uerbo breuiter disseruimus, nunc
ad sensum capituli reuertamur. grandis offensa est postquam peccaueris, iram domini non
mereri. fornicatus fuerat israel a domino deo suo, et spiritu fornicationis abductus; ideo
fornicantur et filiae eius et sponsae, et absque ulla uindicta in suo scelere relinquuntur, ut
quod filii et uxor uero parenti fecerant et marito hoc in liberis suis et uxoribus sentiant, et ex
proprio dolore intellegant dolorem dei, qui intantum iratus est, ut nequaquam percutiat
delinquentes. quod et apostolus ad romanos scribens, mystico sermone testatur: dicentes enim
se esse sapientes, stulti facti sunt; et mutauerunt gloriam incorruptibilis dei in similitudinem
imaginis corruptibilis hominis, et uolucrum, et quadrupedum, et serpentum. et quia cum idolis
fuerant fornicati, tali feriuntur sententia: propter quod tradidit illos deus in desideria cordis
eorum, in immunditiam, ut contumeliis afficiant corpora sua in semetipsis, qui
commutauerunt ueritatem dei in mendacium; et coluerunt et seruierunt creaturae, potius quam
creatori, qui est benedictus in saecula. amen. ut autem sciamus, uisitationem quasi
uulneratorum et languentium ideo inferri a deo, ut ueluti cauterio et amarissimis potionibus
recipiant sanitatem, et morbis careant, per prophetam loquentem audiamus deum: uisitabo in
uirga iniquitates eorum, et in uerberibus peccata eorum; misericordiam autem meam non
dispergam ab eo. qui igitur amatur, corripitur; qui neglegitur, suis peccatis dimittitur. tantus
que numerus fuit fornicatorum in israel, ut esset ultio, desperans emendationem. quid enim
turpius quam uiros meretricum cultui copulari, et cum effeminatis immolare hostias libidinis
suae? quod autem iungit: populus non intellegens uapulabit; pro quo septuaginta
transtulerunt: et populus intellegens adhaerebat meretrici; hoc significat quod uapulet israel in
captiuitate et diuersis afficiatur plagis, ut per dolorem recipiat disciplinam. de haereticis
facilis intellegentia est, quod filiae eorum fornicentur et sponsae, id est animae quas in errore
genuerunt, et suis dogmatibus desponsarunt. istiusmodi indigni sunt correptione dei; quoniam
omnis eorum cultus fornicatio est, et turpes turpibus commiscentur, et propterea uapulabunt,
ut aliquando per plagas intellegant quem requirant deum. quando uideris peccatorem diuitiis
affluere, iactare se potentia, sanitate gaudere, delectari coniuge, corona circumdari liberorum,
et impleri illud quod scriptum est: in labore hominum non sunt, et cum hominibus non
flagellabuntur, dicito in illo comminationem prophetae esse completam: non uisitabo super
filias uestras cum fuerint fornicatae et super sponsas uestras cum adulterauerint. si fornicaris
tu, israel, non delinquat saltim iuda et nolite ingredi in galgala; et ne ascenderitis in bethauen,
neque iuraueritis, uiuit dominus; quoniam sicut uacca lasciuiens declinauit, israel. nunc pascit
eos dominus quasi agnum in latitudine. lxx: tu autem, israel, ne ignores, et iuda, nolite ingredi
in galgala, ne ascendatis in domum ôn~g, et ne iuretis, uiuit dominus; quoniam sicut uacca
asylo percussa insaniuit israel.
nunc pascit eos dominus sicut agnum in spatioso. pro domo ôn~g in quibusdam
exemplaribus, et maxime in theodotione legitur domus iniquitatis, quod aquila et symmachus
interpretati sunt domum anôphelous~g, id est inutilem, quae nihil prosit, et alio uerbo idolum
nuncupetur. est autem bethel, et quae prius uocabatur domus dei; postquam uituli in ea positi
sunt, appellata est bethauen, id est domus inutilis et domus idoli, quod nos ut in hebraeo
legitur expressimus. uidetur autem mihi idcirco et populus israel in solitudine fecisse sibi
caput uituli, quod coleret, et ieroboam filius nabath uitulos aureos fabricatus, ut quod in
aegypto didicerant apin~g et mneuin~g, qui sub figura boum coluntur, esse deos, hoc in sua
superstitione seruarent. dicamus sensum capituli: si semel, o israel, errore deceptus es, et te
cum meretricibus miscuisti, ita ut quicumque impleuerit manum uel suam uel regis, offerendo
et dando ei munera, sacerdos fieret excelsorum; saltim tu, iuda, qui possides hierusalem, et
habes ex lege leuitas, et exerces templi caeremonias, non debes sororis quondam tuae oollae
in fornicatione exempla sectari, et cum deo idola colere. ne ingrediaris galgala, de qua in hoc
eodem propheta legimus: omnis malitia eorum in galgalis, in qua saul unctus in regem est; in
qua exiens populus de deserto, primum castrametatus, secunda circumcisione purgatus est. ex
quo tempore religionis aduersae in loco celebri error inoleuit. et ne ascendas in bethauen, id
est, quae quondam uocabatur bethel, quia postquam aurei ibi uituli positi sunt ab ieroboam
filio nabath, non domus dei appellatur, sed domus idoli. pro qua miror cur septuaginta
domum ôn~g interpretati sunt, nisi forte errore consueto pro iod littera media, quae aleph et
nun litteris ex utraque parte uallatur, uau, quae sola differt magnitudine, putauerunt. neque
iuraueritis, uiuit dominus. nolo enim per os uestrum nominis mei fieri mentionem, quod
idolorum recordatione pollutum est. sicut enim uacca lasciuiens et abiciens legis iugum; ita
israel, id est decem tribus, declinauit a domini seruitute. pro lasciuiente uacca, septuaginta
transtulerunt paroistrôsan~g, quae oestro, asylo que percussa sit, quem uulgo tabanum uocant.
de quo et uirgilius in tertio georgicorum libro refert: cui nomen asilo romanum est, oestrum
graii uertere uocantes, asper acerba sonans; quo tota exterrita siluis diffugiunt armenta; furit
mugitibus aether concussus, siluae que et sicci ripa tanagri, quia ergo insaniuit israel, et
percussus fornicationis spiritu, incredibili furore bacchatus est, ideo non multo post tempore,
sed dum propheto, dum spiritus hos regit artus, pascit eos dominus quasi agnum in latitudine.
quia metaphoram a uacca lasciuiente, siue oestro ceperat, seruat in reliquis, ut captiuitatem in
assyrios, et in latissima medorum terra dispersionem populi israel quasi in campo latissimo et
in spatiosa terra gregis et agnorum pasturam uocet. super haereticis prona intellegentia est ad
quos, uel de quibus dicitur: si semel fornicaris, haeretice, saltim tu, ecclesiastice, ne
delinquas, nec ingrediaris galgala, haereticorum conciliabula, ubi peccata omnium reuelantur,
et instar porcorum uolutantur in ceno. nec te ascendere putes ad superbas et arrogantes
falsorum dogmatum fictiones. non est enim ibi domus dei, sed domus idoli. nec iuraueris per
nomen christi, cuius maiestatem miscendo idolis polluisti. sicut enim uacca percussa asilo,
percussi sunt haeretici ardentibus diaboli sagittis, et legis notitiam reliquerunt; ideo pascentur
in lata et in spatiosa uia, quae ducit ad mortem, et patientia domini boni pastoris eos nutriet
ad interitum. particeps idolorum ephraim, dimitte eum, separatum est conuiuium eorum;
fornicatione fornicati sunt, dilexerunt afferre ignominiam protectores eius, ligauit spiritus
eum in alis suis; et confundentur a sacrificiis suis. lxx: particeps idolorum ephraim posuit sibi
scandala, prouocauit chananaeos, fornicantes fornicati sunt, dilexerunt ignominiam ex
fremitu; turbo spiritus tu es in alis eius et confundentur ex altaribus suis. ephraim de qua tribu
ieroboam filius nabath, qui primus aureos uitulos in bethel dan que constituit, rex est decem
tribuum. o igitur iuda, cui supra dixi, si fornicatur israel, non delinquat saltim iuda, audi
consilium meum, prophetae uerba non spernas; quia ephraim idolorum semel amicus et
particeps est, dimitte eum, ne sequaris impietatem eius, cuius cultus et religio et cibus a tuo
conuiuio separatus est. illi enim semel idolis seruiunt, et daemonibus immolant, et cotidie
fornicantur; et diligunt fornicationem suam; immo principes et protectores eius, id est reges,
dilexerunt ignominiam afferre populo, id est uitio principum; infelix populus suscepit cultum
idolorum quorum immundus spiritus ligauit israelem in alis suis, et eum libere uolitare non
patitur. confundentur igitur in sacrificiis suis, et ignominiam principum in sua confusione
suscipient. symmachus pro eo quod nos interpretati sumus: ligauit spiritus eum in alis suis,
hoc modo uertit in graecum, uelut si quis liget uentum in alis uenti, ut scilicet et principes et
populum, immo et daemones et israelem, uanos uanis, et inanibus inanes asserat copulatos.
uentus enim et spiritus apud hebraeos uno uerbo appellantur rua, id quod septuaginta
posuerunt: prouocauit chananaeos; in hebraico non habetur. tamen sic interpretari potest, ut
dicamus, tantum studium habuisse israelem in idolorum cultu, ut non imitatus sit chananaeos,
id est ethnicos; sed ad imitationem sui eos prouocarit erroris. hoc ipsum et ad haereticos
referri potest, et dicitur ad iudam, id est ad uirum ecclesiasticum, quia ephraim qui
interpretatur karpophoros~g, falsam sibi doctrinae ubertatem et frugifera dogmata promittit,
et semel amicus est daemonum, dimitte eum atque contemne, praesertim cum sacrificia
eorum a tuis sint sacrificiis separata.
hoc est enim quod dicit: separatum est conuiuium eorum, semel fornicati sunt, et principes
eorum infelicem populum deceperunt; et pro dei cultu imbuerunt eos idolorum ignominiam,
et ligauit eos diaboli spiritus in alis suis, qui circumferuntur omni uento doctrinae; et stabili in
ecclesia pede permanere non possunt. qui uere in suis sacrificiis confundentur, quia panis
eorum panis luctus est. quod que dicitur: prouocauit chananaeos, eodem sensu referri potest et
ad haereticos, quod tam spurca plerique haereticorum et nefanda confinxerint, habeant que
immunda sacrificia, ut idololatria inferior sit. uel certe quia chananaeus interpretatur
negotiator siue metabolos~g, id est translator omnes qui domum patris faciunt domum
negotiationis, et lucra quaerunt de populis, et ecclesiae ueritatem transferunt in mendacium,
chananaei appellandi sunt.
Caput 5
audite haec, sacerdotes, et attendite, domus israel, et domus regis; auribus auscultate, quia
uobis iudicium est; quoniam laqueus facti estis speculationi et rete expansum super thabor, et
uictimas declinastis in profundum. lxx: audite haec, sacerdotes, et attendite domus israel, et
domus regis; auribus percipite, ad uos enim est iudicium, quia laqueus facti estis speculationi;
et sicut rete expansum super itabyrium, quod qui capiunt, uenationem confixerunt. sacerdotes
decem tribuum ad iudicium uocantur, et reges, non quo sacerdotes sint de tribu leui, sed quo
sacerdotes uocentur a populo. unde et sacerdotes baal, et prophetae quadringenti quinquaginta
quos interfecit elias, et postea iehu filius namsi, praesente ionadab filio rechab, appellati sunt
sacerdotes; sed et israel, id est populus uocatur ad iudicium; et nullus excipitur, ut et
sacerdotes et populus et reges, qui induxerant populum, et constituerant sacerdotes, simul
audiant quae fecerint, et cur tradantur inimicis. speculatores, inquit, uos posui, et principes in
populo, et in excelso dignitatis culmine constitutos, ut populum regeretis errantem. uos autem
facti estis laqueus, et non tam speculatores et principes, quam uenatores appellandi.
expanditis enim rete super montem thabor, quem septuaginta itaburion~g transtulerunt, hanc
habentes consuetudinem, ut hebraea nomina graeco sermone declinent; sicut edom, hoc est
esau, et seir, semper idumaeam interpretantur. est autem thabor mons in galilaea, situs in
campestribus, rotundus atque sublimis, et ex omni parte finitur aequaliter. de hoc monte et in
psalmo legimus: thabor et hermon in nomine tuo exsultabunt. hunc montem et in hieremia
septuaginta itabyrium transtulerunt, in quo aues laqueis capi solent. et uictimas, inquit,
declinastis in profundum, ut nullus ageret paenitentiam, nec occisus eleuaret caput.
prohibuerunt et reges et sacerdotes ire populum ad templum hierusalem; idcirco in profundum
uictimas declinasse dicuntur. iuxta tropologiam, accusatur populus ne se alienum arbitretur a
crimine, si inductus sit a regibus et sacerdotibus, quos haereticorum principes intellegimus.
ipsi quoque principes accusantur, quod quasi laqueus ceperint populum, et positi speculatores
in ecclesia, eos duxerint in errorem. et in monte thabor excelso atque pulcherrimo, qui
interpretatur ueniens lumen, insidias posuerunt, ut deceptos quosque pertraherent in
profundum, et immolarent daemonibus; et in barathrum uictimas declinarent, ne aliquando
resipiscerent, ne domum dei ecclesiam suspicarent. quidam thabor interpretari putant lacum,
id est cisternam; et praesenti sensui conuenire quod haeretici foderint lacum et inciderint in
foueam quam fecerunt. et ego eruditor omnium eorum. ego scio ephraim et israel non est
absconditus a me, quia nunc fornicatus est ephraim, contaminatus est israel; non dabunt
cogitationes suas, ut reuertantur ad deum suum, quia spiritus fornicationum in medio eorum,
et dominum non cognouerunt. lxx: ego enim magister uester. ego cognoui ephraim et israel
non recessit a me, quia nunc fornicatus est ephraim, commaculatus est israel; non dederunt
cogitationes suas ut reuertantur ad dominum deum suum, quia spiritus fornicationis est in eis.
dominum autem non cognouerunt. o sacerdotes et reges, qui meum populum decepistis; et tu,
popule, qui deceptus es, tam grauiter deliquistis, ut non solum occideritis uictimas, sed in
profundum eas miseritis inferni. nolite arbitrari magnitudine sceleris uos a me penitus
recessisse. ego sum magister uester, immo eruditor, qui emendare cupiam, non punire; et
saluare, non perdere. ego, inquit, scio ephraim, id est ieroboam, a quo seductus est populus, et
omnes reges qui eum et dignitate et scelere sunt secuti; et israel non est absconditus a me, id
est decem tribuum populus, quia fornicante rege, contaminatus est israel. rex primo cepit a
dei cultu fornicari, uitulos aureos cupiens adorare, et uolens secutus est populus, parem que
impietatem pari studio compleuerunt.
denique non reuertentur ad dominum, quia quod uoluerunt, inuenerunt, et spiritus
fornicationis, qui iuxta apostolum operatur in filiis diffidentiae, possidet eorum corda captiua;
idcirco illo regnante, dominum nescierunt, immo obliti sunt creatoris sui. unde et principes
dogmatum peruersorum et populum dominus non ignorat; non quo eius notitia digni sint, sed
quo nihil eum lateat eorum quae occulte faciunt, quorum alii deceperunt, alii sunt decepti. nec
dabunt cogitationes suas ut agant paenitentiam, qui semper in perditione proficiunt. spiritus
enim fornicationis quo fornicati sunt in ecclesia, et a uero matrimonio recesserunt, uersatur in
medio eorum; ideo dominum non cognouerunt. et respondebit arrogantia israel in facie eius;
et israel et ephraim ruent in iniquitate sua, ruet etiam iuda cum eis. lxx: et humiliabitur iniuria
israel in faciem eius; et israel et ephraim infirmabuntur in iniquitatibus suis, infirmabitur
etiam iudas cum eis. uerbum gaon septuaginta et symmachus interpretantur iniuriam, aquila et
theodotio superbiam. quidquid igitur fecit israel, uel superbe agens contra dominum, uel in
iniuriam creatoris idola uenerans, respondebit in facie eius ut non abeat impunitus, sed
humilietur eius contumelia; et populus et reges in iniquitate sua pariter corruant, siue
infirmentur, ut qui fortes erant in scelere, infirmi ad dominum redire cogantur. et hoc non
solum eueniet israeli et ephraim, id est decem tribubus et regibus earum, ut ducantur in
captiuitatem: sed etiam iudas, id est duae tribus quae regnabant in hierusalem, sequentur
uestigia captiuorum, ut quorum imitantur scelera, imitentur et poenam. haeretici matrem
habent iniquitatis suae superbiam, dum semper altiora se scire iactitant et in ecclesiae
contumeliam debacchantur. sed infirmabitur arrogantia eorum et populus ac magistri pariter
corruent; iudas quoque qui uidetur esse in domo dei, et in ecclesia, non mente sed corpore
commoratur; et eamdem habet cum haereticis in errore sententiam; frustra nomen
ecclesiasticum repromittit, quia et ipse cum haereticis puniendus est. manifesta transcurrimus,
ut in obscurioribus immoremur. in gregibus suis et in armentis suis uadent ad quaerendum
dominum et non inuenient; ablatus est ab eis; in domino praeuaricati sunt, quia filios alienos
genuerunt, nunc deuorabit eos mensis cum partibus suis. lxx: cum ouibus et uitulis ibunt ut
quaerant dominum et non inuenient eum; declinauit ab illis, quia dominum reliquerunt; quia
filios alienos genuerunt sibi, nunc deuorabit eos rubigo, et cleros eorum. non solum israel et
ephraim ibunt cum gregibus et armentis ad dominum requirendum, sed etiam iudas, de quo
supra scriptum est: ruet etiam iudas cum eis; hoc habentes omnes certamen, ut quem
praeuaricationibus offenderunt, hostiis placare nitantur; et non inueniunt quem requirunt, quia
a recedentibus et ipse discessit. praesertim cum et alibi loquatur: numquid manducabo carnes
taurorum aut sanguinem hircorum bibam? et iterum: non accipiam de domo tua uitulos, neque
de gregibus tuis hircos. et in esaia: holocausta arietum, et adipem agnorum, et sanguinem
hircorum atque taurorum nolo. praeuaricati sunt enim in domino; quia fornicantes cum idolis,
non deo filios, sed daemonibus genuerunt. alii putant hoc significari quod in esdra multo post
tempore dicitur, quando uxores alienigenas assumpserunt, creantes ex eis liberos, et postea
repudiare compulsi sunt. sed hic melius est alienos filios accipere, qui in idolorum errore
generati sunt, siue quos ducentes per ignem, idolis consecrarunt. quia igitur hoc fecerunt, non
multo post tempore, non annorum spatiis infinitis, et ut solitus eram prius, longe post futura
praedicere; sed nunc et in praesentiarum adueniet assyrius atque chaldaeus; et deuorabunt eos
cum partibus, siue cleris suis, id est cum possessionibus quas in diuisione terrae ad mensuram
funiculi susceperunt. pro eo quod nos diximus: deuorabit eos mensis, septuaginta rubiginem
transtulerunt; cum utique rubigo, id est erusibê~g, hasil appelletur, ut ipsi quoque dixerunt in
propheta ioel: reliquias bruchi comedit rubigo, id est hasil. mensis autem hodes dicitur;
denique aquila neomenias, id est kalendas, interpretatus est; symmachus et theodotio
mensem; et est sensus, per singulos menses hostis adueniet, et cuncta uastabit. legamus regum
et paralipomenon libros, et inueniemus sub rege phasee, qui regnabat in decem tribubus,
uenisse teglathphalasar regem assyriorum, et magnam partem populi samariae in assyrios
transtulisse, quo tempore apud graecos secundus annus primae olympiadis fuit; et apud
latinos, - necdum roma condita -, albae uicesimo anno amulius imperabat quem postea
romulus regno pepulit. haeretici suspicantur quod in sacrificiorum multitudine placent deum;
et ecclesiastici, quod eleemosynis redimant peccata, in quibus permanent; cum omne
sacrificium praeterita scelera deleat, non praesentia; ideo non inueniunt dominum, qui
aufertur a talibus, et procul recedit. isti uero praeuaricati sunt in deum, et alienos filios non
christo, sed diabolo procrearunt; ideo omni tempore maledicta sunt opera eorum et cuncta
quae faciunt, cruenti coloris rubigo populatur, quia sanguini et interfectioni proxima sunt.
rubigo autem proprie descendere dicitur in rore nocturno, ac lactantia in spicis frumenta
maculare colore minii, uel sinopidis, et congrue iuxta anagôgên~g uastat cleros haereticorum,
de quibus dicitur: cleri eorum non proderunt eis.
Liber 2
Caput 5 cont.
qui saepe nauigat, aliquando patitur tempestatem; qui uiam frequenter ingreditur, aut sustinet
latronum impetus, aut certe metuit; omni que in arte, tam gloria quam obtrectatio, secundis
aduersis que uentis oritur, dum aut amici plus merito laudant, aut inimici plus iusto detrahunt;
rarum que inuenias qui in utramque partem non fauore aut odio, sed rerum aequitate ducatur.
quod mihi in scripturarum explanatione sudanti accidere uideo.
alii enim quasi parua contemnunt, et quicquid dixerimus contracta nare despiciunt; alii odio
nominis nostri, non res, sed personas considerant; magis que aliorum silentium, quam
nostrum studium probant. sunt qui audacter nos facere asserant, quod arripuimus opus, quod
nullus ante nos latinorum temptare ausus est. quidam in eo se disertos arbitrantur et doctos, si
alieno operi detrahant, et non quid ipsi possint, sed quid nos non possimus diiudicent. tu
autem, pammachi, qui nos facere praecepisti hoc, necesse est ut fautor sis imperii tui, et
amafinios ac rabirios nostri temporis, qui de graecis bonis, latina faciunt non bona; et
homines eloquentissimos, ipsi elingues transferunt, euangelico calces pede; uiperam que et
scorpium iuxta fabulas poetarum, aduras cauterio, solea conteras; et scylleos canes ac
mortifera carmina sirenarum surda aure pertranseas; ut pariter audire et nosse ualeamus quid
uaticinetur osee propheta, in cuius explanationem secundum dictabimus librum. cum que tuo
laeter adminiculo; et in prima urbe terrarum, primum et nobilitate et religione habere me
gaudeam defensorem; tamen magis optarem illud mihi contingere, quod titus liuius scribit de
catone, cuius gloriae neque profuit quispiam laudando, nec uituperando nocuit, cum utrumque
summis praediti fecerint ingeniis. significat autem m- ciceronem et c- caesarem, quorum alter
laudes, alter uituperationes supradicti scripsit uiri. dum enim uiuimus, et in uase fragili
continemur, uidentur amicorum prodesse studia, et nocere aemulorum opprobria. postquam
autem reuersa fuerit terra in terram suam, et tam nos qui scribimus, quam eos qui de nobis
iudicant, pallida mors subtraxerit; et alia uenerit generatio, primis que cadentibus foliis uirens
silua succreuerit, tunc sine nominum dignitate, sola iudicantur ingenia; nec considerat qui
lecturus est, cuius sed quale sit quod lecturus est; siue ille episcopus, siue sit laicus, imperator
et dominus, miles et seruus; aut purpura et sericio, aut uilissimo panno iaceat; non honorum
diuersitate, sed operum merito iudicabitur. clangite buccina in gabaa, tuba in rama; ululate in
bethauen post tergum tuum beniamin; ephraim in desolatione erit in die correptionis, in
tribubus israel ostendi fidem. lxx: clangite tuba super colles, sanate super excelsa, praedicate
in domo ôn~g; mente excidit beniamin, ephraim in desolatione factus est in diebus
correptionis, in tribubus israel ostendi fidelia. ephraim et israel et iuda menses singuli siue
rubigo cum suis partibus deuorabunt. quamobrem praecipio uobis qui auditis, ut non uoce
sublimi, sed clara buccina concrepetis; claro enim auditu opus est, ut omnes audiant qui in
circuitu sunt. clangite buccina in gabaa, cuius etymologiam in colles septuaginta
transtulerunt; et tuba in rama, quae interpretatur excelsa; istae autem duae sunt in tribu
beniamin, uicinae sibi mutuo ciuitates, id est gabaa, in qua saul natus est, et rama quae est
iuxta gabaa, in septimo lapide ab hierosolymis sita; et quam rex israel occupare conatus est,
ut exitum et introitum clauderet tribui iudae. in gabaa itaque et in rama clara buccina et tuba
personate; quorum buccina pastoralis est, et cornu recuruo efficitur; unde et proprie hebraice
sophar, graece keratinê~g appellatur. tuba autem de aere efficitur, uel argento, quae in bellis
et in sollemnitatibus concrepat. super bethauen, quae quondam uocabatur bethel, et est in
tribu ephraim, in qua uitulus aureus erat, non clangore et sonitu, sed ululatu opus est, quia
uicina captiuitas est. et pulchre dixit quod bethauen post tergum sit beniamin; ubi enim tribus
finitur beniamin, haud procul in tribu ephraim, haec urbs condita est. idcirco autem dico atque
praecipio: clangite buccina in gabaa, et tuba in rama, et ululate in bethauen, quia domus regia
ephraim, siue ipse ephraim, hoc est imperium israel, iam in desolatione erit; et instat uicina
captiuitas. in die correptionis atque supplicii decem tribuum israel, ostendi mea uerba fidelia,
quae per prophetas comminatus sum; ut quod sermone praedixeram, opere comprobarem.
quidam bethauen iuxta septuaginta, qui dixerunt domus ôn~g, ciuitatem solis interpretati
sunt; et solem iustitiae christum dicentes, urbem illius ecclesiam esse uoluerunt. quod mihi
displicet; neque enim domus idoli, quam aquila interpretatus est domum inutilem, iuxta
tropologiam ad ecclesiam referri potest. sed hoc dicamus, quod haeretici qui in gabaa et rama
excelsam sibi scientiam pollicentur, iubeantur ululare in domo idoli; et non sint ante faciem
beniamin, qui interpretatur filius dexterae; sed post tergum eius, ubi oculos non habet. omnis
enim ephraim iactantia, quae interpretatur ubertas, breui in desolatione erit, et cum iudicii,
inquit, dies et tempus correptionis aduenerit, uerba mea non esse inania rebus ostendam. pro
eo quod nos transtulimus post tergum tuum beniamin, septuaginta uerterunt mente motus est
beniamin; semper ekstasin~g, id est mentis excessum. beniamin, uiro ecclesiastico
coaptantes. unde et in sexagesimo septimo psalmo dicitur: ibi beniamin adolescentulus in
mentis excessu. et in benedictionibus iacob sub persona beniamin, de qua tribu paulus
apostolus fuit, scriptum legimus. beniamin lupus rapax; mane comedet praedam et ad
uesperam dabit escam. qui enim in principio persequebatur ecclesiam, postea in toto orbe
euangelii credentibus alimenta largitus est. unde et saul qui de tribu beniamin fuit, in mentis
excessu, tota die usque ad uesperum uaticinatus est inter prophetarum chorum.
facti sunt principes iuda quasi assumentes terminum; super eos effundam quasi aquam iram
meam. lxx: facti sunt principes iuda quasi transferentes terminos; super eos effundam sicut
aquam impetum meum. ductis ephraim et israel in captiuitatem, et redacta terra eorum in
solitudinem, principes iuda qui flere debuerant, et suum populum cohortari ut recederent ab
idololatria, ne et ipsi similia sustinerent, coeperunt gaudere atque laetari, quod pateret sibi
terra eorum ad possidendum latius; et facti sunt quasi assumentes terminos israel, transeuntes
fines suos; et in locis quondam eorum regnum suum et possessionem dilatare cupientes.
quamobrem dicit dominus: et super ipsos principes iuda uenient babylonii; et ita eos quasi
aquae impetus occupabunt; non suis uiribus, sed indignatione mea. dicit quoque et ad
principes iuda, hoc est ecclesiae, quod non debeant exsultare; et haereticorum perditionem
suam salutem aestimare; sed potius plangere, quod illi perierint. unde et apostolus paulus
docet ecclesiasticos uiros, ne glorientur super fractione iudaicorum ramorum, sed potius
timeant ne et ipsi frangantur. et in alio loco: quis, ait, scandalizatur, et ego non uror? alioquin
super tales principes qui in aliorum miseriis gloriantur, idcirco se stare putant, si alii corruant,
effundet dominus quasi aquam iram suam. pro ira septuaginta horêma~g, id est impetum,
transtulerunt; et putant quidam pro benedictione accipiendum, iuxta illud quod alibi legimus:
fluminis impetus laetificat ciuitatem dei. sed rectius, - ut omnes praeter septuaginta
transtulerunt -, ira accipienda est; praesertim cum nomen effusionis et irae conueniat, dicente
propheta ad dominum: effunde super eos iram tuam et furor irae tuae comprehendat eos.
transferunt principes iuda terminos quos posuerunt patres eorum, quando immutant mendacio
ueritatem; et aliud praedicant quam ab apostolis acceperunt. calumniam patiens ephraim
fractus iudicio, quoniam coepit abire post sordem. lxx: oppressit ephraim aduersarium suum,
conculcauit iudicium, quia coepit abire post uana. si impius est ephraim, et propter
impietatem suam erit in desolationem, quomodo nunc dicitur: calumniam patiens ephraim
fractus iudicio? qui enim calumniam patitur et frangitur, iudicium eius inique opprimitur,
maxime cum causa iusta ponatur, quare sit traditus captiuitati. sequitur enim: quoniam coepit
abire post sordem, hoc est post idola quae sordibus comparantur. quod ergo dicit, hoc est:
opprimitur ephraim ab assyriis, primum a phul, deinde a teglatphalasar, postea a salmanasar;
non quo illi iusti fuerint, qui eum oppresserunt et idcirco eis traditus sit; sed quo qui quondam
fuerunt populus meus, me eos deserente traduntur ad poenas, et in hoc uidetur esse calumnia,
non deo, qui iustam infert sententiam; sed his qui tormenta sustinent, dum peioribus se
aduersariis conceduntur. reddit que causam dominus, idcirco eos in hac parte calumniam
sustinere, et tradi peioribus, et erga illos iudicium non seruari; quia coepit ephraim, id est
ieroboam, abire post idola et deum derelinquere; ipse enim aureos fabricatus est uitulos.
secundum septuaginta interpretationem, oppressit ephraim, id est ieroboam, aduersarium
suum roboam, id est tribum iuda et in eo oppressit; quia deserta hierusalem et templo,
aegyptiarum sordium simulacra sectatus est. de haereticis manifestus est sensus, quod falsis
sophismatibus suis et arte dialectica saepe opprimant ecclesiasticos; sed cum hoc fecerint non
munditiam uerae fidei, sed sordes sequantur mendacii, qui traditi diabolo et angelis eius,
uidentur sibi calumniam pati, et in se fractam esse iudicii ueritatem. aliter uastatur israel et
omnes labores eius assyrio ueniente populantur, deum que perdit praesulem, et idcirco fractus
iudicio est, quia secutus est idola. et ego quasi tinea ephraim et quasi putredo domui iuda.
lxx: et ego quasi conturbatio ephraim et quasi stimulus domui iuda. as lingua hebraea tinea
dicitur; recob putredo et caries; quorum alterum uestes, alterum ligna consumit; pro quibus
lxx tarachên~g, id est tumultum, uel conturbationem et stimulum transtulerunt. et notandum
quod tinea referatur ad ephraim, et putredo ad domum iuda. quomodo igitur tinea uestimenta
consumit, et putredo uel caries ligna (quod utrumque longo fit tempore), ita deus et decem
tribubus, et postea duabus longo tempore dans locum paenitentiae, et eos prouocans ad
salutem, thesaurizantes sibi iram in die irae, quasi tinea efficitur et putredo; non quo deus
tinea sit uel putredo, aut conturbatio uel stimulus, sed quo sustinentibus poenas haec uniuersa
uideatur. primus igitur consumptus est ephraim et israel, dein secuta est et domus iuda; non
ipse iuda, sed domus eius; alioquin reseruatur de genere iuda cui repositum fuit. et ipse erat
exspectatio gentium. punitis autem haereticis, qui intelleguntur ephraim, etiam iudas, scilicet
hi qui cum ecclesia permanent, et haereticorum uel erroribus uel uitiis continentur, simili
sententiae subiacebunt. et uidit ephraim languorem suum et iudas uinculum suum; et abiit
ephraim ad assur et misit ad regem ultorem; et ipse non poterit sanare uos nec soluere poterit
a uobis uinculum.
