Hieronymus
Commentarii in Isaiam
Prologus
expletis longo uix tempore in duodecim prophetas uiginti
explanationum libris et in danielem commentariis, cogis me, uirgo
christi eustochium, transire ad esaiam; et quod sanctae matri tuae
paulae, dum uiueret, pollicitus sum, tibi reddere. quod quidem et
eruditissimo uiro fratri tuo pammachio promisisse me memini; cum que in
affectu par sis, uincis praesentia. itaque et tibi et illi per te reddo
quod debeo, oboediens christi praeceptis, qui ait: scrutamini
scripturas; et: quaerite et inuenietis ne illud audiam cum iudaeis:
erratis, nescientes scripturas neque uirtutem dei. si enim iuxta
apostolum paulum christus dei uirtus est dei que sapientia; et qui
nescit scripturas, nescit dei uirtutem eius que sapientiam, ignoratio
scripturarum, ignoratio christi est. unde orationum tuarum fultus
auxilio, quae diebus ac noctibus in dei lege meditaris et templum es
spiritus sancti, imitabor patremfamilias, qui de thesauro suo profert
noua et uetera; et sponsam dicentem in cantico canticorum: noua et
uetera, fratruelis meus, seruaui tibi; sic que exponam esaiam, ut illum
non solum prophetam, sed euangelistam et apostolum doceam. ipse enim de
se et de ceteris euangelistis ait: quam speciosi pedes euangelizantium
bona, euangelizantium pacem. et ad ipsum quasi ad apostolum loquitur
deus: quem mittam et quis ibit ad populum istum? et ille respondit: ecce
ego, mitte me.
nullus que putet, me uoluminis istius argumentum breui cupere
sermone comprehendere, cum uniuersa domini sacramenta praesens scriptura
contineat et tam natus de uirgine emmanuel, quam illustrium patrator
operum atque signorum, mortuus ac sepultus et resurgens ab inferis et
saluator uniuersarum gentium praedicetur. quid loquar de physica, ethica
et logica? quidquid sanctarum est scripturarum, quidquid potest humana
lingua proferre, et mortalium sensus accipere, isto uolumine continetur.
de cuius mysteriis testatur ipse qui scripsit: et erit uobis uisio
omnium, sicut uerba libri signati, quem cum dederint scienti litteras,
dicent: lege istum. et respondebit: non possum, signatus est enim. et
dabitur liber nescienti litteras dicetur que ei: lege. et respondebit.
nescio litteras. siue igitur hunc librum dederis nescienti litteras
populo nationum, respondebit: non possum legere, quia non didici
litteras scripturarum. siue dederis scribis et pharisaeis, qui legis
litteras nosse se iactant, respondebunt: non possumus legere; quia
signatus est liber. quid idcirco eis signatus est? quoniam non
receperunt eum quem signauit pater, qui habet clauem dauid: qui aperit
et nemo claudit; qui claudit et nemo aperit.
neque uero, ut montanus cum insanis feminis somniat, prophetae in
ecstasi sunt locuti, ut nescirent quid loquerentur et cum alios
erudirent, ipsi ignorarent quid dicerent. de quibus apostolus ait:
nescientes quae loquantur, et de quibus affirment. sed iuxta salomonem
qui loquitur in prouerbiis: sapiens intellegit quae profert de ore suo,
et in labiis suis portabit scientiam; etiam ipsi sciebant quid dicerent.
si enim sapientes erant prophetae, quod negare non possumus; et moyses
omni eruditus sapientia loquebatur ad dominum et dominus respondebat ei;
et de daniele ad principem tyri dicitur: numquid sapientior es daniele?
et dauid sapiens erat qui gloriabatur in psalmo: incerta et occulta
sapientiae tuae manifestasti mihi, quomodo sapientes prophetae instar
brutorum animantium quid dicerent ignorabant? legimus et in alio
apostoli loco: spiritus prophetarum prophetis subiecti sunt, ut in sua
habeant potestate, quando taceant, quando loquantur. quod si cui uidetur
infirmum, illud eiusdem apostoli audiant: prophetae duo aut tres
loquantur et alii diiudicent; si autem alii fuerit reuelatum sedenti,
prior taceat. qua possunt ratione reticere, cum in ditione sit spiritus
qui loquitur per prophetas, uel tacere uel dicere? si ergo intellegebant
quae dicebant, cuncta sapientiae rationis que sunt plena. nec aer uoce
pulsatus ad aures eorum perueniebat; sed deus loquebatur in animo
prophetarum, iuxta illud quod alius propheta dicit: angelus qui
loquebatur in me; et: clamantes in cordibus nostris: abba, pater. et:
audiam quid loquatur in me dominus deus.
unde post historiae ueritatem, spiritaliter accipienda sunt
omnia; et sic iudaea et hierusalem, babylon et philistiim, moab et
damascus, aegyptus et desertum mare, idumaea et arabia, ac uallis
uisionis et ad extremum tyrus, et uisio quadrupedum intellegenda sunt,
ut cuncta quaeramus in sensu et in omnibus his quasi sapiens architectus
paulus apostolus iaciat fundamentum, quod non est aliud praeter
christum iesum.
magni que laboris et operis est, omnem esaiae librum uelle disserere, in
quo maiorum nostrorum ingenia sudauerunt, graecorum dico. ceterum apud
latinos grande silentium est, praeter sanctae memoriae martyrem
uictorinum, qui cum apostolo dicere poterat: etsi imperitus sermone, non
tamen scientia. scripsit enim in hunc prophetam iuxta editiones
quattuor, usque ad uisionem quadrupedum in deserto, origenes triginta
uolumina, e quibus uicesimus sextus liber non inuenitur. feruntur et
alii sub nomine eius de uisione tetrapod�n~g duo ad gratam libri, qui
pseudographi putantur; et uigintiquinque homiliae et s�mei�seis~g, quas
nos excerpta possumus appellare. eusebius quoque pamphili iuxta
historicam explanationem quindecim edidit uolumina; et didymus, cuius
amicitiis nuper usi sumus, ab eo loco ubi scriptum est: consolamini,
consolamini populum meum, sacerdotes; loquimini ad cor hierusalem, usque
ad finem uoluminis, decem et octo edidit tomos. apollinaris autem more
suo sic exponit omnia, ut uniuersa transcurrat et punctis quibusdam
atque interuallis, immo compendiis grandis uiae spatia praeteruolet; ut
non tam commentarios quam indices capitulorum nos legere credamus. ex
quo animaduertis, quantae difficultatis sit, ut latini nostri, quorum
aures fastidiosae sunt et ad intellegendas scripturas sanctas nauseant,
plausu que tantum eloquentiae delectantur, mihi ignoscant, si prolixius
locutus fuero; cum esaias duodecim prophetis iuxta numerum uersuum aut
aequalis aut maior sit. sicubi autem praetermissis lxx de hebraico
disputaui, illud in causa est quod aut eadem, aut similia sunt pleraque
cum ceteris et duplici editione proposita, nolui libros explanationis
extendere, qui etiam in simplici expositione modum breuitatis excedunt.
sed iam propositum persequamur.
LIBER 1
1. uisio esaiae, filii amos, quam uidit super iudam et hierusalem, in diebus oziae, ioatham, achaz et ezechiae, regum iuda.
pro iuda, in quo significantur duae tribus, lxx et theodotio
posuerunt iudaeam, quae totam terram duodecim tribuum ostendit. et pro
eo quod nos ex hebraeo uertimus: super iudam et hierusalem, illi
interpretati sunt: contra iudaeam et hierusalem. symmachus more suo
manifestius: de iuda et hierusalem, ut nec prospera, nec aduersa uelit
titulo demonstrari, sed ea quae de iuda et hierusalem in utramque partem
propheticus sermo praedixerat. ergo esaias principaliter de duabus
loquitur tribubus, iuda et beniamin; exceptis decem, quae in samaria
erant et uocabantur ephraim et israel; et quas sub ozia rege iuda et
hierusalem, phul rex assyriorum uastare iam coeperat. denique
quinquagesimo et secundo imperii eius anno, regnante apud samariam
phacee filio romeliae, uenit teglathphalasar rex assyriorum, et cepit
aion et abel domum maacha, et ianoe et cedes et asor et galaad et
galilaeam, omnem terram nephthali. et transtulit eos in assyrios. ex quo
ostenditur, uicina euersione samariae in comminationem duarum tribuum
haec uniuersa narrari.
ozias autem ipse est, qui et azarias, duplici nomine. et uno
quidem atque eodem tempore esaiam, osee, ioel et amos prophetasse, ex
regibus qui ponuntur in titulo, cognoscimus; sed principium uerbi domini
fuit in osee filio beeri. amos autem pater esaiae, non ut plerique
autumant, tertius duodecim prophetarum est, sed alius, diuersis que apud
hebraeos scribuntur litteris. iste primam et extremam litteras habet
aleph et sade; ille ain et samech; et iste secundum quosdam
interpretatur fortitudo siue robustus; ille populus durus uel grauis; de
quo in amos plenius diximus. non solum autem hic propheta, sed et alii
cum habeant in titulo: uisio quam uidit esaias, siue abdias, non
inferunt quid uiderint. uerbi gratia: uidi dominum sabaoth sedentem
super thronum excelsum et eleuatum et seraphim duo in circuitu eius; sed
quae dicta sunt, narrant, id est: audi, caelum et auribus percipe,
terra. et: haec dicit dominus deus ad idumaeam: auditum audiui a domino
et legatum ad gentes misit. prophetae enim prius uocabantur uidentes,
qui dicere poterant: oculi nostri semper ad dominum. et: ad te leuaui
oculos meos qui habitas in caelo. unde et apostolis a saluatore
praecipitur: leuate oculos uestros, et uidete regiones, quia iam albae
sunt ad metendum. istos cordis oculos et sponsa habebat in cantico
canticorum, cui sponsus dicit: uulnerasti cor meum, soror mea sponsa,
uno ex oculis tuis. et in euangelio legimus: lucerna corporis tui est
oculus tuus. in ueteri quoque dicitur instrumento, quod populus uiderit
uocem dei.
ex quo montani deliramenta conticeant, qui in ecstasi et cordis amentia
prophetas putat uentura dixisse; neque enim uidere poterant quod
ignorabant. scio quosdam iudaeam et hierusalem de caelestibus
interpretari et esaiam sub persona domini saluatoris. quod captiuitatem
illius prouinciae in nostra terra praenuntiet et postea reditum
conscensum que ad montem sanctum in diebus nouissimis. quae nos
contraria christianorum fidei iudicantes, uniuersa despicimus, et
sequentes historiae ueritatem sic interpretamur spiritaliter, ut
quidquid illi de caelesti hierusalem somniant, referamus ad christi
ecclesiam, et ad eos qui uel propter peccata egrediuntur ex ea, uel ob
paenitentiam reuertuntur ad sedem pristinam, de qua et illud in hoc
eodem propheta dici arbitramur: illuminare, illuminare, hierusalem;
uenit enim lux tua, et gloria domini super te orta est. et: in te
apparebit dominus et gloria illius super te ostendetur et gradientur
reges in lumine tuo, et gentes in splendore tuo, quando uenient omnes
filii eius de longe, et filiae illius in humeris portabuntur et operient
eam cameli madian et epha, afferentes aurum et thus; et greges cedar
congregabuntur in hierusalem et arietes nabaioth properabunt et erunt
placabiles hostiae super altare domini.
quod que in titulo ponitur prophetasse eum sub ozia et ioatham,
et achaz et ezechia, regibus iuda, non ut in aliis prophetis confuse
intellegendum est, ut nesciamus quid sub quo specialiter rege dictum
sit; sed usque ad finem uoluminis scriptum refertur, quid seorsum sub
ozia, et quid sub ioatham, et quid sub achaz, et quid sub ezechia ei a
domino reuelatum sit. sciamus quoque ezechiam in hierusalem duodecimo
anno romuli, qui sui nominis in italia condidit ciuitatem, regnare
coepisse. ut liquido appareat, quanto antiquiores sint nostrae
historiae, quam gentium ceterarum. interpretatur autem esaias: saluatus
domini. iuda: confessio. hierusalem: uisio pacis. ozias: fortitudo
domini. ioatham: domini perfectio. achaz: tenens siue robustus.
ezechias: imperium domini. qui igitur domino praesidente saluatur et est
filius amos, id est fortis atque robusti, cernit spiritaliter uisionem
confessionis, dum antiqua peccata deplangit; et pacis, dum post
paenitentiam transit ad lucem, et aeterna pace requiescit; cuncta que
illius tempora transeunt sub fortitudine domini et perfectione eius ac
robore. cum que omnia fecerit, dicet illud euangelicum: serui inutiles
sumus; quod enim debuimus facere, fecimus.
audi, caelum, et auribus percipe, terra, quia dominus locutus
est. supra, quis propheta, cuius filius, quid contra iudam et
hierusalem, siue super iudam et hierusalem, et quo tempore uiderit,
titulo demonstratum est. nunc caelum et terram ad audiendum prouocat. in
caelo supernas significans angelicas que uirtutes; in terra mortalium
genus, met�numik�s~g ab his quae continent, ea quae continentur. siue
quia per moysen testes uocauerat dominus caelum et terram, dans populo
israel legem suam et dixerat: attende, caelum, et loquar; audiat terra
uerba oris mei. post praeuaricationem populi, eosdem rursum in
testimonium uocat, ut cuncta elementa cognoscant, iuste deum in ultionem
mandatorum suorum ad iracundiam concitatum. pro caelum, hebraicum
samaim caelos plurali numero sonat; maxime cum audite dixerit, id est,
semu, quod plurali effertur numero, non singulari. sed quidam uolunt
pluraliter quidem dici caelos, singulariter intellegi, iuxta illud quod
singulas ciuitates, thebas et athenas uocamus. est que hebraici
characteris idioma, ut omnia quae in syllabam finiuntur -im masculina
sint et pluralia, ut cherubim et seraphim. et quae in -oth, feminina et
pluralia, ut sabaoth. et hoc notandum quod caelis dicatur, audite,
terrae, auribus percipe; ea enim quae excelsa sunt, maiorem habent
intellegentiam, quae humiliora, terrenis sensibus inuoluuntur. unde et
saluator in euangelio: qui habet, inquit, aures audiendi, audiat. si
quis igitur caelum est et habet municipatum in caelestibus, audiat
mystice quae dicuntur.
si quis terrenus, simplicem sequatur historiam. illud quoque
animaduertendum, quod non dixerit: audi, caelum, et auribus percipe,
terra, quid uobis locuturus sit dominus; sed quid locutus sit mihi, ut
quod ego audiui in spiritu, uobis referam, qui ipsum loquentem audire
non meremini. quidam caelum et terram quasi animantia ad audiendum
prouocari putant, iuxta illud, quod de terra in alio loco dicitur: qui
respicit terram et facit eam tremere; cum hoc potestatis dei sit, non
terrenae intellegentiae.
filios genui et exaltaui: ipsi autem spreuerunt me. pro quo
symmachus et theodotio ita uerterunt: filios enutriui et exaltaui. ab
hoc loco narrat propheta, quid dominus sit locutus, quod populum israel,
quos seruos communi lege condiderat, in filios uerterit, dixerit que
filius primogenitus meus israel. denique et dominus in euangelio
apostolis promittit, quod si fecerint uoluntatem eius, iam non appellet
eos seruos, sed filios et amicos. quod si superbierit israel, audiens se
esse primogenitum, intellegat primogenitum idcirco se dici, quia
secundi filii ex gentibus significentur. non enim appellatur unigenitus,
qui excludat fratres ceteros; sed primogenitus, ut monstret et alios
secuturos; et tamen iuxta mysteria scripturarum, non primogeniti
accipiunt hereditatem, sed secundi. primogenitus fuit cain, sed abel
munera placuerunt deo. primogenitus ismael, sed isaac accepit
hereditatem. primogenitus esau, sed benedictionem patris iacob
supplantator eripuit. primogenitus ruben, et tamen benedictio seminis
christi transfertur ad iudam. itaque illi iuxta uocationis ordinem primi
fuerunt et appellabantur caput; nos secundi qui dicebamur cauda, uersi
sumus in caput et dei appellamur filii. quotquot enim susceperunt eum,
dedit eis potestatem filios dei fieri. nec accepimus spiritum seruitutis
in timorem, sed spiritum adoptionis, in quo clamamus: abba, pater; quia
perfecta dilectio foras mittit timorem. melius est autem iuxta
hebraicum legere filios enutriui, quam genui, ne uideatur illi dicto,
quod in ioannis epistola legimus, esse contrarium: omnis, qui natus est
ex deo, non peccat. ergo isti si nati sunt ex deo, quomodo peccare
potuerunt, cum omnis qui ex deo natus est, peccare non possit?
cognouit bos possessorem suum et asinus praesepe domini sui.
israel non cognouit, populus meus non intellexit. pro quo soli lxx
transtulerunt: israel autem me non cognouit et populus me non
intellexit. ut iuxta ceteros et hebraicum, possessorem suum israel non
cognouerit et praesepe domini sui populus non intellexerit. et est
sensus perspicuus: ego eos adoptaui in filios et feci populum peculiarem
et partem meam ac funiculum hereditatis meae, appellaui que
primogenitos; illi autem nec hoc quidem fecerunt, quod bruta faciunt
animalia, ut beneficiis uincerentur, et intellegerent pastorem ac
nutricium suum. nec comparauit eos canibus, quod sagacissimum genus
animantium est et pro paruo cibo dominorum tecta defendunt. sed
stolidioris sensus boui et asino, quorum alterum carpenta trahens,
durissimas terrae glebas uertit uomere, alterum portat onera et hominum
in gradiendo laborem temperat; unde et iumenta appellantur ab eo, quod
iuuent homines. potest hic locus et de deo patre intellegi, sed magis
refertur ad filium, quod non cognouerit eum neque susceperit populus
israel, cuius diem abraham uidit et laetatus est; et in cuius aduentum
omnium prophetarum uota pendebant. qui et in euangelio ad hierusalem
loquitur: quotiens uolui congregare filios tuos, sicut gallina pullos
sub alas suas, et noluisti! quaerimus ubi pariter legerimus bouem et
asinum? in deuteronomio scriptum est: non arabis in uitulo simul et
asino. et in hoc eodem esaias: beatus qui seminat super omnem aquam, ubi
bos calcat et asinus. simul arat in boue et asino ebion, dignus pro
humilitate sensus.
paupertate nominis sui; qui sic recipit euangelium, ut iudaicarum
superstitionum, quae in umbra et in imagine praecesserunt, caeremonias
non relinquat. beatus est autem qui seminat in eloquiis scripturarum tam
ueteris quam noui instrumenti; et calcat aquas occidentis litterae, ut
metat fructum spiritus uiuificantis. bos iuxta anagogen refertur ad
israel, qui legis portauit iugum et mundum animal est. asinus peccatorum
onere praegrauatus, gentium populus accipitur, cui dominus loquebatur:
uenite ad me omnes qui laboratis et onerati estis; et ego reficiam uos.
pharisaeis ergo et scribis non credentibus, qui habebant legis clauem
atque notitiam et uere appellabantur israel, id est mens uidens deum,
credidit pars populi iudaeorum, ut una die tria milia simul crederent et
alia die quinque milia. sapientibus quoque saeculi non recipientibus
crucem christi, indocta nationum turba suscepit. unde et apostolus
loquebatur: uidete uocationem uestram, fratres, quia non multi sapientes
secundum carnem, non multi potentes, non multi nobiles; sed quae stulta
sunt mundi, elegit deus, ut confundat sapientes; et quae infirma sunt
mundi, elegit deus, ut confundat fortia. sed haec coacta, superior uera
interpretatio est.
uae genti peccatrici, populo graui iniquitate, semini nequam,
filiis sceleratis; dereliquerunt dominum; blasphemauerunt sanctum
israel; abalienati sunt retrorsum. hoc quod in ultimo posui: abalienati
sunt retrorsum, lxx interpretes non habent et pro blasphemauerunt,
scribitur in eis: ad iracundiam concitauerunt; et pro semine nequam,
semen pessimum. quod ceteri sequentes hebraicum merehim interpretati
sunt pessimorum, ut non tam seminis uitium sit, ne boni et mali diuersa
putetur esse natura, quam eorum malitiae, qui uoluntate propria
dereliquerunt dominum.
in principio uoluminis titulus est, personam, causam, tempus que
commemorans. in secundo intentos auditores facit; in tertio narrat quid
locutus sit dominus; in quarto quasi in excessibus gentem increpat
peccatricem et populum plenum uel grauem iniquitate. non quo alia sit
gens et alius populus, ut quidam putant, sed ipse israel et gens
appellatur et populus, et filii scelerati, siue iniqui, ut qui primum
per beneficium filii appellati sunt domini, postea uitio suo uocarentur
filii iniquitatis. siue ut reliqui consona uoce dixerunt filii
corrumpentes, id est diaphtheirontes~g, qui naturae bonum suo uitio
perdiderunt. quod que iungitur: blasphemauerunt sanctum israel, proprie
de iudaeis dicitur conclamantibus: non habemus regem, nisi caesarem; et:
nonne hic est fabri filius; et: daemonium habet et samaritanus est.
quia igitur dereliquerunt christum et blasphemauerunt sanctum israel
idcirco abalienati sunt retrorsum, ut qui appellabantur pars et filii
dei, postea dicerentur: filii alieni mentiti sunt mihi. praecepit
saluator, ne apprehenso aratro, respiciamus post tergum, ne imitemur
uxorem lot. unde et apostolus extendens se in priora, posteriorum
obliuiscitur. quod autem dixit iuxta lxx: populo pleno peccatis,
ostendit nullam speciem peccatorum in israel populo non fuisse. sin
autem legerimus, ut in hebraico est: populo graui iniquitate, illius
testimonii recordemur, quod iniquitas sedeat super talentum plumbi, et
ex peccatoris persona dicatur in psalmo tricesimo septimo: eleuatae sunt
iniquitates meae super caput meum. quasi onus graue ingrauatae sunt
super me. manifesta transcurrimus, ut in obscurioribus et in his, quae
explanatione indigent, immoremur.
in quo percutiam uos ultra addentes praeuaricationem? quo
testimonio discimus idcirco dominum percutere delinquentes, ut percussos
corrigat et non tam poena sit, quam emendatio. est que sensus: non
inuenio quam plagis uestris possim adhibere medicinam; omnia membra
uestra plena sunt uulnerum; nullam partem corporis quae non sit ante
percussa, reperio. uel certe hoc modo: nullas inuenio plagas, quibus
uestram frangam duritiam. quanto enim tormenta maiora sunt, tanto magis
crescit impietas et iniquitas, siue, ut theodotio transtulit,
declinatio, ut recedatis et declinetis a domino. quale est illud
hieremiae: sine causa percussi filios uestros; disciplinam non
recepistis. unde iratus loquitur per osee: non uisitabo super filias
uestras, cum fuerint fornicatae; et super nurus uestras, cum
adulterauerint. et per hiezechielem: zelus meus recedet a te; et non
irascar tibi amplius.
de quibus et in psalmis legimus: non est firmamentum in plaga eorum; et
in laboribus hominum non sunt, nec cum hominibus flagellabuntur.
omne
caput languidum, et omne cor maerens. animi laetitia interdum dolorem
corporis mitigat; quod si ad aegrotationem corporis accedat aegritudo
animi, duplicatur infirmitas. inter ipsos quoque sensus et omnia membra
corporis, principalem locum obtinet caput, in quo uisus et odoratus,
auditus et gustus est. cum igitur caput doluerit, omnia membra debilia
sunt. et per metaphoram docet quod a principibus usque ad extremam
plebem, a doctoribus usque ad imperitum uulgus in nullo sit sanitas; sed
omnes in impietate pari ardore consentiant.
a planta pedis usque ad uerticem, non est in eo sanitas: uulnus
et liuor et plaga tumens. seruat coeptam translationem: a pedibus usque
ad uerticem, id est, a summo usque ad summum, ab extremis usque ad
primos, toto confossi sunt corpore. uulnus, inquit, et liuor et plaga
tumens. aut enim uerberibus liuent corpora, aut plagis tument, aut hiant
uulneribus, quaerimus, cui haec tempori coaptanda sint. post
babylonicam captiuitatem sub zorobabel, et ezra, ac neemia israel
reuersus est in iudaeam, et antiquum recepit statum. sub diuersis quoque
principibus ac regibus templum augustius fabricatum est, in tantum ut
etiam externarum gentium, lacedaemoniorum et atheniensium ac romanorum
mererentur amicitias. ergo hoc quod dicit: non est in eo sanitas, ad
extremam refert captiuitatem, quando post titum et uespasianum et
ultimam euersionem hierusalem, sub aelio hadriano usque ad praesens
tempus nullum remedium est. impletur que quod scriptum est: omnes
declinauerunt; simul inutiles facti sunt. non est qui faciat bonum, non
est usque ad unum. quod que infertur: non est in eo sanitas, uel in
populo intellege, uel in corpore, uel in capite.
non est circumligata, neque curata medicamine neque fota oleo.
pro quo lxx transtulerunt: non est malagma imponere, neque oleum, neque
alligaturas. usque hodie uulnus et liuor, et plaga tumens populi israel
non est circumligata fasciolis, neque curata medicamine. quod aquila
interpretatus est mot�sin~g, linteola uidelicet, quae ad exsiccandam
saniem et purulentias extrahendas iniciuntur uulneribus. neque fota
oleo, ut eorum duritia lacrimis paenitentiae molliretur. pro fasciolis,
quibus israelis nequaquam circumligata sunt uulnera, lxx malagma
transtulerunt. iacet ergo confossus et contrucidatus israel, quia
interfecit medicum, qui ad curandam uenerat domum israel. unde et in
hieremia tropik�s~g sub persona babylonis loquuntur angeli: curauimus
babylonem et non est sanata, urbem uidelicet confusionis atque uitiorum.
et in euangelio legimus, descendentem de hierusalem in hiericho a
latronibus uulneratum, curatum que a samaritano, et post austeritatem
uini infusi, uulneribus eius olei mollitudinem confotum. ab eo ergo
loco, ubi supra dixerat: in quo percutiam uos; et: omne caput languidum,
usque ad hoc quod infertur: non est curata medicamine, neque fota oleo,
translationis similitudo seruatur et irremediabilium descriptio
uulnerum, aeternam exprimit captiuitatem iudaeorum.
terra uestra deserta; ciuitates uestrae igne succensae; regionem
uestram in conspectu uestro alieni deuorant et desolabitur sicut in
uastitate hostili. haec sub babyloniis ex parte completa sunt, incenso
templo, subuersa hierusalem, quando regionem decem tribuum samaritani
possederunt et in tantam redacta est terra repromissionis solitudinem,
ut a leonibus uastaretur. plenius autem atque perfectius quid futurum
sit sub romana captiuitate describitur, quando uniuersam iudaeam romanus
uastauit exercitus, ciuitates que succensae sunt et regionem eorum in
praesentiarum alieni deuorant, et usque ad finem mundi perseuerabit
uastitas iudaeorum. possumus autem haec tropologice et de peccatoribus
accipere, qui de sanctitate pristina corruerunt, postquam contrariis
fuerint traditi potestatibus, quod omnia eorum bona ueniant ad desertum;
et prioris iustitiae dominus non recordetur et igne diaboli omnia
succendantur; et sint pabulum bestiarum, de quibus et in alio loco
scriptum est: ne tradas bestiis animam confitentem tibi.
derelinquetur filia sion sicut umbraculum in uinea et sicut
tugurium in cucumerario. quod uinea appellatus sit omnis israel, idem in
consequentibus propheta testatur, dicens: uinea enim domini sabaoth,
domus est israel; et homo iuda, nouella plantatio atque dilecta. et in
psalmo: uineam de aegypto transtulisti; eiecisti gentes et plantasti
eam. haec uinea quamdiu uberrimos attulit fructus, habuit custodem
dominum, de quo scribitur: non dormitabit, neque dormiet qui custodit
israel. postquam uero uindemiauerunt eam omnes transeuntes uiam; et
uastauit eam aper de silua. reliquit templum suum dominus, iratus que
consurgens ait: surgite, abeamus hinc; et: relinquetur uobis domus
uestra deserta. et per hieremiam: reliqui domum meam; dimisi hereditatem
meam. facta est hereditas mea mihi, quasi leo in silua. dedit super me
uocem suam, propterea odiui eam. similitudo autem uastationis templi et
hierusalem sumpta est ab agricolis, qui quamdiu uinea uuarum plena est,
ponunt custodes in umbraculis. in cucumerario quoque, quod lxx pomorum
custodiam uocant, paruulae fiunt casulae propter ardorem solis ac radios
declinandos; et inde uel homines uel bestiolas quae insidiari solent
natis frugibus, abigunt. cum autem ablata fuerint istiusmodi genimina,
remanent arentia fruticum umbracula, casulae que recedente custode, quia
non habet ultra quod seruet. ergo et omnipotens deus dereliquit
templum, et urbem fecit esse desertam. quod non necesse est sermonibus
approbare, nobis praesertim, qui uidemus desertam sion et euersam
hierusalem, templum que usque ad solum dirutum. quod autem filiam sion
uocat, clementissimi parentis monstrat affectum. nec mirum si sion
appelletur filia, cum etiam babylon saepissime filia nuncupetur. omnes
enim natura dei filii sumus, sed nostro uitio alieni efficimur. iuxta
anagogen, uinea dei et pomorum paradisus, anima nostra appellari potest,
cui si mens, id est nous~g, praefuerit, habet custodem mentis deum; sin
autem uitia nos quasi quaedam bestiae fuerint depraedata, relinquimur a
custode deo et omnia nostra redigentur ad solitudinem.
nisi dominus exercituum reliquisset nobis semen, quasi sodoma
fuissemus, et quasi gomorrha similes essemus. hunc locum paulus
apostolus ad romanos plenius disserit, scribens: dico ergo: numquid
repulit deus populum suum? absit; nam et ego israelita sum, ex semine
abrahae, de tribu beniamin. non repulit deus plebem suam quam
praesciuit. et post paululum: sic ergo et in isto tempore reliquiae
secundum electionem gratiae saluae factae sunt. ex quo ostenditur
superiora quae contra hierusalem et iudam sermo propheticus comminatus
est, non ad babylonicae captiuitatis referenda tempus, sed ad ultimam
romanorum, quando in apostolis saluae factae sunt reliquiae populi
iudaeorum, et una die crediderunt tria milia et altera quinque milia et
in toto orbe euangelium seminatum est. pro domino exercituum, quod nos,
secuti aquilam, in latinum uertimus, in hebraeo legitur, dominus
sabaoth, quod lxx interpretes pro locorum qualitate dupliciter
transferunt, aut dominum uirtutum, aut dominum omnipotentem. et
quaerendum, utrum de patre dicatur, an de filio. nec dubium quin illud
quod in uicesimo tertio psalmo legitur: attollite portas, principes,
uestras et eleuamini portae aeternales et introibit rex gloriae! quis
est iste rex gloriae? dominus sabaoth, id est: dominus uirtutum, ipse
est rex gloriae, ad christum referatur, qui post passionis triumphum ad
caelos uictor ascendit. et in alio loco de domino dicitur, quod rex
gloriae sit: si enim cognouissent, numquam dominum gloriae
crucifixissent. ergo non solum iuxta apocalypsim ioannis et apostolum
paulum; sed in ueteri quoque testamento dominus sabaoth, hoc est
omnipotens, christus appellatur.
si enim omnia patris filii sunt et, ut ipse loquitur in euangelio: data
est mihi omnis potestas in caelo et in terra; et: omnia mea tua sunt et
glorificor in eis, cur non etiam omnipotentis nomen referatur ad
christum, ut sicut deus dei et dominus domini, sic omnipotens
omnipotentis filius sit?
audite uerbum domini, principes sodomorum; percipite auribus
legem dei nostri, populus gomorrhae. saluis factis reliquiis per
apostolos populi israel, ad scribas et pharisaeos et populum
succlamantem: crucifige, crucifige talem, propheticus sermo conuertitur,
et uocat eos principes sodomorum et populum gomorrhae, iuxta illud quod
in consequentibus legimus: iniquitatem suam sicut sodoma annuntiauerunt
et ostenderunt. uae animae eorum, quia cogitauerunt consilium pessimum
contra semetipsos, dicentes: alligemus iustum, quoniam inutilis est
nobis. ergo propterea principes uocantur sodomorum et populus gomorrhae,
quia cogitauerunt consilium pessimum et alligauerunt iustum atque
dixerunt: non habemus regem nisi caesarem. et rursum: nos scimus quia
moysi locutus est deus; istum autem quis sit, nescimus. simul que
gloriantes in euangelio: semen abrahae sumus; et nemini umquam
seruiuimus. audiunt a domino saluatore: si essetis filii abrahae, utique
opera abrahae faceretis; et rursum: uos ex diabolo patre nati estis et
opera patris uestri uultis facere. tale quid et ezechiel ad hierusalem
loquitur: pater tuus amorrhaeus et mater tua gethaea. aiunt hebraei ob
duas causas esaiam interfectum, quod principes sodomorum et populum
gomorrhae eos appellauerit, et quod domino dicente ad moysen: non
poteris uidere faciem meam, iste ausus sit dicere: uidi dominum sedentem
super thronum excelsum et eleuatum. non considerantes quod faciem et
pedes dei, siue suos, quia in hebraeo ambigue legitur, seraphim
texerunt; et media tantum eius esaias uidisse se scribat. homo igitur
dei faciem uidere non potest. angeli autem, etiam minimorum in ecclesia,
semper uident faciem dei. et: nunc in speculo uidemus et in aenigmate,
tunc autem facie ad faciem; quando de hominibus in angelos profecerimus
et potuerimus cum apostolo dicere: nos autem omnes reuelata facie
gloriam domini speculantes, in eamdem imaginem transformamur a gloria in
gloriam, quasi a domini spiritu. licet faciem dei iuxta naturae suae
proprietatem nulla uideat creatura; et tunc mente cernatur quando
inuisibilis creditur.
quo mihi multitudinem uictimarum uestrarum? dicit dominus, plenus
sum. holocausta arietum et adipem pinguium et sanguinem uitulorum et
agnorum et hircorum nolui. pro eo quod est nolui, lxx transtulerunt
nolo, praesens tempus pro praeterito. porro iuxta hebraicum, numquam se
deus hostias iudaeorum uoluisse demonstrat, quod et in quadragesimo nono
psalmo legimus: non accipiam de domo tua uitulos neque de gregibus tuis
hircos, quoniam meae sunt omnes ferae siluarum, iumenta in montibus et
boues. cognoui omnia uolatilia caeli et pulchritudo agri me cum est. si
esuriero, non dicam tibi; meus est enim orbis terrae et plenitudo eius.
numquid manducabo carnes taurorum, aut sanguinem hircorum potabo? cum
que ueteris legis caeremonias respuisset, transit ad euangelicam
puritatem; et quid pro his cupiat, ostendit: immola deo sacrificium
laudis et redde altissimo uota tua. et inuoca me in die tribulationis
tuae; et eruam te et honorificabis me. omnis ergo capituli huius
continentia, usque ad eum locum ubi ait: iudicate pupillo, defendite
uiduam, et uenite, et disputemus, dicit dominus, respuit sacrificia
uictimarum et euangelii oboedientiam docet esse super sacrificium. quod
intulit: plenus sum, hoc sensu accipiendum: nulla re indigeo: domini est
terra et plenitudo eius. unde et nos omnes de plenitudine eius
accepimus. potest hoc et de his accipi, qui cum dei praecepta non
faciant, donariis atque muneribus deum redimere posse se credunt, uel
qui rapta per rapinam et auaritiam, altari offerunt et pauperibus.
quis enim quaesiuit haec de manibus uestris? audiant ebionaei,
qui post passionem christi abolitam legem putant esse seruandam. audiant
ebionitarum socii, qui iudaeis tantum et de stirpe israelitici generis
haec custodienda decernunt.
hostiae ergo et immolatio uictimarum non principaliter a deo quaesita
sunt, sed ne idolis fierent, et ut de carnalibus uictimis quasi per
typum et imaginem ad spiritales hostias transiremus. dicendo autem se
hostias non quaesisse, ostendit quia lex spiritalis est; et omnia quae
iudaei carnaliter faciunt, a nobis impleri spiritaliter.
calcare atrium meum non apponetis. obserua quod post babylonicam
uastitatem. rursum a zorobabel templum aedificatum sit; et per multam
annorum seriem in templo sint oblata sacrificia. ergo ultimam sub
uespasiano et tito destructionem templi indicat, quae usque ad
consummationem mundi perseueratura est.
neomenias uestras et sabbata et festiuitates alias non feram;
iniqui sunt coetus uestri. omnis conuentus qui hostias spiritales non
offert, nec audit illud, quod in quinquagesimo psalmo canitur:
sacrificium deo spiritus contribulatus; cor contritum et humiliatum deus
non spernit, abominabilis est deo. et idcirco iungit et dicit: kalendas
uestras et sollemnitates uestras, ut non suas festiuitates appellet,
sed eorum qui male his abutuntur. quod que lxx interpretati sunt:
ieiunium et otium, possumus dicere illud ieiunium recipi a deo, quod
otium bonorum operum non habet. odit anima mea. anthr�popath�s~g, non
quod animam deus habeat; sed nostro loquitur affectu.
facti mihi estis in satietatem; nequaquam dimittam peccata
uestra. pro quo interpretatus est aquila: laboraui sustinens; symmachus
ekop�th�n~g hilaskomenos~g, quod est: defeci miserans; ut ostendat se
nequaquam ultra misereri, quia aliud sit seruos ad se missos occidere,
aliud filium. hunc sensum et in osee propheta legimus: perditio tua,
israel; tantum in me auxilium tuum. quod ita intellegitur: pereas,
israel, quia non tuo merito, sed meo tantum saluaris auxilio. manus
uestrae sanguine plenae sunt. causam manifestat cur deus auertat ab eis
oculos suos et multiplicatam orationem non exaudiat, quia fuderint
sanguinem iusti; et pessimi coloni heredem ad se missum interfecerint.
unde et saluator ad eos loquitur: et uos implete mensuram patrum
uestrorum. illi enim interfecerunt missos ad se prophetas; uos iugulate
patrisfamilias filium. utendum hoc testimonio et contra eos, qui cum
cotidianis operibus sanguine manus plenas habeant, in oratione dies
noctes que coniungunt. lauamini, mundi estote. pro superioribus uictimis
et holocaustis et adipe pinguium et sanguine taurorum et hircorum; et
pro thymiamate et neomeniis, sabbato, die festo atque ieiuniis, kalendis
et aliis sollemnitatibus, euangelii mihi placet religio, ut baptizemini
in sanguine meo per lauacrum regenerationis, quod solum potest peccata
dimittere. nisi enim quis renatus fuerit ex aqua et spiritu, non
intrabit in regnum caelorum. ipse quoque dominus ascendens ad patrem:
euntes, inquit, docete omnes gentes, baptizantes eas in nomine patris,
et filii, et spiritus sancti.
auferte malum cogitationum uestrarum ab oculis meis. quod ioannes
baptista dicebat: genimina uiperarum, quis ostendit uobis fugere ab ira
uentura? facite ergo fructus dignos paenitentiae; ut qui christi
baptisma consecutus est, auferat malum de corde suo et quiescat agere
peruerse, ac postea discat bonum facere, secundum illud quod alibi
praecipitur: declina a malo et fac bonum.
discite bonum facere. uirtus ergo discenda est, nec naturae
tantum bonum sufficit ad iustitiam, nisi quis erudiatur congruis
disciplinis.
iesus quoque filius sirach tale quid loquitur: desiderasti sapientiam,
serua mandata et dominus tribuet tibi eam. et in sequentibus idem esaias
commemorat: omnis qui non didicerit iustitiam super terram, ueritatem
non faciet. discenda est ergo iustitia, et magistrorum sapientiae
terenda sunt limina.
quaerite iudicium, subuenite oppresso, iudicate pupillo,
defendite uiduam. et uenite, et arguite me, dicit dominus. uictimis
iudaeorum euangelica mandata succedunt et ideo pupillis ac uiduis
prouidetur, ut securi de tutela coniugum ac liberorum suorum, martyres
ad bella procedant. cum autem, inquit, haec feceritis, arguite me, si
non reddidero praemia quae pollicitus sum. quando autem dicit: quaerite
iudicium, ostendit non esse omnium recte iudicare, sed eorum qui
prudentes sunt. denique et salomon in uisione per somnium, hoc a domino
postulauit, ut accepta sapientia, iuste populum iudicaret.
si fuerint peccata uestra ut coccinum, quasi nix dealbabuntur. et
si fuerint rubra quasi uermiculus, ut lana alba erunt. ordo praecipuus;
non enim sufficit dixisse: lauamini, nisi iungat: mundi estote, ut post
lauacrum aquae cordis habeant puritatem. beati enim mundo corde,
quoniam ipsi deum uidebunt. cum que cordis habuerint puritatem, debent
auferre malum de mentibus suis, non in conspectu hominum, sed in
conspectu dei, quem celare nihil potest, quod que iungit: quiescite
agere peruerse, illud euangelicum sonat: ecce sanus factus es; iam noli
peccare, ne quid tibi deterius fiat. recedens ergo a uitiis, discat
bonum, quaerat que iudicium, oppresso subueniat, pupillum uiduam que
sustentet; et si hoc fecerit, tunc peccata, quae prius in modum coccini
sanguinea fuerant, dimittentur et opera cruoris ac sanguinis, ueste
domini mutabuntur, quae de agni confecta est uellere, quem sequuntur in
apocalypsi, qui uirginitatis candore resplendent.
si uolueritis et audieritis, bona terrae comedetis; si nolueritis
et non audieritis, siue ut in hebraeo habet: et me prouocaueritis ad
iracundiam, gladius deuorabit uos. quia os domini locutum est. liberum
seruat arbitrium, ut in utramque partem non ex praeiudicio dei, sed ex
meritis singulorum, uel poena, uel praemium sit. bona autem terrae illa
puto dici, de quibus in psalmo legimus: credo uidere bona domini in
terra uiuentium; et: beati mites, quoniam ipsi possidebunt terram. uel
certe quia iudaeis loquebatur, qui necdum poterant capere spiritalia,
pollicetur eis bona praesentis saeculi, ut saltem praesentibus inuitati
faciant quae praecepta sunt. et quia noluerunt audire, sed e contrario
prouocauerunt ad iracundiam sanctum israel; propterea eos gladius
deuorauit, id est romanus deleuit exercitus. et haec, inquit, omnia
fient: quia os domini locutum est. cuius sententia, permanentibus
hominum peccatis, non potest immutari.
quomodo facta est meretrix ciuitas fidelis, plena iudicii;
iustitia requieuit in ea, nunc autem homicidae. uerbum hebraicum ialin,
pro quo lxx transtulerunt: dormiuit, et requieuit et requiescet; id est,
et praeteritum et futurum tempus significat. unde et aquila et
theodotio quasi de futuro dicunt. miratur autem prophetico spiritu, quod
ciuitas quae quondam fidelis fuit, uel fidelium receptaculum, subito
facta sit meretrix. quod quidem et in esaiae temporibus intellegi
potest; sed plenius refertur ad passionem christi, quando omnes
declinauerunt, simul inutiles facti sunt. et quamquam in hebraico non
habeatur sion, tamen lxx, ut sensum manifestiorem facerent, addiderunt.
sion autem mons est, in quo hierusalem urbs condita est; quae postquam
capta est a dauid, appellata est ciuitas dauid.
nec ambigo fuisse in ea sanctos uiros, quando tabernaculum dei habuit et
postea templum aedificatum est, quando nathan et gad prophetauerunt; et
super choros, qui in libro dierum plenius describuntur, asaph, et
idithun et eman et filii chore constituti sunt, ut paulatim a
sacrificiis uictimarum ad laudes domini transiret religio. ciuitas ergo
fidelium, quae prius fuit plena iudicio et iustitia requieuit in ea,
nunc plena est homicidis, qui interfecerunt prophetas et ipsum dominum
saluatorem. fornicationem autem hierusalem, quomodo diuaricauerit crura
sua omni transeunti, sub nomine oolibae hiezechiel prosequitur. quae
interpretatur: tabernaculum meum in ea, quod nunc aliis uerbis dicitur
iustitia requieuit in ea. pro iustitia in hebraeo scriptum est sedec,
quod iustum magis sonat quam iustitiam, ut intellegamus prius in ea
dominum commoratum, de quo alibi dicitur: iustus autem quid fecit?
dominus in templo sancto suo. dominus in caelo sedes eius. quae omnia
possumus secundum anagogen referre ad animam sancti quondam uiri, in qua
prius dei iustitia commorata est, si postea peccauerit et pro hospite
deo, homicidae daemones in ea fuerint commorati.
argentum tuum uersum est in scoriam. ad ciuitatem loquitur sion,
in qua prius requieuit iustitia, quod argentum illius, doctrina
uidelicet scripturarum, de qua in psalmis legimus: eloquia domini,
eloquia casta: argentum igne examinatum, probatum terrae, purgatum
septuplum. uersum sit in scoriam, quod hebraice dicitur sigim: rubigo
uidelicet metallorum, siue purgamenta et sordes, quae igne excoquuntur,
ut quia argentum nominauerat, seruet metaphoram. potest autem et hoc
dici, quod iusti et sancti uiri qui prius in urbe uersati sunt, postea
in sordes uersi sint peccatorum.
caupones tui miscent uinum aqua. pro quo symmachus transtulit:
uinum tuum mixtum est aqua. et est sensus: lex dei pura atque sincera,
et, ut ita dicam, mera ueritate subnixa, uiolata est traditionibus
pharisaeorum. quod dominus in euangelio plenius docet, omisisse eos
legem dei et sequi mandata hominum. omnis que doctor qui austeritatem
scripturarum per quam potest audientes corripere, uertit ad gratiam, et
ita loquitur, ut non corrigat, sed delectet audientes, uinum sanctarum
scripturarum uiolat atque corrumpit sensu suo. haeretici quoque
euangelicam ueritatem corrumpunt praua intellegentia et sunt caupones
pessimi, facientes de uino aquam, cum e contrario dominus noster uinum
de aqua fecit, et tale uinum quod miretur architriclinus, quale et
regina saba in salomonis miratur conuiuio, pincernas eius et ministros
uini, sua uoce collaudans. sed et ecclesiastes ministeria uini atque
conuiuii sui mystico sermone describit. unde pro uino aquila
sumposion~g, id est conuiuium, interpretatus est, quod apud graecos
apo~g tou~g potou~g, apud nos a conuictu rectius appellatur.
principes tui inoboedientes, socii furum. pro inoboedientibus,
aquila, recidentes; symmachus, declinantes, interpretatus est. principes
autem scribas uocat et pharisaeos, qui a domino recedentes, immo
ueritatis semitam relinquentes, peruerso ambulauerunt in itinere et
socii fuerunt proditoris furis que iudae. quod quidem et nos cauere
debemus, ne accipientes ab hominibus saeculi munera, qui per rapinas
miserorum que lacrimas diuitias congregant, non tam ipsi fures, quam
socii furum appellemur dicatur que nobis: uidebas furem et currebas cum
eo, et cum adulteris portionem tuam ponebas.
omnes diligunt munera, sequuntur retributiones. in catalogo
uitiorum numerantur etiam hi qui diligunt munera. non dixit: qui
accipiunt, hoc enim saepe necessitate fit; sed qui non putant amicos,
nisi a quibus dona perceperint. nec os considerant amicorum, sed manus;
et eos sanctos iudicant, quorum exhauriunt marsupium, de quibus et
ecclesiastes loquitur: qui diligit pecuniam, non implebitur pecunia.
istiusmodi sequuntur retributiones, ut laudent eos a quibus aliquid
acceperint, uel certe nulli quidpiam tribuant, nisi a quo se recepturos
putauerint. pro retributionibus, symmachus uicissitudines uel ultiones
interpretatus est, ut hi quoque in culpa sint, qui reddunt malum pro
malo et dentem pro dente, oculum pro oculo; et non imitantur illud
dauidicum: si reddidi retribuentibus mihi mala; et hieremiae de iusto
dicentis: dabit percutienti se maxillam suam, saturabitur opprobriis, ut
impleat euangelicum uirum, cui dicitur: qui te percusserit in maxillam,
praebe ei et alteram.
propter hoc ait dominus exercituum, fortis israel. pro fortis
israel, quod omnes similiter transtulerunt, soli lxx, nescio quid
uolentes, posuerunt: uae fortes israel; quod nos sic disserere possumus,
ut dicamus: principes quoque corripi atque robustos, de quibus scriptum
est: potentes potenter tormenta patientur; et: cui plus datur, plus
exigetur ab eo. abutimur que hoc testimonio, si quando opus fuerit
aduersum ecclesiae principes, qui suam destruunt operibus dignitatem.
heu consolabor super hostibus meis et uindicabor de inimicis
meis. rursum et in hoc, quod in hebraico non habetur, ponuntur lxx: non
cessauit enim furor meus contra inimicos meos. corripit autem scribas et
pharisaeos, de quibus et in euangelio loquitur: uae uobis, scribae et
pharisaei. et in alio loco: generatio adultera et peruersa signum
quaerit; et signum non dabitur ei, nisi signum ionae prophetae. plangit
autem clementissimus pater principes delinquentes et hostes suos uocat
et inimicos appellat, quod pereant, eo quod nolint agere paenitentiam,
quod ad se uenientem non susceperint. appropinquans enim hierusalem,
fleuit et dixit: hierusalem, hierusalem, quae occidis prophetas et
lapidas eos, qui ad te missi sunt, quotiens uolui congregare filios
tuos, sicut gallina pullos suos et noluisti! consolatio ergo dei super
hostibus eius et inimicis est, ut qui non senserunt beneficia,
suppliciis corrigantur.
et conuertam manum meam ad te; et excoquam ad purum scoriam tuam
et auferam omne stagnum tuum. pro scoria, quod interpretatus est
symmachus, aquila stemphula~g, id est uinacia, theodotio gigart�des~g,
id est acinum uuae interpretatus est; soli lxx incredulos uel
inoboedientes, sensum magis quam uerba uertentes. quia enim supra
dixerat: argentum tuum uersum est in scoriam, nunc seruat metaphoram, ut
conuertat super eam, id est, extendat manum suam ad puniendum atque
purgandum et excoquat omnes sordes, ac uitia peccatorum, ut separato
stagno, purum argentum remaneat, quod absque igne fieri non potest; per
quod significat eos passuros esse tormenta. legimus et in malachia de
domino: ipse egredietur quasi ignis conflatorii et quasi herba fullonum
et sedebit conflans, et emundans sicut argentum et aurum; et emundabit
filios leui; ut postquam mundati fuerint, dicatur de eis: et erunt
domino offerentes uictimas in iustitia. hiezechiel quoque omnem domum
israel, aere, et ferro, et plumbo, et stagno dicit esse commixtam, et
postea purgandam, ut postquam purgata fuerit, cognoscat, quia ipse sit
dominus. sed et in euangelio sub alia metaphora idem sensus ostenditur:
cuius uentilabrum in manu eius et purgabit aream suam et mundabit
triticum et congregabit frumentum in horrea; paleas autem comburet igni
inexstinguibili.
et restituam iudices tuos, ut fuerunt prius et consiliarios tuos
sicut antiquitus. in ciuitate fideli sion, quae postea facta est
meretrix; et pro iusto, siue iustitia, habitauerunt in ea homicidae.
ideo dominus conuertit manum suam, ut excoquat eam ad purum et auferat
omne stagnum eius et restituat iudices illius, sicut fuerunt a
principio, et consiliarios sicut antiquitus. iudices priores fuerunt
moyses, et iesus filius naue, et ceteri a quibus etiam liber scripturae
sanctae nomen accepit; et postea dauid et alii iusti reges. restituet
ergo iudicum similitudinem, uel post captiuitatem babylonicam, ut iudaei
uolunt, zorobabel, esdram, et neemiam et ceteros principes, qui usque
ad hircanum populo praefuerunt, cui herodes successit in regnum. uel
certe uerius et rectius, apostolos, et qui per apostolos crediderunt,
ecclesiarum que principes constituti sunt, sicut in principio huius
diximus uisionis, quod et comminatio et repromissio pertineat ad tempus
dominicae passionis et ad fidem, quae post passionem eius fundauit
ecclesiam.
post haec uocaberis ciuitas iusti, urbs fidelis. haec perspicue
de ecclesia, quae in dominum creditura est tam de iudaeis, quam de
gentibus, propheticus sermo complectitur. urbs autem iusti, hoc est,
domini saluatoris, siue ipsa iusta uocabitur, de qua dictum est: non
potest ciuitas abscondi supra montem posita. si ita est, fidelem quoque
appellans, uel metropolim iuxta lxx, ostendit ab his esse appellandam,
qui in domino credituri sunt. sion in iudicio redimetur et reducent eam
in iustitia. non omnes redimentur, nec omnes salui fient, sed reliquiae,
de quibus et supra dictum est. reducentur autem in iustitia, cum
scelerati et peccatores contriti fuerint, et qui dominum reliquere,
consumpti. cum que saluati fuerint, confundentur qui idolis prius
sacrificauerant; et erubescent in hortis, quos elegerant. significat
autem loca luxuriae, lucos et nemora.
erunt enim quasi terebinthus defluentibus foliis; et uelut
hortus, siue paradisus, sine aqua. usque hodie iudaei, legentes
scripturas sanctas, terebinthus sunt, siue quercus, ut interpretatus est
symmachus. et iuxta euangelium, ficus quae aruit, in qua cum dominus
poma quaesisset, et non inuenisset, aeterna ei ariditate maledixit. sed
et ipsa folia et poma uerborum nunc apud eos esse cessarunt; hortus
quoque irriguus, id est, scientia scripturarum, siue paradisus
diuersarum arborum, qui absque gratia spiritali est, nec olera quidem
affert, de quibus apostolus loquitur: qui infirmus est, olera manducet;
et siccatis radicibus, omnis uiror in ariditatem uersus est, ac
squalorem.
et erit fortitudo uestra ut fauilla stupae. pro fauilla,
apotinagma~g interpretatus est symmachus, quando stupa pectitur, et
quidquid sordium habet, proicitur. omnis igitur fortitudo et superbia
peccatorum et sceleratorum israel, qui dereliquerunt dominum et idcirco
consumpti sunt, et sacrificauerunt idolis, et erubescent in hortis, quos
elegerunt, redigentur in purgamenta stupae, quae leui uorantur
incendio. sequitur enim: et opus eius, id est fortitudinis uestrae siue
idololatriae, in qua erraueratis, paruula scintilla consumet. et
succendetur utrumque simul; et non erit qui exstinguat. et scientia
uidelicet iudaeorum et omnia opera quae faciunt, siue et idolum et
hierusalem in qua idolum fuit; et succendente domino, nullus exstinguere
poterit. quae omnia de contrariis quoque dogmatibus accipere possumus,
quod et magistri et discipuli pariter pereant et omne opus eorum ignis
pabulum sit.
2. uerbum quod uidit esaias, filius amos super iudam et
hierusalem. et in priori uisione, quam iam exposuimus, ubi lxx
interpretati, sunt: quam uidit contra iudaeam et contra hierusalem, in
hebraico scriptum est: al iuda uierusalem; et in hac quae secunda est,
in hebraico similiter continetur. et miror cur lxx interpretes in illa
dixerint: contra iudaeam et hierusalem; et in hac: de iudaea et de
hierusalem; nisi forte quia ibi appellatur gens peccatrix, populus
plenus peccatis, semen pessimum, filii iniquitatis et principes
sodomorum ac populus gomorrhae, et ciuitas meretrix, et cetera
istiusmodi, sensum magis quam uerbum interpretati sunt. et hic quia
statim prospera promittuntur:
erit in nouissimis diebus manifestus mons domini et domus dei in
summitate montium, non contra iudaeam et hierusalem, sed de iudaea et
hierusalem prophetiam intellexerunt, cum et in illa legerimus post
comminationem prospera: restituam iudices tuos, ut fuerunt prius et
consiliarios tuos sicut antiquitus, post haec uocaberis ciuitas iusti,
urbs fidelis; et in ista, post prospera, truculenta sit comminatio. ecce
dominator dominus exercituum auferet ab hierusalem et ab iuda ualidum
et fortem, omne robur panis et omne robur aquae, et reliqua. ergo iuxta
hebraicum et in illa uisione, et in isto sermone, quem uidit esaias,
filius amos, de iuda et hierusalem intellegendum est; non contra iudaeam
et hierusalem, uel pro iuda et hierusalem, ut symmachus transtulit, sed
absolute, de iuda et hierusalem, in quo possunt et laeta et tristia
contineri. et hoc considerandum, quia ibi uisionem uideat; hic uerbum,
quod erat in principio apud deum, et in illa iudaeis comminans ad
gentium ueniat salutem; in ista a gentium salute incipiens, punito
israel, ex utraque uocatione credentes in christi ecclesiam congreget.
et erit in nouissimis diebus praeparatus mons domus domini in uertice
montium. nouissimos dies et in genesi legimus, quod, uocante iacob
filios suos atque dicente: uenite ut annuntiem uobis quid futurum sit in
nouissimis diebus; postea ad iudam, de cuius semine ortus est christus,
dixerit: non deficiet princeps ex iuda, neque dux de femoribus eius,
donec ueniat cui repositum est; et ipse erit exspectatio gentium. in his
nouissimis diebus erit hora nouissima, de qua ioannes apostolus
loquitur: filioli mei, nouissima hora est, in qua abscisus lapis de
monte sine manibus, creuit in montem magnum et repleuit omnem terram, a
quo princeps tyri in hiezechiele dicitur uulneratus. hic mons in domo
domini est, quam propheta suspirat, dicens: unam petiui a domino, hanc
requiram, ut inhabitem in domo domini, omnes dies uitae meae; et de qua
paulus scribit ad timotheum: sin autem tardauero, ut scias quomodo te
oporteat conuersari in domo dei, quae est ecclesia dei uiuentis, columna
et firmamentum ueritatis. haec domus aedificata est super fundamentum
apostolorum et prophetarum, qui et ipsi montes sunt, quasi imitatores
christi. de hac domo hierusalem psalmista conclamat dicens: qui
confidunt in domino sicut mons sion, non commouebitur in aeternum, qui
habitat in hierusalem. montes in circuitu eius et dominus in circuitu
populi sui. unde et super unum montium christus fundat ecclesiam et
loquitur ad eum: tu es petrus et super hanc petram aedificabo ecclesiam
meam; et portae inferi non praeualebunt aduersus eam. simile quid ad
desiderantem animam suam et impatienter domum dei uidere cupientem,
sanctus loquitur: quare tristis es, anima mea et quare conturbas me? et
iterum: haec recordatus sum et effudi in me animam meam, quoniam
pertransibo in locum tabernaculi admirabilis usque ad domum dei, in uoce
exultationis et confessionis sonus epulantium. lxx: manifestum montem
domini, et domum dei super capita montium, transtulerunt. quod
testimonium eisdem uerbis et michaeas propheta posuit, quae in suo loco
exposui.
et eleuabitur super colles. qui in capitibus montium ostensus est
et paratus, iste super colles eleuabitur. de quibus montibus et
collibus et in cantico canticorum sponsa loquitur: uox fratruelis mei:
ecce hic uenit saliens super montes, transiliens colles; similis est
fratruelis meus capreae uel hinnulo ceruorum in montibus bethel. et
fluent ad eum omnes gentes. et ibunt populi multi. omnes enim gentes
seruient ei, cui dictum est: postula a me et dabo tibi gentes
hereditatem tuam, et possessionem tuam terminos terrae; ut seruiant ei
iuxta sophoniam sub iugo uno, de quibus idem propheta testatur: ex
finibus fluuiorum aethiopiae afferent tibi hostias. et in septuagesimo
primo psalmo legimus: in conspectu eius procident aethiopes. in nomine
enim iesu omne genu flectetur, caelestium, terrestrium et infernorum.
et dicent: uenite, ascendamus ad montem domini et ad domum dei
iacob; et docebit nos uias suas et ambulabimus in semitis eius. gentes
et populi nequaquam propria salute contenti, se mutuo hortabuntur et
dicent: uenite, ascendamus ad montem domini et ad domum dei iacob. de
quibus supra diximus, qui sit mons domini praeparatus et quae domus
domini super uerticem montium. domus autem domini dicitur domus dei
iacob, ut recipiamus uetus instrumentum, et non secundum manichaeum
aliam extra domum dei iacob quaeramus domum. cum autem fuerimus in domo
dei iacob, tunc docebit nos uias suas, per quas gradiamur ad eum et
ambulabimus in semitis eius, quas triuerunt et alii. denique et iesus
ascendens in montem, docebat discipulos suos octo beatitudines et cetera
quae euangelicus sermo complectitur. prius ergo discendae sunt uiae
domini; et postea ambulandum in semitis eius.
quia de sion exibit lex, et uerbum domini de hierusalem. omnes
gentes et populi multi, idcirco se mutuo hortabuntur et dicent: uenite,
ascendamus ad montem domini, et cetera quae sequuntur: quia de sion
egredietur lex et uerbum domini de hierusalem; nequaquam de sinai, et de
solitudine, et de monte oreb, sed de monte sion, in quo aedificata est
hierusalem; et de hierusalem, in qua templum est et religio dei. legimus
quod saepe dominus docuerit in templo; et quod non oportuerit mori
prophetam extra hierusalem; et supra uerbum et legem pariter nominata.
uerbum principes iubentur audire; legem populus auribus percipere. qui
enim prius legem fecerit, postea uenit ad sermonem dei. sed et in
hierusalem primum fundata ecclesia totius orbis ecclesias seminauit. et
hoc dicendum quod quicumque in specula et in uisione pacis fuerit, in
hoc et lex et uerbum domini constitutum sit. et pulchre non dixit: in
sion et in hierusalem erit et manebit uerbum et lex domini; sed
egredietur, ut de illo fonte omnes nationes doctrina dei significet
irrigandas.
et iudicabit gentes et arguet populos multos. ergo et inter
gentes et gentes iudicandum est; nec omnes increduli pari sententia
condemnandi, sed pro diuersitate meritorum diuersa passuri sunt.
postquam autem iudicauerit gentes, tunc arguet populos multos, siue ut
lxx transtulerunt, populum multum. et nota ordinem: gentes iudicabuntur,
quia crediturae sunt: qui enim non credit, iam iudicatus est. populus
autem multus, qui intellegitur israel, nequaquam iudicabitur, sed
arguetur, quia ad se missum filium dei non receperit. et conflabunt
gladios suos in uomeres, et lanceas suas in falces. omne bellandi
studium uertetur ad pacem et pro discordia erit in toto orbe concordia.
gladii mutabuntur in uomeres et lanceae in falces, ut omisso furore
bellandi, agriculturae seruiant et uberrimas falcibus messes secent.
quod quidem et spiritaliter intellegi potest, quando omnis duritia
cordis nostri christi uomere frangitur et eradicantur spinae uitiorum,
ut sementis sermonis dei crescat in fruges; et postea labores manuum
nostrarum manducemus, quando uenientes uenient in exsultatione portantes
manipulos suos.
non leuabit gens contra gentem gladium, neque exercebuntur ultra
ad proelium. ueteres reuoluamus historias et inueniemus usque ad
uicesimum octauum annum caesaris augusti, cuius quadragesimo primo anno
christus natus est in iudaea, in toto orbe terrarum fuisse discordiam et
singulas nationes contra uicinas gentes arsisse studio proeliandi, ita
ut caederent et caederentur. orto autem domino saluatore, quando sub
praeside syriae cyrino prima est in orbe terrarum facta descriptio et
euangelicae doctrinae pax romani imperii praeparata, tunc omnia bella
cessauerunt et nequaquam per oppida et uicos exercebantur ad proelia;
sed ad agrorum cultum, militibus tantum legionibus que romanis contra
barbaras nationes bellandi studio delegato, quando impletus est
angelorum ille concentus: gloria in excelsis deo, et in terra pax
hominibus bonae uoluntatis; et in diebus eius orta est iustitia et
multitudo pacis.
domus iacob uenite et ambulemus in lumine domini; proiecisti enim
populum tuum domum iacob. post uocationem gentium et ostensionem montis
domini super uerticem montium, ad populum suum, id est populum
iudaeorum, qui appellatur domus iacob, propheta conuertitur et hortatur
eos, ut qui in tenebris uersantur erroris, lumen suscipiant ueritatis et
ambulent in lumine domini. et quodammodo illud dauidicum canit:
accedite ad eum et illuminamini; et facies uestrae non confundentur.
omnis enim qui operatur malum, odit lumen et non uenit ad lucem, ne
opera eius arguantur. uos autem domus iacob, domus populi mei, uenite me
cum et pariter ambulemus in lumine domini; recipiamus euangelium
christi, illuminemur ab eo qui dicit: ego sum lux mundi. cum que hoc
locutus fuisset ad populum iudaeorum, cernens impaenitens cor eorum et
animam incredulitate durissimam, facit apostropham ad dominum et dicit:
ideo eos hortor, ut ad te ueniant et me cum tuo lumine perfruantur, quia
pro merito peccatorum suorum reliquisti populum tuum, domum quondam
iacob.
quia repleti sunt ut olim, et augures habuerunt ut philisthiim.
pro philisthiim semper lxx alienigenas interpretati sunt, nomen commune
pro proprio, quae est hodie gens palaestinorum, quasi philisthinorum,
quia p litteram sermo hebraicus non habet; sed pro ea phi graeco utitur.
unde illud quod in psalmis dicitur, cum enumeratione gentium ceterarum:
mihi alienigenae subditi sunt, non omnes exteras nationes, sed proprie
palaestinos significat. reddit que causas quare proiecerit deus populum
suum domum iacob, quia repleti sunt, inquit, ut fuerunt in principio,
auguribus, et ominibus, cunctis que sordibus idololatriae. non
attendenda omina nec auguria, mose scribente, cognoscimus, quae
habuerunt gentes, quas eiecit dominus a facie israel; chananaeorum,
amorrhaeorum et chethaeorum. hunc locum ecclesiae tractatores aliter
atque aliter edisserunt. quidam enim uolunt hoc significari, quod
proiecto populo iudaeorum, ingressus sit terram quondam repromissionis
romanus exercitus; et eiectis iudaeis, habitauerint in iudaea
alienigenae, qui de toto orbe diuersarum gentium accolae sunt, adducti a
tito et uespasiano et hadriano, ceteris que principibus. alii autem
putant hoc non pertinere ad romana tempora, sed ad superiora, priusquam a
babyloniis uastarentur, quod sub impiis regibus fuisse narrantur, et a
domino derelicti sunt.
et pueris alienis adhaeserunt. pro quo lxx transtulerunt: et
filii multi alienigenae nati sunt eis. symmachus: et cum filiis alienis
applauserunt. pro quo scriptum est in hebraico iesphicu, quod hebraei
interpretantur esph�n�th�san~g, et nos uertimus adhaeserunt, ut uitiorum
in gente iudaea turpitudo monstretur. intantum autem graeci et romani
hoc quondam uitio laborauerunt, ut et clarissimi philosophorum graeciae
haberent publice concubinos; et adrianus philosophiae artibus eruditus,
antinoum consecrarit in deum templum que ei ac uictimas et sacerdotes
instituerit et ex eo aegypti ciuitas ac regio nomen acceperit. inter
scorta quoque in fornicibus spectaculorum pueri steterint publicae
libidini expositi, donec sub constantino imperatore, christi euangelio
coruscante et infidelitas uniuersarum gentium et turpitudo deleta est.
porro lxx coniuges eorum uiolatas esse significant, dum filios alienos
iudaeis generant. symmachus quodam circuitu et honesto sermone
plaudentium, eamdem cum pueris turpitudinem demonstrauit.
et repleta est terra argento et auro, et non est finis
thesaurorum eius. inter cetera uitia terrae domus iacob, etiam auri et
argenti multitudo numeratur. inter omina et augures, equos et quadrigas,
quas deus multiplicari prohibuit regibus israel; inter idola, quae sunt
opera manuum hominum, auaritia condemnatur.
unde dominus praecepit in euangelio, ne thesaurizemus nobis thesauros in
terra, et ne faciamus thesauros, de quibus fur possit eripere, ad
extremum inferens: non potestis deo seruire et mammonae. pulchre autem
illud comma uersiculi: semper auarus eget, aliis uerbis propheta
significauit dicens: et non est finis thesaurorum eius. non quod
thesauri finem non habeant, sed quod possidentium animus non impleatur.
utraque autem gens et iudaeorum et romanorum per haec uerba auaritiae
sugillatur. quod historiae quoque tam graecae narrant quam latinae,
nihil iudaeorum et romanorum gente esse auarius. unde et repetundarum
lex constituta est et cotidie uidemus illud compleri apostolicum: qui
praecipis non furandum, furaris. furem iudicem audit atque condemnat
iudex furacior, in alio de se promens sententiam.
et repleta est terra eius equis et innumerabiles quadrigae eius.
non enim dignum est numero quod contra dei imperium possidetur. unde et
in psalmis dicitur: fallax equus in salutem. et in exodo: equum et
ascensorem deiecit in mare. et in alio psalmo: hi in curribus, et hi in
equis; nos autem in nomine domini dei nostri inuocabimus. potest autem
utrumque intellegi, quod et populus iudaeorum contra praeceptum dei sibi
equos et quadrigas multiplicauerit, et terra iudaeae uictorum equis et
curribus sit repleta. et repleta est terra eius idolis, opus manuum
suarum adorauerunt, quod fecerunt digiti eorum. et incuruauit se homo et
humiliatus est uir. ubi quondam erat templum et religio dei, ibi
adriani statua et iouis idolum collocatum est. quod multi super illo
testimonio interpretantur, quod in euangelio legimus: cum autem
uideritis abominationem desolationis stantem in sancto loco. et operi
manuum suarum inclinati sunt; et homo, rationale animal, aes adorauit et
lapidem. sunt autem qui haec de iudaeis interpretentur, quod antequam
caperentur a babyloniis uniuersa haec fecerint et ideo dimissi sunt a
deo. unde et in fine capituli ponitur:
ne ergo dimittas eis. possumus secundum anagogen et hoc dicere,
quod omne dogma contrarium ueritati adoret opera manuum suarum, et
constituat idola in terra sua, et incuruetur homo, et humilietur uir, et
se erigere non possit, quia sit a diabolo colligatus, nisi illum
erexerit dominus, exemplo illius mulieris, quam satanas uinxerat annis
decem et octo, ut nequaquam caelum, sed terram semper aspiceret. ne ergo
dimittas eis. pro quo lxx interpretati sunt: et non dimittam eis. si
deus loquitur, ita intellegendum est: quia tanta fecerunt, non parcam
eis, nec tam innumerabilia peccata dimittam. si propheta, sic
sentiendum: ne ergo dimittas eis, qui tanta scelera perpetrarunt. quod
si de romanis intellegimus, uerior interpretatio est, qui subuertentes
templum dei, non eum adorauerunt, qui uictoriam praebuit, sed idola
manuum suarum. sin autem de iudaeis, prophetae truculenta sententia est,
ut contra populum suum orare uideatur, cui supra dixerat: domus iacob,
uenite et ambulemus in lumine domini
ingredere in petram; abscondere in fossa humo a facie timoris
domini et a gloria maiestatis eius. ego quidem populum cohortatus sum,
dicens: domus iacob, uenite et ambulemus in lumine domini. sed quia
proiecit dominus populum iacob; proiecit autem, quia aut fecit, aut
passus est, quae supra exposuimus; ideo praenuntio uobis quae uentura
sint mala et hortor ut ingrediamini petras et abscondamini in speluncis a
facie babylonii uel romani exercitus, quando omnia uastabuntur, iuxta
illud quod in euangelio legimus: tunc dicent montibus: cadite super nos,
et petris: abscondite nos. iuxta anagogen uero a facie dominicae
maiestatis praecipitur nobis, ut assumamus petrae fortitudinem, de qua
dictum est: petra refugium leporibus. et: in petra exaltasti me. moyses
quoque in foramine petrae ponitur, ut uideat posteriora dei. et: bibebat
populus de spiritali sequenti eos petra. absconditur que in petra qui
ingreditur cubiculum suum et clauso ostio adorat patrem, ut in terreno
corpore constitutus, transeuntem mundi non sentiat tempestatem.
oculi sublimes hominis humiliati sunt, et incuruabitur altitudo
uirorum; exaltabitur autem dominus solus in die illa. cum hostes
uenerint et omnem prouinciam babylonius aut romanus mucro uastauerit, et
circumsederint agmina bellatorum hierusalem; tunc nec diuitiae, nec
nobilitas generis, nec potentia dignitatum aliquem defendere poterunt;
sed omnium erit una captiuitas, et deus solus exaltabitur, cuius iram
nullus poterit declinare. multi haec de die iudicii intellegunt, quod
omnis creatura comparatione diuinae gloriae humilietur et incuruetur et
nihil esse se sentiat.
dies enim domini exercituum super omnem superbum et excelsum et
super omnem arrogantem, et reliqua. et haec prioribus coniunguntur. in
die, inquit, illa in qua exaltabitur dominus solus, hoc est, in die
ultionis dominicae, excelsi quique et arrogantes atque sublimes
captiuitati et gladio subiacebunt. metaphorik�s~g autem sermo de magnis
est atque principibus, quod quanto magis superbierint, tanto amplius
deprimantur. dominus enim superbis resistit, et humilibus dat gratiam.
qui de die iudicii intellegunt, superbum et excelsum et sublimem et
arrogantem, diabolum dici putant, qui superbiens loquitur: super stellas
caeli ponam sedem meam; sedebo in monte excelso, super omnes montes
excelsos ad aquilonem; ascendam super nubes, ero similis altissimo.
quando ex ore infantium et lactentium perficietur laus, ut destruatur
inimicus et ultor.
et super omnes cedros libani sublimes et erectas et super omnes
quercus basan. et in uicesimo octauo psalmo canitur: uox domini
conterentis cedros; conteret dominus cedros libani et comminuet eas
quasi uitulum libani. et in tricesimo sexto psalmo: uidi impium
exaltatum et eleuatum quasi cedros libani, et transiui, et non erat, et
quaesiui eum, et non est inuentus locus eius. quercus quoque basan, quas
aquila druas~g, symmachus et theodotio balanous~g interpretati sunt,
glandiferas nouimus, quae etsi fecerint fructus, porcorum sunt alimenta,
non hominum. basan regio est arabiae, cui imperauit og, qui appellatus
est rex basan, et interpretatur aischun�~g, id est ignominia, quam si
confusionem transferre uoluerimus, magis sugchusin~g, id est babylonem,
significat quam basan. super omnes ergo qui eriguntur in superbiam et
faciunt opera ignominiae atque in caeno libidinum uolutantur, domini
uindicta consurget. quod si prudens lector quaesierit, cur in templo
domini cedrina ligna sint posita et in centesimo tertio psalmo legamus
iuxta hebraicam ueritatem: saturabuntur ligna domini et cedri libani,
quas tu plantasti, ibi passeres nidificabunt; et inter cetera ligna
etiam cedri ad laudes domini prouocentur; et in aduentu saluatoris,
quando omnes arbores et ligna campi applaudent ramis suis, scriptum sit:
ponam in terra inaquosa cedrum et buxum et cypressum et pinum; et nunc
diem domini super cedros libani sermo propheticus comminetur? hoc
dicendum est, quod ex eodem genere hominum, alii sublimentur ad regnum,
alii detrahantur ad poenam; et cedri libani, quae propter superbiam
conterentur, eligantur, cum boni odoris fuerint et cum apostolo
dixerint: christi bonus odor sumus.
et super omnes montes excelsos et super omnes colles eleuatos.
sicut in bonam partem pro uarietate uirtutum montes appellantur et
colles, sic inter impios pro diuersitate uitiorum et maxime superbiae,
alii montes sunt, alii colles, super quos erit dies domini, de quibus in
hiezechiele scriptum est: haec dicit adonai dominus montibus et
collibus: ecce ego inducam super uos gladium et dissipabuntur excelsa
uestra, et conterentur arae uestrae, et reliqua.
et super omnem turrim excelsam, et super omnem murum munitum. qui
ad uespasiani adriani que haec referunt tempora, corporaliter dicunt
impleta quae scripta sunt, quod non turris excelsa, non firmissimus
murus, non ulla nauium multitudo et negotiationis industria, aduersum
uim romani exercitus potuerit praeualere. sed in tantam habitatores
iudaeae uenisse formidinem, ut et ipsi cum coniugibus et liberis, auro
et argento quae sibi auxilio fore aestimabant, in foueas terrae demersi
sint et profundissima antra sectati. si enim uoracium et luxuriosorum
uenter est deus, quare non auari aurum et argentum appelletur deus? alii
haec ad babylonia referunt tempora. ergo iuxta leges tropologiae
singula quaeque percurram. turris uel ob munitionem urbis aedificatur,
uel ob speculam, ut longe ueniens cernatur hostis. unusquisque ergo
nostrum debet aedificare turrim, prius sumptibus supputatis, ne iuxta
euangelicam parabolam, cum explere opus nequiuerit, rideatur. haec
turris bene constructa persistit. sin autem erecta in superbiam, firma
non habuerit fundamenta, cadet super eum a quo aedificata est; sicut
illa in siloa, quae decem et octo homines interfecit. unde et dominus
loquitur ad audientes: et uos si non egeritis paenitentiam, similiter
peribitis. in consequentibus quoque lecturi sumus, quod dominus in uinea
sua aedificauerit turrim, et fecerit torcular, et maceriam
circumdederit, sed haec omnia destructa sint atque uastata, quia uano
superbiae supercilio intumuerint. muri quoque exstruuntur excelsi, ne
cito ciuitas destruatur, ne hostibus pateat, quia circumdantur ecclesiae
sapientissimis uiris et omni ratione firmantur, ne quod dogma peruersum
praeualeat ueritati. de istiusmodi muris deus loquitur ad hierusalem:
ecce super manus meas depinxi muros tuos et in conspectu meo sunt
semper. sin autem hi qui prius impugnauerant ecclesiam, cognita
ueritate, transierint ad fidem et pugnauerint pro ea, quam ante
impugnauerant, tunc illud implebitur: cito aedificaberis ab his, a
quibus destructa eras. in leuitico quoque legimus, domum, quae in
urbibus muratis sit, si intra annum redempta non fuerit, emptori aeterna
possessione firmari, quod si in uillis et in uiculis sit, quae muros
non habeant, semper posse redimi et emptoris pretium fluctuare.
et super omnes naues tharsis et super omne, quod uisu pulchrum
est. pro tharsis, quod omnes similiter transtulerunt, soli lxx mare
interpretati sunt. hebraei putant, lingua proprie sua mare tharsis
appellari, quando autem dicitur: iam, non hebraico sermone appellari,
sed syriaco. habuit et iosaphat naues, quas mittebat in tharsis, sed
contritae sunt in asiongaber. habuit et salomon quae ibant in tharsis,
et post tres annos reuertebantur, afferebant que regi argentum et aurum,
ebur et simias. sed quia rex uterque peccauerat, alius deditus
uoluptati et externarum gentium amans feminas; alius se cum rege
samariae copulans, quod utrumque ad ethnicos refertur et haereticos, in
quibus nihil est aliud nisi fulgor eloquentiae, et sensus diabolica arte
constructus, et sermo mortuus, quod interpretatur in dentibus, et
similitudo rationis humanae, quod sentitur in simiis. idcirco in psalmis
legimus: in spiritu uiolento confringes naues tharsis. et de his
nauibus idem esaias loquitur: uae alis nauium, quae sunt trans
aethiopiam. sunt autem e contrario et bonae naues, de quibus in eisdem
psalmis dicitur: qui descendunt mare in nauibus et faciunt opus in aquis
multis. ipsi uiderunt opera domini et mirabilia eius in profundo. qui
enim in saeculi huius fluctibus non sunt otiosi, sed operantur, et
merces portant dominicas et ad portum quietis uenire festinant, ipsi
uident opera domini, et mirabilia eius in profundo, quando ad profundam
scientiam peruenerint, et uniuersa scrutantes, hoc est, etiam profunda
dei et mirabilia eius aspexerint. iosephus tharsis urbem ciliciae tarsum
arbitratur; alii regionem putant indiae et hoc nomine etiam de duodecim
gemmis lapidem appellari, qui apud nos uocatur chrysolithus, ob marini
coloris similitudinem. melius autem est tharsis uel mare uel pelagus
absolute accipere. neque enim ionas de ioppe nauigans, ad indiam poterat
peruenire, ad quam illo mari non potest nauigari; sed simpliciter ire
in pelagus, et ad quascumque insulas pergere. quod que sequitur: et
super omne, quod uisu pulchrum est. siue ut lxx transtulerunt: et super
omnem aspectum pulchritudinis nauium, eodem sensu accipiendum, quod
destruatur a die domini quidquid pulchrum uidetur in uerbis et humana
ratione constructum, si se erigat contra scientiam dei.
et incuruabitur sublimitas hominum et humiliabitur altitudo
uirorum et eleuabitur dominus solus in die illa; et idola penitus
conterentur. tamdiu uidetur humanus sermo habere rationem, quamdiu
diuinae scientiae non fuerit comparatus. cum autem mendacium ueritati,
quasi stipula igni, appropinquauerit, cito uoratur et deperit et omnia
dogmata falsitatis, quae nunc idola nominantur, ab eo quod simulata sint
atque conficta, penitus conterentur.
in die illa proiciet homo idola argenti sui et simulacra auri
sui, quae fecerat sibi, ut adoraret talpas et uespertiliones, et
ingredietur in fissuras petrarum et cauernas saxorum a facie formidinis
domini et a gloria maiestatis eius, cum surrexerit percutere terram.
saepe diximus argentum et aurum pro sermone et sensu accipi, quae cum a
deo hominibus data sint, ut uel loquantur uel sentiant deum et laudent
creatorem suum, illi abutuntur hoc munere in idolorum simulationem.
iuxta illud quod scriptum est: dedi eis argentum et aurum; ipsi uero de
argento et auro meo operati sunt baal. cum ergo quis domini pauore
perterritus primum in spelunca pectoris sui idola condiderit; et in
uoraginibus terrae absconderit, non audens proferre quod male finxerat,
secundum profectus est, ut prius caelata proiciat, et in se esse non
patiatur. pro talpis, quas nos interpretati sumus, lxx uana, aquila
orukta~g, symmachus infructuosa, theodotio ipsum uerbum hebraicum posuit
pharpharoth. est autem animal absque oculis, quod semper terram fodit,
et humum egerit, et radices subter comedens, frugibus noxium est; quod
graeci aspalaka~g uocant. uespertilio autem nocturna auis, quae congruum
ab eis nomen accepit nukteris~g, eo quod in nocte uolitet, paruum
animal est, et murium simile, non tam uoce et cantu resonans, quam
stridore, quod cum uideatur uolitare, lucifugum est et solem uidere non
patitur. istiusmodi animantibus idola comparata sunt, quae caeca et
tenebrosa coluntur a caecis, et omnia dogmata contraria ueritati. quae
cum in die domini fuerint derelicta, ingredientur hi qui proiecerint ea
in fissuras petrarum cauernas que saxorum, ut non in terrae puluere et
uili luto, sed in firma ratione uersentur et inueniant sibi diuersa
uirtutum foramina, per quae ad ueritatem ualeant peruenire. haec iuxta
anagogen, ut potui, breui sermone perstrinxi, quae hebraei ad babylonia
referunt tempora et subuersionem hierusalem, quando surrexit dominus
terram percutere iudaeorum.
quiescite ergo ab homine, cuius spiritus in naribus eius, quia
excelsus reputatus est ipse. hoc praetermisere lxx, et in graecis
exemplaribus ab origene sub asteriscis de editione aquilae additum est,
quod in hebraeo ita legitur: hedalu lachem men aadam aser nasama
baaphpho chi bama nesab hu. ubi nos diximus: excelsus reputatus est
ipse, aquila interpretatus est: in quo reputatus est iste.
uerbum hebraicum bama uel hups�ma~g dicitur, id est excelsum, quod et in
regnorum libris et in hiezechiele legimus. uel certe in quo et eisdem
litteris scribitur beth, mem, he ac pro locorum qualitate, si uoluerimus
legere: in quo dicimus bamma; sin autem: excelsum uel excelsus, legimus
bama. intellegentes ergo iudaei prophetiam esse de christo, uerbum
ambiguum in deteriorem partem interpretati sunt, ut uiderentur non
laudare christum, sed nihili pendere. quae est enim uerborum
consequentia et qui ordo rationis ac sensus, ut dicamus: cum haec ita se
habeant, et dies uentura sit domini, in qua uniuersus iudaeae status
subuertendus est et omnia conterenda. moneo uos atque praecipio, ut
quiescatis ab homine, qui ita spirat ac uiuit ut nos homines, quia in
nihili computandus est? quisquam ne hominum ita quempiam laudet, ut
dicat: cauete ne offendatis eum, qui omnino nihili est? ergo e contrario
sic intellegendum: cum haec uniuersa uentura sint uobis et prophetali
spiritu praedicantur, moneo atque praecipio, ut quiescatis ab eo qui
secundum carnem quidem homo est, et habet animam, et ita spirat, et
naribus halitum trahit, ut nos homines spiramus, et uiuimus; sed
secundum diuinam maiestatem excelsus et est, et reputatur et creditur.
tacita me cum mente pertractans, non possum inuenire rationem, quare lxx
tam perspicuam de christo prophetiam in graecum noluerint uertere.
ceteri enim, qui uerterunt quidem, sed sermonem ambiguum ad impietatis
traxere sensum, non mirum cur male interpretati sint, nec uoluerint de
christo gloriosum quid dicere, in quem non credebant. uidelicet ut
iudaei aut semiiudaei, id est ebionitae. quod autem christus excelsus
sit uel altissimus, qui alio sermone apud hebraeos appellatur elion, in
octogesimo sexto psalmo legimus: numquid sion dicet homo et homo natus
est in ea; et ipse fundauit eam altissimus? et in euangelio: et tu puer
propheta altissimi uocaberis. ac ne longum funem traham, in expositione
enim sanctarum scripturarum ueritatem debemus sequi, non contentionem in
isto loco bama apud hebraeos non excelsus dicitur, sed excelsum, id
est, ipsa altitudo atque sublimitas; quasi si de aliquo dicamus, non est
diuinus, sed diuinatio; non est riuus, sed fons; non est homo, sed ipsa
humanitas. origenes hunc locum ita interpretatus est: quia singulariter
de uno homine dicitur, referri potest et ad dominum saluatorem, iubente
propheta, ut quiescant ab eo qui in magno aliquo reputatus est; licet
impraesentiarum uideatur ut homo et spiramen habere in naribus, sicut et
ceteri spirant homines.