lxx: et uidit ephraim infirmitatem suam et iudas dolorem suum, et abiit ephraim ad assyrios,
et misit legatos ad regem iarib; et ipse non poterit liberare uos nec cessare faciet a uobis
dolorem. legatos non habetur in hebraeo. et ubi septuaginta posuerunt iarib, nos iuxta
symmachum, ultorem uertimus; nam aquila et theodotio iudicem interpretati sunt. quod autem
iarib ultorem significet et iudicem, nomen gedeonis ostendit, quem cum cultores baal
expeterent ad supplicium, eo quod lucum baal aras que euertisset, respondit pater: ulciscatur
se baal, aut iudicet eum baal, et appellatus est, inquit, ierobaal, id est: ulciscatur se baal.
intellegens itaque ephraim infirmitatem suam et iudas uinculum suum, quod cum decem
tribubus peccato fuerat colligatus, non a deo qui soluere poterat, sed a rege assyriorum
quaesiuit auxilium. legimus, quod sub rege manahen, qui decem tribubus praefuit, israel
assyriis dona transmiserit; et iudas sub rege achaz, praesidium flagitarit teglathphalasar regis
assyriorum, qui eos aduersante deo liberare non potuerunt, nec captiuitatis uinculum soluere.
possumus uinculum, pro quo in hebraeo scriptum est mezur, et aquila interpretatus est
epidesin~g siue sundesmon~g, id est colligationem siue coniurationem; et ad illud tempus
referre, quando rasin et phasee filius romeliae multa de tribu iuda hominum milia uastauerunt,
quod frustra iudas aduersus duos reges non dei, sed assyriorum auxilium flagitarit. quidam
iuxta tropologiam ephraim et iudam ad haereticos et ad uiros ecclesiasticos referunt; eo quod
et illi et iudas peccatorum uinculis colligati, iuxta illud quod scriptum est: funibus
peccatorum suorum unusquisque constringitur, miserint ad assur et ad regem ultorem, id est,
ad diabolum de quo legimus: ut destruas inimicum et ultorem. et quia non uerum uel
auxiliatorem uel iudicem deprecati sunt, idcirco permanere eos fecit in dolore languoris et in
uinculis delictorum. legi in cuiusdam commentariis regem iarib christum interpretari. et quia
sequitur: ipse non poterit sanare uos, hoc argumentatus est, quod haereticos uel ecclesiasticos
peccatores christus sanare non possit in tempore iudicii, ubi nulla est misericordia, iuxta illud
quod scriptum est: in inferno autem quis confitebitur tibi? et quod sanare uel liberare non
possit, nequaquam sua imbecillitate, sed eorum merito, qui sero auxilium postularint.
quomodo et dominus dicitur signa in patria sua facere non potuisse; et causa cur non potuerit,
exponit: quia, inquit, non credebant in eum. haec ille dixerit, nos in malam partem regem
interpretemur ultorem. pro eo quod nos exposuimus iarib, id est ultorem, alii male legunt
iarim per mem litteram, quod transfertur in siluas; unde cariath iarim, interpretatur uilla
siluarum. quoniam ego quasi leaena ephraim et quasi catulus leonis domui iuda. ego ego
capiam et uadam, tollam et non est qui eruat. uadens reuertar ad locum meum donec
deficiatis, et quaeratis faciem meam. lxx: quia ego sum quasi panther ephraim et quasi leo in
domo iuda. et ego rapiam, et uadam et tollam, et non erit qui eruat; ibo et reuertar in locum
meum donec dispereant et quaerant faciem meam. illis euntibus ad assur, et mittentibus ad
regem uindicem, uel ultorem, qui eos sanare non poterit; nec soluere uinculum colligatum,
ostendam quod me aduersante omne hominum auxilium uanum sit; ero enim quasi leaena
ephraim, et quasi catulus leonis domui iuda. pro leaena, quod hebraice dicitur sohel,
septuaginta pantherem interpretari sunt, quae graece similiter dicitur et latine, et tam nomen
bestiae quam omnis bestia accipi potest; ut quicquid saeuum in bestiis est, hoc in dei
indignatione cognoscas. nihil panthere uelocius, nihil leone fortius; in panthere uelox per
assyrios regni samariae significatur interitus; et in leone fortissimum contra hierusalem et
iudam aliquanto post tempore regnum ostenditur chaldaeorum. et quia leaenam siue
pantherem, et leonem se esse dixerat, seruat metaphoram, et dicit: ego ego capiam et uadam,
tollam et non est qui eruat. quaeritur si capiente, et tollente, et tenente deo, nullus de manibus
eius potest eripere, iuxta illud quod scriptum est: nemo potest rapere de manu patris mei
quomodo iudas de manu dei proditione sit raptus? ad quod breuiter respondebimus, nullum
posse rapere de manu dei; posse autem eum, qui tenetur, propria uoluntate de manu dei
excidere. quod que sequitur: uadens reuertar ad locum meum, locum dei, magnificentiam et
maiestatem eius debemus accipere; ut nequaquam pro dispensatione descendat ad homines,
irascatur, miseratur, obliuiscatur, fiat quasi panther, uertatur in leonem, mutetur in bestias;
sed res spernat humanas et permittat eos quos antea protegebat hostibus subiacere, ut
tabescant, et deficiant, et intereant, et postea quaerant faciem domini; et dicant: illumina
faciem tuam et salui erimus. et: ostende nobis, domine, misericordiam tuam, et salutare tuum
da nobis. haereticis quoque et ecclesiae neglegenti, deus in pantherem uertitur et leonem; et
tollet ab his praedam quam ecclesiae ante rapuerunt, ut capti saluentur qui liberi perierant; et
nequaquam habitabit in conciliabulis peruersorum, sed reuertetur ad locum suum, de quo
dicit: ego in patre et pater in me, et eos spernet atque despiciet, donec deficiant in impietate,
et quaerant eum per paenitentiam a quo fuerant derelicti. alii locum dei caelum putant; quo
offensus deus ab his qui in terra habitant reuertatur, et eos faciet disperire, qui
clementissimum dominum magnitudine peccatorum in ferarum sibi rabiem conuerterunt.
Caput 6
in tribulatione sua mane consurgent ad me; uenite et reuertamur ad dominum, quia ipse cepit
et sanabit nos; percutiet et curabit nos; uiuificabit nos post duos dies, nos in die tertio
suscitabit et uiuemus in conspectu eius; sciemus sequemur que, ut cognoscamus dominum.
lxx: in tribulatione sua mane uigilabunt ad me, dicentes: eamus et reuertamur ad dominum
deum nostrum, quia ipse uerberabit et sanabit nos; percutiet et curabit nos; sanos nos faciet
post duos dies; in tertio resurgemus et uiuemus coram eo et sciemus; persequamur, ut
cognoscamus dominum. ideo deus tradidit ephraim et iudam captiuitati, et nullus est qui de
manu eius possit eripere, et reuertetur ad locum suum donec deficiant; et quaerant faciem
eius, ut quem propitium praesentem que non senserant, iratum et absentem requirant; et in
tribulatione sua, orto eis lumine paenitentiae, mane consurgant ad eum, iuxta illud quod in
esaia legimus: in tribulatione, domini recordatus sum. et in primo graduum psalmo: ad
dominum cum tribularer clamaui, et exaudiuit me. cum que ad dominum mane surrexerint,
quid loquentur? uenite et reuertamur ad dominum. non sunt propria salute contenti, sed se
mutuo prouocant, ut reuertatur ad dominum quem reliquerant, quem propter peccata
deseruerant, a quo fuerant derelicti. quia ipse cepit et sanabit nos; qui supra dixerat: ego ego
capiam et uadam, percutiet et sanabit nos. pro eo quod nos diximus: curabit, omnes similiter
transtulerunt motôsei~g; proprie autem mota~g appellantur linteola quae inseruntur
uulneribus, ut putridas carnes comedant et extrahant purulentias, artis que medicorum est
grandia uulnera longo sanare tempore et per dolorem reddere sanitatem. percutit ergo
dominus et curat nos; quia quem diligit dominus corripit, et castigat omnem filium quem
recipit; non solum curat, sed uiuificat post dies duos et die tertio resurgens ab inferis, omne
hominum se cum suscitat genus. cum que percussos curauerit et curatos uiuificauerit, et
uiuificatos suscitauerit; tunc uiuemus in conspectu eius, qui illo absente, mortui iacebamus.
uiuemus autem in conspectu eius; sciemus eum et omni studio sectabimur, ut cognoscamus
dominum, quo tertia die resurgente, surreximus. his sermonibus explicatur illud quod saepe
iam admonuimus, et israelem et iudam, id est decem et duas tribus, tunc unum habituras esse
pastorem, et regem dauid, cum crediderint in dominum resurgentem, frustra que iudaei mille
annorum sibi somnia pollicentur cum salus uniuersorum die tertia repromissa sit, qua
dominus ab inferis resurrexit. hebraei diem secundum in aduentu christi sui interpretantur, et
diem tertium in iudicio, quando saluandi sunt. quod ut concedamus, respondeant nobis, quae
sit dies prima, hoc est primus saluatoris aduentus. et cum respondere non potuerint, inferamus
primum diem esse iuxta quod ipsi uolunt, in humilitate saluatoris aduentum, secundum in
gloria, tertium in habitu iudicantis. qui autem secundum tertium que suscipiunt, primum se
perdidisse testantur, quia secundus et tertius sine primo non potest appellari. quasi diluculum
praeparatus est egressus eius et ueniet quasi imber nobis temporaneus et serotinus terrae. lxx:
quasi mane paratum inueniemus eum et ueniet nobis quasi pluuia temporanea et serotina
terrae. uenite, inquit, et reuertamur ad dominum, quia ipse qui cepit et sanabit nos, percutiet
et curabit nos, et uiuificabit nos post dies duos et die tertio suscitabit nos ipse et non alius,
quasi mane et aurora paratus est nobis. de quo et uicesimi primi psalmi titulus est: pro
assumptione matutina; licet in hebraeo scriptum sit: pro ceruo matutino, eo quod interfecta
morte et tortuoso antiquo que serpente cupiat ad montana conscendere; et ipse tenebris
dissipatis, oritur nobis sol iustitiae, ut nostram illuminet caecitatem. et pulchre, praeparatus
est, inquit, egressus eius. de quo iuxta tropologiam in octauo decimo psalmo legimus: et ipse
tamquam sponsus egreditur de thalamo suo. qui non solum mane uocatur, et aurora, et
diluculum; sed ueniet nobis quasi imber temporaneus et serotinus terrae. nos christum
recipimus temporaneum, quando fidei in nobis iacta sunt fundamenta et suscipiemus eum
imbrem serotinum, quando maturis segetibus, fruges capiemus aeternas, et in dominica horrea
recondemur. ergo iudaei, qui temporaneas pluuias non receperunt, et absque pluuiis iecere
semen, segetum fructus in ultimo tempore non recipient. haec est pluuia de qua dominus
pollicetur dicens: dabo uobis pluuiam temporaneam et serotinam. iuxta allegoriam, datur
pluuia temporanea, quando ex parte cognoscimus; datur pluuia serotina, quando uenit quod
perfectum est. semper que dominus mane surgentibus paratus est, qui possunt dicere:
consurgam diluculo. et: deus, deus meus, ad te de luce uigilo.
sitiuit in te anima mea. quid faciam tibi, ephraim? quid faciam tibi, iuda? misericordia uestra
quasi nubes matutina, et quasi ros mane pertransiens; propter hoc dolaui in prophetis, occidi
eos in uerbis oris mei, et iudicia tua quasi lux egredientur. lxx: quid faciam tibi, ephraim?
quid faciam tibi, iuda? misericordia autem uestra quasi nubes matutina, et quasi ros mane
pertransiens; propterea succidi prophetas uestros, occidi eos in uerbis oris mei, et iudicium
tuum quasi lux egredietur. quando dicit: quid faciam tibi, ephraim? quid faciam tibi, iuda?
parentis in perditos filios monstrat affectum. iuxta illud quod in esaia legimus: quid est quod
debui ultra facere uineae meae et non feci ei? et in michaea: popule meus, quid feci tibi, et
quid molestus fui tibi? responde mihi, quia eduxi te de terra aegypti, de domo seruientium
liberaui te, et misi ante faciem tuam moysen, et aaron, et mariam. quid igitur tibi faciam,
ephraim, quid tibi faciam, iuda? misericordia uestra qua uobis semper misertus sum, quasi
nubes matutina pertransiit, et quasi ros mane consurgens, qui orto sole siccatur. iam enim
captiuitas prope est, iam uos cerno duci in assyrios et in babylonios catenatos; dolaui uos in
prophetis et uerbis terribilibus comminatus sum, scalpellum ignes et cauteria protuli; ut qui
clementem contemnebatis, timeatis offensum, et occidi neglegentes in uerbis oris mei, ut ante
peccatores uerborum terrore punirem, quam captiuitas immineret. et haec uniuersa feci, ut
iudicii, quo te iudicaturus sum, ueritas appareret, nullus que dubitaret uos iuste quae patimini
fuisse perpessos. pro eo quod est dolaui in prophetis, septuaginta transtulerunt: succidi
prophetas uestros, ipsos pseudoprophetas occisos a domino intellegentes; ut qui causa erroris
fuerant, prospera promittentes, interfecti uerterentur in occasionem salutis. et est sensus: ne
diceretis: prophetis credidimus; etiam ipsos interfeci, ut omnis uobis peccandi tolleretur
occasio. legimus in regum uolumine trecentos prophetas baalim interfectos sub elia, et aliam
innumerabilem multitudinem sub iehu, qui subuertit domum achab. haec eadem et ad
haereticos, et ad uerum iudam, qui similia perpessurus est, dicta sentimus, quod prouocet eos
dominus ad misericordiam, et reuerti cupiat ad salutem. sed illi delicias huius saeculi et
refrigeria quasi nubem et rorem, qui cito transeat consectentur, quibus in euangelio dicitur:
stulte, hac nocte repetunt animam tuam a te; quae autem parasti cuius erunt? et diues ille
purpuratus, qui ante ianuas suas iacentem lazarum contemnebat, omnes quod fruitus est,
instar nubis ac roris transisse cognouit. semper autem prophetas haereticorum interficit deus,
dum aeterna eis supplicia comminatur et aufert de uera uita, et morti scelerum derelinquit. nos
autem nubem diligamus illam, quae perpetua est, et quae a mundi huius ardore nos protegit,
cui sedens dominus uenit in aegyptum, et omnia aegyptiorum simulacra confregit. amemus
illum rorem, de quo moyses loquitur: descendant sicut ros uerba mea. et de quo esaias dicit:
resurgent mortui et resuscitabuntur qui in sepulcris sunt; ros enim qui a te est, sanitas eorum
est. sunt qui prophetas interfectos uiros sanctos aestiment, eo quod causa populi peccatoris
etiam prophetae occisi sint, et hostibus traditi. quia misericordiam uolui et non sacrificium; et
scientiam dei plus quam holocausta; ipsi autem sicut adam transgressi sunt pactum; ibi
praeuaricati sunt in me. lxx: quia misericordiam uolo et non sacrificium, scientiam dei magis
quam holocausta; ipsi uero sunt sicut homo praeteriens testamentum. quod sequitur in
septuaginta: ibi contempsit me galaad ciuitas quae operatur uana, et reliqua, sequenti capitulo
coaptandum est; nos quod posuimus, disseramus: dolaui eos in prophetis, occidi in uerbis oris
mei, grauia comminatus sum, ut misererer paenitentium, ut lapsis atque surgentibus
porrigerem manum. neque enim sacrificiis delector et uictimis, et holocaustorum multitudine.
uictimae meae et holocausta, salus credentium, conuersio peccatorum est.
ipsi autem imitati sunt adam, ut quod ille in paradiso fecerat, pactum meum legem que
praeteriens, isti in terra facerent. et ibi, hoc est in paradiso, omnes praeuaricati sunt in me, in
similitudine praeuaricationis adam. non enim mirum si quod in parente praecessit, etiam in
filiis condemnetur. cotidie deus et eos qui extra ecclesiam sunt, et qui peccant in ecclesia
commorantes, prouocat ad paenitentiam, et dicit eis: misericordiam uolo et non sacrificium;
et scientiam dei plus quam holocausta. illi uero offerunt panem sacrilegum, et dant
eleemosynas, et sectari uidentur humilitatem, quae ergo, si uere fiant, holocausta interpretor.
cum autem scientiam dei reliquerint, frustra, truncato capite fidei, cetera membra habere se
iactant, praeuaricati sunt enim pactum dei in ecclesia, sicut adam praeuaricatus est in
paradiso; et imitatores se antiqui parentis ostendunt, ut quomodo ille de paradiso, sic et isti
eiciantur de ecclesia. galaad ciuitas operantium idolum supplantata sanguine, et quasi fauces
uirorum latronum (siue uiri latronis utrumque enim legi potest). lxx: ibi contempsit me
galaad, ciuitas quae operatur uana et conturbat aquam, et fortitudo tua uiri piratae. legimus in
ramoth galaad unctum esse in regem iehu qui sanguinem sanguini miscuit, et achab subuertit
domum, et ante solis ortum aceruos capitum filiorum eius iussit statui; in hac urbe trans
iordanem in possessione tribus gad, idolum consecratum est; quae habitabatur a sacerdotibus,
nam et ipsa fugitiuorum ciuitas fuit. quanto igitur celebrior et maioris auctoritatis, quia in
parte sacerdotum fuerat delegata, tanto trans iordanem habitanti israel principium idololatriae,
et malorum omnium fuit, ut qui primi peccauerant, primi ab assyriis caperentur. et quoniam
ipsa prouincia plena est latrociniorum, comparat eos latronibus, ut quomodo illi uiatoribus,
sic sacerdotes simplicitati populi insidiati sunt. porro secundum tropologiam, galaad
interpretatur transmigratio testimonii; et contemnit deum, dum testimonia scripturarum ad
peruersa deprauat dogmata, et omnia opera illius uana sunt, conturbat que ecclesiae aquas, et
de purissimis fontibus caenosos et sordidos riuos facit, qui maculent potius quam mundent
baptizatos. omnis que fortitudo huius urbis quasi uiri piratae est, dum imitatur diabolum, qui
in huius saeculi mari, in quo naues pertranseunt, insidiatur his qui ad portum peruenire
contendunt. denique symmachus manifestius interpretatus est, dicens: et fauces tuae quasi uiri
insidiatoris. de istiusmodi piratis in iob legimus: non est dilatio piratis. quamuis enim in
praesenti saeculo se iactare uideantur, et conturbare aquas, et operari uana, et exercere
piraticam, tamen non est mora poenarum, quae eos uelociter comprehendent. particeps
sacerdotum in uia interficientium pergentes de sichem, quia scelus operati sunt. lxx:
absconderunt sacerdotes uiam domini, interfecerunt sicima, quia iniquitatem operati sunt.
symmachus hunc locum ita interpretatus est: societas sacerdotum in uia interficiebant sichem.
theodotio hoc modo: absconderunt sacerdotes uiam, interficiebant in dorso. aquila:
participatio sacerdotum in uia occidebant humeros; quorum cum intellegentiam iuxta
historiam quaereremus ab hebraeo, ita nobis expositum est: sacerdotes bethel, immo fanatici
bethauen, temporibus paschae et pentecostes et scenopegiae, quando per sichem, quae hodie
neapolis appellatur, eundum erat hierosolymam, ubi solum licebat uictimas immolare,
ponebant in itinere latrones, qui insidiarentur pergentibus, ut magis uitulos aureos in dan et in
bethauen, quam in hierosolymis et in templo adorarent deum. quod autem dicit: participatio et
societas sacerdotum, coniurationem eorum significat, et in mala parte consensum. sin autem
legerimus, ut nos interpretati sumus: participes sacerdotum, ad galaad, inquit, referendum est,
quae operatur idolum; et supplantata est sanguine, quod sacerdotum impietatem secuta sit, et
latrociniis uacet ac sanguini. hoc illi dixerint: nos dicamus intercludere haereticos uiam, ne de
sichem, id est de bonis operibus pergamus in hierusalem, id est in ecclesiam. isti sunt quasi
fauces uirorum latronum, et interficiunt eos, qui per huius saeculi uiam ad ueritatem pergere
cupiunt. sichem interpretatur ômoi~g, id est humeri; in humeris opus intellegimus, et omnes
falsi sacerdotes abscondunt uiam, et occidunt homines malis operibus, ne perueniant
hierusalem. quod autem humerus opus significet illud ostendit: da cor tuum in humerum
tuum, hoc est, quae intellegis uerte in opera. et de issachar legimus, quod supposuerit
humerum suum ad laborandum, et uir agricola sit. in domo israel uidi horrendum, ibi
fornicatione ephraim contaminatus est israel; sed et, iuda, pone messem tibi, cum conuertero
captiuitatem populi mei. lxx: in domo israel uidi horribilia, ibi fornicationem ephraim,
contaminatus est israel et iuda; incipe uindemiam tuam cum conuertero captiuitatem populi
mei.
de hoc scelere et horrore terribili et hieremias loquitur: obstupuit caelum super hoc et
exhorruit terra uehementer. quid enim horribilius, quam decem tribus ad idolorum cultum
repente transgressas? unde ad metropolim earum dicitur: aufer uitulum tuum, samaria, in qua
primus fornicatus est ephraim, id est ieroboam de tribu ephraim; et illo fornicante,
contaminatus est israel, populus uidelicet samariae, qui magna ex parte commune israelis
nomen obtinuit. unde et ad iudam sermo conuertitur: tu quoque iuda, pone messem tibi; et est
sensus: non te putes esse securum, quod israel captiuus abducitur; tu quoque praepara tibi
segetes ut metantur; non multo enim post tempore duceris captiuus in babylonem, et
messionis tuae tempus adueniet. cum que te chaldaei messuerint, conuertam rursum
captiuitatem populi mei, et sub cyro rege persarum et artaxerxe reducam populum meum. et
nota quam significanter iudae captiuitas, et regressio pariter prophetetur; de israel autem, hoc
est de decem tribubus et nunc tacitum est, et si quando prosperum quid dicitur, in christi
differtur aduentum. in domo autem haereticorum cotidie uidemus horrendum, fornicantibus
primum magistris, et populo qui ab eis inducitur sordidato. iudae quoque, hoc est ecclesiae,
praecipitur, ut et ipse propter peccata paret sibi messem, siue uindemiam, cum iudicii tempus
aduenerit. sed huic ignoscitur et ueniam dominus pollicetur, quia quem diligit corripit, et
castigat omnem filium quem recipit, ut probatum et purgatum condat in thesauros suos.
quidam hoc quod dicitur: iuda, incipe uindemiam tuam, siue, pone messem tibi, ad bonam
partem referunt, ut punito israel, iste operum suorum fructus recipiat iuxta illud quod
scriptum est: qui seminant in lacrimis, in gaudio metent. nobis superior sensus magis placet.
Caput 7
cum sanare uellem israel reuelata est iniquitas ephraim et malitia samariae quia operati sunt
mendacium, et fur ingressus est spolians latrunculus foris. lxx similiter. multa saepe israel
idololatriae accepit uulnera, et maxime illud quando in eremo uituli conflauerunt caput, atque
dixerunt: isti sunt dii tui, israel, qui te eduxerunt de terra aegypti. unde ego qui malo
paenitentiam peccatoris, quam mortem, et postea loquor in euangelio: non indigent sani
medico, sed hi qui male habent; uulnera populi mei sanare conatus sum. et cum haec omni
arte retractarem, ut miserabilis populus curaretur, subito exstitit ieroboam de tribu ephraim,
qui uitulos aureos faceret, et malitia samariae reuelata est, sequentis regem impium; operati
sunt enim et rex et populus mendacium, hoc est idolum. sicut enim contrarium est
simulacrum deo, ita mendacium ueritati. ipse autem rex instar furis ingressus est ad populum
israel, et quasi latrunculus infelicem plebem dei exspoliauit auxilio. et est sensus: cum uellem
uetera populi mei peccata delere propter antiquam idololatriam, ephraim et samaria noua
idola reppererunt. sed et hoc dici potest quod domino saluatore post effusionem sanguinis sui,
et ecclesiam suam tam de iudaeis quam de gentibus congregatam, uolente populi peccata
sanare et eos ad paenitentiam reducere; subito ephraim qui ubertatem falsorum dogmatum
repromittunt, et populus samariae qui se dicit dei praecepta seruare, surrexerunt et operati
sunt idolum falsorum dogmatum; et per illos ingressus est fur et latro diabolus in ecclesiam;
siue ipsa doctrina haereticorum ingressa est, quasi fur et latrunculus, de quibus et saluator
dicit in euangelio: omnes qui uenerunt ante me, fures fuerunt et latrones. fures insidiantur et
occulta fraude decipiunt; latrones audacter aliena diripiunt. qui enim furantur, nocte furantur
et in tenebris. unde significanter ait, quod fur clam ingressus sit, et latrunculus exspoliet foris.
non enim possunt exspoliare ueste christi quos docuerunt, nisi eos de ecclesia foras eduxerint,
et in peruersa doctrinarum suarum uia fecerint ambulare. fures et latrones qui uenerunt ante
dominum, non moysen et prophetas qui semper saluatoris ore laudantur, sed pseudoprophetas
debemus accipere; et postea haereticos, qui non missi sunt a domino, sed sua uoluntate
uenerunt. et ne forte dicant in cordibus suis: omnis malitiae eorum me recordatum, nunc
circumdederunt eos adinuentiones suae; coram facie mea factae sunt. lxx: ut concinant quasi
canentes in cordibus suis: omnes malitias eorum recordatus sum; nunc circumdederunt eos
cogitationes suae, contra faciem meam factae sunt. ne forsitan, inquit, dicant in cordibus suis:
uetera nobis deus peccata restituit, et patrum delicta persoluimus; illi comederunt uuam
acerbam, et dentes nostri obstupuerunt; idcirco quae nunc et in praesentiarum, me uidente,
fecerunt, et cotidie faciunt sequenti sermone narrabo; et ostendam eis adinuentiones suas, siue
cogitationes quibus mala studiosissime consectati sunt et quae me praesente gesserunt, non
timentes faciem meam. quod autem in septuaginta legimus: ut concinant quasi canentes in
cordibus suis; ad illud referendum est, quod ideo fur ingressus, siue latrunculus exspoliauerit
foris, ne in pristinis diuitiis et uestibus permanentes, repellant furis latronis que consensum;
sed cum spoliati fuerint, concinant cum eis, et uno corde efficiantur. idcirco recipiant quae
fecerunt et omnes cogitationes eorum uel opera meum non merebuntur aspectum. haeretici
quoque non possunt uetera contra deum peccata causari; cum cotidie antiquis operibus nouam
addant impietatem, et cum perditis pereant, suis que ligentur erroribus, et cum dominum
celare se putant, oculos eius uitare non ualeant. iam malitia sua laetificauerunt regem et in
mendaciis suis principes. lxx: in malitiis suis laetificauerunt reges et in mendaciis suis
principes. exponit quae coram facie eius fecerunt: in malitiis suis laetificauerunt regem
ieroboam, et in mendaciis suis principes qui sub ieroboam populo praefuerant. haeretici
quoque in malitia operum suorum laetificauerunt regem diabolum, et in mendaciis dogmatum
peruersorum principes, haud dubium quin mundi huius, quorum falsam sapientiam destruit
deus. possumus regem apud haereticos dicere, qui primus haeresim repperit, et principes eos
qui praepositi haereticorum populis, falsum sibi uindicant sacerdotium. et simul notandum,
quod in peccatis nostris gaudeant contrariae fortitudines et rectores ac principes tenebrarum
istarum. omnes adulterantes quasi clibanus succensus a coquente: quieuit paululum ciuitas a
commixtione fermenti, donec fermentaretur totum. lxx: omnes adulterantes quasi clibanus
ardens ad coquendum in deustionem flammae a commixtione fermenti, donec fermentaretur
totum. qui in malitia sua laetificauerunt regem et in mendaciis suis principes, omnes adulteri
sunt; et instar clibani ab ieroboam idololatriae igne succensi, ut panem coquerent impietatis,
qui cum erroris in animas eorum misisset incendium quasi caminus et clibanus primo igne
succensus, paululum conquieuit, ut non uim faceret populo, sed suae eum dimitteret uoluntati,
donec fermentaretur omne mendacium; quicquid enim necessitate fit, cito soluitur, quod
uoluntate arripimus, perseuerat. ideo et hic quia translationem a clibano sumpserat, qui ad
coquendos panes succenditur, seruat in reliquis, ut in commixtione fermenti totius populi
monstret assensum; quo scilicet et rex et populus pari in idololatria ardore corrueret.
haereticorum corda diaboli igne succensa, ut in eis panis coquatur antichristi, nemo ambigit;
idcirco primum quiescunt in ecclesia et loquuntur occulte, et omnia pacifica repromittunt, ut
cancer paulatim serpat in populos, et fermentum doctrinae eorum; quod et dominus
intellegens loquitur: cauete a fermento pharisaeorum; cum intumuerit in cordibus
deceptorum, tunc in apertam prorumpunt insaniam; et impletur in eis quod a ioanne apostolo
dicitur: ex nobis exierunt, sed non fuerunt ex nobis; si enim fuissent ex nobis, mansissent
utique nobis cum. dies regis nostri: coeperunt principes furere a uino; extendit manum suam
cum illusoribus, quia applicuerunt quasi clibanum cor suum cum insidiaretur eis. tota nocte
dormiuit coquens eos, mane ipse succensus quasi ignis flammae; omnes calefacti sunt quasi
clibanus et deuorauerunt iudices suos; omnes reges eorum ceciderunt, non est qui clamet ad
me ex eis. lxx: dies regum uestrorum.
coeperunt principes furere a uino; extendit manum suam cum pestilentibus, quia succensa
sunt quasi clibanus corda eorum, cum praecipitarentur tota nocte. somno ephraim repletus est,
mane factum est; incensus est quasi ignis flamma. omnes calefacti sunt quasi clibanus ignis
ardens et comederunt iudices suos. omnes reges eorum ceciderunt; non est in eis qui inuocet
me. obscurus locus et attento lectoris sensu indigens, ut primum historiam cognoscamus.
paululum israel et samariae ciuitas conquieuit recepto in se erroris ardore, donec tota massa
fermento similis fieret, et cresceret atque erumperet; ac populus intumescens clamaret ad
fores ieroboam regis et diceret: hic est dies ieroboam regis nostri, hic est festus dies quem
nobis noster constituit imperator; hunc celebramus, hunc canimus, in hoc exsultamus et
ludimus, in hoc uitulos aureos adoramus. clamante populo, principes non irati sunt, ut quidam
putent; sed et ipsi coeperunt furere a uino et intellegentiam suae mentis amittere; obliuisci dei
et in idolorum ligna impingere. quod cum rex cerneret, clamare scilicet populum et dicere:
dies iste regis nostri est, et principes quasi temulentos et fanaticos, nescire quid dicerent,
extendit manum suam illusoribus, copulauit assensum his qui ei uanis laudibus illudebant. qui
illusores, cum insidiaretur eis rex suus, et eos a deo suo abduceret, praebuerunt ei quasi
clibanum cor suum ut eos succenderet et idololatriae flammis ardere faceret. idcirco enim
assensus est populo, quia intellexit omni eos ad errorem mente conuersos. quod que sequitur:
tota nocte dormiuit coquens eos, mane ipse succensus quasi ignis flammae, hoc significat:
postquam misit ignem in clibanum cordis eorum, et uidit eos furere, et nullum esse qui suae
resisteret uoluntati, tota nocte dormiuit, hoc est securus fuit; uersatus in tenebris est, dum illi
coquerentur et impietatis panem efficerent. unde postea surrexit mane, et scelerum suorum
flammam aperta ostendit insania, ut nequaquam per insidias, sed impudenter a dei cultu ad
idolorum caeremonias transilirent. quid plura? omnes quasi clibanus, idololatriae igne
calefacti sunt, et deuorauerunt iudices suos, ut etiam qui bonus esse poterat per naturam, et
religionis domini recordari, uidens et principes et populum uitulis subditos, et illos putare
deos, etiam ipse a scelere deuoratur. denique omnes reges ceciderunt israel, et ambulauerunt
in uiis ieroboam filii nabath, qui peccare fecit israel, et nullus inuentus est qui desertis idolis,
reuerteretur ad deum. haec iuxta hebraeorum traditionem audacter magis quam scienter locuti
sumus, fidem dictorum auctoribus relinquentes. nunc ad spiritalem intellegentiam
transeamus: infelices populi qui a rege diabolo, et ab eius principibus seducuntur; siue qui ab
haereseos principe et ab eius ducibus sollemnitates alias susceperunt, relinquentes ecclesiam,
et ueritatem fidei conculcantes, solent clamare et dicere: haec est dies regis nostri; uerbi gratia
ualentini, marcionis, arii atque eunomii. quod audientes qui eis praepositi sunt, non
inebriantur uino ne leue putetur esse peccatum; sed insaniunt ex uino, de quo moyses scribit
in cantico deuteronomii: furor draconum uinum eorum, et furor aspidum insanabilis; hi enim
comedunt cibos impietatis et uino iniquitatis inebriantur. de quo dicit et apostolus: nolite
inebriari uino, in quo est luxuria. et in prouerbiis legimus: principes uinum non bibant, ne
obliuiscantur sapientiae et recta iudicare non possint. unde deceptis et populis et ducibus,
princeps extendit manum suam uel illusoribus et pestilentibus, quales erant filii heli, et de
quibus in primo psalmo legimus: in cathedra pestilentium non sedit; de quo dicitur: eice
pestilentem de consilio et egredietur cum eo contentio, quorum succensa sunt corda, ut
allidant quos deceperint. hoc enim iuxta septuaginta significant cataractae, quae non sursum
leuant, sed allidunt deorsum. quod que dicit: tota nocte somno ephraim repletus est, ostendit
haereticos dormientes lucem solis iustitiae non uidere. qui enim dormiunt, nocte dormiunt,
quia oppressus est sensus eorum. et de his in psalmis legimus: dormierunt somnum suum et
nihil inuenerunt. horum corda calefiunt uariis perturbationibus: ira, amore, auaritia; et
deuorant iudices suos, uel si quid possunt in animo habere uirtutum, uel sensus quibus mala
discernunt a bonis. siue hoc dicendum quod duces haereticorum a suis populis deuorentur, ut
quorum domos deuorant turpis lucri gratia, ipsi eorum deuorentur assensu. omnes
haereticorum principes ceciderunt, quamuis clament ad dominum, nullus est qui inuocet
nomen eius. omnis enim qui inuocauerit nomen domini, saluus erit. moyses et aaron in
sacerdotibus eius et samuel inter eos qui inuocant nomen eius; inuocabant dominum et ipse
exaudiebat illos, qui haereticorum reges et principes non exaudit, quia non est inter eos qui
clamet ad dominum. ephraim in populis ipse commiscebatur; ephraim factus est
subcinericius, qui non reuersatur; comederunt alieni robur eius et ipse nesciuit.
sed et cani effusi sunt in eo et ipse ignorauit; et humiliabitur superbia israel in facie eius, nec
reuersi sunt ad dominum deum suum, et non quaesierunt eum in omnibus his. lxx: ephraim
populis suis commiscebatur; ephraim factus est subcinericius, qui non reuersatur. comederunt
alieni fortitudinem eius, ipse uero nesciuit; et cani effloruerunt ei et ipse ignorauit; et
humiliabitur contumelia israel in facie eius et non sunt reuersi ad dominum deum suum; et
non quaesierunt eum in omnibus his. factum est regnum decem tribuum, sicut omnium
nationum, quia recesserunt a domino; et sicut subcinericius panis, qui non reuersatur, hoc est
non agit paenitentiam, comederunt assyrii atque chaldaei fortitudinem eius et quicquid uirium
habere poterat, deuorauerunt. tantae que uecordiae fuit, ut deuoratum esse se nesciret; aut
certe ignoraret causam propter quam fuisset deuorantibus traditus. denique usque ad
senectutem, id est usque ad ultimam captiuitatem, in coepto errore permansit. unde
humiliabitur superbia israel non multo post tempore, sed nunc et in praesenti; hoc est enim
quod dicit: in facie eius; humiliabatur autem, quia se erexerat et non in deo, sed in
multitudine confidebat exercitus, et quia superbis deus resistit, humilibus autem dat gratiam;
pro superbia, id est gaon, more suo septuaginta hubrin~g, id est iniuriam, transtulerunt. et
quia supra dixerat: ephraim factus est subcinericius qui non reuersatur, et uidebatur
ambiguum, nec satis sonare quid diceret, nunc ponit manifestius: non sunt reuersi ad
dominum deum suum; et non quaesierunt eum in omnibus his. quod si fuissent reuersi ad
dominum deum suum, audissent utique per hieremiam loquentem deum: reuertimini ad me et
ego reuertar ad uos. et cum tanta fecerint, non quaesierunt eum, quem suo uitio perdiderunt.
cum autem debeat ephraim, ut ad sensum alium transeamus, docere populos, et ad
similitudinem sui trahere, ipse populis commiscetur, et similis eorum efficitur; iuxta quod
supra dictum est: erit sicut populus, sic sacerdos. siue ephraim populis et gentibus
commiscetur, ut omnes haeretici nihil differant ab errore gentilium. et qui quondam fuit
princeps in ecclesia, factus est subcinericius panis, ex omni parte immundo cinere et ignium
ardore circumdatus, ut non reuerteretur ad dominum, sed in coepto permaneret errore.
comederunt daemones robur eius; isti sunt enim alieni et hostes omnium christianorum et ipse
nesciuit, aduersarios amicos putans, et deuoratores sui arbitrans esse conuiuas; sed et cani
effusi sunt in eo, immo effloruerunt, id est multo errauit tempore; et nihilominus ignorauit
senectutem et uetustatem suam, de qua scriptum est: quod ueteratur et senescit, prope
exterminium est. et si ad iustum uirum, et ad ecclesiasticum dicitur: cani hominis sapientia
eius; quare non dicatur ad iniquum, et ad haereticum: cani hominis stultitia eius? de hac
senectute daniel dicebat ad presbyterum: inueterate dierum malorum. unde et in libro pastoris,
- si cui tamen placet illius recipere lectionem -, hermae primum uidetur ecclesia cano capite,
deinde adolescentula et sponsa crinibus adornata. cum que humilietur superbia haereticorum,
siue contumelia, quam cotidie faciunt ecclesiasticis uiris, non reuertuntur ad dominum; sed in
omnibus his nequaquam requirunt eum, quia calefacti sunt quasi clibanus, et non quaesierunt
eum; deuorauerunt iudices eorum et reges pariter conciderunt; nec est qui clamet ad
dominum. quae uniuersa perpessi sunt, ut dominum quaererent, quem quaerere noluerunt. et
factus est ephraim quasi columba seducta non habens cor. aegyptum inuocabant, ad assyrios
abierunt; et cum profecti fuerint, extendam super eos rete meum, quasi uolucrem caeli
detraham eos, caedam illos secundum auditionem coetus eorum. lxx: et erat ephraim quasi
columba insipiens non habens cor. aegyptum inuocabat et in assyrios abierunt sicut ibunt.
mittam super eos rete meum, ut uolatilia caeli detraham illos; corripiam eos in auditu
tribulationis eorum. praecipit dominus in euangelio ut simus simplices quasi columbae, et
astuti quasi serpentes, ut imitantes simplicitatem columbarum, et serpentis astutiam, nec aliis
nocere possimus, nec ab aliis patiamur insidias; sed simplicitate et prudentia exhibeamus
hominem temperatum, quia prudentia absque bonitate, malitia est; et simplicitas absque
ratione, stultitia nominatur. factus est ergo ephraim quasi columba seducta, quod hebraice
photha; ab aquila et symmacho thelgomenê~g uel apatômenê~g dicitur, id est lactata, siue
decepta; et a septuaginta insipiens, siue insensata; anous~g enim utrumque exprimere potest.
et pulchre columba seducta, siue insipiens appellatur, quia est columba et sapiens, quae dicit
in psalmis: quis dabit mihi pennas sicut columbae, et uolabo et requiescam? cuius pennae
deargentatae sunt, et posteriora dorsi eius in uirore auri. ephraim autem columba insipiens et
non habens cor, intantum brutae mentis ostenditur, ut aegyptum inuocans, ad assyrios
perrexerit. qui enim deprecatus aegyptiorum auxilium est, ab assyriis captiuus abducitur.
baculus arundineus aegyptus, cui qui innixus fuerit, statim conteret eum, et fractus atque
contritus manum transforat incumbentis. et ut ostenderet deus, quod commutantes loca,
oculos eius uitare non possumus et semper dei regimur potestate. cum, inquit, profecti fuerint
in assyrios, etiam ibi extendam rete meum, et si exaltati fuerint ut uolucres, inde detraham
illos. detraham autem non in perditionem, sed ut caedam quasi filios; et caedam non in
poenarum magnitudine, sed in timore, ut audientes uetera supplicia, solis terroribus
emendentur. quaeritur cur ephraim non aliis auibus, sed colombae sit comparatus. aues
ceterae pullos suos etiam cum periculo uitae suae protegere festinant; et cum ad nidum suum
accipitrem, colubrum, coruum siue cornicem accedere uiderint, huc illuc que uolitant, et
immittunt se morsu, et unguibus lacerant, et dolorem parentis querula uoce testantur; sola
columba ablatos pullos non dolet, non requirit; et huic recte comparatur ephraim, quod
uastatum per partes populum non sentiat, sed neglegens sit salutis suae. quod que dicit:
caedam eos secundum auditionem coetus eorum, et hoc significare potest: sicut iuncto
consilio omnes idola fabricati sunt, ita me irato, omnes pariter uastabuntur. magistros
contrariorum dogmatum, qui christum reliquere sapientiam; et de ecclesia sunt egressi, recte
insipientem et excordem columbam possumus dicere, qui terrena desiderantes, assyriis traditi
sunt. et cum profecti fuerint de ecclesia, expandit dominus rete suum, testimoniis
scripturarum et artifici sapientiae sermone contextum, ut eleuantes se contra scientiam dei, et
instar auis ad excelsa uolitantes, ad humilia detrahat; et corripiat eos comminatione, et
auditione poenarum, ut correcti non pereant in aeternum. uae eis, quoniam recesserunt a me;
uastabuntur, quia praeuaricati sunt in me. ego redemi eos, et ipsi locuti sunt contra me
mendacia, et non clamauerunt ad me in corde suo, sed ululabant in cubilibus suis. lxx: uae
eis, quoniam recesserunt a me; manifesti sunt quoniam impie egerunt in me; ego autem
redemi eos; ipse uero locuti sunt contra me mendacium et non clamauerunt ad me corda
eorum, sed ululabant in cubilibus suis. me extendente rete meum, ut eos comprehenderem, et
quasi uolucrem caeli de superbia deponerem, et caederem in auditu angustiae, illi recesserunt
et resiluerunt a me, hoc enim significat apepêdêsan~g, quod septuaginta transtulerunt. et
propterea uastabuntur, quia praeuaricati sunt in me. pro eo quod nos diximus: uastabuntur, et
in hebraeo scriptum est sod laem, id est uastatio eis. symmachus, interitum; theodotio,
miseriam interpretati sunt. porro in editione uulgata dupliciter legimus; quidam enim codices
habent dêloi~g eisin~g, hoc est: manifestati sunt; alii deilaioi~g eisin~g, hoc est: meticulosi
siue miseri sunt. uastabuntur igitur et miseri erunt, et semper timentes ac formidantes, quia
praeuaricati sunt in deum, adorantes uitulos aureos, et relinquentes eum qui redemit eos de
aegyptia seruitute, et eduxit in excelso brachio. ipsi uero locuti sunt contra dominum
mendacia, dicentes de idolis: hi sunt dii tui israel qui te eduxerunt de terra aegypti, et non
clamauerunt ad dominum in corde suo, sed in idololatriae fornicationibus uolutabantur. siue
quia daemonum cultum sequitur libido et luxuria, qui colebant daemones, consequenter instar
porcorum in caeno libidinum uersabantur. et pulchre cantica idolis seruientium, non carmina
in deum, sed ululatum appellat. super haereticis facilis interpretatio est quod uae habeant
sempiternum, quia recesserunt a deo; et miseri sunt, quia reliquerunt creatorem suum qui
redemit eos sanguine suo; et ipsi loquuntur contra eum mendacia, impia falsitatis dogmata
componentes; et non clamant in cordibus suis, sed ululant semper in conciliabulis, quae
pulchre cubilia appellat, et ferarum lustra. istiusmodi non possunt dicere: lauabo per singulas
noctes lectum meum lacrimis meis stratum meum rigabo; sed uolutantur in sordibus
libidinum, uacant stupris, et quicquid loquuntur et putauerint se in laudem dei dicere, ululatus
luporum et baccharum insanientium sonitus est. raro haereticus diligit castitatem, et
quicumque pudicitiam simulant se amare, ut manichaeus et marcion, et arius et tatianus, et
instauratores ueteris haereseos, uenenato ore mella promittunt. ceterum iuxta apostolum, quae
secreto agunt, turpe est et dicere. super triticum et uinum ruminabant recesserunt a me. et ego
erudiui et confortaui brachia eorum; et in me cogitauerunt malitiam; reuersi sunt, ut essent
absque iugo; facti sunt quasi arcus dolosus; cadent in gladio principes eorum, a furore linguae
suae; ista subsannatio eorum in terra aegypti. lxx: super tritico et uino dissecabantur; eruditi
sunt in me et ego confortaui brachia eorum, et contra me cogitauerunt mala; conuersi sunt in
nihilum, facti sunt quasi arcus intentus, cadent in gladio principes eorum propter imperitiam
linguae eorum; sic est subsannatio eorum in terra aegypti. propter abundantiam, inquit, rerum
omnium corruerunt. quod etiam ezechiel in sodomis et gomorrhis factum esse commemorat,
ut nihil aliud nisi cibos et luxuriam ruminarent; pro quo septuaginta transtulerunt: super
frumento et uino dissecabantur, in exemplum prophetarum baal, qui praesente elia,
concisione membrorum pluuias precabantur.
simul que ut ostenderet eos iumentorum similes, non dixit: comedebant, sed ruminabant; et
ideo recesserunt a domino qui dicit: ego eos erudiui, ego fortitudinem praebui, et contra me
suas erexere ceruices; non quo aliquid possint facere et nocere creatori suo, sed quod solum
facere potuerunt, contra me cogitauerunt mala. et quomodo a principio fuerunt, priusquam
uocarem eos per abraham, et postea per moysen et aaron; et erant absque iugo legis que
notitia, et cunctis nationibus miscebantur. ita etiam nunc reuersi sunt in pristinum statum, ut
absque iugo et frenis ferrentur per praecipitia, et mutarentur in arcum dolosum; ut quem deus
contra aduersarios intenderat, ipsi contra suum dominum uerterent, et mitterent aduersus eum
blasphemiarum sagittas. unde princeps eorum, qui infelicem populum deceperunt, cadent
gladio propter furorem linguae suae, quo uitulos aureos deos appellare sunt ausi, ut hoc
facerent in terra repromissionis, quod in aegypto didicerant; colentes apim aegyptium, et
omnia eorum portenta uenerantes. ita enim et in solitudine, quando egressi sunt de aegypto,
dominum subsannauerunt, dicentes: isti sunt dii tui, israel. et: utinam essemus in terra
aegypti, ubi sedebamus super ollas carnium, et cetera. super tritico et uino, et falsis mysteriis
corporis et sanguinis christi, qui dicit in euangelio: nisi ceciderit granum tritici in terram, et
mortuum fuerit, ipsum solum manet. et in alio loco: ego sum uitis uera. et: nisi biberitis
sanguinem meum. super hoc ergo tritico et uino haeretici conciduntur, et diuersa sibi
construunt tabernacula; siue praeciduntur ab ecclesiae corpore, et legem dei meditari, et
ruminare se simulant. sed hoc facientes recedunt a domino qui docuit eos in ecclesia, et dedit
eis fortitudinem, qua contra aduersarios dimicarent. illi uero cogitauerunt contra dominum
malitiam, impiissimas haereses exstruentes, et reuersi sunt in statum gentilium, ut essent
absque dei notitia et iugo; siue reuersi sunt in nihilum, non quo esse desierint, sed quo ad
comparationem eius, qui loquitur ad moysen: uade, dic populo israel: qui est misit me, omnes
qui contra dominum sapiunt, non esse dicantur. iuxta illud quod in esther, in septuaginta
dumtaxat, legimus. ne tradas sceptrum tuum his qui non sunt, haud dubium quin idola
significet. si enim deus est ueritas, quicquid contrarium ueritati, est mendacium, et nihil
nominatur. hoc haereticis conuenit, qui instructi de scripturis sanctis, aduersum dominum
legis et prophetarum et euangelii uerba uertunt; et sunt quasi arcus dolosus siue peruersus.
dolosus arcus atque peruersus est, qui percutit dirigentem, et uulnerat dominum suum. siue
facti sunt quasi arcus intentus, parati semper ad pugnam et contentiones, in subuersionem
audientium. unde principes eorum, id est haeresiarchae, domini mucrone feriuntur, propter
insaniam linguae suae, qua dominum blasphemauerunt; hoc idem facientes in falsi nominis
ecclesia, quod faciebant eo tempore quo in aegypto saeculi morabantur, hoc est quando
gentiles erant. omnes enim haereticorum et gentilium quaestiones eaedem sunt, quia non
scripturarum auctoritatem, sed humanae rationis sensum sequuntur.
Caput 8
in gutture tuo sit tuba, quasi aquila super domum domini; pro eo quod transgressi sunt foedus
meum et legem meam praeuaricati sunt. me inuocabant, deus meus, cognouimus te israel.
proiecit israel bonum, inimicus persequetur eum. ipsi regnauerunt et non ex me: principes
exstiterunt et non cognoui. argentum suum et aurum fecerunt sibi idola, ut interirent. lxx: in
sinu eorum quasi terra sicut aquila super domum domini, pro eo quod transgressi sunt
testamentum meum et contra legem meam impie egerunt. me inuocabant, deus, cognouimus
te; quia israel auersatus est bona. inimicum persecuti sunt, semetipsis regnauerunt et non per
me; principes exstiterunt et non indicauerunt mihi; argentum suum et aurum suum fecerunt
sibi idola, ut dispereant. hoc quod nos interpretati sumus: in gutture tuo sit tuba, pro quo in
hebraeo scriptum est alechcha sophar, aquila et symmachus et theodotio similiter
transtulerunt. soli septuaginta dixerunt: in sinu eorum quasi terra, quod quid significet,
incertum est. quidam enim aestimant sinum dupliciter accipi, et inferiorem partem uestimenti
a genitalibus usque ad pedes; et colpum maris, id est sinum, uerbi gratia, hadriatici et ionii et
propontidis, falsos que magistros, qui blasphemiam aegypti sunt secuti, omnia in sinu suo
libidini seruientia et terrena retinere; uel certe in portu et refugio nauigationis suae, nihil
pretiosarum mercium, sed terrena conquirere. nos autem sequentes hebraicam ueritatem,
coeptae explanationis texamus ordinem. praecipitur prophetae, et dicitur ad eum: in gutture
tuo sit tuba, hoc est sic exalta uocem tuam, ut tubae similis sit, ut plurimi audiant, quia
plurimi peccauerunt. cum que exaltaueris uocem tuam, hoc dicito cum clamore, quasi aquila
super domum domini; et est sensus: ueniet nabuchodonosor cum omni exercitu suo tam
raptim, tam uelociter, ut aquilae imitetur uolatum festinantis ad praedam; et ueniet non ad
alium locum, sed ad hierusalem, in qua templum dei situm est, ut eam destruat atque
subuertat. de hac aquila et hiezechiel plenius loquitur: magnarum alarum plumarum que et
unguium, quae habet ductum intrandi in libanum, hoc est in templum dei, iuxta zachariam
prophetam, in quo scriptum est: aperi, libane, portas tuas et comedat ignis cedros tuas. hoc
autem, o propheta, quod tibi dico atque praecipio: in gutture tuo sit tuba, ut uocifereris et
dicas, quasi aquila super domum domini, regem uenire chaldaeorum, non ob aliam causam
iubeo, nisi quod transgressi sunt foedus meum et meas caeremonias reliquerunt. unde tempore
necessitatis et angustiae, quando captiuitas uenerit, me inuocabunt et dicent: deus meus,
cognouimus te, israel; nos qui appellamur israel, scimus te atque cognoscimus, et nomen
iacob, qui tibi placuit, seruamus antiquum, ut dicamur israel. quibus respondit dominus:
quomodo uocamini israel, cum israel proiecerit bonum, id est dominum suum, a quo
appellatus est israel? idcirco quia israel proiecit bonum, inimicus, hoc est assyrius,
persequetur eum atque comprehendet, qui me rege deserto, petierunt sibi regem, sicut et
gentes reliquae, et fecerunt contra uoluntatem meam. denique samuel ideo eis dura regis
exponit imperia, et filios eorum ac filias dicit regibus seruituras, ut ad dominum regem
clementissimum reuertantur, sed illi absque uoluntate dei principes exstiterunt. et non eis
suffecit hoc scelus, nisi maiori impietate facinus duplicarent, ut argentum suum et aurum
quod acceperant ad diuitias et ornatum, in idola uerterent. ergo saul non ex uoluntate dei, sed
ex populi errore rex factus est. et quia radicem pietatis non habuit, statim ut regnare coepit,
impietate succensus est. potest hoc quod dicit: ipsi regnauerunt et non ex me; principes
exstiterunt et non cognoui, etiam de ieroboam accipi filio nabath, et de ceteris principibus, qui
ei in imperio successerunt. nec statim, quia deus salomoni iratus, regnum eius diuidi uoluit,
idcirco israel bene suscepit regem. debuerat enim iuxta legis praecepta interrogare dominum,
an uellet hoc fieri. nam et de saluatore dicitur, quod oporteat quidem tradi filium hominis, sed
uae illi, per quem tradendus sit. diabolum qui ponere cupit super astra caeli nidum suum,
aquilam saepissime legimus: si exaltatus fueris ut aquila, inde detraham te, dicit dominus.
oculus quoque qui irridet patrem, et despicit senectutem matris, effodietur a coruis, et
deuorabunt eum pulli aquilarum; per diabolum et daemones, clarum uisionis suae lumen
amittens. unde in lege praecipitur, ut non comedamus aquilam. haec igitur aquila uenit super
haereticorum conciliabula, quae quondam fuerant domus domini; et idcirco uenit, quia
praeuaricati sunt foedus eius, et legem dei dereliquerunt; et sine causa inuocant eum et dicunt:
deus meus es et cognouimus te, nos qui uocamur israel, cernentes deum et uocamur nomine
christiano. frustra, inquit, haec faciunt, cum ipsi sibi reges constituerint, et contra meam
fecerint uoluntatem, et principes habeant aduersarios meos, quos ego nescio, quia mei
notitiam non merentur. argentum quoque suum et aurum, et quicquid habere poterant
naturaliter, sermones ac sensus uerterunt in idola, quae de suo corde finxerunt; et uerterunt,
non ut interirent; sed quia uerterunt, ideo interierunt. neque enim hac ratione fecerunt, ut
perirent; sed quia fecerunt, idcirco perierunt. proiectus est uitulus tuus, samaria. iratus est
furor meus in eis. usquequo non poterunt emundari? quia ex israel et ipse est, artifex fecit
illud et non est deus, quoniam in aranearum telas erit uitulus samariae. lxx: proice uitulum
tuum, samaria; concitatus est furor meus super eos. usquequo non poterunt emundari in
israel? et hoc artifex fecit et non est deus, quia seducens erat uitulus tuus, samaria. in eo loco,
in quo nos posuimus aranearum telas, in hebraico scriptum est sababim, per iod litteram
penultimam; non ut quidam falso putant, sababum, id per uau, quod septuaginta et theodotio
planôn~g interpretati sunt, id est seducens atque decipiens; aquila errantibus siue conuersis;
symmachus inconstans uel instabile, id est akatastatôn~g; quinta editio rhembeuôn~g, uagus
et fluctuans.
nos ab hebraeo didicimus sababim proprie nominari aranearum fila per aerem uolantia, quae
dum uidentur intereunt, et in atomos atque in nihilum dissoluuntur. et recte his samariae
uitulus comparatur, quem eo tempore pro pretii magnitudine, quia aureus erat, populus
adorabat. hoc quod supra dixerat: argentum suum et aurum suum fecerunt sibi idola, ut
interirent, nunc exponit manifestius: proiectus est uitulus tuus, samaria, iratus est furor meus
in eos; uel in uitulos quia duos fecerant; uel in samariae habitatores, qui eos adorabant. porro
quod in septuaginta legimus: proice uitulum tuum samaria, cohortatur habitatores eius, non
unius urbis, sed omnium decem tribuum, quae appellantur samaria, - alioquin in urbe samaria
uituli non erant, sed in dan et in bethel -, ut proiciat uitulos super quos iratus est deus; siue
apotripsetai~g, id est defricet; ut quos multo tempore coluerat, paulatim defricet et emundet.
illis que non audientibus, conuertitur ad alios, et quasi ad tertiam personam loquitur:
usquequo non poterunt emundari? quae ista, inquit, insania est, me dante locum paenitentiae
illos ad sanitatem nolle conuerti. et quia dixerat: proice uitulum tuum, samaria, exponit quis
iste sit uitulus, quia ex israel et ipse est; non ab aliis ait, uitulum gentibus accepistis, ut baal et
astaroth a sidoniis, ut chamos a moabitis et moloch ab ammonitis; sed uos ipsi, et rex uester
ieroboam, quod in aegypto didiceratis fecistis in israel. aut qualis ille deus est, qui manu
formatur artificis? denique ut aranearum fila dissoluuntur in uentum, ita uitulus samariae
redigetur in nihilum. proicit deus haereticorum uitulos et samariae, qui se dicunt legis
praecepta seruare; qui uituli haerent humo et operantur in terra non spiritu, nec oculos ad
caelum leuant; et idcirco iratus est furor domini super eos et miratur quae sit tanta peruersitas,
ut nolint relinquere idola, quae sibi fabricati sunt, et ament sordes haereticas pro ecclesiae
munditiis. quos uitulos non accepit israel, qui deum uidere se fingit a ceteris gentibus; sed de
scripturis sanctis sibi ipse conflauit intellegentiae prauitatem, et artifex est dei sui, qui cito
peribit et aranearum telas imitabitur, quae leui rumpuntur attactu. quia uentum seminabunt et
turbinem metent; culmus stans non est in eo, germen non faciet farinam, quod si et fecerit
alieni comedent eam. lxx: quia corrupta uento seminauerunt et subuersio eorum suscipiet ea;
manipulus non habens uires ut faciat farinam, quod si et fecerit alieni comedent eam.
aranearum telis, samariae uitulum comparat; idcirco metaphoram seruat in reliquis, ut quos
aranearum dixerat telas comparet uento et turbini, culmis que non stantibus; et si steterint,
farinam non habentibus; et si farinam, inquit, fecerint, ab aliis deuorabitur. et quia tam de
haereticis quam de his, qui in samaria fabricati sunt idola, communis est sensus, communiter
disputandum est. isti uentum seminant, siue quae a uento corrupta sunt semina quae
medullam non habent, quam graeci enteriônên~g uocant, et idcirco uacua seminantes, inania
uacua que recipiunt; immo seminantes in carne, de carne metunt corruptionem, et
circumferuntur omni uento doctrinae. cum que uentum seminauerint, metunt turbines et
tempestates, et primum quidem culmus, hoc est stipula, non erit ex his seminibus, nec
aliquam poterunt speciem segetis habere fecundae. quod si raro acciderit ut ecclesiastici quid
dogmatis simile habere uideantur, ipsum germen et spica farinam non faciet. in cuius farinae
satis tribus mittit fermentum euangelica mulier; et ut spiritus quo sentimus et anima qua
uiuimus, et corpus quo incedimus, in unum sanctum spiritum redigantur iuxta apostolum: in
ipso uiuimus, mouemur et sumus. quod si raro acciderit haereticis, ut farinam quoque
sementis eorum faciat, de hac farina fiet subcinericius panis, qui non reuersatur, et quem
alieni comedent. unde et nunc ait: quod si et fecerit farinam alieni comedent eam. alienos
autem illos debemus accipere de quibus scriptum est: filii alieni mentiti sunt mihi. et in
octauo decimo psalmo: ab occultis meis munda me, domine et ab alienis parce seruo tuo. qui
si iusto uiro non fuerint dominati, tunc immaculatus erit et mundabitur a delicto maximo.
deuoratus est israel, nunc factus est in nationibus quasi uas immundum. septuaginta pro
immundo, inutile transtulerunt, cetera similiter. immundum uas, siue inutile, hebraei matulam
uocant, qua ad suscipienda et proicienda stercora uti solemus. huic immunditiae idololatras et
haereticos comparat, qui miscentur gentibus, dum dei non custodiunt ueritatem, et facti uas in
honorem, conuersi sunt in uas contumeliae. quid enim immundius daemonico spiritu et
haereticorum dogmatibus, quae eos ethnicis miscuerunt? talis erat iechonias idolis
mancipatus, de quo per hieremiam loquitur deus: inhonoratus est iechonias, sicut uas cuius
nulla est utilitas.
econtrario paulus qui dicere poterat: an experimentum quaeritis eius qui in me loquitur
christus? appellatur uas electionis aureum et argenteum, quia habebat sapientiam et eloquium,
quo christi euangelium praedicabat. quod autem dicit: deuoratus est, uel absorptus, hoc
significat quod mixtus idolis et nationibus, proprium israelis et christiani nomen amiserit.
quia ipsi ascenderunt ad assur, onager solitarius sibi. ephraim munera dederunt amatoribus,
sed et cum mercede conduxerunt nationes, nunc congregabo eos, et quiescent paulisper ab
onere regis et principum. lxx: quia ipsi ascenderunt ad assyrios, germinauit apud semetipsum
ephraim, munera dilexerunt; idcirco tradentur in gentibus, nunc suscipiam eos et quiescent
paruum ut ungant reges et principes. deuoratus est, inquit, israel et factus est tamquam uas
inutile, siue immundum, de quo non supersit testa, in qua hauriri possit aqua, aut modicum
quid igniculi. et quia factus est uas immundum, ideo ascenderunt in assyrios imitantes
onagrum solitarium; nequaquam ut oues pasti a domino, sed male abutentes libertate sua, et
educti in captiuitatem, quos propheta plangit et dicit: ephraim munera dederunt assyriis et
conduxerunt mercede amatores suos; de quibus scribit hiezechiel: omnibus meretricibus
dantur mercedes, tu autem dedisti mercedes amatoribus tuis, et econtrario factum est in te.
cum que dederint dona gentibus, et mercede ad auxiliandum sibi conduxerint nationes,
congregabuntur ad pugnam, et uincti pariter abducentur. et quia amant offerre aduersariis
munera, ideo paulisper beneficium consequenter ut non soluant stipendia regi et principibus,
donec perueniant in assyrios, ubi nequaquam tributa et stipendia dabunt ut liberi; sed
redigentur in ultimam seruitutem. de haereticis non ambigimus quin iuxta errorem mentis
suae euntes ad assyrios ascendere se putent, non descendere. unde dicitur ad eos per esaiam;
quid factum est tibi nunc quia ascendisti omnis in tecta uana? quorum assyriorum princeps est
sensus magnus. unde in semetipso germinauit ephraim, praesumptione sui aestimans se
creuisse. siue onager factus est solitarius, ut non ecclesiae consita, sed diaboli deserta
penetraret. amauit munera pro errore suo, ipse sibi praemia repromittens, siue turpis lucri
gratia omnia faciens. uel certe dedit amatoribus suis daemonibus munera atque mercedes, et
cum hoc fecerit, tradetur gentibus. sicut enim nationes corporalia simulacra uenerantur; sic
isti idola deos putant, quae de suo corde finxerunt, et ideo reputabuntur in numero nationum.