LIBER 2
finito in esaiam primo uolumine, quod ut potui, non ut uolui, celeri
sermone dictaui: sensum potius scripturarum, quam compositae orationis
uerba perquirens; nunc transcendam ad secundum; et quidquid in me uirium
est, pronae que in dominum uoluntatis, offeram ei qui per prophetam
locutus est: ego uisiones multiplicaui; et in manibus prophetarum
assimilatus sum. unde obsecro te, uirgo christi eustochium, ut nobis in
scripturarum explanatione certantibus, tu cum moyse ad dominum eleues
manus; ut qui exeuntes de aegypto, mare transiuimus rubrum, uincamus
amalec, qui interpretatur deuorans et lingens; et possimus te cum
dicere: benedictus dominus deus meus, qui docet manus meas ad proelium
et digitos meos ad bellum.
3. ecce enim dominator dominus exercituum auferet ab hierusalem
et ab iuda ualidum et fortem, omne robur panis et omne robur aquae.
hucusque de iudicio dici putant. quod sequitur, de captiuitate uentura,
quam alii ad babylonios, alii referunt ad romanos. sed melius est, ut
supra diximus, cuncta referri ad dominicam passionem. post
interfectionem quippe illius, omnes gratiae et donationes sublatae sunt a
iudaeis, secundum quod in euangelio scriptum est: lex et prophetae
usque ad ioannem baptistam. et est ordo: quoniam noluistis cessare ab
homine, cuius spiritus in naribus eius, qui excelsus reputatus est; sed e
contrario fudistis sanguinem iusti et cogitastis consilium pessimum,
dicentes: alligemus iustum, quia inutilis est nobis. ideo fructum
adinuentionum uestrarum comedetis. nihil apud iudaeos post passionem
domini forte, nihil ualidum est, sed omnia infirma et languida. nec
aliquis potest apud eos dicere: omnia possum in eo, qui me confortat,
christo iesu domino nostro. et quia iuxta lxx legimus: ualidum et
ualidam, ualido illud possumus coaptare: donec occurramus omnes in uirum
perfectum, in mensuram aetatis plenitudinis christi. porro ualidae:
uolo, inquit, omnes uos uirginem castam exhibere christo. fortitudo
autem panis et fortitudo aquae pro omni cibo et potu accipitur. legimus
quod moyses fuerit in monte sinai, et quadraginta diebus panem non
comederit et aquam non biberit. illud quoque quod ad adam dicitur: in
sudore uultus tui comedes panem tuum, donec reuertaris in terram, de qua
sumptus es, similiter audiendum. nec non quod a saluatore dicitur: non
in pane solo uiuit homo, sed in omni uerbo quod egreditur per os dei.
fortitudo igitur panis auferetur ab eis. ille qui dicit: ego sum panis
uiuus, qui de caelo descendi. et fortitudo aquae, de qua idem dominus
loquebatur: omnis qui biberit ex aqua hac, sitiet iterum; qui autem
biberit ex aqua, quam ego dabo ei, non sitiet in aeternum. sed aqua,
quam ego dabo ei, fiet in eo fons aquae salientis in uitam aeternam. de
huiusmodi panibus et in prouerbiis legimus: aperi oculos tuos et replere
panibus. habent panem iudaei, sed absque fortitudine; habent aquas, sed
absque robore. legunt enim scripturas, sed non intellegunt; tenent
membranas, et christum, qui in membranis scriptus est, perdiderunt.
lacte enim aluntur, quasi paruuli et non solido cibo. et quia
fortitudinem perdiderunt et infirmi sunt, propterea olera comedunt.
athletarum autem solidus cibus est, qui et uitam sustentat humanam, et
uiuentibus praebet fortitudinem. de istiusmodi pane et aqua, quod
auferantur a iudaeis, etiam alius propheta testatur, dicens: ecce dies
ueniet, dicit dominus, et emittam famem super terram; non famem panis,
neque sitim aquae, sed famem audiendi sermones dei.
fortem et uirum bellatorem, iudicem et prophetam, et hariolum, et
senem. pro forti, quod solum est in hebraeo, duo simul lxx
transtulerunt: gigantem et fortem, eumdem uolentes gigantem esse, quem
fortem. de forti supra dictum est. gigantem autem in bonam partem, hoc
est de domino saluatore, in octauo decimo psalmo legimus: exsultauit ut
gigas ad currendam uiam suam; a summo caelo egressio eius, et occursus
eius usque ad summum illius. sin autem legerimus, nemrod gigantem, qui
fuit uenator coram domino, et gigantes, propter quos uenit diluuium
super terram, in contrariam partem accipiendi sunt. uirum quoque
bellatorem iuxta historiam sic intellegimus, quod capti sint et usque
hodie seruiant, et non deposuerint seruitutis iugum. sed ne iudices
quidem habeant proprios, romanis que subiciantur iudicibus; in tantum ut
de principibus eorum, qui esse uidentur in populo, romani principes
iudicent. sed et hoc dicendum, quod nullus sit apud eos bellator in
lege, habens scientiam iudicandi; sed omnia uana sint et caduca et plena
stultitiae. de propheta autem, quod apud eos esse cessauerit, nulli
dubium est. quaerimus iuxta hebraicum, quomodo interpretemur hariolum,
quem omnes interpretati sunt diuinum, exceptis lxx, qui pro hoc
coniectorem transtulerunt. et dicendum quod saepe etiam per hariolos
futura dicantur, sicut in balaam diuino legimus et in diuinis quinque
urbium palaestinarum, gazae et ascalonis, geth et accaronis et azoti,
qui dant consilium quomodo arca domini remittatur. et est sensus: et
uera et falsa a iudaeis pariter auferentur. senem quoque, quem lxx
presbyterum transtulerunt, intellegit ablatum a iudaeis, qui scierit in
scripturis sanctis presbyteros merito et sapientia eligi, non aetate.
neque enim apud iudaeos senes esse cessarunt, quos usque ad decrepitam
senectutem saepe uenire conspicimus. et inueteratos dierum malorum duos
presbyteros iuxta theodotionem in danielis principio legimus. nam et
moysi praecipitur, ut eligat presbyteros, quos scit esse presbyteros. et
apostolus paulus, qualis presbyter eligi debeat, plenissime scribit ad
timotheum. unde et in prouerbiis dicitur: gloria senum canities. quae
est ista canities? haud dubium quin sapientia, de qua scriptum est:
canities hominum prudentia est. cum que nongentos et eo amplius annos ab
adam usque ad abraham uixisse homines legamus, nullus alius prius
appellatus est presbyter, id est senex, nisi abraham, qui multo
paucioribus annis uixisse conuincitur. unde scribit et ioannes post
pueros et iuuenes, etiam ad senes, dicens: scripsi uobis, patres, quia
cognouistis eum, qui a principio est. et roboam filius salomonis ideo
perdidit regnum, quia noluit audire presbyteros.
principem super quinquaginta. sunekdochik�s~g a parte totum.
quomodo enim centuriones uocantur, qui centum praesunt militibus, et
chiliarchi, qui mille, quos nos tribunos appellamus, ab eo quod praesint
tribui. sic in israelitico exercitu quinquagenarii uocabantur, qui in
capite erant quinquaginta militum. unde et decanos dicimus, qui decem
praesunt hominibus. nec mirum si apud iudaeos omnis perierit dignitas
bellatorum, cum militandi sub gladio et arma portandi non habeant
potestatem. quia uero quinquagenarius numerus semper refertur ad
paenitentiam, princeps que paenitentiae, et caput eorum, qui saluantur
per paenitentiam, christus est; breuiter numeri huius sacramenta
pandamus. in genesi legimus, loquente abraham ad dominum, quod a
quinquaginta primum iustis, si inueniatur in ciuitate, dixerit urbem
esse saluandam. et septem hebdomadarum in numeris, id est: pentecostes
celeberrima festiuitas est. iubileus quoque, id est remissionis annus,
qui septenis annorum hebdomadibus, id est quadraginta nouem annis
texitur, in quo clangunt tubae et ad omnes reuertitur antiqua possessio,
hoc continet sacramentum. unde et dauid in quinquagesimo numero psalmum
scribit paenitentiae. legimus quoque in eodem.
numerorum libro, quod de praeda et spoliis quinquagesimum caput, tam de
hominibus quam de iumentis, accipiant sacerdotes, et quinquagesimum
leuitae, qui custodiunt fores tabernaculi. illa quoque euangelii
parabola, in qua dicuntur duo debitores, unus qui debebat quingentos
denarios et alius quinquaginta, ad hanc refertur intellegentiam. unde et
apostolus apud ephesios, quibus mystica quaeque dissoluerat, uult
permanere usque ad pentecosten, donec perfecte ad dominum conuertantur,
dicens: ostium enim mihi apertum est magnum et euidens, sed aduersarii
multi. imitatur autem et diabolus israeliticum exercitum, de quo iethro
dederat genere suo moysi consilium, ut constitueret super populum
tribunos et centuriones et quinquagenarios. unde impius rex mittit duos
quinquagenarios cum subditis sibi militibus, ut exhiberent eliam, qui
diuino igne consumpti sunt. tertius autem saluatur ex eis, qui conuersus
ad preces, paenitentiae sacramenta cognouerat. unde et iudaei, nolentes
dominum esse perfectum nec principem quinquagenarium, dicunt ad eum:
quinquaginta annos necdum habes, et abraham uidisti? et ille sciens se
esse non solum paenitentium principem, sed et iustorum respondit:
antequam abraham esset, ego sum. quod autem dominus princeps sit
quinquagenarius, ex una festiuitate intellegere possumus, de qua ait:
dominus est sabbathi, filius hominis. quod si sabbathi, et kalendarum.
si kalendarum, et paschae, id est, azymorum. si paschae, et iubilei, si
iubilei, et tabernaculorum. si tabernaculorum, et pentecostes, quae ad
quinquagesimum refertur numerum.
et honorabilem uultu et consiliarium. pro duobus, id est
honorabili uultu et consiliario, lxx unum: uirum admirabilem
consiliarium transtulerunt. inter ceteras gratias etiam hoc dominus
auferet a iudaea, ut nullum habeant consiliarium; sed faciant cuncta
absque consilio. et graeci poetae laudabilis illa et admiranda sententia
est: primum esse beatum, qui per se sapiat; secundum, qui sapientem
audiat. qui autem utroque careat, hunc inutilem esse, tam sibi, quam
omnibus. unde et illud in nostris libris legimus: amici tibi sint
plurimi, consiliarius autem unus de mille. et iterum: cum consilio omnia
age. et dabit tibi prudentia admirabilem consiliarium. senatus quoque
consulta dicuntur et principes quondam romani consules appellati sunt,
uel a consulendo ciuibus, uel a regendo cuncta consilio. et nos habemus
in ecclesia senatum nostrum, coetum presbyterorum. cum ergo inter cetera
etiam senes iudaea perdiderit, quomodo poterit habere consilium, quod
proprie seniorum est?
et sapientem architectum. pro quo aquila transtulit:
sapientissimum artificum, ut ostenderet eos plures quondam habuisse
artifices; qualis et ille fuit beseleel filius uri, filii ur de tribu
iuda, quem impleuit deus spiritu sapientiae et intellegentiae ac
disciplinae, ut in omni opere esset faber perfectissimus, non solum in
auro et argento, sed et in aere et ceteris quae moyses enumerat, qui
aedificauit tabernaculum dei. illis ergo perdentibus architectos, omnis
aedificandi gratia translata est ad ecclesiam. unde paulus apostolus
dicit: quasi sapiens architectus fundamentum posui. et hieremias
architectus erat, qui non solum eradicabat et suffodiebat et perdebat,
sed et aedificabat. unde idem apostolus loquitur: dei agricultura, dei
aedificatio sumus.
dominus quoque noster appellatur structor maceriarum. et in euangelio
filius fabri sugillatur, qui uniuersa condiderit. in regum quoque
uolumine legimus, quod miserit rex salomon, et tulerit hyram tyrium,
filium mulieris uiduae quae erat de tribu nephthali, et habebat patrem
tyrium, artificem aeris. ingressus que est ad regem et fecit omnia opera
regi salomoni; in quo typus est aedificandae ecclesiae, quae non solum
de tribu iuda, sed de nephthali quoque et patre tyrio generatus sit, qui
habuit matrem uiduam, quia priorem uirum perdiderat. et multo plures
sunt filii desertae, magis quam eius quae habet uirum. sed et in
paralipomenon libro legimus uallem artificum: saraias autem genuit ioab
patrem uallis artificum; ibi quippe artifices erant. qui propterea
habitare dicuntur in ualle, quia non eos inflabat scientia, sed humilem
atque mansuetum sequebantur iesum et cum apostolo dicere poterant: ego
enim sum minimus apostolorum, qui non sum dignus uocari apostolus. et
alibi: ex parte cognoscimus et ex parte prophetamus; et nunc per
speculum uidemus in aenigmate.
et prudentem eloquii mystici. pro quo lxx interpretati sunt:
prudentem auditorem; theodotio: prudentem incantatorem; aquila:
prudentem susurratorem; symmachus: prudentem eloquii mystici, quem et
nos in hoc loco secuti sumus. dicendum primum iuxta lxx quod inter
ceteras gratias spiritales, etiam prudens auditor in ecclesia
necessarius sit. alii enim datur prophetia; alii discretio spirituum.
unde et constituti erant in populo iudaeorum sacerdotales gradus, qui
prophetas pseudoprophetas que discernerent; hoc est, intellegerent, qui
de dei spiritu loquerentur, qui de contrario. legamus hieremiam. prudens
autem eloquii mystici, siue susurrator et, ut theodotio uoluit,
incantator, uidetur mihi uir esse eruditus et exercitatus tam in lege et
prophetis, quam in euangelio et apostolis, qui possit singulas animi
perturbationes sua sanare doctrina, et ad statum mentis reducere; dum et
scortator recipit castitatem et ganeo frugalitatem et quondam auarus
dat eleemosynam. euentila omnes iudaeorum synagogas, et nullum poteris
inuenire doctorem, qui sancta praecipiat, et contemptis diuitiis,
sectandam doceat paupertatem. de istiusmodi incantatoribus contra
serpentes et aspides, id est contra peccatores, qui dei iustitiam
reliquerunt, dauid loquebatur in psalmo: alienati sunt peccatores a
uulua; errauerunt ab utero, locuti sunt falsa. furor eorum iuxta
similitudinem serpentis; sicut aspidis surdae et obturantis aures suas,
quae non exaudit uocem incantantium, et uenefici medicantis sapienter.
omnis sermo apostoli contra serpentes et aspides incantatio est, quem
non exaudiunt peccatores et haeretici, quia claudunt aures suas, ne
audiant ueritatem.
et dabo pueros principes eorum. si ex persona prophetae dicitur:
ecce enim dominator dominus exercituum, auferet ab hierusalem et ab iuda
ualidum et ualidam, omne robur panis et omne robur aquae; et reliqua.
quomodo nunc idem propheta loquitur: dabo pueros principes eorum, et
effeminati dominabuntur eis? ergo iuxta consuetudinem prophetalem
loquente propheta, subito deus loquitur per prophetam ex persona sua et
dicit: dabo pueros principes eorum; sublatis enim his quae ante
donaueram et quasi bona iratus abstuleram, nunc e contrario dabo mala.
tuli senem et quinquagenarium, et admirabilem consiliarium et sapientem
architectum et prudentem auditorem et cetera. pro his dabo pueros
principes. qui enim presbyterum perdiderunt. qualem superior sermo
monstrauit, qualis et abraham primus appellatus est presbyter, recte
iuuenes principes accipiunt. de quibus et in ecclesiaste legimus: uae
tibi ciuitas, cuius rex iuuenis et principes tui mane comedunt. beata
terra, cuius rex filius ingenuorum. talis fuit rex iuuenis roboam filius
salomonis, qui secutus est iuuenum consilia.
non quod aetate esset iuuenis, sed sapientia. alioquin quadraginta et
amplius annorum regnum accepisse narratur. et e contrario salomon
duodecim annorum erat quando suscepit imperium et quia habebat
sapientiam propterea non est appellatus iuuenis. erat enim in eo
latitudo cordis, et amplitudo sapientiae quanta arena est in maris
litoribus. unde et apostolus scribit ad timotheum: nemo adolescentiam
tuam contemnat. qui enim aetate iuuenis est, maturitate senex est. et
daniel iuxta theodotionem antequam iudicaret, appellatus est puer.
postquam uero excitauit in eo deus spiritum et iudicauit senes, accepit
presbyterii dignitatem. hieremiae quoque, qui ad mittentem se dominum
dixerat: quiesce, dominator domine. ecce ego nescio loqui, quia iuuenis
sum. respondit dominus: ne dicas, quia iuuenis sum; prius enim quam
formareris in utero, noui te, et antequam exires de uulua matris tuae,
sanctificaui te, et prophetam in gentibus constitui te. ob hanc causam
reor et adolescentulas uiduas iuberi ab apostolo, ut accipiant maritos
et matresfamiliae sint et educent liberos suos, quia multae retro
abierunt post satanam. et cum luxuriatae fuerint in christo, nubere
uolunt, habentes damnationem, quia primam fidem irritam fecerunt. nec
ecclesiasticis uidua sustentatur alimentis, nisi quae sexaginta annorum
est et maturitatem habet morum pariter et aetatis. putet aliquis et
illud quod apostolus prohibet episcopum fieri neophytum, ad hoc
pertinere, quia paruulus in fide est, ne elatus in superbiam, incidat in
iudicium diaboli. iudicium autem diaboli nullum est aliud, nisi
superbia, propter quam de caelestibus cecidit. unde et saluator
loquitur: uidebam satanam, quasi fulgor cadentem de caelo.
et effeminati dominabuntur eis. pro quo in hebraeo scriptum est
thalulim, quos lxx et theodotio illusores interpretati sunt, aquila
enallaktas~g, qui se mutent et turpitudinis exerceant uices. quales in
iudicum libro super concubina leuitae in gabaa legimus. consideremus
patriarchas iudaeorum, et iuuenes siue pueros effeminatos que ac
deliciis affluentes, et impletam prophetiam esse cernemus. possumus
illusores dicere et magistros populi israel, qui deuorant populum dei
sicut escam panis, et peruerse scripturas sanctas interpretantur
illudunt que stultitiae discipulorum.
et corruet populus uir ad uirum, unusquisque ad proximum suum;
tumultuabitur puer contra senem, et ignobilis contra nobilem. quando
iuuenes fuerint principes et illusores domini, quales propheticus sermo
describit, tunc nec dignitatis, nec aetatis, nec scientiae ullus ordo
seruabitur; sed rebellabunt pueri senibus et ignobiles nobilibus, et
mutuo corruent. et implebitur illud apostolicum: mordentes inuicem,
consumpti estis ab inuicem. haec sub tito filio uespasiani accidisse
populo iudaeorum. scribit iosephus; et quod, cum expugnarentur a
romanis, fuerit hierusalem in tres partes diuisa seditio; et alii arcem
et templum, alii inferiorem. urbis partem tenuerint alii superiorem.
apprehendet enim uir fratrem suum, domesticum patris sui.
uestimentum tibi est, princeps esto noster; ruina autem haec sub manu
tua.
uestimentum tibi est, princeps esto noster; ruina autem haec sub manu
tua. pro ruina, symmachus et theodotio infirmitatem transtulerunt, lxx
cibum. significat autem raritatem hominum et maxime rerum omnium
penuriam, quod qui cibum et uestimentum habuerit, potens et diues et
inclutus esse credatur. quod autem ait iuxta hebraicum: ruina haec sub
manu tua, hunc sensum habet: miseria nostra et calamitas tuo
substentetur et protegatur auxilio. et hoc considerandum quod singuli
sibi eligant principes singulos et in principum electione seditio sit,
dum alii alios principatu dignos putant. nec dicunt ad eos: possessiones
tuae et diuitiae et reditus sustentare nos poterunt, sed infirmitas
ista, siue cibus meus, ex tuo sanabitur et pendebit arbitrio.
et respondebit in die illa, dicens: non sum medicus, et in domo
mea non est panis, neque uestimentum; nolite constituere me principem
populi. pro medico, symmachus et lxx transtulerunt: principem; theodotio
epidesmeuonta~g, qui liget uulnera et prouideat sanitati. respondebit
in hebraeo non habetur, sed de lxx additum est. in hebraeo enim his quae
supra scripta sunt iungitur: in die illa, dicet, non sum medicus, et
reliqua. is autem dicet, qui princeps fuerit electus. et sicut populus
qui eum, quem comparatione sui locupletiorem intellegit, principem
habere desiderat, sic qui eligitur considerans paupertatem et
imbecillitatem suam, indignum se esse delato honore testatur, nec posse
mederi uitiis, id est curare languentes, esurientibus tribuere cibum,
uestire nudos, qui ipse se sustentare uix ualeat. ergo non statim
multitudinis acquiescamus iudicio, sed electi in principatum nouerimus
mensuram nostram et humiliemur sub potenti manu dei, quia deus superbis
resistens, humilibus dat gratiam. quanti panem non habentes et
uestimentum, cum ipsi esuriant et nudi sint, nec habeant spiritales
cibos, neque christi tunicam integram reseruarint, aliis et alimoniam et
uestimenta promittunt; et pleni uulneribus, medicos se esse iactant.
nec obseruant illud mosaicum: prouide alium quem mittas; aliud que
mandatum: ne quaeras iudex fieri, ne forte non possis auferre
iniquitates. solus iesus omnes languores sanat et infirmitates, de quo
scriptum est: qui sanat contritos corde et alligat contritiones eorum.
ruit enim hierusalem et iuda concidit, quia lingua eorum et
inuentiones eorum contra dominum, ut prouocarent oculos maiestatis eius.
agnitio uultus eorum respondit eis; et peccatum suum quasi sodoma
praedicauerunt, nec absconderunt. hoc propheta loquitur, non, ut
plerique arbitrantur, ille qui princeps fuerat electus. et dicit ideo
nullum uelle praeesse populo peccatori, quia iudas et hierusalem et
urbs, et iudaea prouincia, siue tribus iuda pariter conciderint. causas
que reddit impietatis eorum, quia contra dominum blasphemauerunt, atque
dixerunt: tolle, tolle, crucifige talem, non habemus regem nisi
caesarem. et clementissimum deum furore linguae suae ad amaritudinem
prouocauerunt agnitio que uultus eorum respondebit eis, id est: sua
recepere peccata, siue ut septuaginta transtulerunt: confusio uultus
eorum restitit eis, id est: ante oculos suos propria semper habuere
delicta. et quomodo sodomitae cum omni libertate peccantes et ne pudorem
quidem ullum habentes in scelere, dixerunt ad lot: educ foras uiros, ut
concumbamus cum eis. sic et isti publice proclamantes, suum
praedicauere peccatum, nec ullam in blasphemando habuere uerecundiam.
secunda enim post naufragium tabula paenitentiae est et consolatio
miseriarum, impietatem suam abscondere. unde et principes appellantur
sodomorum, qui sodomitica habuere peccata.
uae animae eorum, quoniam reddita sunt eis mala. dicite iusto,
quoniam bene, quoniam fructum adinuentionum suarum comederunt. uae impio
in malum; retributio enim manuum eius fiet ei. iuxta hebraicum et
ceteros interpretes hunc sensum habet: uae illis quia sua scelera
receperunt. unde uos qui auditis, uel qui librum prophetae legitis,
laudate iustitiam dei, quia benefecerit, quia impii labores manuum
suarum comederunt. et uae impio populo in malum: recepit enim quod
merebatur. et qui principem suum romanae tradidit potestati, ipse
romanae subiacet seruituti. iuxta lxx autem interpretes qui dixerunt:
uae animae eorum, quoniam cogitauerunt, consilium pessimum contra
semetipsos, dicentes: alligemus iustum, quoniam inutilis est nobis;
itaque fructus operum suorum comedent. perspicue de christi passione
dicitur, quod inierint consilium pessimum, non tam contra iustum, quam
contra semetipsos et animam suam; et nunc fructus operum suorum
comedant. quae enim seminauerit homo, haec et metet, et unusquisque onus
suum portabit.
populum meum exactores sui spoliauerunt; et mulieres dominatae
sunt eis. pro mulieribus, quas solus interpretatus est symmachus, et
hebraice dicuntur nasim, aquila et lxx transtulerunt apaitountas~g, qui
significant exactores, theodotio daneistas~g, id est feneratores.
loquitur autem sermo propheticus contra scribas et pharisaeos, qui
turpis lucri gratia, ut acciperent decimas et primitias, dei filium
negauerunt. et non eos uocat magistros, scribas atque doctores, sed
exactores, qui quaestum putant esse pietatem; et deuorant, non (iuxta
apostolum) domos tantum uiduarum, sed uniuersum populum; accusans que
luxuriam eorum et turpem conuersationem, non solum exactores appellat,
ut ab inuitis pecuniam uideantur exigere; sed mulieres, quia propter
libidinem omnia faciant, et sint dediti uoluptatibus. caueamus ergo et
nos, ne exactores simus in populo; ne iuxta impium porphyrium matronae
et mulieres sint noster senatus, quae dominantur in ecclesiis et de
sacerdotali gradu fauor iudicat feminarum.
popule meus, qui te beatum dicunt, ipsi decipiunt te et uiam
gressuum tuorum dissipant, siue conturbant. scribas et pharisaeos
exactores appellauerat, non magistros; et supra illusores, qui propter
munera, quae excaecant oculos etiam sapientium, non solum peccatores in
populo non corripiebant, sed pro diuitiis atque compendiis efferebant
laudibus, beatos uocantes, et columnas domus dei, et cetera quae solent
adulatores dicere. ille est ergo doctor ecclesiasticus, qui lacrimas,
non risum, mouet, qui corripit peccatores, qui nullum beatum, nullum
dicit esse felicem. nec praeuenit sententiam iudicis sui, dicente
scriptura sancta: ne beatum dicas quemquam hominum ante mortem.
sed et in alio loco legimus: qui benedicit amico mane grandi uoce, a
maledicente nihil differt. unde spernentes hominum iudicia, nec laudibus
eorum extollamur nec obtrectationibus contristemur, sed ingrediamur
rectam uiam, et tritas a sanctis prophetis semitas. audiamus que
hieremiam dicentem: state in uiis et uidete; et interrogate semitas
domini sempiternas, quae sit uia bona; et ambulate in ea. quod si quando
errauerimus et quasi homines peruerso itinere perrexerimus, domini per
hiezechiel expectemus promissa dicentis: dabo eis uiam alteram et cor
aliud. exactores autem peruerterunt atque turbauerunt uiam domini, ut
habentes clauem scientiae, nec ipsi intrarent nec populum intrare
paterentur; sed facerent eos perdere uiam ueritatis, quae loquitur in
euangelio: ego sum uia, et uita, et ueritas.
stat ad iudicandum dominus; et stat ad iudicandos populos.
dominus ad iudicium ueniet cum senibus populi sui et cum principibus
eius. populus, qui propter simplicitatem imperitiam que deceptus est,
adhuc uocatur populus dei; et propterea iudicatur, ut saluetur. nec
sedet dominus in habitu iudicantis, ut in daniele legimus: throni positi
sunt et libri aperti sunt. sed stat ad iudicandum et stat ut iudicet
populos, uolens eos stare, quorum uia fuerat dissipata. contra principes
autem et presbyteros populi sui uenit ad iudicium, ut non iudicet, sed
ut pariter iudicetur, dans ei locum defensionis, si potuerint habere
quod respondeant, iuxta illud quod in quinquagesimo psalmo dicitur: ut
iustificeris in sermonibus tuis et uincas cum fueris iudicatus. in
michaea quoque propheta tale quid legimus, quod in suo loco interpretati
sumus. ergo contra pharisaeos et deuter�tas~g, praesens locus
accipitur. inter senes autem et principes hoc fuisse reor in ueteri
populo, quod nunc est inter presbyteros et episcopos.
uos enim depasti estis uineam meam; rapina pauperis in domo
uestra. quare atteritis populum meum et facies pauperum commolitis, siue
conteritis. et ut lxx interpretati sunt: confunditis. seruat
consuetudinem prophetalem, ut mutet repente personas, supra enim ipse
dominus dixerat: popule meus, qui beatum te dicunt, ipsi decipiunt te;
et postea propheta subiecerat: stat ad iudicandum dominus; dominus ad
iudicium ueniet. igitur post prophetam ipse dominus, qui ad iudicium
uenerat cum senibus populi sui et principibus eius, loquitur ad eos, et
corripit delinquentes: quare depascitis uineam meam? de qua scriptum
est: uineam de aegypto transtulisti. et in hoc eodem propheta: uinea
domini sabaoth domus est israel. hanc uineam et in euangelio locauit
dominus agricolis pessimis, qui missum ad se patrisfamilias filium
interfecerunt. rapina, ait, pauperis in domibus uestris. pauperem uel
simpliciter accipe, qui indiget eleemosynam; uel certe pauperem spiritu,
de quo scriptum est: beatus qui intellegit super egenum et pauperem. et
paulus apostolus: tantum, inquit, ut pauperum memores essemus. quod que
sequitur: quare atteritis populum meum et facies pauperum commolitis,
siue confunditis, manifeste ad principes dicitur iudaeorum. sed et ad
nostros principes referri potest, si atterant subiectam sibi plebem et
pauperes delinquentes publice arguant atque confundant, diuitibus autem
peiora peccantibus ne mu quidem facere audeant. et rapina pauperum in
domibus eorum est, quando replent thesauros suos et ecclesiae opibus
abutuntur in delicias, publicas que stipes, quae ad sustentationem
pauperum datae sunt, uel sibi reseruant, uel propinquis distribuunt et
alienam inopiam suas suorum que faciunt esse diuitias.
et dixit dominus: pro eo quod eleuatae sunt filiae sion, et
ambulauerunt extento collo et nutibus oculorum ibant et plaudebant, et
ambulabant, et pedibus suis composito gradu incedebant. supra populum et
principes tam propheta quam dominus corripuerant; nunc ad mulieres de
quibus prius dixerat: et mulieres dominatae sunt eis, propheticus sermo
conuertitur, ne se alienas arbitrentur a crimine, ob quarum delicias
atque luxuriam depasti sunt exactores uineam domini; et rapina pauperis
in domibus eorum est, et attriuerunt populum eius et facies pauperum
confuderunt. quas quidam putant uere feminas iudaeorum, alii metaphorice
de urbibus iudaeae dici arbitrantur, quae appellantur filiae sion,
minores uidelicet ciuitates, uici et oppida. unde et in libro iesu per
singulas tribus ponuntur nomina ciuitatum, et postea describuntur uillae
atque castella, et filiae nuncupantur. alii secundum tropologiam,
mulieres animas arbitrantur, quae si extento collo ambulauerint, et se
erexerint in superbiam, et non uirilem duritiam, sed dissolutionem
sectatae fuerint feminarum, corripiantur a sermone prophetico et omnia
perdant ornamenta uirtutum, quae sub lunulis torquibus que et monilibus
atque armillis, mitris et discriminalibus et ceteris huiusmodi,
describuntur. abutendum est hoc testimonio et aduersum ecclesiae
feminas, quae ambulant collo extento, et nutibus loquuntur oculorum, et
plaudunt tam manibus quam pedibus, et ut composito incedant gradu, non
naturam sequuntur ducem, sed histriones redimunt praeceptores.
decaluabit dominus uerticem filiarum sion et crinem earum
nudabit, et pro ornatu erit ignominia. hoc et nobis accidet quorum
peccata celantur, cum impletum fuerit illud quod scriptum est: nihil
occultum quod non reuelabitur. quamdiu enim protegimur crine et ueste
ignorantiae, et homines nos putant sepulcra dealbata, qui intus sumus
pleni ossibus mortuorum, uidemur aliquid habere munditiae. cum autem
patuerit quod occultum est, auferetur uniuersa caesaries, et foeda
caluities omnibus apparebit.
in die illa auferet dominus ornamentum calceamentorum. in qua
die? iudaei putant captiuitatis babyloniae. nos uerius esse conuincimus,
quando a romanis capti sunt, et omnia uestium atque gemmarum auri que
ac monilium ornamenta et diuersas supellectiles perdiderunt. siue per
metaphoram mulierum, omnis ornatus urbium destructus esse narratur.
ornamenta urbium in plateis et porticibus, foro atque gymnasiis et
moenibus publicis intellege. quae si referamus ad animarum statum,
calceatos pedes eius, qui carnes agni comesturus est, et celebraturus
pascha, legisse nos recordemur, et per solitudinem transeuntium, nec
uestimenta nec calceamenta consumpta. quae sunt ista calceamenta? illa
de quibus apostolus scribit ad ephesios: calceati pedes in
praeparationem euangelii pacis. quae calceamenta animae perditurae sunt,
quando extento collo ambulauerint et pedibus traxerint uestimenta, ut
pro munditia matronali terrae uerrant spurcitiam.
et lunulas, et torques, et monilia, et armillas, et mitras, et
discriminalia, et periscelidas, et murenulas, et olfactoriola, et
inaures, et annulos et gemmas in fronte pendentes. describit monilia
feminarum, et per haec insignia ciuitatum, uel iuxta anagogen uariarum
ornamenta uirtutum. habent mulieres in lunae similitudinem bullulas
dependentes, quas nos ad ecclesiae ornamenta transferimus, quae
illuminatur sole iustitiae. torques quoque, quae ad pectus usque
pendentes, intellegentiam ac principale mentis in corde demonstrant. et
monilia, quae uno sermone omnia ornamenta significant; et armillarum
bona opera, quales rebecca accepit in sponsalibus; et mitras, capitis
ornamenta et discriminalia, ut iudicium habeat singulorum; et
periscelidas, quibus noster gressus ornatur, ut audiamus: pes tuus non
offendet; et: eruet pedes meos a lapsu; et murenulas, quae auri atque
argenti texuntur uirgulis, sensu uidelicet et sermonibus scripturarum;
et olfactoriola, ut christi bonus odor simus; et inaures, ne audiamus
iudicium sanguinis, sed domini uerba dicentis: qui habet aures audiendi
audiat; et annulos, quibus signamur ad domini militiam, quem deus
signauit pater. unde dicitur ad principem tyri: tu es signaculum
similitudinis. filius quoque prodigus cum stola recepit annulum et
calceamenta et gemmas in fronte pendentes, quibus nostra ora decorantur.
de cuius capitis ornamento et in psalmo legimus: sicut unguentum in
capite, quod descendit in barbam, barbam aaron. quae omnia licet lxx
interpretes, aquila quoque et symmachus ac theodotio diuersis modis
interpretentur, nos ut potuimus uel de hebraeo, uel de ipsorum
translatione texuimus, nec uolumus diutius in singulis immorari, ne
friuola sit expositio et prudenti lectori fastidium faciat.
et mutatoria, et pallia, et linteamina. pro linteamina, lxx
perspicua laconica interpretati sunt; uolentes tenuissimas significare
uestes, quibus lacedaemoniorum, qui fuerunt ad bella promptissimi et
austerioris uitae, corpora tegebantur, quamquam laconica nec hebraicum
habeat nec ullus alius interpretum. mutatoria autem et pallia, quae
significantius symmachus transtulit anabolaia~g, ornamenta sunt uestium
muliebrium, quibus humeri et pectora proteguntur. mutatoria iuxta
anagogen illa sunt, de quibus dicitur: ibunt de uirtute in uirtutem; et
linteamina, ut loti in domino deliciis perfruamur, secundum illud, quo
in psalmis scriptum est: torrente uoluptatis tuae potabis eos. haec
autem omnia perdiderunt filiae sion, quia ambulauerunt extento collo et
oculorum nutibus superbiam gestauerunt putantes suae esse potentiae quod
habebant, et non domini gratiae.
et acus, et specula, et sindones, et uittas, et theristra. habent
acus mulieres, quibus ornatorum crinium compago retinetur, ne laxius
fluant et in sparsos dissipentur capillos. habent et specula, quibus
considerant uultum suum et si quid deesse uiderint, addunt ornatui.
habent sindones, quae uocantur amictoria; et uittas, quibus crines
ligantur, quas appellant tainias~g. habent et theristra, quae nos
appellare possumus pallia, quo obuoluta est et rebecca. et hodieque
arabiae et mesopotamiae operiuntur feminae; quae hebraice dicuntur
ardidim, graece theristra~g, ab eo quod in therei~g, hoc est in aestate
et caumate corpora protegant feminarum. filiae ergo sion propter
superbiam suam perdiderunt acus, quibus omnium praeceptorum regula
stringebatur. perdiderunt specula, quae obtulerunt in exodo manentes in
foribus tabernaculi mulieres ad luterem domini fabricandum. de quibus et
paulus apostolus loquebatur: uidemus autem nunc per speculum in
aenigmate. amiserunt sindones et uittas, quibus operiebant humeros, et
fluentem huc atque illuc animum constringebant; et theristra, quo
tutissimo in aestibus tegebantur umbraculo. haec dicimus ne omnino
tropologiam huius loci fugere uideamur. ceterum laboris est maximi in
singulis immorari et latam explanationem quaerere.
et erit pro suaui odore, fetor; et pro zona, funiculus. fetere
peccata paenitens loquitur: putruerunt et corruptae sunt cicatrices meae
a facie insipientiae meae. zona accingi lumbos, apostolus praecepit,
dicens: state accincti lumbos uestros in ueritate. et de peccatore
legimus: funibus peccatorum suorum unusquisque constringitur.
igitur pro bono odore uirtutum, filiae sion habebunt putredinem
peccatorum; et pro cingulo ueritatis, mendacii funiculis ligabuntur,
quos habuerunt super capita qui cum pannis et sordibus uitam regi syriae
precabantur. et pro fascia pectorali cilicium. pro fascia pectorali,
quam interpretatus est symmachus, lxx tunicam mesoporphuran~g, id est
clauatam purpura transtulerunt, quod aquila cingulum exultationis
expressit. theodotio ipsum uerbum hebraicum phthigil posuit, quod genus
ornamenti muliebris est. fascia pectus tegit, et eum possidet locum in
feminis quem rationale in pontificibus. de hac fascia pectorali et
hieremias mystico sermone dicebat: si obliuisci potest sponsa ornatus
sui, aut uirgo fasciae pectoralis suae, et ego obliuiscar tui, dicit
dominus. uirgo, qualem exhibere nos cupit apostolus christo, quamdiu non
corrumpitur in aegypto, nec franguntur mamillae eius, quae pectorali
fascia colligatae sunt, iungitur sponso; et cum cotidie uirtutum filios
generet, nequaquam uirgo esse desistit. quod si aliquando diuaricauerit
pedes omni transeunti et secuta fuerit amatores suos; et iuxta osee
uaticinium, sepserit dominus uias eius et intercluserit semitas,
reuertetur ad uirum suum priorem, et audiet: exuere uestimentis luctus,
et induere uestibus gloriae tuae.
pulcherrimi quoque uiri tui gladio cadent; et fortes tui in
proelio. pro pulcherrimis uiris, lxx interpretati sunt: et filius tuus
pulcherrimus, quem diligis, gladio cadet. quod si de animae statu
intellegimus, quae post uirtutes peccauerit, pulcherrimum filium eius,
bona accipiamus opera, quae hostili gladio conciderunt; et fortes quoque
periisse in proelio, quia iustitia iusti non liberabit eum in quacumque
die aberrauerit. sin autem sequamur historiam, ex his sermonibus
docebimur, non de mulieribus prophetae esse sermonem, quarum uiri in
proelio corruerunt; sed de urbibus iudaeae, quas filias sion appellauit
et quarum bellatores ceciderunt in certamine. denique de eadem sion
sequens uersiculus loquitur.
et maerebunt atque lugebunt portae eius, et ipsa urbs desolata
sedebit in terra. quod usque hodie oculis cernimus. facilis secundum
tropologiam interpretatio est, quod quicumque locum dederit diabolo, et
non omni custodia seruauerit cor suum, lugeant portae eius; et absente
sponso, semper in luctu sit, ac de excelsis corruens, in terrae puluere
sedeat.
et apprehendent septem mulieres uirum unum in die illa, dicentes:
panem nostrum comedemus, et uestimentis nostris operiemur, tantummodo
inuocetur nomen tuum super nos; aufer opprobrium nostrum. cum
pulcherrimi urbis hierusalem gladio ceciderint et fortes perierint in
proelio; et maeruerint luxerint que portae eius; et ipsa fuerit desolata
ob nimiam hominum raritatem, interfectis bellatoribus, septem mulieres
apprehendent unum uirum, cupientes habere semen in sion et domesticos in
hierusalem. cibum et uestimentum se habere dicentes; tantum ne absque
marito esse uideantur et subiacere illi maledicto, quod scriptum est:
maledicta sterilis et quae non facit semen in israel. zacharias quoque
huic congruit sensui: in diebus illis apprehendent decem homines ex
omnibus linguis gentium fimbriam uiri iudaei dicentes: ibimus uobis cum
audiuimus enim quoniam deus uobis cum est. septenarius et denarius
numerus propter sabbatum et decem praecepta legis, iudaeis familiaris
est; et ideo hoc frequenter abutuntur, licet iuxta hebraei sermonis
ambiguitatem, qui uerbum saba, nunc septem, nunc plures, nunc iuramentum
interpretantur, possit in hoc loco non septem significare, sed plures.
hoc secundum litteram. ceterum in aduentu domini saluatoris, septem
mulieres, id est, septem gratiae spiritus sancti, de quibus in
consequentibus idem propheta dicturus est: exiet uirga de radice iesse
et flos de radice conscendet; et requiescet super eum spiritus domini,
spiritus sapientiae et intellectus, spiritus consilii et fortitudinis,
spiritus scientiae et pietatis; et implebit eum spiritus timoris domini;
apprehendent iesum, quem multo tempore desiderauerant, quia nullum
alium potuerant inuenire, in quo aeterna statione requiescerent. unde et
ioannes baptista refert in euangelio: et qui misit me, ipse mihi dixit:
super quem uideris spiritum sanctum descendentem et manentem in eo,
ipse est. in zacharia quoque legimus super lapidem unum septem oculos,
et in uno aureo candelabro septem lucernas et septem suffusoria, ac duas
oliuas ex utraque parte lampadis, firma radice fundatas. quod autem
gratia sancti spiritus cuncta possideat. expositione non indiget. sed
quia in hominibus semper patiebatur opprobrium, nullo uiuente ut
spiritus sancti dona poscebant; propterea iesu nomen sibi cupiunt
inuocari, ut quod in lege imperfectum erat, in euangelio compleatur.
in die illa erit germen domini in magnificentia et in gloria; et
fructus terrae sublimis et exsultatio his qui saluati fuerint de israel.
et erit: omnis qui relictus fuerit in sion, et residuus in hierusalem,
sanctus uocabitur, omnis qui scriptus est in uita in hierusalem.
cum filiae sion propter superbiam omnem ornatum perdiderint; et
maeruerint luxerint que portae eius et ipsa desolata conciderit, omnes
que bellatores eius perierint in proelio, in tantum ut multae mulieres
unum uirum habere uix possint. tunc orietur germen nominis christiani et
terra dabit fructum suum; et exsultatio erit his qui de israel saluati
fuerint, de quibus et supra dictum est: nisi dominus sabaoth reliquisset
nobis semen, quasi sodoma essemus, et similes gomorrae fuissemus. et
nota quod non omnis israel saluetur, sed reliquiae populi sion et
residuus in hierusalem; omnis qui scriptus est in uita in hierusalem,
quibus et dominus loquebatur: gaudete, quoniam nomina uestra scripta
sunt in caelis. significat autem apostolos et eos qui per apostolos
crediderunt. cum abluerit dominus sordes filiarum sion et sanguinem
hierusalem lauerit de medio eius in spiritu iudicii et spiritu
combustionis. tunc saluabuntur reliquiae de israel, quando in baptismate
saluatoris eis fuerint peccata dimissa et ille sanguis ablutus, quem
super se errans populus imprecatus est: sanguis eius super nos et super
filios nostros. unde supra legimus: cum extenderitis manus, non exaudiam
uos; manus enim uestrae sanguine plenae sunt. et postea eos ad
paenitentiam prouocans infert: lauamini, mundi estote. et nota quod
sordes filiarum sion lauerit spiritu iudicii, sanguinem autem hierusalem
spiritu combustionis. quod enim leue est, lauatur; quod grauius,
exuritur. de quo iudicii spiritu et spiritu combustionis ioannes
baptista in euangelio loquebatur: ego uos baptizo in aqua; qui autem
post me uenit, ipse uos baptizabit in spiritu sancto et igni. ex quo
discimus, quod homo tantum aquam tribuat; deus autem spiritum sanctum, a
quo et sordes abluuntur et sanguinis peccata purgantur.
et creabit dominus super omnem locum montis sion et ubi inuocatus
est, nubem per diem et fumum et splendorem ignis flammantis per noctem.
in christo enim noua creatura est, de qua alibi legimus: uetera
transierunt: ecce facta sunt omnia noua. pro quo lxx transtulerunt: et
ueniet, et erit omnis locus montis sion, et omnia quae in circuitu eius
sunt, proteget nubes per diem, et lumen ignis flammantis in nocte. quis
autem ueniet nisi ille, de quo scriptum est: ueniet ex sion qui liberet.
et de quo alius propheta commemorat: adhuc paululum modicum, qui
uenturus est ueniet et non tardabit. cum ille uenerit, reddetur populo
felicitas pristina, quam aliquando habuere in eremo; praecedente eos
domino per diem in columna nubis et per noctem in columna ignis, ut nec
in prosperis nec in aduersis aliquando turbentur. quod et in psalmo
dicitur: per diem sol non uret te, neque luna per noctem. fumus autem in
hoc loco non errorem et ignorantiam, sed gloriam significat, iuxta
illud quod in hoc eodem propheta, secundum quorumdam opinionem, lecturi
sumus: et domus impleta est fumo. et in ioel de gratia spiritus sancti,
quae descendit super apostolos, dicitur: effundam de spiritu meo, et
prophetabunt. et: dabo prodigia in caelo sursum et signa in terra
deorsum, sanguinem et ignem et uaporem fumi. id ipsum significare puto
et illud in psalmis: qui tangit montes, et fumigabunt.
super omnem autem gloriam protectio. et tabernaculum erit in
umbraculum diei, ab aestu et in securitatem et in absconsionem a turbine
et a pluuia. hunc locum iudaei ad antichristum referunt, quem per
turbinem et tempestatem significari aestimant, quando eos dominus a
potentissimo aduersario defensurus sit. nos autem omnia referamus ad
primum aduentum christi, de quo et in psalmis legimus: protexit me in
abscondito tabernaculi sui: in petra exaltauit me; super quam fundata
ecclesia nulla tempestate concutitur, nullo turbine uentis que
subuertitur. plurimi iudaeorum et haec et uniuersa, quibus ista sociata
sunt, super babylonia captiuitate et reditu in hierusalem sub zorobabel
et ezra et neemia intellegunt.
5. cantabo nunc dilecto meo canticum patruelis mei, uineae suae.
cantat propheta carmen lamentabile populo israel, quod composuit ille,
de quo scriptum est in euangelio: cum autem uidisset eam, haud dubium
quin hierusalem, fleuit super eam, et dixit: si scires et tu quae ad
pacem sunt tibi, quoniam uenient dies super te et circumdabunt tibi
inimici tui munitiones et uallabunt te, et prosternent te, et filios
tuos.
et rursum: quotiens uolui congregare filios tuos, sicut gallina
congregat pullos suos sub alas suas, et noluisti? ecce dimittetur uobis
domus uestra deserta, cui simile est hoc quod nunc in isto carmine
dicitur: dimittam uineam meam. quod autem christum dicatur dilectus
atque carissimus, quem aquila patradelphon~g interpretatus est, patruum
uel patruelem, quadragesimi quarti psalmi nos inscriptio docet: canticum
pro dilecto. et uox dei patris in euangelio: hic est filius meus
dilectus, in quo mihi complacui. et in sexagesimo septimo psalmo
legimus: dominus dabit uerbum euangelizantibus uirtute multa. rex
uirtutum dilecti. hic ergo dilectus carmen lugubre fecit uineae suae,
quod ego cantabo dilecto atque miserabili populo meo. uel certe ita
intellegendum: cantabo omnipotenti deo patri canticum christi, qui est
patruelis meus, hoc est: ex eadem me cum gente generatus. quod autem
uinea dei appelletur populus israel et in fine huius cantici legimus:
uinea domini exercituum, domus est israel et uir iuda germen laudabile
eius. et in septuagesimo nono psalmo: uineam de aegypto transtulisti,
eiecisti gentes et plantasti eam. in euangelio quoque paene eisdem
uerbis, quibus propheta nunc loquitur, dominus texit parabolam: homo
quidam erat paterfamilias, qui plantauit uineam et maceriam illi
circumdedit; et fodit in ea torcular, et aedificauit turrim et locauit
eam agricolis, et cetera. et in hieremia legimus: ego plantaui te uineam
fructiferam, totam ueram; quomodo conuersa es in amaritudinem, uinea
aliena? itaque hierusalem, ut diximus, plangitur; et sermone prophetico
illius ruina cantatur. porro ecclesiae et populo quondam gentium, aliud
carmen est editum, de quo in psalmis legimus: cantate domino, omnis
terra, annuntiate diem ex die salutare eius. annuntiate in gentibus
gloriam illius in omnibus populis mirabilia eius. et rursum: cantate
domino canticum nouum, quia mirabilia fecit. ostendit dominus salutare
suum, in conspectu gentium reuelauit iustitiam suam.
uinea facta est dilecto meo in cornu filio olei. hoc iuxta
hebraicum theodotio et aquila transtulerunt; symmachus autem more suo
manifestius: uinea facta est dilecto meo in cornu in medio oliuarum.
porro lxx sensum magis quam uerbum interpretati sunt: uinea facta est
dilecto meo in cornu, in loco pingui, siue uberi, pi�n~g enim utrumque
significat. et reuera nihil terra repromissionis pinguius, si non
montana quaeque atque deserta, sed omnem illius latitudinem consideres, a
riuo aegypti usque ad flumen magnum euphratem contra orientem; et ad
septentrionalem plagam usque ad taurum montem et zephyrium ciliciae,
quod mari imminet. cornu autem regnum significare et potentiam saepe
legimus, ut est illud in euangelio: suscitauit cornu salutis nostrae in
domo dauid pueri sui. et: in te inimicos nostros cornu uentilabimus. et
in zacharia quattuor cornua quattuor potentissima regna demonstrant.
hebraei hunc locum ita disserunt: uinea christo plantata est in cornu,
id est, in forti loco atque sublimi, qui appellatur filius olei, uel
quod indigeat dei misericordia et eius sustentetur auxilio, uel quod
cunctis gentibus clarum dei notitiae lumen praebuerit.
et sepsit eam et lapides elegit ex illa, et plantauit uineam
sorec, et aedificauit turrim in medio eius, et torcular exstruxit in ea.
per metaphoram, ut prius diximus, uineae describit populum iudaeorum,
quem sepsit angelorum auxilio. et lapides elegit ex eo, uel idola uel
omnia quae dei cultum poterant impedire. et plantauit eam uineam sorec,
quam solus symmachus electam interpretatus est, non uerbum e uerbo, ut
mihi uidetur, exprimens, sed sensum qui tenetur in uerbo. aiunt enim
hebraei sorec genus esse uitis optimae, quod ubere fructus faciat atque
perpetuos.
denique sorec a quibusdam kallikarpos~g interpretatur, quod nos in
pulcherrimos fructus uertere possumus. aedificauit quoque turrim in
medio eius, templum uidelicet in media ciuitate; et torcular exstruxit
in ea, quod quidam altare significari putant. sicut enim ad torcular,
omnes uuae comportantur atque calcantur, ut ex eis exprimatur uinum, sic
altare omnis populi suscipit fructus et immolatas hostias deuorat;
iuxta illud quod de beniamin, in cuius tribu templum fuit et altare,
legimus: beniamin lupus rapax, mane comedet et ad uesperam dabit escam.
cuncta quae dicuntur de uinea, possunt et ad animae humanae referri
statum, quae a deo plantata in bonum, non uuas attulerit, sed labruscas;
et postea sit tradita bestiis conculcanda, nec diuinum imbrem
susceperit doctrinarum, quia praeterita dona contempserit.
et exspectaui, ut faceret uuas et fecit labruscas. pro labruscis,
quas nos uertimus, in hebraeo scriptum est busim, quod aquila
interpretatus est saprias~g, id est fructus pessimos. symmachus atel�~g,
hoc est imperfectos. lxx et theodotio spinas, quibus iudaei dominum
coronauerunt. illo enim exspectante, ut uindemiae tempore deferrent uuas
ad torcularia, pro quibus octauus et octogesimus tertius psalmus habent
titulos, isti se curis et uitiis saeculi demergentes, quae in euangelio
spinae interpretantur, blasphemiarum stimulos obtulerunt. puto autem
melius esse busim labruscas, quam spinas intellegi, ut coeptae
translationis similitudo seruetur. unde et saluator dicit in euangelio:
numquid colligunt de spinis uuas, aut de tribulis ficus.
nunc ergo habitatores hierusalem et uiri iuda. iudicate inter me
et uineam meam; quid est quod ultra debui facere uineae meae et non
fecerim ei? an quod exspectaui ut faceret uuas, et fecit labruscas?
feci, inquit, uniuersa quae debui, plantaui uineam in loco uberrimo,
circumdedi maceriam, elegi lapides et flagella eius hastilibus calamis
que subrexi; uitis quoque ipsa non fuit una de pluribus, sed electa et
kallikarpos~g. aedificaui firmissimam turrim, in qua fruges reconderem,
et de qua insidiantes frugibus bestias contemplarer. exstruxi torcular,
ut in eodem potissimum loco premerentur uuae et uinum funderent. quia
haec igitur feci, quae facere debui, respondeant mihi habitatores
hierusalem et iudae; immo iudicent inter me et uineam meam: quid est
quod facere debui et non fecerim? et illis tacentibus, sibi ipse
respondet: nisi forte in hoc erraui, quod pro labore meo exspectaui, ut
uuas faceret, non labruscas, quas inculta ac deserta uinea afferre
consueuit. tale quid et nathan propheta ad dauid missus loquitur, et
interrogat eum per parabolam, ut dum de alio iudicat, de se promat
sententiam. ergo et hic populus interrogatur quasi de uinea, ut contra
se ipse respondeat. hunc locum in euangelio plenius saluator exsequitur,
et quod hic praetermissum est, scribas et pharisaeos interrogat. in
esaia enim nihil dictum est de agricolis, nec quae passuri sint
indicatur; sed tantum de uinea sermo est; ibi autem quasi alia sit uinea
et alii agricolae, sic de populo loquitur et magistris, ut malos male
perdat et uineam aliis agricolis locet, significans apostolos et eos qui
apostolis successuri sunt. nec uero tautologia~g est, ut plerique
aestimant in eo quod ait: an quod exspectaui, ut faceret uuas et fecit
labruscas? supra enim apud se tacitus loquitur, hic autem quod
cogitauerat, alios interrogat.
et nunc ostendam uobis quid ego faciam uineae meae: auferam sepem
eius, et erit in direptionem; diruam maceriam eius, et erit in
conculcationem. et ponam eam desertam; non putabitur et non fodietur; et
ascendent super eam uepres et spinae. prouocaui, inquit, uos supra, o
habitatores hierusalem et uiri tribus iudae, ut iudicaretis inter me et
uineam meam, et interrogaui, ut diceretis quid debuerim facere quod non
fecerim. et quia iuxta euangelicam parabolam non uultis respondere quod
sciscitor, ego mihi respondebo ipse pro uobis, indicans quid facturus
sim: quoniam feci uineae meae cuncta quae debui et pro uuis attulit
labruscas, auferam uniuersa quae dederam. tollam angelorum auxilia, de
quibus in psalmis scriptum est: circumdat angelus domini in circuitu
timentium eum et liberabit eos; et diripietur ab aduersariis.
destruam muros et inimicis gentibus subiacebit, erit que deserta et non
putabitur in aeternum, nec fodietur, ut redigatur in uepres; et
ascendent in ea spinae. haec autem sub metaphora uineae, de hierusalem
atque iudaeae dicuntur solitudine, quod plerique iudaeorum putant sub
babyloniis accidisse; quod et nos ex parte factum negare non possumus.
sed quia sequitur:
et nubibus mandabo, ne pluant super eam imbrem, hoc in illa
captiuitate intellegi non potest. siquidem et hieremias capta iam urbe
prophetauit in populo; et hiezechiel, daniel quoque et tres pueri uel
prophetasse uel mirabilia signa etiam in captiuitate fecisse narrantur.
et postea aggaeus et zacharias futura dixerunt in consolationem populi
seruientis. tollitur autem dei auxilium ab his qui indigni sunt; ut quia
senserant deum per beneficia, sentiant per supplicia. uel ideo
truculenta quaedam et aspera comminatur, ut conuersi ad paenitentiam,
imminentia tormenta deuitent. uerbum hebraicum saith omnes uoce simili
spinas interpretati sunt. si ergo saith in praesenti loco spinae
dicuntur iuxta aquilam et theodotionem et lxx, respondeant quomodo supra
busim non labruscas, sed spinas transtulerunt. et nubibus mandabo ne
pluant super eam imbrem. istae sunt nubes quas eduxit dominus ab extremo
terrae, de quibus et in psalmo legimus: ueritas tua usque ad nubes. hae
nubes, quoniam sub elia omnes idololatrae erant, tribus annis et sex
mensibus super terram israel non pluerunt. quod quidem non solum de
prophetis, sed de apostolis possumus intellegere, quod post passionem
domini nec prophetas nec apostolos habuerunt iudaei, ne pro uuis
afferrent spinas, sed pro sterilitate et ariditate sua precarentur eum,
qui potest imbres praebere uirtutum. unde et in leuitico loquitur ad
eos: ponam caelum uobis ferreum et terram aeneam. et in deuteronomio:
erit caelum super caput tuum aeneum et terra subter te ferrea. et
rursum: dabit dominus pluuiam terrae tuae. et: cinis de caelo descendet
super te, donec eradicet te et deleat. quia terra quae frequenter super
se uenientem suscipit pluuiam et non facit segetem, sed spinas et
tribulos, reproba est et maledictionis proxima, cuius finis combustio
est.
uinea autem domini exercituum domus israel est; et uiri iuda
germen delectabile eius, id est dei, siue ut lxx transtulerunt: nouella
plantatio dilectissima. israel et iudas hoc inter se differunt, quod
omnis populus prius appellabatur israel et postea, regnante dauid super
tribum iuda, et roboam filio salomonis super duas tribus, iudam et
beniamin, hi qui erant in samaria, hoc est, decem tribus, uocabantur
israel; et quibus regnabant de genere dauid, appellabantur iuda. et
quoniam ab israel uituli colebantur in dan, et in bethel, propterea ab
assyriis primum est capta samaria; et multo post tempore iudas a
chaldaeis ductus est in babylonem, quia minora peccauerant. unde et in
hiezechiele ad utriusque populi peccata purganda, israel in sinistro
latere ponuntur, iuxta septuaginta, dies centum nonaginta, siue ut
uerius in hebraico continetur, trecenti nonaginta; iudae autem
quadraginta dies. hoc dico, ut comparatione israel, id est, decem
tribuum, amabilem atque dilectum ostendam iudam, in quo erant sacerdotes
et leuitae et dei religio uersabatur eo tempore, quo propheta esaias
loquebatur ad populum. et pulchre israel, hoc est totus populus, domus
est. iudas autem, qui separatis tribubus postea pullulauit, nouellum
dicitur delectabile. sed et hoc notandum, quod iuxta consuetudinem
prophetalem, quae prius per metaphoram dicta sunt uel per parabolam,
postea exponuntur manifestius, quod uinea et nouella plantatio israel et
iudas sit.
et exspectaui ut faceret iudicium et ecce iniquitas; et iustitiam
et ecce clamor. siue ut lxx transtulerunt: exspectaui ut faceret
iudicium, et fecit iniquitatem, et non iustitiam, sed clamorem. uolumus
latinis insinuare auribus quod ab hebraeis didicimus: iudicium, apud eos
appellatur mesphat; iniquitas siue dissipatio, ut interpretatus est
aquila, mesphaa. rursum iustitia dicitur sadaca; clamor autem appellatur
saaca.
una itaque uel addita littera uel mutata, sic uerborum similitudinem
temperauit, ut pro mesphat diceret mesphaa; et pro sadaca poneret saaca,
et elegantem structuram sonum que uerborum, iuxta hebraeam linguam
redderet. exspectauit autem deus, ut populus iudaeorum faceret iudicium,
id est uuas; et fecit iniquitatem, id est labruscas; et exspectauit
iustitiam, ut largitorem tantorum munerum a patre missum susciperet, et
fecit clamorem, quo uociferatus est contra dominum, et clamauit, dicens:
tolle, tolle, crucifige talem. unde et paulus apostolus scribit: omnis
ira et clamor et blasphemia auferatur a uobis cum omni malitia. uel
certe quoniam iusti sanguinem fuderant, sanguis dominicae passionis
clamabat ad dominum, propterea clamorem pro iustitia reddiderunt, iuxta
illud quod in genesi legimus: uox sanguinis abel fratris tui clamat ad
me.
uae qui coniungitis domum ad domum et agrum agro copulatis usque
ad terminum loci. numquid habitabitis soli uos super terram? pro eo quod
nos diximus usque ad terminum loci, lxx transtulerunt: aut auferatis
proximo. symmachus et theodotio: donec deficiat, uel non sit locus; ut
deficiente terra, nequaquam saturetur auaritia. quod quidem et
generaliter aduersum omnes, quibus nihil satis est, dictum puto; et
specialiter contra uineam domini, quae pro uuis fecit labruscas, id est:
pro iudicio iniquitatem et pro iustitia clamorem. quae est enim rabies,
cum tecta et agri ad depellendos imbres et ad serendas fruges haberi
debeant, ea habere cupere, in quibus cunctis habitare non possis, et
quae colere non sufficias; alterius que necessitatem tuam facere
uoluptatem? iuxta tropologiam contra haereticos quidam hoc dictum
arbitrantur, qui cum mouerent pedes suos de oriente, ueniunt in campum
sennaar, qui interpretatur excussio dentium; et aedificant ciuitatem
confusionis turrim que superbiae, et audiunt sub uerbis aliis: audite
haec, duces domus iacob, et residui domus israel, qui abominamini
iudicium, et omnia recta peruertitis, qui aedificatis sion in
sanguinibus et hierusalem in iniquitate. isti domos domibus, id est,
dogmata coniungunt dogmatibus; quibus dicitur per michaeam: nolite
aedificare in domo derisum, ne supra fundamentum christi, quod apostolus
paulus posuit et in quo debuerant aedificare aurum, argentum, lapides
pretiosos; e contrario aedificent ligna, fenum, stipulam, quorum finis
incendium est. de huiuscemodi domibus saluator in euangelio loquitur:
omnis qui audierit uerba mea et non fecerit ea, assimilabitur uiro
stulto, qui aedificauit domum suam super arenam. descendit pluuia,
uenerunt flumina, flauerunt uenti et impegerunt in domum illam, et
cecidit; et fuit ruina domus illius magna. tamdiu autem quaerunt
haeretici noua ueteribus iungere et eadem recentioribus immutare, donec
et sensus humanus et sermo deficiat.
in auribus meis sunt haec domini exercituum: nisi domus multae
desertae fuerint, grandes et pulchrae absque habitatore. pro eo quod nos
iuxta hebraicum uertimus: in auribus meis sunt haec domini exercituum,
id est: uerba quae locutus est dominus adhuc resonant in auribus meis;
lxx transtulerunt: audita sunt haec in auribus domini sabaoth. non quod
propheta uerba domini audierit, sed in auribus domini audita sint quae
propheta dicturus est; cum consequentius sit intellegere audisse
prophetam quae dominus sit locutus. dominus autem locutus est quod post
captiuitatem domus magnae atque pulcherrimae desertae futurae sint, non
habentes habitatorem.
decem enim iugera uinearum facient lagunculam unam et triginta
modii sementis facient modios tres. pro laguncula, quam soli lxx
transtulerunt, omnes alii batum interpretati sunt, quod hebraice dicitur
beth. et pro triginta modiis, quos nos pro coro posuimus, qui hebraice
dicitur omer, lxx uerterunt: artabas sex, quae mensura aegyptiaca est et
facit modios uiginti. in sterilitate ergo nimia quae sequitur
captiuitatem, decem iugera uinearum facient batum, id est tres amphoras;
et triginta modii seminis, id est, corus, faciet ephi, quod lxx tres
mensuras interpretati sunt, id est tres modios. batus autem in liquidis
speciebus dicitur, et ephi siue epha eiusdem mensurae in aridis. sicut
in hiezechiel iuxta hebraicum legimus: ephi iustum et batus iustus erit
uobis. ephi et batus aequalia et unius mensurae erunt, ut capiat decimam
partem cori batus et decimam partem cori ephi; iuxta mensuram cori erit
aequa libratio eorum. quaerimus iuxta anagogen, quomodo haereticorum
domus grandes et pulchrae sint, quae cum iudicii tempus aduenerit,
nullum habitatorem habeant. omnis enim pompa structura que uerborum et
argumenta dialectica redigentur ad nihili. et quia iuxta apostolum
paulum non solum dei aedificatio sumus, sed et agricultura, quam
imitantes haeretici suffodiuntur et eradicantur ab hieremia. idcirco ubi
decem iugera uinearum, siue ubi decem iuga boum operantur, facient
batum unum et triginta modii sementis facient ephi, ut de denario
numero, qui in scripturis sanctis mysticus atque perfectus est; et de
tricenario, in quo prophetauit hiezechiel et dominus baptizatus est,
redigantur ad ephi, qui ad comparationem multiplicis numeri, unione
constringitur. quod autem aedificatio et agricultura referatur ad
intellegentiam spiritalem, etiam alio loco paulus apostolus docet,
fundatos et radicatos in caritate credentes esse contestans.
unde et ecclesiastes: non solum sibi aedificauit domos, sed plantauit
uineas, et fecit hortos et pomaria, et instituit omnes arbores
pomiferas, exstruxit que piscinas, ut irrigaret saltum. porro haeretici
imaginem tantum habentes umbram que uirtutum, et non ipsam ueritatem,
absque fructu operum, uerborum folia pollicentur. de quorum arboribus
dicit dominus: omnis plantatio, quam non plantauit pater meus caelestis,
eradicabitur. de uinea enim sodomorum uinea eorum, et propago eorum de
gomorra: uua eorum, uua fellis, et botrus amaritudinis eis, furor
draconum uinum eorum, et furor aspidum insanabilis.
uae qui consurgitis mane ad ebrietatem sectandam et potandum
usque ad uesperam, ut uino aestuetis. cithara et lyra, tympanum et
tibia, uinum in conuiuiis uestris; et opus domini non respicitis, nec
opera manuum eius consideratis. pro ebrietate, quam aquila est
interpretatus et symmachus, lxx ipsum hebraicum posuerunt siceram quod
omnem significat potionem, quae inebriare potest et statum mentis
euertere. arguit autem iuxta consequentiam coeptae explanationis
agricolas uineae, qui imminente sterilitate et uicino incendio, quo
uepres et spinae sunt comburendae, luxuriae se et uoluptatibus
tradiderunt; non solum in uescendo et bibendo; sed in aurium quoque
oblectatione et in diuersis musicae artis generibus. qui cum ista
faciunt, opus domini non respiciunt nec considerant quae uentura sint.
abutamur hoc testimonio aduersum principes ecclesiae, qui de mane
consurgunt ad sectandam siceram et bibendum usque ad uesperam. de quibus
in alio loco dicitur: uae tibi ciuitas, cuius rex iuuenis est et
principes tui mane comedunt. qui deliciis occupati, ex creaturis non
intellegunt creatorem, nec considerant opera manuum eius, de quibus
legimus: uerbo domini caeli firmati sunt et spiritu oris eius omnis
uirtus eorum. potest iuxta altiorem intellegentiam, omnis animae
perturbatio ebrietas appellari, quae concipitur de uino furoris draconum
et de ueneno aspidum insanabili, quod nonnulli bibunt ab adolescentia
usque ad senectutem, hoc est: de mane usque ad uesperam. alii uero hora
tertia, sexta uel nona et undecima suscitantur de conuiuio, et dicitur
ad eos: expergiscimini qui ebrii estis a uino. super hoc uinum et super
huiuscemodi uuas ac uineas pluit dominus sulphur et ignem a domino; et
quicumque ex earum uino biberit, aestuat atque comburitur. requirit
citharam et psalterium, cuius repertor est iubal, de cain stirpe
generatus, nec audit dominum dicentem ad aaron: uinum et siceram non
bibetis tu et filii tui, quando ingredimini in tabernaculum testimonii,
aut accedetis ad altare.
has citharas et lyras, tympanum que et tibias rex babylonius
habuit, quibus consonantibus, uniuersarum gentium populi prosternebantur
in terram, et adorabant auream statuam. quod autem primum tempus
humanae sapientiae, quando egredimur pueritiam et ad rationalem uenimus
aetatem, mane in scripturis intellegatur, multa testimonia docere nos
poterunt. de quibus exempli causa ponenda sunt pauca: mane mittebam
prophetas; et: mane exaudies orationem meam. mane assistam tibi et
uidebo; et: de nocte exsurget spiritus meus; et: deus, deus meus, ad te
de luce uigilo; et: in matutinis interficiebam omnes peccatores terrae,
ut disperderem de ciuitate domini omnes qui operantur iniquitatem; et in
alio loco: ad uesperam demorabitur fletus et ad matutinum laetitia; et
cetera his similia. consurgimus autem de mane, quando uitia relinquimus
in pueritia et dicere possumus: peccata iuuentutis meae et ignorantiae
ne memineris. orto que nobis sole iustitiae, fugantur tenebrae et statim
interficimus omnes cogitationes, quae ad peccata nos prouocant, et de
ciuitate mentis nostrae illos disperdimus peccatores, de quibus saluator
loquitur: de corde exeunt cogitationes malae, homicidia, adulteria,
fornicationes, furta, falsa testimonia, blasphemiae, et reliqua.
infelicissimi autem sunt qui de mane usque ad uesperam ebrietate, gula
et diuersis uoluptatibus occupati, non intellegunt in se opera domini
nec considerant cur creati sunt.
propterea ductus est captiuus populus meus, quia non habuit
scientiam; et nobiles eius interierunt fame et multitudo eius siti
exaruit. haec iuxta litteram accidisse populo iudaeorum sub uespasiano
et tito romanis principibus, tam graeca quam latina narrat historia.
quod quidem et spiritaliter hodie quoque patiuntur, sustinentes non
famem panis neque sitim aquae, sed famem audiendi sermonis dei, quia nec
respexerunt opus domini nec considerauerunt opera manuum eius neque
habuerunt eius scientiam, qui semper locutus est per prophetas. unde et
in psalmis dicitur de eis: conuertentur ad uesperam et famem patientur
ut canes et circuibunt ciuitatem. quod autem omnis sermo doctrinae,
panis appelletur et aqua, illud docet euangelicum: non in solo pane
uiuit homo, sed in omni uerbo quod egreditur de ore dei. et: quicumque
biberit de aqua, quam dedero ei, non sitiet in aeternum. et in psalmo
dicitur: super aquas refectionis educauit me. unde et dominus non uult
esurientes in eremo dimittere, ne lassentur et corruant, et
interficiantur fame. et de iusto uiro dicitur: iuuenis fui et senui, et
non uidi iustum derelictum, nec semen eius quaerens panem. quidam hoc
quod dicitur: captiuus ductus est populus meus, quia non habuit
scientiam; et nobiles eius interierunt fame, et multitudo eius siti
exaruit, generaliter de inferis et gehenna interpretari uolunt, in qua
punietur omnis qui dei non habuerit scientiam.
propterea dilatauit infernus animam suam et aperuit os suum
absque ullo termino, et descendent fortes eius, et populus eius, et
sublimes gloriosi que eius ad eum. et incuruabitur homo, et humiliabitur
uir, et oculi sublimium deprimentur. qui surrexerunt mane ad sectandam
siceram, et permanserunt in ebrietate usque ad uesperam, et uoluptate ac
deliciis occupati, opus domini respicere noluerunt, nec opera manuum
eius contemplati sunt, propterea ducti sunt in captiuitatem, quia non
habuerunt scientiam filii dei, dicente ipso ad eos: nec me scitis, nec
qui me misit; et in ipsa captiuitate fame perierunt ac aruerunt siti.
unde infernus et mors dilatauit animam suam et aperuit os suum, et
absque ullo numero et satietate deuorauit in perpetuum puniendos. ita ut
principes et populus et sublimes gloriosi que terrae iudae descenderent
ad eum et humiliaretur omnis superbia, et oculi sublimium
deprimerentur, intellegentium se esse mortales; et cuncta rebus expleta,
quae uentura per prophetas dominus nuntiarat. infernus autem animam
habere dicitur, non quod animal sit, iuxta errorem quorumdam; sed quod
uerbis humanae consuetudinis, rerum insensibilium exprimamus affectum,
quod insatiabilis sit, et numquam mortuorum multitudine compleatur.
quomodo et in manu linguae mors dicitur, et omnipotens deus sabbatha, et
neomenias iudaeorum odisse loquitur animam suam. quidquid de populo
diximus iudaeorum, tropologice referri potest ad eos qui saeculi
deliciis occupati nec respicientes opera dei, captiui ducuntur in
peccatum et non habent scientiam dei; et idcirco fame et siti pereunt
bonorum operum atque uirtutum et detrahentur in gehennam, ibi que
aeternis cruciatibus deputati, potentiam et superbiam miseria cernent et
humilitate mutari.
et exaltabitur dominus exercituum in iudicio; et deus sanctus
sanctificabitur in iustitia. cum captiuus ductus fuerit populus, quia
non habuit scientiam, et interierit fame, et siti exaruerit, et
dilatauerit infernus animam suam, et descenderint fortes atque sublimes
gloriosi que in profundum, et incuruatus fuerit homo et humiliatus uir,
et receperint omnes iuxta merita sua. tunc exaltabitur dominus in
iudicio, cuius prius iniustum uidebatur esse iudicium, et deus sanctus
ab omnibus sanctificabitur in iustitia, ut impleatur illud quod in
euangelio dicitur: pater noster, qui es in caelis, sanctificetur nomen
tuum; et: pater iuste, mundus te non cognouit. unde cauere debemus ne
praeueniamus iudicium dei, cuius iudicia magna sunt et inenarrabilia, et
de quo apostolus loquitur: inscrutabilia iudicia eius et inuestigabiles
uiae illius, donec illuminet occulta tenebrarum et aperiat cogitationes
cordium, qui dicit in euangelio: nolite iudicare, ut non iudicemini.
cui sententiae congruens paulus apostolus praecepit: tu quis es qui
iudicas alienum seruum? suo domino stat, aut cadit. stabit autem; potens
est enim deus statuere illum.
et pascentur agni iuxta ordinem suum; et deserta in ubertatem
uersa, aduenae comedent. pro pascentibus agnis iuxta ordinem suum, quod
in bonam partem accipitur, nescio quid uolentes lxx transtulerunt:
pascentur direpti quasi tauri, pro agnis tauros intellegentes, et rursum
pro aduenis interpretantes agnos. quando autem dominus exaltatus fuerit
in iudicio, et sanctus in sua sanctificatus iustitia, ut mali agricolae
male pereant, et exaltata cedrus securi domini succidatur; tunc qui
fuerint de agnorum numero, non haedorum, pascentur in ecclesiae pratis,
et dicent: dominus pascit me et nihil mihi deerit. et quae a iudaeis
deserta sunt, uersa in ubertatem comedet gentium populus. haec iuxta
tropologiam. ceterum ut ordinem compleamus historiae, id ipsum aliis
uerbis dicitur, de quo supra legimus: regionem uestram in conspectu
uestro alieni deuorant et deserta est atque subuersa a populis externis.
de toto enim orbe congregata gentium multitudo habitat in iudaea, et
eiectis prioribus populis, ideo ex parte caecitas facta est domui
israel, ut subintraret plenitudo gentium. pulchre que iuxta lxx direpti
sunt atque uastati et ducti in captiuitatem quasi tauri, de quibus
dominus dixerat: tauri pingues obsederunt me, ut loca taurorum
occuparent agni.
uae, qui trahitis iniquitatem in funiculis uanitatis, et quasi
uinculum plaustri peccatum. qui dicitis: festinet et cito ueniat opus
eius, ut uideamus, et appropiet et ueniat consilium sancti israel, et
scimus illud. pro uinculo plaustri, corrigiam iugi uitulae siue uaccae
lxx transtulerunt. quod autem uincula dicantur esse peccata, crebrius
legimus.
e quibus illud est: funibus peccatorum suorum unusquisque constringitur.
et dominus arguens populum delinquentem, qui peccatis peccata sociarat,
fecit flagellum de funiculis, ostendens eis quomodo domum dei fecissent
speluncam latronum, et sedem orationis uertissent in domum
negotiationis. conuiua quoque cenae dominicae, uestem non habens
nuptialem, uinctus pedibus ac manibus eicitur in tenebras exteriores. et
dominus uenit, ut his qui erant in uinculis diceret: exite; et qui
uersabantur in tenebris: reuelamini. ipse enim soluit compeditos, et
illuminat caecos, quos hieremias uinctos terrae nuncupat. nec plangit
eos qui peccare coeperint statim que desierint (non est enim iustus
super terram qui faciat bonum et aliquando non peccet), sed qui longo
funiculo peccata protraxerint. unde et in numeris legimus, uaccam rufam,
cuius cinis expiatio populi est, non aliter immolari et offerri ad
altare domini, nisi quae terrena opera non fecerit, iugum que non
traxerit, nec uinculis iugi nabuchodonosor fuerit alligata. et in hoc
eodem propheta pro cingulo ueritatis, filiae sion cinguntur funiculo.
achitophel quoque et iudas, quorum alter dauid, alter dominum
prodiderunt, fune longissimo trahentes peccata sua, periere suspendio;
putantes malum conscientiae praesenti morte finiri et nihil esse post
mortem. quod autem iuxta hebraicum et omnes alios interpretes,
appellantur funiculi uanitatis, hoc significat, quod facientibus
peccatum facile texitur et tam inane et facile est, ut aranearum fila
texuntur. sed cum inde uoluerimus exire, solidissimis uinculis nectimur.
plaustrum autem plenum oneratum que peccatis facilius intellegunt, qui
meminerint scriptum in zacharia, impietatem sedere super talentum
plumbi; et aegyptios qui graui peccatorum sarcina premebantur, quasi
plumbum in mare rubrum esse demersos. et in alio loco peccator loquitur:
iniquitates meae supergressae sunt caput meum; sicut onus graue
grauatae sunt super me. dicuntur autem haec ad principes iudaeorum, qui
supra arguti sunt in auaritia atque luxuria, quod prouocati a domino ad
paenitentiam, et postea ab apostolis eius, usque hodie perseuerent in
blasphemiis et ter per singulos dies in omnibus synagogis sub nomine
nazarenorum anathematizent uocabulum christianum. est autem sensus: uae
uobis qui putatis diem iudicii non futurum, uel non uenturam
captiuitatem quam propheticus sermo praedicit, qui dicitis ad prophetam:
usquequo nobis dei minaris iram? uolumus eam scire, iam ueniat. hoc
autem per ironiam loquuntur, quoniam eam non putant esse uenturam, sed
simulari a propheta.
uae qui dicitis malum bonum et bonum malum; ponentes tenebras
lucem et lucem tenebras; ponentes amarum in dulce et dulce in amarum.
eiusdem criminis est, bonum, lucem et dulce, contrariis uocare
nominibus, cuius malum, tenebras et amarum uocabulis appellare uirtutum.
hoc contra eos qui peccatum non putant, si bono detrahant et non
aestimant esse delictum, si laudent malum. ponunt autem iudaei bonum
malum, et lucem tenebras, et dulce amarum, suscipientes barabbam
latrocinii et seditionis auctorem et crucifigente iesum, qui non uenerat
nisi ad oues perditas domus israel, ut saluaret quod perierat. in
barabbam intellegamus diabolum, qui cum sit nox et tenebrae,
transfiguratur in angelum lucis. unde et apostolus loquitur: quae
participatio iustitiae cum iniquitate? quae societas luci ad tenebras?
qui consensus christi et belial? neque enim lucerna tollenda est et
ponenda sub modio uel sub lecto, sed supra candelabrum, ut omnibus
luceat. nec arbor malos afferens fructus, bonae arboris est appellanda
uocabulo. unde et in genesi mystico sermone narratur, quod diuiserit
deus inter lucem ac tenebras, quae in principio super abyssum
ferebantur. quod autem bonus saluator sit appellatus, ipse in euangelio
loquitur: pastor bonus ponit animam suam pro ouibus suis. lucem quoque
esse se dicit: ego sum lux mundi; et cotidie caelesti pane saturati
dicimus: gustate et uidete, quam suauis est dominus. e contrario quando
dicimus: libera nos a malo; et: mundus in maligno positus est, diaboli
cupimus insidiis liberari.
quod autem ipse tenebrarum et amaritudinis significetur nominibus,
crebrius legimus. sed et hoc possumus dicere, quod omnia contraria
dogmata ueritati amara sint et sola dulcis ueritas. unde cauendum est,
ne pro ueritate sequamur mendacium, ne pro lumine tenebras. multae enim
sunt uiae quae uidentur hominibus rectae, et nouissima earum perueniunt
in profundum inferni. est quoque iustus periens in iustitia sua, cui
dicitur: ne sis iustus multum, quas ob causas israel repromittit se uia
ambulaturum regia, nec ad sinistram nec ad dexteram declinaturum. et ut
loquar quod sentio: difficile hoc maledicto quis carere potest, cum et
malis frequenter adulemur propter potentiam et bonos despiciamus propter
inopiam. unde significantius interpretatus est aquila: uae qui dicit
malo: bonus es; et bono: malus es. et in hunc congruit sensum illud quod
salomon in prouerbiis loquitur: qui iudicat iustum iniustum, et
iniustum iustum, abominabilis est uterque apud deum. scribae quoque et
pharisaei uerba saluatoris non recipientes, sed traditiones hominum et
aniles fabulas, fecerunt bonum malum, et malum bonum.
uae qui sapientes estis in oculis uestris, et coram uobismetipsis
prudentes. qui uobis, inquit, ipsi uidemini sapientes esse, qui
prudentiam sequimini, non dei, sed hominum; et cum non recipiatis dei
uirtutem dei que sapientiam, putatis uos esse sapientes. inter
sapientiam et prudentiam hoc dicunt interesse stoici, quod sapientia
rerum sit diuinarum humanarum que notitia, prudentia autem tantum
mortalium. consequenter autem haec aduersum scribas dicuntur et
pharisaeos, qui habentes clauem scientiae, nec ipsi ad christum
introeunt nec alios introire permittunt.
uae qui potentes estis ad bibendum uinum, et uiri fortes ad
miscendam siceram, id est ebrietatem. quibus supra dixerat: uae qui
consurgitis mane ad ebrietatem sectandam, et potandum usque ad uesperam,
ut uino aestuetis, de his etiam nunc loquitur, qui potentes sunt ad
bibendum uinum et uiri fortes ad miscendum siceram. qui inebriati uino
draconis et ueneno aspidum insanabili, uirtute domini calumniabantur. et
ipsi ebrii inebriabant populos, ut pari furore bacchantes, aduersus
dominum conclamarent. iuxta tropologiam ante iam diximus, quod
sacerdotes ingressuri tabernaculum dei, non debeant uinum bibere et
siceram. quibus nunc addimus, quod nazaraeis quoque praeceptum sit, qui
se sanctificant domino, ut uinum et siceram et omne quod de uuis est,
non bibant nec comedant, ne uuam quidem passam, et acetum ex uino. sed
et in prouerbiis praecipitur: potentes qui iracundi sunt; uinum non
bibant, ne cum biberint, obliuiscantur sapientiae. inter uinum et
siceram iuxta anagogen hoc esse arbitror, quod uinum e pluribus una
perturbatio est, uerbi gratia, libidinis, auaritiae, gulae et inuidiae.
sicera autem, id est ebrietas, omnes in se uitiorum continet passiones,
quas rectius latino sermone perturbationes possumus dicere, quod statum
mentis euertant, et ebrios faciant nescire quid agant. qui ergo possunt
plurimum, debent carere uitiis et maxime ira, quae furori proxima est,
ne quanto plus possint, tanto amplius subiectis noceant. miscet siceram
qui cum ebrietate plenus sit, ad decipiendos homines, umbras quasdam et
imagines simulat se habere uirtutum.
qui iustificatis impium pro muneribus, et iustitiam iusti
aufertis ab eo. et haec pars uitiorum est uineae, quae pro uuis fecit
labruscas et exspectante domino, ut faceret iudicium, fecit iniquitatem,
iustificans impium pro muneribus, et non causas, sed dona considerans,
quae excaecant etiam oculos sapientium. unde cauendum est, ne inebriemur
uino, in quo est luxuria; et nudentur femora turpitudinis nostrae; et
adulemur impiis pro muneribus et iustitiam iusti pro inopia despiciamus.
quod et in epistola iacobi praecipitur: ne honorantes impios diuites et
despicientes sanctos pauperes, fiamus iudices iniquitatis. propter hoc
sicut deuorat stipulam lingua ignis et calor flammae exurit, sic radix
eorum quasi fauilla erit, et germen eorum ut puluis ascendet. abiecerunt
enim legem domini exercituum et sermonem sancti israel blasphemauerunt.
propter superiores causas superbiae et ebrietatis et auaritiae, quia pro
uuis attulerunt spinas et fenum, ligna, stipulam arsuros que uepres;
ideo radix malitiae eorum redigetur in fauillam, et omnis flos et
pulchritudo diuitiarum et corporis pulueri comparabitur. non enim solum
ista fecerunt, sed his gradibus peruenerunt ad blasphemiam, ut legem
domini non reciperent, et sermonem sancti israel blasphemarent; de
quibus supra legimus: de sion egredietur lex, et uerbum domini de
hierusalem. potest radix in malis cogitationibus accipi, fructus autem
et germen in malis operibus atque sermonibus, ut quod in radice latet,
monstretur in germine, quae utraque domini incendio uorabuntur. unde et
apostolus: radicem amaritudinis malorum sursum loquitur germinantem.
ideo iratus est furor domini in populum suum et extendit manum
suam super eum et percussit eum, et conturbati sunt montes, et facta
sunt morticina eorum, quasi stercus in medio platearum. in omnibus his
non est auersus furor eius, sed adhuc manus eius extenta. quoniam
abiecerunt legem domini exercituum, quam se daturum per hieremiam
dominus pollicetur, dicens: ecce dies ueniunt, dicit dominus, et feriam
domui israel et domui iuda foedus nouum, non secundum pactum quod pepigi
cum patribus uestris, in die quando apprehendi manum eorum, ut educerem
eos de terra aegypti. et sermonem sancti israel blasphemarunt,
dicentes: daemonium habet, et samaritanus est; et: nonne hic est fabri
filius? idcirco iratus est furor domini in populum suum, qui prius
iratus fuerat contra principes et potentes, qui sapientes erant in
oculis suis, et iustificauerunt impium pro muneribus, et deuorauerat eos
quasi stipulam lingua ignis et calor flammae exusserat, ut potentes
potenter tormenta paterentur. et extendit manum suam aduersum eum, quem
uocat populum suum; eo quod fuerit pars hereditatis eius et funiculus
possessionis illius. extendit autem manum, ut percutiat et furor eius
irascatur, de quo et in alio loco legimus: domine, ne in furore tuo
arguas me, neque in ira tua corripias me. et hieremias: corripe nos,
inquit, domine, uerumtamen in iudicio et non in furore. furere autem
dominus dicitur, non quod humanis perturbationibus subiaceat; sed quod
nos qui delinquimus, nisi irascentem audierimus, dominum non timeamus.
unde et apostolus scribit, quod bonitas dei et patientia prouocet nos ad
paenitentiam; nos autem secundum duritiam et impaenitens cor nostrum,
thesaurizemus nobis iram in die irae et reuelationis iusti iudicii dei.
quae sit autem manus quae extenditur, uel eleuatur super populum
peccatorem, iob loquitur manifestius: manus enim domini tetigit me. unde
et diabolus sciens potentem manum domini et brachium quod uniuersis
gentibus reuelatum est, dicit ad dominum: mitte manum tuam et tange
omnia quae habet, nisi in faciem benedixerit tibi. quod autem quasi
praeteritum dicitur, quod futurum est, consuetudinem sequitur
prophetalem, in qua tam certa sunt quae futura dicuntur, ut putentur
esse praeterita. quod et in psalmis canitur: dederunt in cibum meum fel
et in siti mea potauerunt me aceto. et iterum: diuiserunt sibi
uestimenta mea et super uestimentum meum miserunt sortem. quod que
sequitur: et percussit eum, id est populum suum, et conturbati sunt
montes. montes quidam putant contrarias fortitudines, siue eos spiritus
qui in ministerio dei sunt et quibus traduntur peccatores ad puniendum.
nos autem hyperbolice dictum putamus, quod pro magnitudine malorum
imminentium etiam montes commoueantur, et cadaueribus mortuorum
repleantur omnes plateae urbium. hoc accidisse iudaeis post passionem
domini sub uespasiano et adriano, nemo dubitat. cum que haec facta sint,
non est aduersus furor eius, sed adhuc manus eius extenta, siue
excelsa, quae habitum irascentis et percutientis ostendit. et notandum
in his omnibus, quod non eis exprobret idololatriam, non alia peccata,
propter quae offenderint deum, sed quia abiecerunt legem euangelii et
sermonem domini blasphemauerunt.
et leuabit signum in nationibus procul et sibilabit ad eum de
finibus terrae, et ecce festinus uelociter ueniet. et non erit
deficiens, neque laborans in eo; non dormitabit, neque dormiet, neque
soluetur cingulum lumborum eius, nec rumpetur corrigia calciamenti eius.
sagittae eius acutae et omnes arcus eius extenti; ungulae equorum eius
ut silex, et rotae eius quasi impetus tempestatis. rugitus eius ut
leonis, rugiet ut catuli leonum, et frendet, et tenebit praedam, et
amplexabitur, et non erit qui eruat. et sonabit super eum in die illa
sicut sonitus maris.
aspiciemus in terram, et ecce tenebrae tribulationis, et lux obtenebrata
est caligine eius. hebraei hunc locum de babyloniis et nabuchodonosor
intellegunt prophetari, quod dei uoluntate adductus sit in iudaeam et
hierusalem templum que subuerterit. nos autem sequentes ordinem et
sequentia superioribus copulantes, ideo signum in nationibus procul
eleuatum dicimus esse, et sibilasse dominum, uel traxisse eos de finibus
terrae; quoniam abiecerunt legem euangelii et sermonem sanctum
blasphemauerunt. si enim de babyloniis esset sermo, iuxta consuetudinem
prophetalem dixisset: uocabo eum qui ab aquilone est, eo quod iuxta
iudaeae situm, assyrii atque chaldaei in septentrionali plaga sint. uel
certe apertius babylonios assyrios que describeret. nunc uero dicendo:
leuabit signum in nationibus procul et sibilabit ad eum de finibus
terrae, gentes longe positas significat, et quae in terrae finibus
commorantur, haud dubium quin romanos et omnes italiae galliarum que et
hispaniae populos, qui sub uespasiano et adriano romano imperio
subiacebant. unde et italia ab eo quod ibi hesperus occidat, olim
hesperia dicebatur. et hoc ueniente percussus est et omnes iudaeae
montes turbati sunt, ut interpretatus est theodotio et symmachus, uel
commoti, ut aquila posuit, uel acerbati, ut lxx transtulerunt, ut impetu
hostium omnes replerentur plateae cadaueribus mortuorum. describit ergo
sermo diuinus uelocitatem uenientis exercitus, qui non sua, sed domini
uenerit uoluntate. immo attractus sit et sibilo illius prouocatus, quod
non defecerit nec tanto itinere laborauerit, et cupiditate praedandi
somnum oculis non admiserit, calciamenta quoque illius non sint attrita,
sagittariorum multitudinem, equitum turmas, curruum quadrigarum que
feruorem, quos instar leonis, non tam ad pugnandum, quam ad praedandum
et uorandum uenerit, et ululatus uincentis exercitus marinis fluctibus
comparatur. ex quo notandum ubicumque sonitus maris in scripturis
appellatur, quid significet. cum igitur uenerit romanus exercitus et
tenuerit praedam et non fuerit qui eruat, propheta compatientis affectu
se iungit populo, et ait: aspiciemus in terram et ecce tenebrae
tribulationis. caelum enim aspicere non audebimus, cuius habitatorem
offendimus; et lux nostra quam semper habebamus in deo, tribulationum
caligine obscurata est. legi in cuiusdam commentariis, hoc quod dicitur:
leuabit signum in nationibus procul et sibilabit ad eum de finibus
terrae, de uocatione gentium debere intellegi, quod eleuato signo crucis
et depositis oneribus peccatorum, uelociter uenerint atque crediderint.
sed nescio quomodo huic sensui possint congruere quae sequuntur.
LIBER 3
sufficit mihi uoluminum magnitudo, quae in explanatione esaiae
prophetae texitur, ubi aliquid praetermittere damnum est intellegentiae.
quamobrem in singulis libris, qui tantum numerum ordinem que
significant, breues praefatiunculas posui. te que uirgo christi
eustochium, precor, ut in expositione difficillimae uisionis orationibus
me iuues, in qua deus omnipotens in sua cernitur maiestate; et duo
seraphim stantia in circuitu eius atque clamantia: sanctus, sanctus,
sanctus dominus sabaoth, plena est omnis terra gloria eius; et commotum
liminare templi atque concussum et domus iudaica tenebris erroris
impleta. et comparatione diuinae gloriae propheta immunda labia habere
se dicens et habitare in medio populi blasphemantis, qui consona
impietatis uoce clamabant: crucifige, crucifige talem; et: non habemus
regem, nisi caesarem. unum que de seraphim missum ad esaiam, qui forcipe
de altari carbone comprehenso, prophetae purgaret labia, et populus
remaneret immundus. tertius ergo in esaiam liber hoc habet exordium.
6. anno quo mortuus est rex ozias, uidi dominum sedentem super
solium excelsum et eleuatum. sub quattuor regibus prophetasse esaiam
super iudam et hierusalem primae uisionis titulo demonstratum est, id
est sub ozia, ioatham, achaz et ezechia. mortuo ergo ozia, sub quo dicta
sunt uniuersa, quae supra exposuimus, successit filius eius ioatham,
qui regnauit annis sedecim et fecit rectum in conspectu domini et portam
templi aedificauit excelsam. quo imperante, uidit esaias sedentem
dominum super solium excelsum et eleuatum, ut habitum regnantis
ostenderet.
et ea quae sub ipso erant, implebant templum, siue ut theodotio
et symmachus transtulerunt: et ea quae sub pedibus eius erant, implebant
templum. pro quo lxx interpretati sunt: et plena domus gloria eius. de
hac uisione ante annos circiter triginta, cum essem constantinopoli et
apud uirum eloquentissimum gregorium nazianzenum, tunc eiusdem urbis
episcopum, sanctarum scripturarum studiis erudirer, scio me breuem
dictasse subitum que tractatum, ut et experimentum caperem ingenioli
mei, et amicis iubentibus oboedirem. ad illum itaque libellum mitto
lectorem, oro que ut breui huius temporis expositione contentus sit.
oziam, quia sibi illicitum sacerdotium uindicabat, lepra fuisse
percussum, sacra narrat historia; quo mortuo, dominus uidetur in templo,
quod ille polluerat.
ex quo animaduertimus, regnante in nobis leproso rege, nos dominum in
sua maiestate regnantem uidere non posse nec sanctae trinitatis nosse
mysteria. unde et in exodo postquam mortuus est pharao, qui opprimebat
israel luto et paleis et lateribus, populus clamauit ad dominum, qui,
illo uiuente, clamare non poterat. et hiezechiel, mortuo phaltia filio
bananiae pessimo principe, cadit in faciem suam, et uoce excelsa clamat
ad dominum. pulchre que iuxta hebraicum non ipse dominus implebat
templum, cuius caelum thronus est et terra scabellum pedum eius; et de
quo in alio loco legimus: dominus in templo sancto suo, dominus in caelo
sedes eius; sed ea quae sub pedibus eius erant, implebant templum. quis
sit autem iste dominus qui uidetur, in euangelista ioanne et in
apostolorum actis plenius discimus. quorum ioannes ait: haec dixit
esaias, quando uidit gloriam eius et locutus est de eo, haud dubium quin
christum significet. rursum paulus in actis apostolorum, ubi romae
loquitur ad iudaeos: bene, inquit, spiritus sanctus locutus est per
esaiam prophetam ad patres nostros, dicens: uade ad populum istum, et
dic: aure audietis, et non intellegetis, et uidentes uidebitis, et non
perspicietis. incrassatum est enim cor populi huius et auribus grauiter
audierunt, et oculos suos compresserunt, ne forte uideant oculis, et
auribus audiant, et corde intellegant, et conuertant se, et sanem eos.
uisus est autem filius in regnantis habitu et locutus est spiritus
sanctus propter consortium maiestatis unitatem que substantiae. quaerat
aliquis, quomodo nunc propheta dominum uidisse se dicat et non absolute
dominum, sed dominum sabaoth, ut in consequentibus ipse testatur, cum
euangelista ioannes dixerit: deum nemo uidit umquam; et ad moysen
loquatur deus: non poteris faciem meam uidere, neque enim uidebit homo
faciem meam, et uiuet. ad quod respondebimus, non solum patris
diuinitatem, sed ne filii quidem et spiritus sancti, quia una in
trinitate natura est, posse oculos carnis aspicere; sed oculos mentis,
de quibus ipse saluator ait: beati mundo corde, quoniam ipsi deum
uidebunt. legimus quod abraham uisus sit dominus in hominis figura; et
cum iacob quasi homo luctatus sit, qui deus erat. unde et appellatus est
locus ipse phanuel, hoc est: facies dei. uidi enim, ait, dominum facie
ad faciem et salua facta est anima mea. hiezechiel quoque uidit dominum
in forma hominis sedentem super cherubim, a lumbis eius et deorsum erat
quasi ignis et superiora habebant speciem electri. ergo dei natura non
cernitur, sed uidetur hominibus, ut uoluerit.
seraphim stabant super illud, sex alae uni, et sex alae alteri:
duabus uelabant faciem eius, et duabus uelabant pedes eius, et duabus
uolabant. et clamabant alter ad alterum, et dicebant: sanctus, sanctus,
sanctus dominus exercituum; plena est omnis terra gloria eius. hoc quod
nos, sequentes alios interpretes et hebraicam ueritatem, in qua scriptum
est memmallo, id est epan�~g autou~g, quod latine dicitur super illud,
uertimus, lxx transtulerunt: in circuitu eius, ut non super templum
stare seraphim, sed in circuitu domini describantur. rursum ubi nos
diximus quod unus de seraphim uelaret faciem et pedes eius, per quod
intellegitur dei, in hebraeo scriptum habetur phanau et reglau quod
potest interpretari et eius et suam, ut seraphim iuxta hebraei sermonis
ambiguitatem et faciem pedes que dei, et suam faciem ac pedes operire
dicantur. in septuagesimo nono psalmo legimus: qui sedes super cherubim
manifestare, qui in nostra lingua interpretantur scientiae multitudo.
unde et dominus in aurigae modum super cherubim aperte sedere
ostenditur. seraphim autem praeter hunc locum, in scripturis canonicis
alibi legisse me nescio, qui stare dicuntur super templum, uel in
circuitu domini. ergo errant qui solent in precibus dicere: qui sedes
super cherubim et seraphim, quod scriptura non docuit. seraphim autem
interpretantur empr�stai~g, quod nos dicere possumus incendentes siue
comburentes, iuxta illud quod alibi legimus: qui facit angelos suos
spiritus et ministros suos ignem urentem. unde et paulus apostolus in
epistolas ad hebraeos, quam latina consuetudo non recipit: nonne omnes,
inquit, ministri sunt spiritus, in ministerium missi propter eos qui
hereditatem accepturi sunt salutis? daniel quoque cum in habitu
regnantis dominum descripsisset, adiecit: milia milium ministrabant ei
et decies milies centena milia assistebant ei. in cherubim ergo
ostenditur dominus: in seraphim ex parte ostenditur, ex parte celatur.
faciem enim et pedes eius operiunt, quia et praeterita ante mundum et
futura post mundum scire non possumus; sed media tantum quae in sex
diebus facta sunt, contemplamur. nec mirum hoc de seraphim credere, cum
et apostoli saluatorem credentibus aperiant, infidelibus abscondant; et
uelum ante arcam fuerit testamenti.
alas quoque habere dicuntur propter uelocitatem et in cuncta discursum,
siue quia semper in altioribus commorantur. neque enim illud quod de
uentis dicitur: qui ambulat super pennas uentorum, uere uentos iuxta
fabulas poetarum et pictorum licentiam pennas habere testatur; sed
celerem in cuncta discursum. et singuli senas alas; quia de fabricatione
tantum mundi et praesentis saeculi nouimus. quod autem clamant alter ad
alterum, uel, iuxta hebraeos, iste ad istum, id est, unus ad unum,
inuicem se ad laudes domini cohortantur, et dicunt: sanctus, sanctus,
sanctus, dominus exercituum, ut mysterium trinitatis in una diuinitate
demonstrent; et nequaquam templum iudaeorum, sicut prius, sed omnem
terram illius gloria plenam esse testentur, qui pro nostra salute
dignatus est humanum corpus assumere ad terras que descendere. denique
et moysi, cum pro adorato uitulo dominum precaretur, ut parceret populo
peccatori, respondit dominus: propitius ero illis. uerumtamen uiuo ego
et uiuit nomen meum, quia implebitur gloria mea omnis terra, et
septuagesimus primus psalmus canit: implebitur gloria eius omnis terra.
unde et angeli clamabant pastoribus: gloria in excelsis deo, et super
terra pax hominibus bonae uoluntatis. impie ergo quidam duo seraphim,
filium et spiritum sanctum intellegit. cum iuxta euangelistam ioannem et
paulum apostolum, filium dei uisum in maiestate regnantis et spiritum
sanctum locutum esse doceamus. quidam latinorum duo seraphim uetus et
nouum instrumentum intellegunt, quae tantum de praesenti saeculo
loquuntur. unde et sex alas habere dicuntur, et faciem dei pedes que
uelare, et certatim proferre testimonium ueritatis, et omne quod clamant
trinitatis sacramenta monstrare. et mirari ad inuicem quod dominus
sabaoth in forma dei patris positus formam serui acceperit et
humiliauerit se usque ad mortem, et mortem crucis; et nequaquam ut prius
caelestia eum tantum, sed et terrena cognoscant.
et commota sunt superliminaria cardinum a uoce clamantis; et
domus impleta est fumo. clamantibus seraphim et in tota terra trinitatis
mysterium praedicantibus, quando passionem domini saluatoris terra
uniuersa cognouit, statim commotum est, siue sublatum liminare templi,
et omnes illius cardines conciderunt, impleta saluatoris comminatione,
dicentis: relinquetur uobis domus uestra deserta. et quam pulcher ordo
uerborum. postquam terra repleta est gloria domini sabaoth, iudaeorum
templum impletum est ignorantiae tenebris et caligine et fumo, qui
noxius est oculis. uel certe per fumum templi monstratur incendium.
prius enim euangelium saluatoris in toto orbe praedicatum est, et post
quadraginta duos annos dominicae passionis, capta hierusalem templum que
succensum est. iudaei putant templum impletum fumo thymiama
significare, id est incensum, et per hoc aduentum diuinae maiestatis.
et dixi: uae mihi quia tacui, quia uir pollutus labiis ego sum,
et in medio populi polluta labia habentis ego habito; et regem dominum
exercituum uidi oculis meis. et abraham postquam uidit dominum et
audiuit uocem eius, terram et cinerem esse se dicit; et esaias iuxta lxx
interpretes compunctum se esse testatur, non ob alia crimina, sed quia
labia haberet immunda. felix conscientia, quae tantum in sermone
peccauit, non suo uitio, sed societate populi habentis polluta labia,
cum quo loqui saepissime cogebatur. ex quo ostenditur noxium esse uiuere
cum peccatoribus: qui enim tangit picem, inquinabitur ab ea. sed quia
in hebraeo legimus: uae mihi, quia tacui, plangit se propheta, quia non
fuerit dignus laudare dominum sabaoth cum seraphim, quos angelicas
fortitudines intellegimus. non fuit autem ausus laudare dominum, quia
labia habebat immunda. et propterea labia habebat immunda, quia cum
peccatore populo uersabatur. uel certe ita intellegendum: quia tacui, et
non audacter oziam impium regem corripui, ideo labia mea immunda sunt,
et laudes domini cum angelis cantare non audeo, ne mihi dicatur: quare
tu enarras iustitias meas et assumis testamentum meum per os tuum? non
est enim pulchra laudatio in ore peccatoris. hoc autem dicimus, non quod
esaiam talem fuisse doceamus; sed quod ipse pro humilitate, et immundis
tantum labiis, indignum se dei laude fateatur. et uolauit ad me unus de
seraphim, et in manu eius calculus, quem forcipe tulerat de altari, et
tetigit os meum, et dixit: ecce tetigit hoc labia tua, et auferetur
iniquitas tua, et peccatum tuum mundabitur
uolauit, uel missus est unus de seraphim, qui interpretatur incendens,
ut prophetae labia purgaret immunda et pruna uel calculo, quem de altari
tulerat, excoqueret. multi autem putant, duos esse seraphim, quia
clamabat alter ad alterum, cum et de pluribus possint singuli clamare ad
singulos; et lxx editio magis significet plurimos, qui interpretati
sunt: seraphim stabant in circuitu eius. quod si de duobus diceretur,
non in circuitu, sed ex utraque parte dixissent. et hoc conuenit
angelorum multitudini, quae in dei ministerium praeparata est. seraphim
autem plurali numero appellantur, et singulari seraph, sicut cherubim,
et cherub. quod autem altare sub quo animae martyrum sunt, uideantur in
caelo, et ioannes in apocalypsi loquitur; et calculus iste qui a solis
lxx anthrax~g, id est carbunculus, interpretatur, potest non carbonem
significare, uel prunam, ut plerique existimant, sed anthraka~g, id est
carbunculum lapidem, qui ob coloris flammei similitudinem igneus
appellatur. ex quo intellegimus altare dei plenum esse carbunculis, hoc
est, ignitis calculis et prunis, peccata purgantibus. unde scriptum de
deo legimus: carbones succensi sunt ab eo. et de ipso domino dicitur,
quod ignis consumens sit. et saluator in euangelio: ignem ueni mittere
super terram, ut baptizaret in spiritu sancto et igni. uniuscuiusque
enim opus quale sit, ignis probabit. et qui saluandus est, sic
saluabitur, quasi per ignem transierit. et hoc notandum, quod ad
hieremiam, cui dictum est: prius quam te formarem in utero noui te et in
uulua matris tua sanctificari te, quia labia non habebat immunda, sed
tantum dixerat: nescio loqui, quia iuuenis sum, extendit ipse dominus
manum suam, et tetigit os eius, et dixit: ecce dedi sermones meos in os
tuum. porro ad esaiam qui dixerat: uir pollutus labiis ego sum, et in
medio populi polluta labia habentis ego habito, non dei manus
porrigitur, sed seraphim mittitur a deo, uel uolat propria uoluntate,
quia huic officio mancipatus est. et in manu sua tenet calculum, quem
iuxta lxx et theodotionem, forcipe, iuxta aquilam, et symmachum, qui
hebraicum sunt secuti, forcipibus apprehendit, id est malcaim, ut
tangeret os eius, et pristina delicta purgaret. manus autem et a deo et
seraphim mittitur, ut propheta sui corporis membrum uidens, tactu non
terreatur externo. quidam nostrorum forcipem, quo calculus
comprehenditur, duo testamenta putant, quae inter se spiritus sancti
unione sociantur. quia uero sedens dominus introducitur, et sedens in
templo, et domus impleta est fumo, ut iudaei putant, thymiamatis;
consequenter ponuntur et forcipes, quos et in sacerdotali ministerio
legimus.
et audiui uocem domini dicentis: quem mittam et quis ibit nobis?
et dixi: ecce ego, mitte me. pro eo quod et nos et alii omnes
interpretes transtulerunt: nobis, quod hebraice dicitur lanu, nescio
quid uolentes lxx posuerunt: ad populum istum, quod penitus in hebraeo
non habetur. quando autem ex dei persona dicitur: nobis, illo sensu
accipiendum est, quo et in genesi legitur: faciamus hominem ad imaginem
et similitudinem nostram, ut sacramentum indicet trinitatis. quomodo
enim in euangelio legimus dicentem dominum: ego et pater unum sumus, et
unum ad naturam referimus, sumus ad personarum diuersitatem. sic, domino
iubente, trinitas imperat. propterea autem non dicit dominus quem ire
praecipiat, sed proponit audientibus optionem, ut uoluntas praemium
consequatur. et propheta non temeritate et arrogantia propriae
conscientiae se ire promittit, sed fiducia: quoniam purgata sunt labia
eius, et ablata iniquitas mundatum que peccatum. ergo et moyses, cui
dixerat dominus: ueni, mittam te ad pharaonem regem aegypti; et ille
ait: obsecro, domine, non sum dignus, prouide alium quem mittas, siue ut
in hebraeo legitur: mitte quem missurus es, non de contemptu, sed de
humilitate respondit, uia nihil de purgatis labiis suis audierat, qui
omni sapientia aegyptiorum fuerat eruditus. et esaias non suo merito,
sed domini gratia qua purgatus est, offert se ad ministerium. alii autem
putant idcirco se obtulisse esaiam, quia aestimabat populo prospera
nuntianda, sed quia audiuit: uade, dic populo huic: auribus audietis et
non intellegetis et uidentes uidebitis et non cognoscetis; propterea in
consequentibus, dicente ad eum uoce domini: clama, non statim clamat,
sed interrogat: quid clamabo? et hieremias, cui dictum fuerat: accipe
calicem et potionabis omnes gentes, ad quas ego mittam te, libenter
accipiens suppliciorum calicem, ut aduersariis gentibus propinaret
biberent que et uomerent et caderent, postquam audiuit: uade et primum
propinabis hierusalem, respondit: decepisti me, domine, et deceptus sum.
haec hebraeorum obseruatio est. ceterum nos dicimus non temeritatis
esse, sed oboedientiae, domino se obtulisse mittendum.
et dixit: uade, et dices populo huic: auditu audite et nolite
intellegere, et uidete uisu et nolite cognoscere. excaeca cor populi
huius, et aures eius aggraua, et oculos eius claude, ne forte uideat
oculis suis, et auribus audiat, et corde intellegat, et conuertatur, et
sanetur. lxx hunc locum ita interpretati sunt, ut euangelista lucas in
apostolorum actibus posuit: cum que inuicem non essent consentientes,
haud dubium quin iudaei discedebant, dicente paulo unum uerbum: quia
bene spiritus sanctus locutus est per esaiam prophetam ad patres
nostros, dicens: uade ad populum istum, et dic: aure audietis, et non
intellegetis, et uidentes uidebitis, et non perspicietis. incrassatum
est enim cor populi huius et auribus grauiter audierunt, et oculos suos
compresserunt, ne forte uideant oculis, et auribus audiant, et corde
intellegant, et conuertant se, et sanem illos. quo autem haec prophetia
impleta sit tempore, ipse apostolus paulus in consequentibus loquitur:
notum ergo sit uobis, quoniam gentibus missum est hoc salutare dei et
ipsi audient. unde et in eisdem apostolorum actis legimus, quod paulus
et barnabas, iudaeis nolentibus credere, dixerint: uobis oportebat
primum loqui uerbum dei, sed quoniam repulistis illud, et indignos uos
iudicastis aeternae uitae, ecce conuertimur ad gentes. sic enim
praecepit nobis dominus: posui te in lucem gentibus, ut sis in salutem
usque ad extremum terrae. ergo secundum lxx facilis interpretatio est,
quod esaias propheta domino imperante praedicat, quid populus sit
facturus. in hebraico difficultas est, quomodo ipse deus praecipiat
populo, ut auditu audiat, et non intellegat, et uidens uideat, et non
agnoscat, et postea propheta inducatur loquens, et dominum precetur et
dicat: excaeca cor populi huius, et aures eius aggraua, et oculos eius
claude, ne forte uideat oculis suis, et auribus audiat, et corde
intellegat, et conuertatur, et sanetur. ac primum soluenda est illa
quaestio, quae nobis obici potest: quare apostolus paulus cum hebraeis
disputans, non iuxta hebraicum, quod rectum esse cognouerat, sed iuxta
lxx sit locutus? euangelistam lucam tradunt ueteres ecclesiae
tractatores medicinae artis fuisse scientissimum et magis graecas
litteras scisse quam hebraeas unde et sermo eius tam in euangelio quam
in actibus apostolorum, id est, in utroque uolumine, comptior est, et
saecularem redolet eloquentiam, magis que testimoniis graecis utitur
quam hebraeis. matthaeus autem et ioannes, quorum alter hebraeo, alter
graeco sermone euangelia texuerunt, testimonia de hebraico proferant, ut
est illud: ex aegypto uocaui filium meum. et: quoniam nazareus
uocabitur. et: flumina de uentre eius fluent aquae uiuae. et: uidebunt
in quem compunxerunt; et cetera his similia. pauli quoque idcirco ad
hebraeos epistolae contradicitur, quod ad hebraeos scribens utatur
testimoniis quae in hebraeis uoluminibus non habentur. quod si aliquis
dixerit, hebraeos libros postea a iudaeis esse falsatos, audiat origenem
quid in octauo uolumine explanationum esaiae huic respondeat
quaestiunculae, quod numquam dominus et apostoli, qui cetera crimina
arguunt in scribis et pharisaeis, de hoc crimine, quod erat maximum,
reticuissent. sin autem dixerint post aduentum domini saluatoris et
praedicationem apostolorum libros hebraeos fuisse falsatos, cachinnum
tenere non potero, ut saluator et euangelistae et apostoli ita
testimonia protulerint, ut iudaei postea falsaturi erant. de praesenti
autem loco hoc dicendum est, frustra nos ad lxx translationem confugere,
ne blasphemum uideatur esse quod iuxta hebraicum dicitur: auditu audite
et nolite intellegere, et uidete uisionem et nolite cognoscere; cum
huiusmodi testimonia etiam in lxx interpretibus reperiamus, ut est illud
in exodo quod ad pharaonem dicitur: propterea suscitaui te, ut ostendam
in te uirtutem meam. si autem ipse suscitauit, et indurauit cor
pharaonis ne crederet; et de aliis dicitur: dedit eis deus spiritum
compunctionis, oculos ut non uideant, et aures ut non audiant; et in
psalmis: fiat mensa eorum in laqueum, et in captionem et in scandalum,
et in retributionem; obscurentur oculi eorum ne uideant, et dorsa eorum
semper incurua. non sunt illi in culpa qui non uident; sed ille qui
dedit oculos ad non uidendum. ergo et absque hoc testimonio, quod nunc
conamur exponere, manet eadem quaestio in ecclesiis, et aut cum ista
soluentur et ceterae, aut cum ceteris et haec indissolubilis erit. locum
istum beatus apostolus paulus plenius explicat ad romanos, et quod ille
paene tota epistola prosecutus est, nos superfluum facimus, si
uoluerimus breui sermone comprehendere. dicit enim post multa: conclusit
deus omnia in incredulitate, ut omnibus misereatur. admirans que domini
sacramenta intulit: o profundum diuitiarum sapientiae et scientiae dei,
quam inscrutabilia iudicia eius et inuestigabiles uiae eius. et iterum
de iudaeorum incredulitate disputans ait: numquid sic peccauerunt, ut
caderent? absit; sed illorum delicto salus gentium fieret ad aemulandum
eos. et post modicum: si enim abiectio eorum reconciliatio mundi, quae
assumptio eorum?
nonne uita ex mortuis? et iterum: nolo enim uos ignorare, fratres,
mysterium hoc, ut non sitis uobismetipsis prudentes, quia caecitas ex
parte facta est in israel, donec plenitudo gentium introeat, et tunc
omnis israel saluus fiat. et post paululum: iuxta euangelium quidem
inimici propter uos, iuxta electionem autem dilecti propter patres;
absque paenitentia enim sunt donationes et uocatio dei. sicut enim uos,
inquit, aliquando non credidistis deo, nunc autem estis misericordiam
consecuti, propter eorum incredulitatem; sic et isti nunc non
crediderunt in uestram misericordiam, ut et ipsi misericordiam
consequantur. conclusit enim deus omnia sub peccato, ut omnibus
misereatur. ergo non est crudelitas dei, sed misericordia, unam perire
gentem, ut omnes saluae fiant, iudaeorum partem non uidere, ut omnis
mundus aspiciat. unde et ipse dominus in euangelio sacramentum caeci a
natiuitate, qui receperat oculos, uertit ad tropologiam, et dicit: in
iudicium ego ueni in hunc mundum, ut uidentes non uideant et non
uidentes uideant. et in alio loco simeon loquitur: ecce hic positus est
in ruinam et in resurrectionem multorum. illis itaque non uidentibus,
nos uidemus; illis cadentibus, nos resurgimus. quod intellegens propheta
quodammodo aliis uerbis dicit: o domine, praecipis mihi loqui populo
iudaeorum, ut audiant et non intellegant saluatorem, et uideant eum et
non cognoscant. si uis impleri iussionem tuam, et totum saluari mundum,
quod et ego fieri desidero, tu excaeca cor populi huius et aures aggraua
et oculos claude, ne intellegant, ne audiant, ne uideant. si enim illi
uiderint et conuersi fuerint et intellexerint et sanati fuerint, totus
mundus non recipiet sanitatem. ex quo animaduertimus, quamuis graue sit
peccatum, si quis conuertatur, eum posse sanari. simul que et hoc
intellegendum quod pro magnitudine sceleris etiam paenitentia indigni
iudicati sint, ipso domino dicente ad hierusalem: quotiens uolui
congregare filios tuos, sicut gallina pullos sub alas suas, et noluisti.
et dixi: usquequo domine? et dixit: donec desolentur ciuitates
absque habitatore, et domus sine hominibus, et terra relinquatur
deserta. et longe faciet dominus homines, et multiplicabitur quae
derelicta fuerat in medio terrae. et adhuc in ea erit decimatio, et
rursum erit in depraedationem, sicut terebinthus, et sicut quercus quae
proiecit fructus suos, sanctum semen erit quod steterit in ea. dicente
domino: uade, et dic populo huic, quod audiat et non audiat, uideat et
non uideat. idcirco autem nec audiat nec uideat, quia non sit
intellecturus uerba domini, nec eius opera cogniturus, et quoniam
incrassatus est, et dilatatus, et oblitus creatoris sui. propheta
respondet, et quaerit sollicitus de populo suo: usquequo, domine, haec
sententia permanebit ut audiens non audiat, uidens que non uideat? cui
respondit dominus: tamdiu non audiet et non uidebit, et excaecatum
habebit cor, donec ciuitates iudaeae, uespasiano tito que pugnantibus,
penitus subuertantur, in tantum ut ne nomen pristinum quidem permaneat,
et domus si quae remanserint, sine habitatore sint, et terra redigatur
in solitudinem. et uel fuga uel captiuitate in totum orbem iudaicus
populus dispergatur; et nequaquam in iudaea, ut prius, sed in cunctis
gentibus iudaeorum populus multiplicetur. quod autem dico multiplicetur,
tanta erit infelicitas residui populi, ut ad comparationem prioris
multitudinis, uix decima pars remaneat. cum que et in ipsa terra fuerit
solitudo - dupliciter enim locus iste intellegi potest, quod decima
pars, et in toto orbe uix remaneat, et in ipsa iudaea uix parua pars
populi reseruetur - rursum ipsae reliquiae erunt in depraedationem,
quando post annos ferme quinquaginta adrianus uenerit, et terram iudaeam
penitus fuerit depraedatus. in tantum, ut terebintho et quercui, quae
glandes amiserit, comparetur. denique post extremam uastitatem, etiam
leges publicae pependerunt, et prohibiti sunt iudaei terram, de qua
eiecti fuerant, ingredi. si quis autem crediderit in christum, et
impletum fuerit illud quod supra legimus: nisi dominus sabaoth
reliquisset nobis semen, quasi sodoma essemus et similes gomorrae
fuissemus. quando iuxta apostolum, reliquiae saluabuntur, hoc semen
sanctum erit, et de apostolorum germine cunctae ecclesiae pullulabunt.
quod diximus: semen sanctum erit quod steterit in ea, uel iuxta aquilam:
semen sanctum erit germen eius, in lxx interpretibus non habetur, sed
de hebraico et theodotionis editione ab origene additum, in ecclesiae
fertur exemplaribus, ut postquam intrauerit plenitudo gentium, tunc
omnis israel saluus fiat; et impleatur etiam in hoc sermo domini,
dicentis: ego occidam, et ego uiuificabo, et percutiam, et ego sanabo.
7. et factum est in diebus achaz filii ioatham filii oziae regis
iuda: ascendit rasin rex syriae, et phacee filius romeliae rex israel,
in hierusalem ad proeliandum contra eam, et non potuerunt debellare eam.
et nuntiauerunt domui dauid dicentes: consensit syria cum ephraim, et
commotum est cor eius, et cor populi illius, sicut mouentur ligna
siluarum a facie uenti.
ozias qui et azarias, rex iuda, regnauit in hierusalem annis
quinquaginta duobus. cuius extremo iam tempore uidit esaias quae
praeteritus sermo disseruit. quo mortuo, et regnante pro eo ioatham
filio eius, rege iustissimo, uidit statim propheta dominum saluatorem in
sua maiestate regnantem, et annuntiantem iudaici populi caecitatem, et
subuersionem hierusalem et ceterarum urbium sub uespasiano et adriano;
et quomodo in apostolis reliquiae sint saluandae. tertius rex filius
ioatham succedit achaz impiissimus, qui clausit ianuas templi, et in
ualle benhennom adorauit baalim, et filium suum idolis consecrauit. ita
ut auferret altare aeneum, quod salomon fecerat, et poneret in templo
dei altare idolorum, cuius exemplar de damasco acceperat. iuste igitur a
domini auxilio derelictus est, et consurrexerunt aduersus eum rasin rex
syriae, id est aram, et phacee filius romeliae, rex israel in samaria,
et uenerunt in hierusalem ut expugnarent eam. legimus in paralipomenon
libro, rasin regem damasci, uicto achaz, multos de iudaea damascum
transtulisse; et phacee filium romeliae regem decem tribuum, quae
appellabantur israel et regnabat in samaria, una die centum uiginti
milia percussisse de iuda hominum bellatorum, et ducenta milia mulierum
puerorum que et puellarum cum infinita praeda in samariam duxisse
captiua. de quo certamine propheta nunc tacuit, sed secundum refert
proelium, quando experimentum habentes fortitudinis suae atque uictoriae
et inuitati praedae magnitudine rursum ueniunt ad iudaeam, et
hierusalem cupiunt debellare, et non potuerunt, quia auxiliatus ei est
dominus, ut sub occasione misericordiae, qua populum liberabat obsessum,
filium suum nuntiaret de uirgine nasciturum. quod cum audisset domus
dauid, hoc est domus regia, syriam scilicet et ephraim, rasin et phacee
iuncto uenire exercitu, exterrita est atque pertimuit, et tam rex quam
populus ita contremuerunt, ut putares arborum folia uentorum flatibus
uentilari. iuxta anagogen facilis interpretatio est, quod regnante achaz
rege impio, rex aram, qui interpretatur excelsus atque sublimis, ut
indicet arrogantiam sapientiae saecularis. et phacee filius romeliae,
qui et ipse iuxta osee prophetam ex tribu ephraim, de qua ieroboam
filius nabath uitulos aureos in bethel et dan constituerat, et a domo
dauid dei populum separarat, refertur ad haereticos, consentientes sibi,
ut expugnent ecclesiam. quod cum audierit domus dauid, quem in
hiezechiel bonum pastorem legimus suscitandum, et populus eius
simpliciter credens in dominum, pertremiscet. et ideo pertremiscet, quia
non arboribus frugiferis, sed infructuoso saltui comparatur. iisdem
autem haereticos atque gentiles contra domum dauid argumentorum et
dialecticae artis gladiis dimicare, nulli dubium est; ut qui inter se
discrepant, in ecclesiae oppugnatione consentiant. iuxta illud quod
herodes et pilatus inter se discordantes, in domini passione amicitia
foederantur.
et dixit dominus ad esaiam: egredere in occursum achaz, tu et qui
derelictus est iasub filius tuus, ad extremum aquae ductus piscinae
superioris, in uia agri fullonis. et dices ad eum: uide ut sileas, noli
timere, et cor tuum ne formidet a duabus caudis titionum fumigantium
istorum, in ira furoris rasin, et syriae, et filii romeliae. eo quod
consilium inierit contra te syria pessimum, ephraim et filius romeliae,
dicentes: ascendamus ad iudam, et suscitemus eum, et euellamus eum ad
nos, et ponamus regem in medio eius filium tabeel. haec dicit dominus
deus: non stabit, et non erit istud, sed caput syriae damascus et caput
damasci rasin et adhuc sexaginta et quinque anni, et desinet ephraim
esse populus. et caput ephraim samaria, et caput samariae filius
romeliae.
si non credideritis, non permanebitis. iasub filius esaiae, qui
interpretatur reliquus atque conuertens, in typum populi iuda, qui erat
de duorum regum manibus liberandus, iubetur egredi cum parente et
occurrere achaz regi iudae in loco aquaeductus piscinae superioris, in
uia agri fullonis, ubi postea lecturi sumus, sub ezechia rege iuda stare
rabsacem et ex praecepto sennacherib regis assyriorum dei populum
blasphemare. in quem locum egressi sunt, missi ab ezechia principes
ciuitatis, quos in regum uolumine legimus. praecipitur que achaz,
quamuis impio regi, propter domini misericordiam, ut agat silentium, et
non terreatur neque formidet cor eius, putans se passurum similia quae
prius sustinuerat. duas autem caudas titionum, id est torrium
fumigantium, uocat rasin regem syriae, et phacee filium romeliae regem
samariae, eo quod in illis finitum sit regnum syriae, id est damasci, et
regnum samariae, id est decem tribuum, quae alio nomine appellabantur
ephraim. scriptum est enim quod theglathphalassar rex assyriorum sub
rege achaz ascenderit in damascum et uastauerit eam, et transtulerit
habitatores eius cyrenem, et rasin interfecerit; et quod tetenderit
insidias phacee, filio romeliae, osee filius ela, et percusserit eum, et
interfecerit, et regnauerit pro illo in israel annis nouem; et quod
uenerit salmanasar rex assur, et obsederit samariam quae nunc sebaste
uocatur, tribus annis; et nono anno regni osee ceperit eam, uinctum que
osee in carcerem miserit, et transtulerit israel in assyrios, posuerit
que eos in halla et in habor iuxta fluuium gozam in ciuitatibus, siue,
ut septuaginta transtulerunt, in montibus medorum. quamuis enim inierint
consilium hi duo reges pessimi, ut ascenderent ad iudam, cuius regio in
montibus sita est et suscitarent eum quiescentem et quodammodo
dormientem, suo que imperio subiugarent; et superponerent ei regem
filium tabeel, qui interpretatur bonus deus, ut uel hominem hoc nomine
uel idolum demonstrarent. tamen haec dicit dominus deus: non stabit hoc
consilium, sed interim modo caput syriae urbium erit damascus, et in
ipsa metropoli damasco imperabit rasin. porro in ephraim propter
ieroboam filium nabath, qui primus regnauit de ephraim, erit caput
samaria, hoc est regia domus in urbe samaria, et samariae caput erit
filius romeliae, id est phacee. regnum autem decem tribuum, id est
populi ephraim post sexaginta et quinque annos esse cessabit.
quod nisi diligentius attendamus, stare non poterit. quartodecimo enim
anno achaz filii ioatham in tribu iuda, regnauit osee super samariam, et
nono anno imperii sui captus est. regnauit autem achaz super iudam
annis sedecim, post cuius mortem septimo anno imperii sui captus est
osee, et destructa samaria, omnis que populus est transductus in medos.
ita ut si uoluerimus sedecim annos achaz et septem osee ponere,
efficiantur anni uiginti tres, aut ut multum uiginti quattuor; et ubi
erunt sexaginta et quinque anni, in quibus regnum israel dicitur
finiendum? igitur hebraei hunc locum ita edisserunt, ut amos qui sub
ozia cepit prophetare, quando et esaias prophetiae suae habuit exordium,
primus prophetauerit contra israel, dicens: israel autem captiuus
ducetur de terra sua. titulus quoque prophetiae eius contra samariam
sit; et prophetare coeperit in diebus oziae regis iuda ante duos annos
terrae motus, quem uolunt eo tempore accidisse, quo ingressus ozias in
templum dei, sibi sacerdotium uendicabat, et terra percussa est, et
cineres altaris effusi sunt, et ipse rex percussus est lepra. uolunt
autem annum fuisse uigesimum quintum oziae, quando haec acciderunt,
cuius reliqui anni sunt uiginti septem. ozias enim regnauit annos
quinquaginta duos, post eum regnauit ioatham filius eius annis sedecim,
et huius filius achaz annis aliis sedecim; post quem regnauit ezechias,
cuius sexto imperii anno capta samaria est, atque ita effici simul annos
sexaginta quinque. haec per prophetam domino praedicente, et achaz et
populus futura non credidit. unde subiungitur: si non credideritis, non
permanebitis, ut symmachus transtulit, id est: et uos non permanebitis
in regno uestro, sed in captiuitatem ducemini, sustinentes eorum poenas,
quorum imitati estis infidelitatem. uel certe iuxta lxx: non
intellegetis. et est sensus: quia quae dominus dicit futura, non
creditis, intellegentiam non habebitis. haec iuxta historiam dixerimus.
ceterum iuxta coeptam tropologiam considerandum est, quod impio regi
esaias iubeatur occurrere, exiens de loco suo, non in principio
aquaeductus, sed in extremis finibus piscinae superioris, quae erat in
agro fullonis, ubi sordes et maculae purgabantur. quamuis enim achaz
regnaret super iudam, tamen quia impius erat, in superioris piscinae
extremis finibus morabatur. ergo deus non tam regis miseretur, quem
indignum aestimabat salute, quam populi sui. duas autem caudas torrium
fumigantium, ut prius diximus, uocat sapientiam saecularem haereticum
que sermonem, quorum finis exustio est. qui frustra inierunt consilium,
ut ascenderent contra iudam, et quasi neglegentem et dormientem
caperent, et suis erroribus copularent, ponerent que super eum regem
filium tabeel, hoc est, bonum deum. uterque enim aduersarius apud se
ueritatem, apud se aestimat optimam esse doctrinam. denique marcion
haereticus, boni dei filium, hoc est, alterius, putat esse christum, et
non iusti, cuius prophetae sunt, quem sanguinarium, crudelem et iudicem
uocat. haec illis dicentibus, dominus comminatur, quod non stet
consilium ipsorum, sed interim nunc quamdiu mundus iste stat, et ea quae
mundi sunt in suis finibus, et in suis urbibus dominentur. cum autem
consummationis tempus aduenerit, hoc est, sexaginta quinque anni, et tam
mundi res quae in sex diebus factae sunt, quam omnia quae ad quinque
sensus pertinent, finem acceperint, tunc uniuersa esse soluenda, quae
gentiles et haeretici futura non credunt, et propter infidelitatem non
intellegunt quae dicuntur.
et adiecit dominus loqui ad achaz dicens: pete tibi signum a
domino deo tuo in profundum inferni, siue in excelsum supra. qui prius
per prophetam locutus fuerat ad achaz: uide ut sileas, noli timere, et
cetera: illo non credente, et ideo non intellegente, ipse loquitur ad
achaz, ut saltem auctoritate domini territus suscipiat quae dicuntur.
quia tibi, inquit, uidetur esse difficile, quod regna potentissima breui
tempore finienda sint et tu cum populo tuo de magno periculo libereris;
pete tibi signum, nequaquam ab idolis, quorum errore retineris, sed a
domino deo tuo qui tibi auxilium pollicetur, et ipsum signum optionis
tuae est unde postules, siue de profundo siue de excelso. quod cum soli
septuaginta dixerint, ceteri iuxta hebraicum significantius
transtulerunt: de profundo inferni. ergo sicut profundum infernum
significat, ita excelsum supra caelos intellegere debemus, ut cum de
inferno siue de excelso signum acceperis, credas futura quae dixi. uis,
inquit, ut scindatur terra et grandi hiatu inferi pateant, qui in corde
terrae esse dicuntur, an ut aperiantur caeli? quod utrumque ad typum
pertinet mortis domini et ascensionis: qui enim descendit, ipse est qui
et ascendit. et in apostolo legimus: ne dixeris in corde tuo, quis
ascendit in caelum?
hoc est christum deducere. aut: quis descendit in abyssum? hoc est
christum de mortuis reducere. et in alio loco de christo disputans, ait:
quae sit latitudo et longitudo et excelsum et profundum supereminentis
scientiae et dilectionis christi. hoc quantum ad mysticos pertinet
intellectus. ceterum et moyses accepit signa de terra, de quibus in
psalmis legimus: misit signa et prodigia in medio tui, aegypte: ranas,
locustas, ciniphes et coenomyiam; de caelo autem grandinem et ignem et
trium dierum tenebras. ego reor et ezechiam, quando sol decem regressus
est lineis, signum accepisse de caelo; et iesum filium naue in gabaon et
haialon, stantibus sole et luna. plerique putant, saulem signum
accepisse de terra et de profundo inferni, quando samuelem per
incantationes et artes magicas uisus est suscitasse. sed et ionas
propheta de abysso et de profundo ac mortis faucibus liberatus, signum
dedit et accepit inferni. legi in cuiusdam commentariis hunc locum per
allegoriam extenuatum, ut profundum et excelsum aisth�ta~g et no�ta~g
intellegeret, quae nos possumus sensibilia dicere et intellegibilia,
quorum alterum refertur ad sensus, alterum ad mentem et rationem.
uirginem quoque interpretatur animam, quae nulla peccati corrupta est
conscientia, et potest de se emmanuel, nobis cum deum, id est praesentem
dei, generare sermonem. sed nos elixas agni carnes non comedimus uerum
assas, et quae in nobis possint omnes uoluptatum siccare pituitas, ne
sacramentum fidei nostrae, dum plus sapimus quam oportet sapere,
neglegamus.
et dixit achaz: non petam et non temptabo dominum. non
humilitatis est, sed superbiae, quod non uult signum a domino postulare.
quamquam enim scriptum sit in deuteronomio: non temptabis dominum deum
tuum, et hoc contra diabolum saluator usus sit testimonio; tamen iussus
ut peteret, oboedientia debuit explere praeceptum, praesertim cum et
gedeon et manue signum petierint et acceperint. quamquam iuxta hebraei
sermonis ambiguitatem, in quo scriptum est ulo enasse adonai, et omnes
similiter transtulerunt: non temptabo dominum, possit legi: non exaltabo
dominum. sciebat enim rex impius quod si signum peteret, accepturus
esset et glorificaretur dominus. ergo quasi idolorum cultor, qui in
omnibus angulis platearum et in montibus lucis que nemorosis aras
constituerat et pro leuitis habebat fanaticos; non uult signum petere
quod praeceptum est.
et dixit: audite ergo, domus dauid: numquid parum uobis est
molestos esse hominibus, quia molesti estis et deo meo? quis est iste
qui dixit: audite ergo, domus dauid? nequaquam deus qui supra ad achaz
dixerat: pete tibi signum a domino deo tuo; sed propheta, ut ex
consequentibus comprobatur: quia molesti estis et deo meo. et est
sensus: quia non solum prophetas persequimini et eorum dicta
contemnitis, sed praesentis et iubentis dei sententiae contraitis, ita
ut ei exhibeatis laborem, qui in alio loco ait: laboraui sustinens,
idcirco dominus faciet quae sequuntur. pro labore et molestia, quod
aquila et symmachus transtulerunt, lxx et theodotio agonem interpretati
sunt, id est, luctam atque certamen, quia contentiosi non subiciant
collum domini seruituti, sed illo uulnera eorum uolente curare, respuant
sanitatem. et hoc notandum, quod achaz rege impiissimo nolente signum
petere, sermo propheticus ad domum dauid, hoc est, ad tribum regiam
conuertatur, de qua supra legimus: et nuntiauerunt haec domui dauid,
dicentes: consenserunt syria et ephraim.
propterea dabit dominus ipse uobis signum. ecce uirgo concipiet
et pariet et uocabis nomen eius emmanuel. nequaquam multifarie iuxta
apostolum paulum et multis modis loquetur deus, nec iuxta alium
prophetam in manibus prophetarum assimilabitur; sed qui ante loquebatur
per alios, dicet ipse: adsum. de quo et sponsa rogabat in cantico
canticorum: osculetur me osculis oris sui. dominus enim uirtutum ipse
est rex gloriae. ipse descendet in uterum uirginalem et ingredietur et
egredietur orientalem portam quae semper clausa est; de qua gabriel
dicit ad uirginem: spiritus sanctus ueniet super te, et uirtus altissimi
obumbrabit te; propterea quod nascetur in te sanctum, uocabitur filius
dei. et in prouerbiis: sapientia aedificauit sibi domum.
quando autem dicitur: dabit dominus ipse uobis signum, nouum debet esse
atque mirabile. sin autem iuuencula uel puella, ut iudaei uolunt, et non
uirgo pariat, quale signum poterit appellari, cum hoc nomen aetatis
sit, non integritatis? et reuera, ut cum iudaeis conferamus pedem, et
nequaquam contentioso, fune praebeamus eis risum nostrae imperitiae,
uirgo hebraice bethula appellatur, quae in praesenti loco non scribitur;
sed pro hoc uerbo positum est alma, quod praeter lxx omnes
adolescentulam transtulerunt. porro alma apud eos uerbum ambiguum est;
dicitur enim et adolescentula et abscondita, id est apokruphos~g. unde
et in titulo psalmi noni, ubi in hebraeo positum est alamoth, ceteri
interpretes transtulerunt: pro adolescentia, quod lxx interpretati sunt:
pro absconditis. et in genesi legimus, ubi rebecca dicitur alma,
aquilam non adolescentulam, nec puellam sed absconditam transtulisse.
sunamitis quoque mulier, amisso filio, cum elisaei fuisset pedibus
prouoluta et prohiberet eam giezi, audit a propheta: dimitte eam, quia
in dolore est, et dominus abscondit a me. pro eo quod in latino dicitur:
abscondit a me, in hebraeo scriptum est: eelim memmenni. ergo alma, non
solum puella uel uirgo, sed cum epitasei~g uirgo abscondita dicitur et
secreta, quae numquam uirorum patuerit aspectibus, sed magna parentum
diligentia custodita sit. lingua quoque punica, quae de hebraeorum
fontibus manare dicitur, proprie uirgo alma appellatur. et ut risum
praebeamus iudaeis, nostro quoque sermone alma sancta dicitur. omnium
que paene linguarum uerbis utuntur hebraei, ut est illud in cantico
canticorum de graeco phoreion~g, id est ferculum, sibi fecit salomon,
quod et in hebraeo ita legimus. uerbum quoque nugas et mensuram hebraei
eodem modo et eisdem appellant sensibus. et quantum cum mea pugno
memoria, numquam me arbitror alma in muliere nupta legisse, sed in ea
quae uirgo est; ut non solum uirgo sit, sed uirgo iunioris aetatis et in
annis adolescentiae. potest enim fieri ut uirgo sit uetula, ista autem
uirgo erat in annis puellaribus. uel certe uirgo, non puellula et quae
adhuc uirum nosse non posset, sed iam nubilis. denique in deuteronomio
sub puellae et adolescentulae nomine uirgo intellegitur. si inuenerit,
inquit, homo in campo puellam desponsatam et ui opprimens dormierit cum
ea, interficietis uirum solum, qui concubuit cum ea, et puellae nihil
facietis; non est adolescentulae peccatum mortis. quia quomodo si quis
in insidiis insurgat contra proximum suum, et interficiat animam eius,
sic hoc negotium accidit. in agro inuenit eam: clamauit puella
desponsata et non est inuentus qui auxiliaretur ei. et in regum uolumine
legimus, quod quaesierint puellam uirginem nomine abisag et
introduxerint ad regem, quae dormiret cum eo et foueret eum et erat
puella pulchra nimis, et ministrabat ei, et rex non cognouit eam. quod
que sequitur: et uocabis nomen eius emmanuel, et lxx et tres reliqui
similiter transtulerunt, pro quo in matthaeo scriptum est: uocabunt,
quod in hebraeo non habetur. ergo iste puer qui nascetur ex uirgine, o
domus dauid, nunc a te appelletur emmanuel, id est nobis cum deus, quia
rebus ipsis probabis a duobus inimicis regibus liberata, deum te habere
praesentem; et qui postea uocabitur iesus, id est saluator, eo quod
uniuersum hominum genus saluaturus sit, nunc a te emmanuelis appelletur
uocabulo. uerbum carathi, quod omnes interpretati sunt uocabis, potest
intellegi et uocabit, quod ipsa scilicet uirgo quae concipiet et pariet,
hoc christum appellatura sit nomine. in multis testimoniis quae
euangelistae uel apostoli de libris ueteribus assumpserunt, curiosius
attendendum est, non eos uerborum ordinem secutos esse, sed sensum. unde
et in praesenti loco, pro: concipiet in utero, matthaeus posuit: in
utero habebit; et pro uocabis: uocabunt. hebraei hoc de ezechia filio
achaz prophetari arbitrantur, quod ipso regnante sit capta samaria, quod
omnino probari non potest. siquidem achaz, filius ioatham, regnauit
super iudam et hierusalem annis sedecim, cui successit in regnum filius
eius ezechias, annos natus uiginti quinque et regnauit super iudam et
hierusalem annis uiginti nouem. quomodo ergo, ut demus primo anno achaz
hanc ad eum factam prophetiam, de ezechiae conceptu dicitur et
natiuitate, cum eo tempore quo regnare coepit achaz, iam nouem ezechias
esset annorum, nisi forte sextum ezechiae regni annum, quo est capta
samaria, infantiam eius appellari dicant, non aetatis, sed imperii. quod
coactum esse atque uiolentum, etiam et stultis patet.
quidam de nostris esaiam prophetam duos filios habuisse contendit, iasub
et emmanuel; et emmanuel de prophetissa uxore eius esse generatum, in
typum domini saluatoris, ut prior filius iasub, quod interpretatur
relictus, siue conuertens, iudaicum populum significet, qui relictus
est, et postea reuersurus. secundum autem, id est emmanuel et nobis cum
deus, gentium uocationem, postquam uerbum caro factum est et habitauit
in nobis.
butyrum et mel comedet, ut sciat reprobare malum et eligere
bonum. pro quo lxx transtulerunt: antequam sciat. quod que sequitur:
assumere malum, in hebraico non habetur. et est sensus: o domus dauid,
cui dei sermone praecipitur, ut uoces, id est inuoces, in periculo
constituta nomen emmanuelis, id est nobis cum deus; non mireris ad rei
nouitatem, si uirgo deum pariat, qui tantam habeat potestatem, ut multo
post tempore nasciturus, te nunc liberet inuocatus; ipse est enim qui
uisus est abraham, et locutus est cum moyse. dicam et aliud mirabilius,
ne eum putes in phantasmate nasciturum, cibis utetur infantiae, butyrum
comedet et lac. et licet de eo multa post saecula euangelista testetur:
puer autem proficiebat sapientia et aetate et gratia apud deum et apud
homines; et hoc dicatur, ut ueritas humani corporis approbetur. tamen
adhuc pannis inuolutus, et butyro pastus ac melle, habebit boni mali que
iudicium, ut reprobans mala, eligat bona. non quod hoc fecerit, aut
reprobauerit, uel elegerit; sed quod scierit reprobare et eligere, ut
per haec uerba noscamus, infantiam humani corporis diuinae non
praeiudicasse sapientiae. denique iacentem in praesepio angeli
pastoribus nuntiant, magi adorant de oriente uenientes, quos utique
electos esse credendum est. et e contrario herodes, scribae ac pharisaei
reprobantur, quia pro uno infante multa paruulorum milia trucidarunt.
prius enim quam sciat puer reprobare malum et eligere bonum,
derelinquetur terra, quam tu detestaris, a facie duorum regum suorum.
sexto imperii anno ezechiae est ab assyriis capta samaria, id est
tricesimo primo anno aetatis ipsius. sic itaque iste qui nasciturus, uel
de uirgine, ut nos probamus, uel de adolescentula, ut iudaei uolunt,
butyrum et mel comedet, et tam paruulus erit, ut malum a bono discernere
nequeat et antequam ille tempus egrediatur infantiae, terra syriae et
samariae uastanda ab assyriis sit. respondeant hebraei, quomodo ezechias
triginta et uno annis infantulus praedicetur, et tam rudis aetatis, ut
mel et butyrum comedens, iuxta niniuiticos pueros, nec sinistram nec
dexteram, id est, nec malum nec bonum nouerit. relatum autem ad
emmanuel, quod interpretatur nobis cum deus, facilem habebit
intellegentiam. quod ad mysterium et inuocationem nominis eius terra
syriae et samariae, assyrio superante, uastetur; et domus dauid
liberetur a duobus regibus quos metuit, rasin uidelicet et phacee.
adducet dominus super te et super populum tuum, et super domum
patris tui dies qui non uenerunt a diebus separationis ephraim a iuda,
cum rege assyriorum. locus iste per hyperbaton legendus est. denique et
nos secuti hebraicam ueritatem, ita eum interpretati sumus: o domus
dauid, ausculta quae dico, ut derelinquatur terra syriae et samariae a
facie regum duorum, quos tu uehementissime reformidas. adducet dominus
dies super te et super domum patris tui dauid, quos numquam habuisti ex
eo tempore quo decem tribus a duabus tribubus separatae sunt et regnum
in samaria habere coeperunt. adducet autem istos dies, id est tempora,
cum rege assyriorum, ut illis superatis atque subuersis, tu emmanuelis
praesentia libereris. lxx hunc locum ita uerterunt: adducent dominus
super te et super populum tuum et super domum patris tui dies, qui
necdum uenerunt ex qua die abstulit ephraim a iuda regem assyriorum.
quod quem sensum habeat, scire non possumus, nisi forte hoc dicendum
est, quod peccatorum suorum magnitudine ephraim, id est samaria, primum
ad se assyriorum fecerit impetum declinare. aliter: interim nunc duo
reges rasin et phacee, qui te obsident et uastare festinant, breui
tempore subuertentur. tuae autem uastationis tempus illud adueniet,
quando, quod numquam speraueras, immo numquam metueras, assyrius
uenerit. per quae docet domui dauid, non syriam et samariam, sed
assyrios esse metuendos. praesenti ergo formidine liberat et de futuro
tempore comminatur.
et erit in die illa, sibilabit dominus muscae, quae est in
extremo fluminum aegypti, et api quae est in terra assur; et uenient, et
requiescent omnes in torrentibus uallium, et in cauernis petrarum, et
in omnibus frutetis, et in uniuersis foraminibus.
cum fuerit duorum regum terra deserta, damascus et samaria, quam tu nunc
detestaris et metuis. tunc adducet dominus, o domus iuda, super te et
populum tuum dies, quos numquam ante uidisti, et regem assyriorum.
frustra igitur praesentia metuis, semiustos torres et ignem penitus non
habentes; scire enim debes, quod sibilo suo dominus muscas aegypti et
fluminum eius, haud dubium quin septem di�ruchas~g nili significet,
uocaturus sit; et apem, quae est in terra assur. muscas autem aegyptios
uocat propter sordes idololatriae et imbellem populum; et apem assyrios,
quorum illo tempore potentissimum regnum erat et ad bella
promptissimum; uel ob id, quia omnis prope assyriorum et persidis regio
usum habebat sagittarum. hi igitur omnes uenient, et occupabunt terram
tuam in torrentibus uallium et cauernis petrarum et in omnibus frutetis
et foraminibus, lignis que nemorosis. haec autem per metaphoram
dicuntur, ut quia semel muscas, et apes nominauerat, translationem
seruaret in reliquis. legamus regum et paralipomenon libros, et
inueniemus ab aegyptiis caesum sanctum regem iosiam, et populum israel
potestati aegyptiae subiugatum, ita ut regem illis constitueret. et post
non multum temporis uenit nabuchodonosor cum innumerabili multitudine
bellatorum, capta que hierusalem et ceteris iudaeae urbibus dirutis,
incendit templum, et habitatores assyrios posuit in iudaea.
in die illa radet dominus in nouacula conducta, in his qui trans
flumen sunt, in rege assyriorum, caput, et pilos pedum, et barbam
uniuersam. haec quidam putant de assyriis prophetari, qui mille
trecentis annis, antequam hierusalem subuerterent, regnum asiae aegypti
que et libyae possederunt, quod a medis persis que uincendi sint et
eorum imperium destruendum. alii uero arbitrantur, quod trans flumen
euphratem caesi sint aegyptii. nos autem nouaculam mercede conductam
ipsum arbitramur assyrium, quem in hieremia, ob ultionem populi
peccatoris, etiam columbam suam uocat. denique et in uisione tyri, quia
in exstruendis munitionibus et aggere comportando nabuchodonosor
plurimum laborauerat, et illis classe fugientibus, fuerat mercede
priuatus, data est ei aegyptus pro mercede et labore suo. ergo in ista
nouacula acutissima, et in his, qui habitant trans flumen euphratem, in
rege uidelicet assyrio, omnes capillos et pilos totius corporis a capite
usque ad pedes decorem que barbae, quod uirilitatis indicium est, radet
dominus de iudaea, ut nihil in illa forte, nihil pulchrum resideat, sed
effeminatis hominibus, immo ignominiosis mulieribus comparentur.
et erit in die illa: nutriet homo uaccam boum, et duas oues, et
prae ubertate lactis comedet butyrum; butyrum enim et mel manducabit
omnis, qui relictus fuerit in medio terrae. et erit in die illa: omnis
locus ubi fuerint mille uites mille argenteis, et in spinas et in uepres
erunt. cum sagittis et arcu ingredientur illuc; uepres enim et spinae
erunt in uniuersa terra. et omnes montes qui in sarculo sarrientur, non
ueniet illuc terror spinarum et ueprium, et erit in pascua bouis et in
conculcationem pecoris. post subuersionem hierusalem et captiuitatem
populi et templi incendium, nabuzardan princeps militiae, quem lxx
archimageiron~g uocant, paucos de populo et eos pauperes dereliquit in
terra, qui uineas et agros colerent. denique godolias, qui eis
praepositus erat de regio genere relictus, hortatur et dicit: nolite
timere chaldaeos; habitate in terra et seruite regi babylonis et bene
erit uobis. in die igitur illa, hoc est in illo tempore cum fuerint
omnes opes iudaeorum translatae in chaldaeam, tanta solitudo erit in
terra iudaeae et tam incredibilis uastitas, ut nequaquam armenta boum
habeant nec greges ouium, sicut prius habere consueuerant; sed uix rarus
habitator unam uaccam nutrire possit et duas oues; non ad arandum, sed
ad cibum atque uestitum, lactis ac uelleris, propter inopiam quippe
frumenti et omnium, quae terra gignit ad comedendum, lacte ac butyro et
agresti melle uescentur. quod que ait: prae ubertate lactis comedet
butyrum, hoc significat quod terra cultorum raritate fertilior sit et
magis apta pascuis. in illo tempore prae hominum paucitate, tanta erit
uini inopia desertis uineis, quae metu hostili nequaquam putabuntur, ut
singulae uites siclis argenteis singulis uix emantur. in uepres enim et
in spinas omnis terra redigetur; tanta que erit formido, ubique
saeuientibus gladiis, ut absque arcu et sagittis nullus suum agrum
inuisere audeat, et derelictis campestribus locis, ad montana
confugiant, ibi que locorum difficultate muniti, uix asperos montes manu
fodiant, quia boues, aratra et uomeres non habebunt sicubi ergo rarus
cultor in montibus fuerit inuentus, inde uitam miserabilem sustentabunt.
cetera autem patebunt pascuis et absque ullo custode a brutis
animantibus conculcabuntur. haec post captiuitatem solere fieri, utinam
nesciremus! at nunc magna pars romani orbis quondam iudaeae similis est,
quod absque ira dei factum non putamus, qui nequaquam contemptum sui
per assyrios ulciscitur et chaldaeos. sed per feras gentes et quondam
nobis incognitas, quarum et uultus et sermo terribilis est et femineas
incisas que facies praeferentes, uirorum (et bene barbatorum!) fugientia
terga confodiunt. legisse me noui in his locis latissimam et
inextricabilem tropologiam, quod uniuersa, quae iuxta historiam
disseruimus, spiritaliter iudaeis acciderint, uix unam habentibus uaccam
et duas oues, munda uidelicet animalia, ut nequaquam solido cibo, sed
lacte nutriantur infantiae et comedant mella uerborum, quae distillant
de labiis mulieris meretricis; et uinum non habeant, quod laetificat cor
hominis, sed omnia eorum opera redigantur in spinas, ut uulnerentur ab
aduersariis, qui percutiunt in obscuro rectos corde. quod si quando
uoluerint altius quippiam sapere, et nimio labore sudantes de scripturis
sanctis mysticum aliquid inuenire, nihilominus fruges non afferant
doctrinae, sed uepribus compleantur et spinis, quae oriuntur in manibus
ebrii. et nequaquam terra eorum atque doctrina, ab hominibus,
rationalibus animantibus, sed a bobus, quorum deus curam non habet, et a
brutis animalibus conculcetur.
8. et dixit dominus ad me: sume tibi librum grandem et scribe in
eo stilo hominis: uelociter spolia detrahe, cito praedare. et adhibui
mihi testes fideles, uriam sacerdotem et zachariam filium barachiae, et
accessi ad prophetissam, et concepit, et peperit filium. et dixit
dominus ad me: uoca nomen eius: accelera, spolia detrahe, festina
praedari, quia antequam sciat puer uocare patrem suum et matrem suam,
auferetur fortitudo damasci, et spolia samariae coram rege assyriorum.
lxx pro libro grandi, interpretati sunt librum nouum et magnum. et pro
eo quod in hebraeo habetur: adhibui mihi testes fideles, dixerunt: adest
enim, et testes fac mihi fideles homines. et pro uria sacerdote, tantum
uriam, cetera similiter. primum propheta missus est ad achaz, ut ei
praediceret quae scriptura commemorat, quo audire nolente, ipse dominus
loquitur ad achaz et praecepit ei, ut petat sibi signum in profundum,
siue in excelsum. quo respondente: non petam, et non temptabo dominum,
dimisso rege impio, ad domum dauid dei uerba uertuntur, et promittitur
ei uirgo paritura filium, cuius nomen sit emmanuel, hoc est nobis cum
deus. qui si crebro fuerit inuocatus, samariae subuertatur et syria;
subuertatur autem a rege assyriorum, qui et ipsum iudam postea capturus
sit; ita ut omnis terra iudaea uertatur in solitudinem. rursum ergo sub
alia figura partus describitur uirginalis. et dixit dominus ad
prophetam, ut nequaquam in populos proferat nouae natiuitatis arcanum,
sed scribat eam in isto grandi uolumine, quod nunc legimus. et quo sit
mirabilius, humanis uerbis et stilo, quo homines scribere consueuerunt,
dei sacramenta comprehendat. quid est autem illud quod scribitur humano
stilo? ut puer natus uelociter spolia detrahat et cito praedetur, hoc
est, ne ultra patiatur regnare diabolum. nec mittat angelos nec
prophetas; sed ad saluandas creaturas suas ipse descendat. facit ergo
propheta quod iussum est et adhibet sibi duos testes fideles, uriam
sacerdotem, qui legis doctor est, dicente malachia: labia sacerdotis
custodient scientiam et legem requirent ex ore eius, quia angelus domini
exercituum est; et zachariam filium barachiae, quem prophetam fuisse
dubium non est. legimus, quod regnante achaz, zacharias sacerdos fuerit
templi domini, cui praecepit achaz, ut altare simile altaris damasci
faceret. et dierum narrat liber, quod ezechias filius achaz quaesierit
dominum in diebus zachariae eruditi in timore dei. exhibuit autem se
esaias dignum spiritu prophetali et praebuit prophetissae, id est
spiritui sancto, qui sermone hebraico uocatur genere feminino rua, iuxta
illud quod scriptum est: accedite ad dominum, et illuminamini. spiritu
itaque sancto conceptus est dominus. et licet humanus sermo natiuitatis
eius nequeat explicare, mysteria, tamen gabriel ipsi uirgini loquitur,
quae concepit: spiritus sanctus ueniet super te, et uirtus altissimi
obumbrabit te; propterea quod nascetur ex te sanctum, uocabitur filius
dei. quidam prophetissam sanctam mariam interpretantur, quam prophetin
fuisse non dubium est; ipsa enim loquitur in euangelio: ecce enim amodo
beatam me dicent omnes generationes, quoniam fecit mihi magna qui potens
est, et reliqua. praecipitur que esaiae, ut ipsum puerum, qui prius
uocabatur emmanuel, nunc appellet: accelera, spolia detrahe, festina
praedari. ascendens enim in altum, captiuam duxit captiuitatem; accepit
dona hominibus. et antequam humanum corpus assumeret, et iuxta infantiam
patrem uocaret deum et matrem mariam, auferetur damasci fortitudo, et
spolia samariae per regem assyriorum, ut necdum natus populum suum,
domum dauid, sola inuocatione saluaret. urias interpretatur lux domini.
zacharias memoria domini; et barachias benedictio domini, quibus
testibus christi natiuitas comprobatur. ipse enim in euangelio duobus
euntibus in emmaus, incipiens a moyse et prophetis, edisseruit quod de
se omnia prophetassent. iuxta tropologiam, in anima uirginali et nulla
sorde maculata, de spiritu sancto dei sermo conceptus, uelociter de
aduersariis potestatibus spolia detrahit et sibi facit uniuersa seruire.
cum que ex parte nunc uideat, et ex parte prophetet, priusquam possit
esse perfectus, et merito uocare deum patrem et matrem suam caelestem
hierusalem, adhuc in infantia et in profectu positus, uincet
fortitudinem damasci, doctrinam uidelicet sapientiae saecularis; et
auferet spolia samariae, quibus ecclesiam haeretici spoliauerunt,
dicentes: non est nobis portio in dauid, neque hereditas in filio iesse,
praesente rege ipso assyriorum, diabolo, qui eis non poterit auxiliari.
tales autem filios non solum maria prophetis, uirgo perpetua, sed et
sanctae mulieres patriarchis generant. sara, quae interpretatur
archousa~g, id est princeps: et rebecca, quae in lingua nostra
patientiam sonat. et adiecit dominus loqui ad me adhuc, dicens: pro eo
quod abiecit populus iste aquas siloe, quae uadunt cum silentio, et
assumpsit magis rasin et filium romeliae, propter hoc ecce dominus
adducet super eos aquas fluminis fortes et multas, regem assyriorum et
omnem gloriam eius; et ascendet super omnes riuos eius et fluet super
uniuersas ripas eius. et ibit per iudam inundans, et transiens usque ad
collum ueniet, et erit extensio alarum eius implens latitudinem terrae
tuae, o emmanuel. dixerat supra auferendam damasci fortitudinem, et
spolia samariae in conspectu regis assyriorum, et duos reges, assyrio
pugnante, capiendos. nunc deus loquitur ad prophetam charactere solito
scripturarum, per translationem siloe fontis hierusalem, et assyrii
fluminis uiolentissimi, quod omnem terram israel suis inundet aquis et
egrediatur ripas aluei, tanto que feratur impetu, ut postquam decem
tribuum occupauerit terram, ad iudam perueniat, et transiens ad collum
usque pertingat, per quae uicinam significat captiuitatem. non enim tunc
captus est iuda, sed cunctis duarum tribuum urbibus subiugatis, sola
remansit hierusalem, quae incredibili dei misericordia liberata est.
potentiam ergo assyrii et innumerabilis eius exercitus, quam sub
fluminis inundatione descripserat, nunc per aliam ostendit
translationem, quod alis suis, id est, ducibus et infinita multitudine
operuerit terram emmanuelis, hoc est: defendentis eam dei. sed tamen non
possederit, quamquam emmanuel a lxx sequenti capitulo coaptetur, non
proprio nomine, ut apud hebraeos uocatur, sed interpretato, id est:
nobis cum deus. siloe autem fontem esse ad radices montis sion, qui non
iugibus aquis, sed in certis horis diebus que ebulliat, et per terrarum
concaua et antra saxi durissimi cum magno sonitu ueniat, dubitare non
possumus, nos praesertim qui in hac habitamus prouincia. est autem
sensus, quia populus decem tribuum magis uoluit rasin et filio romeliae,
id est damasci et samariae regibus esse subiectus, quam stirpi dauid,
quae meo coepit regnare iudicio, faciam eum nequaquam his regibus, quos
assumpsit, sed regi seruire assyrio, cuius potentia occupantis terram
samariae, inundationi fluminis comparatur. et fit apostropha ad
emmanuel, hoc est, ad praesentem deum, quod in tantum se erexerit
assyrius, ut etiam terram ipsius iudam conatus sit possidere. iuxta
anagogen, omnis haereticus qui iunxerit auxilio suo sapientiam
saecularem et hierusalem, id est ecclesiam, uoluerit oppugnare,
derelinquens aquas siloe fontis qui interpretatur missus, et qui salit
in uitam aeternam, tradetur assyriorum principi, quem sensum magnum in
posterioribus lecturi sumus, cuius traditus potestati, in profundum
ueniet peccatorum. tantae est enim arrogantiae, ut ausus sit ostendere
saluatori uniuersa regna terrae, et dicere: haec omnia mihi tradita
sunt. conabitur quoque iudam, id est domum confessionis, intrare, et
crebro per eos qui in ecclesia neglegentes sunt, usque ad collum ueniet,
credentes in christo cupiens suffocare, et extendet alas suas, implens
uniuersam regionem emmanuelis. sed non poterit obtinere, quia habet
iudas praesentem deum. legimus in euangelio secundum ioannem, quod
caecum a natiuitate, cuius oculos, luto ex saliua sua facto dominus
linierat, miserit ad aquas siloe, quibus cum caecus lauisset lutum,
caecitate detersa, clarum oculorum lumen accepit. quod, post signi
magnitudinem, indicat non aliter caecitatem iudaeorum et omnis increduli
posse sanari, nisi doctrina aquarum christi, quae absque strepitu et
clamore uerborum leniter fluit, tenebrae prioris fugentur erroris. hoc
quod in septuaginta legitur: et ambulabit super omnem murum uestrum, et
auferet de iudaea hominem, qui possit caput leuare, aut forte aliquid
facere. in hebraico non habetur, et in graecis codicibus (signum_obeli)
ueru iugulante confossum est.
congregamini populi et uincimini, et audite uniuersae procul
terrae: confortamini et uincimini. accingite uos, et uincimini; inite
consilium et dissipabitur; loquimini uerbum, et non fiet, quia nobis cum
deus. pro congregamini, siue infirmamini, et confringimini, ut
interpretati sunt alii, lxx posuerunt: scitote. uerbum enim hebraicum
rou, propter res litterae, et daleth similitudinem, intellexerunt dou. o
igitur populi samariae et syriae, infirmos et debiles esse cognoscite,
et emmanuele praesente, nihil posse contra hierusalem urbem dei; et hoc
non solum uos, qui uicini estis, sed cuncta procul terra cognoscat.
quamuis enim exercitum congregetis, et accingatis uos ad proelium, et
maior sit numerus obsidentium quam obsessorum, tamen non semel, sed
iterum dicam: uincimini. et quodcumque contra hierusalem inieritis
consilium, dissipabitur. et licet supra dixeritis: ascendamus ad iudam,
et suscitemus eum quiescentem, et ponamus regem super eum filium tabeel.
loquimini quidem uerbum, sed non fiet, quia nobis cum est deus, id est
emmanuel. possumus hoc testimonio et contra gentes abuti in
persecutionis tempore, quod quamuis fortes esse uideantur et nos
superare in his qui lapsi sunt, tamen uincantur in his qui pro christo
fuderunt sanguinem et quod post bella pax reddatur ecclesiis; et
uniuersa eorum contra emmanuelem consilia dissipentur, quia nobis cum
sit deus.
contradicentes quoque ueritati utiliter audient, ut tandem ratione
superentur et nequaquam uelint in mendacio uincere, quia quodcumque
dixerint, numquam peruersitas possit superare quod rectum est.
haec enim ait dominus ad me: sicut in forti manu erudiuit me, ne
irem in uia populi huius dicens. non dicatis: coniuratio; omnia enim
quae loquitur populus iste, coniuratio est; et timorem eius ne timeatis,
neque paueatis. dominum exercituum ipsum sanctificate; ipse pauor
uester et ipse terror uester. et erit uobis in sanctificationem, in
lapidem autem offensionis et in petram scandali duabus domibus israel,
in laqueum et in ruinam habitantibus hierusalem; et offendent ex eis
plurimi, et cadent, et conterentur, et irretientur, et capientur.
septuaginta hunc locum ita interpretati sunt: haec dicit dominus: forti
manu recesserunt ab itinere uiae populi huius loquentes, ne forte
dicant: durum est. omnia enim quae loquitur populus iste, dura sunt;
timorem autem eius ne timueritis, neque conturbemini. dominum uirtutum
ipsum sanctificate et ipse erit timor tuus, et si in ipso confisus
fueris, erit tibi in sanctificationem, et non ut lapidi offensionis
occurretis, neque ut petrae ruinae. domus autem iacob in laqueo et in
conualle erit sedentibus in hierusalem; ideo infirmi erunt in ipsis
plurimi, et ruent et conterentur, et appropinquabunt, et capientur. quod
que sequitur: homines in tuitione, obelo praenotandum est. quia multum
inter se hebraicum distat et uulgata editio, ideo utrumque posuimus. et
primum de hebraico disputandum est: haec ad me locutus est dominus. qui
propter bona opera, et gratiam quae per bona opera consecutus sum, siue
forti manu sua erudiuit me et instituit, ne ambularem in uia populi
huius, et pari tenerer errore. uel certe fecit me recedere a uia populi
huius pessima, et dixit mihi: noli duorum regum timere coniurationem;
sed hoc magis considera, quod omne quod loquitur hic populus aduersum
me, coniuratio sit; et secundum symmachum, qui interpretatus est
antarsin~g, in me exstiterit perduellis. tu autem propheta et hi qui te
cum sunt, ne timeatis insidias populi, sed dominum timete, et ipse sit
timor uester. principium enim sapientiae timor domini. qui erit
credentibus in sanctificationem, incredulis autem in lapidem offensionis
et in petram scandali, duabus scilicet domibus iudae et israel.
praecipue autem in laqueum et in ruinam habitantibus in hierusalem, in
quo impingent plurimi, et cadent, et conterentur, peccatorum que suorum
uinculis irretiti, ducentur in captiuitatem. duas domus nazaraei, qui
ita christum recipiunt, ut obseruationes legis ueteris non omittant,
duas familias interpretantur, sammai et hellel, ex quibus orti sunt
scribae et pharisaei, quorum suscepit scholam akibas, quem magistrum
aquilae proselyti autumat et post eum meir, cui successit ioannan filius
zachai, et post eum eliezer, et per ordinem telphon, et rursum ioseph
galilaeus, et usque ad captiuitatem hierusalem iosue. sammai igitur et
hellel non multo priusquam dominus nasceretur, orti sunt in iudaea,
quorum prior dissipator interpretatur, sequens profanus; eo quod per
traditiones et deuter�seis~g suas legis praecepta dissipauerit atque
maculauerit. et has esse duas domus, quae saluatorem non receperint, qui
factus sit eis in ruinam et scandalum. iuxta lxx, manu forti restitit
populus dei uoluntati et dicit omnia dura esse quae dominus praecepit,
secundum illud quod in euangelio legimus: durus est hic sermo, quis
poterit audire eum? unde praecipitur eis ut dominum audiant et ipsum
solum timeant. si enim ipso confisi fuerint, habebunt eum in
sanctificationem, et non impingent quasi in lapidem scandali, et quasi
in petram ruinae. de hoc loco et apostolus sumit testimonium, quod
christus iudaeis factus sit in scandalum, gentibus autem in stultitiam.
et rursum: israel sectando legem iustitiae, in legem iustitiae non
peruenit. quare? quia non ex fide, sed quasi ex operibus legis
offenderunt in lapidem offensionis, sicut scriptum est: ecce ponam in
sion lapidem offensionis et petram scandali; omnis qui credit in eo, non
confundetur. ergo qui non receperunt emmanuelem, sed factus est eis in
lapidem offensionis et in petram scandali, conterentur, captiui que
ducentur. quod que ait: domus autem iacob in laqueo et in conualle erit
sedentibus in hierusalem, hoc significat, quod non habitent in montibus,
nec in excelsis scripturarum uersentur locis; sed semper humilia
intellegant, peccatis peccata sociantes et uincti laqueis delictorum.
liga testimonia, signa legem in discipulis meis, et exspectabo
dominum, qui abscondit faciem suam a domo iacob, et praestolabor eum.
uox domini loquentis ad prophetam: quia, inquit, factus est dominus in
lapidem offensionis et in petram scandali duabus domibus israel, et
missum ad se emmanuel suscipere noluerunt. liga testimonia ueteris
instrumenti, et trade illa discipulis meis, qui euangelium susceperunt,
apostolis uidelicet, siue apostolicis uiris. uel certe lex et prophetia
usque ad ioannem ligetur apud eos et clausa sit atque signata, ut quod
legunt, non intellegant. pro discipulis enim, iuxta hebraici sermonis
ambiguitatem, possumus et doctrinas interpretari. unde propheta
respondit: quia euangelio succedente, lex apud iudaeos clausa est atque
signata et iubes eam nequaquam iudaeis, sed gentibus assignari. idcirco
ego exspectabo emmanuelem, quem promittis esse uenturum, de quo supra
dixisti, quod ipse sit pauor noster, et ipse terror noster, et nobis sit
in sanctificationem; et praestolabor dominum qui abscondit faciem suam a
domo iacob, hoc est, a iudaeis, quia eum recipere noluerunt. lxx hunc
locum ita interpretati sunt: tunc manifesti erunt qui signantur, ut non
discant legem. quod hunc sensum habet, quando ceciderint plurimi, et
contriti fuerint, et impegerint in lapidem offensionis, et in petram
scandali, tunc manifesti erunt qui signantur in populo, ut nequaquam
discant legem moysi; sed oboediant praeceptis euangelicis.
ecce ego et pueri, quos mihi dedit dominus in signa atque
portenta israelis, a domino exercituum qui habitat in monte sion.
praecepit mihi, ait dominus, ut ligarem testimonium in iudaeis et legem
discipulis eius traderem atque signarem, quia abscondisset faciem suam a
domo iacob; ideo praestolabor eum et exspectabo dominum meum, et non
solum ego, sed et pueri, quos mihi dedit dominus, alii uidelicet
prophetae et filii prophetarum, qui non ex uoluntate carnis et
sanguinis, sed ex deo nati sunt. de quibus et apostolus loquebatur:
filioli mei, quos iterum parturio, donec christus formetur in uobis.
isti autem pueri, id est prophetae, in signa dati sunt et in portenta
israeli, iuxta illud quod in hiezechiele legimus: et erit hiezechiel
uobis in signum. in zacharia quoque sancti uiri prophetarum que
discipuli teratoskopoi~g, id est portentorum signorum que spectatores
appellantur, eo quod semper prophetae in signum praecesserint futurorum.
hoc interim iuxta litteram. ceterum beatus apostolus in epistola, quae
ad hebraeos scribitur, docet, licet eam latina consuetudo inter
canonicas scripturas non recipiat, hoc testimonium ex persona debere
intellegi domini saluatoris. quamobrem non erubescit fratres eos uocare,
dicens: annuntiabo nomen tuum fratribus meis, in medio ecclesiae
laudabo te. et iterum: ego ero confidens in eum; et rursum: ecce ego et
pueri mei, quos mihi dedit deus. quia ergo pueri communicauerunt carni
et sanguini et ipse similiter particeps factus est earumdem passionum.
quomodo autem isti pueri in signum fuerint atque portentum sapientiae
saeculi et superbiae iudaeorum, idem apostolus docet, qui elegisse dicit
dominum saluatorem stulta mundi et infirma, ut confunderet sapientes et
fortia. unde et ad apostolos saluator aiebat: nisi conuersi fueritis
quasi unus de pueris, non intrabitis in regnum caelorum. puer autem
efficitur noui euangelii praedicator, qui deponit ueterem hominem, qui
corrumpitur in desideriis seductionis, et induitur nouo, qui renouatur
in cognitionem iuxta imaginem creatoris. habitare autem dominum
exercituum in monte sion, idem apostolus scribit: accessistis ad montem
sion et ciuitatem dei uiuentis, hierusalem caelestem. unde miror quemdam
nostrorum pueros istos duos esaiae filios intellegere, quos de
prophetissae mulieris conceptione generarit, iasub uidelicet et
emmanuel, quorum prior in abiectione prioris populi, sequens in
assumptione gentium praecesserit. quod qui recipit, consequenter et osee
prophetam uere meretricem uxorem habuisse firmabit.
et cum dixerint ad uos: quaerite a pythonibus et a diuinis, qui
strident in incantationibus suis, numquid non populus a deo suo requirit
pro uiuis a mortuis? ad legem magis et ad testimonium. quod si non
dixerint iuxta uerbum hoc, non eis erit matutina lux. et transibit per
eam; corruet, et esuriet; et cum esurierit, irascetur, et maledicet regi
suo, et deo suo. et suspiciet sursum, et ad terram intuebitur, et ecce
tribulatio et tenebrae, dissolutio, angustia, et caligo persequens; et
non poterit auolare de angustia sua. si esaiae prophetae uox est, ut
iudaei aestimant: ecce ego et pueri mei, quos mihi dedit dominus in
signum et in portentum israelis; et haec quae sequuntur, ipse ad
discipulos suos credendus est dicere.
cum dixerint, inquit, ad uos gentes et populi, de quibus supra lectum
est: infirmamini, populi, et uincimini; quid prophetas uultis audire,
quid esaiae uerbis decipimini et illum putatis quae uentura sunt nosse?
quaerite magis a pythonibus et a diuinis, qui strident in
incantationibus suis. pro quibus lxx interpretati sunt: qui de terra
loquuntur, qui de uentre clamitant. omnis enim, qui de terra est, de
terra loquitur. et cuius deus uenter est, et gloria in confusione eius,
de uentre clamare credendus est. uos respondete eis, et dicite: numquid
non populus a deo suo requirit pro uiuis a mortuis? si uos, inquit, pro
uarietate idolorum uestrorum, non enim unum, sed plures habetis deos,
eos consulitis, quos deos arbitramini; et a mortuis siue mortuorum
hominum simulacris, de uiuentibus quaeritis: quanto magis nos deum
nostrum per prophetas audire debemus? docet ergo discipulos; et infert
ad legem magis et ad testimonium. si de aliquo, inquit, dubitatis,
scitote scriptum: gentes, quas dominus deus tuus disperdet a facie tua,
somnia audiunt et diuinos. tibi autem non ita tradidit dominus deus
tuus: prophetam uobis suscitabit dominus deus uester de fratribus
uestris; sicut me, illum audietis. unde si uultis nosse quae dubia sunt,
magis uos legi, et testimoniis tradite scripturarum. quod si noluerit
uestra congregatio uerbum domini quaerere, non habebit lucem ueritatis,
sed uersabitur in errore tenebris que. lux pertransibit eam, hoc est,
congregationem uestram, siue terram, et corruetis, et esurietis, et cum
esurieritis, irascemini, secundum illud quod scriptum est: et cum non
fuerint saturati, murmurabunt; et maledicetis deo regi uestro, et in
necessitatibus sursum aspicietis in caelum, et in terram deorsum; et
ecce tribulatio et tenebrae, dissolutio genuum, et mentis angustia, et
caligo oculorum, et non poteritis erui de angustia. haec iuxta hebraeos.
ceterum ut supra diximus, si persona christi est dicentis: ecce ego, et
pueri, quos mihi dedit deus. etiam haec ipse loquitur ad apostolos et
ad credentes ex gentibus, qui eius euangelium susceperunt. si dixerint,
inquit, patres uestri quos reliquistis: quaerite uentriloquos, quos
pythonas intellegimus, qualem et in actibus apostolorum ancillam
legimus, quae quaestui erat dominis suis; et qui de terra loquuntur,
quod in euocatione animarum magi se facere pollicentur, et cetera
maleficarum artium genera; hoc scire debetis, quod unaquaeque gens
proprios consulat deos et de uiuorum salute mortuos sciscitetur. uobis
autem in auxilium legem dedit deus, ut possitis dicere: non est talis
ethnicorum diuinatio, qui cultores suos saepe decipiunt, sicut nostra,
quae absque ullo munere profertur ex lege. unde interpretati sunt lxx:
non sicut uerbum hoc, pro quo non est dare munera. gratis enim, inquit,
accepistis, gratis date. ueniet autem super incredulos fames durissima,
non fames panis aut sitis aquae, sed fames audiendi sermonem dei. et cum
esurieritis, contristabimini, et maledicetis principi uestro et
paternis traditionibus, hoc est diabolo et antiquis erroribus. hoc autem
ad eos loquitur qui famem passi fuerint ueritatis, et suspicient in
caelum sursum et in terram deorsum, et erunt in angustia, in tenebris et
in tribulatione, ut non uideant usque ad tempus, donec et ipsi ad
dominum conuertantur. latam explanationem loca ista desiderant, sed
parcimus librorum magnitudini, ut tollamus fastidium lectionis. haec
iuxta lxx translationem ex parte perstrinximus, quae in plerisque
dissonat ab hebraeo. ceterum nazaraei locum istum ita disserunt: cum
dixerint ad uos scribae et pharisaei, ut eos audiatis, qui omnia uentris
causa faciunt; et in morem magorum stridunt in incantationibus suis, ut
uos decipiant, hoc eis respondere debetis. non mirum si uos uestras
traditiones sequamini, cum unaquaeque gens sua consulat idola. ergo et
nos a uobis mortuis de uiuentibus consulere non debemus, magis nobis
deus legem dedit, et testimonia scripturarum, quae si sequi nolueritis,
non habebitis lucem, sed semper caligo uos opprimet, quae transibit per
terram uestram atque doctrinam, ut cum decepti a uobis se in errore
perspexerint, et sustinere famem ueritatis, tunc contristentur, siue
irascantur; et maledicant uobis, quos quasi deos suos et reges putabant.
et frustra ad caelum terram que respiciant, cum semper in tenebris
sint, et non possint de uestris auolare insidiis.