sin autem, inquit, nunc et in praesenti saeculi egerint paenitentiam, et susceperim eos
cessabunt paruum super se regem constituere et principes eius. ut intellegamus paruum regem
diabolum, ad distinctionem magni regis, qui societatem cum belial habere non potest; sed
statim ut receptus fuerit, de corde credentium fugat paruum regem et principes eius. iuxta
hebraicum autem congregabuntur in ecclesia dei qui fuerant antea dispersi, et mercede sibi
conduxerant nationes, et quiescent ab onere regis, super quo apostolus scissos ab ecclesia
increpat, dicens: sine nobis regnatis; atque utinam regnetis, et a principibus quos habent in
synagogis diaboli constitutos. quia multiplicauit ephraim altaria ad peccandum, factae sunt ei
arae in delictum. scribam ei multiplices leges meas, quae uelut alienae reputatae sunt; hostias
adfer, adfer; immolabunt carnes, et comedent, et dominus non suscipiet eas. lxx: quia
multiplicauit ephraim altaria, in peccatum, sunt ei altaria dilecta. scribam eis multitudinem;
legitima eius in aliena reputata sunt altaria dilecta quia si immolauerunt hostias, et comederint
carnes, dominus non suscipiet eas. ducti, ait, in captiuitatem cessabunt paulisper ab onere
regis et principis. et hoc patientur quia ephraim princeps eorum multiplicauit altaria, non in
quibus immolaret domino, sed in quibus peccatis peccata coniungeret; quae altaria, id est
arae, uertentur ei in delictum, ut quanto plura fuerint, tanto illius scelera multiplicentur.
deinde ut supra dixerat: quid faciam tibi, ephraim? quid faciam tibi, iuda? uelut ambigens et
requirens quo medicamine sanaret infirmum, et quibus consiliis peccantem retraheret ad
salutem. scribam, inquit eis rursus, leges quas prius dederam per moysen.
sed quid prodest ultra alias scribere, cum contempserit eas quas ante suscepit? annon
contemptus dei est, quando me iubente, ut unum in hierusalem esset altare, per omnes montes
et colles idola fabricati sunt, quibus irritarent dominum? altaria quoque idcirco fecerunt, non
ut mihi placerent; sed ut multis hostiis immolatis, carnes earum comederent, iuxta illud quod
dominus loquitur in euangelio: amen, amen dico uobis, quaeritis me, non quia uidistis signa,
sed quia manducastis de panibus, et saturati estis. omne enim studium uictimarum in eo
habent ut deuorent hostias, non ut per eas placeant deo; nec suscipiet eas dominus quas non
illi, sed suo uentri immolauerunt et gutturi. unum autem esse altare in ecclesia, et unam
fidem, et unum baptisma apostolus docet, quod haeretici deserentes, multa sibi altaria
fabricati sunt, non ad placandum deum, sed in delictorum multitudinem. propterea legem dei
accipere non merentur, cum eas quas acceperant, ante contempserint. et si quid dixerant de
scripturis, nequaquam diuinis uerbis, sed ethnicorum sensibus comparandum est. isti multas
immolant hostias et comedunt carnes earum, unam christi hostiam deserentes; nec
comedentes eius carnem, cuius caro cibus credentium est. quicquid fecerint, sacrificiorum
ordinem ritum que simulantes, siue dederint eleemosynam, siue pudicitiam repromittant, siue
humilitatem simulent, fictis que blanditiis simplices quosque decipiant, nihil de huiuscemodi
sacrificiis dominus suscipiet. nunc recordabitur iniquitatis eorum et uisitabit peccata eorum;
ipsi in aegyptum conuertentur. et oblitus est israel factoris sui, et aedificauit delubra, et iudas
multiplicauit urbes munitas, et mittam ignem in ciuitates eius, et deuorabit aedes illius. lxx:
nunc recordabitur iniquitates eorum, et ulciscetur iniustitias eorum; ipsi in aegyptum conuersi
sunt et oblitus est israel eum qui fecit illum, et aedificauerunt delubra, et iudas multiplicauit
urbes muratas, et emittam ignem in ciuitates eius, et deuorabit fundamenta illius. inter
anomian~g, id est iniquitatem, et peccatum, hoc interest, quod iniquitates ante legem,
peccatum post legem est, et qui permanent in delictis, iniquitatis eorum dominus recordabitur,
quam ante legem commiserant; peccatorum autem non recordabitur, sed faciet ultionem. ideo
autem et ueterum iniquitatum recordabitur, et peccata pristina uisitabit, quia in aegyptum sunt
reuersi, uel auxilia postulantes, uel eosdem colentes deos, in quibus prius errauerant, apin~g
et mneuin~g. oblitus est enim israel factoris sui et aedificauit delubra in excelsis, totos colles
et montes, et umbrosas arbores baal et astaroth et aliis idolis consecrans. iudas quoque
intellegens israelem de dei amore recessisse, et uisitata eorum peccata, non est conuersus ad
dominum, sed in urbium munitione confisus est, quas dominus destructurum esse se dicit,
usque ad fundamenta illius uoraturum. illius, haud dubium, quin iudam significet; licet
quidam fundamenta earum, id est urbium, pro illius legant. secundum autem anagogem
iniquitates, id est et anomiai~g et adikiai~g uocantur, quas ante baptismum commisimus, et
quae nobis in baptismate sunt dimissae; peccata autem quae post baptismum egimus, de
quibus et in psalmo scriptum est: beati quorum remissae sunt iniquitates, et quorum tecta sunt
peccata. quae omnia imputabuntur haereticis ut et ueteres iniquitates et noua eis peccata
redigantur. qui enim de aegypto exierant per confessionem christi, perfidia in aegyptum sunt
reuersi. oblitus est israel factoris sui, et creatore contempto, alium sibi finxit deum. iudas
quoque, id est uir ecclesiasticus, in malis operibus, uel in sanctarum scripturarum
interpretatione peruersa, aedificauit sibi urbes munitas, non auxilio dei, sed artifici mendacio,
quas dominus igne sui spiritus succensurum esse se dicit, et deuoraturum bareis~g eius, id est,
magnas et in modum turrium aedificatas domos; et fundamenta male posita subuersurum, ne
possint sacrilega contra deum delubra constituere. quidam urbes a iuda munitas in bonam
partem accipiunt, et illud quod huic sensui contrarium uidebatur: immittam ignem in ciuitates
eius, et deuorabit aedes illius, ita temperare nituntur, ut postquam uenerit quod perfectum est,
id quod ex parte est, destruatur. quod iuxta lxx interpretes legimus (signum_obeli) et in
assyriis immunda comederunt, (signum_metobeli) in hebraico non habetur, et idcirco obelo
praenotandum est. possumus autem dicere, quod desiderantes aegyptum israelitae, capti ab
assyriis, ibi immunda comederint, iuxta hiezechielem, quis eos in chaldaea idolothyta
comedisse describit; et in tantum idolorum polluta sordibus, ut humano stercori comparentur.
haeretici quoque, quorum principes sunt assyrii, - de quibus crebro diximus -, comedunt apud
eos immunda, dum illorum sordibus inquinantur.
Caput 9
noli laetari, israel, noli exsultare sicut populi, quia fornicatus es a deo tuo; dilexisti mercedem
super omnes areas tritici. area et torcular non pascet eos et uinum mentietur eis. lxx: noli
gaudere, israel, et noli laetari sicut populi, quia fornicatus es a deo tuo; dilexisti munera super
omnem aream tritici. area et torcular non cognouit eos et uinum mentitum est illis.
qui a deo recesserint cum in profundum uenerint peccatorum, et desperauerint salutem suam,
uniuersa contemnent. denique et israel recedens a lege dei, et colens idola, ex multis gentibus
unam gentem esse se dicit; gaudens et gratulans quod a dei notitia recesserit et sit gens mixta
cum ceteris, et propterea nunc corripit eos; et dicit: ne gaudeas, ne laetaris, nec putes talem te,
ut sunt ceterae nationes. aliter enim nesciens deum, aliter punitur recedens a deo, quia seruus
qui scit uoluntatem domini sui, et non facit eam, uapulabit multum. mercedem fornicationis
tuae areas multas et torcularia reputasti, ut rerum omnium abundantia fruereris; ideo area et
torcular, triticum uinum que non facient et mentietur eis torcular, siue negabit uinum suum,
quo se inebriandos putabant. legimus sub achab rege israel, et elia propheta, famem
grauissimam fuisse in samaria, ita ut matres filiorum suorum cadaueribus uescerentur. eo
tempore, iuxta litteram, area et torcular non pauit eos, et uinum mentitum est eis, et in
egestate tabuerunt. dicitur et ad haereticos, ne exsultent atque laetentur, et putent se ceterarum
similes nationum. illae enim non crediderunt in deum; isti uero sub nomine dei idola colunt et
fornicantur a deo suo; et plures sibi areas, et torcularia infinita multiplicant, et comedunt
triticum, de quo efficitur panis luctus, et bibunt uinum sodomorum, quod cum aspidum felle
calcatur. et quia sibi plura torcularia et multas areas praeparant, idcirco de uera et de una area,
et torculari quod calcauit dominus iesus, non uescentur, et non bibent; sed quodcumque se
habere putauerint, mendacio deprauabitur. non habitabunt in terra domini, reuersus est
ephraim in aegyptum, et in assyriis pollutum comedit. non libabunt domino uinum, et non
placebunt ei sacrificia eorum, quasi panis lugentium, omnes qui comedunt illum,
contaminabuntur, quia panis eorum, animae ipsorum, non intrabit in domum domini. lxx: non
habitauerunt in terra domini. habitauit ephraim in aegypto; et in assyriis immundum comedit;
non libauerunt domino uinum, nec placuerunt ei sacrificia eorum, quia panis luctus eis;
omnes qui manducauerint ea, contaminabuntur; quia panes animarum eorum non intrabunt in
domum domini. non solum area et torcular non pauit eos, et uinum mentitum est in terra
israel, quando per triennium et menses sex cuncta perierunt, sed et ipsi habitatores recedent
de terra domini; et ducentur in terram alienam, ne habitent in terra sancta quam suis
fornicationibus polluerunt. reuersus est, inquit, ephraim in aegyptum, et in assyriis pollutum
comedit. de hoc loco quidam supra addiderunt: et in assyriis pollutum comedit, quod in
hebraico non habetur, de quo iam diximus. cum autem fuerint in chaldaea absque templo et
absque altari, non libabunt domino uinum, sed daemonibus; et non placebunt ei, qui libant
diis alienis, et qui in captiuitate retinentur atque in assyriis idolothyta comedunt, et quasi
panes lugentium sunt. non est enim licitum de sacrificiis comedere lugentium, et si comederit,
immundum fiet quod oblatum est. lugentium cenas graeci perideipna~g uocant, nos parentalia
possumus dicere, ab eo quod parentibus mortuis immolentur. et non solum qui obtulerit, sed
etiam qui comederit de huiusmodi cibis immundus erit; panis enim eorum, hoc est cibus
quem offerunt, non intrabit in domum domini, quae destructa est, quae babylonio igne
succensa; sed erit animae eorum. et est sensus: suae gulae et suae prouident uoluptati;
ceterum mihi non placent polluta. non habitabunt in terra domini, qui ab ecclesia recesserunt,
et reuersi sunt mente in aegyptum, et assyriorum, id est: daemonum comedunt sacrificia; nec
libant domino uinum quo inebriati sunt in luxuriam, et non placent ei nec illa quae offerunt,
nec ipsi qui offerunt. sacrificia haereticorum panis luctus est et lacrimarum; omnia enim quae
faciunt uertentur in fletum. nec audire poterunt: beati lugentes, quoniam ipsi consolabuntur;
sed e contrario audient: uae ridentibus, quia ipsi lugebunt. quicquid offerunt non deo, sed
mortuis offerunt; his uidelicet qui sceleratas haereses confinxerunt; et quicumque de eorum
comederit uictimis, contaminabitur. caeci in foueam ducentur a caecis. quicquid fecerint,
deliciarum causa faciunt, ut populum decipiant, ut domos deuorent uiduarum. panem luctus
possumus dicere, uerba mortifera, quibus iniquitatem loquuntur contra dominum, qui panis
non ingreditur in domum dei; haereticorum enim conciliabula, non domus dei appellantur,
sed speluncae latronum. quid facietis in die sollemni, in die festiuitatis domini? ecce enim
profecti sunt a uastitate; aegyptus congregabit eos, memphis sepeliet eos, desiderabile
argentum eorum urtica hereditabit, lappa in tabernaculis eorum.
lxx: quid facietis in die conuentus et in die sollemnitatis domini? ideo ecce ibunt de miseria
aegypti, et suscipiet eos memphis, et sepeliet eos machmas, argentum eorum interitus
possidebit, spinae in tabernaculis eorum. cum uenerit, inquit, dies captiuitatis et saeuissimus
hostis ingruerit, quae mea sollemnitas est? quam ego placabilem habeo hostiam? quia me de
meis hostibus uindicat, et iniuriae ponit modum, et flagellat impios filios. quid igitur facietis
in die festiuitatis domini? respondete. illis que tacentibus, sibi ipse respondet, immo quae
facturi sint, diuinis oculis intuetur. ecce, inquit, miseria et uastitate prementibus, et assyrio
atque chaldaeo captos ligare cupientibus, ad aegyptum confugerunt. ibi memphis sepeliet eos,
quae eo tempore erat metropolis aegypti, antequam alexandria, quae prius appellabatur no, ab
alexandro macedone et magnitudinem urbis et nomen acciperet. quod autem in septuaginta
dicitur: sepeliet eos machmas, in hebraeico non habetur; sed mamad, quod appellatur
desiderabile. ex quo perspicuum est, falsos eos esse similitudine litterarum daleth et chaph et
pro mamad, quod omnes desiderabile transtulerunt, putasse machmas aegypti ciuitatem.
possumus hoc quod dicitur: ecce enim profecti sunt a uastitate, aegyptus congregabit eos,
memphis sepeliet eos, et de tribu iuda accipere; quando, interfecto godolia ab ismaele, quem
nabuchodonosor terrae praeposuerat, reliquiae populi cum hieremia propheta ad aegyptum
transfugerunt, et ibi persequentibus postea chaldaeis, uel captae sunt, uel sepultae.
desiderabile autem argenti eorum, quod urtica possidet, uillas et omnia ornamenta uillarum
intellegemus, quae pretio emuntur argenti. quod que sequitur, lappa in tabernaculis eorum,
longam significat uastitatem, ut ubi quondam domus erant, ibi lappae et urticae nascantur et
spinae. dicitur et ad haereticos: cum dies sollemnis aduenerit, quid facturi estis: pro die
sollemni, aquila interpretatus est tempus. ex quo manifestum est, non festam diem sonare, sed
tempus retributionis; statim enim sequitur: uenerunt dies ultionis, uenerunt dies retributionis
tuae. ecce uastati estis a multis hostibus: assyrii uos chaldaei que iugularunt, fugistis ad
saeculum, et ceteris estis nationibus comparati; ibi uos memphis sepeliet, quod interpretatur
ex ore; et est sensus: iuxta uestras blasphemias recipietis et quod locuti estis, in suppliciis
sentietis; desiderabilia, hoc est dogmata quae uobis artifici composueratis eloquio, quod
interpretatur argentum, possidebit urtica, quae uos aeterno ardore consumet; et erit lappa uel
spina in tabernaculis uestris, spinae quippe oriuntur in manibus eorum, qui inebriati sunt
calice babylonio. et in euangelio legimus, turpes cogitationes et curas huius mundi, et
inhaerentia uitia, spinas appellari, quae surgentia in herbis frumenta suffocent. uenerunt dies
uisitationis, uenerunt dies retributionis; scitote, israel, te stultum prophetam, insanum uirum
spiritalem; propter multitudinem iniquitatis tuae, et multitudo amentiae. lxx: uenerunt dies
ultionis, uenerunt dies retributionis tuae, et affligetur israel sicut propheta insaniens, homo
qui habebat spiritum; propter multitudinem iniquitatum tuarum, multiplicata est amentia tua.
et in hoc loco error est solitus: ubi enim nos interpretati sumus: scitote israel, hoc est,
israelitae, et in hebraeico legitur iadau, septuaginta transtulerunt: et affligetur, iod litteram uau
putantes, et pro daleth legentes res, quorum alterum scientiam, alterum afflictionem, uel
malitiam sonat. uenerunt igitur dies uisitationis, de quibus supra dixerat: quid facietis in die
sollemni, in die festiuitatis domini? uenerunt dies retributionis. o israel, nunc tua uerba
cognosce, qui prophetam tibi uera dicentem, et spiritu sancto prophetantem, stultum et
insanum uocabas, iuxta illud quod in ramoth galaad principes locuti sunt ad iehu: quid uenit
ad te iste uesanus? igitur propter multitudinem iniquitatum tuarum, quibus in scelere diu
debacchatus es, non prophetam meum, sed te insanum esse cognosce, qui ad hoc laborasti, ut
mea uerba calcares. pro amentia, aquila uertit egkotêsin~g, quam nos uel iracundiam uel
memoriam doloris in latino possumus dicere. diem ultionis et retributionis, quidam
interpretantur diem iudicii, quando affligetur israel, qui nunc deum uidere se iactat, et non
sancto spiritu regitur; sed daemoniaco in partes uarias circumfertur, nesciens quid loquatur,
dicens que dei filium creaturam, spiritum sanctum deum negans. et rursum alium deum
bonum alium mundi asserens, creatorem, quorum insania multiplex est, quia et iniquitates
fuere quamplurimae. quem nos stultum prophetam diximus, septuaginta pseudoprophetam
interpretati sunt. et ne eadem saepe repetentes, uideamur lectoris prudentiae diffidere breuiter
admonemus, quicquid de israel et de ephraim in hoc propheta dicitur, ad haereticos esse
referendum, qui uere insanientes, contra deum loquuntur mendacia. speculator ephraim cum
deo meo, propheta laqueus ruinae factus est super omnes uias eius, insania in domo dei eius,
profunde peccauerunt; sicut in diebus gabaa, recordabitur iniquitatis eorum et uisitabit
peccata eorum.
lxx: speculator ephraim cum deo propheta; laqueus tortuosus super omnes uias eius, insaniam
in domo dei confinxerunt; corrupti sunt secundum dies collis; recordabitur iniquitates eorum;
ulciscetur super peccata eorum. idcirco deus principes dedit, ut populum corrigerent
delinquentem, et ad rectum iter retraherent. unde et ad hiezechiel loquitur: speculatorem te
dedi domui israel. ergo ieroboam quasi speculator datus in populo est, et quasi propheta cum
deo meo, hoc est cum deo, qui haec osee loquitur. at ille iuxta id quod supra scriptum est:
laqueus facti estis speculationi et rete expansum super thabor; et uictimas declinastis in
profundum, etiam nunc populi israel laqueus appellatur, eo quod omnes in laqueo eius
corruant, maxime cum insaniam in domo dei posuerit, siue confinxerit, id est in bethel
uitulum aureum fecerit, hoc enim interpretatur domus dei; et tam profunde in scelere
peccauerit, sic que et impietatis baratrum sit demersus, ut uincat scelus quod quondam
gestum est in gabaa, quando uxorem leuitae reuertentis de bethleem illicito necauere
concubitu. possumus dies gabaa et illud tempus accipere, quando pro deo elegerunt sibi
regem de urbe gabaa, id est saul. et multo nunc eos dicit maiora peccasse, elegendo ieroboam
et adorando idola, quam eo tempore, quo elegerunt saul; hic enim schismati etiam idololatria
copulata est, ibi uero dei cultus permansit in populo. ideo recordabitur iniquitatis eorum, qui
nunc per patientiam putatur oblitus, et uisitabit peccata eorum, et uulnera quae longo tempore
computruerunt. ueteres scrutans historias, inuenire non possum scidisse ecclesiam, et de
domo domini populos seduxisse, praeter eos qui sacerdotes a deo positi fuerant et prophetae,
id est speculatores. isti ergo uertuntur in laqueum tortuosum, in omnibus locis ponentes
scandalum, ut quicumque per uias illorum ingressus fuerit, corruat, et in christo stare non
possit, uariis que abducatur erroribus et semitis tortuosis ad praecipitia deferatur. hi sunt
speculatores ephraim, qui insaniam in domo domini confinxerunt, hoc est in ecclesia, siue in
scripturis sanctis, peruerse eas interpretantes, uel certe in unoquoque credentium, qui domus
dei rectissime nominatur. propterea corrupti sunt et interierunt iuxta dies collis, quando
iniquitatem in excelsos locuti sunt, et ascenderunt in tecta uana. recordabitur deus iniquitatis
eorum, per quam inique gesserunt in proximum, educentes eum de ecclesia, et uisitabit
peccata eorum, quibus in suas animas peccauerunt. hoc est quod in psalmo legimus: iuxta
semitam scandalum posuerunt mihi. nisi enim quis dei uiderit semitam, id est, christi nomen
audierit, non ingredietur per eam. idcirco et haeretici sub nomine christi iuxta semitam
posuerunt laqueos, ut qui in christo calcare se credit, de quo legimus, quod ipse sit uia, calcet
et in eorum laqueis, qui insaniam in domo dei confinxerunt. quasi uuas in deserto inueni
israel, quasi prima poma ficulneae in cacumine eius; uidi patres eorum, ipsi autem intrauerunt
ad beelphegor et alienati sunt in confusionem; et facti sunt abominabiles sicut ea quae
dilexerunt. lxx: sicut uuam in deserto inueni israel, et sicut ficum in arbore ficus temporanea
uidi patres eorum; ipsi autem ingressi sunt beelphegor, et abalienati sunt in confusionem; et
facti sunt abominabiles sicut dilecti. pro quo in aliis exemplaribus legimus: et facti sunt
dilecti, quasi abominabiles, quod magis congruit ueritati. cum omnis orbis esset desertus, et
dei notitiam non haberet, inueni, ait, populum israel quasi uuam in solitudine; et quomodo
eum inuenerit, dicit: sicut prima poma ficulneae, in cacumine eius uidi patres eorum. ergo in
abraham et isaac et iacob inuentus est populus. et nota proprietatem: parentes uidentur,
populus inuenitur et in utroque uinea est et ficulnea, sub quibus requiescere dicitur qui
confidit in domino. ipsi autem educti de aegypto, fornicati sunt cum madianitis, et ingressi ad
beelphegor idolum moabitarum, quem nos priapum possumus appellare. denique interpretatur
beelphegor (hoc est idolum tentiginis) habens in ore, id est in summitate, pellem, ut
turpitudinem membri uirilis ostenderet. et quia intrauerunt ad beelphegor, idcirco abalienati
sunt a deo, confusioni suae, id est idolo, mancipati; ut propter quod recesserant a deo, illud
colerent, secundum quod scriptum est: a quo enim quis superatur, huius et seruus est; et sicut
gulae seruientes, habent uentrem deum; ita qui libidini seruiunt, habent deum beelphegor. et
facti sunt, inquit, abominabiles, sicut ea quae dilexerunt, iuxta illud quod scriptum est in
psalmis: similes illis fiant qui faciunt ea, et omnes qui confidunt in eis, ut non solum
idololatrae, sed idola nuncupentur. dicente autem domino in passione sua: torcular calcaui
solus et de gentibus uir non erat me cum. et in psalmo: saluum me fac, domine, quoniam
defecit sanctus. cum omnis mundus teneretur in peccato, gentes ignorarent deum, israel
reppulisset quem ante cognouerat primum in apostolis et in apostolicis uiris, inuenit dominus
israel populum christianum, et sensu uidentem deum; et dulcissimis eorum satiatus est
fructibus, uua et ficu, quae si in deserto inueniantur, et necdum maturo tempore, ob raritatem
maioris sunt gratiae. ipsi autem, hoc est israel, qui sibi christianum nomen assumunt, - neque
enim de patribus intellegendum est -, intrauerunt ad idolum beelphegor, quod habet in ore
pellem.
quicquid enim loquuntur haeretici, mortiferum est, et a uiuente dei sermone seiunctum. siue
intrauerunt ad libidinem; difficile est enim haereticum reperire, qui diligat castitatem; non
quod eam praeferre desistat in labiis, sed quod non seruet in conscientia, aliud loquens, et
aliud faciens; unde et alienati sunt a deo, et habent gloriam in confusione sua, et facti sunt
abominabiles, qui prius diligebantur in patribus. si autem uoluerimus legere: facti sunt
abominabiles sicut dilecti, quod tamen in hebraico non habetur, dicimus ita factos esse
gentiles, qui sunt abominabiles, quomodo et haereticos qui prius diligebantur in patribus, hoc
est: ut et hi et illi pariter abominabiles sint et culpae rei. ephraim quasi auis auolauit; gloria
eorum a partu et ab utero et a conceptu. quod et si enutrierint filios suos, absque liberis eos
faciam in hominibus. sed et uae eis cum recessero ab eis. ephraim, ut uidi, tyrus erat fundata
in pulchritudine; et ephraim educet ad interfectorem filios suos. lxx: ephraim quasi auis
auolauit; gloria eorum in partu et in parturitionibus et conceptu; quia etiam si enutrierunt
filios suos, sine filiis erunt in hominibus, quia et uae eis est; caro mea ex eis. ephraim, sicut
uidi, in captionem praebuit filios suos; et ephraim, ut educeret ad interfectionem filios suos.
multum in hoc loco inter se discordant interpretes. in eo enim loco, in quo nos diximus: uae
eis cum recessero ab eis, septuaginta et theodotio transtulerunt: uae eis, caro mea ex eis,
quaerens que causam cur sit tanta uarietas, hanc mihi uideor repperisse: caro mea, lingua
hebraea dicitur basari; rursum si dicamus: recessio mea, siue declinatio mea, dicitur basori.
septuaginta igitur et theodotio pro eo, quod est recessio mea et declinatio mea, uerterunt: caro
mea. rursum ubi nos posuimus: ephraim, ut uidi, tyrus erat, septuaginta interpretati sunt
thêran~g, id est uenationem, siue capturam; aquila et symmachus et theodotio, petram
durissimam, id est silicem, quae lingua hebraica appellatur sur, quod si legamus sor, tyrus
dicitur. putantes autem septuaginta interpretes ob litterarum similitudinem res, et daleth, non
esse res, sed daleth, legerunt sud, id est uenationem, siue capturam, unde et bethsaida domus
dicitur uenatorum. diuersitatem interpretum diximus, reuertamur ad sensum. ephraim, id est
decem tribus, quasi auis auolauit in captiuitatem et de suo recessit loco. auem autem
appellauit, ut uelocem in babylonem transitum demonstraret. sin autem legerimus, quasi auis
auolauit gloria eorum, hoc dicimus, quod dei ab eis recesserit et auolauerit auxilium. quod
que sequitur, a partu et ab utero et a conceptu, dupliciter intellegi potest, ut gloria quae
auolauit ab ephraim, etiam a partu et ab utero et a conceptu eorum recedat, hoc est: deserat
filios eorum, et posteros derelinquat. aut certe dicimus, omnem gloriam israel habuit in
multitudine, et in eo se maiorem arbitratus est iuda fratre suo, quia ipse decem tribubus, ille
duabus praefuit. unde dominus loquitur, quod etiam si enutrierint filios, et liberorum
multitudinem congregarint, tradentur neci; et tunc eis uerum incumbat uae, cum ab eis
recesserit deus. et consequenter exponit, qualis quondam fuerit ephraim, qui nunc desertus
est; tam pulcher, inquit, erat et sic dei uallabatur auxilio, ut tyrus mari cingitur, uel certe, ut
scopulus durissimus, qui fixus in terra, omnes contemnit procellas, et de turbinibus uentis que
non curat. ipse autem, id est ephraim, siue tyrus, quae erat fundata in maris plenitudine,
educet ad captiuitatem filios suos. multi hoc capitulum ad azaelis tempora referunt, qui
obsedit samariam, et longo tempore afflixit fame, ut leuius arbitrarentur obsessi gladio perire,
quam inedia. nos autem dicamus iuxta tropologiam, ephraim, id est haereticos, quasi auem de
ecclesia recessisse, et omnem habere gloriam in partu, et in utero, et in conceptu, si multos
genuerint filios quos dominus comminatur, etiamsi enutriti fuerint, et puniendos, non ab alio
quolibet sed ab ipso domino, quoniam filios fornicationis generarint; et uerum illis sit uae,
cum deus recesserit ab eis. simul que replicat qualis fuerit ephraim; quando, inquit, erat in
ecclesia, ita saeculi huius temptationibus, quasi tyrus maris fluctibus tundebatur, et tamen
nihil aduersi poterat sustinere, quia habebat fundamentum christi, super quo aedificata domus
euerti non potest. nunc autem filios suos educit ad interfectorem, hoc est ad diabolum. et
pulchre dixit: educit, id est de ecclesia facit exire foras. possumus filios ephraim cogitationes
pessimas dicere et contraria dogmata ueritati, quae interficit dominus spiritu oris sui, et eos
tales liberos habere non patitur, et aeterno interitui derelinquit. quod autem in septuaginta
legimus: caro mea ex eis, ephraim, quomodo uidi, in uenationem praebuit filios suos, ita
intellegimus: si christus caput est corporis, id est ecclesiae, omnes nos christi et ecclesiae
membra sumus.
qui ergo de ecclesia recesserit, christi corpus lacerat; igitur ephraim caro fuit et membrum
domini saluatoris. sed in uenationem praebuit filios suos, in uenationem autem eorum de
quibus scriptum est: anima nostra sicut passer erepta est de laqueo uenantium. et eduxit de
ecclesia liberos suos ad occisionem, siue ad uulnerandum, ut uulnerentur ab his qui mittunt
ardentes sagittas, ut percutiant pariter et exurant. da eis, domine; quid dabis eis? da eis
uuluam sine liberis et ubera arentia. lxx similiter. si his quae deus pro benedictione donauit,
male abutamur, et in contrarium quam ab eo data sunt conuertantur, expedit ut auferantur a
nobis. denique lingua data est ad laudandum dominum deum, et quae bona sunt eloquenda. si
quis ea abutatur in blasphemiam, contra hunc psalmista dominum deprecatur: muta fiant labia
dolosa, quae loquuntur aduersus iustum iniquitatem in superbia et in abusione. et in alio loco:
disperdat dominus uniuersa labia dolosa et linguam magniloquam. quia igitur ephraim
gloriabatur in utero, et in conceptu, et in partu, et in populorum multitudine, propheta
dominum deprecatur et dicit: da eis, domine. sibi que ipse respondit: quid dabis eis? et statim
infert: da eis uuluam sterilem, et ubera arentia, ne habeant causas superbiae, ut in quo sibi
gloriari solent, in eo confundantur. quod et de magistris contrariorum dogmatum intellegi
possit, perspicuum est, qui in populorum multitudine gloriantur, et in iis liberis quos
nutrierint in interitum, ut educerent eos de ecclesia et inducerent ad interfectorem. tot enim
diabolus iugulat, quot haeretici in errore genuerint filios. de istiusmodi anima dicitur: beata
sterilis immaculata, quae non cognouit cubile in peccato. beatus enim est uir ecclesiasticus,
qui comparatione haeretici in errore filios non procrearit. et in alio loco legimus: melius est
filios non habere cum uirtute. ex iniquo enim concubitu semen peribit; et cum longi fuerint
temporis, reputabuntur in nihilum et ignobilis in nouissimis erit senectus eorum; fecunda
enim impiorum multitudo ad nihilum est utilis; neque enim aestimare debemus, quod uuluam
sterilem et ubera arentia corporaliter deprecatus sit. omnes nequitiae eorum in galgal, quia ibi
exosos habui eos. lxx similiter. in galgal saul in regem unctus est, samuele iram dei populo
nuntiante. ibi, inquit, exosos habui eos, et sibi regem hominem postulantes, a meo imperio
recesserunt. siue quia galgala idololatriae locus est; ibi omnia scelera commiserunt. uerum
quia galgala interpretatur reuelatio, aut kulismoi~g, id est uolutabra, omnes malitias
haereticorum dicit eo tempore reuelandas, cum eis dederit deus uuluam sterilem et ubera
arentia, et uiderint ignominiam suam. et qui se iactabant per superbiam, quod ad excelsa
conscenderint, deuoluentur in terram, siue ad inferos pertrahentur. uere haeretici odio dei
digni sunt, qui loquuntur contra deum mendacium, de quibus dicit in consequentibus: propter
malitiam adinuentionum eorum de domo mea eiciam eos. sequitur: non addam ut diligam eos,
omnes principes eorum recedentes, siue inoboedientes. quod et septuaginta similiter. et de
haereticis quidem non est dubium, quin de domo dei eiecti sint, et non addat ut diligat eos,
quamdiu in errore permanserint, omnes que principes eorum recedentes a deo sunt, siue
inoboedientes, ut ualentinus, marcion et ceteri. possumus principes haereticorum daemones
dicere, qui uere a domino recesserunt et appellantur principes, iuxta quod dominus loquitur in
euangelio: ueniet princeps mundi huius et inueniet in me nihil. et apostolus aduersus
potestates et principatus et rectores tenebrarum istarum pugnare nos dicit.
quaeritur autem iuxta historiam, quomodo de domo sua eiecerit eos, id est decem tribus, cum
in domo dei non fuerint? sed domum dei, uel terram sanctam appellabimus, in quam
introducti sunt, uel falsum nomen israelis uel quod ad eos quasi populum dei mittebantur
prophetae. quod autem non addat ut diligat eos, et omnes reges israel a deo fuerint recedentes,
perspicuum est; usque hodie enim permanent in captiuitate. alii hoc quod scriptum est: de
domo mea eiciam eos, ad regnum iuda referri arbitrantur, quod et ipsi ducendi sint in
captiuitatem. sed quomodo eis poterit coaptari non addam ut diligam eos, cum postea
hierosolymam sint reducti; et omnes principes eorum recedentes, cum legerimus dauid, asa,
iosaphat, ezechiam et iosiam reges fuisse iustos? unde ad christi tempora transeundum est
quod in aduentu eius eiecti sint de domo dei, et nequaquam saluentur ut israel, sed ut populus
christianus. unde et dominus fecit sibi flagellum de funiculis, et eiecit eos de templo, quia
domum patris eius fecerant domum negotiationis. percussus est ephraim; radix eorum
exsiccata est; fructum nequaquam facient; quod et si genuerint, interficiam amantissima uteri
eorum. abiciet eos deus quia non audierunt eum; et erunt uagi in nationibus. lxx: doluit
ephraim radices suas; arefactus est, fructus nequaquam affert; quia et si genuerint, interficiam
desiderabilia uteri eorum. repellet eos deus quia non audierunt eum; et erunt uagi in
nationibus. metaphoram sumit ab arbore, cuius si radices aruerint, fructum afferre non poterit,
et si paululum fecerit, statim in ipso flore siccabitur. dicit autem de ephraim, cuius radix aruit,
quia deum in quo fundatus erat, perdidit, siue patres suos abraham, isaac et iacob, in quibus
radicem miserat, habere non meruit; et propterea fructum iustitiae non facit; quod et si fecerit:
interficiam, inquit, amantissima uteri eius, iuxta id quod supra dixerat: si enutrierint filios
suos, absque liberis eos faciam in hominibus; unde et abiecit eos deus, et fecit ire captiuos. et
erunt uagi in nationibus. possumus hoc ipsum et de omnibus iudaeis dicere quorum quia
principes a deo recesserunt, commouentes populum, ut eum ad mortem expeterent; propterea
eiecit eos de domo sua et non addet, ut ultra diligat eos. percussit radicem eorum et
exsiccauit, et fructum ultra non facient; quod et si fecerint, et uisi fuerint scripturam sanctam
legem que meditari, et quasi amantissimos filios aliquid scientiae atque doctrinae de suo
corde protulerint, aduersante domino, succidentur. abiecit enim eos deus omnium
prophetarum, quia non audierunt eum; et uagi erunt in nationibus, non habentes altare, non
sedem, non ciuitatem propriam. unde et dauid loquitur in psalmo: ne occidas eos, ne quando
obliuiscantur populi mei: disperge illos in uirtute tua. et in alio loco: secundum multitudinem
impietatum eorum expelle eos, quoniam irritauerunt te domine. de hac arbore etiam in
euangelio legimus: iam securis ad radices arborum posita est. omnis arbor quae non facit
fructum bonum, excidetur et in ignem mittetur. haereticos fructus facere non posse uirtutum,
quia dominum perdiderunt, quo iuxta apostolum radicati esse debuerant et fundati, nemo
dubitat; quod et si fecerint, et aliquos uteri sui fecunditate generarint, domino aduersante,
morientur. siue quia fructus eorum sunt uniuersa quae fingunt, et de suo corde generant,
arefient et peribunt; et erit cunctis perspicuum, siccam radicem fruges afferre non posse. isti
abicientur, immo abiecti sunt a deo; quia non audierunt eum dicentem: ne transferas terminos
quos posuerunt patres tui. et idcirco uagi erunt in nationibus, nunc ad has, non ad illas
sententias transeuntes; dum non eis placet, quod semel reppererint, sed semper uetera mutant
nouis et ethnicorum imitantur errores.