9. primo tempore alleuiata est terra zabulon, et terra nephthali;
et nouissimo aggrauata est uia maris trans iordanem galilaeae gentium.
populus qui ambulabat in tenebris, uidit lucem magnam; habitantibus in
regione umbrae mortis, lux orta est eis. lxx: hoc primum bibe, uelociter
fac regio zabulon, terra nephthalin, et reliqui, qui iuxta mare estis
trans iordanem galilaeae gentium. populus, qui ambulabat in tenebris,
uidit lucem magnam; qui habitatis in regione et umbra mortis, lux
orietur uobis. duplicem posuimus editionem, quia uulgatum est
testimonium et usurpatum ab euangelista matthaeo, ut uel diuersitas
interpretationis uel similitudo noscatur. ac primum notandum quod
testimonium hoc euangelista matthaeus non iuxta lxx, sed iuxta hebraeos
posuerit. dicit enim sermo euangelicus: audiens autem iesus, quod
ioannes esset traditus, secessit in galilaeam, et derelinquens nazareth,
uenit et habitauit in capharnaum, quae est iuxta mare in finibus
zabulon et nephtalim; ut impleretur quod dictum est per esaiam
prophetam, dicentem: terra zabulon et terra nephtalim, uia maris trans
iordanem galilaeae gentium; populus, qui sedebat in tenebris, uidit
lucem magnam; sedentibus in regione umbrae mortis, lux orta est eis. ex
eo tempore coepit iesus praedicare et dicere: appropinquauit regnum
caelorum. et ioannes euangelista refert quod iesus cum discipulis suis
in cana galilaeae inuitatus ad nuptias, primum ibi signum fecerit; aquas
in uinum conuertendo: hoc fecit principium signorum iesus in cana
galilaeae; et manifestauit gloriam suam; et crediderunt in eum discipuli
eius. unde et in lxx dicitur: hoc primum bibe, uelociter fac. quia
terra zabulon et terra nephthali prima christi uidere miracula, ut prima
biberet fidei potionem, quae prima uiderat dominum signa facientem. et
iuxta hebraicum, primo tempore releuata esse dicitur onere peccatorum,
quia in regionibus duarum tribuum primum saluator euangelium
praedicauit. unde et in sexagesimo septimo psalmo dicitur: benedicite
dominum de fontibus israel. ibi beniamin adolescentior (paulus
apostolus) in mentis excessu, qui et alibi loquebatur: siue mente
excedimus deo. principes zabulon, principes nephthali duces eorum; quia
in his tribubus fuere uiculi, de quibus duces nostri apostoli
crediderunt. et crediderunt iuxta symmachum uelociter, ut audientes:
uenite, et faciam uos piscatores hominum, statim et patrem relinquerent
et nauiculam. nouissimo autem tempore aggrauata est fides eorum plurimis
iudaeorum in errore permanentibus. mare autem hic lacum appellat
genesareth, qui iordane influente efficitur; in cuius litore capharnaum,
et tiberias, et bethsaida, et chorozaim sitae sunt, in qua uel maxime
regione dominus commoratus est; ita ut populus, qui uel sedebat uel
ambulabat in tenebris, lucem uideret, nequaquam paruam, ut aliorum
prophetarum, sed magnam, ut eius qui in euangelio loquitur: ego sum lux
mundi. et qui habitabant in regione umbrae mortis, lux orta est eis.
inter mortem et umbram mortis, hoc esse puto, quod mors eorum est, qui
cum operibus mortuis ad inferos perrexerunt: anima enim, quae
peccauerit, ipsa morietur. umbra autem mortis eorum est, qui cum
peccent, necdum de uita ista egressi sunt; possunt enim si uoluerint
agere paenitentiam. pro galilaea gentium, aquila thinas~g gentium,
symmachus terminos gentium interpretati sunt; thinas~g autem tumulos
intellegimus arenarum, qui uel in litoribus uel in ripis sunt. hebraei
credentes in christum hunc locum ita edisserunt: primo tempore hae duae
tribus zabulon et nephthali ab assyriis captae sunt et ductae in
hostilem terram; et galilaea deserta est, quam nunc propheta dicit
releuatam esse, eo quod peccata populi sustineret. postea autem non
solum duae tribus, sed et reliquae, quae habitabant trans iordanem et in
samaria, ductae sunt in captiuitatem. et hoc, inquiunt, scriptura nunc
dicit, quod regio cuius populus primus ductus est in captiuitatem et
babyloniis seruire coepit, et quae prius in tenebris uersabatur erroris,
ipsa primum lucem praedicantis uiderit christi, et ex ea in uniuersas
gentes sit euangelium seminatum. nazaraei, quorum opinionem supra posui,
hunc locum ita explanare conantur: adueniente christo et praedicatione
illius coruscante, prima terra zabulon et terra nephthali scribarum et
pharisaeorum est erroribus liberata, et grauissimum traditionum
iudaicarum iugum excussit de ceruicibus suis. postea autem per
euangelium apostoli pauli, qui nouissimus apostolorum omnium fuit,
ingrauata est, id est multiplicata praedicatio; et in terminos gentium
et uiam uniuersi maris christi euangelium splenduit. denique omnis
orbis, qui ante ambulabat uel sedebat in tenebris, et idololatriae ac
mortis uinculis tenebatur, clarum euangelii lumen aspexit.
multiplicasti gentem, non magnificasti laetitiam; laetabuntur
coram te, sicut laetantur in messe, sicut exsultant uictores, capta
praeda, quando diuidunt spolia. iugum enim oneris eius et uirga humeri
illius, et sceptrum exactoris eius superasti, sicut in die madian. quia
omnis uiolenta praedatio cum tumultu; et uestimentum mixtum sanguine
erit in combustionem et cibus ignis.
lxx: plurimam partem populi deduxisti in laetitia tua; et laetabuntur in
conspectu tuo, sicut laetari solent in messe, et sicut hi qui diuidunt
spolia; quia ablatum est iugum quod supra ipsos erat positum, et uirga
de collo eorum. uirga enim exactorum dissipabitur, sicut in die madian.
quia omnem stolam congregatam dolo, et uestimentum commutationis
restituent; et cupient igne esse combusti. in obscuris locis utramque
editionem ponimus, ut quantum a ceteris editionibus et ab hebraica
ueritate distet uulgata translatio, diligens lector agnoscat. ad lucem
ipsam, quae apparuit populo in tenebris constituto, id est ad dominum
saluatorem fit apostropha. et dicitur ad eum: multiplicasti gentem, hoc
est: replesti omnes gentes notitia tui; sed non magnificasti laetitiam.
iuxta quod apostolus maerorem sibi dicit esse perpetuum pro fratribus
suis qui sunt israelitae. et ionas contristatur, quod ita saluati sint
niniuitae, ut cucurbita siue ciceion aruerit. et ipse dominus loquitur
in euangelio: non ueni nisi ad oues perditas domus israel. et in
passione: pater, si fieri, inquit, potest, transeat calix iste a me. qui
locus hunc sensum habet: si potest fieri ut sine interitu iudaeorum
credat gentium multitudo, passionem recuso. sin autem illi excaecandi
sunt, omnes gentes uideant, fiat, pater, uoluntas tua. cum ergo christus
aduenerit, et christianorum gens de uniuersis gentibus fuerit
congregata, tunc laetabuntur apostoli, sicut messores laetantur in
messe, de quibus dominus loquebatur: messis quidem multa, operarii autem
pauci. et sicut exsultant uictores, qui captam diuidunt praedam. cum
enim fortis captus fuerit et ligatus, omnis domus eius diripitur et
diuiduntur spolia. tu autem, domine atque saluator, iugum oneris eius,
hoc est diaboli, qui prius exsultabat in mundo, qui cunctis gentibus
imperabat, qui grauissimo seruitutis iugo colla omnium deprimebat; et
uirgam qua percutiebat uniuersos, et peccata sibi quasi quoddam tributum
reddere compellebat, detraxisti de humeris eorum; et tibi liberatos
seruire fecisti absque ullo exercitu et absque effusione sanguinis in
abscondita manu, sicut quondam sub gedeone populo israel de madianitis
uictoriam praebuisti. quomodo enim uestis, quae humano sanguine cruenta
est, lauari non potest; sed infecta sanguine igne comburitur, ut maculae
cum uestimento foedi cruoris intereant; sic diaboli uiolenta praedatio
et tumultus ac turbae, quibus humanum, sibi subiecerat genus, gehennae
ignibus deputatae sunt. lxx non omnes, sed partem quamdam populi
credidisse significant; licet pro eo quod illi dixerunt deduxisti in
laetitia, alii interpretati sint magnificasti. et cum in reliquis eumdem
sensum teneat, stolam congregatam dolo et uestimentum commutatum, eum
adiciunt redditurum, id est diabolum; quod scilicet omnes animas, quas
dei auxilio nudauerat, cum ornamentis pristinis redditurus sit; non
solum ipse, sed et satellites eius daemones, quibus si optio detur,
magis eligant perire flammis, quam praedam perdere.
paruulus enim natus est nobis, filius datus est nobis; et factus
est principatus super humerum eius; et uocabitur nomen eius admirabilis,
consiliarius, deus, fortis, pater futuri saeculi, princeps pacis.
multiplicabitur eius imperium et pacis non erit finis, super solium
dauid et super regnum eius, ut confirmet illud et corroboret in iudicio
et iustitia, amodo et usque in sempiternum. zelus domini exercituum
faciet hoc. lxx: quia paruulus natus est nobis, filius datus est nobis,
cuius principatus factus est super humerum eius; et uocatur nomen eius
magni consilii nuntius. adducam enim pacem super principes, et sanitatem
eius. magnus principatus illius et pacis non est terminus, super
thronum dauid et regnum eius, ut corrigat illud, et auxilietur in
iudicio et iustitia; ex hoc nunc et usque in saeculum. zelus domini
sabaoth faciet haec. ideo diabolus, et omnis eius uiolenta praedatio,
qua humanum oppresserat genus, et sanguinem sanguini miscuerat, erit in
combustionem, et cibus ignis aeterni, quia natus est nobis de uirgine
puer, de quo supra dictum est: antequam sciat puer reprobare malum et
eligere bonum; et postea in generatione prophetissae: antequam sciat
puer uocare patrem suum et matrem suam. iste igitur puer, qui natus est
de uirgine, appellatur emmanuel, id est nobis cum deus; et de
prophetissa, hoc est de sancto generatus spiritu, nuncupatus est:
accelera, spolia detrahe, festina praedari; nunc multis nominibus
appellatur. et licet ex eo quod supra dixerat, emmanuel, id est nobis
cum deus, deum illum esse monstrauerit; tamen nunc dicit factum illius
principatum super humerum eius, uel quod crucem suam ipse portauerit,
uel per humerum ostendens brachii fortitudinem, eodem esaia dicente:
reuelauit dominus deus brachium sanctum suum omnibus gentibus. et
rursum: domine, quis credidit auditui nostro; et brachium domini cui
reuelatum est?
uocabitur ergo post duo nomina, sex aliis nominibus: admirabilis,
consiliarius, deus, fortis, pater futuri saeculi, princeps pacis. non
enim, ut plerique putant, bina iungenda sunt nomina, ut legamus:
admirabilis consiliarius, et rursum: deus fortis; sed admirabilis
legendum est separatim, quod hebraice dicitur phele; et consiliarius
seorsum, qui lingua eorum appellatur ioes; et deus separatim, qui
hebraice el dicitur. denique in consequentibus ubi legimus: tu es enim
deus et nesciebamus; et iterum: ego sum deus et non est alius praeter
me; et multa his similia, pro eo quod in latino dicitur deus, in
hebraico el scriptum est. quod que sequitur fortis, hebraice gibbor
appellatur. unde et in eo loco ubi idem propheta commemorat: erunt
confidentes super deo sancto israel in ueritate, et quod residuum est
iacob super deo forti, pro deo forti in hebraico scriptum habet el
gibbor. patrem autem futuri saeculi et resurrectionis, quod in nostra
uocatione completur: et principem pacis - qui locutus est ad apostolos:
pacem meam do uobis, pacem meam relinquo uobis - non dubitabit, qui
pacem nostram iuxta paulum apostolum legerit saluatorem. qua nominum
maiestate perterritos lxx reor non esse ausos de puero dicere, quod
aperte deus appellandus sit et cetera; sed pro his sex nominibus
posuisse, quod in hebraico non habetur: magni consilii angelum, et
adducam pacem super principes, et sanitatem eius. quod hunc mihi sensum
habere uidetur: magni consilii angelus est, qui nuntiauit nobis
abiciendum pro tempore israel et gentes esse saluandas; dedit que pacem
principibus suis, apostolis et apostolicis uiris, et sanitatem dogmatum
suorum credentibus dereliquit. quod autem sequitur: multiplicabitur eius
imperium, et pacis non erit finis, pro quo lxx transtulerunt: magnus
principatus eius, scire debemus quod uerbum hebraicum mesra et hic et
supra lxx arch�n~g, id est principatum, interpretati sunt. pro quo nos
supra principatum, hic imperium uertimus. aquila autem, uerbi
ambiguitate deceptus, metron~g, id est mensuram, interpretatus est, quae
et hebraice et latine eodem appellatur nomine. nec dubitare poterit de
multiplici saluatoris imperio et pace eius, quae non habeat finem, qui
in psalmis legerit: postula a me et dabo tibi gentes hereditatem tuam,
et possessionem tuam terminos terrae; et rursum: et multitudo pacis,
donec auferatur luna; id est: usque ad consummationem saeculi.
principatus autem illius et imperium erit super solium et regnum dauid,
quod post captiuitatem babyloniam fuerat dissipatum, ut confirmet illud
et corroboret, et doceat esse perpetuum, ne cassa dei promissio
uideretur, ab incarnationis tempore usque in sempiternum. propterea
autem zelus, id est aemulatio, domini exercituum fecit hoc, quia ipsi
eum ad aemulationem prouocauerunt in his qui non erant dii, et ille eos
prouocauit ad aemulandum in gente, quae non erat gens. coepta emmanuelis
et nascentis pueri de uirgine prophetia, ex eo loco ubi dicitur ad
achaz: pete tibi signum a domino deo tuo, uersiculo isto finita est, quo
infertur: zelus domini exercituum faciet hoc. nunc ad reliqua
transeamus.
LIBER 4
inaequales dictamus libros, et pro diuersitate uisionum ac sensuum,
alius contrahitur, alius extenditur, itaque finito tertio uolumine,
transimus ad quartum, qui tertia mensura uersuum priore minor est,
praesertim cum quintus, quem huic libro subiecimus, historicae
explanationis sit, et paene duplicem numerum habeat. dum enim nolumus
coniuncta diuidere, et olim interpretata transire, quasi inter duas
maris pontici sumpl�gadas~g nauiculam nostram direximus, quae flante
spiritu sancto et domino saluatore cursum dirigente nostrum, elabitur in
pelagus, dicente te, uirgo christi eustochium: a quattuor uentis caeli
ueni, spiritus, et mortua ossa uiuifica, ut quae iacebant in terrae
puluere, spirante domino, suscitentur.
9. uerbum misit dominus in iacob, et cecidit in israel. et sciet
populus omnis ephraim et habitantes samariam, in superbia et magnitudine
cordis, dicentes: lateres ceciderunt, sed quadris lapidibus
aedificabimus; sycomoros succiderunt, sed cedros immutabimus. et
eleuabit dominus hostes rasin super eum, et inimicos eius in tumultum
uertet, syriam ab oriente, et philisthiim ab occidente, et deuorabunt
israel toto ore. in omnibus his non est auersus furor eius, sed adhuc
manus eius extenta, et populus non est reuersus ad percutientem se, et
dominum exercituum non inquisierunt. legimus supra quod in diebus achaz
filii ioatham, filii oziae regis iuda, ascenderit rasin rex syriae, et
phacee filius romeliae rex israel in hierusalem, ut expugnarent eam. et
quod missus sit esaias propheta in occursum achaz cum iasub filio suo,
ut ei diceret, ne timeret et cor illius ne formidaret a duabus caudis
titionum fumigantium, eo quod in ipsis esset syriae et israel imperium
finiendum. quo non credente propter rei magnitudinem et praesens
periculum, iubetur ut sibi postulet signum. et quia idololatra erat, hoc
quoque facere noluit; propterea dominus nequaquam ipsi regi, sed domui
dauid dat signum filii sui de uirgine nascituri, ad cuius inuocationem
sint de imminenti periculo liberandi et cetera quae usque ad praesentem
locum interpretati sumus. multis ergo mysteriis in medio positis, nunc
reuertitur ad id est quod coeperat, et euersionem rasin et ephraim, hoc
est syriae et samariae, uaticinatur: uerbum, inquiens, misit dominus in
iacob et cecidit in israel. apud hebraeos dabar quod per tres litteras
scribitur consonantes daleth, beth, et res, pro locorum qualitate, si
legatur dabar, uerbum significat, si deber, mortem et pestilentiam. quam
ob causam plerique sermonis ambiguitate decepti, non uerbum dicunt
missum esse, sed mortem. misit ergo dominus uerbum in iacob, et cecidit
in israel.
regnare uoluit iudam, ut iacob prophetat in genesi; et israel, hoc est
decem tribus, sibi imperium uindicarunt, de quibus dictum est: ipsi
regnauerunt, et non per me. imperii ergo dignitas, quae in unctione
samuelis post abiectum saul coeperat in dauid, missa in iacob, hoc est,
in duodecim tribus quae iacob olim uocabantur, cecidit in israel. non ut
lxx transtulerunt, uenit; cecidit enim in impiis, quod staturum ad
sanctos directum erat. sciet igitur populus ephraim et habitantes
samariam, qui propter multitudinem eriguntur in superbiam, et dicunt:
paruum est regnum iudae, et nostri comparatione uilissimum. itaque illis
ruentibus quasi lateribus, nos quadro lapide aedificemus nobis domum.
illorum sycomoris, quae ligna sunt uilia, hostili incursione succisis,
nos imperium nostrum cedris exstruemus, quae imputribiles sunt, ut
regnum significent sempiternum. sciat ergo hoc populus omnis ephraim et
habitantes samariam, quod syrus qui nunc ei auxilio est, in hostem
transeat. uel certe contra ipsum syrum, subita aduersariorum bella
consurgant, et omnes uertantur in tumultum; ita ut contra israel syria
ab oriente, et philisthiim, hoc est palaestini, ab occidente moueantur.
et simul deuorent israel. cum que haec fecerint, nihilominus manus mea
extenta (siue excelsa) est super israel et eos ferire non cessat. caesi
que a deo non reuertentur ad percutientem se, nec dominum quaerent
exercituum, uitulos aureos adorantes pro deo. iuxta anagogen hunc locum
nostri ita edisserunt: misit deus filium suum ad iacob, hoc est ad
iudaeos; et uenit ad israel, hoc est ad gentium populum, quos et
apostolus appellari dicit israel. alii uero ita: uerbum suum misit
dominus ad ecclesiam, quae priorem populum supplantauit et cecidit in
israel, hoc est in haereticos, qui deum uidere se iactant. sciant itaque
principes eorum, et omnes qui habitant in samaria, hoc est, qui dei
legem custodire se dicunt et in ubertate esse uirtutum et fructus
afferre iustitiae (hoc enim interpretatur ephraim), qui in superbia
cordis sui despiciunt ecclesiam et simplicitatem eius arbitrantes
imperitiam, dicunt: pro lateribus illius, quadris lapidibus atque
fortissimis aedificabimus ecclesias nostras, et pro infructuosis
arboribus cito que perituris, cedros sublimissimas exstruemus, quas
conteret dominus, et quas iustus sub persona impii uidisse se narrat et
non inuentum locum earum. dicit ergo dominus, quod rasin, qui
interpretatur sapientia saecularis, cuius ephraim utebatur auxilio,
uertatur contra eum et omnes inimici eius aduersum illum dimicent, et
tam ab oriente quam ab occidente expugnetur, et deuoraturi sint israel
toto ore. pro quibus interpretati sunt lxx: et aedificemus nobis turrim;
et allidet deus qui consurgunt contra montem sion et inimicos illius
dissipabit. cupiunt enim et ipsi in similitudinem templi dei aedificare
sibi templum in samaria; sed quamuis mouerint pedes ab oriente, et
dixerint: uenite, aedificemus turrim et faciamus nobis nomen antequam
dispergamur, domino impugnante soluetur, et dissipabitur consensus
eorum, et linguae eorum contra se inuicem diuidentur, ne consentientes
peiores fiant, sed a se inuicem destruantur. cum que ita percussi sint,
et ab hostibus deuorati, tamen non reuertentur ad dominum; sed adhuc
manus illius ad percutiendum parata est, iuxta illud quod legimus in
hieremia: sine causa percussi filios uestros; disciplinam non
recepistis.
et disperdet dominus ab israel caput et caudam incuruantem et
deprauantem in die una. longaeuus et honorabilis, ipse est caput; et
propheta docens mendacium, ipse est cauda. et erunt qui beatum dicunt
populum istum, seducentes, et qui beati dicuntur, praecipitati. propter
hoc super adolescentulis eius non laetabitur dominus, et pupillorum
illius et uiduarum non miserebitur, quia omnis hypocrita est et nequam,
et uniuersum os locutum est stultitiam. in omnibus his non est auersus
furor eius, sed adhuc manus eius extenta. succensa est enim quasi ignis
impietas; ueprem et spinam uorabit, et succendetur in densitate saltus,
et conuoluetur in superbia fumi. in ira domini exercituum contremuit
terra et erit populus quasi esca ignis. uir fratri suo non parcet, et
declinabit ad dextram, et esuriet, et comedet ad sinistram, et non
saturabitur; unusquisque carnem brachii sui uorabit. manasses ephraim,
et ephraim manassen, simul ipsi contra iudam. in omnibus his non est
auersus furor eius, sed adhuc manus eius extenta. non solum dominus
hostes rasin eleuabit contra eum, et inimicos eius uertet in tumultum,
syriam ab oriente et philisthiim ab occidente, ut deuorent israel toto
ore; sed quia non est reuersus ad percutientem se, nec requisiuit
dominum exercituum, extendet manum ad percutiendum, ut disperdat de
israel caput, et caudam incuruantem et deprauantem, eum uidelicet, qui
recta peruertit. qui sit autem caput, ipse interpretatus est: longaeuus
et honorabilis.
et qui sit cauda: propheta, inquit, qui docet mendacium, id est
pseudopropheta. dixit de principibus, nunc optimatibus iungit et
populum, quod et magistri et discipuli, et eruditi, et uulgus indoctum
pariter pareant. qui enim beatum dicebant populum, seductores sunt; et
qui beati appellabantur, non propter uirtutem, sed propter munera,
praecipitabuntur in mortem. unde et supra legimus: populus meus, qui
beatum te dicunt, seducunt te et semitas pedum tuorum supplantant. in
tali populo nullius personae miserebitur deus: non pupilli, non uiduae,
quia omnis hypocrita est, aliud simulans et aliud agens; promittens
castitatem et uiuens luxuriose; praeferens paupertatem et replens
marsupium. unde iungit, et dicit: et uniuersum os locutum est
stultitiam. propter haec omnia dominus non cessat irasci, sed adhuc ad
percutiendum eleuat manum. et quia ista fecerunt, succendetur quasi
ignis impietas, ut non cultum agrum, sed uepres et spinas deuoret, nec
frugiferas arbores, sed infructuosum saltum, in quo habitant bestiae,
sapiens flamma consumat. quam ob rem dicitur quod densitas saltus igne
supposito, fumi superbia et altitudine conuoluatur. omne enim quod
excelsum est, et in sublime consurgens, superbum appellari potest. pro
quo nescio quid uolentes lxx transtulerunt: et deuorabit in circuitu
collium omnia. unde et ad iram domini terra contremuit et populus ignis
factus est pabulum, quia tanta fuit in eo crudelitas, ut ne carissimo
quidem germanitatis nomini parceret, sed dextram deserens atque
contemnens, saturaretur in his quae sinistra erant, dum uoluptatum, et
malorum patitur famem, et semper cupit malis peiora sociare. ipsi quoque
manasses et ephraim, qui de uno nati sunt utero et de eodem parente
generati, in tantam rabiem proruperunt, ut hostili odio inter se
dissiderent. legamus regum et paralipomenon uolumina, et inueniemus
samariae inter se bella ciuilia, dum alii pro aliis regibus dimicant, et
quomodo suis regibus interfectis, in iudae expugnationem concordent.
secundum tropologiam, auferet dominus caput et caudam, maiorem pariter
ac minorem. caudam appellans, non homines, sed iumenta, haereticos esse
demonstrat, quae hoc membro utuntur ad stercora protegenda et ad arcenda
parua animalia. et post caput, et caudam incuruantem iungit et
deprauantem, quod legis praecepta subuertant, et rectam deprauent uiam.
longaeuum quoque, qui caput est, et pseudoprophetam qui in cauda
ponitur, disperdet, et magistros pariter et discipulos; alios qui
propter munera laudant peccatores; alios qui laudati sua mala non
sentiunt nec agunt paenitentiam. propter hoc in iuuenibus eorum non
laetabitur dominus: uae enim ciuitati cuius rex adolescens. et qui deum
patrem uel dominum uerum perdiderunt, non impetrabunt misericordiam.
omnis enim haereticus hypocrita est, aliud agens et aliud simulans, et
quidquid loquitur, licet uideatur esse sapientia, tamen stultitia est.
propter haec extendit manum suam ad puniendum, et omnes impietates eorum
quasi spinas uorax flamma consumet. et uerba absque uirtutibus, quae
infructuoso saltui comparantur, inuoluentur fumi superbia. ad eorum
poenam contremiscet omnis humus, et decepti populi aeternis tradentur
ardoribus, quia turpis lucri gratia, ne suis quidem parcunt, sed
certatim de deceptis populis praedas agunt, relinquentes bona et in
pessimis immorantes. cum que semper sinistra inueniant, tamen suis
numquam satiantur erroribus, uorantes carnem brachii sui, et aduersum
ecclesiam pari studio dimicantes. propter luxuriam et uoluptates, et
lucra de populis inter se habent discordiam, ut de una haeresi duae
fiant, et rursum ipsae diuidantur in partes, ut proprios abducant greges
et deuorent domos uiduarum et mulierum peccatricum, semper discentium
et numquam ad scientiam ueritatis peruenientium. in omnibus his non
auertetur furor domini, consumens uitia atque subuertens; sed quanto
illi proficiunt ad peccandum, tanto iste amplius manum suam extendit ad
poenas.
10. uae qui condunt leges iniquas, et scribentes iniustitiam
scripserunt, ut opprimerent in iudicio pauperes, et uim facerent causae
humilium populi mei, ut essent uiduae praeda eorum, et pupillos
diriperent. quid facietis in die uisitationis, et calamitatis de longe
uenientis? ad cuius confugietis auxilium? et ubi derelinquetis gloriam
uestram?
ne incuruemini sub uinculo, et cum interfectis cadatis. super omnibus
his non est auersus furor eius, sed adhuc manus eius extenta. haec
plerique adhuc contra decem tribus dici arbitrantur, quae habitabant in
samaria, quod ad priora scelera etiam ista sociarint. nobis autem
uidetur contra iudices tribus iudae et hierusalem, scribas uidelicet et
deuter�tas~g, sermo propheticus conclamare, quod aduersum legem dei
iniquas scripserint leges et traditionibus suis subuerterint iudicii
ueritatem. deo enim dicente: honora patrem tuum et matrem, illi e
contrario monuerunt filios parentibus dicere: donum quodcumque est ex
me, tibi proderit, ne honorarent patrem et matrem; et cetera his
similia. propterea autem scripserunt leges pessimas, ut opprimerent
pauperes et humiles populi, ut praedas agerent de uiduis et pupillos
diriperent. qui interrogantur quid facturi sint, cum uel captiuitatis
uel iudicii dies aduenerit et calamitatis de longe uenientis, quae multo
tempore ante praedicta est. ad cuius, inquit, fugietis auxilium, cum
offenderitis deum, qui uerus auxiliator est, et ubi derelinquetis
gloriam uestram? non enim proderunt diuitiae in die furoris, ne uinctos
in hostilem terram ducat assyrius, ne corruatis in proelio. et ad
extremum sicut in superioribus contra samariam crebro dixerat: in
omnibus his non est auersus furor eius, sed adhuc manus eius extenta;
etiam contra iudam loquitur, quod non sit finis mali eorum extrema
captiuitas, sed etiam in hostili terra domini eos gladius persequatur.
iuxta anagogen, omnis haereticus scribit iniquitatem, ut pauperes et
humiles populi decipiat, uiduas et pupillos diripiat. qui enim diues
est, de quo legimus: redemptio animae uiri propriae diuitiae, non
sustinet comminationem, non cito ab eis capitur. pauper autem et qui
humilis est et paruus in populis, cito ab eis scandalizatur. uidua
quoque, quae uirum perdiderit deum, et pupillus qui patrem amiserit
creatorem, de quo scriptum est: deum, qui te genuit, dereliquisti, et
oblitus es dei nutritoris tui, facile supplantantur. quid igitur facient
in die iudicii, cum tantos deceperint, et calamitatis de longe
uenientis? sicut enim ad iustum uirum dicitur: prope est uerbum in ore
tuo et in corde tuo; et in alio loco: regnum dei intra uos est; sic
haereticorum calamitas de longe ueniet, multo eis tempore praeparata. ad
quem confugient, cum fictum habeant deum? cui tradent gloriam suam, cum
simulata sint omnia? nec poterunt euadere uinculum, quo plurimos
ligauerunt. unde et in uisione uallis sion, quae dei altitudine
derelicta et haeretica humilitate decepta est, dicitur de magistris
falsi nominis scientiae: omnes principes tui fugerunt, et qui capti
sunt, dure ligati sunt. quod que cum singulis interfectis cadant et in
aliorum nece ipsi pereant, et cum multa patiantur dies que uisitationis
aduenerit, non sit finis eorum interitus; sed semper sibi impendentem
manum domini pertremiscant. hucusque contra decem et duas tribus, id est
contra samariam et hierusalem, dei comminatio est, quae regnante adhuc
achaz, coepit in populo, de quibus duae et semis tribus sub eo captae
sunt, et reliquae sub ezechia, qui achaz successit in regnum. sequens
prophetia, contra assyrios scribitur.
uae assur, uirga furoris mei, et baculus ipse est, in manu eorum
indignatio mea. ad gentem fallacem mittam eum, et contra populum furoris
mei mandabo illi, ut auferat spolia, et diripiat praedam, et ponat
illum in conculcationem quasi lutum platearum. ipse autem non sic
arbitratus est, et cor eius non ita aestimauit, sed ad conterendum erit
cor eius et ad internecionem gentium plurimarum. dicit enim, numquid non
principes mei simul reges sunt? numquid non ut charcamis, sic chalanno,
et ut arphad, sic emath? numquid non ut damascus sic samaria? quomodo
inuenit manus mea regna idoli, sic et simulacra eorum de hierusalem et
de samaria. numquid non sicut feci samariae, et idolis eius, sic faciam
hierusalem et simulacris eius? ponamus in hoc loco translationem lxx,
quae ab hebraico discordat in plurimis: uae assyriis; uirga furoris mei
ipse est in manibus eorum, iram meam in gentem iniquam mittam, et populo
meo praecipiam, ut faciat spolia et praedam, et conculcet ciuitates, et
ponat eas in puluerem.
ipse autem non sic cogitauit, et non ita arbitratus est; sed ut conterat
mens eius et disperdat gentes plurimas. quod si dixerint ei: tu solus
es princeps, respondebit: non tuli regionem quae est supra babylonem et
chalane, ubi turris aedificata est. tuli autem arabiam et damascum et
samariam; sicut has tuli, sic omnia regna capiam. ululate sculptilia in
hierusalem et samaria; sicut enim feci samariae et idolis eius, sic
faciam hierusalem et simulacris illius. primum sciendum est quod in
hebraico non habet chalane, sed chalanno. ultima enim nominis huius
littera non est iod, ut illi putauerunt, sed uau, quae litterae sola
inter se distant magnitudine. turris autem aedificata est in campo
sennaar, in quo erant arec, acad et chalanne et babylon, quae ex
confusione linguarum nomen accepit. arabia autem non habetur in hebraeo,
sed emath, quam syri usque hodie epiphaniam uocant. ululate quoque
sculptilia in hierusalem, de suo addiderunt. quod que supra scriptum
est: si dixerint ei: tu solus es princeps, respondebit: non tuli
regionem illam et illam, sed tuli arabiam et damascum et samariam, hunc
suggerit sensum: cum, inquit, dixerint assyrio qui capti sunt, tu
princeps es omnium, ille adhuc infirmum se esse sentiens, respondebit:
quomodo me uocatis principem, cum tantum arabiam et damascum et samariam
ceperim, et longe positas nationes trans babylonem necdum meae
subdiderim potestati? quo modo autem arabiam cepi, damascum et samariam,
sic omnia mihi regna substernam. transeamus ad hebraicum, et quid nobis
uideatur, breuiter annotemus. uae assyrio id est sennacherib, quia ipse
est uirga, et baculus furoris mei; in manu enim eius indignatio mea, et
per illum percutiam gentem fallacissimam, quae inter me semper et idola
claudicauit, quae praecepta mea se facturam esse mentita est, et contra
populum furoris mei ipsi praecipiam, ut spoliet eum atque praedetur, et
redigat in puluerem, et conculcet quasi lutum platearum, id est, ut
percutiat eum et non interficiat, ut uulneret et non animam auferat.
ipse autem modum iracundiae meae egressus est, et non solum contra
israel, ad quem directus fuerat, sed in gentes plurimas debacchatus est,
ut omnia per circuitum regna contereret, et usque ad internecionem
gentium plurimarum illius mucro saeuiret. erectus enim in superbiam,
haec ausus est dicere: duces mei aliarum gentium reges sunt, et mihi
subiecti, cunctis nationibus imperabunt. quomodo cepi charcamis, sic
cepi et chalanno; quomodo arphad, sic obtinui et emath; quomodo
damascum, sic mihi subieci et samariam. quomodo cetera regna, quae
idolorum cultui seruiebant, meis subieci pedibus, sic et hierusalem et
samariam, in qua eadem idola sunt, meae subiciam potestati. quo modo
cepi samariam cum idolis suis, sic et hierusalem capiam quia eosdem
ueneratur deos. pro charcamis autem lxx, addentes de suo, regionem trans
babylonem, interpretati sunt: et chalane ubi aedificata est turris,
arphad penitus relinquentes. possumus autem iuxta translationem eorum et
tropologiae, dummodo pia sit, libertatem, ex eo quod ait: et populo meo
praecipiam, ut faciat spolia et praedam, et conculcet ciuitates, et
ponat eas in puluerem, etiam hoc dicere, quod cotidie populo suo
praecipiat dominus, ut aduersariorum ciuitates quae eriguntur contra
scientiam dei, et haereticorum nimio labore constructae sunt, in
puluerem redigat, et nihil esse demonstret. qui intellegens infirmitatem
cordis humani, et quod mortali carne circumdatus, non possit perfectam
uirtutum habere uictoriam, nec omnes gentes capere, licet eum alii
admirentur, et dicant: tu solus es princeps, respondebit eis: multa sunt
quae destruere debeo, et adhuc destruere non potui; scio quod nesciam.
et quamquam multa aduersariorum argumenta superauerim, tamen sunt
pleraque, quae adhuc superanda sunt. simul que spe futurorum ex his,
quae superauit, etiam ceterorum sibi uictoriam repromittit. iubentur
autem ululare simulacra hierusalem et samariae; non ipsa quae ficta
sunt, sed hi qui ea finxerunt; met�numik�s~g hi qui fecerunt, per ea
quae facta sunt. ut non solum hi qui in haeresibus idola fabricati sunt,
sed qui in ecclesia per ignorantiam defendunt pro ueritate mendacium,
ululatu et paenitentia se errasse testentur.
et erit cum compleuerit dominus cuncta opera sua in monte sion et
in hierusalem, uisitabo super fructum magnifici cordis regis assur et
super gloriam altitudinis oculorum eius. dixit enim: in fortitudine
manus meae feci, et in sapientia mea intellexi, et abstuli terminos
populorum, et principes eorum depraedatus sum, et detraxi quasi potens
in sublimi residentes; et inuenit quasi nidum manus mea fortitudinem
populorum; et sicut colliguntur oua, quae derelicta sunt, sic uniuersam
terram ego congregaui, et non fuit qui moueret pennam et aperiret os
atque ganniret. lxx pro fructu, sensum, uel mentem magnam interpretati
sunt. post captiuitatem samariae, et assyriorum uictoriam, et
comminationem aduersum hierusalem, quia simulacra imitata samariae,
simili sit ferienda sententia; nunc aduersum ipsum assyrium qui elatus
est in superbiam, et suae fortitudinis putauit esse quod uicit, propheta
loquitur. dixit enim assyrius, cordis tumore se iactans, quod in
fortitudine manus suae, cunctas uicerit nationes, et incredibili
sapientia omnium possederit terminos.
et iuxta lxx tantae potentiae fuerit, ut bellatorum hominum urbes
funditus subruerit, totum que orbem quasi nidum apprehenderit, et quasi
derelicta oua a matribus, in suam praedam uerterit. et quia semel
metaphoram ab auibus, nido et ouis sumpserat, seruauit in reliquis, ut
diceret: non fuit qui moueret pennam et aperiret os atque ganniret.
tantus, inquit, terror fuit fortitudinis meae atque uictoriae, ut ne
fletum quidem et gemitum uicti libere proderent. sunt qui haec
generaliter contra regnum assyriorum dici arbitrentur, quod postquam
compleuerit dominus cuncta opera sua in monte sion et in hierusalem, hoc
est, postquam subuersa fuerit hierusalem, assyriorum imperium
destruatur. mihi autem ex his quae sequuntur, proprie contra sennacherib
regem assyriorum uidetur comminatio. quod autem ait: postquam
compleuerit dominus cuncta opera sua in monte sion et in hierusalem, non
subuersionem urbis significat, sed obsidionem, quando uenit rabsaces
dux sennacherib, et ea fecit quae in posterioribus idem propheta
commemorat. secundum tropologiam, cum samaria et hierusalem domini iram
sustinuerint, et in fabricatione idolorum errasse se senserint, tunc
destruetur sensus magnus, assyrius, qui in tantam contra dominum
inflatus est superbiam, ut sapientiae suae aestimauerit cuncta cessura,
et quaeuis excelsa dogmata, et dialectica arte munita, concutienda et
penitus destruenda. intantum ut in similitudinem pullorum auium non
ualeant in sublime consurgere, et necdum animata insensibilia esse atque
torpentia, quod ouorum demonstrat exemplum, et ne mutire quidem, et
commouere linguam contra rationem et fortitudinem sui sermonis audere.
numquid gloriabitur securis contra eum qui secat in ea, aut
exaltabitur serra contra eum a quo trahitur? quomodo si eleuetur uirga
contra leuantem se, et exaltetur baculus, qui utique lignum est. contra
sennacherib siue, ut multi putant, nabuchodonosor gloriantem atque
dicentem: in fortitudine manus meae feci, in sapientia mea intellexi, et
reliqua, sanctus propheta respondit: o stultissime mortalium, dei iram
tuam putas esse sapientiam, et illius iussionem ad tuam refers
fortitudinem? quomodo si securis glorietur contra eum qui securim tenet,
et serra contra illum a quo trahitur, et dicant cuncta opera quae per
securim et serram fiunt, sua arte perfecta. et si eleuet quispiam
uirgam, et exaltet baculum ad percutiendum quem uoluerit, et ipsa uirga
ac baculus glorientur, et dicant a se percussum esse percussus est. sic
et tu cum organum dei fueris uoluntatis, erigeris in superbiam, et
cuncta quae geruntur tuae gloriaris esse uirtutis. quidquid autem
assyrio dicitur, et ad haereticorum superbiam et ad diabolum referri
potest, qui securis et serra et uirga in scripturis appellatur, eo quod
per illum infructuosae arbores succidantur et diuidantur atque serretur
incredulorum duritia, et percutiantur uirga qui non recipiunt
disciplinam. haeretici quoque quorum os in caelum ponitur, et lingua
eorum pertransit in terram, et sensu quem a deo in bonam partem
acceperunt, abutuntur in contrarium atque peruersum, ut loquantur contra
eum a quo conditi sunt, et linguae ministerium, quo laudandus est
dominus, uertant in blasphemiam.
propter hoc mittet dominator dominus exercituum in pinguibus eius
tenuitatem, et subtus gloriam eius succensa ardebit quasi combustio
ignis. et erit lumen israel in igne, et sanctus eius in flamma; et
succendetur et deuorabitur spina eius et uepres in die una. et gloria
saltus eius et carmeli eius ab anima usque ad carnem consumetur, et erit
terrore profugus, et reliquiae ligni saltus eius prae paucitate
numerabuntur, et puer scribet eos. quia ista fecisti, et locutus es quae
supra narraui, propterea mittet dominus angelum suum, et una nocte
centum octoginta quinque milia de tua morientur exercitu. ita ut
potentissimi quique, quos pingues appellat, redigantur in tenuitatem et
in nihili; et sicut hebraei tradunt, illaesis uestibus assyriorum,
corpora occulto crementur ardore. tunc lumen israel et sanctus, hoc est
angelus, erit in igne et in flamma, et omnes spinae ac uepres
assyriorum, id est malitia, consumetur, non longo tempore, sed uno die
atque momento. et quomodo saltus et carmelus, qui est mons in galilaea
nemoribus consitus, supposito igne uelociter concrematur; sic ab anima
usque ad carnem omnis assyrii gloria consumetur. tunc spoliatus
exercitus fugiet, quod idem in consequentibus propheta testatur, et de
tam innumerabili multitudine quae carmelo et saltui comparata est, ad
tantam ueniet paucitatem, ut puer paruulus eos possit numerare et
describere. tradunt enim hebraei, decem tantum de eius exercitu
remansisse. nostrorum quidam uolunt hunc regem typum esse aduersariae
fortitudinis. et quomodo in daniele legimus principes regni persarum, et
regni medorum, et regni graecorum, sic et principem esse assyriorum,
qui propter superbiam sensus magnus uocetur, et in die iudicii gehennae
tradatur ardoribus quae praeparata est diabolo et angelis eius. et lumen
israel et sanctum, hoc est ipsum dominum, succendere uepres ac spinas
assyrii, omnem que illius potentiam et innumerabiles populos ad nihili
deducendos. tunc eum timore perterritum, quasi colubrum tortuosum et
fugitiuum, imminentes poenas uelle uitare. qui autem de saltu et
confusione eius lignis que perituris potuerint euadere, eos dignos
existere, qui numerentur et describantur a puero, cuius principatus in
humeris eius est.
hoc ipsum et ad haereticos referri potest, quod postquam ecclesiastica
doctrina illuxerit, et omnes eorum decipulae patuerint, tunc ad tantam
ueniant solitudinem, ut de saltu et infructuosis arboribus, et
innumerabili eorum multitudine, quam haeretica fraude deceperant, uix
pauci resideant qui eorum sequantur errorem. pro eo quod nos uertimus,
mittet dominus in pinguibus eius tenuitatem, lxx transtulerunt: mittet
dominus in honorem tuum ignominiam. et pro eo quod nos diximus: et
sanctus eius in flamma, illi uerterunt: et sanctificabit eum in igne;
per quod quidam intellegi uolunt poenas atque tormenta ad hoc adhiberi
peccatoribus, ut diuino igne purgentur. quod que nos diximus: et gloria
saltus eius, et carmeli eius, illi interpretati sunt: exstinguentur
montes et colles et saltus, quo omnis assyriorum claritas et superbia et
multitudo humilietur exstincta. et erit in die illa: non adiciet
residuum israel, et hi qui saluati fuerint de domo iacob, inniti super
eo qui percutit eos, sed innitetur super dominum sanctum israel in
ueritate. reliquiae conuertentur, reliquiae, inquam, iacob, ad dominum
fortem. si enim fuerit populus tuus israel quasi arena maris, reliquiae
conuertentur ex eo. consummatio abbreuiata inundabit iustitiam.
consummationem enim et abbreuiationem dominus deus exercituum faciet in
medio omnis terrae. ubi in graeco dicitur: conuertentur reliquiae iacob
ad deum fortem, pro deo forti, in hebraeo scriptum habet el gibbor, duo
nomina de sex nominibus, quibus paruulum puerum et filium, qui datus est
nobis, supra legimus appellatum. et pro eo quod scriptum est: reliquiae
conuertentur, pro eo dicitur in hebraeo numero singulari: quod reliquum
est conuertetur, id est, to~g hupoleimma~g epistrepsei~g, in hebraeo
scribitur sar iasub. et ex hac occasione sermonis putant iasub filium
esaiae in signum saluandi ex israel populi praecessisse. quando ergo
lumen israel et sanctus carmeli saltus uepres que consumpserit, et rex
assyrius cum paucis fugerit; tunc residui israel, qui cum ezechia
principe captis ceteris iudaeae urbibus obsidebantur in hierusalem,
nequaquam confident in assyrio, sicut nunc faciunt sub achaz rege, qui
misit nuntios ad regem assyriorum dicens: seruus tuus ego sum, ascende
et libera me de manu regis syriae, et de manu regis israel, qui
consurrexerunt aduersum me. quando tulit aurum et argentum, quod
inuentum est in thesauris domus domini et in domo regia, et misit regi
assyriorum munera, audiuit que eum rex assyrius et uenit in damascum et
cepit eam et transtulit et rasin interfecit. sed liberati ab ipso
assyrio percussore, qui prius amicus, et postea hostis exstiterat,
innitentur atque confident super dominum sanctum israel, nequaquam
falso, ut sub prioribus fecerant regibus, sed in ueritate. quod sub
ezechia factum legimus, ita ut idolis derelictis, conuerterentur ad
cultum dei. et quia dixerat reliquias esse saluandas, transit ad
posteriora tempora, et plenam saluationem futuram dicit esse sub
christo. quod et apostolus paulus intellegens scribit ad romanos: esaias
autem clamat pro israel: si fuerit numerus filiorum israel tamquam
arena maris, reliquiae saluae fient. uerbum enim consumens et breuians
in aequitate, quia uerbum breuiatum faciet dominus super terram. et
sicut dixit esaias: nisi dominus sabaoth reliquisset nobis semen, sicut
sodoma facti essemus et gomorrae similes fuissemus. ubi ergo tanti uiri
praecedit auctoritas, cesset alia omnis interpretatio. et reuera si
legamus iosephum, et quanta hominum in hierusalem et in iudaea fuerit
multitudo, quando passus est dominus, intellegimus uix paucos in
apostolis et apostolicis uiris ex iudaeis esse saluatos. abbreuiatus
autem atque perfectus sermo euangelicus est, qui pro cunctis laciniosae
legis caeremoniis, dedit praeceptum breuissimum dilectionis et fidei, ut
quod nobis fieri noluerimus, ne fecerimus alteri. unde et dominus in
euangelio: in his, inquit, duobus mandatis pendet omnis lex et
prophetae. nonnulli hoc capitulum ad illa tempora referunt, quando sub
zorobabel filio salatiel, et iesu filio iosedec, et esdra, et neemia
quaedam pars populi reuersa est in iudaeam. quibus respondebimus, non
eos seruare ordinem historiae, maxime cum ea quae sequuntur, non
aduersum babylonios, quorum rex nabuchodonosor fuit, sed aduersum
sennacherib regem dicantur assyriorum. propter hoc haec dicit dominus
deus exercituum: noli timere, populus meus habitator sion ab assur, in
uirga percutiet te et baculum suum leuabit super te in uia aegypti.
adhuc enim paululum modicum que et consummabitur indignatio mea, et
furor meus super scelus eorum. et suscitabit super eum dominus
exercituum flagellum, iuxta plagam madian in petra oreb et uirgam suam
super mare, et leuabit eam in uia aegypti. et erit in die illa:
auferetur onus eius de humero tuo, et iugum eius de collo tuo, et
computrescet iugum a facie olei.
pro petra, quod iuxta hebraicum interpretatus est aquila, symmachus et
theodotio ipsum uerbum posuerunt hebraicum sur oreb. pro quo lxx
interpretati sunt: locum tribulationis, de quo in suo dicemus loco.
difficile, inquit, tibi uidetur, o habitator sion, ut cunctis in
circuitu ab assyrio gentibus subiugatis, tu solus de eius manibus
libereris. ausculta quae dico: noli timere, populus meus, quod assur
uincente capiaris. licet enim anno quarto decimo regis ezechiae
ascensurus sit sennacherib rex assyrius super omnes ciuitates iudae
munitas, ut capiat eas, et missurus rabsacen, qui obsessum in hierusalem
populum terreat. tamen hoc scire debes, quod non te gladio, sed uirga
percussurus sit, et pergens contra taracham regem aethiopiae, et
aegyptios ac mare rubrum per uiam aegypti, baculum tantum suum eleuet
contra te, et ferire non possit. adhuc enim paululum, et reuersus de
aegypto cum infinita exercitus multitudine, atque obsidere te cupiens,
statim mea indignatione ferietur, et flagellum illud, quod quondam
aduersum madianitas sub gedeone, qui altero nomine uocabatur ierobaal,
suscitaui, quando oreb et zebee principes madianitarum occisi sunt super
petram durissimam, id est silicem, quae hebraice appellatur sur, ita ut
ex petra et ex rege, qui in ea occisus est, locus petrae oreb nomen
acceperit. leuabit ergo uirgam suam super mare rubrum pergens aduersus
aethiopes, et leuabit reuertens ad te per uiam aegypti; sed statim ut de
aegypto uenerit, auferetur onus de humeris tuis et iugum imperii eius,
ac seruire desistes. quod iugum, id est potentia assyrii, a facie olei,
id est dei misericordiae, computrescet. possumus autem hoc quod dixit:
in uirga percutiet te et baculum suum leuabit super te in uia aegypti;
et rursum: et uirgam suam super mare, et leuabit eam in uia aegypti,
etiam sic intellegere, quod idcirco percusserit plurimos de tribu iuda,
et in circuitu regni hierusalem ceperit ciuitates, quia non in deo, sed
in aegyptiis habuerint fiduciam. unde et rabsaces exprobrat eis dicens:
ecce confidis super baculum arundineum confractum, super aegyptum. cui
si innixus fuerit homo, intrabit in manum eius, et perforabit eam. sic
pharao rex aegypti omnibus qui confidunt in eo. historia madianitarum in
iudicum libro scripta est, quam et in psalmo legimus: pone principes
eorum sicut oreb et zeb et zebee et salmana. errant ergo qui putant
illud significari tempus, quando in libro numerorum madianitae caesi
referuntur ab israel a deserto sur usque ad montem dei oreb; quae aliis
apud hebraeos scribuntur litteris, cum eo tempore non fuerint in monte
oreb, sed in solitudine sethim. iuxta anagogen praecipitur populo in
ecclesia commoranti, ne timeat aduersarios, qui ad pugnandum semper
parati sunt, et multa disputatione sua animas subuerterunt. ideo enim
eos contra populum dei pauxillum accipere potestatem, et non tam gladio
percutere quam uirga, id est: non occidere sed minari, quia in uia
ambulauerint aegypti et non in domino sint confisi. cum autem ad deum
reuersi fuerint et reliquerint iter aegypti, tunc flagellum dei iudicio
suscitandum contra aduersarios. madian enim interpretatur ex iudicio, ut
spiritu oris eius et oleo misericordiae iugum hostium computrescat.
ueniet in aioth, transibit in magron; apud machmas commendabit
uasa sua. transierunt cursim gabee sedes nostra (siue ut alibi scriptum
reperimus: mansione manserunt); obstupuit rama, gaba saulis fugit. hinni
uoce tua, filia gallim; attende, laisa, paupercula anathoth; migrauit
medemena; habitatores gebim confortamini. adhuc dies est, ut in nob
stetur; agitabit manum suam super montem filiae sion, collem hierusalem.
lxx: ueniet enim in ciuitatem aggai et transibit in mageddo; et in
machmas ponet uasa sua; et transibit uallem, et ueniet in aggai. timor
apprehendet rama ciuitatem saul; fugiet filia gallim. attende laisa;
audietur in anathot; obstupuit medemena et habitatores gebim.
consolamini hodie in uia, ut maneat; consolamini montem filiae sion et
collem hierusalem. multum in hoc loco lxx ab hebraico discrepant; quam
ob rem utramque editionem posuimus, ut quid nobis uideatur in singulis,
christo, si meruerimus, inspirante, dicamus. describit sermo propheticus
assyrii iter pompam que redeuntis de aegypto hierusalem, et quanto
strepitu quanto que cursu ad oppugnandum eam ueniet. et primum, inquit,
ueniet in aioth, ubi prae festinatione nimia nolens manere, transibit in
magron, tantam que capiendae urbis habebit fiduciam, ut apud machmas
commendet sarcinas suas, quasi cito subuersa urbe rediturus; quibus
depositis, transibit eam cursim, et in gabee habebit diuersorium.
quo paululum ibidem subsistente, ut lassum refoueat exercitum, rama urbs
uicina terrebitur; gaba saulis quondam ciuitas fugiet. tunc et filia
gallim, quae hebraice dicitur beth gallim, ita eiulabit, ut equorum
arbitreris hinnitum. unde, o laisa, et paupercula (uel oboediens siue
humilis) anathoth (tribus enim modis interpretari potest) diligenter
attendite, et declinate currentis impetum, si potestis; migrauit enim
iam de sedibus suis urbs medemena. uos autem qui habitatis in collibus,
quod interpretatur gebim, tuti locorum altitudine, confortamini, id est,
arma corripite. adhuc tantum supererat diei, ut stans in oppidulo nob,
et procul urbem conspiciens hierusalem, agitaret manum suam atque
concuteret super montem sion, uel despiciens eam atque contemnens, uel
insultans et comminans, et admirans, quod toto sibi oriente subiecto,
tam parua ciuitas potentiae suae audeat repugnare. haec iuxta hebraeos,
ut nobis ab eis traditum est, breui sermone perstrinximus. nunc quid
iuxta lxx editionem ecclesiastici uiri de hoc loco sentiant, subiciamus.
cum iugum assyrii, siue ut quidam male arbitrantur, babylonii, ablatum
fuerit de humeris tuis atque corruptum, fugiens assyrius sennacherib cum
paucis reliquiis ueniet in aggai, quae in hebraico non habetur. et
tanta erit fugientis trepidatio, ut ibi manere non audeat, sed transibit
in mageddo, quam et ipsa scriptura non continet. et quia sarcinis suis
praepeditus uelocius fugere non poterit, deponet uasa in machmas, et
gradu concito transibit uallem, quam et ipsam hebraeus sermo non
resonat; et rursum ueniet in aggai, quae bis in hoc loco ponitur et in
hebraico non habetur. ad sonitum fugae eius contremiscet rama, ciuitas
saul; quod perspicue falsum est. ciuitas enim saul appellatur gaba, ut
in hebraico continetur. deinde ueniet in gallim; audiet laisa, audiet
anathoth, contremiscet medemena. habitatores autem gebim et colles, quae
sunt in hierusalem, id est, excelsi quique uiri, prouocantur ad
consolandam hierusalem. non longo post tempore, sed in praesentiarum, et
eadem die dum in uia est assyrius, ut maneant in locis suis, et
perturbati timore nequaquam fugiant. hoc iuxta litteram. ceterum quidam
in isto loco, cum falsorum nominum iuxta lxx etumologias~g inuenire non
possit, nec se in libro hebraicorum nominum reperire potuisse testetur,
mittit nos ad incertum, ut dicat in extremo mundi tempore et in
consummatione huius saeculi imminentibus poenis, sensum magnum,
principem assyriorum esse fugiturum, et per diuersa loca uarios que
profectus fugere cupere ab ira dei. cum que ille fugierit, habitatores
gebim, id est excelsas quasque uirtutes sermone prophetico prouocari, ut
consolentur fugientem doceant que ne fugiat, sed maneat in uia et dei
praestoletur misericordiam; et non solum consolari fugientem, sed in
bonis operibus filiam sion reuocare a luctu et ad salutem paenitentiae
prouocare, et hos esse colles in hierusalem de quibus in posteriore
parte huius prophetae legimus: consolamini, consolamini populum meum,
sacerdotes; loquimini ad cor hierusalem. haec dixit, quia rei ueritate
constrictus aliud quod diceret non habebat.
ecce dominator dominus exercituum confringet lagunculam in
terrore, et excelsi statura succidentur, et sublimes humiliabuntur, et
subuertentur condensa saltus ferro, et libanus cum excelsis cadet.
putant quidam hunc locum adhuc dici de assyrio, quod illo contrito,
omnes in circuitu nationes, quae ditioni illius subiacebant, succidantur
et humilientur, et saltus densissimus subuertatur; per quem
metaphorik�s~g populum et principes intellegi uolunt. libanum quoque cum
excelsis suis cadere ut nihil omnino assyriae resideat potestatis. alii
uero ab hoc loco uolunt principium esse de christo; maxime cum et ea
quae sequuntur, et nos de illo et circumcisio scripta fateatur. dixerat
supra nomen de uirgine pueri nascituri, quod appellaretur emmanuel; et
postea prophetissae conceptus utero uocaretur: accelera, spolia detrahe,
festina praedari; et ipse esset lapis offensionis et petra scandali
duabus domibus israel, cuius principatus esset in humero eius, et
uocaretur sex nominibus: admirabilis, et consiliarius, et deus, et
fortis, et pater futuri saeculi, et princeps pacis; et quod
multiplicaretur eius imperium et pacis non esset terminus. nunc in
prologo aduentus eius, prius quam dicatur quod de iesse et dauid sit
genere nasciturus, per translationem fractae lagunculae passio illius
demonstratur. quod, uolente deo, idcirco caro eius morti tradita sit, ut
iudaeorum sublimitas destruatur, et excelsi quondam in terram corruant;
et libanus cum suis cedris succidatur, de quo in zacharia legimus:
aperi, libane, portas tuas, et comedat ignis cedros tuas; ulula, abies,
quia cecidit cedrus, quoniam magnifici uastati sunt. quod autem a patre
contritus et percussus esse dicatur, et illud indicio est: percutiam
pastorem, et oues dissipabuntur. et aliud testimonium: quoniam quem tu
percussisti, ipsi persecuti sunt. uerbum hebraicum phura, quod aquila
keramidion~g interpretatus est, theodotio symmachus que uerterunt
l�non~g, id est torcular, quod et ipsum iuxta inscriptionem trium
psalmorum dominicam significat passionem, ipso dicente in esaia:
torcular calcaui solus et de gentibus uir non erat me cum. lxx autem pro
torculari, nouum sensum inferentes, gloriosos interpretati sunt.
11. et egredietur uirga de radice iesse, et flos de radice eius
ascendet. et requiescet super eum spiritus domini, spiritus sapientiae
et intellectus; spiritus consilii et fortitudinis; spiritus scientiae et
pietatis: et replebit eum spiritus timoris domini. usque ad principium
uisionis, uel ponderis babylonis, quod uidit esaias filius amos, omnis
haec prophetia de christo est, quam per partes uolumus explanare, ne
simul proposita atque disserta lectoris confundat memoriam. uirgam et
florem de radice iesse, ipsum dominum iudaei interpretantur, quod
scilicet in uirga regnantis potentia, in flore pulchritudo monstretur.
nos autem uirgam de radice iesse sanctam mariam uirginem intellegamus,
quae nullum habuit sibi fruticem cohaerentem; de qua et supra legimus:
ecce uirgo concipiet et pariet filium. et florem dominum saluatorem, qui
dicit in cantico canticorum: ego flos campi et lilium conuallium. pro
radice, quam soli lxx transtulerunt, in hebraico scriptum habet geza,
quod aquila et symmachus et theodotio kormon~g interpretati sunt, id est
truncum. et pro flore qui hebraice dicitur neser, germen transtulerunt,
ut ostenderent, quod multo post tempore babylonicae captiuitatis, nullo
de stirpe dauid antiqui regni gloriam possidente, quasi de trunco
maria, et de maria christus exortus sit. illud quod in euangelio
matthaei omnes quaerunt ecclesiastici, et non inueniunt ubi scriptum
sit: quoniam nazaraeus uocabitur, eruditi hebraeorum de hoc loco
assumptum putant. sed sciendum quod hic neser per sade litteram
scribatur, cuius proprietatem et sonum inter z et s latinus sermo non
exprimit. est enim stridulus, et strictis dentibus uix linguae
impressione profertur; ex qua etiam sion urbs scribitur. porro nazaraei,
quos lxx sanctificatos, symmachus separatos, transtulerunt, per zain
semper scribuntur elementum. super hunc igitur florem, qui de trunco et
de radice iesse per mariam uirginem repente consurget, requiescet
spiritus domini, quia in ipso complacuit omnem plenitudinem diuinitatis
habitare corporaliter; nequaquam per partes, ut in ceteris sanctis, sed
iuxta euangelium quod hebraeo sermone conscriptum legunt nazaraei:
descendet super eum omnis fons spiritus sancti. dominus autem spiritus
est, et ubi spiritus domini, ibi libertas. in eodem matthaei uolumine
legimus illud quod in consequentibus scribitur: ecce puer meus quem
elegi; electus meus in quo complacuit animae meae; ponam spiritum meum
super illum; iudicium gentibus proferet, ad saluatoris referri
intellegentiam, in quo requieuit spiritus domini, id est: aeterna
habitatione permansit. non ut auolaret, et rursum ad eum descenderet,
sed iuxta ioannis baptistae testimonium iugiter permaneret, qui ait:
uidi spiritum descendentem quasi columbam de caelo, et manentem in eo,
et ego nesciebam illum; sed qui me misit baptizare in aqua, ille mihi
dixit: super quem uideris spiritum descendentem et manentem in eo, ipse
est qui baptizat in spiritu sancto. porro in euangelio, cuius supra
fecimus mentionem, haec scripta reperimus: factum est autem cum
ascendisset dominus de aqua, descendit fons omnis spiritus sancti, et
requieuit super eum, et dixit illi: fili mi, in omnibus prophetis
exspectabam te, ut uenires, et requiescerem in te. tu es enim requies
mea, tu es filius meus primogenitus, qui regnas in sempiternum. qui
spiritus domini appellatur et spiritus sapientiae; omnia enim per ipsum
facta sunt; et sine ipso factum est nihil, quod factum est. et in
psalmis canitur: quam magnificata sunt opera tua, domine, omnia in
sapientia fecisti. et apostolus scribit: christus dei uirtus et dei
sapientia. et in prouerbiis legitur: deus in sapientia sua fundauit
terram, et parauit caelos in prudentia. et quomodo idem sermo dei
uocatur lux et uita et resurrectio, sic spiritus sapientiae et
intellectus, et consilii et fortitudinis, et scientiae et pietatis ac
timoris domini nuncupatur; non quod diuersus sit iuxta differentias
nominum, sed unus atque idem cunctarum uirtutum fons sit atque
principium. absque christo igitur nec sapiens quis esse potest, nec
intellegens nec consiliarius, nec fortis nec eruditus, nec pius nec
plenus timoris dei. et hoc notandum quod spiritus domini, sapientiae et
intellectus, consilii et fortitudinis, et scientiae et pietatis et
timoris domini, id est, septenarius numerus, qui septem oculi in uno
lapide dicuntur in zacharia, requiescat super uirgam et florem, qui de
iesse, ac per hoc dauid stirpe surrexit. specialiter autem spiritus
timoris domini impleuerit eum propter eos qui timore domini indigent,
quia paruuli sunt, quem foras mittit perfecta dilectio. qui enim timet,
poenam habet, et non est perfectus. unde et apostolus loquitur ad
credentes: non enim accepistis spiritum seruitutis iterum in timore; sed
accepistis spiritum adoptionis, in quo clamamus: abba pater. et in
malachia legimus: si pater ego sum, ubi est gloria mea? et si dominus
ego sum, ubi est timor meus?
de quo timore cantatur in psalmo: uenite, filii, audite me: timorem
domini docebo uos.
non secundum uisionem oculorum iudicabit, neque secundum auditum
aurium arguet. sed iudicabit in iustitia pauperes et arguet in aequitate
pro mansuetis terrae, et percutiet terram uirga oris sui, et spiritu
labiorum suorum interficiet impium. et erit iustitia cingulum lumborum
eius, et fides cinctorium renum eius. haec nos ad primum aduentum
referimus saluatoris; iudaei in fine mundi contendunt futura. porro lxx
transtulerunt: non secundum gloriam iudicabit, neque iuxta sermonem
arguet; sed iudicabit humili iudicio, et arguet humiles terrae. nullius
enim personam accipit in iudicio, sed scribis et pharisaeis ac
principibus loquitur: uae uobis, hypocritae. et: auferetur a uobis
regnum dei et dabitur genti facienti fructus eius. nec secundum sermonem
et auditum aurium corripuit. illis enim dicentibus: magister, scimus
quia uerax es, et uiam dei in ueritate doces et non ad te pertinet de
aliquo; neque enim uides in faciem hominum, sciens malitiam eorum,
respondebat: quid me temptatis, hypocritae? et cetera his similia.
iudicabat autem in iustitia pauperes spiritu, quorum est regnum dei; et
arguebat in aequitate mansuetos et humiles terrae, dicens ad apostolos:
adhuc et uos insipientes estis? et iterum: necdum scitis neque
intellegitis? et ad petrum specialiter: modicae fidei, quare dubitasti?
uel certe pro humilibus atque mansuetis alios arguebat, qui eos
opprimere conabantur. percussit quoque omnia terrena opera uirga, siue
ut lxx transtulerunt: uerbo oris sui, loquens in euangelio: nolite
putare, quia uenerim mittere pacem super terram; non enim ueni mittere
pacem, sed gladium. et spiritu labiorum suorum interficiet impium. de
quo in nono psalmo legimus: increpasti gentes, et periit impius; nomen
eorum delesti in saeculum et in saeculum saeculi. et paulus apostolus
scribit: quem dominus iesus interficiet spiritu oris sui. percusso autem
impio, accinctus est dominus iustitia et ueritate et fide. ipse enim
factus est nobis a deo sapientia et iustitia et sanctificatio et
redemptio, qui et in euangelio loquitur: ego sum lux, et uita, et
ueritas. et de quo in psalmis dicitur: ueritas de terra orta est; et
iustitia de caelo prospexit. unde et apostolus hortatur ephesios: state
ergo succincti lumbos uestros in ueritate, et induti lorica iustitiae.
quod si pro ueritate, fides legitur, illud dicendum, quod cingulum
domini, quo cinctus est hieremias, fides credentium sit.
habitabit lupus cum agno, et pardus cum haedo accubabit; uitulus
et leo et ouis simul morabuntur, et puer paruulus minabit eos. uitulus
et ursus pascentur; simul requiescent catuli eorum, et leo quasi bos
comedet paleas. et delectabitur infans ab ubere super foramine aspidis;
et in cauerna reguli, qui ablactatus fuerit, manum suam mittet. non
nocebunt, et non occident in uniuerso monte sancto meo, quia repleta est
terra scientia domini, sicut aquae maris operientes. haec quoque iudaei
et nostri iudaizantes iuxta litterarum futura contendunt, ut in
claritate christi, quem putant in fine mundi esse uenturum, omnes
bestiae redigantur in mansuetudinem, et pristina feritate deposita,
lupus et agnus pascantur simul, et cetera cum ceteris, quae nunc uidemus
sibi esse contraria. quos interrogare debemus, si omnia praesentis loci
sic accipiuntur, ut scripta sunt, et nihil refertur ad intellegentiam
spiritalem, iuxta illud apostoli, qui ait: benedictus deus et pater
domini nostri iesu christi, qui benedixit nos in omni benedictione
spiritali in caelestibus in christo. ergo et radix et uirga et flos non
referantur ad sensum, terra que percussa uerbo dei, et interfectus
impius spiritu labiorum eius sic intellegantur, ut scripta sunt, et
docere cogantur, quomodo rebus incorporeis, iustitia et ueritate, renes
domini circumdentur?
sed et hoc eos interrogemus, quid dignum sit domini maiestate, ut lupus
et agnus pascantur simul, et pardus cum haedo accubet, et leo paleas
comedat, et puer paruulus mittat manum suam in foramine aspidum? nisi
forte iuxta fabulas poetarum, aureum nobis saturni saeculum restituent,
in quo lupi et agni pascentur simul, et mulso uino plena current
flumina, et de foliis arborum stillabunt mella dulcissima, lacteis que
fontibus omnia complebuntur. quod si responderint pro beatitudine
temporum haec futura, ut absque cuiusquam noxa homines bonis omnibus
perfruantur, audiant a nobis, nihil esse bonum nisi uirtutem, et nihil
malum nisi uitium, dicente psalmista: quis est homo qui uult uitam, et
diligit dies uidere bonos? compesce linguam tuam a malo, et labia tua ne
loquantur dolum. declina a malo, et fac bonum. diuitiae autem et
sanitas corporis et rerum omnium abundantia, et his contraria,
paupertas, infirmitas et inopia, etiam apud philosophos saeculi nec
inter bona reputantur nec inter mala, sed appellantur indifferentia.
unde et stoici, qui nostro dogmati in plerisque concordant, nihil
appellant bonum, nisi solam honestatem atque uirtutem; nihil malum, nisi
turpitudinem. haec breuiter diximus, ut iudaizantes nostros grauissimo
somno stertere conuincamus. ceterum iuxta uiuificantem spiritum facilis
intellegentia est. lupus enim paulus, qui primum persequebatur et
lacerabat ecclesiam, de quo dictum est: beniamin lupus rapax, habitauit
cum agno, uel anania a quo baptizatus est, uel petro apostolo, cui
dictum est: pasce agnos meos. et pardus qui prius non mutabat uarietates
suas, lotus in fonte domini accubuit cum haedo, non qui a sinistris
est, sed qui immolatur in pascha domini. et hoc notandum, quod non agnus
et haedus habitent, et accubent cum lupo et pardo, sed lupus et pardus
agni et haedi imitentur innocentiam. leo quoque prius ferocissimus, et
ouis et uitulus pariter morabuntur. quod cotidie cernimus in ecclesia,
diuites et pauperes, potentes et humiles, reges atque priuatos pariter
commorari et a pueris paruulis, quod apostolos intellegimus et
apostolicos uiros, imperitos sermone sed non scientia, regi in ecclesia.
qui cum inter se disciplina domini fuerint foederati, ita ut eorum
quoque familiae coniungantur, tunc complebitur: simul requiescent catuli
eorum. leo quoque non carnes comedet, sed paleas, quod scilicet
uescatur cibo simplici. et hic obseruandum, quod non bos carnes, sed leo
paleas comedat. paleas puto in scripturis sanctis uerba simplicia
intellegi. triticum autem et interiorem medullam, sensum qui inuenitur
in littera; et frequenter euenit, ut homines saeculi, mystica
nescientes, simplici scripturarum lectione pascantur. infans quoque, qui
malitia paruulus est, mittit manum in foramine aspidis, et de obsessis
hominum corporibus fugat daemones. qui autem ablactatus est, nequaquam
lacte nutritur infantiae, sed iam solido uescitur cibo. iste in reguli
cauernam mittit manum, hoc est, in ipsius satanae habitaculum, et inde
eum extrahit. unde et apostolis potestas data est, ut calcarent super
serpentes et scorpiones, et super omnem fortitudinem inimici. nocere
autem et occidere nequaquam poterunt uenenata prius animalia eos qui
habitauerint in monte sancto dei, quod interpretatur ecclesia, de quo in
euangelio dicitur: non potest ciuitas abscondi super montem posita. at
ne hoc putemus dici de monte sion iuxta hebraeorum errorem, sequenti
uersiculo euangelicae praedicationis sacramenta monstrantur: quia
repleta est terra scientia domini. hoc est illud quod supra dicebatur
obscurius: habitabit lupus cum agno, et pardus cum haedo accubabit; et
iuxta consuetudinem suam prophetalia in fine uerba panduntur: sicut
aquae, inquit, maris operientes. quomodo aquae maris operiunt profunda
maris, hoc est, terram quae operta est fluctibus, sic scientia domini
omnis terra complebitur. quam diuersorum prius morum coniunctionem etiam
beatus apostolus petrus in uase linteo, quod de caelo dimissum est, se
uidisse testatur, habente quattuor principia, quae quattuor mundi plagas
intellegimus, ut repletam terram dei scientia cognoscamus; in quo uase
erant quadrupedia et serpentes et bestiae et uolatilia caeli, ut quod
arca in diluuio, hoc ecclesia praestet in mundo.
in die illa radix iesse, qui stat in signum populorum; ipsum
gentes deprecabuntur, et erit sepulcrum eius gloriosum. lxx: et erit in
die illa radix iesse, et qui consurget, ut princeps sit gentium, in ipso
gentes sperabunt, et erit requies eius honor.
pro requie eius, in hebraico positum est mnuatho, quod omnes similiter
transtulerunt. pro honore quoque in hebraeo legitur chabod, quod
perspicue gloriam sonat. et est sensus: erit mors eius gloriosa, ut
impleatur illud quod saluator in euangelio deprecatur: pater, glorifica
me gloria, quam habui prius quam mundus esset apud te. dictum est de
natiuitate eius, dictum de ceteris in medio sacramentis; uenit ad
mortem, quae non consueto mortalium nomine, sed quia in christo erat
uita perpetua, requies appellatur. nos autem, ut manifestum legenti
sensum faceremus, pro dormitione et requie, altero uerbo, sed eodem
sensu, sepulcrum uertimus. in tempore igitur illo, quando christi in
toto mundo euangelium coruscarit, et repleta fuerit omnis terra scientia
domini, sicut aquae maris terram operientes, erit radix iesse, et qui
de eius stirpe conscendet in signum omnium populorum, ut uideant populi
signum filii hominis in caelo. qui habebit cornua in manibus suis, in
quibus abscondetur fortitudo eius, ut exaltatus omnia trahat ad se. siue
ut lxx transtulerunt, resurget a mortuis, ut princeps sit omnium
nationum, et uniuersae gentes sperent in eo. quod etiam iacob de tribu
iuda mystico sermone testatur: non deficiet princeps ex iuda, neque dux
de femoribus eius, donec ueniat cui repositum est, et ipse erit
exspectatio gentium. et erit in die illa, adiciet dominus secundo manum
suam ad possidendum residuum populi sui. quod derelinquetur ab assyriis
et ab aegypto, et a phetros et ab aethiopia, et ab aelam et a sennaar,
et ab emath et ab insulis maris. et leuabit signum in nationes, et
congregabit profugos israel, et dispersos iudae colliget a quattuor
plagis terrae; et auferetur zelus ephraim, et hostes iuda peribunt.
ephraim non aemulabitur iudam, et iudas non pugnabit contra ephraim. et
uolabunt in humero philisthiim per mare, simul praedabuntur filios
orientis; et idumaea et moab praeceptum manus eorum, et filii ammon
oboedientes erunt. in die illa, hoc est in illo tempore, de qua et supra
dictum est, cum surrexerit radix iesse in signum populorum (siue ut
dominetur gentium) apponet dominus secundum manum suam, ut nequaquam
iuxta nostros iudaizantes in fine mundi, cum intrauerit plenitudo
gentium, tunc omnis israel saluus fiat. sed haec omnia in primo
intellegamus aduentu. neque enim possumus, cum una dies dicatur et nunc
et supra, illam referre ad primum aduentum et istam ad secundum, ne per
haec quae sequuntur et illa quae praecesserunt ad eum referenda sint
christum, quem iudaei necdum uenisse, sed uenturum esse contendunt. post
uocationem igitur gentium, quae quondam in caudam reputatae sunt,
israel in caudam reputabitur, ut apponat dominus secundo manum suam, et
possideat residuum populi sui, de quo et supra legimus, non omnem
israel, sed reliquias esse saluandas, quae relictae fuerint ab assyriis
et ab aegypto, et a diuersis per circuitum nationibus. primum enim
duodecim apostoli, et septuaginta, et centum uiginti animae, et
quingenti, quibus pariter congregatis dominus apparuit, deinde tria
milia, et quinque milia iudaeorum in dominum crediderunt. iacobus quoque
ad paulum apostolum loquitur, qui et ipse de reliquiis erat: uides,
frater, quanta milia sint iudaeorum credentium? hi omnes aemulatores
legis sunt. et in eodem uolumine legimus: erant autem in hierusalem
habitantes iudaei uiri timorati, de uniuersis gentibus quae sub caelo
sunt. qui omnes mirabantur atque dicebant: nonne isti galilaei sunt, et
quomodo nos audiuimus unusquisque linguam nostram, in qua nati sumus?
parthi et medi et elamitae, et habitantes in mesopotamia et syria,
cappadocia, ponto et asia, phrygia et pamphilia, et aegypto et libya et
cyrene, et aduenae romani, iudaei et proselyti, cretes et arabes
audiuimus loquentes eos nostris linguis magnalia dei. de his igitur
uniuersis gentibus per apostolos israel reliquiae saluabuntur. tradunt
ecclesiasticae historiae, quod apostoli in toto orbe dispersi euangelium
praedicarint; ita ut quidam persas indos que penetrarent, et aethiopia
daret manus suas deo, et trans flumina aethiopiae inde christo munera
deferrentur. ac ne solum orientales populos significare uideatur, iungit
et reliqua: et ab insulis maris. insulas autem maris occidentalem
plagam significat, quae oceani ambitu clauditur. leuabit igitur signum
crucis in uniuersas nationes, et de synagogis iudaeorum primum israel
populum congregabit. ut apostoli praeceptum saluatoris implerent, qui
dixerat: ite ad oues perditas domus israel.
denique et paulus ad incredulos loquitur ex iudaeis: uobis oportebat
primum loqui uerbum dei; sed quoniam repulistis illud, et indignos uos
iudicastis aeternae uitae, ecce conuertimur ad gentes, sicut praecepit
nobis dominus. quattuor autem plagas, orientem et occidentem, meridiem
et septentrionem significat, ut per haec mundi uocatio demonstretur. eo
tempore, inquit esaias, nequaquam ephraim et iudas, qui nunc, me
prophetante, inter se hostili odio dissident, inimici erunt, sed iuxta
hiezechielis prophetiam, duae uirgae in unam uirgam copulabuntur, et
iungentur in christi ecclesia, qui prius fuerant separati, ita ut in
gentibus communi labore desudent, et uolent in humero philisthiim per
mare. hoc est: primum maritimis praedicent palaestinis et per mare
uolucri cursu pergant ad ceteras nationes. siue iuxta lxx interpretes:
uolabunt in nauibus alienigenarum, mare simul praedabuntur; quod de
unius pauli apostoli exemplo intellegamus, qui per pamphiliam et asiam,
et macedoniam et achaiam, et diuersas insulas atque prouincias, ad
italiam quoque, et ut ipse scribit, ad hispanias, alienigenarum portatus
est nauibus. igitur ephraim et iudas, id est, qui de duodecim tribubus
in christum crediderunt ex iudaeis, simul praedabuntur orientem, et in
idumaea et moab extendent manus suas, iuxta illud quod sub persona dauid
christus mystice loquitur: in idumaeam extendam calceamentum meum; mihi
alienigenae seruient. hae enim gentes eo tempore quo esaias
prophetabat, aduersariae erant populo iudaeorum, et idcirco nunc dicit
quod postquam surrexerit radix iesse, ut regnet in gentibus, et uexillum
crucis ob salutem totius orbis fuerit eleuatum, tunc etiam idumaea et
moab et filii ammon, omnis scilicet arabiae latitudo, dent apostolis
manus, et in locis idololatriae christi ecclesiae suscitentur.
et desolabit dominus linguam maris aegypti, et leuabit manum
super flumen in fortitudine spiritus sui, et percutiet eum in riuis
septem; ita ut transeant per eum calciati. et erit uia residuo populo
meo qui relinquetur ab assyriis, sicut fuit israel in die qua ascendit
de terra aegypti. quomodo idumaea et moab et filii ammon tradent manus
suas apostolis, ut oboediant euangelicae praedicationi, sic ipse dominus
qui in apostolis suis illa perfecit, desolabit, non mare iuxta lxx, sed
iuxta hebraeos linguam maris aegypti, quae prius contra dominum
blasphemabat et superstitioni aegyptiae praeerat. unde et in psalmis
legimus: hoc mare magnum et spatiosum, ibi reptilia quorum non est
numerus. quibus infertur: draco iste quem plasmasti, ut illuderet ei.
desolabit igitur, siue interficiet, hoc est anathematisei~g, ut
theodotio, aquila et symmachus transtulerunt, linguam maris aegypti, et
leuabit manum suam super flumina aegypti in fortitudine spiritus sui,
uel spiritu uiolentissimo, quod regnum intellegimus romanorum. regnante
enim caesare augusto, quando flos de radice iesse conscendit et in orbe
romano prima facta est descriptio, potentissimum prius regnum
aegyptiorum, quod multis durauit aetatibus, cleopatrae morte destructum
est, et percussus est amnis aegyptius in septem riuis siue in septem
uallibus. nilus enim aquarum multarum, qui prius uno fluebat alueo et
intransibilis erat, in septem ualles humillimas et riuos diuisus est
atque concisus, ut calciatis pedibus transiretur. hoc autem tropologice
significat, quod gentem aegyptiorum, in tantum idololatriae et
uanissimae superstitioni deditam, ut accipitres, noctuas, canes, et
hircos, et asinos diuino nomine consecrarent, de infinita regni potentia
per singulos romani imperii iudices distribuerit, ut alium iudicem
habeat thebe, alium libya, alium pentapolis, alium aegyptus, alium
alexandria, et diuersae regiones, quas nomous~g aegyptii uocant.
propterea autem sub metaphora nilus diuisus in partes est et scissus in
riuos, ut possit absque ullo impedimento euangelicus sermo discurrere,
et ad populos aegypti ultimos peruenire. et quomodo temporibus moysi
rubrum siccatum est mare, ut populus de aegypto transfugeret; sic e
contrario aegypti flumina siccabuntur, ut reliquiae populi dei, quae ab
assyriis et diuersis gentibus saluabuntur, transeant in aegyptum,
nequaquam fugientes eam, sed capientes et suo calcantes pede. prudens et
christianus lector hanc habeat repromissionum prophetalium regulam, ut
quae iudaei et nostri, immo non nostri iudaizantes, carnaliter futura
contendunt, nos spiritaliter iam transacta doceamus, ne per occasionem
istiusmodi fabularum et inextricabilium iuxta apostolum quaestionum
iudaizare cogamur.
12. et dices in die illa: confitebor tibi, domine, quoniam iratus
es mihi; conuersus est furor tuus et consolatus es me. ecce deus
saluator meus, fiducialiter agam et non timebo, quia fortitudo mea et
laus mea dominus deus, et factus est mihi in salutem. qui prius in
solitudine dixeratis, quando ascendistis de terra aegypti, et mare
siccatum est rubrum: cantemus domino, gloriose enim magnificatus est, et
reliqua. nunc percussa lingua maris aegypti, et flumine illius arefacto
atque conciso et humiliato, glorificate dominum, et dicite: confitebor
tibi, domine, quoniam qui iram merui et furorem tuum, misericordiam
consecutus sum; es tu enim saluator meus, id est iesus, et nequaquam
fiduciam habebo in idolis, nec timebo quae non sunt timenda, sed tu es
fortitudo mea et laus mea, qui factus es mihi in salutem. audiat
sceleratissima haeresis, factum dominum his qui saluantur, et quorum
prius dominus non erat, ut creationem in scripturis atque facturam, non
semper conditionem eorum quae non erant, sed interdum gratiam in eos qui
meruerint sibi deum fieri, intellegamus. haurietis aquas in gaudio de
fontibus saluatoris. quem supra emmanuel, deinde: spolia detrahe,
festina praedari, et reliquis appellarat nominibus, ne uideretur alter
esse praeter eum quem gabriel uirgini nuntiauit, dicens: et uocabis
nomen eius iesum, ipse enim saluum faciet populum suum, nunc uocat
saluatorem, et de eius fontibus aquas praedicat hauriendas, nequaquam de
aquis fluminis aegypti, quae percussae sunt, neque de aquis fluminis
rasin, sed de fontibus iesu, hoc enim hebraeorum lingua saluator
exprimitur. unde et ipse clamabat in euangelio: qui sitit, ueniat ad me,
et bibat. qui crediderit in me, sicut dicit scriptura: flumina de
uentre eius fluent aquae uiuae. hoc autem, inquit euangelista, dicebat
de spiritu sancto, quem credentes in eum accepturi erant. et in alio
ipse loquitur in euangelio: qui biberit de aqua quam ego dedero ei, non
sitiet in aeternum; sed aqua quam ego dabo ei, fiet in eo fons aquae
salientis in uitam aeternam.
fontes saluatoris, doctrinam intellegamus euangelicam, de qua in
sexagesimo septimo psalmo legimus: in ecclesiis benedicite deo domino de
fontibus israel. et dicetis in illa die: confitemini domino et inuocate
nomen eius; notas facite in populis adinuentiones eius; mementote,
quoniam excelsum est nomen eius. cantate domino, quoniam magnifice
fecit; annuntiate hoc in uniuersa terra. haec praecipiuntur ab apostolis
et reliquiis israel his qui de gentibus crediderunt, ut soli
confiteantur domino, et idolis derelictis, inuocent nomen eius; et
cuncta eius opera praedicent infidelibus; ut sciant, quoniam solus
excelsus est, cui cantandum sit quod magnifice fecerit, et in omni orbe
illius misericordia praedicetur.
exsulta et lauda, habitatio sion, quia magnus in medio tui
sanctus israel. primum dicendum iuxta litteram: o habitatio sion,
exsulta et lauda deum tuum, quod qui tuus ante uidebatur deus, et
modicis iudaeae terrae claudebatur angustiis, nunc repleuerit omnem
terram scientia sua et de morte consurgens, regnet in gentibus, et ipsum
nationes deprecentur, atque adorent; ita dumtaxat, ut adiciat secundo
manum suam ad possidendum quod reliquum est populi sui, et congregandos
profugos israel, et dispersos iuda colligendos a quattuor plagis terrae,
quia seminarium euangelii per apostolos, qui ex iudaeis erant,
processit a fontibus israel. melius autem est, ut sion, id est speculam
in sublimibus collocatam, interpretemur ecclesiam, de qua et
quinquagesimus psalmus canit: benigne fac, domine, in bona uoluntate tua
sion, et aedificentur muri hierusalem, ut acceptabile fiat in ea domino
sacrificium iustitiae, oblationes et holocausta, et uitulus quem filio
paenitenti pater clementissimus immolauit.
LIBER 5
plures anni sunt quod a sanctae memoriae uiro amabili episcopo
rogatus, ut in decem esaiae scriberem uisiones, pro angustia illius
temporis quid mihi uideretur in singulis breui sermone perstrinxi;
historiam tantum quod petebat, edisserens. nunc ad te, philopon�tat�~g
eustochium, cogor in totum prophetam commentarios scribere, et interim
orationibus tuis ad babylonem usque perueni, quae prima decem uisionum
est, de quibus ante iam dixi. superfluum autem mihi uisum est aut eadem
rursus iterare, aut in uno opere diuersas sententias promere. unde
quintus in esaiam liber erit hic, qui quondam solus editus est, quo ad
calcem usque perfecto, sexti uoluminis iuxta tropologiam arripiemus
exordium, et eadem te dominum deprecante, spiritalis intellegentiae
culmina persequemur.
hucusque papa amabilis, columen caritatis et nomen, ac mihi
omnium quos terra genuit amantissime, per litteras flagitabas, ut tibi
decem uisiones quae in esaia obscurissimae sunt, historica expositione
dissererem, et omissis nostrorum commentariis, qui uarias opiniones
secuti, multa uolumina condiderunt, hebraicam panderem ueritatem. me que
retractantem, et molestissimum explanationis genus in tempus aliud
differentem, saepissime commonebas. hoc autem anno misisti filium
nostrum heraclium diaconum, qui me manu conserta in ius uocaret, et
promissum per momenta exigeret. quid igitur faciam? subeam ne opus in
quo uiri eruditissimi sudauerunt, origenem loquor et eusebium pamphili,
quorum alter liberis allegoriae spatiis euagatur, et interpretatis
nominibus singulorum, ingenium suum facit ecclesiae sacramenta, alter
historicam expositionem titulo repromittens, interdum obliuiscitur
propositi et in origenis scita concedit? an taceam et aperte huius
generis expositionem nescire me dicam? et quando tibi potero persuadere,
me non potuisse magis quam noluisse, quorum alterum imbecillitatis est,
alterum superbiae? quibus adactus causis, malui a te ingenium meum quam
uoluntatem quaeri; breuiter que annotabo quae didici, fundamenta
iaciens scripturarum. ceterum si aut tu uolueris, aut spatium fuerit, et
uoluntati nostrae christus annuerit, spiritale supra struendum est
aedificium, ut imposito culmine, perfecta ecclesiae ornamenta
monstremus. proposuisti de esaia uisionem babylonis et philisthiim, moab
et damasci, aegypti que et deserti maris, et idumaeae et arabiae, et
uallis uisionis et tyri; quas si latius nitar exponere, multis libris
opus erit, et exactoris mei nauigatio in annum alterum differetur.
itaque ut uis, singulis testimoniis breues sententiolas coaptabo, ut non
tam exponam quid sentiam, quam paucis uerbis tibi sentienda dimittam.
dictamus haec, non scribimus: currente notariorum manu currit oratio.
nolumus enim nostra laudari, sed prophetae dicta intellegi, nec iactamus
eloquentiam, sed scientiam quaerimus scripturarum. incipiamus ergo a
babylone.
13. onus babylonis, quod uidit esaias filius amos. uerbum
hebraicum messa uel onus uel pondus intellegi potest. et ubicumque
praepositum fuerit, minarum plena sunt quae dicuntur. unde miror lxx
translatores in re tristi uoluisse ponere uisionem; sed de hoc alias.
nunc quod cepimus exsequamur: babylon fuit metropolis chaldaeorum, cuius
rex nabuchodonosor cunctis usque ad aethiopiam gentibus superatis,
inter ceteras uastauit et iudaeam, diu que obsessam hierusalem undecimo
anno cepit regni sedechiae; quem et ipsum captum duxit in antiochiam,
quae tunc uocabatur reblatha, ibi que coram patre filiis interfectis,
oculos sedechiae iussit auferri, excaecatum que misit in caueam et in
ritum ferarum traxit in babylonem, completo uaticinio hieremiae, quod
canebat: intrabis in babylonem et non uidebis eam. ad consolationem ergo
populi iudaeorum, babylonis ruina praedicitur, quod quomodo niniue
metropolis assyriorum, quorum reges phul et theglathphalasar, et
salmanasar et sennacherib decem tribus ceperant, chaldaeo uastante,
subuersa est; ita etiam haec, quae contra deum superbierit, medorum
atque persarum impetu subuertatur.
in montem caliginosum eleuate signum, exaltate uocem, leuate
manum. montem caliginosum siue tenebrosum, quod hebraice dicitur nesphe,
babylonem propter superbiam intellege. isti sunt montes tenebrosi,
tristitiam et caliginem praeferentes, de quibus hieremias ait: date
gloriam domino deo uestro, antequam offendant pedes uestri ad montes
tenebrosos. praecipitur que uel angelis uel quibuslibet ministris, ut
iubente deo, et exaltata nuntiorum manu, uentura babyloni captiuitas
praedicetur.
et ingrediantur portas duces. ego mandaui sanctificatis meis et
uocaui fortes meos in ira mea exsultantes in gloria mea. principes et
gigantes iuxta lxx translatores eusebius uirtutes angelicas
interpretatur et pessimos daemones, qui ad euersionem babylonis missi
sunt. nos autem historiae ordinem prosequentes, medos esse dicimus. de
quibus in consequentibus apertius scriptura testatur, dicens: ecce ego
suscitabo super eos medos, qui argentum non quaerant nec aurum uelint.
ne mirum si medos ad subuersionem babylonis sanctificatos uocet, cum per
hieremiam ipsum nabuchodonosor, quia eius imperio seruiebat, destruens
praeuaricatricem hierusalem, seruum suum et columbam dixerit. porro quod
ait: fortes meos et exsultantes in gloria mea, ostendit eos non suis
uiribus, sed dei ira tam sublimis regni potentiam subuertisse.
uox multitudinis in montibus, quasi populorum frequentium; uox
sonitus regum gentium congregatarum. dominus exercituum praecepit
militiae belli uenientibus de terra procul a summitate caeli. dominus et
uasa furoris eius, ut disperdat omnem terram. medorum atque persarum
describitur impetus, quod multis se cum auxiliis congregatis, domino
eorum exercitum praecedente, ad uastitatem ueniant babylonis, ut
disperdant omnem terram; non quod totum orbem uastauerint, sed omnem
terram babylonis et chaldaeorum. idioma est enim sanctae scripturae, ut
omnem terram illius significet prouinciae, de qua sermo est, quod quidam
non intellegentes, ad omnium terrarum subuersionem trahunt.
ululate, quia prope est dies domini; quasi uastitas a domino
ueniet. apostropha fit ad populum chaldaeorum, ut uentura mala fletibus
resonent, nec de ruina ambigant ciuitatis, cum dominus uastator
adueniat.
propter hoc omnes manus dissoluentur, et omne cor hominis
tabescet et conteretur. torsiones et dolores tenebunt; quasi parturiens
dolebunt; unusquisque ad proximum suum stupebit; facies combustae uultus
eorum. hoc expositione non indiget, sed breuiter indicatur, quod tantum
malorum pondus incumbat, ut pugnatorum babylonis soluatur manus, et cor
pauore languescat et in morem parturientium feminarum dolor torqueat
uiscera, et unusquisque alterius quaerat auxilium, luridam faciem
pallore circumferens; naturale est enim, ut imminentibus malis alios
sapere plus putemus.
ecce dies domini uenit crudelis et indignationis plenus et irae
furoris que ad ponendam terram in solitudinem, et peccatores eius
conterendos de ea. crudelem diem uocat, non merito sui, sed populi. non
est enim crudelis qui crudeles iugulat, sed quod crudelis patientibus
esse uideatur. nam et latro suspensus patibulo crudelem iudicem putat.
simul que solitudo et uastitas terrae babyloniae nuntiatur; et causa
uastitatis exponitur, quod propter accolas eius haec omnia fiant.
quoniam stellae caeli et splendor earum non expandent lumen suum;
obtenebratus est sol in ortu suo, et luna non splendebit in lumine suo.
uerbum hebraicum chisile lxx �ri�na~g transtulerunt, hebraeus, quo ego
praeceptore usus sum, arcturum interpretatus est. nos generaliter
sequentes symmachum, stellas diximus. est autem sensus, quod cum dies
domini crudelis aduenerit et furor eius uniuersa uastarit, prae timoris
magnitudine mortalibus cuncta tenebrescant, et sol ipse et luna astra
que rutilantia suum uideantur negare fulgorem. unde et caelum sacco
induitur, quod scilicet tenebrae cuncta operiant, et prementibus malis,
nihil aliud sentiant homines, nisi quod mens uidere compellit.
et uisitabo super orbis mala et contra impios iniquitatem eorum;
et quiescere faciam superbiam infidelium; et arrogantiam fortium
humiliabo. ex hoc loco et ex superiore, ubi scriptum est quod
obtenebrescat sol in ortu suo et luna caligine compleatur, et stellae
fulgorem retrahant et totius orbis iniquitas uisitetur, quidam putant
non de babylonis ruina, sed de mundi consummatione praedici. cum utique
secundum superiora et orbis, qui hebraice dicitur thebel, et graece
oikoumen�~g, babylon intellegenda sit. oikoumen�~g enim lingua nostra
habitatam sonat; et habitata propter ingentem populi multitudinem
babylon dicitur, ut ubi prius fuerat innumerabilis turba populorum, ibi
sit uastitas et habitatio bestiarum.
pretiosior erit uir auro et homo mundo obrizo. causa manifesta
quare deus uisitet oikoumen�n~g, id est babylonis mala, ut habitatore
deserta redigatur in solitudinem. pretiosum autem dicitur omne quod
rarum est; quomodo et supra iuxta historiam, pro hominum raritate
apprehendere legimus septem mulieres unum uirum, dicentes: panem nostrum
comedemus, et uestimentis nostris operiemur; tantummodo inuocetur nomen
tuum super nos et aufer opprobrium nostrum. et in samuelis uolumine
continetur: sermo domini erat pretiosus in diebus illis, id est rarus.
nota quod in hebraico pro generali auro phaz, pro obrizo ophir scriptum
est.
super hoc caelum turbabo, et mouebitur terra de loco suo, propter
indignationem domini exercituum et propter diem irae furoris eius. uel
eo sensu accipe, quo supra de stellis et sole et luna et orbe
exposuimus; uel huperbolik�s~g, quod ab indignatione dei et caelum
triste sit, et terra moueatur, elementa quoque omnia iram creatoris
agnoscant.
et erit quasi damula fugiens et quasi ouis, et non erit qui
congreget. babylonium significat et chaldaeum populum, quod ita pauidus
ad irruptionem medorum persarum que fugiat, quasi damula et ouis ad
rugitum leonis et ululatum lupi; nec habet defensorem aut principem,
cuius sequatur imperium.
unusquisque ad populum suum conuertetur, et singuli ad terram
suam fugient. postquam capta fuerit babylon et per portas eius intrarit
hostilis exercitus, cuncta auxilia et diuersarum gentium turmae, quibus
prius ciuitas defensabatur, ad suas prouincias reuertentur.
omnis qui inuentus fuerit, occidetur; et omnis qui superuenerit,
cadet in gladio. qui non fugerit, mucrone ferietur; qui uero aut
resistere uoluerit, aut reuerti, in tantum captae urbi non proderit, ut
ipse quoque sanguinem fundat.
infantes eorum allidentur in oculis eorum; diripientur domus
eorum et uxores eorum uiolabuntur. hoc est quod dauid in spiritu
prophetat: filia babylonis misera, beatus qui tribuet tibi retributionem
tuam, quam retribuisti nobis. beatus qui tenebit et allidet paruulos
tuos ad petram. tanta erit urbis uastitas et uictorum saeuitia, ut nec
innoxiae parcatur aetati, ut cunctae domorum diripiantur opes et in
conspectu maritali uxorum uioletur pudicitia.
ecce ego suscitabo super eos medos, qui argentum non quaerant
neque aurum uelint. apertum est quod latebat: quod nequaquam fortes et
gigantes angeli intellegendi sunt et daemones, sed medorum gens, quorum
princeps darius primus babyloniorum destruxit imperium, occiso balthasar
nepote nabuchodonosor, qui euilmarodach filius fuit. tantam autem
scribit medorum persarum que saeuitiam, ut ardore sanguinis effundendi
aurum argentum que contemnant et oblatas opes pro luto reputent.
sed sagittis paruulos interficient et lactentibus uteri non
miserebuntur, et super filios non parcet oculos eorum. interficientur
paruuli, quorum uulnera erunt non minora quam corpora, et praegnantium
uteri secabuntur, elidentur que infantes, et ad ubera pressos filios
crudelis uictor occidet.
et erit babylon illa gloriosa in regnis, incluta in superbia
chaldaeorum, sicut subuertit dominus sodomam et gomorram; non
habitabitur usque in finem, et non fundabitur usque in generationem et
generationem. audiuimus medos, audiuimus babylonem, audiuimus inclutam
in superbia chaldaeorum; nolumus intellegere, quod fuit, et quaerimus
audire quod non fuit. et haec dicimus, non quod tropologicam
intellegentiam condemnemus, sed quod spiritalis interpretatio sequi
debeat ordinem historiae, quod plerique ignorantes, lymphatico in
scripturis uagantur errore.
usque in praesentem ergo diem prophetia babylonis expletur; et sicut
subuertit deus sodomam et gomorram, sic et ista subuersa non habitabitur
in aeternum. pro illa enim seleuciam et ctesiphontem urbes persarum
inclutas fecerunt.
nec ponet ibi tentoria arabs; nec pastores requiescent ibi. sed
erunt ibi bestiae, replebuntur domus eorum draconibus et habitabunt ibi
struthiones, et pilosi saltabunt ibi. et respondebunt ululae in aedibus
eius, et sirenae in delubris uoluptatis. in tantum babylon uastata erit
atque deserta, ut ne ad pascua quidem armentorum et pecorum utilis sit.
non enim tendet ibi arabs saracenus que tentoria, nec pastores post
uestigia gregum fessi labore quiescent, sed inter parietinas et
angustias ueterum ruinarum habitabunt siim, quod soli lxx bestias
transtulerunt. alii ipso nomine quod apud hebraeos scriptum est,
uolentes genera daemonum intellegi uel phantasmata. et replebuntur,
inquit, domus, ut nos diximus, draconibus; ut aquila transtulit:
typhonibus; ut symmachus ohim, ipsum uerbum hebraicum exprimens. lxx
uero et theodotio clamores uel sonitus interpretati sunt. quod que
sequitur: pilosi saltabunt ibi, uel incubones, uel satyros, uel
siluestres quosdam homines, quos nonnulli fatuos ficarios uocant, aut
daemonum genera intellegunt. pro ululis quoque omnes ipsum uerbum
hebraicum iim, soli lxx onocentauros transtulerunt. sirenae autem
thennim uocantur, quas nos aut daemones aut monstra quaedam, uel certe
dracones magnos interpretabimur, qui cristati sunt et uolantes. per quae
omnia uastitatis et solitudinis signa monstrantur, quod tanta sit
depopulatio urbis quondam potissimae, ut prae multitudine daemonum ac
bestiarum nullus in eam audeat pastorum, id est deserti appetitor
intrare. didicimus a quodam fratre elamita, qui de illis finibus
egrediens, nunc hierosolymis uitam exigit monachorum, uenationes regias
esse in babylone et omnis generis bestias murorum eius tantum ambitu
coerceri.
14. prope est ut ueniat tempus eius, et dies eius non
elongabuntur. instare dicit tempus quo ab hostibus capienda sit. post
captiuitatem quippe hierusalem, non multum tempus in medio, et a medis
persis que uastata est.
miserebitur enim dominus iacob, et eliget adhuc de israel, et
requiescere eos faciet super humum suam. de hoc sophonias plenius
loquitur: lauda, filia sion; iubila, israel; laetare et exsulta in omni
corde, filia hierusalem, quia abstulit dominus iudicium tuum; auertit
inimicos tuos. significat autem tempus quo cyrus rex persarum captiuum
populum hierusalem redire permisit. lege esdrae librum, aggaeum et
zachariam, quando sub zorobabel et iesu sacerdote magno, et esdra et
neemia altare, templum muri que urbis exstructi sunt.
adiungetur aduena ad eos et adhaerebit domui iacob. et tenebunt
eos populi, et adducent eos in locum suum; et possidebit eos domus
israel super terram domini in seruos et ancillas; et erunt capientes eos
qui se ceperant, et subicient exactores suos. multos de diuersis
gentibus cum populo iudaeorum hierosolymam uenisse conicimus, credentes
deo israel et errorum idola relinquentes. quod autem reducti sint ad
litteras regis, et acceperint munera et impensas templi, nulla dubitatio
est. in hoc solum arctari uidetur intellegentia, quomodo possederit
israel in terra domini uictores quondam suos, et subiecerint exactores,
seruos que eos habuerint et ancillas. nisi forte sunekdochik�s~g totum
intellegamus ex parte: quod tantae postea felicitatis fuerint, ut de
diuersis quoque per circuitum gentibus sibi seruorum et ancillarum
familias compararint. potest et in assueri temporibus intellegi, quando
occiso holoferne hostilis ab israel est caesus exercitus. quod haereo
litterae, et in more serpentis terram comedo, tuae est uoluntatis, qui
historicam tantum interpretationem audire uoluisti.
et erit in die illa cum requiem dederit tibi dominus a labore
tuo, et a concussione tua, et a seruitute tua dura qua ante seruiuisti;
sumes parabolam istam contra regem babylonis, et dices. sermo dirigitur
ad israelem, quod postquam reuersus fuerit hierusalem et iugum
seruitutis excusserit, recordetur potentiae quondam nabuchodonosor, et
culminis babylonii, miserabili que eum uoce deploret, quia ad tantam
uenerit calamitatem, ut hostibus quoque suis dignus miseratione
uideatur.
quomodo cessauit exactor, requieuit tributum? contriuit dominus
baculum impiorum, uirgam dominantium caedentem populos in indignatione;
plaga insanabili subicientem in furore gentes, persequentem crudeliter;
conquieuit et siluit. omnis terra gauisa est et exsultauit. uox ista
plangentis et miserantis est israelis, quomodo dominus quondam uictor
que terrarum et tributis cuncta depopulans, contritus sit et redactus in
nihil. ille, inquam, qui fuit baculus impiorum, qui sceptrum et uirga
regalis omnes furibunde percutiens, cuius plaga non poterat sustineri,
qui fugientes quoque crudeliter persequebatur; quomodo conquieuit et
humiliatus est et ad ruinam eius omnis terra consiluit, uocem tantum
laetitiae gestientis emittens?
abietes quoque laetatae sunt super te et cedri libani. ex quo
dormisti, non ascendit qui succidat nos. per abietes et cedros libani
principes gentium intellege, qui nabuchodonosor percutiente succisi
sunt, qui et ipsi in uocem laetitiae prorumpentes dicunt: ex quo ad
inferna deductus es, nullus alius potuit inueniri, qui magnos potentes
que succideret.
infernus subter te conturbatus est, in occursum aduentus tui
suscitauit tibi gigantes; omnes principes terrae, surrexerunt de soliis
suis; cuncti principes nationum uniuersi respondebunt, et dicent tibi.
haec emphatik�s~g legenda sunt et scaenae modo; non quod facta sint, sed
quod fieri potuerint, nisi forte animas regum quos interfecerat,
insultantes regi babylonio occurrisse credimus. solatium enim malorum
est, cum inimicos uiderint eadem sustinere. et tu uulneratus es sicut
nos, nostri similis effectus es. detracta est ad inferos superbia tua:
concidit cadauer tuum, subter te sternetur tinea et operimentum tuum
erunt uermes. sermo potentium et principum terrae, quos supra cedros et
abietes appellarat, ad regem babylonium dirigitur in inferis
constitutum. iam non dolemus nos fuisse succisos, cum et tu eadem securi
corrueris. omnis potentia tua et in caelum eleuata superbia ad terram
detracta est. ergo ne et tuum cadauer tineam sustentabit et scatentium
operiet uermium multitudo? senties per mortem hominis uilitatem, qui dei
in te potentiam praeferebas.
quomodo cecidisti de caelo, lucifer, qui mane oriebaris;
corruisti in terram qui uulnerabas gentes. qui dicebas in corde tuo: in
caelum ascendam, super sidera dei exaltabo solium meum, sedebo in monte
testamenti in lateribus aquilonis; ascendam super altitudinem nubium,
ero similis altissimo. pro eo quod nos interpretati sumus ob facilitatem
intellegentiae: quomodo cecidisti de caelo, lucifer, qui mane
oriebaris, in hebraico, ut uerbum exprimamus ad uerbum, legitur: quomodo
cecidisti de caelo, ulula fili diluculi. significatur autem aliis
uerbis lucifer; et dicitur ei quod flere debeat et lugere, qui quondam
sic fuerit gloriosus, ut fulgori luciferi comparatus sit. sicut, inquit,
lucifer discutiens tenebras, ardens et rutilus illucescit; sic et tuus
progressus in populos et publicum claro sideri similis uidebatur; sed
cecidisti in terram gentium uulnerator, qui per superbiam loquebaris.
tantam potentiam consecutus sum, ut caelum mihi restet et sidera ut sub
pedibus meis superna debeant subiacere. quamquam iudaei caelum et astra
dei se uelint intellegi, ex eo quod sequitur: sedebo in monte
testamenti, id est in templo ubi dei iura sunt condita, et in lateribus
aquilonis; id est in hierusalem. scriptum est enim: montes sion latera
aquilonis. nec suffecerat superbiae eius desiderare caelestia, nisi ad
tantam prorupisset insaniam, ut dei sibi similitudinem uindicaret.
uerumtamen ad infernum detraheris in profundum laci.
qui per superbiam dixerat: in caelum ascendam, ero similis altissimo,
non solum ad infernum, sed ad infernum ultimum detrahitur. hoc enim
significat laci profunditas, pro quo in euangelio tenebras exteriores
legimus, ubi est fletus et stridor dentium.
qui te uiderint, ad te inclinabuntur te que prospicient
(subauditur dicentes): numquid iste est uir qui conturbauit terram, qui
concussit regna, qui posuit orbem desertum et urbes eius destruxit;
uinctis eius non aperuit carcerem? et haec uox insultantium est atque
mirantium, quomodo uastator omnium et ipse uastatus sit. quod autem ait:
uinctis eius non aperuit carcerem? magnitudo crudelitatis et impietatis
exprimitur, ut etiam uinctos teneret in carcere; et non sufficerent
miseris catenae, nisi illos et tenebrarum horror includeret.
omnes reges gentium, uniuersi dormierunt in gloria, uir in domo
sua. tu autem proiectus es de sepulcro tuo quasi stirps inutilis,
pollutus et obuolutus cum his qui interfecti sunt gladio et descenderunt
ad fundamenta laci; quasi cadauer putridum non habebis consortium,
neque cum eis in sepultura. narrant hebraei huiusmodi fabulam:
euilmarodach qui, patre suo nabuchodonosor uiuente per septem annos
inter bestias, ante regnauerat, postquam ille restitutus in regno est,
usque ad mortem patris cum ioachim rege iudae in uinculis fuit; quo
mortuo, cum rursus in regnum succederet, et non susciperetur a
principibus, qui metuebant ne uiueret qui dicebatur exstinctus. ut fidem
patris mortui faceret, aperuit sepulcrum, et cadauer eius unco et
funibus traxit. et est sensus: sepultis omnibus qui a te interfecti
sunt, tu solus insepultus iacebis. alii uero locum istum sic
interpretantur: omnes animae apud inferos aliquam requiem accipient, tu
solus in extremas tenebras religaberis. omnium enim operieris sanguine
et uniuersorum te cruor premet uelut obuolutum sanie mortuorum.
symmachus hunc locum sic transtulit: etiam cum his qui occiduntur in
bello, non mereberis habere consortium sepulturae. pro eo autem quod nos
diximus quasi stirps inutilis, et in hebraeo legitur: chaneser nethab,
aquila interpretatus est: quasi sanies polluta. neser autem proprie
uirgultum appellatur, quod ad radices arborem nascitur, et quasi inutile
ab agricolis amputatur; possumus id ipsum saniem tabem que intellegere.
simul que discimus quod infernus sub terra sit, dicente scriptura:
usque ad fundamenta laci.
tu enim terram tuam disperdidisti, tu populum tuum occidisti.
iuxta lxx interpretes qui dixerunt: qui terram meam perdidisti, et
populum meum occidisti, quid dicant, nulla dubitatio est. terram enim
iudaeam et populum eius israel nabuchodonosor interfecit et perdidit.
iuxta hebraicum difficilis intellectus est, quomodo terram suam
perdiderit, et populum suum occiderit; nisi forte hoc sensu accipiendum
est: eos, quos tibi deus in correptionem dederat, tu penitus perdidisti.
uel aliter: antiquum assyriorum regnum, te multum superbiente et
eleuante contra deum ceruicem tuam, omnino destructum est. si enim te
egisses humiliter et scisses mensuram tuam, assyrius et babylonius
hucusque regnaret. siue hoc modo: tam crudelis fuisti in externos, ut
etiam subiectos tibi populos furibundus opprimeres.
non uocabitur in aeternum semen pessimorum. praeparate filios
eius occisione in iniquitate patrum suorum; non consurgent, nec
hereditabunt terram, neque implebunt facies orbis ciuitatum. omnes
historiae consentiunt, quod occiso balthasar nepote nabuchodonosor et
succedente dario in regnum chaldaeorum, nullus de nabuchodonosor
deinceps stirpe regnarit. hoc ergo scriptura praedicit, quod in tantam
babylon ueniet uastitatem, ut etiam de semine regio nullus remaneat, sed
propter impietatem patris omnis soboles deleatur. pro eo autem quod nos
in ultima parte sententiae transtulimus: neque implebunt facies orbis
ciuitatum, in hebraeo scriptum est pro ciuitatibus arim, quos nos
transferre possumus et aduersarios, ut sit sensus: nullus ex semine tuo
qui cupiat reparare regnum, aduersarius suscitabitur. secundum
septuaginta interpretes, qui dixerunt: semen pessimum, para filios tuos
interfectioni propter peccata patris tui, quem sensum habeat, scire non
ualeo.
et consurgam super eos, dicit dominus exercituum; et perdam
babylonis nomen, et reliquias, et germen, et progeniem, dicit dominus.
et ponam eam in possessionem hericii et in paludes aquarum; et scopabo
eam in scopa terens, dicit dominus exercituum. babylonem fuisse
potentissimam, et in campestribus per quadrum sitam, ab angulo usque ad
angulum muri, sedecim milia tenuisse passuum, id est, simul per
circuitum sexaginta quattuor, refert herodotus, et multi alii qui
graecas historias conscripserunt. arx autem, id est, capitolium illius
urbis, est turris quae aedificata post diluuium, in altitudine quattuor
milia dicitur tenere passuum, paulatim de lato in angustias coarctata,
ut pondus imminens facilius a latioribus sustentetur. describunt ibi
templa marmorea, aureas statuas, plateas lapidibus auro que fulgentes,
et multa alia quae paene uideantur incredibilia. hoc totum narrauimus,
ut ostenderemus quod ad iram dei omnis potentia puluis sit, et fauillae
et cineri comparetur. si liceret introire barbaras nationes, et uidere
tantae urbis extrema uestigia, uideremus possessionem hericii, et
paludes aquarum, et uere completum esse quod nunc esaiae uocibus
canitur: scopabo eam in scopa terens; exceptis enim muris coctilibus,
qui propter bestias concludendas post annos plurimos instaurantur, omne
in medio spatium solitudo est.
iurauit dominus exercituum, dicens: si non ut putaui, ita erit,
et quomodo mente tractaui, sic eueniet ut conteram assyrium in terra
mea, et in montibus meis conculcem eum; et auferetur ab eis iugum eius,
et onus illius ab humero eorum tolletur. reuertitur ad praesentia, hoc
est ad sennacherib regem assyriorum, qui samariam iudaeam que uastauit,
et excepta hierusalem, deleuit per circuitum omnia; et longe post
futuris uicina consociat, ut imminens auferatur metus, quia dicere
poterant audientes. nos praesentem perpetimur obsidionem, iste multis
post saeculis uentura promittit. est igitur ordo prophetiae, quamquam
post annos plurimos babylon destruenda sit, et omne penitus stirpis
assyriorum et chaldaeae seminarium disperdendum; tamen ut non timeatis
uicinam captiuitatem, iurat dominus, cui etiam non iuranti credendum
est, quod sua aestimatio non fallatur, et quod mente conceperit, irritum
non fiat. hoc autem humano loquitur affectu, quod scilicet non fallatur
qui falli non potest. conteram, inquit, assyrium in terra mea et in
montibus meis conculcabo eum. una enim nocte centum octoginta quinque
milia exercitus assyriorum angelo uastante deleta sunt. et auferetur ab
his qui obsidebantur in hierusalem, iugum eius et graue imperium quod
omnibus imminebat, et pondus quo premebantur, in ipsum potius
retrudetur. fugiente enim assyriorum rege in terram suam, liber cum
populi reliquiis egressus est ezechias. hoc consilium quod cogitaui
super omnem terram, et haec est manus extenta super uniuersas gentes.
dominus enim exercituum decreuit et quis poterit infirmare? et manus
eius extenta, et quis auertet eam? hoc loco quidam arbitrantur generalem
esse contra omnem orbem prophetiam, et quod uastitas babylonis et
assyriae ciuitatis typus sit consummationis mundi. quibus nequaquam
contradicimus, dum sciamus, hic omnem terram assyriorum proprie
significari, et uniuersas gentes socias regis assyrii demonstratas.
quidquid autem a domino decretum est, nullius uirtute prohibetur. et
extentam manum eius et ad percutiendum paratam nemo poterit coercere.
anno quo mortuus est rex achaz, factum est onus istud. quattuor
reges iudaeae titulo prophetae legimus esse praepositos: oziam, ioatham,
achaz et ezechiam, singulos sibi ordine et sobole succedentes, quorum
oziam mortuum supra legimus, referente esaia: anno quo mortuus est rex
ozias, uidi dominum sedentem super solium excelsum et eleuatum. ex quo
intellegimus et uisionem sedentis domini, et ea quae praecipiuntur
prophetae, usque ad eum locum ubi scriptum est: sicut terebinthus et
sicut quercus quae expandit ramos suos, semen sanctum erit germen eius,
sub ioatham rege prophetatum. tertius succedit achaz filius ioatham
filii oziae regis iuda, sub quo ascendit rasin, rex syriae, et phacee
filius romeliae, rex israel, in hierusalem ad proeliandum contra eam, et
reliqua quae scriptura commemorat. igitur sub achaz usque ad praesentem
locum, quem nunc exponere nitimur, omnia quae in medio posita sunt,
uaticinata cognoscimus; quo mortuo quartus, id est ultimus, succedit
ezechias, sub quo omnis usque ad finem texitur liber. ne laeteris
philisthaea omnis tu, quoniam comminuta est uirga percussoris tui; de
radice enim colubri egredietur regulus, et semen eius absorbens
uolucrem. naturale est quod dicimus: mortuo rege aduersarum gentium,
semper laetantur inimici, ex rebus nouis bella ciuilia et seditiones ac
regnandi imperitiam praestolantes.
mortuo igitur achaz peccatore, qui ambulauerat in uiis regum israel et
cognatione eis fuerat copulatus, intellegimus philisthaeos e uicino
fuisse laetatos et insultasse israeli, quod maturo rege perdito,
ezechiae iuueni subiacerent. philisthaeos autem, ut supra diximus,
palaestinos significat, quos alienigenas uulgata scribit editio, cum hoc
non unius gentis, sed omnium externarum gentium uocabulum sit. ne,
inquit, laeteris, o philisthaea, ne insultes populo meo, quos
percussoris tui achaz uirga confracta sit; quod baculus qui te ferire
solitus erat, uideatur morte contritus, quod coluber interfectus. pro
hoc enim nocentior nascetur ezechias regulus, quem graeci uocant
basiliscum, qui te suo aspectu interficiat et spiritu oris occidat.
quomodo enim nulla auis reguli aspectum potest illaesa transire; sed
quamuis procul fuerit, eius ore sorbetur. ita et tu a conspectu regis
ezechiae totus peribis. et pulchre seruauit metaphoram, quia enim
serpentem et regulum nominarat, ore eius et spiritu dicit uolucres
deuorari. quod autem nullus regum iuda sic percusserit philisthiim,
quomodo eos depopulatus est ezechias, audi regum librum: ipse percussit
philisthiim usque ad gazam et usque ad terminos eius; a turre custodum
usque ad urbes munitas. pro eo autem quod nos transtulimus absorbens
uolucrem, et in hebraeo scriptum est saraph mopheth; interpretari
potest: serpens uolans, ut sit sensus: de radice colubri nascetur
regulus, et fructus illius, id est reguli, serpens uolans, ut draconem
uolantem intellegas.
et pascentur primogeniti pauperum et pauperes fiducialiter
requiescent. cum te percusserit regulus, et draco uolans tuos terminos
deuastauerit, nequaquam insidiaberis iudae et pauperculum populum meum
tua fraude terrebis; sed pressus propriis angustiis, flebis calamitatem
tuam. humiles autem et pauperes, qui non in diuitiis et in potentia, sed
in meo nomine confidebant, secura pace requiescent, et nullius hostis
impetum formidabunt.
et interire faciam in fame radicem tuam et reliquias tuas
interficiam. totum per figuras loquitur. est autem sensus, quod, populo
dei fiducialiter requiescente, siccetur radix philisthiim et omnes
reliquiae consumentur.
ulula porta, clama ciuitas, prostrata est philisthaea omnis; ab
aquilone enim fumus ueniet, et non est qui effugiat agmen eius. portam
uocat pro his qui in porta sunt et ciuitatem pro habitatoribus
ciuitatis. sermonem quoque dirigit ad urbes palaestinorum quod eiulare
debeant et lugere, ueniente sennacherib, et torrentis modo cuncta
uastante. sub rege enim ezechia uenit assyrius, et inter ceteras
nationes uastauit philisthaeos. ad quos loquitur hieremias: ecce aquae
ascendent ab aquilone et erunt quasi torrens inundans; et operient
terram et plenitudinem eius, urbem et habitatores illius. ab aquilone
enim uenit assyrius et de eius ardore egredientes, niniuem et nationes
ceteras subiugantes. eo tempore quo haec canebantur, fumus ascendebat in
excelsum, id est: rumor in populos uagabatur per ordinem cunctarum
gentium, phoenices quoque et palaestinos esse uastandos.
quid respondebitur nuntiis gentis? quia dominus fundauit sion et
in ipsa sperabunt pauperes populi eius. quia dixerat: nullus est qui
effugiat agmen eius, uidebatur in generali sententia etiam iudas esse
comprehensus. si, inquit, quaesierint angeli gentis assyriae, quare
solus iudas euaserit, respondete eis, quia dominus fundauerit sion et
ipse humilem populum sua uirtute protexerit. pro angelis lxx
transtulerunt reges, unius aleph litterae errore decepti.
15. onus moab; quia nocte uastata est ar, moab conticuit; quia
nocte uastatus est murus, moab conticuit. de onere et pondere semel
dixisse sufficiat. hoc tantum breuiter admoneo, quod onus semper tristia
consequantur. uisionem autem uel statim laeta, uel in fine laeta post
tristia.
moab prouincia est arabum, in qua fuit balac filius beor, qui conduxit
hariolum balaam de mesopotamia, ut malediceret israel, ubi et initiatus
est populus beelphegor. huius metropolis ciuitas ar, quae hodie ex
hebraeo et graeco sermone composita areopolis nuncupatur, non ut
plerique existimant quod areos~g, id est martis, ciuitas sit.
interpretatur autem ar et antidikos~g, id est aduersarius. quantae autem
fuerit potentiae hieremias testatur, dicens: non est ultra exsultatio
in moab. et iterum: habuisti fiduciam in munitionibus tuis et in
thesauris tuis. et iterum: fertilis fuit moab ab adolescentia sua, et
requieuit in faecibus suis, nec transfusus est de uase in uas, et in
transmigrationem non abiit, et idcirco permansit gustus eius in eo, et
odor eius non est immutatus. et in alio loco: quomodo fracta est uirga
fortis, baculus gloriosus? et post modicum: audiuimus superbiam moab,
superbus est ualde. sublimitatem eius et arrogantiam, et superbiam et
altitudinem cordis illius ego scio, ait dominus, et iactantiam eius.
sicut ergo contra babylonem et philisthiim propheta uaticinatus est,
quod oppresserit populum iudaeorum, ita nunc uastitas praedicitur
moabitarum, id est arabiae, ab assyriis et babyloniis. ab utraque enim
gente uastati sunt, eo tempore quo sennacherib captiuum duxit israel, et
quando nabuchodonosor subuertit hierusalem. insultauerat enim ad
utrumque hostem ephraim et iudae, dicente hieremia: allidet manum moab
in uomitu suo et erit in derisum etiam ipse. fuit enim in derisum tibi
israel, quasi inter fures reperisses eum. propter uerba ergo tua, quae
aduersus illum locutus es, captiuus duceris. quod autem ait: nocte
uastata est ar, moab conticuit, decorum inuectionis principium, ut
uastaretur in tenebris, qui de incestu patris nocte conceptus est. nisi
forte noctem pro magnitudine terroris accipimus; et credendum, quia sibi
confidebat in muris, insidiis eam et cuniculis fuisse superatam. audiui
quemdam areopolitem, sed et omnis ciuitas testis est, motu terrae magno
in mea infantia, quando totius orbis litus transgressa sunt maria,
eadem nocte muros urbis istius corruisse.
ascendit domus et dibon ad excelsa in planctum super nabo, et
super medaba moab ululabit. ne molestum tibi sit quod per historiae uiam
gradior; ut enim hoc facerem, ipse uoluisti. subauditur autem, domus
regia urbs dibon ad idola quae in editis posita sunt ascendit; super
nabo, et super medaba, nobiles ciuitates, ululabit uniuersa prouincia.
in nabo enim erat chamos idolum consecratum, quod alio nomine appellatur
beelphegor.
in cunctis capitibus eius caluitium, omnis barba radetur. apud
antiquos barbae capitis que rasura luctus indicium fuit. per haec ergo
magnitudo moeroris ostenditur, hieremia contra moab eadem conclamante:
omne caput caluitium, et omnis barba radetur, et in cunctis manibus
colligatio, et super omne dorsum cilicium.
in triuiis eius accincti sunt sacco; super tecta eius et in
plateis eius omnis ululatus descendet in fletum. non erunt priuatae
lacrimae, publicum luctum publica lamenta resonabunt; nec matronae, nec
uirgines, nec aetas parua puerorum, nec fracti senum gressus tenebuntur
domibus, pudorem et imbecillitatem extrema captiuitas nesciet.
clamabit esebon et eleale. nomina ciuitatum moabiticae
prouinciae, quarum esebon urbs fuit quondam regis amorraeorum, de qua
idem hieremias: ignis egressus est de esebon et flamma de medio seon.
interpretatur autem esebon: cogitatio, et ideo hieremias alludens ad
nomen: contra esebon, ait, cogitauerunt mala.
usque iaza audita est uox eorum.
urbs iaza mortuo mari imminet, ubi est terminus prouinciae moabitarum.
hoc ergo indicat, quod usque ad extremos fines ululatus prouinciae
personabunt. unde et hieremias ait: de clamore esebon, usque eleale et
iaza dederunt uocem suam.
super hoc expediti moab ululabunt, anima eius ululabit sibi.
uerbum hebraicum eluse, pro quo aquila ex�mous~g, id est expeditos et
exertis humeris, symmachus accinctos interpretatus est, quidam putant
non uiros, sed nomen urbis intellegi, quae hodie appellatur eluza, et
est in moabitidis partibus sita. possumus autem et hoc dicere, quod
uniuersa pugnatorum fortitudo corruerit, et mutuis fletibus omnis terra
resonarit. sin autem eluse, ut aquila uoluit, exertis humeris
intellegantur, ille nobis sensus suggeritur, quod ad plangendum cuncti
nudauerint pectora.
cor meum ad moab clamabit. propheta loquitur dolentis affectu,
uel quod hostes quoque creatura dei sint, in quos tot mala superueniant;
uel quod tantis calamitatibus opprimendi, ut etiam inimicis miserabiles
fiant. idipsum hieremias ait: propterea cor meum ad moab quasi tibia
resonabit.
uectes eius usque ad segor uitulam conternantem. et hieremias: a
segor, inquit, usque ad oronaim uitulam conternantem. de hac et in
libris quaestionum hebraicarum diximus, et nunc breuiter annotamus, quod
ipsa sit quinta urbs post sodomam et gomorram, adamam et seboim, quae
ad preces lot parua seruata est. appellatur que bala, id est absorpta,
tradentibus hebraeis, quod tertio terrae motu prostrata sit. ipsa est
quae hodie syro sermone uocatur zoora, hebraeo segor, utroque paruula.
possumus uitulam conternantem pro perfecta aetate accipere. sicut enim
tricesimus annus in hominibus, ita in pecudibus ac iumentis tertius
robustissimus est. uectes quoque pro terminis, et robore intellege, eo
quod segor in finibus moabitarum sita sit, diuidens ab eis terram
philisthiim.
per ascensum enim luith flens ascendet. et hieremias: per
ascensum luith plorans ascendet in fletum. intellegimus autem cliuum
esse itineris quod ducit ad assyrios, et per hoc captiuitatem
significari.
et in uia oronaim clamorem contritionis leuabunt. rursum
hieremias: uox clamoris oronaim, uastitas et contritio magna. longum
est, si uelim de singulis dicere, cum perspicuum sit uel urbium in moab,
uel locorum esse nomina, quae deserunt transmigrantes.
aqua enim nemrim desertae erunt. hoc oppidum super mare mortuum
est, salsis aquis et ob hoc ipsum sterilibus. siue autem allusit ad
nomen, siue quod ante non fuerat, post uastitatem accidit, ut etiam
aquae in amaritudinem uerterentur.
quia aruit herba, defecit germen, uiror omnis interiit. non ut
quidam putant, uere propter steriles nemrim aquas omnis herba exaruit,
sed per metaphoram scriptura loquitur. et est sensus: in cuncto moab
aqua nemrim erunt salsae et amarae; quomodo ibi nulla herba pullulat,
sic totam prouinciam siccitas consequetur, id est a segor usque ad
oronaim, a finibus usque fines.
id ipsum hieremias: aquae nemrim pessimae erunt.
secundum magnitudinem operis, et uisitatio eorum; ad torrentem
salicum ducent eos. pro salicibus in hebraeo legimus arabim, quod potest
et arabes intellegi, et legi orbim, id est uilla in finibus eorum sita,
cuius a plerisque accolae in monte oreb eliae praebuisse alimenta
dicuntur, quod nomen propter ambiguitatem transfertur et in coruos,
atque occidentem loca que campestria. est autem sensus: iuxta morbi
magnitudinem erit uisitatio. uisitationem hic non pro remedio, sed pro
plaga accipe. uisitabo, inquit, in uirga iniquitates eorum et in
uerberibus peccata eorum. torrentem salicum, babyloniae accipe flumina,
de quibus dauid: in salicibus in medio eius suspendimus organa nostra;
siue uallem arabiae, per quam pergitur ad assyrios.
quoniam circuibit clamor terminum moab, usque ad agallim ululatus
eius et usque ad puteum elim clamor eius. eadem prope omnia et
hieremias scribit. sunt autem urbes et loca moabitarum, in quibus clamor
et eiulatio captiui populi describitur.
quia aquae dibon repletae sunt sanguine. ubi prius erat luxuria
propter irriguos agros et fontes iugiter emanantes, ibi prae multitudine
interfectorum riui sanguinis fluent.
ponam enim super dibon additamenta his qui fugerint de moab
leonem, et reliquiis terrae. ne quis scriptoris uitium putet et errorem
emendare dum uult, faciat, una urbs et per m et per b litteram
scribitur: e quibus dimon silentium interpretantur; dibon, fluens.
indito utroque nomine propter latices qui tacite fluant, usque hodie
indifferenter et dimon et dibon hoc oppidulum dicitur. quod autem ait:
ponam super dibon additamenta, et quaestionem facere uidebatur, quid
esset, sequenti uersiculo demonstrauit dicens: his qui fugerint de moab
leonem, et reliquiis terrae; ut etiam qui fuga lapsi sunt, a bestiis
consumantur. quamquam et per metaphoram leonem, regem hostium possumus
intellegere, ut potentiam eius quasi rugitum nemo possit euadere.
16. emitte agnum, dominatorem terrae, de petra deserti ad montem
filiae sion. quod interpretamur, non est historia, sed prophetia. omnis
autem prophetia aenigmatibus inuoluitur et praecisis sententiis, dum de
alio loquitur, transit ad aliud; ne si ordinem scriptura conseruet, non
sit uaticinium, sed narratio. et est sensus: o moab, in quam
desaeuiturus est leo, et de qua ne reliquiae quidem saluari poterunt,
habeto solatium hoc: egredietur de te agnus immaculatus qui tollat
peccata mundi, qui dominetur in orbe terrarum. de petra deserti, hoc
est, de ruth, quae mariti morte uiduata, de booz genuit obed et de obed
iesse, et de iesse dauid, et de dauid christum. montem autem filiae
sion, aut ipsam urbem hierosolymam interpretabimur, aut iuxta sacratam
intellegentiam, ecclesiam, quae sit in uirtutum culmine constituta.
et erit, sicut auis fugiens, et pulli de nido auolantes, sic
erunt filiae moab in transcensu arnon. redit ad ordinem quem ceperat:
cum posuero, inquit, his qui fugerint de moab et reliquiis terrae leonem
saeuissimum, qui eorum artus ossa que confringat, tunc pauidi auolabunt
et omnes filiae, id est uillae et urbes prouinciae moab, in transcensu
arnon migrabunt, qui est terminus amorraeorum et moabitarum. transcensum
autem et hic ponens, captiuitatem significat.
ini consilium, coge concilium; pone quasi noctem umbram tuam in
meridie, absconde fugientes, et uagos ne prodas. habitabunt apud te
profugi mei. moab, esto latibulum eorum a facie uastatoris, finitus est
enim puluis, consummatus est miser, defecit qui conculcabat terram. pro
misero in hebraico legitur sod, quod potest et uastator intellegi.
loquitur autem ad moab, ut consilium salutis inueniat, et senibus
congregatis, cogat salutare concilium. uis, inquit, saluus esse et dei
misericordiam promereri? in clara luce et aperta fuga populi mei, tu
quasi nox et umbra esto, suscipe fugientes uagos que ne prodas. et hoc
quare dixerit, statim infert: habitabunt apud te profugi mei. uastata
enim hierusalem et omni iudaea quae confinis est moabitis, ad te meus
populus transmigrabit. esto igitur latibulum eorum, nec timeas impetum
uastatoris, quia sicut puluis cito transibit, et depopulator uniuersae
terrae, qui conculcabat eam, et suis pedibus subiciebat, aura flante
disperiet. quidam locum hunc male de antichristo interpretantur, ut
putent sanctos eo tempore propter uiciniam urbis hierosolymae ad arabas
transituros et nunc eis praecipi, ne prodant fugientes ad se.
et praeparabitur in misericordia solium, et sedebit super illud
in ueritate, in tabernaculo dauid, iudicans et quaerens iudicium, et
uelociter reddens quod iustum est. hebraei locum istum sic
interpretantur: fugato assyrio, regnabit iudae ezechias uir iustus et
retinebit solium dauid, subiectum sibi populum dei iudicans in ueritate.
alii de christo intellegunt. finito antichristi puluere, et uastatore
sublato, qui conculcabat uniuersam terram, rex christus adueniet, qui
sedebit in tabernaculo dauid, et in die iudicii reddet cunctis pro
operibus suis. nec est ulla dubitatio, quin capitulum hoc de christo
uaticinetur. sed nos et in primo aduentu idipsum intellegere possumus,
atque in ecclesiae tabernaculo demonstrare, quod in omni terra moab
ecclesiarum tropaea surgentia christi testentur imperium.
audiuimus superbiam moab, superbus est ualde; superbia eius et
arrogantia eius et indignatio eius, plusquam fortitudo eius. idcirco
ululabit moab ad moab, uniuersus ululabit; his qui laetantur super muros
cocti lateris, loquimini plagas eius. rursum ad praesentia redit et
superbiae arguit moab, quod multo plus elatus sit quam eius fortitudo
poscebat et propter hanc superbiam ululaturus sit moab ad moab, id est:
populus ad urbem, uel metropolis ad prouinciam, et cuncta ululatibus
terra resonabit super muros cocti lateris, de quibus et hieremias ait:
ideo super moab eiulabo et ad moab uniuersum clamabo, ad uiros muri
fictilis lamentantes. per haec autem et potentiam pristinae felicitatis,
et plagas repentinae subuersionis ostendit.
quoniam suburbana esebon deserta sunt, uinea sabama. inter esebon
et sabama uix quingenti passus sunt, et per metaphoram uineae omnis
prouinciae significat uastitatem.
domini gentium exciderunt flagella eius. seruat translationem
quam coeperat, ostendens reges gentium, qui uastauerant moab, omnes
uiculos castella que depopulatos.
usque ad iazer peruenerunt; errauerunt in deserto; propagines
eius relictae sunt; transierunt mare. flagella et propagines populum
fugitiuos que eius intellege; et transitum maris captiuitatem in
babylonem, de qua postea lecturi sumus: onus deserti maris.
super hoc plorabo in fletu iazer, uinea sabama; inebriabo te
lacrima mea, esebon et eleale. uox plangentis prophetae et magnitudinem
uastitatis lacrimarum magnitudine contestantis, flentis que uineam iazer
et sabama, et esebon et eleale, urbes quondam ualidissimas, assyrio
putante succisas.
quoniam super uindemiam tuam, et super messem tuam uox calcantium
irruit. calcatores uuarum et uindemiae laetitiam congregantes, hostium
exercitus intellege et quod in ipso laetitiae tempore captiuitatis
tempus aduenerit.
et auferetur laetitia, et exsultatio de carmelo. idioma
scripturarum est, quod semper carmelum montem opimum atque nemorosum,
qui ptolemaidi imminet, et in quo orauit elias, fertilitati et
abundantiae comparet, ac per hoc significat omnem laetitiam et
fertilitatem de uberrimis quondam urbibus auferendam.
et in uineis non exsultabit, neque iubilabit.
subauditur prior uindemiator, id est colonus moabitidis prouinciae. denique statim subiecit:
uinum in torculari non calcabit qui calcare consueuerat; uocem
calcantium abstuli. nequaquam in uindemia laetus uindemiator celeuma
cantabit, sed ubique hostilis uastitas, et uictorum orietur clamor.
super hoc uenter meus ad moab quasi cithara sonabit et uiscera
mea ad murum cocti lateris. ne quis putaret planctum prophetae
exsultationis indictum, per quam inimicos populi israel gauderet esse
captiuos, ex affectu et ex intimo cordis dolore, et potentissimam
quondam urbem subrutam lugere se dicit.
et erit, cum apparuerit quod laborauit moab super excelsis suis,
ingredietur ad sancta sua ut obsecret, et non ualebit. ultima miseria
est, nec in his, quos semper uenerata est, habere subsidium. deserta,
inquit, uiribus tuis, et cunctis propugnatoribus interfectis, perges ad
idola, delubra ueneraberis, et nec in illis reperies auxilium, quibus
uastitas te cum communis adueniet.
hoc uerbum quod locutus est dominus ad moab ex tunc. ex quo putas
tempore? uidelicet ex eo, quo creatus est moab. et dominus ait:
moabitae et ammonitae non intrabunt in ecclesiam dei. siue ex tunc pro
antiquo tempore intellegamus, quod olim diuina sententia ista decreta
sint, non quod praescientia dei causam uastitatis attulerit; sed quod
uastitas futura dei maiestati praenota sit.
et nunc locutus est dominus, dicens: in tribus annis quasi anni
mercenarii auferetur gloria moab super omni populo multo, et relinquetur
paruus et modicus nequaquam multus. prophetia ista, ut supra diximus,
mortuo achaz contra moabitas dirigitur, regnante ezechia, sub quo decem
tribus a sennacherib rege assyriorum in captiuitatem ductae sunt. itaque
sicut mercenarius solis exspectat occubitum et diebus ac noctibus finem
operis praestolatur, ut statutam mercedem accipiat, sic et post tres
annos et moab, assyrio ueniente, delebitur, et uix pauci relinquentur in
terra, qui subrutas habitent ciuitates, et desertos agros exerceant.
potest et de babylonica captiuitate praedici, quod post captam
hierusalem, et transitum annorum trium, moab a chaldaeis uastanda sit,
siue quod in trium annorum spatio nulla eis danda sit requies.
17. onus damasci: ecce damascus desinet esse ciuitas; et erit
sicut aceruus lapidum in ruina. derelictae ciuitates aroer gregibus
erunt et requiescent ibi, et non erit qui exterreat. et cessabit
adiutorium ab ephraim et regnum a damasco, et reliquiae syriae sicut
gloria filiorum israel erunt, dicit dominus exercituum. post babylonem
et philisthaeos et moab, ad damascum, id est aram, sermo conuertitur,
quae et ipsa regalis quondam ciuitas fuit, et in omni syria tenuit
principatum; necdum florebant antiochia et laodicia et apamia, quas
urbes, post alexandrum et macedonum imperium, auctas esse cognouimus.
quia igitur semper decem tribubus contra iudam praebebat auxilium, ut
regum et paralipomenon narrat historia, etiam ipsis uastitatem ab
assyriis appropinquare significat, dicente rege assyriorum: cepi arabiam
et damascum et samariam. sicut enim illas cepi et uniuersa regna,
capiam et te. et in regum uolumine legimus: ascendit rex assyriorum
damascum, et cepit eam, et transtulit in cyrenem. rasin quoque
interfecit, qui erat rex damasci, quae omnia, ezechia hierosolymis
regnante, perpessa est. ecce, inquit, damascus desinet esse ciuitas; iam
uicina captiuitas est; iam assyrius suum mouit exercitum. et erit sicut
aceruus lapidum in ruinam, ut tantummodo parietinae ac pristinae
potentiae uestigia in ruinarum magnitudine demonstrentur. derelictae
ciuitates aroer gregibus erunt. aroer myrice interpretatur, quae proprie
arbor in solitudine et salsa humo nascitur, et per hoc uastitas
demonstratur. requiescent ibi. subauditur greges, et non erit qui
exterreat.
tanta enim erit solitudo, ut nec insidiator timendus sit. et cessabit
adiutorium ab ephraim: nequaquam decem tribus in illa contra iudam
habebunt auxilium. et regnum a damasco: apo~g koinou~g subauditur
cessabit. quando autem dicit cessare regnum et quiescere, non perpetuam
significat uastitatem, sed aufert in praesens potentiam, per quam in
omni syria ante regnabat. et reliquiae syriae sicut gloria filiorum
israel erunt, dicit dominus exercituum. quomodo, inquit, decem tribus
assyrio populante deletae sunt, et omnis gloria earum in captiuitatem
ducta est; sic pauci, qui in damasco resederint, immutabuntur et
habebunt gentis gloriam sociae. gloriam per ironiam dictam accipe pro
ignominia. hoc autem totum fiet, quia dominus locutus est, cuius uerba
irrita esse non possunt. quidam hanc prophetiam eamdem putant esse, quam
in hieremia legimus: dissoluta est damascus, uersa est in fugam, tremor
apprehendit eam, angustia et dolores tenuerunt eam quasi parturientem.
et iterum: succendam ignem in muro damasci et deuorabit moenia benadab.
sed sciendum quod ab hieremia babylonia captiuitas damascenae urbis
describitur, id est paucorum quos assyriorum rex reliquerat in ea.
esaias autem uicinam ab assyriis captiuitatem nuntiat. alii aestimant de
romana captiuitate praedici, quoniam et iudaeorum captus est populus,
et damascus (cui imperabat areta) similem sustinuit seruitutem, ut
cuncta quae super eam scripta sunt, ad christi tempus et ad apostolorum
mysteria transferantur.
et erit in die illa, attenuabitur gloria iacob et pingues carnes
eius marcescent. quando, inquit, damascus capta fuerit et ciuitas esse
desierit, et talis eam gloria coronauerit, qualis coronauit israel, id
est decem tribus; tunc omne praesidium, et pinguissimae carnes, et
refugium emarcescet iacob; nequaquam enim habebit, quibus iunctis uastet
hierusalem. legimus supra quod ascenderit rasin rex syriae et phacee
filius romeliae rex israel in hierusalem ad proeliandum contra eam.
nuntiatum que sit domui dauid: requieuit syria super ephraim, de quibus
propheta loquitur ad achaz: noli timere, et cor tuum ne formidet a
duabus caudis titionum fumigantium horum, in ira furoris rasin regis
syriae et filii romeliae, eo quod consilium inierit contra te syria
pessimum ephraim et filius romeliae. et erit sicut congregans in messe
quod restiterit, et brachium eius spicas leget; et erit sicut quaerens
spicas in ualle raphaim. et relinquetur in eo sicut racemus, et sicut
excussio oleae duarum aut trium oliuarum in summitate rami, siue
quattuor aut quinque in cacuminibus eius fructus eius, dicit dominus
deus israel. qui praesentem damasci uastitatem sub romano intellegunt
regno, haec de apostolis significata contendunt, quod quomodo paucae
spicae et oliuae remanere soleant in agro uel in arboribus, sic
reliquiae israel saluentur; maxime quia sequatur: in die illa
inclinabitur homo ad factorem suum et oculi eius ad sanctum israel
respicient, id est ad christum. duas oliuas, et tres, et quattuor, et
quinque, quattuordecim apostolos interpretantur, id est duodecim qui
electi sunt, et tertiumdecimum iacobum, qui appellatur frater domini;
paulum quoque apostolum uas electionis. qui uero assyriorum temporibus
putant completa quae dicta sunt, hoc uolunt intellegi, quos sub assyria
captiuitate damascus non sit omnino deleta, sed translatis quibusdam in
cyrenem, alia pars cultorum terrae dimissa sit, quae et ipsa postea
babylonio uastante deleta est, donec sub macedonibus et ptolemaeis
rursum instauraretur, et in aduentu christi esset quidem ciuitas, sed
non tantae potentiae quantae antea fuerat. et est sensu: tam pauci
remanebunt in damasco, quam solent post messores paucae remanere spicae,
quas in ualle raphaim latissima et potentissima solent pauperes legere;
uel in olea paucae oliuae, quae diligentiam legentis euaserint.
in die illa inclinabitur homo ad factorem suum et oculi eius ad
sanctum israel respicient. et non inclinabitur ad altaria, quae fecerunt
manus eius, et quae operati sunt digiti illius; et non respicient lucos
et delubra. hoc christi temporibus putant esse completum, quando
destructo regno damasci, perpetuum saluatoris successit imperium et
idololatriae error est imminutus. pia quidem uoluntas interpretantium,
sed non seruans historiae ordinem. nos autem dicimus, quod subuersa
damasco, et decem tribubus ductis in assyrios, residui tribuum qui erant
ex israel, ad ezechiae litteras conuersi sint ad cultum dei et ad
templum hierusalem aduenerint, sicut paralipomenon narrat historia.
deleta ergo damasco, conuertentur homines ad factorem suum, id est, ad
eum qui eos creauit, et oculi eorum nequaquam idola quae fecerant in
bethel et in dan, sed deum respicient, contemnentes delubra et altaria,
quae operati sunt digiti eorum.
in die illa erunt ciuitates fortitudinis eius derelictae sicut
aratra, et segetes quae derelictae sunt a facie filiorum israel, et erit
deserta.
hoc non loquitur contra damascum, sed contra decem tribus, quae
uocabantur israel; ut quomodo ad aduentum ex aegypto populi dei, omnes
gentes quae incolebant terram repromissionis, subito pauore conterritae
aratra dimiserunt, aceruos que frugum et media opera, salutem pedibus
requirentes; sic et terra israel multo tempore desolata permaneat. unde
miror pro aratris et aceruis frugum uoluisse aquilam interpretari:
testam et emir; symmachum: siluam et amir; lxx: amorraeos et euaeos.
solus theodotio hebraicum uerbum posuit: ars et emir, quod apud eos
emendatius legitur hores et amir, id est: uomeres et acerui segetum.
quia oblita es dei saluatoris tui et fortis adiutoris tui non es
recordata. ista, inquit, perpetieris, o israel, quia reliquisti deum
saluatorem tuum, qui te liberauit ex aegypto, qui tibi gentes subiecit
inimicas; et adiutoris tui non es recordata. propterea plantabis
plantationem fidelem et germen alienum seminabis. hoc pressius et per
ironiam legendum. quia, inquit, oblita es dei saluatoris tui, et fortis
adiutoris tui non es recordata; num idcirco plantare debebis
plantationem fidelem, et non potius alienum seminare germen, quod hostis
eripiat? uel certe sic: filios meos, qui de populi mei stirpe generati
sunt, ideo fundasti in terra, ut eos alienos et pessimos facias.
in die plantationis tuae labrusca et mane semen tuum florebit.
ablata est messis in die hereditatis et dolebit grauiter. hos, inquit,
operum tuorum fructus capies; uitis tua sorec degenerabit in labruscam,
semen tuum spem promittet in germine; sed cum maturitas aduenerit, ab
alio demetetur. et tunc dolebis grauiter, quando sperata et paene iam
tenta perdideris.
uae multitudini populorum multorum, ut multitudo maris sonantis;
et tumultus turbarum, sicut sonitus aquarum multarum; sonabunt populi,
sicut sonitus aquarum inundantium; et increpabit eum, et fugiet procul;
et rapietur sicut puluis montium a facie uenti, et sicut turbo coram
tempestate. in tempore uesperae et ecce turbatio in matutino, et non
subsistet. haec est pars eorum, qui uastauerunt nos et sors diripientium
nos. qui superiorem damasci captiuitatem a romanis illatam aestimant et
hoc quod scriptum est: inclinabitur homo ad factorem suum et oculi eius
ad sanctum israel respicient, ad christi et apostolorum tempora
referunt. nec non illud quod sequitur: plantabis plantationem fidelem,
et germen alienum seminabis; in die plantationis tuae labrusca, et
cetera, de infidelitate sentiunt iudaeorum. et hoc capitulum quod nunc
proposuimus, super ethnicis interpretantur, qui persequuntur ecclesiam.
illud quoque quod sequitur: increpabit eum et fugiet procul, de diabolo
accipiunt, tropologica interpretatione uastitatem persecutorum et
daemonum demonstrantes. nos autem coeptum sequimur ordinem et historica
fundamenta historico culmine protegimus. uae, inquit, uniuersis
gentibus, quae militauerunt contra populum meum, quarum tantus impetus
fuit, ut maris fluctibus coaequandus sit. sed cum uenerint saeuientes et
inundauerint terram meam, tunc princeps earum sennacherib ab eo fugiet
increpatus, et sicut puluis uento raptante dispergitur, et turbo in
sublime uoluitur in tempestate, sic ille appropinquabit quidem
hierusalem, obsidens eam, sed percutietur ab angelo; ueniet mane et
deletum potentiae suae uidebit exercitum. et: haec erit pars eorum qui
uastauerunt nos. hoc propheta loquitur uel ex persona populi, uel se
ipsum iungens genti suae. postea legimus: egressus est angelus domini et
percussit in castris assyriorum centum octoginta quinque milia; et
surrexerunt mane, et ecce omnes cadauera mortuorum. et egressus est, et
abiit, et reuersus est sennacherib rex assyriorum et habitauit in
niniue.
18. uae terrae cymbalo alarum quae est trans flumina aethiopiae.
uerbum hebraicum selsel, quod symmachus sonitum, theodotion aues
interpretati sunt, et nos in cymbalum uertimus, aquila bis umbram
transtulit. sed sciendum quod umbra sel dicitur, hic autem syllaba ipsa
geminatur.
ex quo possumus dictum intellegere: uae terrae, quae in umbra alarum
suarum pollicetur auxilium. et cum scriptura dicat: qui habitat in
adiutorio altissimi, in protectione dei caeli commorabitur; pro quo in
hebraeo scriptum est: in umbra omnipotentis commorabitur. ipsam dei
similitudinem habere se iactans, et in periculis constituta aliis
suffragari repromittit. significat autem siue no, aegypti ciuitatem,
quae nunc alexandria dicitur, siue aegyptum, in qua semper hierusalem
quasi super quassatam arundinem innixa est, quae confracta manum
perforat incumbentis. et est hic ordo pulcherrimus; ut quomodo in priori
uisione sermo propheticus damasco minabatur, quod decem tribus in illa
habuerint auxilium, misericordiam dei non rogantes; sic etiam nunc
aegypto uastitas praedicetur, ob cuius auxilium dei neglecta sit
inuocatio. ipsa est enim terra, quae est trans flumina aethiopiae, id
est, trans riuos nili fluminis, quem de aethiopia in aegyptum fluere
nemo dubitat. potest aegyptus alarum cymbalum dici propter uelocitatem
frugum; uelox quippe et concitus auium uolatus reddit cymbali sonitum.
quidam ex eo quod sequitur:
qui mittit in mari legatos, et in uasis papyri super aquas,
romanum regnum intellegunt et omnem historiam referunt ad uespasiani et
titi tempora, a quibus hierosolyma subuersa est. sed hoc fidei nostrae
non conuenit, ut minetur dominus regno romano, quare impiam gentem
subuerterit, et rursum in montem sion dicat munera deferenda, nisi forte
et haec spiritaliter in ecclesia accipiamus. qui mittit in mari legatos
et in uasis papyri super aquas. ite, angeli ueloces, ad gentem
conuulsam et dilaceratam, ad populum terribilem, post quem non est
alius, ad gentem exspectantem et conculcatam, cuius diripuerunt flumina
terram eius. apud hebraeos et aegyptus et aegyptius et aegyptii, uno
uocabulo nuncupantur mesraim. hoc dictum sit, ne quis in uerbo haereat,
cum pro genere feminino masculinum inuenerit, id est, pro terra hominem,
quia et nunc dicitur: qui mittit in mari legatos, hoc est: ipsa
mesraim, ipse aegyptius, eo quod de alexandria, quae tunc, ut diximus,
no uocabatur, legati missi sunt hierosolymam et in uasis papyri, id est,
epistolis siue nauibus, suum illis auxilium promittentes, dixerint: ite
uelociter ad iudaeorum gentem conuulsam, et assyriorum impugnatione
laceratam, ad populum quondam terribilem, qui dei utebatur imperio, ad
cuius potentiam nullus alius comparandus est. ad gentem, quae dei semper
exspectabat auxilium, et nihilominus ab hominibus conculcatur, cuius
terram flumina, id est, diuersi reges depopulati sunt. alii autem
putant, quod apostropha dirigatur ad dominum, et sit sensus: o deus, qui
mittis in mare saeculi istius prophetas, et quasi per epistolas
nauigantes, populum commonens, tuis imperas nuntiis. ite uelociter ad
gentem meam laceratam atque conuulsam, ad populum robustissimum, qui
omnibus quondam in circuitu gentibus terrori fuit, qui semper dei
exspectauit auxilium et pro peccatorum magnitudine, quod sperat, non
meretur accipere; cuius diuersarum gentium reges uastauere terram et
cetera quae sequuntur. eusebius caesariensis historicam interpretationem
titulo repromittens, diuersis sensibus euagatur, cuius cum libros
legerem, aliud multo reperi, quam indice promittebat. ubicumque enim eum
historia defecerit, transit ad allegoriam, et ita separata consociat,
ut mirer eum noua sermonis fabrica in unum corpus lapidem ferrum que
coniungere. hoc breuiter admonui, ne quis nos putet ex illius fontibus
mutuasse quae dicimus; nam et in praesenti capitulo aduersum iudaeos et
hierosolymam dicit prophetiam dirigi, quod in principio fidei
christianae ad totas gentes epistolas miserint, ne susciperent passionem
christi; et miserint usque ad aethiopiam et occidentalem plagam, totum
que orbem huius blasphemiae disseminatione compleuerint.
omnes habitatores orbis qui moramini in terra, cum eleuatum
fuerit signum in montibus, uidebitis et clangorem tubae audietis.
cunctae, inquit, gentes, per circuitum, quando meam iussionem, quas
signum in montibus eleuatum, meum que imperium, quasi clangorem tubae
sublimiter resonantis audieritis, tunc uidebitis quid praeceperim.
quia haec dicit dominus ad me: quiescam et considerabo in loco
meo. quid est quod locutus est dominus ad prophetam? hoc quod sequitur:
donec ueniant quae praecepi, in mea sede requiescam; ut iudaei putant,
in templo; ut nos, in caelestibus. et considerabo, inquit, qui rerum
finis adueniat.
sicut meridiana lux clara est, et sicut nubes roris in die
messis. sicut in toto die nihil est clarius meridie, quando sol de medio
caelo rutilat et omnem orbem pariter illustrat, et sicut in aestu et
calore torrente, quando nudus messor excoquitur, et operis magnitudinem
anhelitus probat, gratissima est roris temperies, si arentes stipulas
matutinus humor secabiles faciat; ita meus sermo, quem considerabo in
loco meo, cunctis in me credentibus gratus adueniet.
ante messem enim totus effloruit, et immatura perfectio
germinauit, et praecidentur ramusculi eius falcibus, et quae derelicta
fuerint, abscindentur et excutientur. et relinquentur simul auibus
montium et bestiis terrae, et aestate perpetua erunt super eum uolucres
et omnes bestiae terrae super illum hiemabunt. quia de meridie dixerat,
et nubem roris in aestate ac messe praemiserat et ab agricultura
translationem sumpserat, seruat eam in reliquis, describens aegypti
superbiam, et populi illius uastitatem, et cadauera per uniuersam
prouinciam, quae a uolucribus deuoranda sint.
quomodo enim ante maturitatem segetes erumpentes, cito pereunt, et
antequam perfectio temporis ueniat, germinantes inutiles sunt. sic,
inquit, aegyptii populi quasi rami inutiles falcibus praecidentur et
cunctae propagines nudabuntur. ac ne putares eum de uinea dicere, et non
de hominibus, uertit metaphoram in historiae ueritatem. et
relinquentur, inquit, simul auibus montium et bestiis terrae. aues enim
et bestiae non abscisos arborum ramos, sed cadauera deuorant. legamus
plenius hiezechiel, ubi prophetat contra pharaonem et contra aegyptum;
et haec omnia apertissime scripta reperiemus. quod que dicit: aestate
perpetua erunt super eum uolucres et omnes bestiae super illum
hiemabunt, aut uere interfectorum significat multitudinem, aut per
eamdem translationem demonstrat, quod a cunctis gentibus uastandus sit.
in tempore illo deferetur munus domino exercituum a populo
diuulso et dilacerato, a populo terribili, post quem non fuit alius; a
gente exspectante, exspectante et conculcata, cuius diripuerunt flumina
terram eius, ad locum nominis domini exercituum montem sion. post
aegypti uastitatem et deletum eius imperium, nequaquam israel in umbrae
illius uanitate confidet, sed reuertetur ad dominum, et sua munera
deferet ad montem sion, id est, in templum eius, et illum solum rogans,
cuius uerum aeternum que praesidium est. hoc autem sub zorobabel et
iesu, et ezra ac neemia factum intellegimus. lxx, pro eo quod nos
diximus: exspectantem, exspectantem, et in hebraico scriptum est,
sperantem, sperantem, e contrario interpretati sunt anelpiston~g, id est
non sperantem. et ob hanc causam dederunt occasionem eusebio, ut hoc de
gentibus magis, quae nec spem habeant nec testamentum dei nec prophetas
intellegendum putauerit, quam de iudaeis; quod ab ipsis postea
ecclesiae, quae in specula constituta est, dona mittenda sint, et
offerendae uictimae spiritales.