Caput 10
uitis frondosa israel, fructus adaequatus est ei; secundum multitudinem fructus sui
multiplicauit altaria, iuxta ubertatem terrae suae exuberauit simulacris. lxx: uitis frondosa
israel, fructus abundans in ea; secundum multitudinem fructuum suorum multiplicauit altaria,
iuxta bona terrae eorum aedificabunt titulos. pro uite frondosa, aquila interpretatus est,
enudron~g, quam nos aquosam, uel exitêlon~g, possumus dicere, eo quod uini perdat
saporem. symmachus hulomanousan~g, quae tota in frondibus creuerit. uites quae putatae a
uinitore non fuerint, in flagella frondes que luxuriant, et humorem quem debuerant in uina
mutare, uana frondium et foliorum ambitione disperdunt; istiusmodi uitis damnosa est
agricolis.
talis fuit israel, crescens in multitudine populorum, et non reddens fructus agricolae deo.
dicamus et aliter: uitis frondosa siue iuxta septuaginta euklêmatousa~g, id est: bonas habens
propagines et flagella fructifera, multos botros attulit, et uuarum fecunditas ramorum
magnitudinem coaequauit; sed haec quae prius talis erat antequam offenderet deum, postea
abundantiam fructuum uertit in offensae multitudinem, ut quanto plures haberet populos,
tanto plura aedificaret altaria, et abundantiam terrae numero uinceret idolorum. pro
simulacris, septuaginta uerterunt stêlas~g, quas non statuas uel titulos appellamus, qui proprie
daemonum sunt, aut hominum mortuorum. ita et haeretici dum essent in ecclesia plantati, et
crescerent in domo dei, uocabantur uinea sorec, et afferebant uberrimos fructus; postea uero
quanto plures facti sunt, tanto sibi multiplicauerunt altaria, ut pro uno altari quod uerum est,
plures errori sui aras exstruerent, et iuxta ubertatem terrae suae exuberauerunt simulacris.
haereticorum terra fecunda est, qui a deo acumen sensus et ingenii percipientes, ut bona
naturae in dei cultum uerterent, fecerunt sibi ex his idola. nullus enim potest haeresim struere,
nisi qui ardentis ingenii est, et habet dona naturae quae a deo artifice sunt creata. talis fuit
ualentinus, talis marcion, quos doctissimos legimus. talis bardesanes cuius etiam philosophi
admirantur ingenium. isti ergo terrae suae bona uerterunt in titulos mortuorum, quia omnis
doctrina eorum non ad uiuentes refertur sed ad mortuos, tam eos quos colunt, quam illos quos
decipiunt. diuisum est cor eorum; nunc interibunt, ipse confringet simulacra eorum
depopulabitur aras eorum. lxx: diuiserunt corda sua; nunc peribunt; ipse suffodiet altaria
eorum; affligentur tituli eorum. tradunt hebraei huiuscemodi fabulam, suspicionem suam
scripturarum auctoritate confirmantes: quamdiu et reges et populi pariter uitulos aureos
adorabant, et habebant in impietate consensum, non uenit captiuitas. extremus rex decem
tribuum fuit osee, de quo scriptum est quod fecerit quidem malum in conspectu domini; sed
non sicut reges israel, qui fuerunt ante eum, cuius nono anno salmanasar, rex assyriorum,
cepit populum israel, et eduxit eos in assyrios, et habitare fecit iuxta flumen gozan in
ciuitatibus medorum. quaeritur ergo quare sub pessimis regibus capti non fuerint, sed sub eo
qui coeperat ex parte aliqua ad meliora conuerti? ad quod haec inferunt: excusabat se primum
populus et dicebat: regum paremus imperiis nec possumus eorum resistere tyrannidi; colimus
uitulos quos adorare compellimur. in diebus autem osee ab eodem rege praeceptum est, ne
tanto studio uituli colerentur, sed qui uellet iret in hierusalem et in templo sacrificaret deo;
huic, aiunt, sententiae populus contradixit. et hoc est quod nunc dicit: diuisum est cor eorum,
hoc est regis et populi, et nulla excusatione remanente, nunc interibunt et tradentur aeternae
captiuitati; statim enim ut populus discessit a rege, uenit interitus. quod que sequitur: ipse
confringet simulacra eorum, de deo dicit: aras que depopulabitur; non quia deus ipse propria
hoc fecerit manu, sed quo per hostes uoluntas eius expleta sit. haereticorum inter se corda
diuisa, et contrariis repugnare sententiis, etiam ipsi non negant, dum diuersa sentiunt. unde
disperdentur, et confringet siue suffodiet dominus simulacra uel altaria eorum, quae de suo
corde finxerunt; et uastabit titulos quibus singuli quis appellantur nominibus; et uocauerunt
nomina sua super terras suas, ut nequaquam christi ecclesiae, sed illius uel illius esse
dicantur. quia nunc dicent: non est rex nobis; non enim timemus dominum, et rex quid faciet
nobis? loquimini uerba uisionis inutilis et ferietis foedus, et germinabit quasi amaritudo
iudicium super sulcos agri. lxx: propterea nunc dicent: non est rex nobis, quia non timuimus
dominum, rex autem quid faciet nobis? loquens uerba, occasiones mendaces; disponet
testamentum, orietur sicut gramen iudicium super desertum agri. postquam confregerit deus
simulacra israel, et depopulatus fuerit aras uel statuas eorum, et extrema captiuitas uenerit,
dicent: non est rex nobis. et ne in longum tempus putent sententiam protelari, addidit: nunc
dicent, quando uastantur, quando sentient osee regem ultimum a se esse sublatum; ideo autem
rex ablatus a nobis est, quia non timuimus dominum uerum regem; homo enim rex prodesse
quid poterat? dicite quid uultis, errores ueteres suspirate, pollicemini uobis prospera, quae
uertentur in contraria, foedus ferietis, nequaquam cum deo, sed cum mendacio. et post foedus,
quod septuaginta interpretati sunt testamentum, germinabit uobis, non seges fecunda
frumenti, non saltim iumentorum cibus, hordeum, non legumina uaria, non uites quae fructus
suos in musta desudant, non poma arbores germinabunt quae humorem terrae in uarios
mutant sapores; sed orietur uobis amaritudo, immo amaritudinis iudicium, siue agrôstis~g,
quam latine in gramen uertimus. est enim genus herbae calamo simile quae per singula
genicula fruticem sursum et radicem mittit deorsum, rursus que ipsi frutices et uirgulta
alterius herbae seminaria sunt, atque ita in breui tempore si non imis radicibus effodiatur,
totos agros ueprium similes facit. denique etiam si sicca eius aliqua pars, dummodo
geniculum habeat, super cultam terram ceciderit, omnia replet gramine.
haec diximus iuxta lxx interpretes, ceterum in hebraico ros scriptum habet, quod in
amaritudinem uertitur, hoc est amaritudinis iudicium, de quo et dominus loquitur in
euangelio: in iudicium ego in mundum istum ueni; et de aliis scriptum est, quod recipiant
amplius iudicium. discipuli quoque contrariorum dogmatum, cum eorum fuerint contrita
mendacia, et arae luci que subuersi, sero dicent: non habemus reges qui nobis prius
imperauerant, quibus decipientibus, dominum non timuimus; quid enim nobis profuit eos
sequi, quorum in necessitate non sentimus auxilium? haec loquentur quaerentes aliquam
excusationem, ut non per se, sed per doctores pessimos errasse uideantur. unde et lxx uerba
eorum, excusationes falsas transtulerunt, quas propheta deuitat dicens: ne declines cor meum
in uerba malitiae, ad excusandas excusationes in peccatis. libenter uitiis nostris applaudimus,
et superati uoluptatibus, obtendimus carnis infirmitatem, aut dura maiorum imperia; unde
uerba et uisiones haereticorum inutiles erunt. et ferient foedus, nequaquam cum deo, sed cum
amaritudine, quae cum dies iudicii aduenerit, germinabit super sulcos agri eorum; ut qui
seminauerunt in gaudio, metant in lacrimis; qui riserunt, fleant; qui habuerunt consolationem,
lugeant.
Liber3
Caput 10 cont.
non ignoro, pammachi, difficillimum me duodecim prophetarum opusculum cudere, certe
intermissum a latinis, et quod magis temeritatem nostram possit arguere, quam scientiam
prodere. sed quia tibi hortanti, immo imperanti, negare nihil possumus, et pro efferentium
uiribus in gazophylacium dei, multorum diuitias duo mulieris pauperis aera superarunt.
quicquid possumus, primum deo, deinde tibi, qui dei es, soluimus; illius que semper uersiculi
recordamur: pollio et ipse facit noua carmina. cum que apertum fautorem pro iure amicitiae
esse te gaudeam, tacitum eruditionis tuae iudicium pertimesco, magis que te laudantem, quam
aduersarios detrahentes metuo. illis enim aemulatio detrahit fidem, et non tam iudices quam
accusatores uocandi sunt. tu autem qui diligis, nequaquam personarum, sed rerum promis
sententiam; quamquam et amor recipiat errorem, pulchrum que sit illud theophrastion~g,
quod tullius magis ad sensum, quam ad uerbum interpretatus est, tuphlon~g to~g philoun~g
peri~g to~g philoumenon~g, id est, amantium caeca iudicia sunt. attamen in istam partem
peccato magis, ut labaris non odio, sed amore. tertium in osee prophetam dictamus librum, et
ad uaccas bethauen usque peruenimus; nobis que interpretationis uela pandentibus, tu debes
illud propheticum dicere: a quattuor uentis caeli ueni, spiritus, ut celeri cursu auaros
insidiantium scopulos transeuntes, merces dominicas, ex omni parte saeuiente naufragio, ad
portus tutissimos perferamus. uaccas bethauen coluerunt habitatores samariae, quia luxit
super eum populus eius; et aeditui eius super eum exsultauerunt in gloria eius, quia migrauit
ab eo. siquidem et ipse in assur delatus est, munus regi ultori, confusio ephraim capiet;
confundetur israel in uoluntate sua. lxx: apud uitulum domus ôn~g morabuntur qui habitant in
samaria, quia luxit populus eius super eum. et sicut irritauerunt illum, gaudebunt super gloria
eius, quia translata est ab eo; et ipsum in assyrios ligantes, tulerunt munera regi iarib in domo.
ephraim suscipiet confusionem, confundetur israel in consilio suo. quae sit bethauen, pro qua
lxx transtulerunt domum ôn~g, et qui sit rex iarib, qui interpretatur ultor, supra plenius
disputauimus. in bethauen igitur, id est bethel, uaccas aureas coluerunt habitatores samariae,
quas cum irrisione non uitulos sexus masculini, sed uaccas, id est feminas, appellauit, ut
uidelicet israel non solum deos uitulos, sed deas uaccas coleret. et ut ostenderet uaccas
bethauen, unum in bethel uitulum sentiendum, non intulit, luxit super eis populus, sed super
eo, id est uitulo aureo. si autem luxit populus, quare aeditui eius super eum exsultauerunt?
tradunt hebraei uitulos aureos a sacerdotibus furto esse sublatos, et pro his aeneos et
deauratos repositos. cum igitur lugeret populus tempore necessitatis et angustiae, etiam
uitulos aureos inter munera caetera assyriis regibus et maxime regi sennacherib ab israel rege
esse directos, exsultabant aeditui, quod fraus eorum nequaquam possit argui uel deprehendi.
et hoc est quod ait: aeditui eius, id est uituli, super eum exsultauerunt in gloria populi, hoc est
in uitulo, quem habebant pro gloria; quia migrasset ab eo, id est a populo, et translatus esset
ad assyrios. et ut sciamus, inquiunt, hoc esse quod dicitur, perspicue sequens uersus ostendit:
siquidem ipse in assur delatus est, munus regi ultori. statim que sequitur: confusio ephraim
capiet, et confundetur israel in uoluntate sua, siue in consilio suo. deprehensa enim fraus
deauratorum uitulorum regi israel litteris indicatur, et unde se placere aestimauerant, inde uel
maxime confunduntur, et offendunt eos quibus munera miserant, aestimantes non furto
sacerdotum, sed fraude regum atque consilio hoc esse perfectum. legimus in regum uolumine,
regem israel manahen regi assyriorum phul mille argenti talenta misisse, ut esset manus eius
cum eo, id est: ut ei praeberet auxilium, inter quae nonnulli arbitrantur etiam uitulos aureos
esse delatos.
pro iarib in praesenti loco symmachus interpretatus est hupermachêtêi~g, id est praesuli et
defensori. iuxta spiritalem intellegentiam laborandum est, quomodo omnia haereticis
coaptemus. uaccas bethauen, siue domus ôn~g, quod interpretatur labor, coluerunt haeretici,
qui se in custodia mandatorum dei, hoc est samaria, habitare iactabant, die que iudicii quando
germinabit quasi amaritudo iudicium super sulcos agri, lugebit populus super eum, hoc est
super uitulum, et super dogma peruersum quod putabat deum. sed et aeditui, non dixit:
exsultabunt, sed: exsultauerunt, ad praeteritum tempus referens super gloria sua, qua
quondam gloriosa confixerant, eo quod migrasset populus a deo, siue quod ipsa gloria dei
migrasset a populo, a quo fuerat derelicta. quicquid autem loquuntur haeretici, et pulchro
sermone componunt, mittunt munera regi suo diabolo, ad illum cuncta referentes, unde
confusio eos capiet in aeternum et confundentur in uoluntatibus suis. quidam et supra et in
praesenti loco in commentariis suis scriptum reliquit, regem iarib, id est ultorem, christum
intellegendum. quod nobis omnino displicet. impium enim est quod iuxta historiam
intellegitur de rege assyrio, iuxta tropologiam ad christum referri. transire fecit samaria regem
suum quasi spumam super faciem aquae, et disperdentur excelsa idoli, peccatum israel. lappa
et tribulus ascendet super aras eorum; et dicent montibus: operite nos; et collibus: cadite
super nos. lxx: proiecit samaria regem suum sicut cremium super faciem aquae, et auferentur
arae ôn~g, peccata israel. spinae et tribuli ascendent super altaria eorum; et dicent montibus:
operite nos; et collibus: cadite super nos. pro spuma, quam lxx et theodotion phruganon~g, id
est cremium, transtulerunt aridas herbas sicca que uirgulta, quae camino et incendio
praeparantur, symmachus posuit epizema~g, uolens ostendere feruentis ollae superiores
aquas, et in spumam bullas que assurgentes, quas graeci pompholugas~g uocant. sicut igitur
spuma, quae super aquam est, cito dissoluitur, sic regnum decem tribuum uelociter finietur; et
peribunt excelsa, id est bamoth, de quibus scriptum est: uerumtamen adhuc populus
immolabat et adolebat in excelsis. ipsa autem excelsa ôn~g sunt, siue auen, id est idoli, quod
interpretatur inutile, quod idolum et inutile peccatum est israel. dissipato autem idolo et
excelsis eius. lappa et tribulus ascendet super aras eorum. signum ultimae solitudinis, ut ne
parietes quidem et extrema aedificiorum uestigia relinquantur. eo tempore dicent montibus:
operite nos; et collibus: cadite super nos. quod dominus in ultimo tempore captiuitatis
iudaicae dicit esse complendum. quicquid ergo nunc contra decem tribus, siue contra omnem
dicitur israel, sciamus tupikôs~g etiam ad totum populum posse transferri, ut quando romani
ceperint hierusalem, et subuerterint templum siue cum iudicii dies uenerit, ut alii suspicantur,
dicant magno horrore metuentes, montibus: operite nos; et collibus: cadite super nos, mori
magis optantes quam cernere quae afferunt mortem. sed et spiritalis nequitiae samaria, quae
se a populo dei diuiserat, fecit regem suum transire uelociter, sermonem uidelicet
haereticorum, atque doctrinam quasi spumam, siue cremium super faciem aquae, quorum
aliud dum uidetur, repente dissoluitur, aliud facile est tollere de aquarum summitatibus, et in
ignem mittere. tales sunt haeretici spumantibus uerbis tumentes, et arsura praecepta christi
baptismati ac sermonibus illius commiscentes. quae omnia pertransibunt et uerba magnifica
in quibus laborauerunt, quod interpretatur ôn~g, illico dispergentur, in quibus peccauit israel;
tanta que erit solitudo doctrinae pessimae, ut spinae et tribuli ascendant super aras eorum.
spinas et tribulos ibi nasi, ubi agrorum nulla cultura est, omnibus patet. istae spinae sunt quae
suffocant sementem, et crescere non sinunt quae nascuntur in manu temulenti, quas pro uua
fecit israel. dominus enim exspectauit ut faceret uuas et fecit spinas, siue labruscam habentem
uuae similitudinem, et amaro gustu uescentium ora torquentem. ideo cum iudicii tempus
aduenerit, et fuerint cuncta subuersa, dicent montibus, quos prius excelsos putabant, et
magistris quondam suis: operite nos; collibus que: cadite super nos. sed quia in montibus
posuit: operite; et in collibus: cadite, sacratius aliquid explanandum est. montibus, id est:
sanctis qui ueram habent et non fictam altitudinem, dicent: operite nos.
beati enim quorum opertae sunt iniquitates. et collibus qui non habent altitudinem naturalem,
quos dudum putabant aliquid habere summitatis, loquentur: cadite super nos; montes enim
operient, et colles cadent; haec autem fient prae pauore et incredibili formidine, per quam et
montes et colles humiliabuntur. ex diebus gabaa peccauit israel; ibi steterunt. non
comprehendet eos in gabaa proelium super filios iniquitatis. iuxta desiderium meum
corripiam eos; congregabuntur super eos populi cum corripientur super duas iniquitates suas.
lxx: ex quo colles sunt, peccauit israel; ibi steterunt. non comprehendit eos in colle bellum
super filios iniquitatis; uenit ut corriperet eos et congregabuntur super illos populi, quando
correpti fuerint in duabus iniquitatibus suis. ex eo die quo uxorem leuitae turpiter atque
crudeliter interfecit beniamin in urbe gabaa, peccauit mihi omnis israel; non quia ultus est
iniuriam et scelus sanguine uindicauit, sed quia dolore maritali prosiliuit ad pugnam et
sacrilegium in deum suum noluit uindicare; eo quod in domo michae ephod et theraphim
quae pro idolis adorabantur, neglexerit. hic igitur stetit israel; ibi suum repressit gradum, ne
ultra ambularet in uiis domini. idcirco non eos comprehendet propter gabaa proelium, siue
captiuitas, sicut ipsi putant; ibi enim bene fecerunt ut persequerentur filios iniquitatis; sed
corripiam, inquit, eos atque erudiam tota mei animi uoluntate, et congregabo aduersus illos
populorum multitudinem, quia duas fecerunt iniquitates, uindicando hominem, et dei sui
iniuriam neglegendo. siue duas iniquitates, quia primum peccauerunt in idolis michae,
secundo in uitulis ieroboam. uel certe duos uitulos samariae in dan et bethel, possumus duas
iniquitates appellare, de quibus et hieremias loquitur: duo pessima fecit populus meus;
dereliquerunt fontem aquae uiuae, et foderunt sibi lacus contritos, qui non possunt aquas
continere. hae duae iniquitates contra duo decalogi erupere praecepta, in quibus dicitur: ego
dominus deus tuus; non erunt tibi dii alii absque me. septuaginta gabaa colles interpretati
sunt. a diebus ergo collium peccauit israel, quando montes ecclesiae dereliquit, et ad colles,
siue cliuos descendit haereticos; doctiorem se putans quam ecclesia est, et sublimius aliquid
repperisse: ibi steterunt, hoc est: in errore perseuerauerunt quod que sequitur: non
comprehendet eos in colle proelium, quidam sic interpretati sunt: quia genuerunt filios
iniquitatis, et de ecclesia recedentes, coeperunt esse in collibus, cum persecutio aduenerit, non
eos comprehendet proelium, diaboli suos impugnare nolente. alii ita: quoniam ex diebus
collium peccauit israel, et ibi stetit et ultra ambulare non potuit, nonne oportet eum in collibus
a proelio comprehendi? nonne debent pugnare aduersus eum uiri ecclesiastici, ut illos
destruant super filios iniquitatis? qui si fuerint comprehensi et superati, ultra generare non
poterunt. simul que dominus pollicetur, quod corripiat eos atque erudiat, ut cum superati
fuerint magistri, congregentur aduersus eos discipuli sui, quos ante deceperant et uideant
correptionem propter duas iniquitates; quia et ecclesiam fontem domini reliquerunt et
foderunt sibi lacus contritos, speluncas scilicet haereticorum, qui non possunt aquas, id est
doctrinam saluatoris et sacramentum baptismi continere. ephraim uitula docta diligere
trituram et ego transiui super pulchritudinem colli eius; et ascendam super ephraim; arabit
iudas, confringet sibi sulcos iacob. lxx: ephraim uitula, - siue uacca; etenim quod hebraice
dicitur egla, id est moschos~g et damalis~g, utrumque significat -; ephraim ergo uitula edocta
diligere contentionem; ego autem ueniam super pulchritudinem colli eius; superponam
ephraim et reticebo iudam; roborabitur sibi iacob. locus iste, immo omnia quae hoc capitulum
sequuntur, magnis obscuritatibus inuoluta sunt. unde et nos qui explanare conamur, et
prudens simul lector attendat, ut si non ueritatem, quod difficillimum est, saltim suspicionem
uerisimilium inuestigare ualeamus. hanc habet consuetudinem sermo diuinus, ut per
tropologiam et metaphoram historiae exprimat ueritatem. igitur ephraim similis est uaccae uel
uitulae, quae a iuuentute sua didicit aream terere, et ferreos orbes super aceruos segetum
trahere, ut paleae a tritico separentur; et non solum didicit, uerum nimia consuetudine coepit
amare, quod docta est. et ego, inquit, transiui super pulchritudinem colli eius. uerbum
hebraicum abarthi, id est transiui, maxime quando a deo dicitur, semper plagas et aduersa
significat. denique et exterminator in aegypto transisse memoratur. quia ergo ephraim uacca
uel uitula diligit aream terere, ego, inquit, transiui super pulchritudinem colli eius, et tumentes
ceruicum toros iugo imposito edomui. quid memorem legis iugum? ipse ascendi super eam et
me ita laborante, iudas, hoc est duae tribus coeperunt arua scindere uomere, et in sulcos
terram reclinare.
portante autem iugum ephraim et arante iuda, confregit sibi sulcos iacob. hic iacob ad
distinctionem israel et iudae, duodecim tribus intellegamus, quod coeperint rastris glebas
frangere, terram que comminuere; ut emollita recipiat sementem et fecunda post modicum
seges pullulet. pro tritura uel area, contentionem septuaginta transtulerunt, et est sensus: quia
ephraim non uult legis iugum recipere, ego transibo et ascendam super pulchritudinem colli
eius, ut discat contentiosa uacca atque lasciuiens laborare, quod non uult. iudas autem arabit
sponte sua, quia habet templum; et moratur in lege, ut tota certatim duodecim tribus arua
praeparent ad serendum. quod que sequitur iuxta eosdem septuaginta: superponam ephraim et
reticebo iudam; roborabitur sibi iacob; hic esse sensus potest: ephraim qui contentiosus est et
non uult legis onera portare, imponam captiuitatem. iudam autem parumper relinquam, et
nihil loquar de eo, quicumque autem tam de ephraim, quam de iuda mea praecepta seruauerit,
roborabitur sibi et uocabitur iacob. secundum anagôgên~g hoc dici potest, quod ephraim qui
eruditus fuit in lege dei, ut tereret aream scripturarum, et meditaretur in ea die ac nocte, coepit
diligere contentionem et iugum legis abicere, et contendere contra ecclesiasticos in
subuersionem audientium. unde dominus eleuatam ceruicem et sibi sublimia promittentem,
uel iugo premet, uel ipse transiens calcabit pedibus suis, et ascendet super eum, ut sciat se
habere dominum. iudas autem, hoc est ecclesiasticus, arabit, in coepto opere perseuerans.
siue: reticebo, inquit, iudam. non enim sani indigent medico, sed qui male habent. iacob uero
qui interpretatur supplantator, et cotidie supplantat uitia atque peccata, et accipit primitiua
fratris sui, et haeres paternae possessionis est, et dormit in bethel, quod interpretatur domus
dei, sulcos glebas que confringet, ut molli sinu iactatam sementem terra suscipiat; et faciat
centum modios hordei, siue, ut habetur in hebraeo, centuplum. neque enim credendum est
quod patriarcha isaac hordeo studuerit et non frumento. usque hodie uir ecclesiasticus iacob
glebas historiae et litterae duritiam confringit in partes, et spiritaliter diuidit ut possint fruges
reddere spiritales. quod quidem et dominum fecisse legimus, ut quinque legis panes, quos
integros populus comedere non poterat, in frustra concerperet; ut per apostolorum manus
uescendos credentibus daret. quod autem dicit iuxta septuaginta: roborabitur sibi iacob,
ostendit sibi omnem laborantem laborare, ut fructus capiat sempiternos. seminate uobis in
iustitia et metite in ore misericordiae. innouate uobis nouale, tempus autem requirendi
dominum, cum uenerit qui docebit uos iustitiam. lxx: seminate uobis in iustitia, uindemiate
uobis fructum uitae; illuminate uobis lumen scientiae, quoniam est tempus; quaerite
dominum, donec ueniant fruges iustitiae uobis. seruat ab agricolis semel coeptam
translationem. dixerat ephraim uitulam edoctam trituram areae amare ac diligere, et se
ascendisse super collum eius, et arasse iudam, et confregisse sulcos siue glebas iacob. nunc
praecipit ut seminent sibi per paenitentiam, et seminent in iustitia, id est in lege, metant que
in misericordia, id est in gratia euangelii, ibi enim: oculum pro oculo, dentem pro dente; hic
legimus: qui te percusserit in dexteram maxillam, praebe ei et alteram. cum que seminaueritis
in iustitia, et messueritis in misericordia, innouate uobis laeta noualia. reddit que causas cur
seminent, cur metant, cur innouent laeta noualia. tempus, inquit, requirendi dominum est,
cum uenerit, christus atque saluator, qui docebit uos iustitiam; quam nunc speratis in lege:
finis enim legis christus est ad iustitiam omni operanti bonum. pro eo quod nos diximus:
metite in ore misericordiae, septuaginta transtulerunt: uindemiate uobis fructum uitae; magis
que semini conuenit messio, quam uindemia; fructus autem uitae ipse est, qui et lignum uitae.
et pro eo quod nos posuimus: innouate uobis nouale, illi uerterunt: illuminate uobis lumen
scientiae, ut ex operibus atque mandatis legis notitiam habere mereamur, iuxta illud quod in
quodam libro legimus: desiderasti sapientiam; serua mandata et dominus dabit eam tibi. qui
enim mandata in opera uerterit, seminat in iustitia et metet ex ea fructus uitae. unde et alibi
legimus: mandatum domini lucidum illuminans oculos. et esaias ad dominum dicit: lux
praecepta tua super terram.
et in alio loco: a mandatis tuis intellexi. his quoque, qui ab ecclesia separati sunt, et falsum
sibi christianorum nomen assumunt, praecipitur ut agant paenitentiam, et utrumque recipiant
testamentum; in ueteri iustitiam seminent, in nouo metant misericordiam; et illuminent sibi
lumen scientiae, siue innouent sibi noualia, et requirant dominum, qui docere eos potest
ueram iustitiam, falsos que magistros destruant, a quibus non discunt iustitiam, sed
iniquitatem. arastis impietatem, iniquitatem messuistis; comedistis frugem mendacii. lxx:
quid reticetis impietates, et iniquitates eius uindemiastis; comedistis fructum mendacem.