19. onus aegypti. ecce dominus ascendet supra nubem leuem, et
ingredietur aegyptum, et mouebuntur simulacra aegypti a facie eius, et
cor aegypti tabescet in medio eius. moris est scripturarum obscuris
manifesta subnectere et quod prius sub aenigmatibus dixerint, aperta
uoce proferre. unde et in praesenti loco, quia contra aegyptum fuerat
comminatus: uae terrae obumbranti alis, quae est trans flumina
aethiopiae, et cetera quae propheticus sermo contexuit. nunc
manifestiorem fecit intellegentiam, et ad ipsam comminans aegyptum
loquitur, quod nequaquam per angelos, sed ipse dominus ueniat super
nubem leuem, id est uelocem, et ingrediatur aegyptum, et idola aegypti
contremiscant, tabescat que cor fortium, et hieremiae uaticinium
compleatur: disperdam simulacra, et cessare faciam idola de memphis.
quidam totam hanc prophetiam ad saluatoris tempora referunt, quando
ingressus est super nubem leuem, id est corpus humanum quod ex uirgine
assumpserat, nullo humanae commixtionis semine praegrauatum; siue quod a
nube leui portatus sit, id est corpore uirginali, et ad ingressum eius
omnes daemones contremuerint, tunc que prima idolorum ruina fuerit,
praesentiam domini ferre non sustinens.
et concurrere faciam aegyptios aduersus aegyptios; et pugnabit
uir contra fratrem suum; et uir contra amicum suum; ciuitas aduersus
ciuitatem et regnum aduersus regnum. ingresso aegyptum domino, et
potentissimam gentem sui praesentia destruente, erit prima uictoria
dissidere aegyptios contra aegyptios, et aduersum se rebelli odio
dimicare. quo temporibus assyriorum et nabuchodonosor regis babylonii
factum esse, manifestum est, aliis sedentibus et aliis repugnantibus.
quod autem haec de babylonica captiuitate praedicat, hieremias testis
est, dicens: uitula elegans atque formosa aegyptus, stimulator ab
aquilone ueniet ei. et rursum: confusa est filia aegypti et tradita in
manu populi aquilonis. hiezechiel quoque pari prophetiae auctoritate
consentiens: et cessare, inquit, faciam multitudinem aegypti in manu
nabuchodonosor regis babylonis. et iterum: confortabo brachia regis
babylonis, dabo que gladium meum in manu eius, et confringam brachia
pharaonis. et scient quia ego dominus, cum dedero gladium meum in manu
regis babylonis; et extenderit eum super terram aegypti, et dispergam
aegyptum in nationes. si autem ad tempora referimus saluatoris, illud de
euangelio sumamus exemplum: nolite putare quod ueni pacem mittere super
terram; non ueni pacem mittere, sed gladium. ueni enim diuidere uirum
aduersus proximum suum, et filiam contra matrem suam, et nurum contra
socrum suam, et inimici hominis domestici eius. et rursum in alio loco:
erunt diuisi duo in tres, et tres in duo: pater contra filium, et mater
contra filiam, et nurus contra socrum.
et disrumpetur spiritus aegypti in uisceribus eius et consilium
eius praecipitabo; et interrogabunt simulacra sua et diuinos suos, et
pythones et hariolos.
cum seditio fuerit orta in aegypto, siue babylonio seruire cupientibus
siue nolentibus iugo eius colla submittere, siue aliis christo
credentibus aliis repugnantibus, disrumpetur et scindetur spiritus
aegypti, non eadem cunctis uolentibus, et omne consilium eorum redigetur
ad nihilum. tunc ibunt ad simulacra sua; et diuinos et hariolos ac
uates magicis que edoctos artibus interrogabunt, cur ista acciderint.
et tradam aegyptum in manu dominorum crudelium et rex fortis
dominabitur eorum, ait dominus deus exercituum. duplicem intellegentiam
sequimur: uel chaldaicorum temporum, quando a nabuchodonosor aegyptus
expugnata est; uel romani imperii, quando antonio cleopatra que
superatis, augustus caesar aegyptum subiugauit. babylonios fuisse
crudeles omnis scriptura testatur, qui paruulis non pepercerint et suis
eos iaculis uulnerarint, nec praegnantibus sint miserti. romanum autem
regnum fortissimum et danielis scriptura testatur, exponens quartam
bestiam habentem dentes et ungues ferreos.
et arescet aqua de mari, et fluuius desolabitur atque siccabitur,
et deficient flumina, attenuabuntur et siccabuntur riui aggerum.
calamus et iuncus marcescent, nudabitur alueus riui a fonte suo et omnis
sementis irrigua siccabitur, arescet et non erit. naturale est, ut cum
per iram dei captiuitas uenerit, indignationem eius pestilentia
subsequatur, et aduersum eos qui offenderint deum, cuncta simul elementa
desaeuiant. unde scriptum est in alio propheta, et uolucres in aere
deficere et pisces in aquis, ut omnia humano usui subtrahantur. hoc
dicimus, si simpliciter siccitatem nili fluminis et riuorum eius
uoluerimus accipere. sin autem per metaphoram: in fluuio regnum et in
riuis duces eius intellegimus; et in uirore et iunco et papyro cunctam
aegypti abundantiam, ut per eas res opes aegypti describantur, quarum
aegyptus fertilissima est. legamus hiezechiel, ubi rex pharao draco
magnus habitare describitur in fluminibus, et dicit: meus est fluuius,
et ego feci memetipsum. et audit: ponam frenum in maxillis tuis, et
agglutinabo pisces fluminum tuorum in squamis tuis, et extraham te de
medio fluminum tuorum, et uniuersi pisces tui squamis tuis adhaerebunt,
et proiciam te in deserto. in aduentu autem christi haec omnia
tropik�s~g intellegenda sunt, iuxta illud quod supra legimus: desertum
faciet dominus mare aegypti. et rursum: immittet dominus manum suam
super fluuium aegypti uiolentum et percutiet eum in septem uallibus, ita
ut pertranseat eum quis calceato pede; quod scilicet omnis error
aegyptiarum aquarum et artes maleficae, quibus subiectis populis
illudebant, christi siccentur aduentu. quod que dicit: arescet aqua de
mari, et historice possumus accipere, non mare magnum significari, sed
lacum mareotiden, eo quod scriptura omnes congregationes aquarum
appellet maria. possunt et hyperbolice dicta intellegi. quod que
sequitur: nudabitur alueus riui a fonte suo, describit quod riuus et
fons arescant simul.
et maerebunt piscatores, et lugebunt omnes mittentes in flumen
hamum, et expandentes rete super faciem aquae marcescent. et
confundentur qui operantur linum, plectentes et texentes subtilia; et
erunt irrigua eius flaccentia, omnes qui faciebant lacunas ad capiendos
pisces. et hoc dupliciter accipe, quod uastata aegypto, et cuncta
prouincia ariditate siccata, maereant piscatores, et lugeant qui in
flumen mittebant hamum, et qui operabantur retia ac sagenas, et texebant
iunco diuersi generis uascula; id est: principes et regii generis atque
rectores; et quod in aduentu christi omnes peruersi generis piscatores,
qui contra apostolicam disciplinam capiebant homines in perditionem, et
stulta sapientia texebant retia et sagenas, quibus perditos irretirent,
confusi sunt, et nullus aut rarus in aegypti terra sit talis piscator.
hoc opere uidemus expletum, quod ecclesiarum tropaea consurgunt, et in
omni aegypto idola corruerunt.
stulti principes taneos, sapientes consiliarii pharaonis dederunt
consilium insipiens. quomodo dicetis pharaoni: filius sapientium ego,
filius regum antiquorum? ubi sunt nunc sapientes tui? annuntient tibi et
indicent, quid cogitauerit dominus exercituum super aegyptum. stulti
facti sunt principes taneos, emarcuerunt principes mempheos; deceperunt
aegyptum angulum populorum eius. tanim metropolim fuisse aegypti et
psalmista declarat, quod ibi moyses multa signa fecerit, quae in exodo
describuntur: posuit in aegypto signa sua, et prodigia sua in campo
taneos. memphim quoque magicis artibus deditam, pristini usque ad
praesens tempus uestigia erroris ostendunt. et hoc breuiter indicatur,
quod babylonia uastitate ueniente, omnia magorum consilia, et eorum qui
futurorum scientiam promittebant stultitiae coarguantur, et in aduentu
christi cuncta redigantur in nihili, non inuenientibus consilium aegypti
uatibus, quomodo dogma opprimant christianum.
idioma autem scripturarum est, ut angulum pro regno ponant, eo quod
populos contineat, et quasi in tota domo fortissimum sit. unde et
christus duorum populorum parietes continens, lapis dicitur angularis.
quod que intulit: quomodo dicetis pharaoni: filius sapientium ego,
filius regum antiquorum, significat quod aegyptii heroas et deos
auctores suae gentis simulent, oron et isin, et osirin et tiphonem.
dominus miscuit in medio eius spiritum uertiginis; et errare
fecerunt aegyptum in omni opere suo, sicut errat ebrius et uomens; et
non erit aegypto opus quod faciat, caput et caudam incuruantem, et
refrenantem. primum de interpretatione dicamus, et postea de his quae
scripta sunt, disseremus. pro spiritu uertiginis interpretari potest et
spiritus erroris. in eo quoque quod nos transtulimus incuruantem et
refrenantem, possumus dicere: incuruum et lasciuientem, ut intellegamus
senem et puerum. nos autem uerbum hebraicum agmon, dum celeriter quae
scripta sunt uertimus ambiguitate decepti, refrenantem diximus, quod
significantius aquila transtulit streblounta~g, id est: qui nihil recte
agit, sed omne peruersum, ut puerum significaret. est igitur sensus:
stulti facti sunt principes taneos, et sapientes consiliarii pharaoni
dederunt consilium insipiens et emarcuerunt principes mempheos, et
deceperunt aegyptum angulum populorum, quia dominus miscuit eis spiritum
erroris atque uertiginis, ut ignorent quid loquantur, et errare faciant
aegyptum. et sicut ebrius et uomens egerit quod ingesserat, et ubi sit,
nescit, sed iacet mentis alienae, sic nullum habebit aegyptus opus siue
consilium, quod aut caput habeat aut finem, aut senibus conueniat aut
pueris, quorum alii per nimiam aetatem desipiunt atque delirant, alii
per lasciuiam et infantiam ignorant quid agant. hoc autem siue in
babylonia uastitate siue in aduentu christi, et iuxta litteram et iuxta
spiritalem intellegentiam recipere uolueris, habebit consequentiam
in die illa erit aegyptus quasi mulieres, et stupebunt et
timebunt a facie commotionis manus domini exercituum, quam ipse mouebit
super eam. et erit terra iuda aegypto in festiuitatem; omnis qui illius
fuerit recordatus, pauebit a facie consilii domini exercituum, quod ipse
cogitauit super eam. melius reor etiam proprium errorem reprehendere,
quam dum erubesco imperitiam confiteri, in errore persistere. in eo quod
transtuli: et erit terra iuda aegypto in festiuitatem, pro festiuitate
in hebraico legitur agga, quod interpretari potest et festiuitas, - unde
et aggaeus in festiuum uertitur, - et timor, quod significantius aquila
transtulit gur�sin~g, cum aliquis pauidus et tremens circumfert oculos,
et aduenientem formidat inimicum. ergo si uoluerimus in bonam partem
accipere, quod recordatio iudae aegypto sit gaudii, recte festiuitas
dicitur. sin autem, ut arbitror, in timorem pro festiuitate uertitur,
intellegamus formidinem uel pauorem, quod cum nabuchodonosor uenerit, et
omnes uirorum fortium manus quasi mulierum fuerint dissolutae, etiam
uocabulum iudae terrori sit aegypto, quia dum ei uult auxilium praebere,
tanta mala perpessa sit. de nostris temporibus nemo dubitat, quod
comparatione christianorum omnes ethnici quasi mulieres sint, infirmas
habentes sententias, et quidquid dixerint uerti in stultitiam, dum
stupeant tantam gentis conuersionem, et mirentur atque intellegant manum
domini, et quicumque gentilium nominis christiani fuerit recordatus,
imbecillitatem idololatriae timore fateatur.
in die illa erunt quinque ciuitates in terra aegypti loquentes
lingua chanaan, et iurantes per dominum exercituum: ciuitas solis
uocabitur una. pro ciuitate solis, nescio quid uolentes lxx interpretati
sunt asedec, quam quidam nostrorum urbem iustitiae interpretatur, et
ductus errore, quod iuxta hebraicum ares scriptum sit, terram putat,
quae aliis litteris scribitur. melius ergo transtulit symmachus: ciuitas
solis uocabitur una. ares enim uerbum ambiguum et testa dicitur et sol,
eo quod utrumque areat, et siccum sit. hunc locum non intellegens
onias, templum exstruxit in aegypto in oppido h�liopole�s~g. lege
iosephi historias. alii ares, id est ostrakon~g, hoc est testam, urbem
ostracinem intellegi uolunt, et ceteras iuxta rhinocoruram et casium
ciuitates, quas usque hodie in aegypto lingua chananitide, hoc est, syra
loqui manifestum est; et putant e uicino syros atque arabas a
nabuchodonosor in illam terram fuisse translatos. porro qui in aduentu
christi et romano imperio prophetiam disserunt, quinque ciuitates uel
legem domini, quae in alexandria primum interpretata est, quinque
ecclesiae ordines, episcopos, presbyteros, diaconos, fideles,
catechumenos sentiunt; aut certe spiritalem legis intellegentiam, de qua
et apostolus ait: uolo quinque uerbis loqui in ecclesiis in sensu meo,
quam decem milibus uerborum in lingua. et quod una quinque ciuitatum
appelletur ciuitas solis, uidelicet iustitiae, in cuius pennis est
sanitas.
in illa die erit altare domini in medio terrae aegypti, et
titulus iuxta terminum eius domino. et erit in signum et in testimonium
domino exercituum in terra aegypti. clamabunt enim ad dominum a facie
tribulantis; et mittet eis saluatorem et propugnatorem qui liberet eos.
et cognoscetur dominus ab aegypto, et cognoscent aegyptii dominum in die
illa, et colent eum in hostiis, et muneribus, et uota uouebunt domino,
et soluent. ab hoc loco usque ad finem aegyptiae uisionis, siue
ponderis, et iudaei et nostri de christi aduentu intellegi uolunt; sed
illi uota sua differunt in futurum, nos quasi iam transacta retinemus.
diem autem pro tempore accipe, quamquam sub onia iosephus haec facta
contendat, qui profugus in aegyptum, cum turba plurima iudaeorum
aedificauit templum et altare, et prophetiam christi cassa implere
temeritate conatus est, ita autem unum altare dicitur, quomodo una fides
et unum baptisma et una ecclesia. et titulus iuxta terminum eius
domino, haud dubium quin euangelium et apostolorum scripta significet.
quomodo enim supra iuxta tropologicam intellegentiam terra iuda aegypto
formidabilis siue sollemnis, uetus intellegitur testamentum; sic et
titulus in terminis aegypti, euangeliorum historia demonstratur. denique
iungit: et erit in signum et in testimonium, dominicae uidelicet
passionis. tunc his qui crediderint, concurrentibus aegyptiis contra
aegyptios, et pugnante uiro contra fratrem suum, et ciuitate contra
ciuitatem dimicante. cum persecutionis tempus ingruerit, implorabunt
domini misericordiam, statim que saluator adueniet, id est iesus, hoc
enim in lingua nostra sonat. et cognoscetur dominus ab aegyptiis, et
cognoscent eum, siue persecutores qui fuerint superati, siue credentes
praesenti auxilio liberati. et colent eum in hostiis et muneribus, uota
que uouebunt domino et soluent. respondeant iudaei: lege praeceptum est,
ut altare non fiat nisi in loco uno quem elegerit dominus deus, et
hostiae tantum a sacerdotibus leuitici generis immolentur. ecce esaias
aperte docet quod aegyptii cognoscant dominum, et colant eum, et hostias
et munera offerant, et uota uoueant atque persoluant. si aegyptii
sacerdotium habent, impletur et in illis pauli testimonium dicentis:
translato sacerdotio, necesse est ut legis translatio fiat.
et percutiet dominus aegyptum plaga, et sanabit eam; et
conuertentur ad dominum, et placabitur eis, et sanabit eos.
quem enim diligit dominus, corripit; castigat autem omnem filium quem
recipit. persecutio non ad negationem credentium, sed ad probationem
pertinet et coronam.
in illa die erit uia de aegypto in assyrios, et intrabit assyrius
in aegyptum, et aegyptius in assyrios; et seruient aegyptii assur. ante
aduentum christi unaquaeque gens suum habebat regem, et de alia ad
aliam nullus ire poterat nationem; in romano autem imperio unum facta
sunt omnia. doctus lector ueteres reuoluat historias, et ab euphrate
usque ad tigrim, omnem in medio regionem assyriorum fuisse cognoscat.
ergo quos ueteres assyrios, nunc nos uocamus syros, a parte totum
appellantes. quod autem dicitur: aegyptii seruient syris, uel sic
accipiendum, quod romanae legiones syro instructae milite aegyptum
custodiant, aut quod utriusque gentis inter se commercia sint, et
abundantiam aegypti syriae suscipiant ciuitates, sicut e contrario
palestinae et phoenicis bonis aegyptus irrigetur. quidam nostrorum male
haec ad mille annos referunt, et more iudaico in consummatione mundi
futura pronuntiant, quando antichristus de assyriis ueniens, aegyptum
aethiopiam que possederit. in die illa erit israel tertius aegyptio et
assyrio, benedictio in medio terrae, cui benedixit dominus exercituum,
dicens: benedictus populus meus aegypti et opus manuum mearum assyrio;
hereditas autem mea israel. nequaquam israel inter aegyptum et assyrium
medius elidetur, nunc antiochis et demetriis ad se iudae trahentibus
regnum, nunc ptolemaeis possessionem eius sibi uindicantibus; sed et
ipsa sub romano imperio, ac per hoc christi imperio constituta, erit
eius conditionis, cuius et aegyptus et assyrii, et benedicetur in omni
terra, quia ex sion exibit lex, et uerbum domini de hierusalem. tunc
dicetur a domino: benedictus populus meus aegypti. quando nequaquam
moyse, sed christo domino praeeunte, infinita hominum milia solitudines
repleuerint, et pharaone submerso, dixerint in deserto: cantemus domino,
gloriose enim magnificatus est; equum, et ascensorem deiecit in mare.
tunc et opus manuum domini erit in assyriis; hae enim uel maxime gentes
monachorum florent examinibus; aegyptus et mesopotamia et pari inter se
pietate contendunt. hereditas autem christi israel est, hoc est:
natiuitatis et crucis et resurrectionis ascensionis que eius loca, ad
quae de toto orbe concurritur. Hieronymus - Commentarii in Isaiam
20. anno quo ingressus est thartam in azotum, cum misisset eum
sargon rex assyriorum, et pugnasset contra azotum, et cepisset eam. in
tempore illo locutus est dominus in manu esaiae filii amos, dicens: uade
et solue saccum tuum de lumbis tuis, et calceamenta tua tolle de
pedibus tuis; et fecit sic, uadens nudus et discalceatus. dixit que
dominus: sicut ambulauit seruus meus esaias nudus et discalceatus, trium
annorum signum et portentum erit super aegyptum et super aethiopiam.
sic minabit rex assyriorum captiuitatem aegypti et transmigrationem
aethiopiae, iuuenum et senum nudam et discalceatam, discoopertis
natibus, ignominiam aegypti. et timebunt, et confundentur ab aethiopia
spe sua, et ab aegypto gloria sua. et dicet habitator insulae huius in
die illa: ecce haec erat spes nostra, ad quos confugimus in auxilium, ut
liberaret nos a facie regis assyriorum, et quomodo effugere poterimus
nos? totam posuimus capituli huius continentiam, ut per partes singula
disseramus. azotus quae hebraice dicitur esdod, urbs fuit potentissima
palaestinae de quinque urbibus; hanc sargon rex assyriorum, qui septem
nominibus appellatur, misso duce exercitus sui, cui nomen erat thartan,
cepit et tenuit. eo igitur tempore quo uicina ciuitas capta est,
praecipitur esaiae, ut deposita saccea tunica (hic enim erat habitus
prophetalis populi delicta plangentis) et calceamentis e pedibus, quae
lxx caligas uocant, nudus et discalceatus incederet, typum praebens
captiuitatis aegyptiae et aethiopum, qui aegyptiis in adiutorium
fuerant. quod quomodo esaias nudus ambularet, et foeditatem cernentibus
nudis natibus demonstraret; ita omnis aegyptus atque aethiopia,
populante assyrio, nudae fierent et nihil omnino in terra remaneret. nec
hoc aliquis putet superiori felicitati, quae aegyptiis repromittitur,
esse contrarium, quia ibi post mala de futura beatitudine praedicatur.
hic autem praesens narratur captiuitas, per quam deleto israel et
damasco et philistiim, recta uia perrexit aegyptum, et ipsos pariter
aethiopes que superauit. quod ne cui uideatur ambiguum, ipsius esaiae
ponamus testimonium: reuersus autem rapsaces, inuenit regem assyriorum
proeliantem aduersus lobnam; audierat enim quia profectus esset de
lachis et audiuit de tharaca rege aethiopiae dicentes: egressus est ut
pugnet contra te. simul que discimus oboedientiam prophetarum, quod uir
nobilis, - tradunt enim hebraei esaiam socerum fuisse manasse filii
ezechiae regis iuda -, non erubuerit nudus incedere; sed dei praeceptis
nihil honestius iudicans, deposuerit saccum, quo abiecto nudus fuerit,
unam prius habens tunicam, et ipsam cilicinam. quod autem dicitur: trium
annorum signum et portentum erit super aegyptum et super aethiopiam,
hoc significat, quod tribus annis ab assyriis aegyptus uastanda sit et
aethiopia. tunc, inquit, dicet habitator insulae huius (hoc est,
hierusalem quae uicinarum gentium fluctibus tunditur): haeccine erat
spes nostra? et ad hos confugimus, ut nobis praeberent auxilium, qui se
de captiuitatis malo eruere non quiuerunt? est igitur hic ordo
prouidentiae dei, omne hominum genus ineffabili iudicio dispensantis.
contra dei iram israel sperauit in damasco; diruatur ciuitas quae
aduersum illius uoluntatem impiis praestat auxilium. iudas sperauit in
aegyptiis et aegyptus destruatur. aegyptii confisi sunt in aethiopibus;
aethiopes quoque uincantur ab assyriis. assyrii superbierunt, non dei,
sed suarum uirium arbitrantes esse uictoriam; et ipsi uincantur a
babyloniis. babylon eleuauit contra deum caput et ipsa a medis persis
que superetur. persae et medi ex parte persecuti sunt populum dei, et
aries saeuissimus ad orientem et occidentem omnes populos uentilauit;
ueniat hircus alexander, et conterat eum pedibus suis. et iste qui ultra
modum erectus est, ueneno pereat, regnum que eius diuidatur in partes;
et cum multo tempore inter se collisum fuerit, romano uincente,
populetur. romanus ipse ferratis dentibus unguibus que sanctorum carnes,
et cruento ore lacerauit; excidatur lapis de monte sine manibus, et
potentissimum primum regnum ac ferreum, deinde fragile et infirmum, in
testarum modum conterat.
21. onus deserti maris. nisi in consequentibus huius capituli
legerem: babylon dilecta facta est mihi in miraculum, et iterum:
cecidit, cecidit babylon et omnia sculptilia deorum eius contrita sunt
in terra, et supra: ascende elam et obside mede, dubitarem quod esset
hoc pondus, quod deserto mari imponitur. perspicuum ergo est, quod
desertum mare babylon appellatur, hieremia dicente ex persona dei: et
desertum faciam mare eius et siccabo terram illius, et erit babylon in
tumulos arenarum. mare autem propter multitudinem habitantium dicitur.
unde et supra aegypti multitudo mari comparata est. desertum faciet
dominus mare aegypti.
quod autem medi et persae pugnauerint contra babylonem et subuerterint
eam, in supradicto hieremia legimus: acuite sagittas, implete pharetras.
suscitabit dominus spiritum regum medorum et contra babylonem mens
eius, ut perdat eam, quoniam ultio domini est, ultio templi sui. super
muros babylonis leuate signum augete custodiam, eleuate custodes,
praeparate insidias, quia cogitauit dominus, et fecit quaecumque locutus
est contra babylonis habitatores. et rursum: leuate signum in terra,
clangite buccina in gentibus, sanctificate super eam gentes, annuntiate
contra illam regibus ararat, menni et ascenez, numerate contra eam
tapsar, adducite equum quasi bruchum aculeatum. sanctificate contra eam
gentes, reges mediae, duces eius et uniuersos magistratus eius, cunctam
que terram potestatis eius. et commouebitur terra et turbabitur, quia
uigilauit contra babylonem cogitatio domini, ut ponat terram babylonis
desertam et inhabitabilem.
sicut turbines ab africo ueniunt, de deserto uenit de terra
horribili. uisio dura nuntiata est mihi. uox babylonii populi timentis
inducitur, siue ipsius babylonis, quod audiat medos et elamitas contra
se exercituum praeparare, et uenire de solitudine, ponit que
comparationis exemplum. sicut, inquit, ab africo uento uehemens
tempestas uenire consueuit, ita mihi de solitudine uastitas uenit, de
terra horribili, cuius ne nomen quidem audire possum absque formidine.
uisio dura nuntiata est mihi; quid enim durius quam praesens captiuitas?
qui incredulus est, infideliter agit; et qui depopulator est uastat.
potest in hebraeo ita legi: qui caedis, caede; et qui uastas, uasta. ut
ad ipsum elamitem et medum prophetiae uaticinium dirigatur, hortantis
eum implere quod coepit, intrepidum ascendere, obsidere potentissimam
ciuitatem. sin autem sic legitur, ut transtulimus, quasi de persona
tertia dicatur: qui incredulus est, infideliter agit; et qui depopulator
est, uastat. cum superioribus copulandum est, in quibus sibi babylon
uisionem duram praedicat nuntiatam. ascende elam, obside mede; omnem
gemitum eius cessare feci. ne timeas, inquit, o persa et mede, babylonis
multitudinem, ne illius praeteritam potentiam reformides; omnem gemitum
eius ac pondus, quo te ante premere consueuerat, cessare feci. seu quod
nullus iam gemat et doleat pressus potentia babylonis, seu quod tantis
malis oppressa sit ipsa babylon, ut ne gemitum quidem liberum habeat.
propterea repleti sunt lumbi mei dolore; angustia possedit me,
sicut angustia parientis. corrui cum audirem, conturbatus sum cum
uiderem. emarcuit cor meum, tenebrae obstupefecerunt me. babylon,
dilecta mea, posita est mihi in miraculum. prophetae ideo obscuri sunt,
quia personae in his plurimae commutantur. ergo et nunc uox esaiae
inducitur plangentis babylonem spiritu prophetali, quod tanta mala super
eam uentura sint, ut ipse qui narrat, timore superatus nequeat in uerba
prorumpere, uidens tantae multitudinis sanguinem fundi; et
misericordiae motus affectu, homo enim de hominibus loquitur, non minus
doleat, quam mulier ululare in partu solet. sed conturbatus et trepidus
et in terram corruens, caligantibus oculis nesciat quid loquatur. pro eo
autem quod nos uertimus; babylon, dilecta mea, in hebraeo legitur
neseph esci; et est ipsum uerbum quod in principio babylonii oneris
posuimus: super montem caliginosum; pro caliginoso enim seu tenebroso
scriptum est neseph. proprie que haec urbs sic uocatur, propter
altitudinem et erectum usque ad caelum superbiae uerticem.
pone mensam, contemplare in specula comedentes et bibentes;
surgite, principes, arripite clipeum. locus iste dupliciter accipitur: o
medi et elamitae, quibus supra dixi: ascende elam, obside mede, sumite
cibum, futuro uos proelio praeparate, ne postquam dimicationis tempus
aduenerit, lassitudo uos retrahat.
cum que comederitis et biberitis, surgite, arma corripite, babylonium
debellate. quod que ait: contemplare in specula, hoc sensu legitur:
diligenter quae uentura sunt, prospice. potest et sic intelligi: o
babylon, para balthazar filio euilmarodach nepoti nabuchodonosor regi
tuo mensam atque conuiuium, et uide quid post cibum eueniat, in quo
scortis et concubinis in uasis domini propinabit. o principes, qui cum
rege accumbitis (medos autem persas que significat), surgite et ad
interficiendum regem arma corripite. hoc plenius in danielis uolumine
discimus.
haec enim mihi dixit dominus: uade et pone speculatorem, et
quodcumque uiderit, annuntiet. et uidit currum duorum equitum,
ascensorem asini et ascensorem cameli. et contemplatus est diligenter
multo intuitu, clamauit que leo; super speculam domini ego sum stans
iugiter per diem, et super custodiam meam ego sum stans totis noctibus.
ecce iste uenit ascensor uir bigae equitum, et respondit et dixit:
cecidit, cecidit babylon, et omnia sculptilia deorum eius contrita sunt
in terra. tritura mea, et fili areae meae, quae audiui a domino
exercituum deo israel, annuntiaui uobis. causas reddit superioris
formidinis, quare angustia possederit eum sicut parturientem et
corruerit audiens, et perterritus sit, ac tenebroso horrore circumdatus.
haec, inquit, dixit dominus mihi: uade et constitue speculatorem, ut
spiritu prophetali tibi futura praenuntiet; quem cum posuissem in
speculam, uidit uenientem bigam, et aurigam desuper, asinum que et
camelum currum trahere. significat autem cyrum persarum regem atque
medorum, cum paruo et magno imperio uenientem. persae enim ante cyrum
ignobiles erant, et nullius inter gentes loci habebantur; medi semper
potentissimi. iste ergo unus ascensor, duarum gentium fultus exercitu,
uenit contra babylonem; et speculator ille qui positus erat, ut uentura
prospiceret, clamauit quasi leo, siue ipse propheta appellatur leo, et
quia dubium erat de persona speculatoris, qui cyrum uiderat ascendentem,
ipse exponit manifestius, et ait: super speculam domini ego sum stans
iugiter per diem. speculatorem domini se esse pronuntians, qui semper
positus in officio prophetali, et diebus ac noctibus domini parens
imperio, quodcumque iusserit loquitur. quid igitur clamauit leo: ecce
iste uenit ascensor uir bigae equitum. haud dubium quin cyrus indicetur.
et respondit et dixit ipse leo qui supra clamauerat: cecidit, cecidit
babylon, et omnia sculptilia deorum eius contrita sunt in terra.
uastante enim ascensore bigae, babylon usque in aeternum deleta est, et
belis templum omnia que idola usque ad solum strata. quod autem
sequitur: tritura mea, et fili areae meae, ad hierusalem apostropham
facit, et ad templum quod in area ornae situm est, dicit que ad eam: o
hierusalem, et popule fili templi mei, non tibi uideatur incredulum esse
quod dixi; non mea enim uerba sunt, sed domini et per os meum illius
uerba resonarunt. quidam putant, sed male, hoc non ad hierusalem, sed ad
babylonem dici, de qua et supra: babylon dilecta mea posita est mihi in
miraculum. et esse sensum: quae contriuisti me, eris et ipsa contrita,
non meo sermone, sed domini potestate, quae tibi haec uentura
praenuntiat. quid sibi autem uoluerint in hoc loco lxx interpretes, ut
pro leone, qui hebraice dicitur aria, uriam transtulerint, non satis
intellego, praesertim cum supradictus sacerdos urias, qui uocatur in
testimonium, aliis litteris scriptus sit.
onus duma. ad me clamat ex seir: custos, quid de nocte? custos,
quid de nocte? et dixit custos: uenit mane et nox; si quaeritis,
quaerite, conuertimini, uenite. pro duma, lxx idumaeam ponunt. est autem
duma non tota idumaea prouincia, sed quaedam eius regio quae ad austrum
uergit, et ab urbe palaestinae, quae hodie dicitur eleutheropolis,
uiginti distat milibus; iuxta quam sunt montes seir, sumpto ab auctore
nomine. seir quippe interpretatur hispidus et pilosus, quod esau fuit.
in abdia propheta plenius super hac gente a nobis disputatum est, in quo
necesse fuit ueterem historiam reuoluere, et hiezechielis hieremiae que
easdem in testimonium trahere uisiones, et maxime prophetiam contra
montem seir. et illud de psalmis: in idumaeam extendam calceamentum
meum. et alibi: tabernacula idumaeorum et ismahelitae, moab et agareni,
gebal et ammon et amalech. amos quoque inquit: super tribus sceleribus
edom, et super quattuor non auersabor eum, eo quod persecutus sit in
gladio fratrem suum, et uiolauerit misericordiam suam. siue, ut
symmachus transtulit; uiscera sua, quod aduersus cognatos populos ausus
sit dimicare, et hostili odio dissidere. fuit autem regio esau, in
regione duma, hoc est in montibus seir. hanc ut metropolim, iuxta
ordinem superiorum uisionum, ab assyriis siue a nabuchodonosor
expugnatam esse credimus, memorem que pristini generis, quod de abraham
et isaac sit stirpe generata, implorasse auxilium dei, et necessitate
cogente, illius clementiam flagitasse. narrat ergo nunc dominus: qui
obsidetur in seir et ab hostibus cingitur, meum implorat auxilium, et
dicit: o custos israel, qui populum tuum tueris custodia sempiterna, et
quasi in nocte, illis dormientibus, uigilas, ne hostis irrumpat. quare
et nos qui de genere sumus, non simili clementia protegis? quibus ego
custos uigil que respondeo, de quo scriptum est: non dormitabit neque
obdormiet qui custodit israel. uenit mane populo meo, et nox genti
idumaeorum; illis praebebo lucem, uos in tenebris derelinquam. uel certe
ita: uenit lux nocte transacta; si meum inuocatis auxilium et estis de
stirpe serui mei abraham, nolite me tantum in necessitatibus quaerere,
sed toto ad me animo conuertimini. uenite, et suscipiam paenitentes. hoc
iuxta historiam dictum sit; ceterum propter similitudinem litterae, ex
eo quod res et daleth non multum inter se discrepent, quidam hebraeorum
pro duma romam legunt, uolentes prophetiam contra regnum romanum dirigi,
friuola persuasione, qua semper in idumaeae nomine romanos existimant
demonstrari. duma autem interpretatur silentium.
onus in arabia. in saltu ad uesperam dormietis, in semitis
dodanim. occurrentes sitienti ferte aquam, qui habitatis terram austri,
cum panibus occurrite fugienti. a facie enim gladiorum fugerunt, a facie
gladii imminentis, a facie arcus extenti, a facie grauis proelii.
quoniam haec dicit dominus ad me: adhuc in uno anno, quasi in anno
mercenarii, et auferetur omnis gloria cedar, et reliquiae numeri
sagittariorum fortium de filiis cedar imminuentur. dominus enim deus
israel locutus est. quaerenti mihi et diu cum deliberatione tractanti
quae esset arabia, ad quam propheticus sermo dirigitur, utrum moabitae
an ammonitae, et idumaei cunctae que aliae regiones, quae nunc arabia
nuncupantur, occasionem tribuit in hac eadem uisione quod sequitur:
auferetur omnis gloria cedar, et reliquiae numeri sagittariorum fortium
de filiis cedar imminuentur. ismaelitas debere intellegi. liber geneseos
docet ex ismaele cedar et agarenos, qui peruerso nomine saraceni
uocantur, esse genitos. hi per totam habitant solitudinem, de quibus
puto et poetam dicere: late que uagantes barcaei; et supradictum
uolumen: contra faciem omnium fratrum suorum habitabit; eo quod
latissima eremus ab india ad mauritaniam usque tendatur et atlanticum
oceanum, quod puto hieremiae titulum sonare: ad cedar et ad regna asor,
quae percussit nabuchodonosor rex babylonis; statim que sequitur: haec
dicit dominus, surgite et ascendite ad cedar, et uastate filios
orientis; tabernacula eorum et greges eorum capient, pelles eorum et
omnia uasa et camelos tollent sibi. et iterum: iniuit enim contra uos
nabuchodonosor rex babylonis consilium, cogitauit aduersus uos
cogitationes. surgite et ascendite ad gentem quietam et confidenter
habitantem, ait dominus; non ostia, non uectes eis: soli habitant. et
erunt cameli eorum in direptionem, et multitudo iumentorum in praedam.
et dispergam eos in omnem uentum qui sunt attonsi in comam; et ex omni
confinio eorum adducam interitum super eos, ait dominus. erit que asor
habitaculum draconum deserta in sempiternum; non manebit ibi uir, nec
incolet eam filius hominis.
totum prope testimonium de hieremia posui, ut quae sit cedar,
indubitanter intellegas. et considera quomodo ismaelitarum, hoc est,
saracenorum proprie gentem descripserit, quia habitant in tentoriis; qui
quas nox compulerit sedes tenent, quibus armenta sunt et pecora
camelorum que greges; qui non habent ostia nec uectes, non enim
uersantur in urbibus, sed in solitudine habitant. et hi ergo a
babyloniis deleti sunt, eo quod asor ciuitatem, quae metropolis gentis
illius in eremo fuit, usque ad solum subuerterint; et tamen cum
camelorum et ouium greges capti sint, pelles que eorum eat que tentoria
sorti diuisa. non omnis gentis illius significatur interitus, eo quod
dromedariis camelis centum et amplius milia uno die per uastam
solitudinem fugere soleant. auferetur, inquit, omnis gloria cedar, et
imminuto sagittariorum numero, quia maxime pollent arte pugnandi; ceteri
qui fugerint, remanebunt. quia intelleximus quae sit cedar, et quae
arabia, quae que asor, uideamus esaias propheta quid dicat; in saltu ad
uesperam dormietis, in semitis dodanim. uerbum arab, ut saepe iam
diximus, et uesper et arabia et coruus et planities, et occidens
appellatur. et pro eo quod nos iuxta lxx transtulimus: dormietis, potest
interpretari: morabimini, siue habitabitis, hoc est aulith�sesthe~g,
quod hebraice dicitur thalinu. dodanim quoque in propinquos uertitur et
cognatos. itaque praedicitur nunc iudaeis, qui obsidionem babyloniam
effugere potuerint, et de totius prouinciae uastitate ad eremum transire
uicinam, quod habitaturi sint in solitudine arabiae in itinere quod
ducit ad fratres. rursum que ad ismaelitas sermo conuertitur et eos ad
misericordiam cohortatur. currite, et lassis fratribus ac
periclitantibus ardore sitis obuii ferte aquas; tantus enim feruor est
solis, ut nisi subueniritis, in solitudine pereant; et non solum aquas,
sed etiam panem ferte fugientibus, ut quos confecit obsidio, uestra
clementia releuet. simul que reddit causam quare haec imperet fieri,
dicens: fugerunt babylonium gladium, fugerunt arcus elamitarum, fugerunt
imminens proelium. nec despiciatis miseros: cito ueniet et uestra
captiuitas. quomodo enim uelox mercenarii annus est, et omnem laborem
breuem putat, dum ad desideratam mercedem perueniat. sic uniuersa gloria
filiorum cedar auferetur a uobis et sagittae uestrae conterentur, et
paruus remanebit numerus pugnatorum. quidam uolunt ex eo quod dicitur:
adhuc in uno anno, et auferetur omnis gloria cedar, non babyloniam
captiuitatem praedicari, de qua et hieremias loquitur, sed assyriorum,
qui post unum annum uastationis iudaicae, saracenos latissime persecuti
sunt. illum praeterea locum, in quo nos transtulimus: qui habitatis
terram austri, cum panibus occurrite fugienti, et quasi ex persona
domini imperatiuo modo legimus, in hebraeo sic legi posse affirmant: qui
habitant terram austri, cum panibus occurrerunt fugienti; ut cum deus
eis dixerit: occurrentes sitienti ferte aquam, illi inimica mente panes
tulerint absque aquis, ut cibo augerent sitim.
22. onus uallis uisionis. lxx, licet non habeatur in hebraeo,
manifestius transtulerunt: uerbum uallis sion. haec enim ciuitas
seminarium prophetarum est, in qua exstructum templum, et uisiones
domini multiplicatae sunt. quia ergo inter ceteras gentes ponitur, et
reputatur una de plurimis, nequaquam mons appellatur, iuxta illud
propheticum: fundamenta eius in montibus sanctis; diligit dominus portas
sion super omnia tabernacula iacob; sed uallis, ex eo quod humiliata
sit. aliis uerbis hoc ipsum hieremias loquitur: quando accepit calicem
plenum uini, et dat uniuersis gentibus, ac nouissime porrigit
hierusalem, ut bibat et uomat, et ruat et insaniat. significans a
babyloniis et hanc esse uastandam. quod plenius regum et hieremiae
narrat historia. ex quo intellegimus omnium creatorem aequaliter esse
deum, et eodem cuncta dispensare iudicio, iuxta illud quod ipse loquitur
per amos: numquid non ut filii aethiopum uos estis mihi filii israel?
ait dominus. numquid non israel ascendere feci de terra aegypti, et
palaestinos de cappadocia, et syros de cyrene? ecce oculi domini super
regnum peccans. ne putarent iudaei idcirco se meritorum habere
priuilegium, quia educti essent de aegypto, dicit etiam ceteras gentes
ad alias terras suo imperio fuisse translatas.
quidnam tibi quoque est, quia ascendisti et tu omnis in tecta.
clamoris plena, urbs frequens, ciuitas exsultans? referebat mihi
hebraeus, praesentem uisionem non pertinere ad illud tempus, quo
nabuchodonosor hierusalem cepit, et sedechiam uinctum oculis que
priuatum duxit in babylonem; sed ad sennacherib tempora, quando sobna
pontifex magnam partem prodidit ciuitatis, et tantum sion, id est arx et
templum, ac nobiles remanserunt, in exemplum romanae urbis, quae
irruentibus gallis, patricios et florem iuuentutis in arce seruauit. nos
autem possumus et de babylonia captiuitate dicere; quamquam eusebius
omnia ad christi aduentum referat et putet uespasiani titi que
temporibus fuisse completa. carpamus ergo singula, triplicem
expositionem breuiter attingentes. quidnam tibi quoque est? quid habes,
inquit, sion, quod etiam tu ascendisti omnis in tecta? quando dicit
etiam tu, ostendit quod ceteri prius ascenderint. num et tu reputata es
inter gentes, quae ab hostibus obsideris, et tecta conscendis plena
ululatus et planctus miserabilium feminarum, urbs quondam regia?
interfecti tui non interfecti gladio, nec mortui in bello. cuncti
principes tui fugerunt simul dure que ligati sunt. omnes qui inuenti
sunt, uincti sunt pariter; procul fugerunt. si ad sennacherib tempora
referas, quando ex parte capta est ciuitas, recte dicuntur non fuisse
uicti gladio, nec occisi in bello, sed proditione, aliis ex urbe
fugientibus, aliis, quos hostis oppressit, uinculis alligatis. sin autem
ad babyloniam captiuitatem (quod et uerius est) dicemus quod non pugna,
sed obsidione superati sint. quod si in aduentu christi, iuxta
eusebium, tropologice intellegere uolueris, dices eos interfectos non
gladio, sed infidelitate, omnes que principes eorum recessisse a deo, et
peccatorum funibus alligatos, nec quemquam fuisse de pharisaeis, qui
non diaboli retibus alligatus sit.
propterea dixi: recedite a me, amare flebo; nolite incumbere, ut
consolemini me super uastitatem filiae populi mei. si in uastitate
babylonis lacrimatur propheta lugentis affectu, et dicit: angustia
possedit me, sicut angustia parientis; corrui cum audirem, conturbatus
sum cum uiderem, emarcuit cor meum, tenebrae stupefecerunt me. babylon
dilecta mea posita est mihi in miraculum, quanto magis nunc in urbis
suae ruina nullam accipere consolationem potest, totum se planctibus
tradens!
dies enim interfectionis, et conculcationis, et fletuum domino
deo exercituum in ualle uisionis. reddit causas iuxta triplicem
intellegentiam, quare dixerit: recedite a me, amare flebo; quia
conculcata sit sion, mons quondam uisionum, et nunc uallis fletuum.
scrutans murum, et magnificus super montem. et elam sumpsit
pharetram, currum hominis equitis et parietem nudauit clipeus.
describitur babylonis exercitus intrans urbem, templum occupans, et
quadrigis per plateas superbus incedens. quod que auratos postes, et
marmorum crustis uestitos parietes, clipeus, qui alia solet tegere,
nudauerit, eleganter in hebraeo resonat, sensus que pulcherrimus est,
quod scutum non protexerit quempiam, sed nudauerit; eo quod per robur
militum omnes opes erutae sint. sin autem elamitae ponuntur in proelio,
quae urbs assyriorum est; non potest referri ad tempora romanae
subuersionis, nisi forte cuncta allegorice interpretemur.
et erunt electae ualles tuae plenae quadrigarum, et equites
ponent sedes suas in porta. et reuelabitur operimentum iudae, et uidebis
in illa die armamentarium domus saltus, et scissuras ciuitatis dauid
uidebitis, quia multiplicatae sunt. manifeste captiuitatem describit,
quae undecimo anno regis sedechiae facta est, de qua et hieremias
loquitur: ecce ego conuocabo omnes cognationes regnorum aquilonis, ait
dominus, et uenient, et ponet unusquisque solium suum in introitu
portarum hierusalem, et super omnes muros eius in circuitu. quod ne
putemus uoce praedictum et opere non expletum, idem hieremias ait:
undecimo anno sedechiae, mense quarto, quinta mensis, aperta est
ciuitas, et ingressi sunt omnes principes regis babylonis, et sederunt
in porta media. tunc ergo in circuitu ciuitatis hierusalem,
innumerabilis est fusus exercitus et aperta sunt sancta sanctorum, et
armamentarium, quod nemore consitum erat, hostili populatione reseratum,
et per cunctas urbis partes diuisis muris hostis ingressus est.
et congregastis aquas piscinae inferioris. et domos hierusalem
numerastis, et destruxistis domos ad muniendum murum.
et lacum fecistis inter duos muros, et aquam piscinae ueteris; et non
suspexistis ad eum qui fecerat eam, et operatorem illius de longe non
uidistis. narrat quomodo obsidioni parauerint ciuitatem, et aquas
inferioris piscinae, quae capi poterant, ad superiorem munitionem
transtulerint, destructis que domibus, muros aedificauerint, et per
singulas cognationes, quae domus quantum aquae deberet accipere,
dinumerarint, fecerint que cisternam inter duos muros, et piscinam
ueterem instaurarint ad seruandas aquas. et non magis dei inuocauerint
auxilium, qui conditor urbis sit, piscinae que dominus; quas aliis
uerbis dixerit: fiduciam habuistis in homine, et non in deo, qui factor
est hominis. quidam iuxta mysticos intellectus piscinam ueterem, legis
umbram intellegunt, et inter duos muros, nouum uidelicet et uetus
testamentum, aedificatum lacum pharisaeorum traditionibus atque
mandatis, qui aquas continere non possit. et non respexisse eos ad
filium dei, nec illius praesentiam credidisse quem olim non uiderint,
quia semper dei praeceptis increduli fuerint.
et uocabit dominus deus exercituum in die illa ad fletum et ad
planctum et ad caluitium et ad cingulum sacci. et ecce gaudium et
laetitia occidere uitulos et iugulare arietes, comedere carnes et bibere
uinum; comedamus et bibamus, cras enim moriemur, et reuelata est in
auribus meis domini exercituum. si dimittetur iniquitas haec uobis donec
moriamini, dicit dominus deus exercituum. captiuitate praesente et
obsessa hierusalem, cum ferrum, fames, sitis urgeret urbem, hieremias ad
paenitentiam populum prouocabat, et e contrario reges ac principes et
uulgus miserabile desperatione pereuntium se tradebat epulis. nihil
autem sic offendit deum quam post peccata erecta ceruix, et ex
desperatione contemptus. quod et per amos loquitur: super tres et
quattuor impietates non auersabor eum. quod et cogitauerit, et fecerit,
et non egerit paenitentiam; insuper et docuerit malum. unde et nunc
dicitur: si dimittetur iniquitas haec uobis, donec moriamini. putant
allegorici interpretes de passione christi esse praedictum, quod
uocauerit deus etiam post crucem domini saluatoris infelicem populum ad
paenitentiam, et nihilominus ille se desperationi tradiderit et
uoluptati. principium quippe istius uisionis, in quo ait: clamoris
plena, urbs frequens, ciuitas exsultans, ad illud tempus referunt,
quando a pharisaeis populus incitatus, pari contra iesum uoce resonabat:
crucifige, crucifige talem: non habemus regem nisi caesarem. huius
testimonii exemplo etiam apostolus abusus est, scribens ad corinthios de
resurrectione: si mortui non resurgunt, manducemus et bibamus, cras
enim moriemur.
haec dicit dominus deus exercituum: uade, ingredere ad eum qui
habitat in tabernaculo, ad sobnam praepositum templi, et dices ei: quid
tu hic? aut quasi quis hic, quia excidisti tibi hic sepulcrum? excidisti
in excelso memoriam. diligenter in petra tabernaculum tibi. ecce
dominus asportari te faciet, sicut asportatur gallus gallinaceus et
quasi amictum sic subleuabit te. coronans coronabit te tribulatione,
quasi pilam mittet te in terram latam et spatiosam. ibi morieris, et ibi
erunt currus gloriae tuae; ignominia domus domini tui. et expellam te
de statione tua, et de ministerio tuo deponam te. et erit in die illa,
uocabo seruum meum eliacim filium helciae. et induam illum tunica tua,
et cingulo tuo confortabo eum, et potestatem tuam dabo in manu eius; et
erit quasi pater habitantibus hierusalem et domui iuda. et dabo clauem
domus dauid super humerum eius, et aperiet, et nemo erit qui claudat; et
claudet, et non erit qui aperiat. et figam illum paxillum in loco
fideli, et erit in solium gloriae domui patris sui. et suspendent super
eum omnem gloriam domus patris eius, uasorum diuersa genera; omne uas
paruulum, a uasis craterarum usque ad omne uas musicorum. in die illo,
dicit dominus exercituum, auferetur paxillus qui fixus fuerat in loco
fideli, et frangetur et cadet, et peribit quod pependerat in eo, quia
dominus locutus est.
supra diximus sobnam fuisse pontificem, qui assyriis prodidit ciuitatem.
sed quia hoc traditionis est hebraicae et scriptura non loquitur,
intellegamus eum superbum, tumidum et uoluptuosum, suis que pedibus
populos conculcantem. et quia fecerit cuncta quae propheta describit,
sacerdotium eius ad eliacim filium helciae fuisse translatum, ut illo
eiecto, nouus pontifex fieret. ex quo intellegimus, omni studio
superbiam declinandam, quae offendit deum, et ne pontificatus quidem
priuilegio tuta esse potest. iste est sobna, sicut quidam putant, et
eliacim, de quibus idem propheta subtexuit: misit rex assyriorum
rabsacem de lachis in hierusalem ad regem ezechiam in manu graui; et
stetit in aquaeductu piscinae superioris, in uia agri fullonis, egressus
que est ad eum eliacim filius helciae, qui erat super domum, et sobna
scriba, et iohae filius asaph a commentariis. iubetur ergo ingredi
propheta ad pontificem, qui habitabat, iuxta lxx: in pastophorio; iuxta
aquilam: in tabernaculo. pro quo sequens hebraicam ueritatem theodotio
ait: ingredere ad socen istum, quod interpretari potest: aequum et
rectum, - ut scilicet kata~g antiphrasin~g, iniquus intellegatur et
prauus -, ad pontificem templi. et dices ei: qui habitas in domo dei,
cuius scelera in tota ciuitate bacchantur, cur securus es in operibus
tuis, quasi non uerearis captiuitatem; excidisti tibi in petra
sepulcrum, et tam superbe aedificasti, ut ambitio te et in morte
sequeretur? audi quae sit in te domini sententia, quomodo gallus
gallinaceus humero portantis aufertur, et singuli hominum leuant in
scapula pallium suum. sic tua facilis erit in captiuitatem translatio.
habebis coronam non laminae aureae et sanctificationis domini, sed
tribulationis et angustiae. sicut enim pila si mittatur in procliue,
stare non potest, sed ueloci cursu uoluitur; ita et tu ad terram
latissimam deduceris, quam aut aegyptum aut babyloniae campos
intellegamus, ibi que morieris; et ibi erunt currus gloriae tuae, omnes
potentiae et opes, quibus nunc fultus incedis. ibi senties ignominiam
domus domini tui, quia propter opera mala et uiolatum templum dei tui
ista patieris. detraham te de gradu tuo et de pontificatus officio
proiciam, et pro te eliacim seruum meum filium helciae induam
uestimentis tuis et cingulo tuo decorabo; sicut eleazar uestimentis
aaron patris indutus est. ipsi dabo potestatem templi, qui habeat
populum non subiectum sibi quasi seruum, sed amatorem sui quasi filium.
ipse accipiet clauem domus meae, et in suo portabit humero, ipse habebit
caeremoniarum omnium potestatem. et quomodo paxillus si figatur in
pariete templi, et in loco firmissimo collocetur, omnia uasa sacerdotum
et leuitarum, tam quae in sacrificiis necessaria sunt, quam omnis
generis musicorum, suspenduntur in eo; sic omnis populus ex eliacim
serui mei potestate pendebit. quod autem ait: in die illa auferetur
paxillus qui fixus fuerat in loco fideli, et frangetur et cadet, et
peribit quod pependerat in eo, quia dominus locutus est. multi ad sobnam
referunt, quod eliacim infixa paxillo, prior paxillus qui infixus
fuerat, corruat. sed quia sequitur: et peribit quod pependerat in eo;
quod deiecto sobna, nequaquam factum est, intellegimus hoc dici, quod
deposito sobna pontificatum acceperit eliacim, cuius sacerdotii
dignitatem subuertit extrema captiuitas. qui iuxta anag�g�n~g cuncta
accipiunt, uolunt in sobnae pontificatu iudaeorum sacerdotium cadere et
in successione eliacim, qui interpretatur deus resurgens, euangelici
cultus sacramenta monstrari. ita ut hoc quod sequitur: in die illo,
dicit dominus exercituum, auferetur paxillus, qui fixus fuerat in loco
fideli, et frangetur et cadet, ad prioris populi ruinam pertineat. nemo
autem dubitat, et iuxta historiam et iuxta allegoriam, quia paxillum
dixerat, seruari metaphoram in suspensione uasorum diuersi generis; et
quod prioribus fractis, alia suspendantur.
23. onus tyri. ululate naues maris, quia uastata est domus, unde
uenire consueuerant; de terra cethim reuelata est eis. tacete qui
habitatis in insula negotiatio sidonis. manifestius et plenius
hiezechiel propheta et subuersionem tyri et causas subuersionis exponit,
dicens: fili hominis, pro eo quod dixit tyrus de hierusalem: euge,
confractae sunt portae populorum, conuersa est ad me, implebor, deserta
est. propterea haec dicit dominus deus: ecce ego super te, tyre, et
ascendere faciam ad te gentes multas, sicut ascendit mare fluctuans, et
dissipabo muros tyri, et destruam turres eius, et radam puluerem eius de
ea. quae autem istae sint gentes multae, quae inundabunt tyrum sicut
mare fluctuans, nominatim in consequentibus docet: ecce ego adducam ad
tyrum nabuchodonosor regem babylonis ab aquilone, regem regum, cum equis
et curribus et equitibus, et coetu populo que magno. filias tuas quae
sunt in agro, gladio interficiet; et circumdabit te munitionibus; et
comportabit aggerem in gyro, et eleuabit contra te clipeum, et uineas
atque arietes temperabit in muros tuos, et turres tuas destruet in
armatura sua, et cetera quae usque ad finem uisionis sequuntur.
nam et in alia prophetia, quae aduersum aegyptios cernitur, eadem
scriptura contexit: fili hominis, nabuchodonosor rex babylonis seruire
fecit exercitum suum seruitute magna aduersum tyrum; omne caput
decaluatum, et omnis humerus depilatus, et merces non est reddita ei
neque exercitui eius de tyro. per quae significat multo tempore ab
exercitu babylonis aggerem comportatum, ut quod postea fecit alexander,
insulam continenti terrae socians, ille ante facere sit conatus. quomodo
ergo aduersus babylonem et philistiim, et moab et aegyptum, et idumaeos
et ismaelitas, supra dei comminationem legimus, quod insultauerint
captiuitati populi eius, ita etiam nunc aduersum tyrum inimicam et
insultatricem subuersionis hierusalem prophetia texitur, quod etiam ipsa
ab eodem hoste sit destruenda. legimus graecorum historias, et maxime
eorum qui assyriae gentis bella describunt. ibi que reperimus post
captiuitatem hierusalem, palaestinos et arabas et damascenos, ac
deinceps aegyptios fuisse subuersos. quod autem semper hae gentes, et
praecipue tyrus impugnauerit israel, et in illius subuersione laetata
sit, amos propheta in exordio sui uoluminis explicat, et breuiter laudes
deo canens psalmista declarat: deus, quis similis erit tibi? ne taceas
neque compescaris, deus. quoniam ecce inimici tui sonuerunt; et qui te
oderunt, extulerunt caput. super populum tuum malignauerunt consilium et
cogitauerunt aduersus sanctos tuos. dixerunt: uenite, et disperdamus
eos de gente, et non memoretur nomen israel ultra. quoniam cogitauerunt
unanimiter, simul aduersum te testamentum disposuerunt, tabernacula
idumaeorum, et ismaelitae, moab et agareni, gebal et ammon, et amalech
alienigenae cum habitantibus tyrum. ex quibus omnibus discimus, pondus
irae dei super tyrum uenisse meretricem, quae hic sub specie scorti, in
hiezechiel sub nauis translatione describitur. ululate, inquit, naues
maris. pro quo in lxx legimus carthaginis; et habetur in hebraeo
tharsis, de quo et in iona propheta et in quadam epistola disputaui.
possumus autem, quia carthago tyriorum colonia est, in praesenti loco
tharsis, non mare generaliter, sed et carthaginem accipere, quod
nequaquam de africa naues tyrum ueniant, nec de terra cethim, quam
cyprum quidam interpretantur; usque hodie enim est apud eos urbs citium
de qua et zeno stoicae sectae haeresiarches fuit. quamquam plerique
nostrorum et maxime machabaeorum principium cethim italiae macedoniae
que insulas arbitrentur. hoc enim scriptura commemorat, quod alexander
rex macedonum egressus sit de terra cethim. insulam quoque nominans, non
mentitur; postea enim a nabuchodonosor uel alexandro terrae continens
facta est, propter expugnationem multis in breui freto aggeribus
comportatis. negotiationem quoque sidonis appellat, iuxta sequentem
uersiculum, in quo ait: erubesce, sidon. tradunt enim historiae, quod
tyrus colonia sidonis sit.
transfretantes mare repleuerunt te. in aquis multis semen nili
messis fluminis fruges eius. tyrum negotiatione gaudere et totius orbis
esse emporion, et praesentia tempora probat et hiezechiel lato sermone
describit. quod autem negotiatores in subuehendis mercibus transfretent
maria, nemo est qui dubitet. nec tantas habet opes ipsa urbs de terra
regionis suae, quae ualde angusta est, et galilaeae damasci que finibus
premitur, quantas de subuectione nauium. nilus omnis, et aegypti
fertilitas e uicino infunditur tyro. pro nilo, quod apud hebraeos
legimus sior, lxx et theodotio negotiatores interpretati sunt; quod
uerbum turbidum, et per hoc nili aquas significat, hieremia testante:
quid tibi et aegypto, ut bibas aquas geon. pro quo in hebraico habetur
sior, id est turbidas.
erubesce, sidon; ait enim mare fortitudo maris, dicens: non
parturiui, et non peperi, et non enutriui iuuenes, nec ad incrementum
perduxi uirgines. dixi supra coloniam sidoniorum esse tyrum.
audi igitur, mater, cuncta simul contra filiam tuam maria clamantia, et
quodammodo uocem emittentia, quae per naturam loqui non ualent. frustra
diuitias comportaui; sine causa de toto orbe in tyrum opes contuli. illa
diues, illa luxuriosa, et populorum quondam gaudens multitudine, in qua
nascebatur turba mortalium, caterua puerorum, iuuentutis examina, cuius
plateae uirginum, et infantium, ac iuuenum, et puellarum lusibus
perstrepebant; nunc ad solitudinem redacta est. fieri autem
pros�popoiias~g ex rebus multis sollemne est.
cum auditum fuerit in aegypto, dolebunt cum audierint de tyro.
hoc perspicuum est, quod aegyptii postquam audierint potentissimam et
uicinam gentem, longa obsidione deletam, sciant etiam sibi interitum
propinquare.
transite maria, ululate qui habitatis in insula. rursum pro mari
et tharsis lxx carthaginem transtulerunt. legimus in historiis
assyriorum, obsessos tyrios postquam nullam spem euadendi uidebant,
conscensis nauibus fugisse carthaginem, seu ad alias ionii aegaei que
maris insulas. unde et in hiezechiel dicitur: merces non est reddita ei
neque exercitui eius de tyro, eo quod omnes urbis opes translatae sint,
et nobiles quique eam uacuam dereliquerint.
numquid non haec uestra est, quae gloriabatur a diebus pristinis
in antiquitate sua? arguit superbiae tyrum, quod in conditionis suae
antiquitate sit gloriata, et non respexit ad deum; sed nomina patrum
recolens, se aeternam putauerit.
ducent eam pedes sui longe ad peregrinandum. eos dicit, qui in urbe remanserant, et captiui ducti sunt in babylonem.
quis cogitauit hoc super tyrum quondam coronatam? rursum lege
hiezechiel, et quantae gloriae tyrus fuerit, ex principis eius
lamentatione cognosces. coronatam uocat eam, quod sicut rex inter
plurimam hominum multitudinem ornatum diademate erigit caput. ita tyrus
fulgens et excelsa opibus, auro que et gemmis et serico ac purpura
nitens, regina sit in cunctis gentibus aestimata.
cuius negotiatores principes, institores eius incluti terrae.
miramur legatum pyrrhi quondam dixisse de urbe romana: uidi ciuitatem
regum. ecce multo ante illa tempora negotiatores et institores tyri,
principes et incluti describuntur, ut per haec ostendatur opulentiae
magnitudo, cum negotiator tyri alterius uerbis esse rex possit.
dominus exercituum cogitauit hoc, ut detraheret superbiam omnis
gloriae; et ad ignominiam deduceret uniuersos inclutos terrae. quia
supra interrogantis more dixerat: quis cogitauit hoc super tyrum quondam
coronatam? nunc ipse respondit: non fatorum, ut stulti putant, sic fila
deducta sunt; non fortunae cucurrit rota, sed dei iudicio et ipsius
uoluntate perfectum est, qui superbis resistit et humilibus dat gratiam.
et commonet arrogantes conditionis suae, ut discant potentiam eius per
miseriam, cuius clementiam per beneficia sentire noluerant.
transi terram tuam quasi flumen, filia maris; non est cingulum
ultra tibi. sicut, inquit, fluuius, siue, ut in hebraico significantius
habet, riuulus (hoc enim dicitur ior), facile transitur pede. ita et tu
terram tuam, in captiuitatem ducta, transibis, o filia maris, uel quia
insula es, uel quia supra de te scriptum est: dixit mare fortitudo
maris, non parturiui et non peperi. quod que infert, non est cingulum
ultra tibi, quem sensum habeat, apertius symmachus docet: non poteris
ultra resistere, id est: non habebis uires nec accinctos ad pugnandum
lumbos tuos, ut possis aduersariis contraire.
manum suam extendit super mare, conturbauit regna. quis extendit
manum? haud dubium ex ipsa sermonis continentia quin deus, de quo supra
dixit: dominus exercituum cogitauit hoc, ut detraheret superbiam omnis
gloriae.
extendit ergo manum suam super omnia maria, saeculum orbem que
significans et conturbauit uniuersas gentes, inter quas, et tu, tyre,
turbata es, siue super mare, in quo proprie sita es.
dominus mandauit aduersus chanaan, ut contereret fortes eius.
ostendit quod sit mare, super quod extenderit dominus manum suam,
dicens: mandauit aduersus chanaan. tyrus enim in terra chanaan condita
est. lege scripturas, maxime que euangelium, ubi syrophoenissa
interpellans pro filia, egreditur de terra chanaan, quae dicitur mulier
chananaea. simul que quia dixerat: extendit manum suam, ne operantem
membris et officio corporali crederes dominum, adiecit: mandauit, ut dei
fecisse, iussisse sit.
et dixit: non adicies ultra ut glorieris, calumniam sustinens,
uirgo filia sidonis, in cethim consurgens transfreta; ibi quoque non
erit requies tibi. deus, qui cogitauit detrahere superbiam omnis
gloriae, qui mandauit aduersus chanaan, ut contereret fortes eius, ipse
dicit: nequaquam ultra gloriaberis, et in tua confides potentia. o uirgo
filia sidonis, id est, colonia sidoniorum, fugies quidem nauibus ad
insulas occidentis, seu in cyprum et ceteras macedoniae graeciae que
terras, sed et ibi, aduersante deo, requiem inuenire non poteris.
alioquin, omnis uagus atque in orbe peregrinus et incertarum sedium,
semper in angustia, iugiter in maerore est.
ecce terra chaldaeorum, talis populus non fuit. assur fundauit
eam in captiuitatem, traduxerunt robustos eius, suffoderunt domos
illius, posuerunt eam in ruinam. ululate, naues maris, quia deuastata
est fortitudo uestra. quia supra dixerat: ducent eam pedes sui longe ad
peregrinandum; et iterum: transi terram tuam quasi flumen, duplex que
fuit populus tyri, eorum qui fugerant et transfretauerant in cethim, et
eorum qui in urbe remanserant, ad utrumque loquitur. de his qui
fugerant, supra ait: in cethim consurgens transfreta, ibi quoque non
erit requies tibi. de his qui remanserant et ducti sunt in captiuitatem:
ecce, inquit, accolae terrae chaldaeorum, cuius potentiam nulli populi
ante habuerunt, et quae ab assyrio fundata est, transduxerunt robustos
tyri. suffoderunt non solum muros, sed et cuncta habitacula ciuitatis,
posuerunt que eam in ruinam. quia igitur alii fugerunt, alii capti sunt,
ululate naues, uel maris uel carthaginis; negotiatio enim et colonia
uestra deleta est. simul que considera, quomodo laudauerit chaldaeos.
non dixit, talis populus ultra non erit. potentius quippe et durius
regnum est romanorum; sed, ante non fuit. qui priora negauit, concessit
sequentia.
et erit in die illa, in obliuione eris, o tyre, septuaginta
annis, sicut dies regis unius. ab hoc loco usque in finem huius
prophetiae, tyro prospera nuntiantur, quod debeat agere paenitentiam,
quod iterum exstruenda sit, quod septuaginta tantum annis, quibus et
templum dei desolatum fuit, tyri subuersio maneat; ut, cuius ruinis
insultabat, et ruinarum eius tempus imitetur. septuaginta autem annos
unius regis, multi putant nabuchodonosor dici, quibus regnum gentis
assyriae in hierusalem permanserit. alii generaliter pronuntiatum, quod
qui longum regnandi tempus habuerit, septuaginta annos transire non
possit.
post septuaginta autem annos erit tyro quasi canticum meretricis
sume citharam, circumi ciuitatem, meretrix obliuioni tradita, bene cane,
frequenta canticum, ut memoria tui sit. quia cum plurimis gentibus
fornicata es et desolatam te nudam que et captiuitatis squalentem
sordibus, amatores pristini contempserunt, assume nunc citharam,
congemina carmina, circumi ciuitatem, plange lupanar pristinum et
antiqui erroris uestigia lacrimis laua, ut possis dei in te
misericordiam prouocare.
et erit, post septuaginta annos uisitabit dominus tyrum, et
reducet eam ad merces suas, et rursum fornicabitur cum uniuersis regnis
terrae super faciem terrae.
haec omnia iuxta historiam expleta esse, consonis graecorum et phoenicum
litteris indicatur, quod post lxx annos instaurata, ad potentiam
pristinam sit reuersa, et negotiatio uniuersarum gentium fuerit, quas
ego puto fornicationes appellari, ut quomodo qui fornicatur, ad lupanar
ingreditur, et mercedem stupri tribuit. sic et institor, de toto orbe
concurrens, pulchritudinem urbis quasi meretricis impleuerit. et erit
negotiatio eius, et mercedes eius sanctificatae domino; non condentur,
neque reponentur. quia his qui habitauerint coram domino, erit
negotiatio eius, ut manducent in saturitate, et uestiantur usque ad
uetustatem. haec secundum historiam necdum facta comperimus, nisi forte
putandum est, quod post aedificationem hierusalem et instaurationem
tyri, amicae inter se fuerint ciuitates, et ad templum dei crebro tyri
dona transmiserint. sicut et in ezra legimus, quod tyrios qui pisces
uendebant, in sabbato abegerit, et introire urbem non permiserit; atque
ex uno mercimonio, etiam de ceteris aestimandum sit. iudaei cassa in
futurum uota differunt, post antichristum in mille annis haec explenda
memorantes. nec mirum si ista confingant, qui spreta ueritate christi,
organum diaboli antichristum recepturi sunt, cum etiam christiani
iudaizantes, de mille annorum beatitudine haec dicta contendant. ego
autem quomodo in uisione babylonis sub typo euersionis eius,
consummationis tempus intellego, et in aegypto destructis idolis altare
domini collocatum, ad christi tempus refero; et in uisione moab, thronum
saluatoris in terra eius positum recognosco, et in damasci ceteris que
uisionibus omnibus, nostrorum esse temporum sacramenta non dubito. ita
et in uisione tyri, quae extrema est, christianae felicitatis tempus
interpretor, quod postquam aedificata est et recepit pristinum statum,
et omnis negotiator in antiquam consuetudinem, portum eius ingressus
est, et mercimonia et labor eorum domino dedicentur. cernamus in tyro
exstructas christi ecclesias, consideremus opes omnium, quod non
reponantur, nec thesaurizentur, sed dentur his qui habitant coram
domino, qui seruientes altari participant cum altari. ministrant autem
tyrii non ad diuitias, nec ad cumulandas sacerdotum opes, sed ad uictus
necessaria suppetenda. ut, iuxta apostolum, habentes uictum atque
uestitum, his contenti simus. et nota quod non dixerit negotiationes et
merces tyri sanctificatas domino his dandas qui habitauerint hierusalem
sicut iudaei arbitrantur; sed qui fuerint coram domino, qui seruiunt ei.
sic enim et dominus constituit, ut qui euangelium praedicant, uiuant de
euangelio. seruire autem domino, et habitare coram eo, non est loci,
sed meriti. hucusque uisiones isaiae, siue onera quae certis gentibus
imposuit, ut iussisti, et ut nos quiuimus, historica interpretatione
disseruimus, hebraicae tantum ueritatis prementes uestigia. quae
sequuntur, ad omnes pertinent nationes, et generaliter ad totius mundi
consummationem. de quibus nec tu petisti, ut scriberem, nec mihi otiosum
fuit, ut ex superfluo non quaesita dictarem, qui quaesita uix scripsi.
LIBER 6
quod in praecedenti uolumine pollicitus sum, ut supra fundamentum
historiae, si uoluntati nostrae christus annueret, spiritale struerem
aedificium et imposito culmine perfectae ecclesiae ornamenta monstrarem,
hoc in sequentibus duobus libris, o uirgo christi eustochium,
orationibus tuis et domini misericordia facere conabor, ut eodem labore
quo quintus liber historiam comprehendit, sextus et septimus perstringat
anagogen; non omnia disserentes, ne multa fiant uolumina, sed quid
ecclesiastici uiri ante nos senserint, breuiter indicantes.
13. onus seu uisio contra babylonem quam uidit esaias filius
amos. uidit non carnis, sed mentis oculis, quam grande magnum que pondus
babyloni sit imponendum. et quia babylon, quae hebraice dicitur babel,
interpretatur confusio, eo quod ibi aedificantium turrim sermo confusus
est, spiritaliter mundus iste intellegitur, qui in maligno positus est,
et non solum linguas, sed opera singulorum mentes que confundit. huius
babylonis rex est uerus nabuchodonosor, contra dominum superbiens, qui
dicit in corde suo: in caelum ascendam, super sidera caeli ponam solium
meum; sedebo in monte testamenti in lateribus aquilonis, ascendam supra
altitudinem nubium, ero similis altissimo. iste est qui ostendit domino
uniuersa regna mundi, et dixit ei: haec omnia mihi tradita sunt, et tibi
dabo, si cadens adoraueris me. denique in consequentibus nequaquam
contra babylonem, sed contra orbem terrarum comminatio est. dominus
sabaoth praecepit genti bellicosissimae, ut ueniat de terra longinqua a
summitate caeli, ut disperdat orbem terrarum. et iterum: ecce dies uenit
insanabilis furoris et irae, ut ponat orbem terrarum desertum, et
peccatores disperdat ex eo. ac deinde: praecipiam orbi terrarum uniuerso
mala et impiis peccata sua. ex quibus probatur, omnia quae dicuntur
contra babylonem, ad mundi huius confusionem et interitum pertinere.
super montem caligosum, siue campestrem, leuate signum. apostolis
praecipitur et apostolicis uiris ac magistris ecclesiarum ut dimicaturi
contra babylonem, signum eleuent dominicae crucis, non in humili loco,
et in demersis uallibus, sed in monte caligoso, siue campestri. quorum
alterum significat abscondita ecclesiae sacramenta, quae ut uideret
moyses et audiret uocem dei, intrauit tenebras et caliginem. posuit enim
deus tenebras latibulum suum; et nubes et caligo in circuitu eius.
alterum docet, sic nos ad excelsa ecclesiasticorum dogmatum debere
conscendere, ut iuxta apostolum paulum humiliemur atque dicamus: qui non
sum dignus uocari apostolus, quia sum persecutus ecclesiam dei. qui et
ipse eleuauit signum in monte campestri, quando insita sibi humilitate
dicebat: ego autem iudicaui nihil scire me in uobis, nisi iesum
christum, et hunc crucifixum. hoc autem signum et in superioribus
leuauit ipse, qui ortus est de radice iesse in nationibus, ut
congregaret perditos israel.
exaltate uocem, leuate manum. pro quo lxx transtulerunt:
consolamini manum. exaltat uocem qui de sublimibus loquitur, et
praesentia quasi breuia et transitoria contemnit. qui audit ab eodem
esaia: super montem excelsum ascende qui euangelizas sion. eleua in
fortitudine uocem tuam qui euangelizas hierusalem, eleuat manum suam,
qui potest cum dauid dicere: eleuatio manuum mearum sacrificium
uespertinum; et qui in omni loco leuat sanctas manus, ut non solum leuet
manus, sed etiam consoletur manu, ne dicat pauperi: cras ueni, et
accipe; sed ut pauperiem eius et necessitatem praesenti misericordia
consoletur.
et ingrediantur portas duces. lxx: aperite principes. duces
ecclesiae ingrediuntur portas mysteriorum dei, et scripturarum
sacramenta cognoscunt, habentes clauem scientiae, ut aperiant eas
creditis sibi populis. unde praecipitur, ut magistri aperiant, et
discipuli ingrediantur.
ego mandaui sanctificatis meis. pro quo lxx: ego praecipiam, et
ego adducam eos. ipse enim sanctificat ministros suos, ut et qui
sanctificat et qui sanctificantur, ex uno omnes sint. qui et in alio
loco credentibus loquitur: sancti estote, quoniam et ego sanctus sum;
ipse praecipit et adducet principes suos, ut faciant quae praecepta
sunt.
et uocaui fortes meos in ira mea exsultantes in gloria mea. lxx:
gigantes ueniunt implere furorem meum, gaudentes simul et contumeliam
facientes. iuxta hebraicum haerent superioribus quae dicuntur, quod ipse
uocauerit fortes suos, exsultantes in gloria sua qui mandauerat
sanctificatis suis. porro iuxta lxx, gigantes uenientes ut impleant
furorem domini, gaudentes in aliena iniuria atque laetantes, sinistrae
accipiendae sunt contrariae que uirtutes, de quibus et in psalmis
legimus: misit in eos furorem irae suae, furorem et iram et
tribulationem, immissionem per angelos pessimos. ex his est et
exterminator in aegypto, qui postes agni litos sanguine non audet
intrare, et ille spiritus qui egressus stetit in conspectu domini et
ait: ego decipiam achab. dixit que ei dominus: decipies et praeualebis,
egredere et fac sic. unde in eodem regum uolumine michaeas loquitur:
uidi deum israel sedentem super thronum suum et omnis exercitus caeli
stabat circa eum a dextris, et a sinistris. dextrae uirtutes sunt eorum
angelorum qui ad bona mittuntur; sinistrae autem eorum quibus ad
puniendum tradimur. unde et apostolus: quos tradidi, inquit, satanae, ut
discant non blasphemare. nomen autem gigantium, pro quo in hebraeo
geborim, id est fortium, positum est, lxx et theodotio in similitudine
fabularum uertere gentilium, sicut et sirenas et titanas et arcturum,
hyadas et orionem nominant, quae apud hebraeos aliis appellantur
uocabulis.
si autem gigantes rebelles dei sunt, et omnes haereses contrariae
ueritati rebellant deo. omnes haeretici gigantes sunt, qui gaudent in
errore suo, et tunc maxime gloriantur, quando ecclesiae contumeliam
fecerint.
uox multitudinis in montibus quasi populorum frequentium, uox
sonitus regum gentium congregatarum. tripliciter iste locus accipitur.
primum, ut eleuato signo in monte campestri, ueniat gentium multitudo,
et ipsa in montibus constituta, quae diuiditur in duo, in populos
scilicet et in reges, in discipulos et magistros, de quibus et saluator
in euangelio loquebatur: multi ab oriente et occidente uenient, et
accumbent cum abraham et isaac et iacob in regno caelorum. propterea
autem una uox et consona dicitur, ut illud apostolicum probetur: idipsum
dicatis omnes et non sint in uobis schismata, sed sitis perfecti in
eodem sensu et eadem sententia. secundo, haereticorum describitur
superbia, qui in montibus se esse credentes, eriguntur contra scientiam
dei, et iniquitatem in excelso loquuntur, et ponunt in caelum os suum,
qui et ipsi habent populos, habent reges, qui deceptum populum deuorant.
tertia interpretatio est: quoniam supra dixerat: gigantes ueniunt ut
impleant furorem meum, gaudentes simul et contumeliam facientes, ipsorum
gigantium describit arrogantiam, et ad puniendos, qui sibi traditi
fuerint, in mala parte consensum.
dominus exercituum praecepit militiae belli, uenientibus de terra
procul a summitate caeli, dominus, et uasa furoris eius, ut disperdat
omnem terram. lxx: dominus sabaoth praecepit genti bellicosissimae, ut
ueniat de terra longinqua a summo (signum_obeli) fundamento
(signum_metobeli) caeli dominus, et bellatores eius, ut disperdant
uniuersum orbem. fundamentum obelo praenotandum est. in regum et
paralipomenon uolumine legimus, quod ira dei accensa sit super israel
quando dauid numerauit populum et offendit dominum. in psalmis quoque
scribitur: domine, ne in furore tuo arguas me, neque in ira tua
corripias me, et cetera his similia, pro quo legi in cuiusdam
commentariis iram dei posse intellegi contrariam fortitudinem, cui
tradimur ad puniendum, de quo et in octauo psalmo cantatur: ut destruas
inimicum et defensorem. possunt bellatores dici qui de terra procul
ueniunt et a summo caeli, etiam ministri angeli, qui in mundi
consummatione mittendi sunt, ut zizaniorum manipulos faciant, et
separatos a frumento incendio praeparent sempiterno. omnis quoque terra
disperditur, quando terrena opera subuertuntur. sunt et alii domini
bellatores instructi armatura apostoli, qui cotidie in ecclesia, quae
oikoumen�~g, id est orbis, et habitata intellegitur, disperdant eos, et
interficiant qui eriguntur contra scientiam dei.
ululate, quia prope est dies domini, quasi uastitas a domino
ueniet. propterea omnes manus dissoluentur, et omne cor hominis
tabescet, et conteretur. quoniam bellatores domini uenturi sunt, ut
disperdant omnem terram, ululate, et agite paenitentiam, quibus poena
uentura est. prope est enim dies domini, uel consummationis totius
mundi, atque iudicii, uel exitus uniuscuiusque de uita. uenit enim a
domino depraedatio, quam nos diximus uastitatem. ut seruaremus
metaphoram, quia praemiserat bellatores. cum dies iudicii, uel
dormitionis aduenerit, omnes manus dissoluentur, quibus dicitur in alio
loco: confortamini, manus dissolutae. dissoluentur autem manus, quia
nullum opus dignum dei iustitia reperietur, et non iustificabitur in
conspectu eius omnis uiuens. unde propheta dicit in psalmo: si
iniquitates attendas, domine, quis sustinebit? omne quoque cor siue
anima hominis tabescet; et pauebit conscientia peccati sui. haec est
dies formidolosa atque terribilis, de qua et sophonias loquitur: metuite
a facie domini, quia prope est dies domini. et rursum: iuxta est dies
domini magna; prope, et uelox nimis. et amos: uae, inquit, qui
desiderant diem domini; utquid uobis dies domini quae tenebrae sunt, et
non lux?
quod que iuxta lxx additum est: turbabuntur legati, et dolores
apprehendent eos, illos legatos interpretari possumus, quos ciues
miserant aduersum eum, qui profectus erat in terram longinquam, ut sibi
regnum peteret. unde ipse loquitur in euangelio: inimicos autem, qui
noluerunt me regnare super se, adducite huc et interficite coram me.
torsiones et dolores tenebunt; quasi parturiens dolebunt. unusquisque ad
proximum suum stupebunt; facies combustae uultus eorum. cum uenerint
domini bellatores de terra longinqua, et omnes manus fuerint dissolutae,
et cor pauidum atque contritum; tunc strophomata, quae nos torsiones
uentris interpretati sumus, et dolores tenebunt eos, similes doloribus
parturientium. per quae ostenditur torqueri eos propria conscientia et
facies habere combustas eo igne, quem sibi succenderant, quia non
possunt dicere: signatum est super nos lumen uultus tui, domine. et: nos
omnes reuelata facie gloriam domini contemplantes, in eamdem imaginem
transformamur. unusquisque stupebit ad proximum suum, uidens eum in
eisdem esse tormentis, quibus ipse cruciatur.
ecce dies domini uenit crudelis, et indignationis plenus et irae
furoris que ad ponendam terram in solitudinem, et peccatores eius
conterendos de ea. pro terra septuaginta t�n~g oikoumen�n~g, id est
orbem, interpretati sunt; pro crudeli, insanabilem. cum enim dies uel
iudicii uel mortis aduenerit, implebitur illud quod in sexto psalmo
legitur: in inferno autem quis confitebitur tibi? non est enim tempus
illud paenitentiae sed poenarum. et in alio loco dicitur: quam magna
multitudo dulcedinis tuae, domine, quam abscondisti timentibus te! ergo
absconditur multa dei misericordia ab his qui adhuc in timore sunt
positi et perfectam dei non habent caritatem, ut dum crudelem audiunt
diem domini, et insanabilem, et indignationis furoris que plenum,
peccare desistant. ponetur quoque orbis uel terra in solitudinem, et
peccatores conterentur de ea, quae prius peccatorum onere grauabatur, ut
deletis perditis que sceleribus, habitet et regnet in terra sola
iustitia.
quoniam stellae caeli, et splendor earum non expandent lumen
suum. obtenebratus est sol in ortu suo et luna non splendebit in lumine
suo. lxx: stellae enim caeli et orion (signum_obeli) et omnis ornatus
caeli (signum_metobeli) lumen suum non dabunt. et obtenebrabuntur sole
oriente, et luna non dabit lumen suum. pro eo quod nos interpretati
sumus splendor earum, haud dubium quin stellarum aquila et theodotio
ipsum uerbum posuerunt hebraicum chileem; pro quo lxx orionem
transtulerunt, addentes de suo et omnis ornatus caeli, quod obelo
praenotandum est. orionem autem gentilium fabulae dicunt uiginti duas
habere stellas, e quibus quattuor tertiae magnitudinis sunt, nouem
quartae, rursum aliae nouem quintae, et ab aliis appellantur bootes.