cogor contra uoluntatem meam saepius de hebraeae linguae proprietatibus disputare; neque
enim rhetorum more sententias repetimus, uerba construimus, et audientes uel legentes in
laudes nostras declamationibus suscitamus. sed quae obscura sunt, maxime alienae linguae
hominibus explanare nitimur. supra ubi nos interpretati sumus: arabit iudas, in hebraico
legitur ieros, per iod primam litteram, quam septuaginta uau putantes, interpretati sunt: et
tacebo? nunc quoque in hebraico scriptum est arasthem, quod uertimus arastis, pro quo
septuaginta transtulerunt: quid reticetis; simili errore quo supra, silentium pro aratione
interpretantes. est autem sensus iste dictorum: super collum uitulae ephraim contentiosae
amantis que trituram ego transiui; et ego ascendi, ut arante iuda, et confringente sulcos, iacob
tereret aream, et solis ferret calorem. monui que eos ut seminarent in iustitia, et meterent in
misericordia, et facerent sibi noualia; tempus que requirendi dominum illud esse
cognoscerent, quo uenturus est qui docebit nos iustitiam. me haec iubente et uolente de laetis
noualibus fructus iustitiae ac misericordiae accipere, arauerunt impietatem, quia egerunt
impie contra dominum, relinquentes creatorem, et colentes idola; et messuerunt iniquitatem,
de malo semine malas fruges recipientes, de quibus fecerunt non solum panem subcinericium,
sed fraudulentum atque mendacem, qui uana spe deciperet comedentem. istiusmodi sunt
haeretici, qui arant sermone composito et protegunt uel tacent impietatem, ne impietas esse
uideatur, sed credatur pietas. unde quia dixerunt in corde suo: non est deus, corrupti sunt et
abominabiles facti sunt, et messuerunt, siue uindemiauerunt iniquitates. quomodo enim radix
omnium malorum est auaritia, sic peccatorum scelerum que cunctorum radix est impietas,
quam qui arauerit, siue seminauerit, metet iniquitates. qui igitur arauerunt impietatem, et
messuerunt iniquitates, comederunt fructum mendacii, omnia quae falsa sunt deceptis populis
praedicantes, ut non quaerant panem uerum, qui de caelo descendit; sed panem mendacii, qui
suffocat et interficit deuorantes. quia confisus es in uiis tuis, in multitudine fortium tuorum,
consurget tumultus in populo tuo et omnes munitiones tuae uastabuntur; sicut uastatus est
salmana a domo eius, qui iudicauit baal in die proelii, matre super filios allisa, sic fecit uobis
bethel a facie malitiae nequitiarum uestrarum. lxx: quia sperasti in curribus tuis, in
multitudine fortitudinis tuae, consurget perditio in populo tuo et omnia murata tua abibunt;
sicut principes salmana de domo ierobaal in diebus belli matrem super filios alliserunt, sic
faciam uobis, domus israel, a facie malitiarum uestrarum. ideo comedistis frugem mendacii et
in cunctis quae proposuistis, spes uos uana decepit; quia confisus es, o ephraim, in uiis
idololatriae tuae; hae sunt enim uiae tuae et in multitudine fortium tuorum, non in deo habens
spem, sed in exercitus robore. itaque consurget tumultus in populo tuo, quod hebraice dicitur
saon, id est sonitus et fremitus ululantis exercitus, quibus clamantibus, omnes munitiones
tuae uastabuntur; et ea quae munita arbitrabaris et tuta, patebunt hostibus et sic uastabuntur,
quomodo uastatus est atque contritus salmana princeps madianitarum, qui interfectus est a
domo ierobaal. haud dubium quin gedeonem significet qui ex eo quod destruxit fanum baal,
lucum que succidit, et ille se uindicare non potuit, cognomentum ierobaal sortitus est, id est:
ulciscatur se baal; ut quomodo salmana interfecit filios coram matribus, ipsis quoque
matribus deinceps interfectis. sic et filii tui, o ephraim, te praesente interficiantur, qui et ipse
trucidandus es. quaerimus, ubi scriptum sit, quod salmana matrem super filiis occiderit;
legimus in iudicum libro loquente gedeone ad principem madian: quomodo absque liberis
fecit gladius tuus multas matres, sic sine filiis erit inter mulieres mater tua. sicut igitur
uastatus est salmana ab ierobaal, quem male quidam arbitrantur ieroboam filium nabath, qui
decem tribubus praefuit, et uastatus est, ut in hebraeo continetur, ab arbel id ipsum
significante, quod et ierobaal, sed breuiori disertiori que sermone; sic fecit uobis, o israel, a
facie malitiarum uestrarum bethel, in qua uitulum aureum posuistis, et estis uenerati aegyptios
deos. pro bethel, quod interpretatur domus dei, lxx transtulerunt domus israel, quod in
hebraeo penitus non habetur. euasimus utcumque de confragosis locis; nunc in altum uela
tendentes, allegoriae pelagus transeamus. quia confisus es, o ephraim, in uiis, siue in curribus
tuis, de quibus scriptum est: hi in curribus et hi in equis; nos autem in nomine domini dei
nostri magnificabimur; et confisus es in multitudine fortium tuorum, quos tibi falsa scientia
roborasti; ideo consurget tumultus et sonitus in populo tuo. quicquid enim loquuntur
haeretici, non habent uocem sententias explicantem, sed tumultum clamorem que et sonitum.
et omnes munitiones tuae, siue quae murata sunt, uastabuntur -, non enim testimoniis
scripturarum, sed arte dialectica, et argumentis philosophorum munita sunt atque constructa -;
sicut uastatus est quondam salmana a gedeone, matre super filiis interfecta. cuius historiae et
octogesimus secundus psalmus meminit, ubi inter ceteros duces madian etiam salmana fuisse
commemorat, dicens: fac eis, domine, - haud dubium quin eos significet qui contra deum
inierunt pactum siue testamentum -, sicut madian et sisarae. et post reliqua: pone, inquit,
principes eorum sicut oreb et zeb, et sebee et salmana, omnes principes eorum qui dixerunt:
hereditate possideamus sanctuarium dei.
et in hoc enim psalmo duces haeretici describuntur qui altare dei sibi uindicare conati sunt.
quod que sequitur: sic fecit uobis, bethel, a facie malitiae nequitiarum uestrarum, proprie
haereticorum principibus coaptatur, quod eis fecerit bethel quam ipsi uocant bethel, hoc est
domum dei, et falsam ecclesiam; ut sit sensus: sic uobis faciet ecclesia uestra quam uocatis
domum dei; ceterum ex quo a uobis tenetur, appellanda est bethauen, id est domus idoli,
propter multitudinem malitiarum uestrarum.
Caput 11
sicut mane transit, pertransiit rex israel, quia puer israel et dilexi eum, et ex aegypto uocaui
filium meum; uocauerunt eos, sic abierunt a facie eorum. baalim immolabant et simulacris
sacrificabant. lxx: mane proiecti sunt, proiectus est rex israel, quia paruulus israel, et ego
dilexi eum, et ex aegypto uocaui filios suos. sicut uocaui eos, ita abierunt a facie mea ipsi.
baalim immolabant et sculptilibus adolebant incensum. diuersis figuris eumdem explicat
sensum. qui supra dixerat: transire fecit samaria regem suum quasi spumam super faciem
aquae; eo quod spuma et bullae in aquarum summitatibus natantes celeriter dissoluantur, nunc
eamdem rem sub alia ponit similitudine. sicut enim ortus aurorae et diluculum et principium
diei, quod appellatur mane, inter noctis solis que uiciniam transit celeriter, ita ut finiatur nox
et clarescat dies, sic rex israel, id est decem tribuum uelociter transiet. exponit que beneficia
quae in ipsum contulerit deus. dum, inquit, esset puer et paruulus et captus in aegypto
teneretur, intantum eum dilexi, ut mitterem seruum meum moysen; et ex aegypto uocarem
filium meum, de quo dixi in alio loco: filius primogenitus meus israel. et quia israel
singulariter quidem dicitur, sed pluraliter intellegitur, quomodo et populus et ephraim et
iudas; siquidem in numero singulari multus est numerus, qui hoc numero continetur, ueteris
recordatur historiae, quod uocauerit quidem eos per moysen et aaron, qui uocauerunt eos, ut
egrederentur de aegypto; ipsi uero uocati ab eis recesserunt a facie eorum, uertentes ei terga et
mentis duritiam gestu corporis indicantes. nec eis suffecit uocantes contemnere, nisi
immolarent baal et sculptilibus, siue simulacris adolerent incensum. adorasse eos baal
primum sub achab rege israel legimus, qui sidonii regis filiam iezabel duxit uxorem et
babylonium ac phoenicis idolum transtulit in samariam. ergo distantia peccata temporibus,
uno sermone coniungit, quomodo primum uocati sint de aegypto et appellati filii, deinde in
solitudine recesserint a deo, beelphegor magis colentes, quam deum; et postea in terra sancta
baalim et astaroth et ceteris idolis seruierint. et transire haereticos instar diluculi et regem
eorum diabolum, uel haeresiarcham intellegimus, quos in infantia, - quando crediderunt in
ecclesia, et erant paruuli, et christi nomine censebantur -, dilexit eos deus; et uocauit illos de
tribulatione et tenebris aegypti. uocauit autem per apostolos et doctores ecclesiae. cum que a
meis, inquit, ducibus sint uocati, recesserunt a facie eorum, et adorauerunt beelphegor, hoc
est: suis uitiis et libidini seruierunt, et postea immolabant baalim et simulacris, quae sibi
confinxerant. singuli enim haereticorum habent deos suos, et quodcumque simulauerint, quasi
sculptile ponunt atque conflatile. pro eo quod nos diximus: ex aegypto uocaui filium meum,
septuaginta transtulerunt: ex aegypto uocaui filios eius, quod in hebraico non habetur; nulli
que dubium est, matthaeum de hoc loco sumpsisse testimonium iuxta hebraicam ueritatem.
ergo qui detrahunt nostrae interpretationi, dent scripturam, de qua euangelista hoc
testimonium sumpserit et interpretatus sit in domino saluatore, quando de aegypto reductus
est in terram israel. et cum inuenire non quiuerint, desinant rugare frontem, adducere
supercilium, crispare nares, digitis concrepare. hunc locum in septimo uolumine iulianus
augustus quod aduersum nos, id est christianos, euomuit, calumniatur, et dicit quod de israel
scriptum est, matthaeus euangelista ad christum transtulit, ut simplicitati eorum, qui de
gentibus crediderant, illuderet. cui nos breuiter respondebimus: primum matthaeum
euangelium hebraeis litteris edidisse, quod non poterant legere nisi hi qui ex hebraeis erant.
ergo non propterea fecit, ut illuderet ethnicis. sin autem hebraeis illudere uoluit, aut stultus,
aut imperitus fuit; stultus, si apertum finxit mendacium; imperitus, si non intellexit de quo
haec dicerentur. stultitiam ipsum uolumen excusat, quod prudenter ordinatim que
compositum est; imperitum non possumus dicere, quem ex aliis testimoniis scripturarum
scientiam legis habuisse cognoscimus. superest ut illud dicamus quod ea quae tupikôs~g
praecedunt in aliis, iuxta ueritatem et adimpletionem referantur ad christum; quod apostolum
in duobus montibus sina et sion, et in sara et agar fecisse cognouimus. neque enim non est
sina mons et non est sion; non fuit sara et non fuit agar; quia haec apostolus paulus ad duo
rettulit testamenta.
sic igitur hoc quod scriptum est: paruulus israel et dilexi eum, et ex aegypto uocaui filium
meum; dicitur quidem de populo israel, qui uocatur ex aegypto, qui diligitur, qui eo tempore
post errorem idololatriae quasi infans et paruulus est uocatus; sed perfecte refertur ad
christum. nam et isaac in typo christi fuit quod futurae mortis ligna sibi ipse portauerit; et
iacob quia liam dolentem oculos, et rachel pulchram habuerit uxorem. in lia quae maior erat,
caecitatem intellegimus synagogae, in rachel pulchritudinem ecclesiae; et tamen qui ex parte
typi fuerunt domini saluatoris, non omnia quae fecisse narrantur, in typo eius fecisse credendi
sunt. typus enim partem indicat, quod si totum praecedat in typo, iam non est typus, sed
historiae ueritas appellanda est. haec breuiter ut in commentariis diximus; nunc ad reliqua
recurramus. et ego quasi nutritius ephraim, portabam eos in bracchiis meis, et nescierunt quod
curarem eos. in funiculis adam traham eos, in uinculis caritatis. et ero eis quasi exaltans
iugum super maxillas eorum et declinaui ad eum ut uesceretur. lxx: et ego colligaui ephraim,
suscepi eum super brachium meum; et non cognouerunt ut sanarem illos in corruptione
hominum; extendi eos in uinculis caritatis meae. et ero illis, quasi dans alapas homo super
maxillas eius; et respiciam ad eum praeualens ei. multum inter se hebraicum et septuaginta
interpretum editio dissonant. temptemus igitur iuxta hebraeos historiam, iuxta lxx
anagôgên~g texere. qui supra dixerat: puer israel et dilexi eum, et ex aegypto uocaui filium
meum; et postea intulit quod perpetrauerit nefas: baalim immolabant et simulacris
sacrificabant, nunc narrat quo israel amore dilexerit, secundum illud quod in deuteronomio
legimus: portauit te dominus deus tuus, ut solet homo gestare paruulum filium suum, in omni
uia, per quam ambulasti, donec uenires ad locum istum. et in alio loco: expandit alas suas et
assumpsit eum, atque portauit in humeris suis. ego, inquit, qui pater eram, nutritius factus
sum, et paruulum meum in ulnis meis ipse portabam, ne laederetur in solitudine, et ne uel
aestu uel tenebris terreretur, in die nubes eram in nocte ignis columna; ut quos protexeram,
meo illustrarem et sanarem lumine, cum que peccassent et fecissent sibi uituli caput, dedi
locum paenitentiae, et ignorauerunt quod curarem eos, et uulnus idololatriae quadraginta
annorum spatio obducerem, et pristinae redderem sanitati. curaui autem eos propter funiculos
et uincula caritatis, quibus mihi abraham, isaac et iacob astrinxeram. pro adam enim aquila et
symmachus et septuaginta et theodotio uniuersi homines transtulerunt; ut dicerent: in
funiculis hominum traham eos, in uinculis caritatis. quod que sequitur: ero eis quasi exaltans
iugum, pro quo interpretatus est symmachus: et putauerunt quod imponerem iugum super
maxillam eorum, dupliciter accipitur; aut abstuli iugum ab eis cunctarum per circuitum
nationum, aut legem meam quasi grauissimum iugi pondus arbitrati sunt. et dedi ei escam
manna in deserto, quo uesceretur, hoc est enim quod ait: et declinaui ad eum, ut uesceretur;
pro quo interpretatus est symmachus: et declinaui ad eum cibos. non quod deus ad eum
declinauerit, sed quod cibum mannae ad eum fecerit declinare. aliter: intantum dilexi eos, et
tam clemens pastor fui, ut morbidam ouem humeris meis ipsi portarem; ipse uero
ignorauerunt quod mea illos passione curarem; et qui amator sum omnium hominum,
traherem eos ad credendum in uinculis caritatis, iuxta illud quod in euangelio scriptum est:
nemo uenit ad me, nisi pater qui misit me traxerit eum. et arbitrati sunt iugum meum leue
esse grauissimum; et declinaui ad eos deserens regna caelorum, ut cum eis uescerer,
assumpta, forma hominis, siue dedi eis esum corporis mei, ipse et cibus et conuiua.
transeamus ad intellegentiam spiritalem, iuxta septuaginta dumtaxat interpretes; ne si
utrumque et secundum historiam, et secundum anagôgên~g uoluerimus exponere, tendamus
libri magnitudinem. illis immolantibus baalim quae de suo corde finxerunt, et me uocante,
fugientibus a facie mea, - ita enim in septuaginta continetur -, ego clementissimus dominus
ligabam pedes ephraim, ne a me longius fugerent; hoc enim significat sunepodisa~g. ligabam
autem testimoniis scripturarum, et disputatione magistrorum ecclesiae, ut ligatos per
patientiam suis brachiis contineret, non intellegentes quod patientia dei salutis eorum esset
occasio. unde in corruptione hominum uidelicet magistrorum, qui eos deceperant contractos
perfidiae frigore, extendi calorem fidei, et quasi repugnantes uinculis meae dilectionis
astrinxi. et quia non sua sponte currebant, sed uincti funibus trahebantur, paululum maxillas
eorum alapis uerberaui, non puniens, sed corrigens et emendans. iudex lacerat carnes, torquet
funiculis, flagellis atque ignibus cruciat. qui autem pater est, lasciuientem filium palma
percutit manus. et pulchre non dixit: ero eos alapis uerberans, sed quasi homo maxillas manu
percutiens percutit autem deus filios aberrantes comminatione poenarum, euangelica lectione
et testimoniis prophetarum. cum que sic percusserit in maxilla, ut haereticorum panem atque
doctrinam excutiat de ore polluto; tunc respicit ad eum, dicente sibi filio uerberato: respice in
me et miserere mei. et iterum: respice et exaudi me, domine deus meus. cum que eo
respexerit, praeualebit, siue proderit eis, id est superabit aduersarios, et de fugitiuis seruos
faciet. siue dabit eis uerum et dulcem cibum, qui prius haereticorum mendacia et cibos
amarissimos deuorabant. non reuertetur in terram aegypti et assur ipse rex eius, quoniam
noluerunt conuerti. coepit gladius in ciuitatibus eius et consumet electos eius; et comedet
capita eorum et populus meus pendebit ad reditum meum. iugum autem imponetur eis simul,
quod non auferetur. lxx: habitabit ephraim in aegypto, et assur ipse rex eius, quia noluit
conuerti. et infirmatus est gladius in ciuitatibus eius, et requieuit in manibus illius, et
comedent de cogitationibus suis; et populus eius suspensus est ex incolatu suo, et deus super
pretiosa eius irascetur, et non exaltabit eum. quando dicit: non reuertetur in terram aegypti,
ostendit quod reuerti cupiat, sed ire non possit. reuerti autem cupiebat israel ab aegyptiis
auxilium efflagitans; sed possessus est ab assyrio, qui cepit eum et dominatus est illius iure
uictoris, et hoc passus est, quoniam conuerti noluit, nec agere paenitentiam. uel certe
dicamus, quod reuersus sit in terram aegypti, quando aegyptios in terra sancta adorauit deos,
uel illo sensu accipiendum, quo supra dictum est: aegyptum inuocabant, ad assyrios abierunt.
coepit itaque gladius in ciuitatibus eius, siue irruet, ut interpretatus est aquila, aut uulnerabit,
ut symmachus transtulit. et uide quantum pondus sit miseriarum, ut non agri uel possessiones
ac rura uastentur; sed medias ciuitates hostis introeat, et consumat electos eius siue brachia
illius, ut interpretatus est symmachus, quod hebraice dicitur baddau. cum que consumpserit
gladius electos et principes, siue robur exercitus, et deuorauerit uel capita uel consilia eorum,
ut non possint aliquod inuenire praesidium, tunc plebs miserabilis quae ad me reuerti noluit,
meum ad se reditum praestolabitur. et sero aget paenitentiam, hostibus cuncta uastantibus.
itaque quia peccata grandia grandibus sunt punienda suppliciis, imponet eis qui derelicti
fuerint de populo, - rege eorum ac principibus assyrio mucrone truncatis, - iugum
grauissimum seruitutis, et imponet pariter quod non auferetur iuxta litteram, nisi spiritaliter
tollatur in christo. iuxta septuaginta habitauit ephraim in aegypto, terram sanctam habere se
dicens, et ecclesiam domini saluatoris; sed uitiis atque peccatis et peruersitate fidei semper in
aegypto commoratus est. quia igitur habitauit in aegypto, sensus magnus assyrius erit rex eius;
noluit enim reuerti ad ecclesiam, et uirtute perdita, id est christo, qui est dei uirtus et dei
sapientia, semper in languore uersatus est; et infirmus fuit, cunctis daemonibus ac
perturbationibus subiacens; idcirco gladius, hoc est scientia spiritalis uel sermo ecclesiastici
uiri, uastans atque debellans semper uersabitur in urbibus eius, quas impie exstruxit contra
deum, et ipse gladius requiescet in manibus eius, ut occisus ab alio, alium non possit
occidere, nec contra aduersarium leuare manum. denique recipient et uorabunt secundum
consilia sua. infelix autem populus et uulgus indoctum suspirabit antiquam patriam, et
captum se esse sentiet, siue pendebit in incolatu suo, nesciens quid agat, et quo uertatur
ignorans. deus uero super pretiosa eorum, aurum uidelicet et argentum quae acceperant ab eo,
de quibus saepe diximus, irascitur, et nequaquam liberabit eum qui suo uitio corruit. hoc iuxta
lxx; eumdem autem sensum et hebraico coaptabimus. quomodo dabo te, ephraim, protegam
te, israel? quomodo dabo te sicut adama, ponam te ut seboim? conuersum est in me cor
meum, pariter conturbata est paenitudo mea. non faciam furorem irae meae, non conuertar, ut
disperdam ephraim quoniam deus ego sum et non homo; in medio tui sanctus et non ingrediar
ciuitatem. lxx: quid tibi faciam, ephraim, protegam te, israel? quid faciam tibi? sicut adama
ponam te et sicut seboim; conuersum est cor meum in ipso; simul conturbata est paenitudo
mea. non faciam iuxta iram furoris mei.
non derelinquam ut deleatur ephraim quia deus ego sum, et non homo; in te sanctus et non
ingrediar ciuitatem. in eo loco ubi nos et lxx interpretati sumus: protegam te, israel? in
hebraico scriptum est amaggenach quod aquila transtulit hoplôi~g kuklôsô~g se~g, id est:
scuto circumdabo te. quod cum in bonam partem putaremus intellegi, et significare
protectionem, ex editione symmachi contrarius nobis sensus subicitur, dicentis ekdôsô~g
se~g, id est: tradam te. ex translatione quoque theodotionis non prospera, sed aduersa
demonstrantur : aphoplisô~g se~g quod significat: nudabo te, et auferam a te hoplon~g, hoc
est scutum quo te ante protexeram; et hic sensus magis conuenit domino comminanti. quod
igitur dicit hoc est: quoniam noluerunt conuerti et assur factus est rex eorum, deuorabit que
gladius et urbes et principes et populum; et imponetur eis iugum, quod non auferetur ab eis et
quia uidebatur dura sententia, nequaquam eis locum paenitentiae derelinquens, nunc deus
parentis ad israel loquitur affectu: quid tibi faciam, ephraim? quomodo te meo auxilio
denudabo? quid tibi faciam? qua te arte corripiam? quo potero sanare medicamine? sicut
adama et seboim ponam te, quae duae sunt quinque urbium, sicut in genesi legimus: sodoma
et gomorrha, adama et seboim et bale quae est segor, et syro sermone zoara dicitur. ponam
itaque et uertam te in solitudinem, et delebo usque ad cineres ac fauillas, sicut deleui adama et
seboim. cum que duram, immo crudelem sententiam protulisset, rursum parentis affectu
misericordia uincitur, et austeritatem iudicii pietate mitigat patris. dicit enim: conuersum est
in me cor meum; pariter conturbata est paenitudo mea. statim ut locutus sum, me ephraim et
israel sicut adama seboim que positurum, mea commota sunt uiscera. paenituit me meum
quondam populum delere in perpetuum; idcirco non faciam secundum furorem iracundiae
meae, nec de mea clementia commutabor, ut disperdam ephraim. non enim percutio ut
perdam in perpetuum, sed ut emendem. crudelitas mea paenitentiae et pietatis occasio est.
deus enim ego sum et non homo. homo ad hoc punit ut perdat, deus ad hoc corripit ut
emendet. in medio tui sanctus et non ingrediar ciuitatem, hoc est: non sum unus de his, qui in
urbibus habitant, qui humanis legibus uiuunt, qui crudelitatem arbitrantur iustitiam, quibus
ius summum summa malitia est; mea autem lex mea que iustitia est saluare correctos.
possumus et aliter dicere: quia primus cain paricida exstruxit ciuitatem in nomine filii sui
enoch, in huiuscemodi urbem dominus non ingreditur, quae scelere et sanguine ac parricidio
fabricata est. sin autem uoluerimus legere: quomodo dabo te ephraim, protegam te, israel? sic
intellegendum est: quid tibi faciam? num protectione dignus es qui tanta fecisti? notandum
quoque quod ubi contra iudam dicitur, id est populum dei, non adama ponitur et seboim, sed
sodoma et gomorrha. legimus enim in esaia: audite legem dei, principes sodomorum; et:
attendite uerbum domini, populus gomorrhae. in euangelio quoque ciuitas, quae apostolos
non receperit, excutientibus eis puluerem pedum suorum, dicitur de ea, quod in die iudicii
tolerabilius erit terrae sodomorum et gomorrhae, quam ciuitati illi. et ad hierusalem
prophetalis sermo dirigitur: iustificata est sodoma ex te. datur ergo nobis suspicio, quod
sodoma et gomorrha principes fuerint in peccato, et adama et seboim earum exempla sectatae
sint, quod potentes potenter tormenta patiantur; et seruus qui scit uoluntatem domini sui, et
non facit eam, uapulet multis. unde et ecclesiastici uiri, si iisdem quibus haeretici sceleribus
continentur, nequaquam adamae et seboim, quae inferiores sunt, sed sodomae et gomorrhae,
quae maiorum criminum esse dicuntur cruciatibus subiacebunt. ad haereticos quoque
deceptum que ab eis populum loquitur dominus, quod nisi egerint paenitentiam, ponantur
sicut adama et seboim, ut nullam spem habeant salutis. rursum ut clementissimus pater dicit
se suam mutare sententiam, et paenitere quod talia sit locutus, ut illos quoque ad
conuersionem et ad paenitentiam prouocet.
non faciam, inquit, in furore meo, non disperdam ephraim. quantum, inquit, in me est,
quantum ego cupio, si errorem ueritate correxerit, si me magis amauerit quam principes
haereseos; deus enim ego sum et non homo, lapsis manum porrigam, errantes ad salutem
uocabo. et quia sanctus sum, propterea non ingrediar ciuitatem, id est conciliabula et urbes
haereticorum. foras exeuntes de urbibus suis, libenter recipio, in ciuitates eorum non
ingrediar. hoc quod dixit: non ingrediar ciuitatem, et iuxta lxx sequitur: post dominum
ambulabo, quidam sic interpretati sunt, ut dicerent domino populum respondisse, et esse
sensum: quia conuersum est in te cor tuum, et non secundum peccata nostra fecisti nobis, sed
imitaris clementiam tuam, et nostra delicta non punis, et polliceris te sanctum et clementem in
nostri medio uersaturum, idcirco et ego malorum hominum non ingrediar ciuitatem, nec ero
de numero peccatorum; sed ambulabo post dominum deum nostrum. hebraei autem ex
persona dei ita edisserunt: non te derelinquam, non ibo ad aliam gentem; nec ingrediar
alteram ciuitatem. post dominum ambulabunt, quasi leo rugiet, quia ipse rugiet; et
formidabunt filii maris et uolabunt quasi aues ex aegypto, et quasi columba de terra
assyriorum; et collocabo eos in domibus suis, dicit dominus: lxx: post dominum ambulabo,
sicut leo rugiet, quia ipse rugiet; et formidabunt filii aquarum et uolabunt quasi auis ex
aegypto, et quasi columba de terra assyriorum; et collocabo eos in domibus suis, dicit
dominus. domino prospera pollicente, populus conuertetur ad eum; et ambulabit post
dominum quia dominus rugiet quasi leo. de quo et amos propheta commemorat: dominus de
sion rugiet et de hierusalem dabit uocem suam. rugit autem quando dicit: sicut adama, ponam
te ut seboim. cum que ille rugierit, tunc formidabunt filii maris, siue aquarum, ut lxx
transtulerunt. etenim uerbum maim, quod per tres litteras scribitur mem, iod, mem, si legatur
maim, aquas significat; si meiam, de mari intellegitur. haec hebraei ad aduentum christi
referunt, quem sperant esse uenturum. nos iam transacta conuincimus, quia et de aegypto, et
de assyriis, hoc est: ab oriente et occidente, et ab aquilone et meridie uenerunt, et cotidie
ueniunt qui discumbant cum abraham, isaac et iacob. filios autem maris, siue aquarum, eos
possumus appellare, qui sagena domini comprehensi sunt, et abstracti de mari huius saeculi.
cum que capti fuerint de morte in uitam, collocabuntur in domibus suis, quae horrea uocat
euangelium, in quibus electa et a paleis separata frumenta conduntur. natura leonum esse
dicitur; ut cum infremuerint et rugierint, omnia animantia contremiscant, et fixo gradu se
mouere non possint: tantus pauor est, tanta formido. itaque et dominus cum instar leonis
rugierit et intonuerit, ac dederit uocem suam, cunctae aues et uniuersa uolatilia perhorrescent;
et ibunt ad nidos, id est, ad domos suas in quibus dominus habitabit cum eis. dicamus et
aliter: cum uerus leo infremuerit, falsus leo qui est iuxta apostolum petrum, aduersarius
noster, illico conticescet, et omne dogma peruersum os suum aperire non poterit; quique ante
ab eo capti fuerant, rugitu leonis soluti et comminatione terribili, sequentur dominum deum
suum. tunc timebunt filii maris, siue aquarum, qui in amaritudine et salsis haereticorum aquis
fuerant procreati; et assumptis pennis, uolabunt quasi aues ex aegypto, et quasi columba de
terra assyriorum, et dicent: quis dabit mihi pennas sicut columbae, et uolabo et requiescam?
ut qui apud haereticos laborauerant, requiescant in ecclesia, et habitent in domibus suis, de
quibus fuerant errore seducti. aegyptum, id est mesraim, tribulationem interpretari et
angustiam nouimus; assyrios quoque dirigentes siue, ut melius arbitramus, arguentes. ab his
ergo liberabuntur haeretici, cum habitare coeperint in domibus suis, et malis parentibus
dixerint: relinquetur uobis domus uestra deserta. circumdedit me in negatione sua ephraim et
in dolo domus israel; iudas autem testis descendit cum deo et cum sanctis fidelis. lxx:
circumdedit me in mendacio ephraim et in impietate domus israel et iuda; nunc cognouit eos
deus et populus sanctus uocabitur dei. tradunt hebraei huiuscemodi fabulam: in exitu israelis
ex aegypto, quando ex alia parte mons, ex alia rubrum mare, et ex alia pharaonis cingebat
exercitus, et inclusus populus tenebatur, ceteris tribubus desperantibus salutem, et aut reuerti
in aegyptum, aut bellare cupientibus, solus iuda fideliter ingressus est mare, unde et regnum
meruit accipere. et hoc esse quod nunc dicatur: iudas testis sermonum dei, et astipulator ac
uindex descendit cum deo in mare, et inter sanctos fuit fidelissimus, ut uerbis iubentis
crederet dei. hoc illi dicunt. nos coeptae explanationis sequamur ordinem, quod circumdederit
ephraim regia tribus et domus israel, populus qui tribui regiae seruiebat, et circumdederit eum
in negatione siue mendacio, dum dominum negant et idola confitentur. iudas autem, hoc est
duae tribus, quae habebant templum, legem, prophetas, et seruabant praecepta legalia, erant
testes, gradientes que cum deo et cum sanctis fideles.
sanctos possumus dicere uel angelos, uel patriarchas ac prophetas et ceteros qui dei imperio
seruiebant. ad comparationem enim illius temporis quo haec dicebantur, aberrante penitus
ephraim, et decepto in idolorum cultu israel, solus iuda remanserat, qui in dei cultu et
testimoniis uersaretur, et possit descendere cum eo, siue fortis esse cum forte. rad enim et
descensionem et fortitudinem significat; pro quo aquila transtulit epikrateian~g. iuxta
anagôgên~g circumdant haeretici deum in mendacio, immo in negatione. quicquid enim
loquuntur, negatio, immo mendacium est; et circumdant eum in dolo, siue in impietate domus
israel; dum uniuersa quae simulant, artifici sermone componunt et impietatem loquuntur
contra deum. iudas autem, hoc est uir ecclesiasticus, non superbit, non inflatur tumore
haeretico, sed humiliatur cum deo et cum sanctorum choro fidelis est et robustus, dum
aedificat domum suam supra petram, quae nulla tempestate quatiatur. lxx multo aliter
transtulerunt; quod et ephraim et domus israel et iudas circumdederint deum in mendacio et
in impietate, et tantae clementiae sit deus ut non eis abscindat spem salutis; sed cognoscat
illos et paratus sit uocare populum sanctum et populum dei, qui nunc impietate peruersus est.
iuxta tropologiam quoque, uelle dominum et haereticos saluari, et ecclesiasticos peccatores, et
omnes suo uocabulo nuncupari. qui autem uere sanctus est, non circumdat deum in mendacio,
sed in ueritate, psalmista dicente: potens es, domine, et ueritas tua in circuitu tuo.