legimus quoque in iob hyadas et uesperum, et arcturum et thesauros, siue
interiora austri, de quibus in suo loco dicendum est. nec putare
debemus apud hebraeos has stellas his appellari nominibus, quae graecus
sermo resonat et latinus. sed propria habere uocabula. sicut enim deus
uocauit lucem, diem; et firmamentum, caelum; et aridam, terram; et
congregationes aquarum, maria; sic et singulas stellas suis appellauit
nominibus, quarum proprietatem nostra lingua non exprimit. scriptum est
de deo in alio loco: qui numerat multitudinem stellarum; et omnibus eis
nomina uocat. quando igitur dies domini uenerit ad ponendum orbem
terrarum in solitudinem, et peccatores de ea penitus auferendos. tunc ad
comparationem diuinae maiestatis, stellae caeli et omnis splendor earum
retrahent lumen suum. nec mirum est hoc de minoribus stellis dicere,
cum etiam sol obtenebrescat in ortu suo, et luna splendorem solitum non
habeat. illud autem quod lxx transtulerunt, quod stellae et orion et
omnis ornatus caeli obtenebrentur sole oriente, non habet quid signi
siue miraculi; hoc enim omni fit tempore, ut orto sole, stellae quae in
caelo sunt non appareant. nec mirum hoc dixisse de sole, cum etiam plena
luna et tota nocte fulgente, pleraque astra non luceant.
esse autem etiam per diem stellas in caelo, probat solis deliquium; quod
quando umbra terrae, ut philosophi disputant, et obiecto orbe lunae
fuerit obscuratus, clariora in caelo astra uideantur.
et uisitabo super orbis mala, et contra impios iniquitates eorum.
quando uisitat et percutit deus? ad hoc percutit ut emendet. denique
quando uehementer irascitur super eos qui non agunt paenitentiam. non
uisitabo, inquit, super filias uestras, cum fuerint fornicatae; et super
nurus uestras, cum adulterauerint. e contrario de his qui in christo
credituri sunt, dicitur: uisitabo in uirga iniquitates eorum et in
flagellis peccata eorum; misericordiam autem meam non auferam ab eis. et
requiescere faciam superbiam infidelium; et arrogantiam fortium
humiliabo. lxx: et perdam iniuriam iniquorum, et iniuriam superborum
humiliabo. uerbum hebraicum gaon, quod perspicue arrogantiam et
superbiam sonat, theodotio et septuaginta semper iniuriam transtulerunt,
sensum magis quam uerbum exprimentes, quia omnis superbus promptus est
ad iniuriam. ergo propterea dominus uisitat super orbis mala et contra
impios iniquitates eorum, ut comprimat arrogantiam superborum et
superbiam fortium humiliet. deus enim superbis resistit, humilibus autem
dat gratiam. et in prouerbiis legimus: ante contritionem eleuatur cor
uiri et ante gloriam humiliatur. semper superbiam ruina sequitur, et
humilitatem gloria: qui enim se exaltat, humiliabitur; et qui se
humiliat, exaltabitur. legimus in alio loco: perdam sapientiam
sapientium et intellegentiam prudentium reprobabo. non quod uera
sapientia et uera prudentia perdantur a domino, sed falsi nominis
scientia. qui sibi thesaurizant linguam mendacii et deficiunt scrutantes
scrutinio, et inueniunt nihil, loquentes iniquitatem in excelsum et
ponentes in caelum os suum. unde proprie haereticorum superbia,
ueritatis iniuria nominatur.
pretiosior erit uir auro; et homo mundo obrizo. lxx: et erunt qui
derelicti fuerint, honorati magis quam aurum excoctum; et homo
honorabilior erit lapide sophir. in consummatione mundi, quando orbis
redactus fuerit in solitudinem et obtenebratus sol in ortu suo et luna
splendorem suum non dederit, tanta fient ab antichristo signa atque
portenta, ut iniquitate crescente, refrigescat caritas multorum, ad
decipiendos etiam si fieri potest electos dei. tunc pretiosior erit uir
auro, quod hebraice dicitur ofaz, et aquila interpretatus est kirron~g,
quod coloris optimi atque sanguinei est; et homo mundissimo obrizo, quod
hebraice dicitur ophir, et aquila transtulit sp�l�ma~g opheir~g, quod
nescio quid uolentes lxx interpretati sunt: lapidem de sophir. est autem
indiae locus, in quo aurum optimum nascitur; sicut in genesi legimus de
fluuio phison: iste est qui circumit omnem terram euilat, ubi est
aurum; et aurum terrae illius optimum; et ibi est carbunculus et lapis
prasinus. pretiosior autem intellegitur, pro eo quod est rarior. omne
enim, quod rarum est, pretiosum est, sicut et in samuelis uolumine
legimus: et sermo domini pretiosus erat in israel.
super hoc caelum concutiam, et mouebitur terra de loco suo. lxx:
caelum enim furiet, et terra mouebitur a fundamentis suis. cum
pretiosior fuerit uir auro, et homo mundo obrizo, et impletum quod
scriptum est: putas cum uenerit filius hominis, inueniet fidem super
terram? tunc et caeli mouebuntur et terra. caelum enim et terra
pertransibunt, non sua uoluntate et proprio arbitrio, ut plerique
aestimant, animantia ea esse credentes; sed propter indignationem domini
exercituum et propter diem furoris eius, qui respicit terram et facit
eam tremere. unde hoc quod in lxx dicitur: caelum enim furiet,
met�numik�s~g accipiendum pro his, qui uersantur in caelo, quomodo si
dicamus, omnis ciuitas conclamauit et obuiam iudici urbs uniuersa
processit.
fundamenta uero terrae et in prouerbiis legimus: deus sapientia fundauit
terram. et ad iob loquitur dominus: ubi eras quando fundabam terram?
non quod terra habeat fundamenta profunda mole deiecta; sed uoluntas et
potestas dei, qua omnia continentur, fundamenta illius appellanda sunt.
ipse enim super maria fundauit eam et super flumina collocauit eam, et
ipse appendit eam super nihili.
et erit quasi damula fugiens, et quasi grex ouium, et non erit
qui congreget; unusquisque ad populum suum conuertentur, et singuli ad
terram suam fugient. omnis, qui inuentus fuerit, occidetur, et omnis qui
superuenerit, cadet in gladio. infantes eorum allidentur in oculis
eorum; diripientur domus eorum et uxores eorum uiolabuntur. caelo terra
que commotis, fugiet diabolus coluber tortuosus, uel omne dogma
contrarium ueritati, quod in magistros ac discipulos scinditur, quorum
priores propter oxudorkeian~g, graeco sermone dorcades, id est capreae
nuncupantur, sequentes quasi bruta animalia; et huc atque illuc errantia
non habent qui eos dirigant; perdiderunt enim eum, de quo scriptum est:
a domino gressus hominis diriguntur; qui liberati a magistris pessimis
conuertentur ad populum suum et singuli ad terram suam fugient, de qua
orti sunt; qui uero inuentus fuerit, occidetur, siue iugulabitur. hoc
autem non solum in consummatione mundi, sed usque hodie fit in ecclesia.
quando magistris superatis, grex deceptus reuertitur ad populum, et ad
terram suam; et in eo quod inuenitur, occiditur, ut haereticus esse
desistat, et quicumque superuenerit, cadet in gladio spiritali.
tunc infantes eorum et paruulos, qui nondum ad perfectam uenerunt
erroris aetatem, allident in oculis magistrorum, diripient que eorum
domos, et uxores eorum uiolabunt praua sapientia et doctrina peruersa.
unde pro huiusmodi patribus quorum interficiendi sunt paruuli, debemus
orare et dicere: da eis, domine. quid dabis eis? uuluam sterilem et
ubera arentia. parturierunt enim iniquitatem, conceperunt dolorem et
genuerunt iniustitiam.
ecce ego suscitabo super eos medos, qui argentum non quaerant,
nec aurum uelint. sed sagittis paruulos interficiant et lactentibus
uteri non misereantur, et super filios non parcet oculus eorum.
inuenimus in genesi quod madai auctor gentis medorum fuerit, qui
interpretatur mensura, siue a potente uel forti. igitur contra
babylonios, qui mente confusi sunt, suscitantur a potente et forti deo
ministri ad puniendum fortitudinis, ut reddant unicuique secundum opera
sua. in qua enim mensura mensi sunt, remetietur eis. mensuram agitatam
atque concussam et plenam et supereffundentem restituent in sinus eorum.
qui nec argentum nec aurum, id est nec eloquii pulchritudinem nec
acumen ingenii, in quibus sibi ante plaudebant, recipient. sed poenis
afficient traditos sibi paruulos ac lactentibus uteri non miserebuntur,
ut magis misereantur. atque utinam et nos suscitemur a domino et haec
nobis detur potestas, ut nec argentum nec aurum uelimus eloquentiae et
sapientiae saecularis. sed filios haereticorum, et omnium qui decepti
sunt, interficiamus sagittis spiritalibus, id est testimoniis
scripturarum; et qui lacte nutriuntur erroris, absque ulla misericordia
trucidentur, ut clementi crudelitate pereant, nullius que misereamur
infantiae, et illa beatitudine digni simus: beatus qui tenebit et
allidet paruulos suos ad petram!
et erit babylon illa gloriosa in regnis, incluta in superbia
chaldaeorum, sicut subuertit deus sodomam et gomorram. non habitabitur
usque in finem, et non fundabitur usque ad generationem et generationem;
nec ponet ibi tentoria arabs, nec pastores requiescent ibi. sed
requiescent ibi bestiae, et replebuntur domus eorum draconibus. et
habitabunt ibi struthiones, et pilosi saltabunt ibi; et respondebunt ibi
ululae in aedibus eius; et sirenae in delubris uoluptatis. prope est ut
ueniat tempus eius, et dies eius non elongabuntur. lxx: et erit
babylon, quae uocatur incluta gloriosa regis chaldaeorum, sicut
subuertit deus sodomam et gomorram. non habitabitur in aeternum, nec
ingredietur eam per multas generationes; nec transibunt per illam
arabes, neque pastores requiescent in ea. sed requiescent ibi bestiae,
et replebuntur domus sonitu, et accubabunt ibi sirenae et daemonia
saltabunt ibi, et onocentauri ibi habitabunt, et cubicula facient
haericii in domibus eorum. cito ueniet et non tardabit. quod sequitur:
(signum_asterisci) et dies eius non protrahentur, (signum_metobeli)
asteriscis notandum est, quia de theodotione addita sunt. medis aduersus
confusionis urbem suscitatis, qui nec aurum in bonis reputant nec
argentum; qui sagittis interficiunt paruulos et lactentibus uteri non
miserentur, et super filios non parcit oculus eorum. urbs quondam
incluta quae erat in superbia chaldaeorum, qui interpretantur: quasi
daemonia, sic subuertetur, quomodo subuersa est sodoma et gomorra, ut
nullum in ea maneat pristinae mansionis uestigium. sed postquam fuerit
caelum nouum et terra noua, et praeterierit figura huius mundi, non
habitabitur urbs confusionis in perpetuum; et nequaquam eumdem statum
recipiet. non enim ponet ibi, postquam in pristina gloria esse desierit,
arabs tentoria sua, qui interpretatur occidentalis uel uespertinus; ut
in ea cupiat habitare, quam uiderit esse desertam. arabs autem in
praesenti loco in bonam partem accipitur, quod semper tendat ad finem,
et oblitus praeteritorum, extendat se in priora. nec pastores
requiescent ibi, qui mansuetissimum domini gregem in hierusalem solent
pascere; sed e contrario requiescent ibi bestiae, quas detestatur
psalmista, dicens: ne tradas bestiis animam confitentem tibi.
pro quibus aquila et symmachus et theodotio ipsum uerbum hebraicum
posuerunt siim. et implebuntur domus eorum, hoc est babyloniorum, iuxta
lxx et theodotionem �chou~g, id est sonitu et clamoribus; iuxta aquilam,
typhonibus, quos nos in dracones uertimus; iuxta symmachum oiim, quod
uerbum in hebraico continetur. et habitabunt ibi struthiones, animal
semper solitudines appetens, de quo in iob plenius scribitur, qui cum
pennas habere uideatur, tamen de terra altius non eleuatur, pro quo lxx
seir�nas~g, id est sirenas, interpretati sunt. pilosos autem qui
dicuntur hebraice sirim, theodotio erectis et stantibus pilis
interpretatus est. symmachus et lxx daemonas transtulerunt. pro
onocentauris quoque, quos soli lxx interpretati sunt, imitantes
gentilium fabulas, qui dicunt fuisse hippocentauros, tres reliqui
interpretes ipsum posuere uerbum hebraicum iim quod nos in ululas
uertimus. ubi autem lxx dixerunt: cubilia facient hericii in domibus
eorum, et in hebraico positum est thannim, aquila et symmachus et
theodotio sirenas interpretati sunt, significantes uel bestias aliquas
esse, uel daemonas, iuxta errorem gentilium dulce cantantes et
decipientes homines, qui huius saeculi naufragium clausis auribus
transire non possunt. porro onocentauri nomen, ex asinis centauris que
compositum, uidetur mihi significare eos, qui ex parte aliquid humanum
sapiunt; et rursum uoluptatibus et caeno turpitudinis abducuntur ad
uitia. dicitur ergo secundum tropologiam, quod in fine mundi, uel mortis
uniuscuiusque, omnis gloria et superbia chaldaeorum et confusio mundi
recedat a nobis; et ita omnia subuertantur, sicut subuertit deus sodomam
et gomorram; nec ultra mundi istius futurus sit status, sed pereat in
aeternum. nec ponat ibi arabs tentoria sua, de quo in sexagesimo septimo
psalmo dicitur: iter facite ei qui ascendit super occasum, dominus
nomen eius. nec pastores ibi requiescant, angeli uidelicet qui humano
praesunt generi et cotidie uident faciem patris; sed requiescant ibi
bestiae et dracones, et struthiones et pilosi, et ululae et sirenae,
quas omnes bestias in figura intellegimus angelorum, uel daemonum, et
eorum quibus tradimur ad puniendum. et in domibus quondam uoluptatis,
ubi erat laetitia et gaudium, sit planctus ulularum et lamentabilis uox
sirenarum, quae auditores suos ducit ad mortem. tempus autem imminere
iudicii, et diem consummationis babyloniae non elongari, nequaquam
mirabitur, qui cotidie per sanctos uiros in his qui credunt in domino,
subuerti uiderit babylonem; et aeternitati comparatam, omnem
longitudinem esse uicinam. de generibus bestiarum, immo monstrorum,
breuiter diximus, quia in priori libro iuxta historiam ex parte
perstricta sunt. hoc quoque considerandum, quod postquam ecclesiasticus
sermo et doctrina saluatoris urbem confusionis euerterit, ita ut sodomae
et gomorrae comparetur; non habitetur a sanctis uiris, nec pastores
requiescant in ea, qui christi gregem pascere consueuerant; sed e
contrario requiescant ibi bestiae et dracones, et struthiones et pilosi
saltent in ea. quidquid enim haeretici loquuntur in synagogis satanae,
non est doctrina domini, sed ululatus daemonum et pilosorum, quos
imitabatur esau. et sirenae requiescent in delubris uoluptatis, quae
dulci et mortifero carmine animas pertrahunt in profundum, ut saeuiente
naufragio, a lupis et canibus deuorentur. prope est ergo et instat
cotidie tempus ruinae haereticorum, et non differtur eorum subuersio.
14. miserebitur enim dominus iacob et eliget adhuc de israel, et
requiescere eos faciet super humum suam. adiungetur aduena ad eos, et
adhaerebit domui iacob. et tenebunt eos populi et adducent eos ad locum
suum; et possidebit eos domus israel super terram domini in seruos et in
ancillas; et erunt capientes eos qui se ceperant, et subicient
exactores suos. et erit in die illa cum requiem dederit tibi deus a
labore tuo, et a concussione tua et a seruitute dura, qua ante seruisti;
sumes parabolam istam contra regem babylonis, et dices. pro aduena, id
est proselyto, lxx g��ran~g interpretati sunt, qui hebraice ger dicitur.
unde puto et moysi filium, qui aduena erat in terra, nominatum a patre
gersam. ergo georas est uerbum hebraicum, graeca consuetudine
declinatum. licet quidam hebraei sermonis ignarus, graecam in eo
etymologiam exprimere conetur, ab eo quod terrenae rei curam habeat:
g�~g enim, inquit, terra appellatur, et �ra~g, phrontis~g, id est
sollicitudo. rursum pro masal quam aquila et symmachus et theodotio
parabolam transtulerunt, quos et nos secuti sumus, lxx planctum
interpretati sunt. est autem ordo: postquam babylon deserta fuerit in
aeternum, ita ut habitatio bestiarum sit, miserebitur dominus iacob,
eius uidelicet qui uitia supplantauit; et eliget israel, eum qui mente
conspicit deum. et nota uerborum proprietatem: iacob, qui adhuc in lucta
positus est, miserebitur. israeli uero, qui post uictoriam nomen
accepit, non misericordia, sed electio coaptatur.
requiescere quoque eos faciet super terram suam, de qua saluator
loquitur: beati mites, quoniam ipsi possidebunt terram. et: credo uidere
bona domini in terra uiuentium. adiungentur quoque domui iacob, qui
electi sunt per apostolos, gentium multitudo; et tenebunt reliquias
domus israel, et adducent eos in locum suum, ut habitent in tabernaculis
eorum; et possidebit eos domus israel super terram domini in seruos et
ancillas. prodest quippe malis, ut bonis seruiant. unde et esau dicitur:
seruies fratri tuo. et ad iacob: seruiet tibi frater tuus. et accipient
eos qui se sophismatibus ante deceperant; et exactores suos, qui omnia
lucri causa faciunt, redigent in seruitutem. postquam autem requieuerit
iacob et israel a labore suo, quo multum contra saeculum et haereticos
pugnando laborauerat, et a concussione et seruitute sua, qua malignae
interpretationi et falsis dogmatibus ante seruierat; tunc sumet planctum
atque parabolam contra regem babylonis, sermonem uidelicet haeretici
erroris et confusionis; et dicet quae sequuntur. locum istum iudaei
interpretantur carnaliter, quod postquam reuersi sunt de babylone,
factum esse docere non poterunt. neque enim babylonii seruierunt eis,
qui eos prius ceperant; nec uictis babyloniis, domus eorum possederunt,
neque habuerunt eos in seruos et ancillas. restat igitur ut iuxta
fabulas suas de imperio hoc putent futurum esse romano, quibus superatis
in ultimo tempore, seruiturae sint eis gentes, quibus ante seruierint.
quod si sequentes litteram, spe se falsa decipiunt, quis eis concedet,
ut roma uocetur babylon, et nabuchodonosor rex romani imperii? quomodo
cessauit exactor, quieuit tributum? contriuit dominus baculum impiorum;
uirgam dominantium, caedentem populos in indignatione, plaga insanabili,
subicientem in furore gentes, persequentem crudeliter. in petri
epistola legimus: tempus est, ut incipiat iudicium a domo dei. et in
hiezechiel tortoribus dicitur: a sanctis meis incipite. pro diuersitate
quippe peccati, iudicii ordo disponitur, ut qui minus deliquerint, ante
purgentur. nouissimus autem inimicus destruatur mors. cum ergo israel de
seruitute dura fuerit liberatus, sumet parabolam contra regem
babylonis, quam debemus intellegere ut parabolam. si enim contra
nabuchodonosor sermo est, et simplex historiae expositio, quomodo
parabola dicitur, quae nulli alteri paraballetai~g, id est comparatur.
miratur ergo israel quomodo cessauerit exactor, qui exigere consueuerat
usque ad nouissimum quadrantem. exigere autem consuetus non alios nisi
debitores, qui dicunt in oratione dominica: dimitte nobis debita nostra
sicut et nos dimittimus debitoribus nostris. huic exactori debitores
traduntur a iudice, qui eos mittit in carcerem et exigit usque ad
peccatum minimum. denique et paulus apostolus corinthium fornicantem,
qui uxorem patris acceperat, necnon phygellum et hermogenem tradidit
exactori. et de his exactoribus etiam supra dicitur: populus meus
exactores uestri depraedantur uos; et qui repetunt, dominantur uestri.
pro tributo, aquila famem interpretatus est. sublato enim a nobis
sponso, famem patimur uerbi dei et iugiter a corpore domini ieiunamus.
idcirco que uirga et baculus impiorum, pro quo septuaginta iugum
interpretati sunt, percutit nos, siue opprimit; quia noluimus sustinere
iugum leuissimum, iugum saluatoris. hoc autem baculo et hac uirga
insanabili gentes furore caedebat, et fugientes persequebatur
crudeliter; non emendare uolens traditos, sed occidere.
conquieuit et siluit omnis terra, gauisa est, et exsultauit;
abietes quoque laetatae sunt super te, et cedri libani.
ex quo dormisti, non ascendet qui succidat nos. infernus subter
conturbatus est; in occursum aduentus tui suscitauit tibi gigantes.
omnes principes terrae surrexerunt de soliis suis; omnes principes
nationum, uniuersi respondebunt et dicent tibi: et tu uulneratus es
sicut nos, nostri similis effectus es? detracta est ad inferos superbia
tua, concidit cadauer tuum; subter te sternetur tinea, putredo et
operimentum tuum erunt uermes. ad interitum regis impii, qui percutiebat
plaga insanabili nationes et persequebatur eas crudeliter, omnis terra
conquieuit et siluit, quae prius turbarum et seditionis plena erat, in
tantum ut abietes et cedri libani laetarentur, de quibus in psalmis
scriptum est: uineam de aegypto transtulisti, eiecisti gentes, et
plantasti eam. operuit montes umbra eius, et arbusta eius cedros dei.
has cedros dei, quia aliquando peccauerunt, tradidit dominus suppliciis
conterendas. unde in alio psalmo dicitur: conteret dominus cedros
libani. abietes autem excelsi quique, et in domini seruitute sublimes
debent accipi, quae consona uoce dixerunt: ex quo tu dormisti. nota quod
et mortis mors appelletur dormitio. non ascendet qui succidat nos.
uicto enim forti et direptis uasis eius, etiam ceteri satellites
corruerunt. unde et dominus loquitur in euangelio: ite in ignem
aeternum, qui praeparatus est diabolo, et angelis eius. quantos isti
lignorum arborum que caesores suis securibus succiderunt et fecere
corruere? infernus quoque conturbatus, siue uersus in amaritudinem, in
occursum aduentus ueri nabuchodonosor, locus suppliciorum atque
cruciatuum est, in quo uidetur diues purpuratus. ad quem descendit et
dominus, ut uinctos de carcere dimitteret. possumus infernum occurrentem
dicere et eum angelum qui inferis poenis praepositus est, qui
suscitauit omnes gigantes, pro quo alii raphaim, alii titanas
transtulerunt. gigantes autem uocantur iuxta ethnicorum consuetudinem,
qui eos terrigenas aestimant, quos terra genuerit. nos autem gigantes,
iuxta graeci sermonis etymologiam, eos appellare possumus, qui terrenis
operibus seruierunt. denique sequitur: omnes principes terrae
surrexerunt de soliis suis, in aduentu quondam principis sui, ut quem
prius honorabant pro potentia, postea mirarentur in poenis, et dicerent:
et tu uulneratus es sicut et nos; nostri similis effectus es. quae
uerba hunc sensum habent: putabamus nos pro imbecillitate nostra non
potuisse resistere potentiae dei, et te esse solum, qui in tua
altitudine permaneres; sed ut rebus ostenditur, et tu uulneratus et
captus es, nostri que similis effectus; ut quos in terra dignitas
separauit, apud inferos poena consociet. detracta est ad inferos
superbia, uel gloria tua, et concidit cadauer tuum, siue ut lxx
transtulerunt: multa laetitia tua, qua prius subiectis tibi gentibus
laetabaris. subter te sternetur putredo et operimentum tuum erunt
uermes. haec requies diaboli, iste lectus temptatoris, qui in tantam
erectus est superbiam, ut etiam dominum auderet temptare dicens: haec
omnia tibi dabo, si procidens adoraueris me. putredo et tinea et
operimentum uermium, uel poenae intelleguntur aeternae, quas propria
gignit conscientia, uel suppliciorum materia, quae ex propriis peccatis
nascitur. sicut enim quamdiu cadaueris materia est, et aliquis humor in
cadauere, uermes nascuntur ex putredine; sic ex ipsa materia peccatorum
supplicia gignuntur. unde et apostolus paulus interfecta morte (ad quam
per osee sermo propheticus loquebatur: ero mors tua, o mors; ero morsus
tuus, inferne) loquitur ad eam: ubi est mors contentio tua? ubi est mors
stimulus tuus? illa enim mortua, non est qui succidat nos, nequaquam
enim erit peccatum quod succidendum sit, quia stimulus mortis peccatum
sit.
quomodo cecidisti de caelo, lucifer, qui mane oriebaris?
corruisti in terram, qui uulnerabas gentes? lxx: quomodo cecidit de
caelo lucifer, qui mane oriebatur?
contritus est in terram qui mittebat ad omnes gentes. pro lucifero qui
hebraice dicitur elil, aquila transtulit: ululantem aurorae filium. uere
enim ululare debuit et eiulare, qui propter superbiam suam de caelo in
terram praecipitatus est atque contritus. unde et saluator ad discipulos
loquitur: uidebam satanam quasi fulgur de caelo cadentem. non modo
uideo, sed prius uidebam quando corruit. et si ille propter superbiam de
tanta magnitudine cecidit, uos quoque non debetis gloriari, quia uobis
daemonia subiecta sunt. sed quia nomina uestra scripta sunt in caelo, ut
unde ille cecidit per superbiam, uos ascendatis per humilitatem. iste
est princeps saeculi, qui inter stellas ceteras mane oriebatur, et suo
uitio de lucifero uesper effectus est, et non oriens, sed occidens; qui
uulnerabat gentes, siue qui mittebat ad gentes satellites suos, ut omnes
sua fraude deciperet. isti sunt falsi apostoli, operarii mendaces, qui
transfigurantur in apostolos christi, qui bono semini lolium
superseminant, dormientibus ecclesiarum magistris, et nolentibus aut
nequeuntibus eorum malitiae resistere. iacob autem et israel cuius
misertus est, et quem elegit dominus, haec adhuc loquitur ad diabolum,
siue ut lxx uolunt, de diabolo, id est, non ad secundam personam, sed ad
tertiam
qui dicebas in corde tuo: in caelum ascendam, super sidera dei
exaltabo solium meum; sedebo in monte testamenti in lateribus aquilonis.
ascendam super altitudinem nubium, ero similis altissimo. uel antequam
de caelo corrueret, ista dicebat, uel postea quam de caelo corruit. si
adhuc in caelo positus, quomodo dicit: ascendam in caelum? sed quia
legimus: caelum caeli domino, cum esset in caelo, id est in firmamento,
in caelum ubi solium domini est cupiebat ascendere, non humilitate, sed
superbia. sin autem postquam de caelo corruit, loquitur ista uerba,
arrogantiam debemus intellegere, quod nec praecipitatus quiescat, sed
adhuc sibi grandia repromittat, non ut inter astra, sed super astra dei
sit. cum que dominus loquatur ad apostolos: sufficit discipulo, ut sit
quasi magister et seruo sicut dominus suus. et dicat ad patrem: pater
sancte, da, ut sicut ego et tu unum sumus, ita et isti in nobis unum
sint, iste in tantum sibi arrogat, ut super stellas caeli, quae non
corruerunt, solium suum positurum esse se iactet. quod que infert:
sedebo in monte testamenti in lateribus aquilonis, pro quo lxx
transtulerunt: in monte sublimi, super montes excelsos, qui sunt ad
aquilonem, ad illud referamus, quod in hieremia dicitur: ab aquilone
exardescent mala super omnes habitatores terrae, et quod olla succensa a
facie aquilonis accenditur. iste est aquilo uentus durissimus, a quo
suos uult dominus liberare captiuos, et reducere in ciuitatem sanctam
dicens: dicam aquiloni: adduc; et africo: noli prohibere, adduc filios
meos de terra longinqua. illud autem quod huic potest esse contrarium:
montes sion, latera aquilonis, ciuitas regis magni, facile soluitur. hi
enim qui quondam erant in lateribus aquilonis durissimi, postea per
paenitentiam in ciuitate dei esse coeperunt. semper istiusmodi lucifer
quaerit ascendere super eos qui habent imaginem caelestis, et qui
fulgent in ecclesia sicut astra dei; et sedere in monte pacti siue
testamenti, id est in ecclesia, quae in sublimibus collocata est, et de
lateribus quondam aquilonis habitatores possidet. qui in tantum oblitus
sui est, ut uelit super nubes ascendere, quibus mandauit dominus, ne
pluant super israel imbrem, et ad quas peruenit ueritas domini, cui
loquitur et abdias: si exaltatus fueris ut aquila, et inter sidera caeli
posueris nidum tuum, inde te detraham, dicit dominus. infelix iudas,
qui quasi nubes cum aliis apostolis mittebatur, ut plueret super israel
imbrem, et quasi stella inter ceteras stellas erat, quibus dominus
loquebatur: luceat lumen uestrum coram hominibus; uitio suo ascensorem
suscepit diabolum, qui ut superbiae uerba compleret, etiam hoc ausus est
dicere: ero similis altissimo, ut quomodo christus habet prophetas et
apostolos suos, sic et ego habeam pseudoprophetas et pseudoapostolos.
haec autem omnia referenda sunt ad haereticos, qui cum deorsum sint, cum
principe suo excelsos esse se iactant.
uerumtamen ad infernum detraheris in profundum laci. lxx: nunc
autem in infernum descendes et ad fundamenta terrae. non ad infernum
sponte descendes, hoc enim domini saluatoris est, ut uinctos de inferis
liberet; sed ad infernum detraheris inuitus, ut qui per uirtutes poteras
ad excelsa conscendere, per uitia detraheris ad poenas. sancti pennas
habent aquilae, et pennas columbae et possunt dicere: uolabo, et
requiescam.
impii autem et aegyptiorum similes, demersi sunt quasi plumbum in aquis
uehementissimis et demersi sunt in profundum sicut lapis. unde et
iniquitas, siue ut melius habetur in hebraeo, impietas super talentum
plumbi sedere conspicitur. ergo illud quod alibi legimus: omnis qui se
exaltat, humiliabitur, etiam rex confusionis passus est, ut detraheretur
in fundamenta terrae, siue ut uerius in hebraico habetur: in profundum
laci. de fundamentis terrae in deuteronomio scribitur: ignis succensus
est in furore meo, ardebit usque ad infernum nouissimum. deuorabit
terram et fundamenta eius, eos uidelicet qui terreni sunt. de lacu
quoque, quod per eum profunda significentur inferni, illa sunt
testimonia: assimilatus sum cum descendentibus in lacum. et: posuerunt
me in lacu nouissimo. sicut enim lacus aquas ad se descendentes, ita
infernus animas suscipit, ad quem lacum descendit banaias tempore niuis
et frigoris, et interficit in eo leonem. unde et haeretici relinquunt
fontem aquae uiuentis dominum, et fodiunt sibi lacus contritos qui aquam
non ualeant continere. de his lacis, qui feruorem non habent spiritus
sancti, nec hieremiae prophetae similes sunt, qui iuxta septuaginta
interpretes loquebatur: inueni aquam calidam in deserto; sed
refrigescente caritate, calorem sancti spiritus perdiderunt. ille est
lacus, de quo idem hieremias loquitur: sicut refrigerat lacus aquam, sic
refrigerat malitia habentes se. qui utinam, iuxta apocalypsim ioannis,
aut calidi essent, aut frigidi, id est: aut crederent, aut omnino non
crederent, ne per teporem et simulationem fidei a domino reicerentur!
qui te uiderint, ad te inclinabuntur, te que prospicient. numquid
iste est uir qui conturbauit terram? qui concussit regna? qui posuit
orbem desertum, et urbes eius destruxit, et uinctis eius non aperuit
carcerem? siue ut septuaginta transtulerunt: eos qui ducebantur non
soluit? qui uiderint nabuchodonosor regem babylonium, non oculorum, sed
cordis intuitu, de caelo ad inferos corruisse, inclinabuntur humilitate,
quae contraria est superbiae, et illum prospicient ista dicentes: nonne
iste est uir, siue homo, qui conturbauit, uel concitauit terram? et est
sensus: qui dixerat: ero similis altissimo, et se iactabat deum, homo
esse conuincitur, de quo in nono psalmo qui proprie contra diabolum est,
dicitur: exsurge, domine, non confortetur homo. et in euangelio:
inimicus homo superseminauit zizania. unde ad eum, et socios eius dictum
legimus: ego dixi: dii estis, et filii excelsi omnes. uos autem sicut
homines moriemini, et sicut unus de principibus cadetis. et ad eumdem
sub figura principis tyri dicitur: pro eo quod exaltatum est cor tuum,
et dixisti: deus ego sum, habitatione dei habitaui in corde maris; tu
autem es homo, et non deus, et dedisti cor tuum sicut cor dei. iste uir,
et iste homo conturbauit uniuersam terram, eos uidelicet qui audiunt
cum adam: terra es, et in terram ibis. et concussit regna siue reges,
quorum cor in manu domini est. concussit, inquit, non subuertit. unde et
unus de his qui concussi fuerant, et tamen non ruerat, loquebatur: mei
autem paene moti sunt pedes. et apostolus loquitur ad credentes, ut
arripiant armaturam dei, et stent contra insidias diaboli. domus autem
quae supra petram fundata est, nulla tempestate concutitur. sequitur:
qui posuit orbem terrarum desertum, siue ut iuxta hebraicum, praeter
lxx, omnes alii transtulerunt: quasi desertum. uitiis enim atque
peccatis orbem, qui hebraice dicitur thebel, fecit esse desertum, ut
nullam haberet uirtutem, uel eisdem subiaceret uitiis, quibus gentium
plena est solitudo.
urbes quoque eiusdem destruxit orbis, ut de ecclesiis christi faceret
synagogas diaboli et munditiam uerae fidei haeretica sorde pollueret.
sed uinctis eius, id est orbis, non aperuit carcerem. nos omnes uincti
eramus et clausi tenebamur in carcere, quibus uinctis dixit saluator:
exite; et his qui erant in tenebris: reuelamini. dominus enim soluit
compeditos. qui liberati ab eo, gratias referunt dicentes: tu
dissoluisti uincula mea. funibus enim peccatorum suorum unusquisque
constringitur, quos funes atque uincula soluere possunt et apostoli,
imitantes magistrum suum qui eis dixerat: quaecumque solueritis super
terram, erunt soluta et in caelo. soluunt autem eos apostoli sermone
dei, et testimoniis scripturarum, et exhortatione uirtutum.
omnes reges gentium uniuersi dormierunt in gloria, unusquisque in
domo sua. tu autem proiectus es de sepulcro tuo sicut sanies; pollutus,
inuolutus cum interfectis, et confossis gladio, qui descendunt ad
lapides laci. lxx: omnes reges gentium dormierunt in honore, homo in
domo sua. tu autem proicieris in montibus sicut abortiuum, abominabilis
et inuolutus cum interfectis gladio descendentibus ad fundamenta terrae.
reges gentium quibus deus secundum canticum deuteronomii gentes
crediderat gubernandas, qui concussi sunt a nabuchodonosor, et tamen non
subuersi, quorum nequaquam regnat peccatum; sed quia cor eorum in manu
dei erat, minime corruerunt. etenim saluator, quomodo deus deorum
appellatur, sic dominus dominantium et rex regum. isti igitur reges
uniuersi requieuerunt in gloria sua, unusquisque in domo sua. diuersae
quippe apud patrem sunt mansiones, et pro uarietate uirtutum,
habitationum differentiae. porro nabuchodonosor proiectus est de
sepulcro suo, nec in morte a cruciatibus conquieuit. proiectus est autem
quasi sanies, quae hebraice dicitur neser, quam aquila ich�ra~g
interpretatus est, tabem uidelicet et pedorem; quem symmachus ektr�ma~g,
id est abortiuum, lxx mortuum, theodotio germen. quamquam hoc ipsum
uerbum supra, ubi de christo legimus: egredietur uirga de radice iesse,
et flos de radice eius ascendet, lxx florem, theodotio germen, aquila
akremona~g, id est uirgultum, interpretati sunt. proprie autem neser
dicitur uirgultum, quod ad radices arborum nascitur, et ab agricolis
auulsum quasi inutile proicitur, unde et nos stirpem inutilem
transtulimus. igitur nabuchodonosor quasi stirps inutilis incendio
praeparatus, uel sicut sanies pollutus, et inuolutus his qui ab eo
interfecti sunt gladio, et descenderunt usque ad fundamenta laci,
detrahetur in profundum, et nec cum his quidem habebit consortium
sepulturae quos interfecit. alterius enim poenae est auctor delicti, et
alterius qui ab auctore compulsus est. iste est gladius quo uulnerati
sunt plurimi, et interfecti, de qua in septimo psalmo legimus: nisi
conuersi fueritis, gladium suum uibrabit, arcum suum tetendit et parauit
eum. et in ipso parauit uasa mortis; sagittas suas ardentibus effecit.
his uidelicet, qui in suum cor ignita diaboli iacula susceperunt. porro
iuxta lxx cadauer nabuchodonosor cum plurimis interfectis pollutum atque
confossum iacebit in superbiae montibus et deducetur ad inferos.
fundamenta autem laci, pro lapidibus laci, interpretatus est symmachus,
ut aliis uerbis profundum, et tartarum significaret inferni.
quasi cadauer putridum non habebis consortium neque cum eis in
sepultura. tu enim terram tuam disperdidisti, populum tuum interfecisti.
lxx: quomodo uestimentum commixtum sanguine non erit mundum, sic nec tu
eris mundus, quia terram meam perdidisti, et populum meum interfecisti.
quia multum inter se hebraicum distat et lxx editio, separatim de
singulis disseramus.
sicut cadauer putridum, siue ut aquila transtulit: conculcatum, non
habebis consortium sepulturae, nec cum his quidem quos interfecisti. tu
enim magister es, illi fuere discipuli; et cui plus creditum est, plus
exigitur ab eo. tu enim terram tuam disperdidisti, populum tuum
occidisti, eos uidelicet qui tibi crediti sunt gubernandi. unde ad
saluatorem audet dicere: haec omnia mihi tradita sunt, et dabo tibi ea,
si procidens adoraueris me. cadauer autem diaboli putridum, ob
magnitudinem peccatorum dubitare non poterit, qui legerit peccatum esse
fetidissimum, ipso peccatore dicente: computruerunt et corruptae sunt
cicatrices meae a facie insipientiae meae. e contrario uirtus boni
odoris est; unde et spiritalium fratrum dilectio comparatur unguento,
quod descendit super barbam, barbam aaron, et super oram uestimenti
eius. et ad sponsam sponsus loquitur: odor tuus suauis, et facies tua
speciosa. quomodo autem cadauer diaboli spiritaliter conculcetur, illud
apostoli docet nos: deus conteret satanam sub pedibus uestris uelociter.
et domini uerba dicentis: quasi lutum platearum delebo eos. iste quia
terram sibi creditam perdidit, et commissum sibi populum trucidauit,
nequaquam eos uiuos reseruans deo, sed socios suae praeparans
sepulturae; propterea non erit, nec uocabitur in aeternum
semen pessimorum. porro iuxta lxx hunc habet sensum: o lucifer
qui mane oriebaris, qui quando habebas opera uirtutis et luminis,
uestimentum eras dei, et de te dici poterat: amictus lumine sicut
uestimento. quia multos interfecisti gladio, qui descenderunt ad
infernum, et eorum pollutus es sanguine, nequaquam uocaberis uestimentum
dei, sed uestimentum cruore permixtum, non maculatum atque pollutum, ut
aliquid mundi habere uidearis, sed totum sanguine cruentatum. et hoc
notandum quod ad diabolum dicatur; sicut uestimentum commixtum sanguine
non erit mundum, sic et tu non eris mundus. ubi sunt ergo, qui dant
diabolo paenitentiam, et dicunt illum posse mundari? nec statim fatemur
haeresim, quae diuersas asserit esse naturas; et aliam esse quae numquam
recipiat sanitatem. non enim hoc uestimentum per se immundum est, et
ita a deo conditum, quo olim deus uestiebatur; sed quia commixtum est
sanguine, et totum se polluit suo uitio, et malis accedentibus, non erit
mundum. et propterea non erit mundum, quia terram domini perdidit,
populum eius interfecit, terram iudaeae et terram confessionis et
sanctos quoque perdens atque interficiens; et ideo non manebit in
perpetuum. unde et in euangelio dicitur: ite in ignem aeternum, qui
praeparatus est diabolo et angelis eius. quomodo autem sanctus
uestimentum dei est et uestimentum nouum, et uestitur tunica salutis
atque laetitiae, dicens: exsultet anima mea in domino; induit enim me
uestimento salutis et tunica laetitiae circumdedit me. sic e contrario
peccator, qui portat imaginem ueteris hominis atque terreni, meretur
audire: ecce omnes uos quasi uestimentum ueterascemini et tinea
deuorabit uos. qui autem profecerit in scelere et uetustatem noluerit
emundare nouitate, nequaquam ueteri uestimento, sed panno menstruatae
mulieris comparabitur dicens: errauimus, et facti sumus immundi omnes
nos, sicut pannus menstruatae uniuersa iustitia nostra. semen
pessimorum, praeparate filios uestros occisioni iniquitatum patrum
suorum; non consurgent nec hereditabunt terram, neque implebunt faciem
orbis ciuitatum. et consurgam super eos, dicit dominus exercituum; et
perdam babylonis nomen et reliquias, et germen et progeniem, ait dominus
exercituum. lxx: semen pessimum, praepara filios tuos occisioni peccati
patris tui, ut non consurgant et possideant terram et impleant terram
ciuitatem. et insurgam eis, dicit dominus sabaoth; et disperdam nomen
eorum et reliquias et semen. pro semine pessimo, quod lxx transtulerunt,
in hebraico scriptum est zera mrim, quod ceteri semen pessimorum
interpretati sunt. non quod ipsum semen per seipsum malum sit; deus enim
omnia fecit bona. sed ab his, qui sua uoluntate sunt pessimi, semen
ortum sit malum, quod uoluntate fit, non natura. unde et in daniele
legimus: semen chanaan et non iuda. et de bonis filiis dicitur ab
apostolo: in christo iesu per euangelium ego uos genui.
et in euangelio: quotquot eum susceperunt, dedit eis potestatem ut filii
dei fierent. omnis enim qui facit peccatum, de diabolo est. huic igitur
praecipitur semini, ut filios suos, omnes scilicet cogitationes
pessimas et opera mala, praeparet occisioni, quae ex impiis nata sunt
patribus, haud dubium quin contrarias significet fortitudines. qui
pessimi filii ideo trucidantur in iniquitatibus patrum suorum, ne ultra
consurgant et possideant terram, quae a sanctis possidenda est et
implenda, ut ciuitates in ea domini construantur. et quia non est
hominum perfecta uictoria: nisi enim dominus custodierit ciuitatem, in
uanum uigilabunt qui custodiunt eam. ideo dominus ipse consurget
aduersus filios pessimorum, et disperdet de confusione nomen eorum et
reliquias et omne germen et progeniem, ne ultra pullulent in urbibus
domini. legimus in euangelio quod diabolus ab initio mendax sit et pater
eius, id est mendacii, quod multi non intellegentes, patrem diaboli
uolunt esse draconem, qui regnet in mari, quem hebraei appellant
leuiathan. et hoc putant loco conuenire praesenti iuxta lxx interpretes,
qui dixerunt: pro peccatis patris tui; cum perspicue in hebraeo abotham
non patris tui, sed patrum suorum significet.
et ponam eam in possessionem hericii, et in paludes aquarum;
scopabo eam in scopa terens, dicit dominus exercituum. lxx: et ponam
babyloniam desertam, dicit dominus, ita ut habitent in ea hericii, et
erit in nihili. et ponam eam luti uoraginem, in perditionem. cum
perdiderit dominus exercituum nomen babylonis, et reliquias, et germen,
et uniuersam progeniem, non erit eius perditione contentus, nisi dederit
eam possessionem hericii, et paludes aquarum, et scopauerit eam non
leuiter et fortuito. sed terens ut nihil in ea antiquarum sordium
resideat. in actibus apostolorum scribitur, in uase illo linteo, quod
quattuor demissum principiis pendebat e caelo, omnia genera quadrupedum
et reptilium et uolatilium contineri, quod postea apostolus disserens:
deus, inquit, ostendit mihi nullum hominem immundum dicere. mores ergo
hominum in diuersis animantibus monstrabantur, sicut pharisaei et
sadducaei propter nequitiam appellantur genimina uiperarum, et propter
dolos herodes uulpes dicitur. et luxuriosi proni que ad uoluptatem, equi
appellantur, insanientes in feminas. et: nolite fieri sicut equus et
mulus, in quibus non est intellegentia. e contrario innocentes, columbae
uocantur et oues. igitur iuxta doctrinam domini saluatoris, qui curas
istius saeculi et seductionem diuitiarum spinas appellauit, hericius
mihi uidetur qui, iuxta apostolum, gaudet in incerto diuitiarum, et
armatum se non armatura dei, sed spinis atque peccatis huius mundi esse
confidit, cui rectissime dicitur illud euangelicum: stulte, hac nocte
auferetur anima tua a te, quae autem parasti cuius erunt? tales
habitatores habet babylon deserta uirtutibus, ubi non est ager irriguus,
qui afferat fructus diuersorum seminum, sed paludes infertiles, et
limosae ac lutosae, in quibus caeno gaudentia reptant animalia.
quamobrem clementissimus dominus scopauit eam uehementissime terens, et
quasi quodam uerriculo ad purum usque mundauit, ut babylonia semina
pereant et a solis habitentur hericiis. quando uiderimus aliquem
diuitiarum immersum luto, et ut lxx interpretati sunt: barathro, hoc est
profunda uoragine, et quasi caenosa palude circumdari, non dubitemus
eum appellare hericium, habitatorem desertae babylonis.
iurauit dominus exercituum dicens: si non ut putaui ita erit, et
quomodo mente tractaui sic eueniet, ut conteram assyrium in terra mea,
et in montibus meis conculcem eum. et auferetur ab eis iugum eius, et
onus illius ab humero eorum, tolletur. postquam hericius habitauerit in
deserta babylone, et pro agris irriguis ac fertilibus paludes cuncta
operuerint, ita ut nihil pristini seminis et abundantiae in babylone
resideat, iuramentum domini complebitur, et euenit quod mente tractauit,
ut conteratur assyrius in terra eius, et in montibus illius
conculcetur. hostis quippe temerarius non solum terram dei et humiliora
quaeque occupare festinat, sed etiam eos, qui in dei seruitute
uirtutibus profecerunt, ita ut montibus comparentur, et dicatur de eis:
fundamenta eius in montibus sanctis. et nota proprietatem. in terra
conteritur; in montibus dei ab ipso domino conculcatur. cum enim omnes
inimici positi fuerint sub pedibus christi, ita ut nouissima destruatur
mors, tunc auferetur a sanctis grauissimum iugum assyrii, quo eos ante
depresserat, et onus, siue ut lxx transtulerunt kudos~g, id est gloria,
ab humero eorum tolletur, ut sublato iugo assyriorum uideant requiem,
quia bona est, et terram, quia uberrima est, et supponant ceruices suas
iugo christi ad laborandum, et fiant uiri agricolae. unde et issachar,
qui interpretatur: est merces, ex uirtutibus nomen accepit.
et in propheta legimus: est merces his qui seruiunt domino. et in alio
loco: ecce dominus, et merces eius cum eo, qui reddet unicuique secundum
opus suum. quod autem conterantur et conculcentur assyrii, id est
contrariae fortitudines, et illud euangelicum docet: ecce dedi uobis
potestatem calcandi super serpentes et scorpiones, et super omnem
uirtutem inimici. et apostoli uerba testantur: deus conteret satanam sub
pedibus uestris uelociter.
hoc consilium quod cogitauit super omnem terram, et haec manus
extenta super uniuersas gentes. dominus enim exercituum decreuit, et
quis poterit infirmare? et manus eius extenta, et quis auertet eam? pro
omni terra lxx uniuersum orbem interpretati sunt in fine oneris uel
uisionis contra babylonem. quod latebat aperitur, deum cogitasse
consilium super omnem terram, id est orbem terrarum, et non contra
terram tantum chaldaeorum et regem assyrium atque chaldaeum; et extentam
siue eleuatam manum eius super omnes gentes, et non super unam gentem
babyloniam. ex quo ostenditur, cuncta quae dicta sunt non ad unam
prouinciam specialiter, sed contra orbem terrarum generaliter pertinere.
quod que dicitur: quis poterit infirmare, et quis auertet eam? non pro
difficili debemus accipere, sicut illud legitur: quis sapiens et
intelleget haec? et: quis, putas, est fidelis et prudens dispensator? et
cetera his similia; sed pro impossibili. nullus enim poterit domini
infirmare consilium, et manum eius extentam siue sublimem, ne percutiat,
auertere.
in anno quo mortuus est rex achaz, factum est onus istud. ne
laeteris, philisthaea omnis tu, quoniam comminuta est uirga percussoris
tui. de radice enim colubri egredietur regulus, et semen eius absorbens
uolucrem. et pascentur primogeniti pauperum, et pauperes fiducialiter
requiescent, et interire faciam fame radicem tuam, et reliquias tuas
interficiam. lxx: anno quo mortuus est rex achaz factum est uerbum
istud: ne laetemini, alienigenae omnes, contritum est enim iugum eius
qui percutiebat uos. siquidem ex semine serpentis egredientur genimina
aspidum, et ex geniminibus eorum egredientur serpentes pennati; et
pascentur pauperes per eum, et pauperes homines in pace requiescent.
interficiet autem in fame semen tuum et reliquias tuas occidet. mortuo
achaz, qui interpretatur kataschesis~g, id est obtentio siue possessio,
quem regem impiissimum legimus, fit pondus istud super philisthiim, siue
uerbum. uiuente enim illo, et regnante in peccatoribus, nec pondus
contra alienigenas, nec sermo dei fieri poterat ad prophetam. quod
quidem et supra dixisse me memini, quando ozia mortuo, uidit esaias
dominum sedentem super thronum excelsum et eleuatum. et in exodo legimus
quod postquam mortuus est rex aegypti, ingemuerint filii israel ab
operibus suis, et exclamauerint, et ascenderit clamor eorum ab operibus,
et exaudierit dominus gemitus eorum. nisi enim mysticum esset quod
dicebatur, magis illo regnante clamare debuerant, quando luto et
lateribus deseruiebant. praecipitur ergo philisthiim, quos nunc
palaestinos uocant et semper a lxx allophuloi~g, id est alienigenae,
transferuntur. et dicitur eis ne gaudeant neque laetentur, quoniam
contriuerint uirgam, uel iugum percussoris sui. quem enim diligit
dominus corripit, et castigat omnem filium quem recipit.
et quasi filios nos erudit deus, quando uisitat in uirga iniquitates
nostras, et flagellis peccata nostra, ut misericordiam suam non auferat a
nobis. haec est uirga de qua et in psalmo scriptum est: uirga tua et
baculus tuus ipsa me consolata sunt. haec est uirga, et hoc iugum quod
ceruicibus omnium uult saluator imponere, ut deposito iugo
nabuchodonosor, portent iugum christi. quod si quis abiecerit atque
contriuerit, statim de semine siue radice serpentis, qui est coluber
tortuosus, egredientur regulus et aspides et de aspidibus exibunt
serpentes uolantes, siue qui absorbeant uolucres. abiecto autem iugo
dei, et contrita domini disciplina, primum in cogitationibus nostris
semen colubri radicatur, secundo de semine pessimo nascitur regulus, qui
rex serpentium est, et afflatu suo atque conspectu homines occidere
dicitur. siue genimina aspidum, de quibus in psalmo dicitur: uenenum
aspidum sub labiis eorum, quae peccata sunt uaria, et de cogitationum
pessimo thesauro in mala opera prorumpunt. cum que regnauerint in
hominibus alienigenis, qui a deo alieni sunt, statim egrediuntur
serpentes pennati; ut non sufficiat eis cogitasse, et fecisse quae mala
sunt, nisi patrocinium quoque malorum operum quaesierint, et diuersas
finxerint haereses. ego puto serpentes esse pennatos, qui se exaltant et
eleuant contra scientiam dei et ponunt in caelum os suum. uel qui
absorbent uolucres, hoc est, qui uenenato ore singulos quosque uolare
cupientes et ad excelsa consurgere, suis faucibus deuorant. et hoc
interim de malis. ceterum qui non contriuerunt uirgam et iugum
percussoris sui, sed ceruicem suam domino subiecerunt, et sunt pauperes
spiritu, pascentur et dicent: dominus pascit me, et nihil mihi deerit.
et a domino audient: in pascuis uberrimis pascam eos; et ingredientur et
egredientur, et pascua inuenient. et pascentur pauperes per eum, qui
eos percutit, ut emendet; et in pace requiescent, siue, pastore
sollicito, ipsi agent fiducialiter, et cum lazaro requiescent in sinu
abrahae. qui autem contriuerunt iugum et uirgam percussoris sui, famem
perpetuam sustinebunt; ut non alantur sermone dei, sed omnes eorum
reliquiae intereant, ne quid de malo semine germinetur.
ulula porta, clama ciuitas; prostrata est philisthaea omnis. ab
aquilone enim fumus uenit, et non est qui effugiat agmen eius. et quid
respondebitur nuntiis gentis, quia dominus fundauit sion, et in ipso
sperabunt pauperes populi eius? pro nuntiis, id est angelis, quos solus
symmachus transtulit, omnes reges interpretati sunt, uerbi ambiguitate
decepti, quia praeter unam litteram aleph, quae in angelorum uocabulo
addita est, eodem reges et angeli apud hebraeos appellantur nomine, id
est malache. in libro hebraicorum nominum reperi philisthiim
interpretari cadentes poculo. qui ergo inebriati sunt calice babylonis,
et biberint uinum in quo est luxuria; et inter cetera uitia propter
ebrietatem regnum dei iuxta apostolum non fuerint consecuti, his
praecipitur, ut porta eorum ululet, et clamet ciuitas. portam
haereticorum os arbitror, quo blasphemant; ciuitatem animam, quae
malarum cogitationum thesaurus est. haec ululare debet et plangere, quia
omnis prostrata est, in terram que deiecta et nihil in ea sanae
intellegentiae est dei que sapientiae. quare ululat porta? quam ob
causam clamat ciuitas? quia prostrata est omnis philisthaea. cur que
prostrata sit, sequens uersus ostendit: ab aquilone fumus uenit, et non
est qui effugiat agmen eius. fumus iste ardentibus diaboli iaculis
suscitatur, qui noxius est oculis, et contrarius lumini, et ab aquilone
oritur, a quo in hieremia olla succenditur. et a quo exardescunt mala
super omnes habitatores terrae, qui non possunt dicere: accola sum et
peregrinus, sicut omnes patres mei; sed in terra habitant. unde et in
prouerbiis legitur: aquilo uentus durus. nomine autem alio dexter
uocatur, qui cum per se durus sit et sinister, et ceruice durissima
iugum dei nolit recipere, uocatur dexter ab his qui ponunt dulce amarum,
et amarum dulce; qui ponunt tenebras lucem, et lucem tenebras. et
nullus est, qui fumi huius agmen effugiat; nemo enim absque peccato, nec
si unius quidem diei fuerit uita eius.
cum que philisthaea corruerit, et fumus eius uniuersa penetrarit, ita ut
eum nullus possit effugere, quid dicetur angelis, qui singulis praesunt
gentibus, admirantibus et scire cupientibus, cur sola sion et specula
et in sublimibus collocata amaritudinem fumi huius euaserit? quid igitur
dicetur eis? nempe hoc quod sequitur: quia dominus fundauerit eam, et
ipse sit fundamentum eius. fundauerit autem eam super fundamentum
prudentiae, iustitiae, fortitudinis et temperantiae, sub quibus
nominibus christus intellegitur, de quo et apostolus ait: fundamentum
enim aliud nemo potest iacere, praeter eum qui positus est iesum
christum. qui autem fatuus est, et stulta loquitur, et cor eius uana
intellegit, aedificat domum suam super arenam, quae non habet
fundamentum. in hac ergo sion, quae fundata est a domino, sperabunt
pauperes siue mansueti, et humiles populi eius, de quibus dicitur: beati
mites, quoniam ipsi possidebunt terram. et qui audierunt dominum
loquentem: discite a me quia mansuetus sum et humilis corde. qui ante
gloriam humiliati sunt et audierunt dicentem apostolum petrum:
humiliamini sub potenti manu dei, ut uos exaltet in tempore
uisitationis. pauperes autem ipsi sunt, de quibus supra legimus:
pascentur primogeniti pauperum, et pauperes fiducialiter requiescent.
15. onus moab. lxx: uerbum contra moabitidem. symmachus et
theodotio: assumptio moab. quomodo circumcisio et carnalis est et
spiritalis, et de spiritali ab apostolo dicitur: nos enim sumus
circumcisio, qui spiritu deo seruimus et gloriamur in domino, et non in
carne confidimus. et rursum ad distinctionem spiritalis israelis,
dicitur de carnali: uidete israel secundum carnem; et: uos gentes in
carne. sic moab accipiendus est spiritaliter, qui interpretatur de
patre, siue aqua paterna, de incestu et ebrietate conceptus, quod
quodammodo absente, immo nesciente patre, uideretur esse generatus. in
multis scripturarum locis de moab legimus, et maxime in numerorum
uolumine, quando balac rex moabitarum ad maledicendum balaam inuitauit
hariolum, qui inter cetera etiam hoc contra moab mysticum prophetauit:
orietur stella ex iacob, et consurget homo ex israel et percutiet
principes moab.
quia nocte uastata est ar, moab conticuit; quia nocte uastatus
est murus, moab conticuit. lxx: nocte periit moabitis, nocte enim periit
murus moabitidis. pro ar, quod solus theodotio ita posuit, ut legitur
in hebraeo, aquila et symmachus urbem interpretati sunt, non
considerantes, quod inter ain et res elementa hebraica, iod litteram non
haberet, quae si esset, recte ciuitas diceretur. sapientia saecularis
(de qua dominus loquitur per prophetam: perdam sapientiam sapientium et
prudentiam prudentium reprobabo, quia auctorem sui sensum habet, qui ex
dei conditione generatur) uidetur quidem de patre nasci, quod
interpretatur moab; sed quia adulter est, et aduersarius populo dei, de
incestu et spelunca ac nocte generatur. unde et in nocte periit, in
errore scilicet sempiterno. et aegyptii in mari rubro uigilia matutina,
quae nocturnum tempus ostendit, fluctibus obruti sunt. et lot, sodomitis
nocte pereuntibus, uenit in segor, et ortus est ei sol. quod
intellegens beatus apostolus scribit de sanctis atque perfectis: non
sumus noctis neque tenebrarum, sed sumus filii diei. qui enim dormiunt,
nocte dormiunt et qui inebriantur, nocte ebrii sunt. nos autem qui diei
sumus, uigilemus induti lorica fidei et caritatis. et quia noctem
reliquerat, et filius diei esse iam coeperat, loquitur ad credentes: nox
praecessit, dies autem appropinquauit, quasi in die cum honestate
ambulemus, non in comessationibus et ebrietatibus, non in cubilibus et
luxuria. pereunte autem nocte moabitide, etiam murus eius, qui
dialectica arte constructus est, in eadem nocte uastatus est atque
destructus, et aeterna taciturnitate conticuit. porro ar, quod
interpretatur antidikos~g, id est aduersarius, hoc ostendit, quod haec
sapientia, quae aduersaria dei est, ecclesiastico sermone contra se
pugnante, superata sit.
ascendit domus, et dimon ad excelsa in planctum. lxx:
contristamini in uobis, peribit enim dimon, ubi ara est; illuc
ascendetis ad plorandum.
omnis domus aduersae sapientiae, et dibon, quae interpretatur fluxus
eorum, ascendit excelsa, in quibus superbierat, non ut hostias immolet,
sed plangat in quibus ante peccauerat. et reuera mendacium instar
fluminis transit, et praeterfluit, et numquam potest stabili mansione
consistere. sermo autem dei, qui compactus est, stabilis est. unde et
manna, quod uidetur quasi glacies super faciem terrae, non praeterfluit,
sed consistit. porro iuxta lxx moabitae maerere iubentur et plangere,
non super aliis, hoc enim perfectorum est sed super semetipsis, quia et
dibon haereticorum, id est sermo compositus qui fluebat more torrentis,
periturus sit, in quo habebant quasi aram consecrationis suae et omnes
diuitias saeculares. unde et in psalmo dicitur: diuitiae si affluant,
nolite cor apponere. initium autem salutis est, sua intellegere et flere
peccata.
super nabo et super medaba moab ululabit; in cunctis capitibus
eius caluitium, omnis barba radetur. in triuiis eius accincti sunt
sacco; et super tecta eius et in plateis eius omnis ululat; descendet in
fletum. et clamabit esebon et eleale, usque ad iasa audita est uox
eorum. super hoc expediti moab ululabunt; anima eius ululabit sibi. cor
meum ad moab clamabit, uectes eius usque ad segor uitulam conternantem.
per ascensum enim luith flens ascendet, et in uia oronaim clamorem
contritionis leuabunt. aquae enim nemrim desertae erunt, quia aruit
herba, defecit germen, uiror omnis interiit. secundum magnitudinem
operis, et uisitatio eorum, ad torrentem salicum ducent eos quoniam
circumit clamor terminum moab. usque ad gallim ululatus eius, et usque
ad puteum elim clamor eius, quia aquae dimon repletae sunt sanguine.
ponam enim super dimon additamenta his qui fugerint de moab leonem, et
reliquiis terrae. quia omnis prophetiae huius paene unus est sensus, ne
eam per partes proponendo lacerarem, simul uniuersam posui, et quid mihi
secundum anagogen uideatur in singulis, breui sermone percurram. nabo
interpretatur sessio uel prophetia. medaba: de saltu. esebon:
cogitationes. eleale: ascensio. iasa: factum siue mandatum. segor:
parua. luith: genae. oronaim: foramen maeroris. nemrim: pardi siue
praeuaricatores. gallim: uituli uel arenarum tumuli. elim: arietes siue
fortes. dimon: sufficiens maeror.
quia igitur omne dogma contrarium ueritati, quod absque inspiratione dei
de humano sensu in erroris tenebris nascitur, nocte uastatum est et
argumenta illius, quae intelleguntur muri, ecclesiastico sermone
destructa sunt; ita ut aeterno silentio conticuerint, in tantum ut
uniuersa eorum factio, ad paenitentiam et lacrimas uerteretur, super
nabo, id est prophetiam et sessionem, id est magisterium eorum; et super
medaba, ubi non sunt arbores fructuosae, sed saltus infertilis, in quo
habitant bestiae, de quo in uicesimo octauo psalmo scriptum est: et
reuelabit condensa saltus. erit ululatus et planctus et omnia de
capitibus eorum eloquentiae ornamenta tollentur; ita ut nudi maneant et
deformes. et si quid uirilitatis habere uidebantur in barba, rasum a
uiro ecclesiastico, effeminatum et debile comprobetur. in triuiis quoque
eorum, id est diuerticulis errorum, dum pro uoluntate sua fingit
unusquisque quod uoluerit, accingitur sacco paenitentiae, et super tecta
ac domata, in quibus primum se sublimes esse credebant. et in plateis,
quia non ingrediuntur per angustam uiam, quae ducit ad uitam, sed per
latam, quae ducit ad mortem, erit ululatus. et nequaquam ascendent in
superbiam, sed descendent in fletum. tunc intellegent omnes cogitationes
suas uanas, quod interpretatur esebon et cassum ascensum superbiae,
quod eleale sonat, ut uox eorum audiatur usque ad mala opera quae
fecerunt, et mandatum quod putabant dei, propria se confessione
damnantes. propterea uectes, id est qui firmi fuerint in moab et errorem
suum intellexerint, ululabunt, et spem habere profectus incipient, cum
anima eorum ululauerit sibi. unde propheta compatientis affectu loquitur
ad eos, quorum anima ululabat sibi, et dicit: cor meum ad moab
clamabit, ut eos ad paenitentiam prouocem. uectes autem eorum et omnia
firmamenta, quae habere in haeresibus uidebantur, ad segor, hoc est ad
paruulum usque peruenient. et ostendentur non robusti esse, sed
fragiles. haec autem segor, hoc est parua paenitentia si perseuerauerit,
perducet eos ad perfectam salutem, quod uitula trium annorum
significat, iuxta illud quod in genesi legimus, ubi praecipitur abraham,
ut offerat uitulum, arietem et hircum trium annorum, perfectum scilicet
sacrificium, ut haeres domini esse mereatur. cum que egerint
paenitentiam, per luith, id est genarum lacrimas ad altiora conscendent.
et hoc quasi maeroris foramine atque introitu, clamorem contritionis
leuabunt ad dominum, ut possint dicere: sacrificium deo spiritus
contribulatus. cor contritum et humiliatum deus non spernit. et hoc
fiet, quia aquae nemrim, id est doctrina haereticorum, quae pardis et
praeuaricatoribus comparatur, deserta erit et deducetur ad nihili. pardi
sunt, quorum in hieremia uarietates et maculae non mutantur, et
apostatae, de quibus in psalmo legimus: praeuaricatores reputaui omnes
peccatores terrae. omnis quoque herba et germen, et quidquid in sermone
eorum uiride uidebatur, exaruit. et secundum magnitudinem peccatorum a
deo uisitati sunt, ut quem per beneficia non senserant, per flagella
cognoscerent. denique ducentur ad uallem siue torrentem salicum, ut
nullus in eis fructus remaneat. hanc enim seminis harum arborum dicunt
esse naturam, ut qui illud in poculo hauserit, liberis careat. unde et
sancti qui propter peccata in confusione huius mundi esse coeperunt, in
salicibus babyloniorum fluminum suspendunt organa sua. omnes terminos
moabitarum clamor circumit, uel prouocantium ad paenitudinem, uel pro
errore plangentium, ut offerre possint per ululatum suum uitulos
labiorum, et usque ad fontem dominicorum arietum peruenire, siue
fortium, quia elim utrumque significat. aquae autem dimon, quod
interpretatur sufficiens dolor, siue maeror, quae multos sua aspersione
polluerant, arguentur deceptis populis non saluti fuisse, sed sanguini.
unde propheticus sermo promittit, ut super fluentes lacrimas, quod
interpretatur dibon, non unum maerorem, sed plura maeroris additamenta
congeminent, ut postquam plenam egerint paenitentiam, et fugerint de
moab leonem, principem habeant deum, quem lxx dixerunt ariel, qui
interpretatur leo dei. quorum editionem in hoc loco disserere supersedi,
quia et in plurimis ab hebraica ueritate discordat et ex his quae
interpretati sumus, etiam illius sensus potest intellegi.
16. emitte agnum dominatorem terrae, de petra deserti, ad montem
filiae sion. et erit sicut auis fugiens et pulli de nido auolantes: sic
erunt filiae moab in transcensu arnon. ini consilium, coge concilium,
pone quasi noctem umbram tuam in meridie; absconde fugientes, et uagos
ne prodas. habitabunt apud te profugi mei, moab esto latibulum eorum a
facie uastatoris.
finitus est enim puluis; consummatus est miser; defecit qui conculcabat
terram. et praeparabitur in misericordia solium; et sedebit super illud
in ueritate in tabernaculo dauid, iudicans et quaerens iudicium; et
uelociter reddens quod iustum est. hoc quod de hebraeo interpretati
sumus: emitte agnum dominatorem terrae, potest ita legi: emitte agnum
dominatori terrae, quo scilicet non ipse agnus dominator sit terrae, ut
iuxta historiam interpretati sumus, sed dominatori terrae agnus sit
immolandus. iste igitur agnus, qui uel ipse est dominator terrae, uel
immolatur dominatori terrae, de gente moabitarum est, et de his qui
fugerint de moab, et leonem habere meruerint principem. significat autem
ruth, de qua generatus est christus, quam uocat petram deserti, quia
iuxta praeceptum dei moabitae et ammonitae usque ad decimam generationem
et usque in aeternum non ingrediuntur ecclesiam dei. qui autem fugerit
de deserto moab, ut a prophetia reuertamur ad anagogen, et contempto
mendacio, in monte steterit ueritatis, erit quasi auis fugiens. et quasi
pulli de nido auolantes, ne a moabiticis serpentibus deuorentur. sic,
inquit, erunt omnes filiae, hoc est animae moabiticae, in transcensu
arnon, quod interpretatur illuminatio eorum, quando erroribus derelictis
ad scientiam transcenderint ueritatis. dicitur itaque ipsi moab, uel ei
qui euaserit de moab: nihil agas absque consilio; nec circumferaris
omni uento doctrinae, sed sequere eum, qui magni consilii angelus est.
et coge concilium, ut de uagis et errantibus dei ecclesiam facias.
umbraculum autem tuum et tabernaculum, in quo prius requiescere te
putabas, quod erat noctis et tenebrarum, pone in meridie, hoc est in
clarissimo lumine, in quo abscondere debes de errore fugientes, et prius
uagos ultra non prodere. o enim moab, profugi mei qui me dereliquerant,
qui de ecclesia egressi erant, et dimittentes doctrinam spiritus
sancti, suum sensum sequebantur, uel qui habitauerant apud te, cum eos
coeperit uastator diabolus persequi, tu eis ad domini timorem tota mente
conuersa praebeto latebras. et scito, quod post aduentum agni, qui de
petra deserti ortus est dominator uniuersae terrae et uenit ad montem
filiae sion, finita sit omnis potentia diaboli, quae pulueri comparatur.
et consumptus est miser, qui multos fecit miseros; et defecit qui
conculcabat omnem terram, eos uidelicet qui terreni erant. illo autem
consumpto, et redacto ad nihili, et penitus deficiente, praeparabitur
solium et regnum sempiternum. primum in misericordia, omnes enim sub
peccato sumus et indigemus gratia dei; et sedebit in tabernaculo dauid,
quod corruerat et suscitatum est, qui post misericordiam iudicet, et
quaerat iustitiam, et reddat unicuique secundum opera sua. consideremus a
principio uel oneris, uel sermonis moab, in quo dicitur: nocte uastata
est ar moab, et cetera usque ad hunc locum; et uidebimus quomodo per
gradus et ordinem paenitentiae de moabitis israelitae fiant; et fugiant
quasi aues et auolent quasi pulli de nido, ut transcendant per arnon, et
habitent in monte filiae sion. et omni diaboli uel antichristi
potestate contrita, christus regnet in his, et ponat solium suum qui
misericordia iustitia que saluati sunt. non enim pater iudicat quemquam,
sed omne iudicium dedit filio.
audiuimus superbiam moab; superbus est ualde. superbia eius, et
arrogantia eius, et indignatio eius, plus quam fortitudo eius. idcirco
ululabit moab ad moab, uniuersus ululabit. his qui laetantur super murum
cocti lateris, loquimini plagas eius, quoniam suburbana esebon deserta
sunt, uinea sabama. lxx: audiuimus iniuriam moab; contumeliosus est
ualde. superbia eius, et iniuria eius, et furor non sicut diuinatio tua;
non sic ululabit moab. siquidem in moab omnes ululabunt; habitatoribus
autem deseth meditaberis et non confunderis, campi esebon lugebunt uinea
sabama. quantis obscuritatibus locus iste iuxta lxx interpretes
inuolutus sit, ex eo perspicuum est, quod legi uix potest. dicamus ergo
iuxta hebraicum. moris est scripturarum, ut postquam desperationem
mentis humanae, laeto nuntio subleuauerint, rursum neglegentes et
nolentes agere paenitentiam comminatione deterreant, ne bonitas dei
induret cor nostrum. cuius rei unum tantum ponamus exemplum.
in centesimo quadragesimo quarto psalmo legimus: suauis dominus
uniuersis et miserationes eius super omnia opera eius. et post paululum:
sustentat dominus omnes qui corruunt et erigit omnes allisos. oculi
omnium in te sperant, domine, et tu das escam eorum in tempore
opportuno. cum que praemisisset: custodit dominus omnes diligentes se,
ne neglegentem faceret auditorem, intulit: et omnes peccatores
disperdet. quia igitur consummato antichristo et parente eius diabolo,
qui conculcabat uniuersam terram, praeparandum esse uaticinatus est
solium in misericordia, et eum qui sessurus sit in tabernaculo dauid, ex
persona sanctorum, qui de moab saluati sunt, et experimento suo eius
didicere superbiam, propheta loquitur: audiuimus superbiam moab, siue
iniuriam, ut lxx transtulerunt. quis enim haereticorum non superbus est?
qui ecclesiasticam despiciens simplicitatem, ita habet ecclesiae
homines quasi bruta animalia, et intantum superbiae iniuriae que tumore
erigitur, ut contra ipsum creatorem armet os suum, detrahens prophetis
eius, quasi auctoritate testimonii euangelici, in quo saluator ait:
omnes qui uenerunt ante me, fures fuerunt et latrones. adeo ut moysen
quoque famulum dei appellet homicidam, et iesu filio naue detrahat,
quasi homini sanguinario, qui tantae sanctitatis fuit, ut ad imperium
sermonis eius sol luna que constiterint. et dauid, de cuius semine ortus
est christus homicidam et adulterum uocet, non respiciens eius
paenitentiam et mansuetudinem, qua dei clementia comparatur. sed quamuis
superbus sit et arrogans, et furibundus exsultet, tamen plus audet quam
eius patitur fortitudo. idcirco moab ululabit ad moab, id est alter ad
alterum; omnes uidelicet haereticorum et saecularis sapientiae
diuersitates contra se mugient, cum in tormentis fuerint. quam ob rem
his qui muros habent non quadris aedificatos lapidibus, de quibus
templum aedificatum est; et intantum politis, ut malleus et securis non
sit audita in domo dei, o uos ecclesiae magistri, uel qui estis de moab
errore saluati, annuntiate plagas suas, quibus haereticorum iaculis
uulnerati sunt. omnes enim cogitationes eorum, quod significat esebon,
non ad urbis dominicae habitationem pertinent, de qua scriptum est:
fluminis impetus laetificat ciuitatem dei. sed suburbana sunt, ut ad
urbem domini pertinere credantur, quae suburbana dei sunt deserta
praesidio, siue diuino igne combusta, praecipue uinea sabama, quae
interpretatur attollens altitudinem, eo quod in altum se erigat, et
superbiae suae turrim usque ad caelum struere conetur. quod autem in lxx
positum est habitatoribus deseth, in hebraico non habetur; sed pro hoc
legitur ares, quod testam siue coctum laterem significat.
domini gentium exciderunt flagella eius, usque ad iazer
peruenerunt. errauerunt in deserto; propagines eius relictae sunt;
transierunt mare. super hoc plorabo in fletu iazer uineam sabama,
inebriabo te lacrima mea, esebon et eleale, quoniam super uindemiam tuam
et super messem tuam uox calcantium irruit. et auferetur laetitia et
exsultatio de carmelo; et in uineis non exsultabit, neque iubilabit.
uinum in torculari non calcabit qui calcare consueuerat; uocem
calcantium abstuli. suburbana esebon, de quibus supra diximus, deserta
sunt, et uinea sabama, quae interpretari potest: non solum extollens
altitudinem, sed et conuersio aliqua, quia uidetur in regione moabitica
ad domini seruitutem aliqua ex parte uelle conuerti. huius igitur uineae
sabama, domini gentium, apostoli et apostolici uiri, flagella et
propagines penitus absciderunt, ne ex aliis haeresibus aliae nascerentur
haereses et infinita errantium fieret multitudo. et non solum
exciderunt propagines sabamae, sed usque ad iazer peruenerunt, quae
interpretatur fortitudo eorum. hoc est: ad fortissima quaeque dogmata
haereticorum et dialectica arte constructa, in quibus robur sui habere
uidebantur erroris, et intantum eorum mucro bacchatus est, ut nouissime
errarent in solitudine, et quem interficerent non haberent. cum que illi
exciderent flagella eius, tamen uitio radicis pessimae, propagines
aliquae remanserunt. domini autem gentium transierunt mare, hoc est
temptationes saeculi huius, de quibus in psalmo legimus: ueni in
profundum maris, et tempestas absorbuit me; et in alio loco: qui
descendunt mare in nauibus, facientes operationes in aquis multis; ipsi
uiderunt opera domini, et mirabilia eius in profundo. isti ergo
transierunt mare, ut opera domini et mirabilia eius in profundo
temptationum conspicerent, dum liberantur ex eis. itaque sermo
propheticus plangit fortitudinem haereticorum, id est iazer, et uineam
sabama, quae se extollit contra scientiam dei. et inebriabo te lacrima
mea, esebon, cogitationes scilicet eorum, et eleale, quibus ad excelsa
conscendunt. cur autem plangit iazer uineam sabama, et inebriat esebon
et eleale lacrimis suis? ut dum ipse plorat, et illos plorare doceat.
quoniam, inquit, super uindemiam tuam et super messem tuam uox
calcantium irruit. uinea enim moabitarum propter uiciniam loci talis
est, qualis et uinea sodomorum, de qua dicitur: de uinea enim sodomorum,
uinea eorum, et propago eorum de gomorra. et in septuagesimo septimo
psalmo legimus de aegyptia uinea, quam deus percussit grandine. messes
quoque moabiticae nascuntur in uallibus quae appellantur raphaim; falsa
que uindemia eius est uineae, de qua supra dicitur: domini gentium
exciderunt flagella eius. isti enim conterunt uuas amarissimas, et suis
calcant pedibus, ne draconis de eis exprimantur uenena, et omnes
interficiantur bibentes. auferetur quoque laetitia et exsultatio
haereticorum, qua ante gaudere consueuerant; ut postquam egerint
paenitentiam, illud mereantur audire: beati lugentes, quoniam ipsi
consolabuntur. quod que addidit de carmelo, hoc significat: non quod
haeretici uere carmelum habeant, id est spiritalis circumcisionis
notitiam; sed quod falso habere se iactent. cum que succisae fuerint
uineae, et ablata laetitia, et exsultatio de falsi nominis scientia,
tunc nullus erit de pristinis calcatoribus, qui calcet uuas, quas ante
calcauerat; et uox eorum aeterno obmutescet silentio.
super hoc uenter meus ad moab quasi cithara sonabit; et uiscera
mea ad murum cocti lateris. et erit cum apparuerit quod laborauit moab
ab excelsis suis, ingredietur ad sancta sua ut obsecret et non
praeualebit. hoc uerbum quod locutus est dominus ad moab ex tunc.
destructo errore moabitico, immo falsa laetitia in luctum lacrimas que
mutata, uenter meus, prophetae, qui instar citharae musica arte
compositus est, et qui de dei timore concipiens multos liberos
procreauit, ita ut nulla sit chorda, quae non reddat sonum suum,
resonabit luctum agentis paenitentiam moab; et omnia uiscera mea ad
murum cocti lateris, pro quo interpretatus est theodotio: ad murum
dissipatum. omnia enim contrariorum praesidia, in quibus antea
confidebant, destruentur et corruent. haec sunt autem uiscera et
interiora prophetae, de quibus et dauid dicebat in psalmo: benedic,
anima mea, domino, et omnia interiora mea nomen sanctum eius. quomodo
enim cithara non emittit uocalem sonum atque compositum, si saltem una
chorda rupta fuerit, sic spiritalis uenter prophetae, si una in eo
uirtutum chorda defuerit, non poterit melos dulce resonare; nec ad
lateritium murum cunctis clamare uisceribus. philosophorum quoque
sententia est, haerere sibi uirtutes; et apostoli iacobi, ut cui una
defuerit, huic omnes deesse uirtutes. cum autem intellexerit moab
frustra se in his, quae prius putabat excelsa, dogmatibus laborasse,
ingredietur ad sancta sua, non quae per se sancta sunt, sed quae sancta
errans arbitrabatur, et auxilium inuenire non poterit. uel certe deserto
errore mendacii, ad sancta ecclesiae intrare conabitur, ut sua ea
faciat, et oret, et obsecret, sed non praeualebit. neque enim statim ut
uoluerimus, perfectam possumus capere uirtutem. quod que infert: hoc
uerbum quod locutus est dominus ad moab ex tunc, prooemio in quo dixerat
uerbum contra moab, siue onus, sciamus epilogum redditum, ut quod ibi
coeperat, hic compleuerit. ex tunc autem intellegendum ex quo coepit ad
eum loqui, ut omne quod dixit, unum uerbum dei sit, id est una
sententia. porro iuxta lxx qui interpretati sunt: interiora prophetae
quasi murum renouata a deo et erubescere eum, id est moab, et intrare ad
aras et ad ea quae manu facta sint, ita disserere possumus, ut dicamus
semper prophetae renouari uiscera et a deo fieri fortiora, ut aduersarii
confundantur, et ea quae humana manu fabricati sunt, cassa intellegant
et nihil ad salutem proficientia.
et nunc locutus est dominus, dicens: in tribus annis quasi anni
mercenarii auferetur gloria moab super omni populo multo, et relinquetur
paruus et modicus, nequaquam multus. tres anni, in quibus auferetur
gloria moab super omni populo eius multo, uel diuitiis multis, ut lxx
transtulerunt, mystice intellegendi sunt. sicut enim misericordia domini
in ponderibus est atque mensura, sic et cruciatus ac supplicia habent
mensuram suam, ut postquam tres anni transierint, in quibus relinquetur
paruus et modicus, et nequaquam multus, tunc inglorius esse desistat. et
hoc notandum, quod iuxta hiezechielis prophetiam, quando dies pro annis
numerantur israeli, hoc est decem tribubus, quae maiora peccauerant,
supputentur in poenis anni trecenti nonaginta, ut in hebraico
continetur, non centum nonaginta, ut uulgata editio habet; et iudae, in
quo erat templum dei, anni quadraginta. qui enim paruus est, meretur
misericordiam; potentes autem potenter tormenta patientur. et seruus qui
scit uoluntatem domini sui et non facit eam, uapulabit multum. moab
igitur quia externus erat, nec de populo dei, sed relicto errore
conuersus, non annis pluribus, sed tantum tribus paruus et modicus et
inglorius relinquetur. isti sunt anni, de quibus et alibi legimus:
recordamini dierum saeculi, et iterum: cogitaui dies antiquos, et annos
aeternos in mente habui.
si enim umbrae et exemplaribus seruiebat iuxta carnem israel, et omnis
eorum sollemnitas futurorum erat typus, quare non et anni praesentis
temporis futura tempora praefigurent? de quibus et in alio loco legimus:
quid facietis in diebus conuentus, et in diebus festiuitatis domini?
quod que iungitur: quasi anni mercenarii, hoc ostendit, quod falsa
doctrina pro lucro cuncta faciat atque compendio. omnis enim
mercenarius, et qui non est pastor, cuius non sunt oues, cum uiderit
lupum uenientem fugit, quia mercenarius est, et oues ad eum non
pertinent. quam ob rem puto aduenam et mercenarium de sanctis non
comedere, nec seruos sanctorum esse participes. non enim ob dilectionem
domini, sed ob mercedem cuncta faciunt, qui comedunt domos uiduarum et
proprios adducunt greges, ut lanis eorum uestiantur et lac mulgeant.
quod de doctrina diximus mercenaria, referamus ad cetera. si praebeo
eleemosynam, ut glorificer ab hominibus, recepi mercedem meam et
mercenarius appellandus sum. si castum me esse simulo, et aliud est in
conscientia mea, habeo non gloriam mercenarii, sed supplicia peccatoris.
et in comparatione duorum malorum, leuius malum est aperte peccare,
quam simulare et fingere sanctitatem. uerum et in hoc profectus est
moab, ut qui prius multos erroris sui habebat comites, postea redigatur
ad paucos; uel qui prius multus erat in diuitiis peccatorum, post
paenitentiam paruus et pauper sit in malitia.
LIBER 7
septimus liber idem iuxta anagogen secundus est, immo extremus. in
hoc enim decem uisionum tropologica explanatio terminatur, quem cum
tuis, eustochium, precibus, et christo auxiliante compleuero, ueniam ad
octauum, et utramque explanationem iuxta priores, usque ad quartum,
libros, pariter explicabo.
17. onus damasci. symmachus et theodotio: assumptio damasci. lxx:
uerbum contra damascum, addentes de suo, quod in moab fecere principio.
damasci primum nomen in genesi legimus, qui ante isaac fuit uernaculus
abraham, et putabatur haeres, nisi esset sarae filius ex promissione
generatus. interpretatur autem aut sanguinis osculum, aut sanguinem
bibens, aut sanguis cilicii, quae omnia populo conueniunt ethnicorum,
qui ante fidem christi amicus erat sanguinis et crudelitatis, et digna
opera planctu agebat et sacco. in dierum libro narrat historia, quod
impleto anno ascenderit contra ioas regem iudae exercitus syriae et
uenerit in hierusalem, et omnes principes populi interfecerit, cunctam
que praedam miserit regi damasci, qui cum paucis uiris uenerat; et deus
tradiderat in manu eorum multitudinem magnam nimis, eo quod reliquissent
dominum deum patrum suorum. quod iuxta anagogen et futurorum typum
considerandum est, utrum ad tempus dominici aduentus referre ualeamus.
post finem enim anni acceptabilis, in quo a saluatore est euangelium
praedicatum, ascendit de damasco gentium exercitus in paucis uiris
contra iudam et hierusalem, qui reliquerant dominum. et omnes eorum
legis ac prophetarum abstulere diuitias, et miserunt regi damasci, uiris
scilicet ecclesiasticis et doctrinae euangelicae, qui ad comparationem
totius mundi, adhuc tunc infidelis et in toto orbe dispersorum
iudaeorum, pauci erant; et tamen dominus tradidit hierusalem in manibus
eorum, eo quod dereliquissent dei filium, qui per prophetas ante
praedictus est. ego ob hanc causam reor et saulum, qui postea pauli ex
uirtute nomen accepit, quia aemulator erat legis, isse damascum, et
contra credentes ex gentibus pugnare uoluisse, ibi que superatum, eos
secutum qui in damasco uersabantur, ut inde rursum hierusalem iudaeos
expugnaturus ascenderet. nec alicui uideatur esse contrarium, si in
paralipomenon libro laeta de damasco, et nunc in esaia tristia
praedicentur, quia et de ipso israel, qui certe portio dei est, nunc
aduersa, nunc prospera nuntiantur. et quomodo ad israel iuxta carnem, et
ad gentes dicitur: uos gentes iuxta carnem, qui dicimini praeputium ab
ea quae appellatur in carne circumcisio; sic e contrario est israel
iuxta spiritum, et sunt gentes iuxta spiritum, et inter ceteras gentes
est damascus iuxta spiritum, ne tantum iudaicis fabulis acquiescamus.
ecce damascus desinet esse ciuitas, et erit sicut aceruus lapidum
in ruina. derelictae ciuitates aroer gregibus erunt, et requiescent
ibi, et non erit qui exterreat, et cessabit adiutorium ab ephraim, et
regnum de damasco, et reliquiae syriae, sicut gloria filiorum israel
erunt, dicit dominus exercituum. sicut in titulo demonstratum est, per
damascum uocatio gentium significatur, quae amabant uel bibebant
sanguinem, quae postquam in christum crediderint, pristinae
conuersationis ciuitates esse desistent, et erunt sicut aceruus lapidum
in ruina. quomodo enim acerui lapidum, qui in agris dispersi sunt, in
unum tumulum comportantur, sic de uniuersis nationibus aceruus
credentium congregatus est in ruina populi iudaeorum, illis cadentibus,
et nobis surgentibus. derelictae quoque ciuitates aroer, id est myricae,
ecclesiasticis gregibus erunt, ut quas iudaei deseruerunt, nos
incolamus; siue destructa idololatria exstruetur euangelium.
hoc et nostris temporibus uidemus esse completum. serapium alexandriae
et marnae templum gazae in ecclesias domini surrexerunt, et ciuitates
aroer euangelicis gregibus praeparatae sunt. aroer, id est myricae,
nascuntur in desertis locis, iuxta illud quod scriptum est in
maledictione eius hominis qui confidit in homine et a domino recedit cor
eius: erit, inquit, quasi myricae in deserto, et non uidebit bonum cum
uenerit; sed habitabit in siccitate, in deserto, in terra salsuginis et
inhabitabili. alii uero dicunt ex hac arbore maleficis artibus mistra~g,
id est odia, concitari. ergo qui prius erant in deserto gentilium, et
in odio nominis christiani, christi gregibus seruient, qui requiescent
in eis et non erit qui exterreat, quia dominus habitabit inter eos, et
praesente pastore, lupum timere non poterunt. tunc cessabit adiutorium
dei ab ephraim, qui in hoc loco intelleguntur scribae, et pharisaei,
iuxta osee prophetiam, qui contrarios populo dei ephraim nominat. et
regnum cessabit a damasco, ut nequaquam peccatum et peccati princeps
diabolus regnet in damasco quae prius sanguinem diligebat; sed reliquiae
syriae, id est qui ex gentibus crediderunt, sint sicut prius fuerant
filii israel, ablato ab illis regno dei et tradito gentibus, quae
faciunt fructum eius, sicut dominus deus exercituum locutus est per
omnes prophetas suos.
et erit in die illa, attenuabitur gloria iacob, et pingue carnis
eius tabescet. et erit sicut congregans in messe quod restiterit, et
brachium eius spicas leget, et erit sicut quaerens spicas in ualle
raphaim. et relinquetur in eo sicut racemus, et sicut excussio oliuae
duarum aut trium oliuarum in summitate rami, siue quattuor aut quinque
in cacuminibus eius fructus eius, dicit dominus deus israel. postquam
reliquiae syriae fuerint, sicut quondam fuerat gloria filiorum israel et
delicto eorum salus gentibus data, tunc attenuabitur omnis gloria
iudaeorum, qua gloriosi erant in uniuerso orbe et pingue carnis eorum
tabescet, non habentium prophetas, non signa atque uirtutes, non
praesens auxilium dei, non sacerdotii dignitatem; sed omne corpus gentis
eorum emarcescet, et redigetur ad nihili. cum que dicatur de uocatione
gentium: messis multa, operarii autem pauci, illi pauperes messis
reliquias, quae per apostolos saluatae sunt, et rarissimas spicas
legent, non de montibus et erectis locis, sed in ualle raphaim, id est
in litterae uilitate. et considera quod raphaim qui gigantes
interpretantur, sicut supra ephraim pharisaeos scribas que significent.
denique lxx pro ualle raphaim uallem duram interpretati sunt, ut
duritiam cordis iudaici exprimerent. de quorum humilitate eliguntur
quasi in stipula spicae et quasi in uindemia racemi, qui saluati
fuerint, et sicut excussio oliuae duarum aut trium oliuarum, siue
quattuor aut quinque. quando enim uenit percussio populi iudaeorum,
oliua illa populi israel, quae sub moyse sexcenta milia habuit
armatorum, et sub dauid, numerante ioab, innumerabilem populum, uix
paucos fructus offerre potuit domino saluatori. duas oliuas paulum et
barnabam et tres oliuas petrum et iacobum et ioannem, qui et in monte
transfiguratum dominum conspexerunt, et ad archisynagogi filiam ire cum
domino meruerunt. quattuor autem et quinque oliuae reliquos nouem
faciunt apostolos, in quibus iudae proditoris locum matthias obtinuit,
qui utique pro diuersitate gratiarum, quae nobis ignota est, in quattuor
et quinque oliuas separati sunt, ut euangeliorum numerum et legis in se
uolumina demonstrarent, quasi praedicatores utriusque instrumenti.
in die illa inclinabitur homo ad factorem suum; et oculi ad
sanctum israel respicient. et non inclinabitur ad altaria, quae fecerunt
manus eius, et quae operati sunt digiti eius; non respicient lucos et
delubra. in illo tempore quando de populo israel, cui prius dicebatur:
oliuam fructiferam uocauit te dominus deus tuus, et de quo in psalmis
legimus: filii tui sicut nouellae oliuarum in circuitu mensae tuae, pro
siccitate gratiae spiritalis uix duas oliuas, et tres, aut quattuor, aut
quinque dominus esuriens repererit, subintrabit gentium plenitudo, et
nequaquam ad idola manufacta, sed ad deum suum inclinabitur. et
respicient sanctum israel, et aras lucos que ac delubra contemnent,
scientes illud scriptum: omnis plantatio quam non plantauit caelestis
pater, eradicabitur.
in die illa erunt ciuitates fortitudinis eius derelictae sicut
aratra et segetes, quae derelictae sunt a facie filiorum israel. et eris
deserta. quia oblita es dei saluatoris tui, et fortis adiutoris tui non
es recordata. lxx: in die illa erunt ciuitates tuae derelictae sicut
dereliquerunt amorraei et euaei a facie filiorum israel. et erunt
desertae, quia dereliquisti deum saluatorem tuum, et domini auxiliatoris
tui non es recordata. quomodo sub moyse et iesu filio naue, amorraei et
euaei, siue ceterae gentes quae habitabant in terra repromissionis,
dereliquerunt uomeres et segetes et aceruos in agris, atque fugerunt, ne
ab hostibus occuparentur, sic terra iudaea et omnes urbes illius
robustissimae, romanis iudaeam uastantibus et obsidentibus hierusalem, a
suis habitatoribus derelictae sunt. et fit apostropha ad ipsam terram
iudaeae, id est ad eos qui habitabant in illa. haec autem uniuersa
perpessa es, quia oblita es dei saluatoris tui, qui interpretatur iesus,
quem tibi uenturum lex et prophetae iugiter nuntiabant.
et fortis adiutoris tui, qui tuus semper opitulator fuit, non es
recordata. causa ergo desertarum urbium iudaeae, obliuio saluatoris est,
qui in principio huius prophetae dixerat: israel me non cognouit et
populus meus non intellexit.
propterea plantabis plantationem fidelem et germen alienum
seminabis. in die plantationis tuae labrusca, et mane semen tuum
florebit; ablata est messis in die hereditatis, et dolebit grauiter.
lxx: ideo plantabis plantationem infidelem, et semen infidele, et in die
qua plantaueris, errabis. si autem mane seminaueris, florebit in messem
in die hereditatis, quando sicut pater hominis dat hereditatem filiis
suis. pro eo quod nos iuxta aquilam et symmachum et lxx interpretati
sumus: in die hereditatis, quod hebraice dicitur biom nehela, legi
potest in hebraico: in die pessima. et pro eo quod aquila et theodotio
interpretati sunt: et dolebit homo, nos docti ab hebraeis, pro 'homine'
qui lingua eorum dicitur enos, interpretati sumus anus, id est:
grauiter. de cuius uerbi ambiguitate, si uitae huius spatium fuerit, in
hieremia plenius disseremus, ubi iuxta lxx dicitur: et homo est, et quis
cognoscet eum? dicam ergo quod proposui: quia oblita es, terra iudaea,
dei saluatoris tui, et eius qui tibi semper praebuit fortitudinem, non
es recordata; propterea plantabis quidem plantationem fidelem, siue ut
aquila et theodotio interpretati sunt: pulchram; aut ut symmachus:
bonam, unum deum praedicans. sed germen alienum seminabis, non recipiens
patrem, quia non recipis filium. qui enim credit in patrem, credit et
in filium. et quia germen alienum blasphemiae contra iesum seminasti in
synagogis satanae, ideo non uindemiabis uuam, sed labruscam. cum que
uisum fuerit florere germen tuum et aliquam habere pietatis umbram, dum
homines ab idolis retrahis. tamen quando ad fructus ueneris colligendos
in die hereditatis dolebis grauiter, cernens gentium populum tibi esse
praelatum. unde et apostolus loquitur: tristitia mihi est magna, et
indesinens dolor cordi meo. optabam enim ego ipse anathema esse a
christo pro fratribus meis, qui sunt cognati mei iuxta carnem, qui sunt
israelitae, quorum est adoptio filiorum, et legislatio, et gloria, et
testamentum, et repromissiones; quorum patres et cetera. quod non solum
paulus, sed et omnis sanctus loquitur, uolens cum ramis oleastri etiam
radicem saluam esse. hereditas autem illa est, quam a domino
consequimur, de qua apostolus ait: diuisiones autem gratiarum sunt, idem
autem spiritus; et diuisiones ministeriorum, idem autem dominus; et
diuisiones operationum sunt, idem autem deus, qui operatur omnia in
omnibus. miretur quispiam, cur pro plantationibus pulchris et bonis,
quod aquila et theodotio ac symmachus interpretati sunt, nos fidelem
plantationem dixerimus. uerbum hebraicum neemanim, si per aleph litteram
scribatur, pistous~g, id est fideles, sonat; si uero per ain, et
dicatur neamenim, pulchram significat. unde et noemi, quae hac littera
scripta est, loquitur in ruth: nolite me uocare noemi, id est pulchram,
sed uocate me amaram.
uae multitudo populorum multorum, ut multitudo maris sonantis, et
tumultus turbarum, sicut sonitus aquarum multarum sonabunt. populi
sicut multitudo aquarum inundantium sonabunt; et increpabit eum, et
fugiet procul, et rapietur sicut puluis montium a facie uenti et sicut
turbo coram tempestate. in tempore uesperae, et ecce turbatio; in
matutino, et non subsistet. haec est pars eorum, qui uastauerunt nos, et
sors diripientium nos. supra legimus sub nomine damasci uocationem
gentium et abiectionem iudaeorum, et per apostolos, atque in apostolis,
paucorum de iudaeis credentium electionem. et quoniam ad comparationem
totius mundi et uniuersarum gentium, parua pars populi credidit
christiani, de quibus supra dictum est: et reliquiae syriae sicut gloria
filiorum israel erunt. multi enim uocati, pauci uero electi. et: non
est omnium fides.
nunc consequenter infertur non planctus, sed uae his gentibus quae
credere noluerant, et persecutae sunt populum christianum. comparantur
que undarum molibus et frementi mari, et quantum in se est, cuncta
opprimere et occupare cupienti. sonabunt enim populi in spectaculis
theatralis luxuriae et amphiteatri crudelitate et circi furoribus, sicut
sonitus aquarum inundantium, quando consona impietatis uoce
blasphemant, et dicunt christianos ad leones et bestias proici, et
cetera huiuscemodi. sed illis instar maris furentibus, increpabit
dominus auctorem seditionis eorum, et fugabit eum a suo populo. et sicut
puluis motus in montibus, quanto excelsior est, tanto fortius rapitur;
et sicut turbo, qui de terra consurgit, subita tempestate fertur in
sublime. ita et ille raptus, a dei populo separabitur ac fugiet, ne in
abyssos relegetur. cum que dies consummationis aduenerit, quod
interpretatur uespera, tunc erit turbatio, sua peccata noscentis. et in
tempore matutino, die uidelicet resurrectionis, non subsistet, quod lxx
transtulerunt: non erit. si autem non erit, quid respondebunt, qui
diabolo dant paenitentiam, et illi quantum in se est, archangelicum
fastigium pollicentur? haec est pars eorum, qui uastauerunt nos et sors
diripientium nos. haec uel populus loquitur christianus, uel propheta ex
persona credentis populi, quod interitum sempiternum persecutores eorum
habituri sint, qui exsiliis, carceribus, bonorum proscriptionibus,
oppresserunt sanctos dei, et aeterna supplicia possessuri sunt.
18. uae terrae cymbalo alarum, quae est trans flumina aethiopiae,
qui mittit in mari legatos, et in uasis papyri super aquas. ite, angeli
ueloces, ad gentem conuulsam et dilaceratam; ad populum horribilem,
post quem non est alius; ad gentem exspectantem, exspectantem et
conculcatam, cuius diripuerunt flumina terram eius. omnes habitatores
orbis, qui moramini in terra, cum eleuatum fuerit signum in montibus,
uidebitis et clangorem tubae audietis. lxx: uae terrae nauium alarum
trans flumina aethiopiae, qui mittis in mari obsides et epistolas
biblinas super aquam. ibunt enim nuntii leues ad gentem excelsam et
peregrinum populum et pessimum, qui est trans eum. gens absque spe et
conculcata, nunc flumina terrae omnis sicut regio quae habitatur;
habitabitur regio eorum, quomodo si signum de monte eleuetur, et tubae
uox audiatur. utramque editionem posui in prophetia obscurissima ne quid
uolentibus intellegere quod scriptum est, deesse uideatur. simul que
uehementer admiror eos, qui fidem nostram et spem christianam
arbitrantur simplicitate contentam, quia scriptum est: mandatum dei
lucidum illuminans oculos; nec plus debere nos quaerere, quam ut fiant,
quae praecepta sunt, cum idcirco et omnis scriptura, et prophetae
specialiter futurorum mysteriis inuoluti sint, ut prouocent nos ad
intellegentiam, et ad illud quod in euangelio dicitur: petite, et
accipietis; quaerite, et inuenietis; pulsate, et aperietur uobis. quia
ergo iuxta historiam et id quod in hebraeo continetur, in quinto libro
exposui, nunc quid mihi iuxta anagogen uideatur, edisseram. prudens
forsitan lector inquirat, quid sibi uelit in uisione, uel onere damasci,
alarum cymbalum et cetera quae sequuntur. postquam de uocatione gentium
dictum est, de abiectione iudaeorum, et electione eorum, qui per
apostolos crediderunt et postea de gentium multitudine et
persecutoribus, qui maris fluctibus comparati sunt, sequebatur, ut de
haeresibus quoque, quae ecclesiam uexauerunt, et hucusque populantur,
sermo propheticus nuntiaret, qui, dormiente patrefamilias, in agro
ecclesiae superseminauerunt zizania. et dicuntur cymbalum, caritatem dei
non habentes, iuxta illud apostoli: si linguis hominum loquar et
angelorum, caritatem autem non habeam, factus sum uelut aes sonans aut
cymbalum tinniens. et non solum cymbalum rauco concrepans sonitu, sed
propter leuitatem sermonis haeretici in diuersa currentis, alarum
cymbalum dicuntur, siue iuxta septuaginta: alae nauium, qui magna
mercimonia promittentes, nauigant in saeculi istius fluctibus. alas
autem nauium, uela quibus suspenduntur et trahuntur, intellege. et
pulchre alas dixit nauium, omnis enim haereticus pollicetur excelsa, et
cum alas habere se iactet, tamen haeret in salsis fluctibus, et procul
non recedit a terra, in medio que cursu patitur repente naufragium. unde
aquila pro cymbalo umbram alarum interpretatus est, non enim habent
alas, sed alarum similitudinem. quod que infert: quae est trans flumina
aethiopiae, hoc significat, quod impietate sua omnes uincant haeretici.
uerbi gratia: dicit epicurus non esse prouidentiam, et uoluptatem
maximum bonum. comparatione huius sceleratior marcion, et omnes
haeretici, qui uetus lacerant testamentum.
cum enim recipiant prouidentiam, accusant creatorem et asserunt eum in
plerisque operibus errasse, et non ita fecisse, ut facere debuerat. ad
quam enim utilitatem hominum, serpentes, scorpios, crocodilos et
pulices, cimices que et culices pertinere? isti ergo trans flumina
aethiopiae sunt, et mittunt in mari huius saeculi legatos, id est
discipulos suos, qui eorum portantes uolumina, recte uasa papyri, id est
chartacia, super aquas portare dicuntur, quae delentur uelociter. sicut
enim libri iuxta aquas et humores cito obscurantur et delentur et
pereunt: ita sermo eorum atque doctrina, cum in principio aliquam uisa
fuerit fortitudinem possidere, pertransit et labitur. itaque per ironiam
dicitur ad eos: o angeli haereticorum, ite ueloces. quos beatus
apostolus paulus falsos apostolos, operarios fraudulentos, qui in
apostolos christi transfigurentur, appellat. et ite ad gentem auulsam et
laceratam; auulsam a deo, et haereticorum morsibus laniatam. ad populum
horribilem; nihil enim horribilius blasphemia, quae ponit in excelsum
os suum. post quem non est alter populus; omne quippe peccatum
comparatum blasphemiae, leuius est. gentem exspectantem, exspectantem et
conculcatam. nam omnes haeretici sibi caelestia repromittunt, et
pollicentur ingentia, et tamen a daemonibus conculcantur. cuius terram
diripuerunt flumina, quae non de caelo habent aquas, sed de terra. quis
enim angulus est, quae extrema solitudo terrarum, ad quam non turbidus
haereticorum sermo perueniat? itaque omnes qui habitant et morantur in
orbe terrarum, ad haereticorum signum, quod quasi in montibus eleuatum
est, erigunt oculos suos, et clangorem tubae, id est doctrinae eorum,
audiunt. haec iuxta hebraicum. ceterum secundum lxx planguntur alae
haereticorum, quae instar nauium per mare huius saeculi uolitant, et
impietatem superant ethnicorum, quos nunc aethiopes scriptura
cognominat. et dicitur ad doctrinam eorum atque sermonem. qui mittis in
mari huius saeculi libros, obsides peruersitatis tuae et epistolas ad
decipiendos eos, qui lecturi sunt. pergunt nuntii leues ad gentem
excelsam, et peregrinum populum et pessimum. nullus enim
ecclesiasticorum tantum habet studii in bono, quantum haeretici in malo,
et in eo se lucrum putant consequi, si alios decipiant, et ipsi perditi
ceteros perdant. gens autem uocatur excelsa propter superbiam; et
peregrina et pessima, quia aliena a deo est. uere gens sine spe et
conculcata, cuius flumina in tota terra imitantur habitationem
ecclesiae, ut inueniant sibi hospitium et regionem, in qua eleuent
signum doctrinae suae, et quasi scripturarum clangant tuba.
quia haec dicit dominus ad me: quiescam, et considerabo in loco
meo, sicut meridiana lux clara est, et sicut nubes roris in die messis.
ante messem enim totus effloruit, et immatura perfectio germinabit, et
praecidentur ramusculi eius falcibus; et quae derelicta fuerint,
abscindentur, excutientur. et relinquentur simul auibus montium et
bestiis terrae et aestate perpetua erunt super eum uolucres, et omnes
bestiae terrae super illum hiemabunt. in tempore illo deferetur munus
domino exercituum a populo diuulso et dilacerato, a populo horribili,
post quem non fuit alius, a gente exspectante, exspectante et
conculcata, cuius diripuerunt flumina terram eius, ad locum nominis
domini exercituum montem sion. quiescit et contemplatur deus in loco
suo, siue iuxta aquilam: in firmamento, id est in ecclesia, de qua
paulus apostolus loquitur: columna et firmamentum ueritatis.
contemplatur autem ea quae fiunt in ecclesia; et sicuti meridiana lux
clara est, ita uniuersa perlustrat. iuxta illud quod in decimo octauo
psalmo secundum anagogen de sole iustitiae dicitur: nec est qui se
abscondat a calore eius. et quomodo nubes roris in die messis, et in
feruenti aestate gratissima est, sic dominus habitatores ecclesiae suae
refrigerat, quo praesente cuncta florescunt.
et antequam tempus consummationis adueniat, quia nunc ex parte
cognoscimus et ex parte prophetamus, multi perfecti reperientur, de
quibus apostolus loquitur: quotquot perfecti hoc sentiamus. ramusculi
autem, qui inutiles sunt, falcibus praecidentur, dicente in euangelio
saluatore: ego sum uitis uera, et pater meus agricola est. omnem
palmitem in me non ferentem fructum, tollet eum, et omnem qui fert
fructum, purgabit eum, ut fructum plus afferat. et quae praecisa
fuerint, relinquentur auibus montium et bestiis terrae. auibus, quae
iuxta uiam seminata populantur, et bestiis, quibus traditur anima non
confitens deum, ita ut qui a domino praecisus fuerit et abiectus, et de
corpore illius, quod est ecclesia separatus, tam in aestate quam in
hieme, hoc est: in prosperis et in aduersis, uolucrum et bestiarum
mansio sit. sicut autem hi qui inutiles sunt et infructuosi in ecclesia,
amputantur et proiciuntur, ne modicum fermenti totam massam corrumpat.
sic e contrario fieri potest, ut qui haeretico fuerant errore decepti,
et auulsi a domino atque lacerati, et horribiles ob blasphemiam, frustra
que mendacia praestolantes, et conculcati a daemonibus, et a fluuiis in
partes uarias dissipati, cum recordati fuerint dei sui, et magistros
pessimos dereliquerint, offerant munus domino exercituum, non alibi nisi
in monte sion et in specula, quod interpretatur ecclesia. breuius
dicimus, quia in libro explanationis historicae multa iam diximus.
19. onus aegypti. symmachus et theodotio: assumptio aegypti. lxx:
uisio aegypti. ubi in hebraeo scriptum est massa mesraim, quod nos
interpretati sumus: onus uel pondus aegypti, pro quo aquila transtulit
arma~g aiguptou~g, possumus dicere ab eo, quod tollat propheta, et
portet iugum domini, eum exstitisse condignum, qui prophetiam aegypti
cerneret, siue portaret, unde miror lxx et in babylone pro pondere
interpretatos uisionem; et in philisthiim et moab et damasco: uerbum; et
nunc in aegypto: uisionem; cum in hebraeo in omnibus his non uerbum et
uisio, sed massa, id est onus pondus que ponatur. quod autem symmachus
et theodotio l�mma~g, id est assumptionem, semper interpretati sunt, hoc
scire debemus, accepisse prophetam a domino gratiam spiritalem, ut
aegypti sacramenta cognosceret, siue oculis mentis aspiceret, ut lxx
transtulerunt. non est autem aegyptus ista quam iudaei putant, sicut
arbitratus est iosephus, qui in libris antiquitatum refert: oniam
sacerdotem esaiae implesse uaticinium, ut in territorio heliopolitano,
quod aegyptii nomon~g uocant, exstrueret templum ad similitudinem templi
dei, et altare. esto enim, concedamus haec dicta de onia et altari quod
in aegypto exstruxit, quae erunt quinque ciuitates, quae in aegypto
loquantur lingua chananitica, ex quibus una iuxta lxx appellatur
asedek~g, iuxta alios interpretes, ciuitas ars siue ares, uel ciuitas
solis? et quis erit iste saluator, qui missus est aegyptiis, ut saluaret
eos, et dominum cognoscerent aegyptii? quando coluerunt eum in hostiis
et muneribus, et uota soluerunt? quando percussit dominus aegyptum et
sanauit eam? in quo tempore factum poterimus docere, ut fuerit uia de
aegypto in assyrios, et intrauerint assyrii in aegyptum, et aegyptii in
assyrios; et seruierint aegyptii assur? quando israel tertius in aegypto
fuit, et apud assyrios quasi benedictio in medio terrae, ita ut dominus
diceret: benedictus populus meus aegypti et opus manuum mearum
assyrius? haec ad aegyptum istam, quam iudaei aestimant, non pertinere
perspicuum est. itaque locum istum quem incolimus, et mundum qui in
maligno positus est, aegyptum possumus appellare, maxime quia mesraim,
quod dicitur aegyptus, interpretatur ekthlibousa~g, id est tribulans,
siue ad angustiam redigens. est tamen sciendum, multa oneris aegyptii,
uel uisionis, ad aegypti prouinciam pertinere, quae usque hodie
habitatur et cernitur. sed et in hoc et in aliis scripturarum locis
pleraque ponuntur, quae non possent stare iuxta historiam; ut rerum
necessitate cogamur altiorem intellegentiam quaerere. ecce dominus
ascendet super nubem leuem et ingredietur aegyptum, et mouebuntur
simulacra aegypti a facie eius et cor aegypti tabescet in medio eius. et
concurrere faciam aegyptios aduersus aegyptios et pugnabit uir contra
fratrem suum, et uir contra amicum suum, ciuitas aduersum ciuitatem,
regnum aduersus regnum. et disrumpetur spiritus aegypti in uisceribus
eius; et consilium eius praecipitabo; et interrogabunt simulacra sua et
diuinos suos, et pythones et hariolos. et tradam aegyptum in manus
dominorum crudelium, et rex fortis dominabitur eorum, ait dominus deus
exercituum. pleraque de prophetia aegypti, quam leuauit uel uidit
esaias, in historica explanatione perstrinxi. unde nunc iuxta
tropologiam summa quaeque carpenda sunt. ascendit dominus super nubem
leuem, corpus sanctae uirginis mariae, quod nullo humani seminis pondere
praegrauatum est.
uel certe suum corpus, quod de spiritu sancto conceptum est. et
ingressus est in aegyptum huius mundi; statim que omnia aegypti
simulacra commota sunt. ita ut diuinationes et uniuersa fraus
idololatriae, quae deceptum possidebat orbem, se fractam esse sentiret;
intantum ut magi de oriente docti a daemonibus, uel iuxta prophetiam
balaam intellegentes natum filium dei, qui omnem artis eorum destrueret
potestatem, uenerint bethleem, et ostendente stella, adorauerint puerum.
tunc cor aegypti omne contabuit et aegyptii contra aegyptios
surrexerunt, iuxta illud quod dominus loquitur in euangelio: nolite
putare quia ueni mittere pacem super terram; non ueni pacem mittere, sed
gladium. ueni enim diuidere hominem contra patrem suum, et filiam
contra matrem suam, et nurum contra socrum suam. eo tempore et illud
expletum est: inimici hominis domestici eius. et pugnabit uir contra
fratrem suum, et uir contra amicum suum. fuerunt enim in una domo
separati, duo contra tres, et tres contra duos, et diuisus est pater
contra filium, et filius contra patrem ciuitas aduersus ciuitatem, et
regnum aduersus regnum, eorum qui non crediderunt, aduersum eos qui
crediderunt, uel certe eorum, qui crediderunt, proximos suos saluare
cupientium. et disruptus est spiritus aegypti in uisceribus suis, ut
nequaquam paria sentirent. sed spiritali contra se gladio separati, omne
consilium suum praecipitatum esse cognoscerent; et nihilominus in
errore pristino permanentes, hi qui fidei ueritatem suscipere noluerant,
interrogarent simulacra et diuinos suos, et pythones et hariolos. cum
que illi hoc fecerint, dominus tradidit eos in manu dominorum crudelium,
iuxta illud apostolicum: quos tradidi satanae, ut discant non
blasphemare; quo seruitute durissima oppressi, ad clementissimum dominum
reuertantur. pulchre que daemones crudeles dominos uocat, quibus nihil
crudelius est. rex quoque fortis, qui dominus est eorum, perspicue
diabolus intellegitur, quem et in euangelio dominus fortem uocat, quo
uincto et oppresso, uasa domus eius et praeda diripitur.
et arescet aqua de mari, et fluuius desolabitur atque siccabitur,
et deficient flumina, attenuabuntur et siccabuntur riui aggerum.
calamus et iuncus marcescet; nudabitur alueus riui a fonte suo, et omnis
sementis irrigua siccabitur. arescet et non erit. et maerebunt
piscatores, et lugebunt omnes mittentes in flumen hamum, et expandentes
rete super faciem aquae, et arescent. et confundentur qui operantur
linum, plectentes et texentes subtilia, et erunt irrigua eius
flaccentia, omnes qui faciebant lacunas ad capiendos pisces. stulti
principes taneos, sapientes consiliarii pharao dederunt consilium
insipiens. quando rex fortis et durus dominatus fuerit in aegypto,
arescet omnis doctrina et pulchritudo eloquentiae saecularis, et ipse
fons fluuiorum omnium diabolus, a quo oriuntur uniuersa mendacia,
desolabitur. ita ut deficiant cetera flumina et riui, qui de turbidis
nili aquis implebantur. calamus quoque et iuncus nimia siccitate
arescent. pro iunco papyrum lxx transtulerunt, de quo charta fit,
addentes de suo: achi uiride, quod in hebraico non habetur. cum que ab
eruditis quaererem, quid hic sermo significaret, audiui ab aegyptiis hoc
nomine lingua eorum omne quod in palude uirens nascitur appellari.
calamus autem iuxta tropologiam est sermo uacuus et nihil in se solidum
habens; et papyrus qui uidetur quidem habere medullam et non est uacuus,
et tamen fragilis est cito que marcescit. omnes quoque riui, arefacto
riuorum capite, siccabuntur, et quidquid prius aquis irrigabatur
aegyptiis, arefactum non erit. ita ut maereant aegypti piscatores qui
ualde contrarii sunt piscatoribus domini, et lugeant qui mittebant hamum
in flumen, et expandebant rete super faciem aquae. qui singulos quosque
decipiunt, hamum mittunt in aquas turbidas. qui autem plures simul, ita
ut in synagogis satanae loquantur publice, et populorum abducant
greges, isti rete super aquas mittunt aegyptias. confundentur etiam hi
qui operabantur linum, ut uestes facerent sacerdotum, plectentes illud
et texentes subtilia, quod proprie ad dialecticorum artem pertinet.
pro subtilibus, byssum lxx transtulerunt, quod et ipsum in sacerdotum
uestibus texitur. quod que sequitur: et erunt irrigua eius flaccentia,
omnes qui faciebant lacunas ad capiendos pisces, hoc significat, quod
omnes insidiae aegypti piscatorum destruantur et pereant. pro lacunis
quae fiebant ad capiendos pisces, quod nos iuxta sensum interpretati
sumus, et in hebraico et in cunctis interpretibus in loco piscium
ponuntur animae, ut ab historia trahamur ad tropologiam, quod uidelicet
isti piscatores, qui faciebant lacunas et foueas, ad hoc fecerint, ut
animas in eis deciperent. notandum quod pro lacunis lxx zuthon~g
transtulerunt, quod genus est potionis ex frugibus aqua que confectum,
et uulgo in dalmatiae pannoniae que prouinciis, gentili barbaro que
sermone appellatur sabaium. hoc maxime utuntur aegyptii, ut non puras
aquas bibentibus tribuant, sed turbidas, et commixtarum fecium similes,
ut per huiuscemodi potionem haereticae prauitatis doctrina monstretur.
tunc stulti erunt principes taneos, quae interpretatur mandatum humile.
omnes enim haeretici contrariam altitudini humilitatem docent, et
detrahunt ad inferos, et sunt principes humilis deiecti que mandati.
consiliarii quoque pharao, qui rex aegypti est, et recte dissipator et
diuisus et in partes uarias separatus exprimitur, insipiens arguentur
dedisse consilium, quando disperderit dominus sapientiam sapientium, et
intellegentiam prudentium reprobauerit.
quomodo dicitis pharaoni: filius sapientium ego, filius regum
antiquorum? ubi sunt nunc sapientes tui? annuntient tibi et indicent
quid cogitauerit dominus exercituum super aegyptum. stulti facti sunt
principes taneos, emarcuerunt principes mempheos, deceperunt aegyptum
angulum populorum eius. dominus miscuit in medio eius spiritum
uertiginis, et errare fecerunt aegyptum in omni opere suo, sicut errat
ebrius et uomens. et non erit aegypto opus quod faciat caput et caudam
incuruantem et refrenantem. solent haeretici regi suo uel pharaoni
dicere: filii sumus sapientium, qui ab initio doctrinam nobis
apostolicam tradiderunt; filii sumus regum antiquorum, qui appellantur
reges philosophorum, et habemus scientiam scripturarum iunctam
sapientiae saeculari. quos nunc interrogat, siue ipsum regem
haereticorum, ubi sint sapientes eius qui contemnebant ecclesiasticam
simplicitatem; et respondere compellit, quid cogitauerit dominus sabaoth
super aegyptum istius mundi, et quid in consummatione facturus sit.
stulti sunt approbati principes taneos qui humile haereticorum habuere
mandatum. emarcuerunt omnes principes mempheos, qui eloquentiae et oris
polluere iactantia. memphis enim os uel ex ore interpretatur, et
metaphorik�s~g sermonem sonat. quod que sequitur: deceperunt aegyptum
angulum populorum eius, siue iuxta lxx: decipient aegyptum per tribus,
hoc significat, quod regnum sapientiae saecularis stultum esse
monstretur, et singulorum dogmatum principes, qui interpretantur tribus,
arguantur stultos habuisse doctores. dominus enim miscuit eis spiritum
uertiginis siue errorum, iuxta illud quod scriptum est: et sicut non
probauerunt deum habere in notitia, tradidit illos deus in reprobum
sensum. et quomodo qui sanctus est, cum esaia dicere potest: spiritum
salutis tuae faciemus super terram? sic qui peccator est faciet spiritum
erroris, hoc est malitiae spiritum, secundum quod et in hieremia
legimus: arguet te praeuaricatio tua, et malitia tua corripiet te. sin
autem scandalizatur haereticus, qui uetus non recipit testamentum, quod
dominus miscere dicatur erroris uel uertiginis spiritum, audiat scriptum
in apostolo, hoc est in nouo testamento: tradidit eos deus in
desideriis cordis sui in immunditiam. et iterum: propterea tradidit eos
deus in passiones ignominiae. et rursum: tradidit eos deus in reprobum
sensum, ut faciant quae non conueniunt. traduntur autem in desideriis
cordis, quia mutauerunt gloriam incorruptibilis dei, in similitudinem
imaginis corruptibilis hominis et uolucrum, et quadrupedum et reptilium.
quod quidem non solum in epistola ad romanos, sed et ad
thessalonicenses de antichristo legimus: pro eo quod caritatem ueritatis
non susceperunt, ut saluarentur, mittet eis deus operationem erroris,
ut credant mendacio, et iudicentur omnes qui non crediderunt ueritati,
sed complacuerunt sibi in mendacio. quod puto apostolum paulum de
praesenti esaiae lectione sumpsisse, in qua dicit: dominus miscuit eis
spiritum erroris, et errare fecerunt aegyptum in omnibus operibus suis,
sicut errat, inquit, ebrius et uomens, qui inebriatus est uitiis. de
quibus ebriis ioel loquitur: uae qui ebrii sunt absque uino. et non
solum ebrii, sed et uomentes furorem draconum et furorem aspidum
insanabilem, ut postquam huiuscemodi uinum euomuerint, intellegant
ebrietatem suam, atque cognoscant, quod quamdiu ebrii fuerint, nec
principium habuerint nec finem, id est: nec caput nec caudam, sed
truncum ex utraque parte animal.
pro principio et fine, quod et symmachus et lxx transtulerunt, theodotio
more suo ipsa uerba hebraica posuit chaphphe et agmon, quod aquila
interpretatus est: incuruum atque peruersum. in incuruo, senes intellegi
uolens; in peruerso, lasciuientes pueros, qui omnia peruersa faciant;
ac per hoc esse sensum, quod in aegypto non solum caput desit et cauda,
sed et senes et pueri, id est: et principium et finis.
in die illa erit aegyptus quasi mulieres, et stupebit, et timebit
a facie commotionis manus domini exercituum, quam ipse mouebit super
eam. et erit terra iuda aegypto in festiuitatem; omnis qui illius fuerit
recordatus, pauebit a facie consilii domini exercituum, quod ipse
cogitauit super eam. in illo tempore, hoc enim, ut crebro diximus,
significat dies, quando miscuerit dominus spiritum erroris atque
uertiginis, ut euomat aegyptus uinum draconum et furorem aspidum
insanabilem, intellegens errorem suum et ebrietatem pristinam, aegyptus
timebit quasi mulier, non timore fortuito, qui uiris accidere consueuit,
quos non amat aegyptus, sed suffocat et interficit; sed timore femineo,
quas solas uult pharao uiuere. timebit autem commotionem, siue
elationem manus domini, per quam supplicia demonstrantur, quam mouebit
et eleuabit, ut percutiat aegyptum. tunc terra iuda, id est: scientia
scripturarum, lex et prophetae, euangelia et apostolorum epistolae,
erunt aegypto in festiuitatem, si eas cognouerit. uel in timorem, si
comparatione doctrinae et ueritatis earum se intellexerit habuisse
mendacium. omnis qui huius terrae fuerit recordatus, pauebit eo pauore,
qui ducit ad uitam: principium enim sapientiae, timor domini. et hoc non
solum in consummatione mundi, sed in praesenti quoque tempore accipere
possumus; quod ecclesiasticum uirum, et doctrinis caelestibus eruditum,
omnis haereticus timeat et ad recordationem illius terreatur. timebit
autem et pauebit consilium domini, quod super aegyptum mundi istius
cogitauit. singula breuiter transcurrimus, ut ad reliqua transeamus.
in die illa erunt quinque ciuitates in terra aegypti loquentes
lingua chananitide, et iurantes per dominum exercituum; ciuitas solis
uocabitur una. multum prodest manus domini eleuata siue commota super
aegyptum, ut terra iudae sit ei in timorem, et omnis, qui illius
recordatus fuerit, pertremiscat. in illo tempore quinque ciuitates in
terra aegypti loquentur lingua chanaan, quas plerique nostrorum quinque
sensus intellegunt, uisum, auditum, odoratum, gustum et tactum. quando
uidemus mulierem ad concupiscendum, uisus noster loquitur lingua
aegyptia. quando audimus iudicium sanguinis, dicente domino: non
suscipies auditionem uanam; auditus noster loquitur lingua aegyptia.
quando secundum prophetam uiuimus in deliciis, et iacemus super lectos
eburneos, et primis ungimur unguentis, odoratus noster loquitur lingua
aegyptia. quando uenter noster deus est, gustus noster loquitur lingua
aegyptia. si non audierimus illud, quod apostolus loquitur: bonum est
homini mulierem non tangere, sed e contrario iungamur meretrici, tactus
noster loquitur lingua aegyptia. sin autem e contrario eleuauerimus
oculos nostros et uiderimus quod regiones iam albae sint ad metendum, et
nequaquam curui fuerimus in terram, sed iuxta euangelicam mulierem,
quae decem et octo annis caelum aspicere non poterat, eleuauerimus
oculos nostros et dixerimus: ad te leuaui oculos meos, qui habitas in
caelo, oculus noster et uisus loquitur lingua chananitide. si
circumciderimus aures nostras, et audierimus dominum loquentem: qui
habet aures audiendi audiat, auditus noster loquitur lingua chananitide.
qui potuerit sponso dicere: post te in odorem unguentorum tuorum
currimus. et: christi bonus odor sumus in omni loco, huius odoratus
loquitur lingua chananitide. gustus quoque in bonam partem accipitur
eius qui comedit panem de caelo descendentem, panem uiuum et non
mortuum, et audit illud: gustate et uidete quam suauis est dominus,
statim loquitur lingua chananitide. sed et tactus spiritalis est, de quo
ioannes apostolus ait: manus nostrae palpauerunt de uerbo uitae; et qui
fide tangit iesum, ita ut de eo saluator possit dicere: tetigit me
aliquis, ego enim scio uirtutem exisse de me. didicimus quanta bona
tribuat eleuata manus domini; quaeramus quare non lingua hebraea, sed
lingua chananitide loquantur quinque aegypti ciuitates. ad quod ita
respondere conabimur: hebraeus perat�n~g, id est transitorem, sonat, qui
de loco transit ad locum. ergo et nos licet sancti quamdiu in aegypto
sumus, et in istius mundi uersamur tenebris, non possumus loqui lingua
hebraea, sed lingua chananitide, quae inter aegyptiam et hebraeam media
est, et hebraeae magna ex parte confinis. chanaam interpretatur: quasi
commotio, siue quasi respondens.
quando igitur ab aegypto recedimus, et exire uolumus de potestate
pharaonis, ita ut terra nostra et confessio formidolosa sit aegypto.
tunc mouemur et quasi respondemus domini uoluntati, et tamen quia adhuc
in praesenti saeculo sumus, lingua hebraea necdum loqui possumus. quod
que sequitur: iurare quinque ciuitates per dominum exercituum, hoc
significat, quod etiam hic positi nequaquam daemonum, sed dei recordemur
omnipotentis. de his quinque ciuitatibus, cum aliarum quattuor tacita
sint nomina, una dicitur solis ciuitas, quae mihi uidetur referri ad
uisum. sicut enim ut uideatur ciuitas, sole et luna indiget; ita ut
oculi nostri illuminentur, indigemus sole iustitiae.
in die illa erit altare domini in medio terrae aegypti, et
titulus iuxta terminum eius domini. et erit in signum, et in testimonium
domino exercituum in terra aegypti. clamabunt enim ad dominum a facie
tribulantis; et mittet eis saluatorem, et propugnatorem qui liberet eos;
et cognoscetur dominus ab aegypto. consequenter ad id quod supra
dixerat: in die illa erunt quinque ciuitates in terra aegypti loquentes
lingua chananitide; et iurantes per dominum exercituum, nunc infertur:
erit altare domini in medio terrae aegypti, quod onias secundum iosephum
male intellegens implere conatus est. et titulus domini continens
passionem, in quo scriptum est hebraicis litteris, graecis et latinis:
iesus nazarenus rex iudaeorum, in signum crucis et in testimonium
uniuersarum gentium, quae nunc aegyptus appellantur. cum que persecutio
creuerit a facie tribulantium nominis christiani, tunc clamabunt in
cordibus suis: abba pater. et mittet dominus exercituum saluatorem, id
est iesum, et iudicem uel propugnatorem qui liberet eos, ut liberati
cognoscant dominum, et ipsi cognoscantur a domino; et ubi abundauit
peccatum, superabundet gratia. unum autem altare aegypti, id est mundi
istius, dicitur, ut cuncta altaria, quae contra ecclesiae eriguntur
altare, sciamus esse non domini. usque ad finem uisionis aegyptiae, in
libro explanationis historicae, quia manifesta prophetia erat, diximus
quod cuncta referantur ad christum.
et cognoscent aegyptii dominum in die illa; et colent eum in
hostiis, et muneribus, et uota uouebunt domino, et soluent. et percutiet
dominus aegyptum plaga, et sanabit eam; et reuertentur ad dominum, et
placabitur eis, et sanabit eos. postquam cognouerint aegyptii dominum,
colent eum in hostiis spiritalibus et muneribus; et uota uouebunt domino
et soluent; et dicent cum dauid: sacrificium deo spiritus
contribulatus; et: eleuatio manuum mearum sacrificium uespertinum;
quando credentes in nazaraeum, et ipsi fuerint nazaraei, uinum et
siceram non bibentes, et acetum quod domino propinatum est, et
quaecumque fiunt ex uua sodomitica. cum que uota persoluerint cum abel,
et respexerit ea deus, inuidebit frater maior cain, id est
circumcisionis populus, et effundet sanguinem christianum, qui clamabit
ad dominum. et idcirco egredietur a facie dei, dicens de saluatore:
crucifige, crucifige eum; et: nos non habemus regem nisi caesarem. uotum
offert et soluit domino, qui est sanctus corpore et spiritu. uotum
obtulit et zachaeus, qui mediam partem substantiae suae pauperibus
repromisit. quaeritur, si aegyptiis saluator et propugnator est missus
qui liberet eos de angustiis, quomodo nunc dicatur: percutiet dominus
aegyptum plaga? sed consideremus quod sequitur: et sanabit eam. quem
enim diligit dominus, corripit. et ipse saluator in sexagesimo octauo
psalmo loquitur ad patrem: quoniam quem tu percussisti, ipsi persecuti
sunt; et super dolorem uulnerum meorum addiderunt. si ergo proprio filio
non pepercit, sed tradidit eum pro nobis, ut illius liuore et
uulneribus sanaremur; tradidit dominus et martyres passioni, sed rursum
eos in resurrectione sanabit, ut illorum uulneribus fides credentium
confirmetur. unde et ad iob dicitur: putas me tibi aliter locutum, nisi
ut appareres iustus? ipse enim dolorem facit, et reddit pristinae
sanitati; et uisitat seruos suos in uirga, ut misericordiam suam non
auferat ab eis. unde filiae et nurus, quae multum peccauerunt et
diuaricauerunt pedes suos omni transeunti, non uisitantur neque
corripiuntur, dicente domino: non uisitabo super filias uestras, cum
fuerint fornicatae; et super nurus uestras, cum adulterauerint. percutit
ergo aegyptios dominus, non igne, non gladio, sed uirga.
quis enim filius est, quem non erudiat pater? ut postquam sanati
fuerint, reuertantur ad dominum, et placetur eis, et rursum sanet eos.
semper enim indigemus misericordia dei, et nullus est finis eius
clementiae.
in die illa erit uia de aegypto in assyrios; et intrabit assyrius
in aegyptum, et aegyptius in assyrios; et seruient aegyptii assyriis.
quomodo cetera quae praecedunt in bonam partem accidisse aegyptiis
demonstrauimus, quinque uidelicet ciuitates in terra eorum loquentes
lingua chananitide, et iurantes per dominum et altare domini in medio
terrae aegypti collocatum, et titulum et testimonium et signum, et
saluatorem qui liberaret eos; et quod dominus cognosceretur ab
aegyptiis, et ipsi cognoscerent eum; et quod offerrent hostias et
munera, et uota persoluerent et percussi sanarentur, et reuerterentur ad
dominum, et placaretur eis, et iterum sanarentur. sic et hoc quod
sequitur, seruire aegyptios assyriis, in bonam partem accipiendum est.
seruit enim et apostolus credentibus, ut lucri eos faciat. et esau
subicitur fratri suo iacob, ut particeps fiat benedictionum eius. igitur
qui priores de gentibus saluati fuerint, et habuerint in se altare
domini, eos qui in duritia perseuerant, sua seruitute saluabunt, et
commixtione ac societate eorum, ipsi pergent ad assyrios, ut assyrios
ducant ad aegyptum; et postea possint ad israeliticum populum peruenire.
ob hanc causam reor, et fidelem mulierem seruire uiro infideli, ut
paulatim eum de aegypto et assyriis pertrahat ad iudaeam.
in die illa erit israel tertius aegyptio et assyrio, benedictio
in medio terrae, cui benedixit dominus exercituum, dicens: benedictus
populus meus aegypti, et opus manuum mearum assyrius. hereditas autem
mea israel. tertius erit israel in aegypto et in assyriis, ut omnem
massam suae benedictionis fermento misceat, et qui prius contra se
hostiliter dissidebant, hac benedictionis fibula copulentur; et sit
populus dei aegyptus, et opus manuum eius assyrius, hereditas autem eius
israel. benedictus est aegyptius domino, quia israelis societate
benedicitur. et opus manuum eius assyrius, quia in ipso suam clementiam
demonstrauit. israel autem solus potest dicere: pars mea dominus, qui
mente conspicit deum, et eius hereditas appellatur.
20. anno quo ingressus est thartan in azotum, cum misisset eum
sargon rex assyriorum, et pugnasset contra azotum, et cepisset eam. in
tempore illo locutus est dominus in manu esaiae filii amos dicens: uade
et solue saccum de lumbis tuis et calceamenta tua tolle de pedibus tuis;
et fecit sic, uadens nudus et discalceatus. et dixit dominus: sicut
ambulauit seruus meus esaias nudus et discalceatus, trium annorum signum
et portentum erit super aegyptum et super aethiopiam. sic minabit rex
assyriorum captiuitatem aegypti, et transmigrationem aethiopiae, iuuenum
et senum, nudam et discalceatam, discoopertis natibus ignominiam
aegypti. et timebunt et confundentur ab aethiopia spe sua, et ab aegypto
gloria sua. et dicet habitator insulae huius in die illa: haecine erat
spes nostra? ad quos confugimus in auxilium, ut liberarent nos a facie
regis assyriorum? et quomodo effugere poterimus nos? pro thartan lxx
thanatan transtulerunt; et pro sargon, arna, quod quid interpretetur,
scire non possumus. neque enim falsorum nominum falsas possumus
etymologias fingere. sunt autem nomina non hebraea, sed assyria, e
quibus sonare cognouimus thartan: turrem dedit, uel superfluus siue
elongans. sargon autem princeps horti. hic rex assyrius quem supra
legimus sensum magnum, habet duces plurimos, quorum unus est thartan,
elatus in superbiam, et longe procedens in scelere, et amplior ceteris;
et mittitur ad impugnandam azotum, quae hebraice dicitur esdod, et
interpretatur: ignis generationis; expugnat que dux regis assyrii eos
qui generationi et libidini seruiunt. et pulchre rex assyriorum sargon
princeps hortorum, dicitur uoluptati et luxuriae deditus. denique et
achab rex israel uineam naboth uertere in hortum cupiebat, quod ille
iuxta leges tropologiae intellegens, mori maluit quam facere, ne
hereditas paterna et antiqua possessio in impii regis delicias
uerteretur.
praecipitur autem prophetae, ut sacco calceamentis que depositis, nudus
et discalceatus incedat et in signum sit atque portentum aegyptiis, et
aethiopibus qui dei populum persecuti sunt, et propter superbiam fuere
humiles. aegyptus enim interpretatur persequens siue tribulans;
aethiopes, humiles atque deiecti; omnis enim qui se exaltat,
humiliabitur. qui ducendi sunt in captiuitatem et trium annorum tormenta
passuri, de quibus annis in psalmis legimus: cogitaui dies antiquos, et
annos aeternos in mente habui. quae non putemus parua esse supplicia,
sed magnis elongata temporibus. in ipsa autem captiuitate et
transmigratione aegypti ibunt iuuenes et senes, qui in malitia roborati
sunt, et ad perfectae aetatis uitia peruenerunt, nudi, ut omnia eorum
scelera pateant. nihil enim occultum quod non reuelabitur. et
discalceati, quia pascha domini comedere non poterunt; quod qui comedit,
accinctos habet lumbos, et tenet manu baculum, et calceatis stat
pedibus, ne per saeculi huius solitudinem transiens, a serpentibus
mordeatur. tunc discoopertae erunt nates eorum, per quas stercus
egeritur, et omnis ignominia aegypti demonstrabitur, ita ut confundantur
qui habuerunt spem in aegypto et in aethiopia, et gloriam suam in
confusionem uiderint esse mutatam. in tantum, ut habitator insulae
huius, id est saeculi, qui non est aduena et peregrinus, sed perpetuam
mundi possessionem habere cupiebat, confusus dicat: haec est aegyptus,
et haec est aethiopia, quarum sperabamus auxilium, ut a principe mundi
istius nos liberarent? quomodo ergo effugere poterimus, cum capti sint
hi in quibus spem habebamus? et hoc notandum, quod antequam capiatur
azotus, propheta sacco uestitus sit et calceatis pedibus, ut plangat
quidem eos, qui ardentibus diaboli iaculis uulnerati sunt et libidini
seruiunt; sed nihilominus ipse calceatus incedat, ut calcare possit
super serpentes et scorpiones, et securus incedere per huius saeculi
eremum, in qua sunt serpentes et scorpiones, et bonarum rerum sitis.
postquam autem azotus capta fuerit, in typum captiuitatis aegypti et
transmigrationis aethiopiae, ipse discalceatus et nudus incedat. neque
enim in terra sancta, ad quam ire festinat, sacco uestitus et opertis
pelle pedibus, uel stare poterat uel ambulare, dicente domino: solue
calceamentum de pedibus tuis, locus enim in quo stas, terra sancta est.
21. onus deserti maris. sicut turbines ab africo ueniunt, de
deserto uenit, de terra horribili. uisio dura nuntiata est mihi, qui
incredulus est, infideliter agit, et qui depopulator est, uastat.
ascende elam, obside mede; omnem gemitum eius cessare feci. propterea
repleti sunt lumbi mei dolore; angustia possedit me, sicut angustia
parientis. lxx: uisio deserti maris. sicut tempestas de deserto
transeat, de deserto ueniens. de terra horribili uisio dura annuntiata
est mihi. praeuaricator praeuaricatur, et iniquus inique agit. contra me
elamitae et legati persarum ueniunt, nunc ingemiscam, et consolabor me.
idcirco repleti sunt lumbi mei angustia, dolores apprehenderunt me,
sicut parturientem. quid nobis uideatur iuxta historiam breuiter
diximus; nunc tropologiae summa carpamus. uisio, uel pondus contra
saeculi huius cernitur mare; et cernitur a propheta, quantis
temptationibus mundus hic plenus sit. quod autem mare appelletur
saeculum, ut multa praeteream, uno testimonio psalmi contentus sum: qui
descendunt mare in nauibus, facientes operationes in aquis multis. ipsi
uiderunt opera domini et mirabilia eius in profundo. qui enim operantur
in hoc saeculo opus dei, et cum propheta dicunt: ueni in profundum
maris, ipsi uident mirabilia eius in profundo; et liberati de
temptationibus et angustiis, horribilem et duram uisionem audisse se
dicunt. haec autem ipsa tempestas a deserto uenit, in quo temptatus est
et dominus, et israel colubri morsibus et scorpionum ictibus patuit.
cum que uenerit, pertransit et praeterit. et tunc intellegit ille qui
sustinet, quod non praeuaricatur nisi qui praeuaricator est, et non agit
inique nisi iniquus. ut igitur maris fluctibus obruamur et opprimat nos
saeua tempestas, nostri uitii est, qui ante tempestatem praeuaricatores
fuimus et iniqui. quod que dicit: contra me elamitae et legati persarum
ueniunt, hic sensus est: elamitae interpretantur despicientes; persae
temptantes. ueniant igitur hi qui despicere solent, contemnere atque
temptare; sed ego ingemiscam, et gemitus meus erit mea consolatio. sed
et lumbi mei repleti sunt angustia, et obtinuerunt me dolores quasi
parturientem, ut a timore domini concipiam et pariam, et spiritum
salutis eius faciam super terram. recte autem iuxta hebraicum turbines
atque tempestates de deserto ueniunt, et de terra horribili, ubi non est
habitator deus, et ubi uniuersa terrena sunt; et quicumque est
incredulus agit rem congruam infidelitati suae, et qui depopulator est,
uastat. unde audacter contra aduersarios loquitur: ascende elam, obside
mede. omnem gemitum deserti maris, et terrae horribilis, et uisionis
durissimae, quae nuntiata est, cessare feci. quia lumbi mei agentes
paenitentiam, nequaquam ut prius uoluptate, sed dolore sunt pleni, nec
ultra dicam: lumbi mei impleti sunt illusionibus. angustia enim possedit
me et tribulatio, sicut solet tenere parturientem. multum inter se
uulgata editio et hebraicum in hoc loco discrepant; ideo breuiter
utramque perstringemus, ne philegkl�mosin~g aliquam carpendi nos
occasiunculam relinquamus.
corrui cum audirem, conturbatus sum cum uiderem. emarcuit cor
meum, tenebrae obstupefecerunt me. babylon dilecta mea posita est mihi
in miraculum. pone mensam, contemplare in specula comedentes et
bibentes; surgite, principes, arripite clipeum. lxx: inique egi ut non
audirem, festinaui ut non uiderem, errat cor meum; iniquitas inundauit
super me; anima mea insistit timori. para mensam, speculare speculam;
comedite, bibite; surgentes, principes, parate clipeos. prae auditu et
uisione durissima quam cernebat de deserto mari propheta uenturam,
corruisse et turbatum esse se dicit et propemodum caliginantibus oculis
et stupefacta mente, nescisse quid cerneret. illa enim babylon, pro qua
aquila et theodotio tenebras interpretati sunt, ut significarent mundum
istum, qui in maligno positus est, et cuius principes sunt iuxta
apostolum paulum rectores tenebrarum istarum; quae quondam uel prophetae
uel deo amabilis fuit, facta est in sua subuersione miserabilis. unde
prophetae praecipitur, ut uescens in mensa domini, et illius saturatus
cibo, diligentius contempletur, quae uentura sint mundo; dicitur que per
eum ad omnes credentes, ut comedentes et bibentes corpus et sanguinem
domini, uertantur in principes ecclesiae, et cum apostolis audiant:
surgite, arripiant que clipeum fidei de armatura apostoli pauli in quo
possint ignita diaboli iacula exstinguere. hoc iuxta hebraicum, et
coeptam super mundo interpretationem. transeamus ad editionem lxx, quae
multum a superioribus discrepat. corripit se propheta, immo sub persona
sua aliorum confitetur errorem, qui sequentes occidentem litteram,
contemnunt spiritum uiuificantem; et inique fecisse se dicit, ut non
audiret legem spiritaliter; sed e contrario festinaret dei sacramenta
non cernere, nec diceret cum dauid: reuela oculos meos, et considerabo
mirabilia de lege tua. idcirco errat cor eius, et iudaica superstitione
completum, non in caritate dei, sed in timore consistit, ut habeat
spiritum seruitutis in timore, et nequaquam spiritum adoptionis, in quo
clamamus: abba pater. unde praecipitur ei, ut accedat ad mensam ciborum
spiritalium, comedant que omnes in ea, qui illius sequuntur exemplum, et
bibant. et ueteri errore contempto consurgant in spiritu qui iacebant
in littera, et fiant principes dicant que cum propheta: domine, ut scuto
bonae uoluntatis tuae coronasti nos.
haec enim dixit mihi dominus: uade et pone speculatorem, et
quodcumque uiderit annuntiet. et uidit currum duorum equitum, ascensorem
asini, et ascensorem cameli, et contemplatus est diligenter multo
intuitu, et clamauit leo. lxx: quia sic dixit ad me dominus: uade et
pone tibi speculatorem, et quodcumque uideris, annuntia.
et uidi ascensores equites duos, ascensorem asini, et ascensorem cameli;
audiui auditum multum, et uocaui uriam ad speculam. iubetur propheta
ponere in corde suo speculatorem et diligentius intueri quae uentura
sunt mundo; uidit que duos equites, ascensorem asini et ascensorem
cameli. quos quidam sic interpretatus est ut ascensorem asini iuxta
euangelicam lectionem et prophetiam zachariae, christum diceret; et e
contrario ascensorem cameli, contrariam fortitudinem, propter foeditatem
tortuosi animantis. alii uero duos ascensores litterae et spiritus ad
duo referunt testamenta. illud que quod in hebraico dicitur arie, pro
quo aquila et symmachus leonem et leaenam interpretati sunt, nescio quid
uolentes lxx ourian~g posuerunt, quod quidam lumen domini interpretari
putat, cum aliis litteris lumen domini, quod hic non habetur, et aliis
scribatur leo, qui hic legitur. uult que speculatorem istum, quem
iubetur propheta ponere in corde suo, appellari uriam, et per
interpretationem nominis refert ad christi intellegentiam, ut ipso
habitante in nobis, possimus cernere quae uentura sunt. quod quidem et
leoni poterit coaptari, qui a iacob et balaam sub christi mysterio
nominatur.
super speculam domini ego sum, stans iugiter per diem, et super
custodiam meam ego sum, stans totis noctibus. ecce iste uenit ascensor
uir bigae equitum, et respondit et dixit: cecidit, cecidit babylon, et
omnia sculptilia deorum eius contrita sunt in terra. tritura mea, et
filii areae meae, quae audiui a domino exercituum deo israel, annuntiaui
uobis. lxx: dominus dixit: steti per totam diem, et super castra ego
steti tota nocte; et ecce ipse uenit ascensor bigae, et respondens ait:
cecidit, cecidit babylon, et omnia simulacra eius, et manufacta contrita
sunt in terra. audite qui derelicti estis, et doletis; audite quae
audiui a domino sabaoth, deus israel annuntiauit nobis. stat propheta in
specula domini, et in illius lumine constitutus, quae sint uentura
prospicit. hanc que habet custodiam, et hoc sibi officium delegatum, ut
in saeculi istius tenebris quae sint uentura conspiciat. ecce iste,
inquit, uenit; hoc quod sequitur, se uidisse significans uenire dominum
saluatorem sedentem super bigam, et duobus equis, immo animantibus,
asino et camelo, unum currum iungentem. qui ascensor bigae desideranti
prophetae, et uerba eius audire cupienti, respondit et dixit: cecidit,
cecidit babylon, totius orbis confusio; et in aduentu meo cecidit, quo
humanum corpus assumpsi, et penitus in consummatione mundi ruitura est.
et omnia sculptilia eius contrita sunt in terra. pro quo septuaginta
simulacra et manufacta interpretati sunt, significantes scripturam
haereticorum uarios que errores haereseon, qui fabricatores sunt
idolorum, et adorant quae de suo corde finxerunt. quod que sequitur ex
persona prophetae dicentis: tritura mea, et fili areae meae, quae audiui
a domino exercituum deo israel, annuntiaui uobis; iuxta hebraicum hunc
habet sensum: o popule, qui condendus es in horrea mea, quem idcirco
triui in uariis angustiis, ut paleas ab eo excuterem, et purissimum
triticum in meis horreis conderetur, quae audiui a domino exercituum deo
israel esse uentura uniuerso mundo, haec uobis qui in mundo estis
omnibus nuntiaui. alii uero dicunt adhuc superiorem esse personam,
uidelicet domini saluatoris, quod ipse loquatur ad apostolos: quae
audiui a patre annuntiaui uobis. et quia pro hoc in lxx legitur: audite
qui relicti estis, et doletis; hic mihi iuxta interpretationem eorum
sensus uidetur: o apostoli, de quibus scribit esaias: nisi dominus
reliquisset nobis semen, quasi sodoma essemus, et similes gomorrae
fuissemus, quorum reliquias et apostolus ad romanos docet esse saluatas,
qui relicti estis de populo iudaeorum ut saluaremini; et doletis super
perditione gentis uestrae, de qua et alibi legimus: tristitia est cordi
meo, et dolor continuus pro fratribus meis, qui sunt israelitae secundum
carnem; haec quae audiui a deo patre, uobis annuntio, quae deus israel
uobis uentura praedicit.
onus duma. ad me clamat ex seir: custos, quid de nocte? custos,
quid de nocte? dixit custos: uenit mane, et nox. si quaeritis, quaerite;
conuertimini, et uenite. lxx: uisio idumaeae, ad me clamat de seir:
custodite propugnacula, custodio mane et nocte; si quaeris, quaere; et
apud me habita. uerbum hebraicum elai, quod omnes interpretati sunt: ad
me, si uolueris legere eli, interpretatur deus meus, uel fortis meus.
quod que nos diximus, clamat, uel uocat, id est kalei~g, secundum
hebraei et graeci sermonis ambiguitatem dici potest clama, uel uoca; et
est sensus: deus qui est custos meus, die ac nocte me ad paenitentiam
uocat, ut relinquens seir, quod interpretatur hispidus ac pilosus,
reuertar, et habitem apud eum. duma uel similitudinem uel silentium
sonat. idumaea autem in terrenam uertitur.
dominus ergo loquitur ad apostolorum chorum, et praecipit ei: ad me uoca
eos qui sunt de seir, ut mihi seruiat gentium multitudo, quae in
similitudinem esau nihil in se habet molle et lene ac nitidum, sed est
hispida, fera, intractabilis. et o uos, apostoli, postquam uocaueritis
ad me nationes de seir, custodite ecclesiae propugnacula, ne facile
hostis irrumpat, ne leo rugiens atque circuiens, qui quaerit aditum per
quem possit intrare, clausum in ecclesia gregem laceret atque disperdat.
respondit que ecclesiae multitudo: non solum in prosperis, sed in
aduersis, hoc est: et in die et in nocte, tua, deus, praecepta seruabo.
ad quam loquitur deus: si uere me quaeris, opere ostende quod me
quaeras; nec semel tibi quaesisse sufficiat; sed quem inueneris, semper
inquire; et ut perfectius teneas, obliuiscere populi tui et domus patris
tui, et deserto errore gentilium, apud me in ecclesia commorare. hoc
iuxta lxx dixerimus, qui uisionem idumaeae, hoc est terrenae, ponunt in
titulo, ut eos ostendant uocari, qui prius terrenis operibus seruiebant.
porro iuxta aquilam, qui duma, hoc est silentium, posuit, uel
similitudinem, sic possumus intellegere, ut ad similitudinem populi
israel prouocetur gentium multitudo et ubi prius silentium fuerat legis
dei, ibi confessionis clamor sit; et oleaster inseratur in bonam oliuam.
legimus et in parabola euangelii missos seruos, qui uocarent bonos et
malos, ac patrisfamilias de quibuslibet implerent conuiuium, quia
priores uenire noluerunt. potest et ecclesia narrare quod dominus de
seir, hoc est de terrenis locis, ad se uociferetur, se que prouocet ad
salutem, et dicat ad ipsum dominum: o custos, quid de nocte consurgens
uersaris in tenebris? quid absque peccato in carne es peccatrice? qua
causa uoluisti humanum corpus assumere? respondit custos, hoc est
samaritanus, qui in euangelio uulneratum suis humeris ad stabulum
reportauit: uenit mane et nox. et est sensus: gentium multitudini ortus
est sol iustitiae, et iudaeis uenerunt tenebrae. iuxta quod dicitur a
domino: in iudicium mundi istius ego ueni, ut non uidentes uideant et
uidentes caeci fiant. et ipse custos qui dixerat: uenit mane et nox,
loquitur ad gentium multitudinem: si me quaeritis, studiosius quaerite.
conuertimini ad me, filii conuertentes et ego sanabo contritiones
uestras et uenite ad me. loca difficilia sunt, et cum secundum historiam
minime pateant, cogimur iuxta anag�g�n~g diuersas opiniones sequi.
onus in arabia. hoc in editione lxx interpretum non habetur; sed
quod sequitur: in saltu ad uesperam dormietis in semitis dodanim, cum
priori uisione coniunctum est, ut legatur: si quaeris, quaere; et ad me
habita in saltu. arabia in lingua nostra uesperam sonat, quae noctis et
tenebrarum principium est, omnis que qui habet initium peccatorum,
uersatur in uespera. qui autem uenit ad summum, in media nocte
consistit. unde et in aegypto primogenita in media nocte caeduntur. et
apostolus petrus, antequam gallus cantaret, ter dominum negauit, quod
media nox intellegitur. postquam autem nox praecessit et coepit dies
appropinquare, superatis mediae noctis tenebris et gallo lucis nuntio
resonante, fleuit amare, et intellexit peccatum suum, et eo tempore
dicere potuit: ad uesperam demorabitur fletus, et ad matutinum laetitia.
hoc interim de praesenti loco. ceterum nomen arabiae, id est uesperae
et occidentis, in aliis scripturarum locis diuersas intellegentias
recipit.
in saltu ad uesperam dormietis, in semitis dodanim. lxx: in saltu
ad uesperam dormietis in uia dedan. qui in malitia esse coeperunt, et
peccatorum ingrediuntur uiam, non dormiunt, nec morantur in agris
consitis et noualibus, nec in pratis et segetibus, quas ad metendum esse
candentes saluator docet, nec inter arbores pomiferas; sed in
infructuosis saltibus, ubi uepres et spinae sunt, et bestiae
commorantur. de huiuscemodi saltu et in regum uolumine legimus, quod
plures deuorauerit silua uel saltus, quam interfecti sint gladio, quando
abessalon aduersus patrem exstitit perduellis. recte que quia uespera
principium malorum est, in uia et in semitis habitare dicuntur, et in
uia dedan, quod interpretatur iudicia. quot enim habent peccatorum
genera, tot iudiciorum merentur sententias.
potest autem dedan et grande iudicium interpretari.
occurrentes sitienti ferte aquam, qui habitatis terram austri,
cum panibus occurrite fugienti. a facie enim gladiorum fugerunt, a facie
gladii imminentis, a facie arcus extenti, a facie grauis proelii. lxx:
in occursum sitienti ferte aquam qui habitatis in regione themam, cum
panibus occurrite fugientibus propter multitudinem occisorum; propter
turbam errantium; propter multitudinem gladii et propter multitudinem
arcuum intentorum, et propter multitudinem cadentium in bello. uos qui
estis in theman, quod interpretatur auster atque perfectio, et in eo
uersamini loco, de quo scriptum est: deus ab austro ueniet, et qui
consummati estis atque perfecti et habetis in uobis lumen scientiae
scripturarum, fugientibus de arabia et de saltu, occurrite cum aqua et
panibus, et nolite exspectare donec ipsi ad uos ueniant; sed imitamini
illum euangelicae parabolae patrem, qui occurrit filio reuertenti. et
ille quidem dedit stolam, obtulit annulum; uos autem aquas et panes
offerte fugientibus, ut qui lassi erant atque confecti, uestra
misericordia sustententur, et ad sedes uestras citius transeant.
fugerunt enim gladios haereticorum, doctrinam gentilium, blasphemias
iudaeorum. et quia multos uiderunt eorum iaculis interfectos et
cecidisse in proelio plurimos, ipsi cupiunt uestro auxilio liberari.
locus hic proprie aduersus eos intellegi potest, qui tradentes se otio
atque desidiae, propria salute contenti sunt, nec paenitentibus atque
conuersis porrigunt manum.
quoniam haec dicit dominus ad me: adhuc in uno anno, quasi in
anno mercenarii, et auferetur omnis gloria cedar et reliquiae numeri
sagittariorum fortiter de filiis cedar imminuentur. dominus enim deus
israel locutus est. ideo uobis dico, ut occurratis cum aqua et panibus
fugientibus de saltu et arabia, quia dominus haec futura pollicitus est.
sicut annus mercenarii cito praeterit, qui cotidie nihil aliud nisi
mercedem sui laboris exspectat, uel certe semper in opere est ac labore,
ut mercedem laboris accipiat, sic omnis gloria cedar, quod
interpretatur tenebrae, de quo et in psalmo legimus: habitaui cum
habitantibus cedar, uelociter auferetur, et omnis sagittariorum, id est
diuersorum dogmatum, numerus, qui constitutos in saltu arabiae
uulnerabat, redigetur in nihili, postquam fugientes de saltu fuerint
liberati. et aquam baptismi salutaris acceperint, comederint que
caelestem panem. haec enim futura dominus omnium, et proprie deus
israel, id est mente cernentium deum, locutus est.
22. onus uallis uisionis. lxx: uerbum uallis sion. in libro
hebraicorum nominum posuimus, sion interpretari speculam, quae in
sublimibus sita, de longe uenientia contemplatur. cum igitur sion iuxta
leges tropologiae referatur ad ecclesiam, ut est illud in secundo psalmo
ex persona domini saluatoris: ego autem constitutus sum rex ab eo super
sion montem sanctum eius; et: qui confidunt in domino sicut mons sion;
et: diligit dominus portas sion super omnia tabernacula iacob; et
manifestius apostolus: accessistis, inquit, ad sion montem et ciuitatem
dei uiuentis, hierusalem caelestem; quaerimus quare in praesenti
uisione, uallis sion dicatur. ipsa que uerborum consequentia trahimur ad
intellegentiam spiritalem, ut omnes peruersorum dogmatum principes, qui
corruerunt de sublimitate sensus sanctarum scripturarum, et ad humilia
deuoluti sunt, sciamus in sion ualle uersari. tale quid puto et
salomonem in prouerbiis dicere: oculum qui irridet patrem, et despicit
senectutem matris, effodiant eum corui de conuallibus, et comedant illum
pulli aquilarum. statim enim ut sensus haereticorum irriserit creatorem
patrem, et senectutem ecclesiae matris despexerit, effoditur a tetris
et immundis uolucribus, quae referuntur ad contrarias fortitudines. nec
possunt istiusmodi dicere: leuaui oculos meos in montes, unde ueniat
auxilium mihi; sed in modum brutorum animantium ad terrena depressi
sunt. quid nunc tibi quoque est quia ascendisti et tu omnis in tecta?
lxx: quid factum est tibi nunc, quia ascendistis omnes in tecta uana?
hoc quod iuxta lxx interpretes in regum uolumine quaeritur, quid sibi
uelit dicente eliseo: ubi est deus eliae aphpho?, in praesenti loco
manifestius ponitur, pro eo enim quod lxx transtulerunt: nunc; in
hebraeo habet aphpho, quod nos interpretati sumus: nunc quoque, et
aquila uolens hebraicum seruare idioma, posuit kaipertoi~g, quam
coniunctionem latinus sermo non explicat. quando autem dicit:
quidnam tibi quoque est? interrogat cur inter alios et ipsa
conscendat, atque opinione sublimium in humilibus commoretur. et est
sensus: cum philosophi tumeant, et omnis sapientia saecularis de
sublimibus disputans, simplicitatem contemnat ecclesiae, cur tu quoque
excelsa sectaris? quae lxx s�mantik�teron~g 'd�mata~g mataia~g', id est
tecta uana, interpretati sunt, ut ostenderent esse et aliud tectum, de
quo saluator descendere prohibet, quod tamen non sit tectum uanum.
denique et apostolus petrus hora orationis sexta ascendit in tectum.
nunc autem, ut ostenderet multam haereseon uarietatem, non unum tectum,
sed tecta plurima nominauit.
clamoris plena, urbs frequens, ciuitas exsultans. lxx: repleta
est ciuitas clamantium, urbs exsultans. doctrina haereticorum non in
sensu, sed in multiloquio et clamore uersatur. unde ob multitudinem
deceptorum frequens ciuitas appellatur et exsultans propter superbiam.
inflati enim tument, et sacratiora se inuenisse gloriantur.
interfecti tui non interfecti gladio, nec mortui in bello. lxx:
uulnerati tui non uulnerati gladio nec mortui tui mortui in bello.
maxima pars absque ullo certamine et disceptatione, haereticorum
deceptionibus supplantatur, et haec est turba quam plurima. interfecti
igitur, siue ut septuaginta transtulerunt, uulnerati uallis sion, non
sunt interfecti et uulnerati gladio, sed uoluntate propria ad haereticos
transierunt, et comparatione eorum, qui post proelium uicti sunt,
infelicius ille uulneratus et interfectus est, qui sponte se tradidit.
quomodo et in martyrio qui post poenas uictus manus dedit, leuioris
poenae est eo qui absque ulla necessitate et dolore cruciatuum christum
negauit.
cuncti principes tui fugerunt simul, dure que ligati sunt. in hoc
loco septuaginta interpretationem secuti sumus, quia non multum ab
hebraico distat in sensu. ceterum ut uerbum ex uerbo de hebraeo
transferam, ita apud eos legitur: omnes primates tui migrauerunt simul,
ab arcu ligati sunt, quam editionem et alii interpretes secuti sunt.
migrauerunt enim omnes haereticorum principes ad synagogam satanae a
christi ecclesia, et transierunt simul discordes in perfidia, in
transitu concordes, et ligati sunt ab arcu, de quo in psalmo scriptum
est: ecce peccatores intenderunt arcum, parauerunt sagittas suas in
pharetra, ut sagittent in obscuro rectos corde, et mittant ignita
diaboli iacula quae uulnerent pariter, et ligent. ideo que dure ligati
sunt, quia obturauerunt aures suas sicut aspides surdae, et obturantes
aures, quae non exaudient uoces incantantium, nec uenefici incantantis
sapienter. ob quam causam, et apostolus paulus haereticum post unam
commonitionem, peruersitati suae praecipit relinquendum, quia peruersus
est, et proprio iudicio condemnatus. ex nobis enim exierunt, sed non
erant ex nobis; si enim ex nobis fuissent, mansissent utique nobis cum.
horum principum fugitiuorum ille princeps est, quem idem esaias uocat
draconem fugientem, colubrum tortuosum, qui cum uerba mortifera in aures
miserit deceptorum, dure eos ligat, et de uinculis suis exire non
patitur, de quibus sanctus erutus gratulabatur in psalmo: anima mea
sicut passer erepta est de laqueo uenantium. et in alio loco gaudens
quod euaserit, loquitur: susceptor meus es tu, et refugium meum, deus
meus, sperabo in eum. quoniam ipse eruit me de laqueo uenantium, et a
uerbo aspero, siue turbulento, quod proprie haereticorum doctrinam
significat.
omnes qui inuenti sunt in te, uincti sunt pariter, procul
fugerunt. lxx: et fortes in te longe fugerunt. adhuc sermo prophetae
contra uallem sion, cuius habitatores ascenderunt in tecta uana, et
clamauerunt clamore confuso, et uulnerati sunt absque proelio, cuius
principes omnes fugerunt et dure ligati sunt, et qui fortes inter eos
erant, longius aufugerunt. quanto enim quis in haeretica peruersitate
prudentior est, tanto longius recedit a domino. quod autem dicit iuxta
hebraicum: omnes qui inuenti sunt in te, hoc notare debemus, quod et
haeretici eos quos deceperint, inuenisse se dicant; sed inuentio eorum,
perditio est. denique pariter colligantur, et procul fugiant. nec mihi
placet illa expositio, secundum diuersitatem haereseon diuersa esse et
spatia fugientium, cum scriptura sancta dicat: omnes qui ab haereticis
sunt reperti pariter colligatos, et fugisse longissime, dicente domino:
qui non est me cum contra me est; et qui me cum non colligit, spargit.
unde de moyse dicitur: appropinquabat moyses solus ad deum, ceteri uero
non appropinquabant.
deus enim sanctis suis, deus appropinquans est, et non de longe, dicit
dominus.
propterea dixi: recedite a me, amare flebo; nolite incumbere ut
consolemini me super uastitate filiae populi mei. dies enim
interfectionis et conculcationis et fletuum a domino deo exercituum in
ualle uisionis, scrutans murum et magnificus super montem. lxx:
propterea dixi: dimitte me, amare flebo; nolite contendere, ut
consolemini me super contritione filiae generis mei, quia dies tumultus
et perditionis et conculcationis, et error a domino deo sabaoth in ualle
sion; errant a minimo usque ad maximum; errant super montes. et samuel
plangebat saul, et dominus atque saluator flebat hierusalem; et
apostolus scribit ad corinthios: ne cum rursus uenero ad uos, humiliet
me deus, et lugeam multos qui ante peccauerunt, et non egerunt
paenitentiam. unde compatientis affectu et ad alios loquitur: quis
infirmatur, et ego non infirmor? quis scandalizatur, et ego non uror?
igitur et propheta uidens populum quondam uisionis uana tecta
conscendere et in clamore uersari, cunctos que principes eius fugisse,
et ligatos esse uinculis peccatorum, erumpit in lacrimas, et abigit
consolantes, et fletu amarissimo se flere testatur, non super filios,
sed super filiam populi sui, quae uirilitatis perdidit dignitatem. dies
enim iudicii et interfectionis et conculcationis nequaquam erit
hierusalem, quae interpretatur uisio pacis, sed antiqui nominis iebus,
quae interpretatur conculcatio. fletuum quoque siue erroris, ut
septuaginta transtulerunt, a domino sabaoth, non quo fletus et error a
domino sit, sed per occasionem sanctarum scripturarum, quas dominus
legendas dedit, illis nascitur erroris occasio, qui possunt dicere:
quare nos errare fecisti a uia tua? et in alio loco: dominus eis miscuit
spiritum erroris, ut non in uisionis monte, sed in sion ualle
consisterent. haec autem ipsa dies, quae a domino exercituum in ualle
oritur uisionis, ut singulorum opera demonstret, scrutatur murum
haereticorum, quem aduersum ecclesiam quasi firmissimum propugnaculum
construxerunt; et magnificum gloriosum que id est doctores eorum, qui se
super christo monte consistere gloriantur. de quo alibi legimus:
uenite, ascendamus in montem domini, et in domum dei iacob; et
annuntiabit nobis uiam suam. porro quod lxx transtulerunt: errant a
minimo usque ad maximum, errant super montes, hoc sentire debemus, in
maiori scelere esse eos, qui maiores sunt, et tamen a minimo usque ad
maximum errare cunctos, et errare super montes: moysen, hieremiam
ceteros que prophetas, euangelistas et apostolos. cum que in ualle
uersentur, mirum in modum errant in montibus.
et aelam sumpsit pharetram, currum hominis equitis, et parietem
nudauit clipeus. et erunt electae ualles tuae plenae quadrigarum. et
equites ponent sedes suas in porta. et reuelabitur operimentum iudae; et
uidebis in die illa armamentarium domus saltus; et scissuras ciuitatis
dauid uidebitis, quia multiplicatae sunt. lxx: elamitae autem tulerunt
pharetras; ascensores homines super equos et congregatio pugnantium, et
erunt electae ualles tuae, implebuntur quadrigis, et equites stipabunt
portas tuas; et reuelabunt portas iudae; et aspicient die illo in domus
electas ciuitatis; et reuelabunt abscondita domorum arcis dauid, et
uidebunt quoniam plures sunt. aelam, quod interpretatur ascensus eorum,
siue elamitae, ut lxx transtulerunt, quos in contemptores uertimus,
sumpserunt pharetram, ut sagittent in obscuro rectos corde, qui sunt in
curru equites hominum, ut parietem sion et ecclesiae firmamenta suo
clipeo et impugnatione denudent. erunt autem, inquit, electae ualles
tuae, et humilia dogmata, o uallis sion, plenae quadrigarum, quas
dominus cum pharaone submersit, quarum equites et ascensores ponent
sedes suas in portis tuis, ut obsessos in te atque conclusos non
patiantur exire. tunc omnipotens deus per ecclesiasticos uiros reuelabit
operimenta iudae; et uniuersa secreta eorum, qui in confessione fidei
constituti sunt, et tunc uidebis, o uallis sion, in die illa, et in
claro lumine ueritatis, omnem armaturam apostoli et domus saltus, in quo
gentium turba consistit. sicut et in cxxxi psalmo canitur: ecce
audiuimus eam in ephrata; inuenimus eam in campis siluae. cum autem
operimentum iudae atque secretum, quod prius propter mysterium
celabatur, fuerit reuelatum, et uideris armaturam ecclesiae; tunc
intelleges schismata ciuitatis dauid, quae multiplicasti, ut deceptos
tibi populos congregares. isti elamitae iuxta editionem lxx non habent
unam pharetram, sed plures; et ascensores sunt hominum, in quorum
equitant animabus; et plurima multitudo est ad pugnam se praeparans
contra ecclesiam. ita ut omnes ualles illius compleantur; et equites
obturent sensus eorum, et dimicatione sua ecclesiasticum uirum, qui
interpretatur iudas, prouocent ad certandum, quo proferente testimonia
scripturarum, et cuncta redarguente mendacia, uidebunt haeretici domos
ciuitatis dauid, et omnia prius secreta cognoscent, quomodo in arce
dauid qui interpretatur manu fortis, hoc est christi, omnia sint dogmata
ueritatis. obscura loca sunt, non solum iuxta historiam, sed iuxta
anag�g�n~g. quibus ergo nostra displicuerint, debent proferre sua, ut
explanationi eorum, si uera fuerit, acquiescamus.