Caput 12
ephraim pascit uentum, et sequitur aestum; tota die mendacium et uastitatem multiplicat, et
foedus cum assyriis iniuit; et oleum in aegyptum ferebat. lxx: ephraim autem pessimus
spiritus, persecutus est aestum; tota die uana et inania multiplicauit et testamentum cum
assyriis pepigit; et oleum in aegypto mercabatur. sacra narrat historia, manahen regem israel,
pace facta cum assur, ab aegyptiis auxilium postulasse; et hoc est quod nunc dicitur: ephraim
pascere uentos, id est: spe uana se decipere, sequi que kausôna~g, hoc est aestum, et ire ad
meridiem, nihil que aliud agere tota die nisi sibi illudere. et dum huc illuc que discurrat,
uastitatem et euersionem suis urbibus praeparare. annon est uastitas atque mendacium,
pepigisse foedus cum assyriis, et oleum tulisse in aegyptum? sunekdochikôs~g a parte totum,
quod uidelicet munera aegyptiis miserit. licet quidam arbitrentur quod nequaquam in aegypto
oleum gignitur, et pretiosissimum missum esse ab ephraim, cuius terra samaria olei
fertilissima est. porro secundum tropologiam omnes haeretici pessimo daemonum spiritu
continentur, de quo et in apostolo scriptum est: aduersus spiritalia nequitiae in caelestibus. et
immundus spiritus cum exierit ab homine, et requiem non inuenerit, septem alios spiritus
nequiores se sibi copulat, et ad pristinam reuertitur domum. spiritu igitur pessimo sequuntur
kausôna~g, id est ariditatem, siue uentum urentem, qui contrarius floribus est et germinantia
cuncta disperdit, tota die inania uacua que sectatur, nec proprio errore contentus est, sed
multos discipulos, immo comites suae uanitatis erroris que multiplicat. foedus quoque facit
cum assyriis quorum princeps est sensus magnus, ut quaecumque finxerit, sapienter simulasse
uideatur, ea sapientia quae destruitur a deo, quam et apostolus praecipit declinandam, dicens:
uidete, ne quis uos deprehendat per philosophiam et inanem seductionem, secundum
traditionem hominum, secundum elementa mundi. sed et oleum fert in aegyptum, siue
mercatur aegypti sapientiam, ecclesiasticis cupiens miscere dogmatibus oleum unctionis quo
ungebantur prophetae ac sacerdotes, quo ungebantur et reges. hoc oleum habent et sancti, de
quibus dicitur: filii tui sicut nouellae oliuarum in circuitu mensae tuae. et bona oliua in qua
oleaster noster insertus est. quamuis autem conentur haeretici ueritati miscere mendacium,
oleum aquis et ceteris humentibus ac liquentibus rebus non potest copulari. semper ueritas
supra est, deorsum que mendacium. omnes aliae species, id est haereses, quae non habent, ut
diximus, oleum ueritatis, possunt sibi misceri, et de pluribus unum effici corpus. sed harum
oleum quod defertur in aegyptum, et de terra sancta ad pharaonis regna descendit, detestatur
propheta, dicens: oleum peccatoris non impinguet caput meum. iudicium ergo dei cum iuda et
uisitatio super iacob; iuxta uias eius et iuxta adinuentiones eius reddet ei. in utero
supplantauit fratrem suum et in fortitudine sua directus est cum angelo; et inualuit ad
angelum et confortatus est; fleuit et rogauit eum; in bethel inuenit eum et ibi locutus est nobis
cum et dominus deus exercituum. dominus memoriale eius et tu ad deum tuum conuerteris;
misericordiam et iudicium custodi, et spera in deum tuum semper.
lxx: et iudicium domino cum iuda, ut ulciscatur iacob, iuxta uias eius, et iuxta adinuentiones
eius reddet ei. in utero supplantauit fratrem suum et in labore suo praeualuit deo, et
confortatus est cum angelo, et potuit; fleuerunt et deprecati sunt me; in domo ôn~g inuenerunt
me et ibi dictum est ad eos. dominus autem deus omnipotens erit memoriale eius, et tu in deo
tuo conuerteris, misericordiam et iudicium custodi; et appropinqua deo tuo semper. ephraim
semel pascente uentos, et sequente mendacium, qui in tantam uenit amentiam, ut inter duas
gentes aduersarias dubius fluctuaret, faciens pacem cum assyriis et oleum portans in
aegyptum; nunc mihi omne iudicium est cum iuda et uisitatio super iacob. uisitationem autem
uocat flagella atque supplicia, ut qui ephraim reddidit, quod merebatur, iudae quoque, qui de
iacob ortus est semine, reddat iuxta uias et iuxta adinuentiones suas, qui non tantum fortuito
errore deceptus est et humana concidit fragilitate; sed inquisiuit et adinuenit in quibus
peccaret et rueret. exponit autem quanta bona iudas, hoc est iacob, acceperit, et in patre filius
nominatur, ueteris que recordatur historiae, ut et dei misericordia erga iacob, et illius contra
deum duritia cognoscatur. dum adhuc esset in utero rebeccae, supplantauit fratrem suum esau,
non utique fortitudine propria, qui sentire non poterat; sed misericordia dei, qui cognoscit et
diligit eos, quos praedestinauit. et non solum in utero supplantauit fratrem suum; sed in
fortitudine quoque directus est cum angelo, quando ad torrentem iacob aduersum angelum
tota nocte pugnauit. et quia directus est cum angelo, propterea euthutatou~g, quod hebraice
dicitur isar, hoc est dirigentis, siue directi, nomen accepit. et inualuit, inquit, aduersum
angelum; et eius benedictione quem uicerat, confortatus est. fleuit quoque, et rogauit eum, id
est angelum, dicens: non te dimittam, nisi mihi benedixeris. cum que patris matris que
consilio mesopotamiam fugeret, inuenit eumdem angelum in bethel, qui locutus est ad eum,
locutus est nobis cum, id est in patre, locutus et filiis est, et in iacob dilexit et iudam; ex quo
tempore usque ad praesens, nominis eius quod illi ab angelo et a deo impositum est, memoria
perseuerat. cum haec ita se habeant, et tu, o iuda, imitare parentem tuum, plora et roga
dominum exercituum, et ad eum conuertere. custodi misericordiam et iudicium, et cum
utrumque feceris, spera in deo tuo semper, bonis operibus ad maiora proficiens. pro eo quod
in hebraico habet: fleuit et rogauit eum; in bethel inuenit eum et ibi locutus est nobis cum,
legimus in editione uulgata: fleuerunt et rogauerunt me, in domo ôn~g inuenerunt me, et ibi
dictum est ad eos; ôn~g interpretatur dolor. si quis igitur flet, et agit paenitentiam et dominum
deprecatur, inueniet eum in dolore cordis sui et cum eum inuocauerit, sibi audiet
respondentem. possumus iudam ecclesiasticum uirum intellegere, qui a domino corripitur,
quod non sit pristinorum in se beneficiorum eius memor, sed cotidie peccatis peccata
consociet, et exponit quae sint ipsa beneficia. cum te, inquit, nascentem in fide ecclesia
parturiret, supplantasti iudaeum siue gentilem fratrem tuum, et eius accepisti primogenita; et
in fortitudine tua directus es cum angelo, uel uincens aduersarias fortitudines, uel roboratus
benedictionibus angeli, qui ipse est deus, et inualuisti per figuram contra angelum, ut
inualesceres contra homines, et confortatus es. cum que esses uictoriam consecutus, fleuisti et
rogasti angelum domini, et peccatorum ueterum recordatus, inuenisti eum in bethel, hoc est in
domo dei, quae est ecclesia, siue in domo ôn~g, doloris et lacrimarum et paenitentiae. et ut
sciremus quis esset iste iudas, ibi, inquit, locutus est nobis cum, hoc est nobis christianis, et
ex eo tempore usque in praesentem diem, christi censemur nomine, et ipso dirigente
corrigimur. o itaque, uir ecclesiastice, qui appellaris iudas, et confitens, conuertere cotidie per
paenitentiam ad dominum tuum; et si forte peccaueris, imitare prophetam dicentem: laboraui
in gemitu meo, lauabo per singulas noctes lectum meum, lacrimis meis stratum meum rigabo.
nec hoc dixisse sufficiat, sed dei serua mandata, fac in alios misericordiam, ut ipse
misericordiam consequaris. iudicium uerum iudica, ut in quo iudicaueris, iudicetur de te. et
spera in deo tuo semper, siue appropinqua deo tuo iugiter, ut omni tempore in uirtute
proficiens, appropinques deo tuo. chanaan in manu eius statera dolosa, calumniam dilexit; et
dixit ephraim: uerumtamen diues effectus sum, inueni idolum mihi, omnes labores mei non
inuenient mihi iniquitatem quam peccaui. lxx: chanaan in manu eius statera iniquitatis,
opprimere per potentiam dilexit; et dixit ephraim: uerumtamen diues effectus sum, inueni
requiem mihi, omnes labores eius non inuenientur ei, propter iniquitates in quibus peccauit.
monuerat iudam ut conuerteretur ad dominum deum suum, et misericordiam seruaret atque
iudicium, et speraret in domino semper, siue appropinquaret ei iugiter. nunc ad ephraim, hoc
est ad decem tribus sermo conuertitur, quem uocat chanaan, iuxta illud quod loquitur daniel
ad presbyterum, qui utique erat de semine iuda: semen chanaan et non iuda, species decepit
te. et in hiezechiel a hierusalem dictum legimus: pater tuus amorrhaeus, et mater tua cethaea.
et in esaia dicitur ad tribum iuda: audite uerbum domini, principes sodomorum; percipite
auribus legem domini nostri, populus gomorrhae.
in zachariae quoque extremo uersiculo legimus: et non erit chananaeus ultra in domo domini.
dicit autem chanaan, hoc est ephraim, habere in manu sua stateram dolosam, siue iniquam,
iubente scriptura: aequa sint tibi pondera; et non solum habere stateram iniquam ac dolosam,
sed diligere calumniam et opprimere homines per potentiam. et ne putaremus chanaan alium
quempiam sentiendum, ponit manifestius qui sit iste chanaan. dixit ephraim: uerumtamen
diues effectus sum; et est sensus: non refert unde possideam, dummodo possideam. hoc
morbo laborant plurimi, de quibus scriptum est: diuitiae congregatae inique euomentur.
redemptio enim animae uiri, propriae diuitiae. unde praecipitur, ut faciamus nobis amicos de
iniquo mammona, qui nos possint recipere in aeterna tabernacula, ephraim autem qui
gloriatur et dicit: uerumtamen diues effectus sum, inueni idolum mihi, siue anôpheles~g, hoc
est auen, quod non prosit possidenti, casso labore sudauit. sicut autem gulosi et luxuriosi
uenter deus est, ita et auarus adorat auri idolum; et dicit in corde suo: inueni quod quaerebam;
sed audiet: stulte, hac nocte rapietur anima tua a te; quae autem parasti, cuius erunt? cum que
semel oculos eius diuitiarum, non dicam fulgor, sed caecitas occuparit, loquitur: omnes
labores mei non inuenient iniquitatem meam, in qua peccaui. et est sensus: quicquid
peccauero, si habuero diuitias ab his, qui meo indigent auxilio, mihi non poterit imputari,
secundum illud quod scriptum est: et qui iniqua gerit, benedicitur. diuitum enim amici multi.
unde et ad haereticos hoc ipsum refertur. chanaan quippe interpretari potest: quasi mouentes.
et nota quod dixerit: quasi mouentes, non mouentes. mouentes sunt eos quos deceperint;
quasi mouentes, illos quos temptauerint. sed quia fundati sunt supra petram, nullo possunt
turbine concuti, nec pedum suorum mutare uestigium. in istiusmodi chanaan manu, hoc est
operibus, statera dolosa est et iniqua; quicquid enim haereticus loquitur, dei iustitiam non
habet, et plenum est doli et fraudium; unde et calumniam diligunt, dum deprimunt innocentes,
siue opprimunt eos per potentiam. opprimitur pauper ecclesiasticus uerbositate et argutiis
haereticorum, qui postquam aliquos deceperint, solent dicere: diuites facti sumus, habemus
plurimam multitudinem; discipulorum turba nos sequitur; inuenimus idolum uel refrigerium
nobis. idcirco enim uel maxime haereses componuntur, ut deuorent domos uiduarum, quae
semper discunt, et numquam ad scientiam perueniunt ueritatis. et pulchre, inueni, ait, idolum
mihi. omnia enim haereticorum figmenta idola sunt et simulacra gentilium; nec multum
differunt in impietate, licet in nomine discrepare uideantur. solent que dicere, quicquid fecero,
quicquid egero, mihi non poterit imputari; habeo enim diuitias meas, argumenta
philosophorum, habeo populi multitudinem, quam qui aspexerit, me peccare non arbitrabitur.
et ego dominus deus tuus de terra aegypti, adhuc sedere te faciam in tabernaculis sicut in
diebus festiuitatis; et locutus sum super prophetas, et ego uisiones multiplicaui, et in manu
prophetarum assimilatus sum. lxx: ego autem dominus deus tuus eduxi te de terra aegypti;
adhuc habitare te faciam in tabernaculis, sicut in diebus sollemnitatis, et loquar ad prophetas,
et ego uisiones multiplicaui, et in manibus prophetarum assimilatus sum. tu quidem tanta
peccasti, ut laetareris in scelere, et multitudinem peccatorum putares esse diuitias, et diceres:
diues effectus sum, inueni idolum mihi; omnes labores mei peccata mea inuenire non
poterunt. ego autem dominus deus tuus qui te eduxi de terra aegypti, quando seruiebas
pharaoni, et aedificabas de luto et paleis ciuitates, adhuc tribuo tibi locum paenitentiae, et
magnitudine promissorum hortor, ut ad me redeas; adhuc enim sedere te faciam in
tabernaculis sicut in diebus festiuitatis. diem festiuitatis scenopegiam uocat, septimo mense,
quintadecima die mensis, quando de aegypto egressi sunt filii israel. sicut, inquit, eo tempore
te de aegypto liberaui, et habitasti in tabernaculis ad terram sanctam, et ad locum templi ire
festinans; sic etiam nunc educam te de tribulatione et angustiis et imminente captiuitate, si
tamen feceris quae praecepi. ego enim sum qui per omnes prophetas et uaria genera uisionum
assimilatus sum hominibus, et te ad paenitentiam prouocaui. an non est humanae
similitudinis, quando moyses in altum extollens manus orat, ut iesus uincat amalec, et crucis
in eo sacramenta monstrentur?
nonne in manibus prophetarum assimilatur deus, quando ionas tribus diebus ac noctibus in
profundo est, ut dominum significet die tertia ab inferis resurgentem? multiplicatas autem
uisiones in omnibus prophetis legimus, quando hiezechiel cernit deum in aurigae modum
sedentem super cherubim. et esaias: uidi, inquit, dominum sedentem supra thronum excelsum
et eleuatum, et duo seraphim in circuitu eius clamantia ad inuicem: sanctus, sanctus, sanctus
dominus deus sabaoth. et abacuc stabat in specula sua, ut cornua uideret in manibus
saluatoris, in quibus abscondita est fortitudo eius. unde et psalmista conclamat: audiam quid
loquatur in me dominus deus. ut autem sciamus omnem prophetiam in scripturis sanctis
appellari uisionem: et omnis, inquit, populus uidebat uocem dominus; unde et prophetae ante
dicebantur uidentes. ad eos quoque qui ab haereticis seducti sunt, dicitur ut reuertantur ad
dominum, qui mauult paenitentiam peccatoris, quam mortem; ipsum enim esse qui eos
eduxerit de terra aegypti, id est de tenebris et errore gentilium. et ne forsitan peccati memores
tardius reuertantur; adhuc, inquit, sedere uos faciam in tabernaculis, sicut in diebus
festiuitatis; ut quod facit baptisma, hoc faciat paenitentia, et habitent in tabernaculis
saluatoris, hoc est in ecclesiis, de quibus dicitur: plantati in domo domini, in atriis domus dei
nostri florebunt. et ne putent haeresiarchas et principes erroris sui, dei locutos spiritu: ego
sum, inquit, qui locutus sum ad prophetas, et non ad magistros uestros; ego uisiones
multiplicaui, et in manu prophetarum meorum qui sunt in ecclesia constituti, assimilatus sum.
si galaad idolum, ergo frustra erant in galgal bobus immolantes; nam et altaria eorum quasi
acerui super sulcos agri. lxx: si non galaad est, ergo falsi erant in galgala principes
immolantes, et altaria eorum quasi testudines super desertum agri. pro eo quod nos
transtulimus: bobus, qui hebraice appellantur surim, lxx interpretati sunt: principes, qui
uocantur sarim, uerbi similitudine atque ambiguitate decepti. rursum ubi nos posuimus:
aceruos, qui hebraice appellantur gallim et proprie thinas~g significant, hoc est ex arena
tumulos congregatos, qui maxime in deserto, et in litoribus flante uento, uel augentur uel
minuuntur; lxx transtulerunt: testudines, pro quibus symmachus aceruos lapidum interpretatus
est, theodotio colles. et reuera si thinas~g respicias, habent similitudinem magnarum
testudinum in deserto agro, uel in ripis atque litoribus paululum humo eminentium. quod ergo
dicit, hoc est: si in galaad, de qua scriptum est: galaad ciuitas operantium idolum, supplantata
sanguine, falsi sunt dii et peruersa religio, et est trans iordanem ubi duae tribus habitant,
ruben et gad, et dimidia tribus manasse, ergo et galgal de qua in hoc eodem propheta legimus:
omnis malitia eorum in galgala, quae est post tergum bethauen; quicumque idola colunt, non
boues diis immolant, sed bobus offerunt sacrificia, imitantes errorem samariae. eo enim
tempore quo haec prophetabantur, galaad in regno decem tribuum erat; et galgal sub imperio
duarum tribuum, quae appellabantur iuda. ergo et decem tribus et duae pari idololatriae errore
deceptae sunt, et altaria eorum sicut acerui et tumuli de lapidibus congregati, siue de arenis.
cum que et illi et hi in captiuitatem fuerint abducti, arae quondam eorum absque cultoribus
testudinum uel tumulorum habebunt similitudinem. quia uero galaad interpretatur translatio
testimonii, et galgal uolutabrum, hoc dicere possumus, quod principes haereticorum
testimonia ueritatis transferant in mendacium, et quicquid colunt, idolum sit, et sacrificia
eorum habeant similitudinem uel aceruorum de lapidibus congregatorum uel testudinum.
quomodo enim thines~g et acerui hinc atque illinc de lapidibus et sabulo congregantur, ita et
haeretici de sapientia saeculari et argutiis hominum, fraude atque mendacio simulacra
componunt. et cum hoc fecerint, tardis gressibus in uno mouentur loco, et totum orbem
occupare non possunt. testudo tardigrada et onerata, immo oppressa pondere suo, non tam
ambulat quam mouetur, haereticorum grauissima peccata significans, qui suis in caeno et
uolutabro luti erroribus immolant, adorantes opera manuum suarum, et instar boum cuncta
pro terrenis frugibus laborantes. fugit iacob in regionem syriae, et seruiuit israel in uxore, et
in uxore seruauit. in propheta autem eduxit dominus israel de aegypto, et in propheta seruatus
est. lxx: et recessit iacob in campum syriae, et seruiuit israel in uxore et in uxore custodiuit; et
in propheta eduxit dominus israel de aegypto, et in propheta seruatus est. uidetur absque
ratione et ordine prophetali post idolum galaad et galgal et altaria aceruis lapidum similia,
subito historiam geneseos de iacob uoluisse narrare; quod statim soluit, qui supra de iacob
legisse se meminit: in utero supplantauit fratrem suum et in fortitudine sua directus est cum
angelo; et inualuit ad angelum et confortatus est; fleuit et rogauit eum: in bethel inuenit eum
et ibi locutus est nobis cum. iste igitur iacob non frustra ab angelo confortatus est; sed quia
tota nocte pugnauit, et uicit aduersarium, ut ex hoc fratrem disceret non timere, cuius metu in
syriam fugeret ad laban auunculum suum, et seruiuit in uxore rachel septem annis; et pro lia
oues soceri laban eodem annorum spatio custodiuit. et quia semel iacob dixerat et israel,
patrem filios que coniungit, et sequentis recordatur historiae, quando in propheta moyse
eduxit dominus israel de aegypto, et duodecim tribus quae generatae sunt israel, propheta
educente, seruatae sunt. non errabit qui supplantatorem iacob, et israel uidentem dominum, in
typo domini dixerit praecessisse; et rachel primum sterilem atque formosam, quam plurimum
dilexit iacob significare ecclesiam. liam autem lippientibus oculis atque fetosam, synagogae
sacramenta monstrare, et quod ipse credentium populum eduxerit de tenebris huius saeculi, et
ad dulcissima iordanis, id est baptismi, fluenta peruenerit.
ad iracundiam me prouocauit ephraim in amaritudinibus suis, et sanguis eius super eum
ueniet, et opprobrium eius restituet ei dominus suus. lxx similiter. cum ergo ephraim tanta
praestiterim, ut nudum et exsulem et solum, diuitem dominum que reducerem, et multorum
filiorum parentem, deseruit me ephraim, immo ad iracundiam prouocauit; et amaritudine sua
amarum fecit esse qui dulcis sum. unde sanguis eius super eum ueniet, id est: ipse erit causa
mortis suae, secundum id quod dauid loquitur ad eum, qui saulis nuntiauit interitum, et a se
regem israel caesum esse memorabat: sanguis tuus super caput tuum. non mea sententia, sed
saulis sanguine tuus sanguis effundetur. quod que sequitur: et opprobrium eius restituet ei
dominus, illi sensui congruit quem nathan loquitur ad dauid: qui blasphemare fecisti inimicos
nomen domini, propter hanc rem, hoc est propter hoc peccatum quo interfecisti uriam, ipsa
blasphemia atque opprobrium, quo per te dominus blasphematus est, uertetur in caput tuum.
semper haeretici ad iracundiam prouocant clementem deum, et eum qui mauult paenitentiam
peccatoris quam mortem, duritia cordis sui punire compellunt; et sanguis eorum, quo et suum
et multorum effuderunt sanguinem, ueniet super caput eorum; et opprobria quibus dominum
blasphemauerunt, restituet eis dominus suus, non quod eorum dominus sit, sed quia quondam
dominus eorum fuit.
Caput 13
loquente ephraim horror inuasit israel et deliquit in baal, et mortuus est, et nunc addiderunt ad
peccandum, fecerunt que sibi conflatile de argento suo quasi similitudinem idolorum; factura
artificum totum est; his ipsi dicunt: immolate homines, uitulos adorantes. lxx: iuxta uerbum
ephraim iustificationes accepit ipse in israel, et posuit ad baal, et mortuus est, et nunc
apposuit ut peccaret, et fecerunt sibi conflatile de argento suo, secundum imaginem idolorum,
opera artificum conflata; his ipsi dicunt immolate homines, uituli enim defecerunt. pro eo
quod lxx interpretati sunt: immolate homines, uituli enim defecerunt, et nos uertimus:
immolate homines, uitulos adorantes, symmachus interpretatus est: immolate, homines
uitulos adorent; ut sit sensus: immolate, hoc est sacrificate idolis, et hucusque distinctio
sequatur: rationale animal, homines adorent uitulos, muta animantia. loquente ergo ephraim,
id est ieroboam filio nabath de tribu ephraim, horror inuasit israel, id est decem tribus. pro
horrore qui hebraice dicitur rathath, quem symmachus et theodotio tremorem interpretati, sunt
nescio quid uolentes, dikaiômata~g id est iustificationes, lxx transtulerunt. et tantus israelem
horror inuasit, ut delinqueret et offenderet deum in baal et moreretur perdens eum qui dicit:
ego sum uita. anima enim quae peccauerit, ipsa morietur. et apostolus: uidua, inquit quae in
deliciis est, uiuens mortua est. et non solum mortuus est in baal, sed addidit peccata peccatis,
ut ex argento quod dominus dederat, idola fabricaretur, opera manuum hominum. quibus ipsi
dicunt, id est sacerdotes et principes qui populum bona docere debuerant: immolate homines,
uitulos adorantes; quod quidem et in psalmis dicitur: immolauerunt filios suos et filias suas
daemoniis. pro eo quod iuxta symmachum et theodotionem uertimus: adorantes, aquila
interpretatus est kataphilountes~g, id est deosculantes. qui enim adorant, solent deosculari
manum suam; quod iob fecisse se negat dicens: si osculatus sum manum meam apponens ori
meo, et hoc mihi ad iniquitatem maximam reputetur. sin autem ut quidam uolunt, daemones
loquuntur ad populum: immolate homines, uituli enim defecerunt, ostenditur ingluuies
eorum, qui sanguine uictimarum aluntur, et holocaustorum fumo; quod deficientibus hostiis,
homines sibi cupiant immolari, quorum non solum interitu, sed et cruore laetantur.
loquentibus autem haereticis, immo principibus haereticorum, id est ephraim, horror et tremor
inuadet infelicem populum; et delinquet in idolis, quae de suo corde confinxit, et moritur cum
populo quem seduxit. et non sufficit corruisse, nisi linguam quam ad canendum deum
acceperat, uertat in imagines idolorum, et artifici eloquio simile ueritati dogma componat,
quod nihil est aliud, nisi excogitatio prauitatis humanae. praecipiunt que discipulis suis, ut et
ipsi immolent homines, hoc est furentur de ecclesia dei, et introducant ad haereticos, et
occidant quos deceperint. quod sequitur: uituli enim defecerunt, hunc habet sensum: nolite
quaerere quos seducatis de gentibus, qui uocantur bruta animalia; sed eos rapite, eos
immolate, qui in ecclesia constituti, christi censentur nomine et homines appellantur, iuxta
illud propheticum: escae autem electae. idcirco erunt quasi nubes matutina, et sicut ros
matutinus pertransiens, sicut puluis turbine raptus ex area, et sicut fumus de fumario. lxx
similiter; hoc solum quod in ultimo est, immutantes: et sicut uapor de locustis, siue de
lacrimis, quia in plerisque codicibus akridôn~g, in aliis dakruôn~g positum reperimus. quia,
inquit, homines pro uitulis immolauerunt, et adorauerunt uitulos; idcirco erunt quasi nubes
matutina, et sicut ros mane pertransiens, sicut puluis turbine raptus ex area, et sicut fumus de
fumario. quae omnia uidentur ad tempus et subito dilabuntur iuxta illud quod dixerat: transire
fecit samaria regem suum quasi spumam super faciem aquae. et iterum: sicut mane transit,
pertransiet rex israel. et nubem quidem aut rorem transire uelociter, et puluerem ex area, et
fumum de fumario, nemo ambigit, iuxta illud quod scriptum est: sicut deficit fumus, deficiant
quaerimus autem quare lxx pro fumario, quod theodotio transtulit kapnodochên~g, locustas
interpretati sunt?
apud hebraeos locusta et fumarium, iisdem scribitur litteris aleph, res, beth, he. quod si
legatur arbe, locusta dicitur; si orobba, fumarium; pro quo aquila kataraktên~g, symmachus
foramen interpretati sunt. cataracta autem proprie uocatur foramen in pariete fabricatum, per
quod fumus egreditur. si quis autem contentiosus et nolens recipere hebraicam ueritatem,
locustae sensum quaesierit, audiat ephraim atmôi~g, id est uapori siue aurae et spiritui
comparari; qui ita tenuis de ore locustae egreditur, ut non sentiatur; quod si econtrario
obiecerit, quare non aliis, quae minora sunt, periturum ephraim assimilauerit; uerbi gratia
pulici, qui omnia membra habet, caput, oculos, pedes, uentrem et cetera; quae licet oculis non
uideamus, tamen sensu intellegimus; intantum ut os pulicis ac dentes non uidentes oculis,
morsibus sentiamus. respondendum est ei, quod ideo uapori locustae, siue aurae tenuissimae,
periturorum gloriam compararet, quia locusta noxia est, et sic inimica mortalibus, ut famem
faciat, et segetum culta populetur; intantum ut arbores quoque uineas que decorticet quod
plenius in ioel propheta legimus. et huic locustae et nubi matutinae et rori et pulueri haeretici
comparantur, de quibus et in epistola catholica dicitur: hi sunt nubes sine aquis. habent enim
speciem prophetarum, et nubium apostolicarum, ad quas dei ueritas peruenit; sed non habent
aquas, id est gratiam spiritus sancti, dicente domino in euangelio: qui credit in me, sicut dicit
scriptura, flumina de uentre eius fluent aquae uiuae. hoc autem, inquit, dixit de spiritu quem
accepturi erant credentes in eum. de lacrimis autem, quae sermone graeco habent aliquam
similitudinem locustarum, dakruôn~g kai~g akridôn~g, manifestus error est, quibusdam pro
locustis lacrimas aestimantibus. ego autem dominus deus tuus de terra aegypti. pro quo in lxx
legitur: ego autem dominus deus tuus (signum_obeli) firmans caelum et creans terram, cuius
manus creauit omnem militiam caeli, et non ostendi ea tibi, ut ambulares post ea
(signum_metobeli) et eduxi te de terra aegypti. quae quoniam et in hebraico non habentur, et
a nullo uertuntur interpretum, in antiqua quoque editione lxx non leguntur, obelo praenotanda
sunt; praesertim cum sensus eorum perspicuus sit. unde ad reliqua transeamus, cum his quae
sequuntur iungentes superius capitulum: ego autem dominus deus tuus de terra aegypti, et
deum absque me nescies, et saluator non est praeter me. ego cognoui te in deserto in terra
solitudinis, iuxta pascua sua et adimpleti sunt et saturati; eleuauerunt cor suum et obliti sunt
mei lxx: ego autem dominus deus tuus et ego eduxi te de terra aegypti; et deum praeter me
non cognosces et saluator non est absque me. ego pascebam te in solitudine, in terra
inhabitabili, secundum pascua sua; et repleti sunt in saturitate, et eleuata sunt corda eorum;
idcirco obliti sunt mei. qui supra dixerat: fugit iacob in regionem syriae, et seruiuit israel in
uxore, et in uxore seruauit; in propheta autem eduxit dominus israel de aegypto, et in
propheta seruatus est; etiam nunc quid eis praestiterit, refert: ego dominus deus tuus, qui te
eduxi de terra aegypti, qui tibi mandaui per moysen; attende, ne forte comedas et satureris, et
obliuiscaris dei tui, qui eduxi te de terra aegypti; non est enim alius deus praeter me, et qui
possit saluare, nullus est alius. ego qui conditor omnium sum, cognoui, siue paui te in deserto
et in terra inhabitabili, ubi rerum omnium penuria, ubi nullae aquae; dedi tibi manna de caelo,
et aquarum fontes produxi de petra durissima. qui iuxta illud, quod alibi scriptum est:
incrassatus est, impinguatus, dilatatus et recalcitrauit dilectus, nunc quoque comederunt et
saturati sunt, et eleuauerunt cor suum, et obliti sunt eius, cuius beneficiorum memores esse
debebant. neque enim per tantam eremi uastitatem, ubi non solum fruges et arbores uineae
que, sed nec herba quidem gignitur, et nullae aquae ardorem temperant solis, quadraginta
annis poterat israel ad terram peruenire iordanis, nisi dominus omnia praestitisset. haereticos
quoque eduxit dominus de terra aegypti, de domo seruitutis, et de camino ferreo; qui primum
seruiebant regi pharaoni et ducibus eius; praecepit que eis in ecclesia, ut alium nescirent
deum nisi eum qui creator est omnium, et nouit saluare quos fecit. ipse cognouit eos et pauit
in terra solitudinis; ita ut possint dicere: dominus pascit me et nihil mihi deerit; in loco
pascuae ibi me collocauit, super aquam refectionis educauit me. dedit que eis angelorum
panem manna de caelo, quod in aegypto numquam comederant, et aquas de sequenti eos
petra. petra autem iuxta apostolum christus est, qui comederunt et adimpleti sunt, et cibos
domini non tulerunt. quibus idem apostolus loquitur: iam saturati estis, et iam diuites facti
estis; sine nobis regnatis, atque utinam regnaretis, ut et nos regnaremus uobis cum.
comederunt enim in sanctis scripturis panem qui de caelo descendit, et cum dauid dixerunt:
incerta et occulta sapientiae tuae manifestasti mihi. impleti que et saturati eleuauerunt contra
creatorem cor suum; et alterum sibi finxerunt deum, quicquid biberant et comederant, suis
meritis, non dei misericordiae deputantes. idcirco obliti sunt dei, qui praeceperat eis, ut legis
uerba religarent inter oculos et in manibus, atque in fimbriis palliorum, ne umquam
obliuiscerentur dei sui. et ero eis quasi leaena, sicut pardus in uia assyriorum; occurram eis
quasi ursa raptis catulis et disrumpam interiora iecoris eorum; et consumam eos ibi quasi leo;
bestia agri scindet eos. lxx: et ero eis quasi panther et sicut pardus in uia assyriorum;
occurram eis sicut ursa indigens cibo et disrumpam interiora cordis eorum; et deuorabunt eos
ibi catuli siluarum, bestiae agri disrumpent eos. illi adimpleti sunt et saturati; eleuauerunt
corda sua et obliti sunt mei.
ego autem, inquit, ero eis quasi leaena, siue panther, de quo supra plenius diximus; et sicut
pardus in uia assyriorum, quando ducentur captiui ab assyriis, et occurram illis quasi ursa
raptis catulis, siue indigens cibo; et disrumpam eorum uniuersa uitalia. aiunt qui de bestiarum
scripsere naturis, inter omnes feras nihil esse ursa saeuius cum perdiderit catulos, uel
indiguerit cibis; et non solum pantherae, pardi et ursae ferociam comminatur, sed leonis
quoque et omnium bestiarum, quae gignuntur in saltibus; et in haec omnia dicit se esse
uertendum, quando ierint ad assyrios; ne cum ibi fuerint dura perpessi, non potentiae et
indignationi domini, sed hostium fortitudini assignent miserias suas. simul que consideremus,
quod in euangelio credentibus loquitur: uenite ad me omnes qui laboratis et onerati estis et
ego reficiam uos; iugum enim meum suaue est et onus meum leue est, nunc per prophetam
incredulis, et nolentibus agere paenitentiam panther, pardus, ursa et leo efficitur; non solum
israelitis, qui propter idololatriam in medorum urbibus siue montibus collocati sunt; sed etiam
haereticis, qui propter mentis superbiam, et falsorum dogmatum uanitatem, obliti sunt dei sui,
et confinxerunt et secuti sunt deos alienos. perditio tua, israel, tantummodo in me auxilium
tuum. ubi est rex tuus? maxime nunc saluum te faciunt in omnibus urbibus tuis; et iudices tui,
de quibus dixisti: da mihi regem et principes; dabo tibi regem in furore meo, et auferam in
indignatione mea. lxx: corruptioni tuae, israel, quis auxiliabitur? ubi est rex tuus iste? et
saluum te faciat in cunctis urbibus tuis; iudicet te de quo dixisti: da mihi regem et principem;
et dedi tibi regem et principem, et dedi tibi regem in ira mea, et habui in furore meo. pro eo
quod lxx interpretati sunt habui, omnes abstuli transtulerunt. infelix israel et dignus
maledictione perpetua, qui in tantum impietatis descendit profundum ut solius dei saluetur
misericordia. potest autem in hebraeo et hoc sensu legi: dispereas, israel, quia nihil tibi
reliquum est nisi ut mea solum clementia conserueris. in lxx autem alter est sensus:
corruptioni tuae, israel, quis auxiliabitur? id est, captiuitati tuae et ultimae seruituti quis ferre
poterit auxilium eorum, quos tibi praesules aestimasti? ubi est rex tuus, de quo dicebas ad
samuel: constitue super nos regem, ut iudicet nos; sicut et gentes habent ceterae. cum que ille
contradiceret, respondebas: nequaquam; sed rex erit nobis, et erimus etiam nos sicut et omnes
gentes, et iudicabit nos rex noster, et egredietur ante nos, et pugnabit pro nobis. de quo ergo
tibi promiseras, quod tua bella bellaret, nunc in necessitate subueniat, et uniuersas urbes tuas
liberet de seruitute. ubi sunt iudices tui? ubi reges? tu enim dixisti: da mihi regem et
principes; itaque dedi tibi saulem regem in furore meo; intantum ut in diebus messis pluuiam
demonstrarem contra naturam iudaeae prouinciae. et abstuli, inquit, in indignatione mea
regem, uidelicet sedeciam, ut quem cum furore dederam, tollerem cum indignatione. alii
arbitrantur datum in furore regem ieroboam filium nabath, et ablatum in indignatione osee
ultimum regem decem tribuum. hoc quod exposuimus, dedi tibi regem in indignatione mea, et
abstuli regem, hebraei ad futurum tempus referunt. eo, inquit, tempore quo dicebas: da mihi
regem et principes, ego tibi respondebam per samuelem, quod daturus tibi essem in furore
meo, et ablaturus in indignatione mea. perditus est omnis haereticus et corruptioni traditus;
qui enim corrumpit templum dei, disperdet illum dominus; et in nullo alio habet auxilium,
nisi in sola misericordia dei, quam paenitudine consequitur. huius rex et iudices diabolus est
et daemones, siue omnes principes dogmatum peruersorum, qui eos tempore necessitatis et
angustiae liberare non poterunt, qui dati sunt in furore, et auferentur in indignatione; non
quod dominus tales eos uoluerit habere reges, alioquin non auferret quos sponte dederat, sed
quod dimiserit eos uoluntatibus suis; ut comedentes et incrassatis carnibus, nausearent, et
euomerent per nares suas, et odisse inciperent eos, quos tanto studio sequebantur. colligata est
iniquitas ephraim; absconditum peccatum eius; dolores parturientis uenient ei, ipse filius non
sapiens; nunc enim non stabit in contritione filiorum. lxx: congregatio iniquitatis ephraim;
absconditum peccatum eius; dolores quasi parturientis uenient ei; iste est filius tuus sapiens
quia nunc non sustinebit in contritione filiorum. quomodo si legitur quid in sacculo
conseruatur, et non perit ei cui ligatum est; sic omnis iniquitas qua in deum peccauit ephraim,
colligata est ei, et abscondita quasi in marsupio reseruatur. denique cum dies ultionis
aduenerit, et extrema captiuitas, dolores quasi parturientis uenient ei, siue apprehendent illum.
mulier parturiens multo antequam pariat, ex eo tempore quo concepit, scit se esse parituram,
et exspectat cotidie extrema tormenta cruciatus que uenturos. ita et ephraim filius insipiens,
de quo supra dixerat: ephraim columba insipiens, non habens cor in contritione filiorum et
populi sui. cum dies parturitionis et captiuitatis aduenerit, aut stare aut sufferre non poterit.
pro insipiente filio in lxx per ironiam legitur: iste filius sapiens, hoc est: quem sapientem
putabas, ut econtrario intellegatur insipiens.
omnibus autem haereticis iniquitas colligata est, quam in excelso locuti sunt; et absconditum
est peccatum eorum, dum se putant uenena sui cordis abscondere et habere secreta, quae cum
dies parturitionis aduenerit, dolore eiulationibus que pandentur. iste ephraim filius insipiens
est, quia dei sapientiam dereliquit, de quo et in hieremia scriptum est: nouissimum eius erit
insipiens, et in contritione filiorum suorum quos interfecit, quos iugulauit dei iram sustinere
non poterit. de manu mortis liberabo eos, de morte redimam eos. ero mors tua, o mors; ero
morsus tuus, inferne. consolatio abscondita est ab oculis meis, quia ipse inter fratres diuidit.
lxx: de manu inferni liberabo eos, de morte redimam illos; ubi est causa tua, mors? ubi est
aculeus tuus, inferne? consolatio abscondita est ab oculis meis, quia ipse inter fratris diuidet.
secundum utramque intellegentiam et ephraim, hoc est decem tribuum, et haereticorum qui
sustinere non potuerunt in contritione filiorum suorum, cum dolores quasi parturientis
aduenerint, dominus pollicetur de manu mortis se eos liberaturum, et de morte redempturum.
manum autem mortis appellat opera quibus interficit, iuxta illud quod scriptum est: in manu
linguae mors et uita. liberauit autem omnes dominus, et redemit in passione crucis et
effusione sanguinis sui, quando anima eius descendit in infernum, et caro eius non uidit
corruptionem; et ad ipsam mortem atque infernum locutus est: ero mors tua, o mors. idcirco
enim mortuus sum, ut tu mea morte moriaris. ero morsus tuus, inferne, qui omnes tuis
faucibus deuorabas. uidens que mortis duram necessitatem, et quod nullus sit hominum qui
uiuat et non uideat mortem, clementissimus pater sententiae recordatur antiquae, quia in adam
omnes morimur. siue propheta intellegens fragilitatem suam, et conditionem carnis humanae:
consolatio, ait, abscondita est ab oculis meis; et est sensus: non ualeo consolari, quicquid
mente concepero, dolorem meum non potest mitigare, cernentis, carissima inter se nomina
morte seiungi; ipse, inquit, infernus inter fratres diuidit. quicquid igitur separat fratres,
infernus est appellandus; et maxime mulier meretrix quae uocans insipientem ad se, dicit in
opibus prudentiae: panes occultos libenter attingite, et aquae furtiuae dulcedinem; et nescit
insipiens, quoniam terrigenae apud eam pereunt, et in profundum inferni incurrunt. quicquid
enim non licet, magis desideratur, et quod raritate dulce est, assiduitate in amaritudinem
uertitur. et mel distillat de labiis mulieris meretricis, quae ad tempus impinguat fauces
insipientis, nouissime autem amarius felle inuenitur, et acutius magis quam gladius utrimque
acutus. quicumque terrigena est, et de caelo non nascitur, interficitur eius amplexibus, et
ligatur institis lectulorum; et insipientiae pedes deducunt eos, qui utuntur ea, cum morte ad
inferos. inter mortem autem et inferos, hoc interest: mors est quo anima separatur a corpore;
infernus, locus in quo animae recluduntur, siue in refrigerio, siue in poenis, pro qualitate
meritorum. hoc diximus, ut ostenderemus, id mortem facere, quod meretricem mulierem.
mors enim diuidit fratres, hoc et mulier facit. in fratribus, omnem intellege caritatem, quod et
mater diuidatur a filia, et pater a filio, et frater a fratre. quod autem aliud sit mors, et aliud
infernus, et psalmista demonstrat, dicens: non est in morte qui memor sit tui; in inferno autem
quis confitebitur tibi? et in alio loco: ueniat mors super eos, et descendant in infernum
uiuentes. pro eo quod nos interpretati sumus: ero mors tua, o mors; ero morsus tuus, inferne,
lxx transtulerunt: ubi est causa tua, o mors? ubi est stimulus tuus, inferne? pro quo apostolus
posuit: absorpta est mors in contentione? ubi est, mors, contentio tua? ubi est, mors, aculeus
tuus? et exponens uirtutem testimonii intulit: aculeus autem mortis peccatum, uirtus uero
peccati lex; deo autem gratias, qui dedit nobis uictoriam per dominum nostrum iesum
christum. itaque quod ille in resurrectionem interpretatus est domini, nos aliter interpretari
nec possumus, nec audemus. potest mors et infernus et diabolus accipi, qui christi morte
iugulatus est, de quo et in esaia loquitur: deuorauit mors inualescens.
et postea sequitur: abstulit dominus omnem lacrimam ab omni facie. duos autem fratres inter
se morte diuisos, iuxta historiam illius temporis, quidam israel et iudam intellegunt, ut quod
tunc figurabatur in parte, nunc sentiatur in toto, et cum omni humano genere israel et iudas
liberandus sit et redimendus. in eo loco, in quo lxx transtulerunt: ubi est causa tua? et nos
diximus: ero mors tua, symmachus interpretatus est: ero plaga tua. quinta editio et aquila: ubi
sunt sermones tui? quod hebraice scribitur dabarach; legentes dabar, hoc est uerbum, pro
deber, quod interpretatur mors, iuxta illud quod in esaia legimus: mortem misit dominus in
iacob, et uenit in israel, hoc est deber, pro quo nos interpretati sumus: uerbum misit dominus
in iacob, et uenit in israel, id est dabar. pro aculeo quoque, quem nos morsum transtulimus,
symmachus apantêma~g, id est occursum, theodotion et quinta editio plagam et conclusionem
interpretati sunt. adducet urentem uentum dominus de deserto ascendentem, et siccabit uenas
eius, et desolabit fontem eius, et ipse diripiet thesaurum omnis uasis desiderabilis. lxx:
adducet urentem uentum dominus de deserto super eos, et siccabit uenas eius, et desolabit
fontes illius; iste arefaciet terram eius et omnia uasa desiderabilia. legi in cuiusdam
commentariis, uentum urentem quem adducet dominus de deserto, illum esse qui percusserit
domum iob in quattuor angulis, et fecerit eam super filios ruere conuiuantes et unum esse de
his uentis, quos in euangelio legimus flare et uenire cum turbine, pluuiis atque fluminibus, ut
subuertant domum, quae super petram aedificata est, siue super arenas. quod mihi nequaquam
uidetur; neque enim in iob scriptum est, quod uentum de deserto dominus adduxerit; sed
nomen domini tacitum est, ut uentus de solitudine, qui contra sanctum uirum sua uenerat
uoluntate, contraria possit accipi fortitudo, et uenti qui domorum fundamenta subuertunt,
utique ad bonam partem non poterunt referri. superest ut uentum urentem quem adducet
dominus de deserto ascendentem, illum intellegamus, de quo et in abacuc legimus: deus ab
austro ueniet, et sanctus de monte pharan; qui utique in solitudine et in meridie situs est. et in
cantico legimus: ubi pascis, ubi cubas in meridie? hunc itaque uentum urentem, qui siccet
uenas mortis, et fontes eius arefaciat, adducet dominus de deserto ascendentem; de deserto
autem humani generis, in quo et diabolus quaerens requiem, inuenire non potuit. siue
desertum intellegimus sanctae mariae uterum uirginalem, quod absque semine humano nullo
frutice pullulauerit; sed uirga simplex atque purissima et unione fecunda ediderit eum florem
qui dicit in cantico canticorum: ego flos campi et lilium conuallium. et pulchre tam in esaia
quam in praesenti loco, flos ascendens et uentus ascendens dicitur, quia de humilitate carnis
ad excelsa conscendit, et nos se cum duxit ad patrem, dicens in euangelio: cum exaltatus
fuero, omnia traham ad me. ipse quasi radix ascendet de terra inhabitabili, et nequaquam
mors in eum, sed ipse morti superueniet, neque enim mors in eo ullam suae potestatis uiam
repperit, et hoc est quod in prouerbiis dicitur: impossibile est super petram serpentis inuenire
uestigia. et ipsa loquitur in euangelio: ecce ueniet princeps mundi huius et inueniet in me
nihil. iste siccabit uenas mortis, et desolabit fontes eius. uenae mortis et fontes et aculeus,
peccata ab apostolo nominantur; quibus arefactis, mors quoque ipsa siccabitur. quod que
sequitur: ipse diripiet thesaurum omnis uasis desiderabilis, dupliciter accipitur, siue quod
desiderabilia sunt his, qui in morte habitant, siue uasa desiderabilia quae in thesauro
retinebantur inferni, sanctos intellegimus, quos alligatos forte dominus diripuit et tulit de
inferis, et quasi uasa pretiosissima se cum perduxit in paradisum. pro thesauro, terram lxx
transtulerunt; terra haud dubium quin mortem significet. et in psalmis legimus: credo uidere
bona domini in terra uiuentium. et iuxta euangelium: mites possidebunt terram. econtrario
debemus accipere terram inferni non esse terram uiuentium, sed mortuorum, quae diripitur
atque uastatur, quando morte christi uinctae apud inferos animae liberantur. secundum
tropologiam in eisdem, - de quibus supra diximus -, commentariis legimus uentum urentem,
diabolum intellegi et singulos haeresiarchas. quod nobis displicet; neque enim diabolus uenas
mortis fontes que erroris siccare potest, cum ipse fons et initium mortuorum sit. itaque sermo
ecclesiasticus urens intellegendus est uentus, qui omnia haereticorum dogmata arefaciat et
perducat ad nihilum, et diripiat eos atque dispergat, qui haereticorum doctrina in morte
fuerant congregati.
Caput 14
pereat samaria, quoniam ad amaritudinem concitauit deum suum; in gladio pereant; paruuli
eorum elidantur et fetae eius discindantur. lxx: disperdetur samaria quoniam restitit deo suo,
in gladio peribunt et lactentes eorum elidantur ad petram, et habentes in utero disrumpantur.
saepe diximus decem tribus appellari samariam a metropoli samaria quae ex nomine augusti
nunc uocatur augusta, id est sebaste. cur autem samaria dicta sit ciuitas, in regum uolumine
legimus. imperat igitur propheta, et, ut uerius dicam, optatiuo modo loquitur, ut samaria
pereat. cui cum deus tanta praepararet bona, illa contra deum faciat, et magis daemonum
simulacra sectetur; symmachus autem non dixit pereat, sed metamelêsei~g, id est aget
paenitentiam, sui que eam paenitebit erroris, quod dulcissimum deum in amaritudinem
uerterit, ita ut bellatores eius in gladio pereant, paruuli et lactentes elidantur ad terram, et
fetae eius atque praegnantes disrumpantur in mortem. quae omnia ei accidisse credendum est
tempore captiuitatis et angustiae, quando suam patriam perdiderunt, et qui euasere gladium,
in seruitutem perpetuam sunt abducti. de haereticis facilis intellegentia est, quod uocentur
samaria, eo quod dei praecepta seruare se iactent, non quod custodissent leges eius; sed quod
hoc esse se dicant in similitudinem schismatis nouatianorum, qui et ipsi katharous~g, id est
mundos, se uocant, cum sint omnium immundissimi, negantes paenitentiam, per quam
peccata mundantur, iuxta illud quod scriptum est: lauabis me, et super niuem dealbabor. et in
esaia: lauamini, mundi estote. lauacrum autem non baptismum uocat, sed omnem
paenitudinem, quae sordes abluit peccatorum. pereat igitur huiuscemodi samaria, quia
quicquid loquitur repugnat deo suo et clementiam eius uertit in crudelitatem, usque adeo, ut
qui uiri sunt apud illam et ad malitiae aetatem uenere perfectam, spiritali mucrone truncentur.
qui autem paruuli atque lactentes, elidantur ad petram, de quibus et in psalmo legimus: beatus
qui tenebit et allidet paruulos suos ad petram. fetae quoque eius atque praegnantes quae de
malo semine conceperunt, ideo disrumpentur, ne pessimos liberos faciant. tale quid et in
euangelio nobis subicitur: uae praegnantibus et nutrientibus in diebus illis; diebus uidelicet
tribulationis et angustiae. interficiuntur autem et bellatores samariae gladio et lactentes
eliduntur, et praegnantes disrumpuntur, ut pereunte malo semine, zizaniis que eius exustis,
solum remaneat triticum, quod in domini horrea recondatur. conuertere, israel, ad dominum
deum tuum, quoniam corruisti in iniquitate tua, tollite uobis cum uerba, et conuertimini ad
dominum; dicite ei: omnem aufer iniquitatem et accipe bonum, et reddemus uitulos labiorum
nostrorum; assur non saluabit nos, super equum nos ascendemus; nec dicemus ultra: dii nostri
opera manuum nostrarum, quia eius qui in te est misereberis pupilli. lxx: conuertere, israel, ad
dominum deum tuum, quia infirmatus es in iniquitatibus tuis; sumite uobis cum sermones et
reuertimini ad dominum, dicite ei ut non tollatis iniquitatem, sed assumatis bona; et reddemus
fructum labiorum nostrorum. assur non saluabit nos, super equum non ascendemus;
nequaquam ultra dicemus: dii nostri, operibus manuum nostrarum, qui in te est miserebitur
pupilli. pereunte samaria et uiris eius, et paruulis et praegnantibus occisis, elisis atque
discissis, totus israel ad paenitentiam prouocatur; ut qui infirmatus est, siue corruit in
iniquitatibus suis, reuertatur ad medicum et recipiat sanitatem, uel stare incipiat qui corruerat;
docetur que quomodo debeat agere paenitentiam. tollite, inquit, uobis cum uerba, id est
preces, et delictorum confessionem, et conuertimini ad dominum tam uerbis quam operibus;
et dicite ei: omnem aufer iniquitatem, nihil languoris in nobis et ruinae pristinae derelinquas,
ne rursum mali seminis pullulent rediuiua plantaria; et accipe, inquit, bonum. nisi enim tuleris
mala nostra, bonum tibi quod offeramus, habere non possumus, iuxta illud quod alibi
scriptum est: declina a malo, et fac bonum; et reddemus, ait, uitulos labiorum nostrorum. pro
uitulis qui hebraice appellantur pharim, fructum septuaginta transtulerunt, qui dicitur pheri,
falsi sermonis similitudine. uituli autem labiorum, laudes in deo sunt et gratiarum actio:
sacrificium enim deo spiritus contribulatus. igitur illos iam tempore carnalibus uictimis
reprobatis, placabilis deo hostia est pura confessio. qui reddituros se esse dicunt labiorum
uitulos, et dei laudes perpeti uoce canituros, etiam aliud repromittunt quod nequaquam in
assyriis spem habeant, nec super equos aegyptios, quia fallax equus ad salutem, et ultra non
adorent opera manuum suarum, uitulos aureos, quos in dan bethel que conflauerunt; et idcirco
inquiunt: nequaquam operi manuum nostrarum dicemus: dii nostri, quia tu eius qui in te est
pupilli misereberis; hoc est populi israel, de quo dixeras: filius primogenitus meus israel. et:
filios genui et exaltaui, ipsi autem me spreuerunt. et in alio loco: filii alieni mentiti sunt mihi.
pupillus autem uocatur, quia deum perdidit patrem. quidam pupillum exposuit eum qui a
malo patre recesserit diabolo, et idcirco dei misericordia subleuetur. ad omne quoque dogma
peruersum cotidie propheta loquitur, et sectatores eius ad paenitentiam prouocat dicens:
conuertimini ad dominum deum uestrum qui corruistis, siue elanguistis, domini perdita
sanitate; tollite uobis cum uerba, ueram fidei confessionem, et dicite: aufer iniquitatem quae
in nostro corde uersatur, et accipe bonum fidei. quia corde creditur ad iustitiam, ore autem
confessio fit ad salutem. uituli et uictimae, siue fructus labiorum sunt in patrem et filium et
spiritum sanctum et in passionem ac resurrectionem domini credere; quam qui obtulerit ei,
nequaquam sperabit in rege assyrio, de quo crebro diximus.
nec ascendet super equum quem praecipit dominus nequaquam multiplicandum, quem habens
pharao cum suo est demersus equitatu. omnis enim haereticus ascendit equos per superbiam,
quos in errore suo ipse generauit. et nequaquam ultra dicent operibus manuum suarum, quae
ipsi artifici eloquio confinxerunt, dii nostri. gulosi uenter deus est, auarus colit mammona,
haereticus dogma quod finxit qui uniuersa haec deseruerit, id est assur et equum et opera
manuum suarum, reuertetur ad dominum, et placabit patrem suum a quo fuerat abiectus.
sanabo contritiones eorum, diligam eos spontanee, quia auersus est furor meus ab eo; ero
quasi ros. israel germinabit quasi lilium et erumpet radix eius ut libani; ibunt rami eius, et erit
quasi oliua gloria eius, et odor eius ut libani. conuertentur sedentes in umbra eius, uiuent
tritico et germinabunt quasi uinea. memoriale eius sicut uinum libani ephraim quid mihi ultra
idola? ego exaudiam et dirigam eum; ego ut abietem uirentem, ex me fructus tuus inuentus
est. lxx: sanabo habitatores eorum; diligam eos manifeste, quia auersa est ira mea ab eis; ero
quasi ros. israel florebit ut lilium et mittet radices suas quasi libanus; ibunt rami eius, et erit
quasi oliua fructifera, et odor illius quasi libani, conuertentur et sedebunt sub umbra eius;
bibent et inebriabuntur frumento, et efflorebit sicut uinea memoriale eius, sicut uinum libani
ephraim. quid ei ultra et idolis? ego humiliaui eum et ego confortabo illum, ego sicut
iuniperus condensa; ex me fructus tuus inuentus est. conuersis ad paenitentiam et instar
pupilli patrem quem reliquerant cognoscentibus, respondit deus: sanabo contritiones, uel
habitacula eorum in quibus fuerant uulnerati, siue confracti, uel in quibus male habitauerant:
diligam eos spontanee; quod lxx transtulerunt homologôs~g, perspicue atque aperte uel
absque ulla dubitatione. diligit autem dominus diligentes se, de quibus et in alio loco ait: ego
diligentes me diligo. qui enim prius irascebar eis propter peccata quae fecerant, nunc
miserebor propter clementiam meam. et ero eis quasi ros; ut fornacem babylonicam et
caminum aestuantis incendii meo rore restinguam, qui et per isaac patriarcham ad iacob
seruum meum locutus sum: de rore caeli erit habitaculum tuum. quomodo enim dominus fit
credentibus lumen, uia, ueritas, panis, uinea, ignis, pastor, agnus, ianua, uermis, et cetera; sic
qui indigemus illius misericordia, et peccatorum febribus aestuamus, in rorem nobis uertitur,
ad quem dicit esaias: ros enim qui a te est, sanitas eorum est. et in deuteronomii cantico
moyses loquitur: descendant sicut ros uerba mea. cum autem nos dominus suo rore
resperserit, et siccitatem pectoris nostri suis pluuiis irrigauerit, germinabimus, immo
florebimus ut lilium, imitantes dominum saluatorem, qui dicit in cantico canticorum: ego flos
campi et lilium conuallium; et loquitur ad sponsam suam, quae non habet rugam neque
maculam: sicut lilium in medio spinarum sic proxima mea in medio filiarum. cum que
creuerimus in domino, mittemus radices nostras sicut arbores libani, quae quantum in auras
consurgunt uertice, tantum radicem in ima demergunt, ut nulla tempestate quatiantur, sed
stabili mole consistant. harum arborum rami huc illuc que tenduntur, ut ueniant uolatilia caeli
et habitent in eis. et ne forsitan putaremus, quia dixerat: erumpet radix eius, siue emittet
radices suas quasi libanus, de cedris eum loqui et infructuosis arboribus, sanctum uirum et
conuersum ad dominum oliuae frugiferae comparat, qui dicit in alio loco: ego autem sicut
oliua fructifera in domo dei. cuius fructum quinque sibi sapientes uirgines parauerunt, ex quo
uulnerum mitigatur tumor, languentium membra requiescunt, in tenebris lumen accenditur,
unguntur in agone certantes. haec oliua habebit odorem quasi libani, uel thuris, quod genus et
thymiamatis: homônumôs~g apud graecos et hebraeos et mons appellatur et thus, uel certe
montis libani qui fertilissimus et uirens, densissimis arborum comis protegitur, ita ut possit
oliua dicere: christi bonus odor sumus. qui autem conuersi fuerint ad dominum, accipient
conuersionis suae praemium, ut sedeant in umbra eius et dicant: sub umbra eius requieui et
sedi, et fructus eius dulcis est in ore meo. cum que sederint in umbra illius, uiuent qui prius
mortui fuerant, siue iuxta septuaginta bibent et inebriabuntur tritico, hoc est rerum omnium
abundantia. quod autem hic ebrietas non euersionem mentis, sed copiam rerum omnium
significet, uersiculus ille declarat dicens: uisitasti terram et inebriasti eam. et ioseph
conuiuium, in quo inebriasse dicitur fratres suos. et dominus loquens ad apostolos: comedite,
amici, et bibite, et inebriamini, fratres. siue quia dominus ipse est frumentum et uinea,
quicumque crediderit in eo, inebriari dicitur.
denique sequitur: et florebit quasi uinea, memoriale eius sicut uinum libani. uinum autem
libani possumus appellare mixtum et conditum thymiamate, ut odorem suauissimum habeat,
uel uinum libani quod domino libatur in templo, de quo in zacharia sub libani uocabulo
legimus: aperi libane, portas tuas. cum ergo tanta rerum abundantia sit futura, o ephraim,
omnis qui agis paenitentiam, et qui meus esse coepisti, dimitte idola, simulacra contemne;
ego enim sum qui humiliaui te, et ego exaltabo te, siue ego exaudiam et dirigam, et faciam
eum quasi abietem uirentem; ut de illo iuxta hebraeos dicatur in psalmo: abies domus eius.
aut certe ego ero quasi iuniperus condensa, ut sub mea umbra requiescat. de arkeuthois~g, id
est iuniperis, iuxta septuaginta interpretes, salomon ianuas templi fecisse memoratur, quia
christus, per quem ad patrem accedimus, hanc habet naturam, ut semper floreat, semper
nouos afferat fructus, et numquam deponat uirorem suum. haec iuniperus sub umbra sua
quiescentibus, ne mundi huius ardore feriantur, et percutiat aestus, caput eorum, sicut
quondam percussit et ionae, dat fruges, et non solum dormientibus requiem et sedentibus, sed
et saturitatem uescentibus praebet. quicquid secundum anagôgên~g interpretati sumus, in
aduentu domini saluatoris, et in conuersione ueri israel, hoc tam ad haereticos et iudaeos
quam ad gentes et ad omne dogma peruersum referri potest, ut cum egerint paenitentiam,
ueniam consequantur. si ergo plenitudo repromissionis adimpleta est in aduentu saluatoris, et
cotidie impletur in ecclesia, credendum est ut plenius impleatur, quando perfectione ueniente,
quod nunc ex parte est, destruetur. notandum quod saepe diximus, salutem israelis et
reuersionis ad deum, et de captiuitate redemptionem, non carnaliter accipere, ut iudaei putant,
sed spiritaliter, ut uerissime comprobatur. quis sapiens et intelleget ista? intellegens et sciet
haec? quia rectae uiae domini et iusti ambulabunt in eis, praeuaricatores uero corruent in eis.
lxx: quis sapiens et intelleget haec, aut intellegens et cognoscet ea? quia rectae uiae domini et
iusti ambulabunt in eis; qui autem impii sunt, infirmabuntur in illis. quando dicit: quis sapiens
et intelleget haec? intellegens et cognoscet ea? obscuritatem uoluminis et difficultatem
explanationis ostendit. si autem ipse qui scripsit, uel difficile, uel impossibile confitetur; quid
nos facere possumus, qui lippientibus oculis et peccatorum sordibus obscuratis, clarissimum
iubar solis non possumus intueri, nisi dicere illud quod scriptum est: o profundum diuitiarum
sapientiae et scientiae dei! quam inscrutabilia sunt iudicia eius et inuestigabiles uiae eius!
quis enim potest absque christo docente cognoscere quid significet iezrael, quid soror eius
non misericordiam consecuta; quid tertius frater non populus meus; quae sit adultera, quae
sine lege dei multo sessura sit tempore; quod sit pactum cum bestiis terrae, et cum uolatilibus
caeli; qui sit dauid ad quem populus reuersurus sit, cuius sit die tertia resurrectio et egressus
eius diluculo comparetur; quae sit pluuia prima et nouissima; qui sit quem propheta dicit esse
uenturum, qui nobis monstret iustitiam, aut in cuius typo educatur israel ex aegypto, et
portetur in brachiis, et ducatur in funiculis caritatis; qui sit qui interficiat mortem, et siccet
uenas eius et fontes arefaciat, et diripiat uasa quae in thesauro condita tenebantur, et cetera
quae longum est retexere? unde quicumque sanctus et iustus est, rectas uias domini esse
cognoscet. uias autem domini esse cognoscimus lectionem ueteris et noui testamenti,
sanctarum intellegentiam scripturarum. in his uiis qui ambulat, nisi conuertatur ad dominum
et ablatum ab eo fuerit uelamen, quod erat ante oculos moysi, rectum iter inuenire non poterit.
sin autem dixerit cum dauid: reuela oculos meos, et considerabo mirabilia de lege tua,
ambulabit in eis, et christum inueniet; et iudaeos atque haereticos, quos uel praeuaricatores
uel impios scriptura nunc nominat, offendere in eis, et infirmari atque corruere sentiet; iuxta
illud quod scriptum est: ecce iste positus est in ruinam et in resurrectionem multorum in
israel.