Prologus
antequam sophoniam aggrediar, qui nonus est in ordine duodecim prophetarum,
respondendum uidetur his qui me irridendum aestimant, quod omissis uiris, ad uos scribam
potissimum, o paula et eustochium. qui si scirent oldam, uiris tacentibus, prophetasse, et
debboram iudicem pariter et propheten, hostes israel, barac timente, superasse; et iudith et
esther, in typo ecclesiae, et occidisse aduersarios, et periturum israel de periculo liberasse;
numquam post tergum meum manum curuarent in ciconiam. taceo de anna et elisabeth, et
ceteris sanctis mulieribus, quarum uelut siderum igniculos, clarum mariae lumen abscondit.
ad gentiles feminas ueniam, ut et apud saeculi philosophos uideant animorum differentias
quaeri solere non corporum. plato inducit aspasiam disputantem, sappho cum pindaro
scribitur et alcaeo; themista inter sapientissimos graeciae philosophatur; corneliam
gracchorum, id est uestram, tota romanae urbis turba miratur; carneades eloquentissimus
philosophorum, acutissimus rhetorum, qui apud consulares uiros et in academia plausus
excitare consueuerat, non erubuit in priuata domo, audiente matrona, de philosophia
disputare. quid referam catonis filiam, bruti coniugem, cuius uirtus facit ne patris mariti que
constantiam tantopere miremur? plena est historia tam graeca quam latina uirtutibus
feminarum, et quae integros libros flagitent. mihi tantum, quia aliud operis incumbit, in fine
prologi dixisse sufficiat, dominum resurgentem primum apparuisse mulieribus, et
apostolorum illas fuisse apostolas, ut erubescerent uiri non quaerere, quem iam fragilior sexus
inuenerat.
Caput 1
uerbum domini quod factum est ad sophoniam filium chusi, filii godoliae, filii amariae, filii
hiezechiae, in diebus iosiae, filii amon regis iuda. lxx similiter. tradunt hebraei cuiuscumque
prophetae pater aut auus ponatur in titulo, ipsos quoque prophetas fuisse. unde et amos unus
de duodecim prophetis, qui dixerat: non sum propheta, nec filius prophetae, sed pastor
caprarum, uellicans sycamina, patris nomen in titulo non habet. hoc si uerum est, sophonias
propheta, quem nunc conamur exponere, more, ut ita dicam, prophetico, et gloriosa maiorum
suorum stirpe generatus est; habuit enim patrem chusi, auum godoliam, proauum amariam,
atauum hiezechiam, et talem quadrigam ipse uelut extremus auriga compleuit. nomen
sophoniae alii speculam, alii arcanum domini transtulerunt. siue igitur specula, siue
absconditum domini interpretetur, utrumque prophetae conuenit. dicitur enim et ad
hiezechiel: fili hominis, speculatorem te posui domui israel, et in alio loco: non faciet
dominus quicquam, nisi reuelauerit disciplinam suam seruis suis prophetis, et noni psalmi
titulus, pro absconditis filii interpretatur. iste ergo propheta, qui erat in specula et in
sublimibus constitutus, et nouerat mysteria domini, filius erat chusi - qui interpretatur
humilitas, uel aethiops meus, de quo postea tractabimus -, habebat quoque auum godoliam,
qui dicitur magnitudo domini, et proauum amariam, qui et ipse uertitur in sermonem domini,
et atauum hiezechiam, qui sonat fortitudinem domini. de fortitudine itaque domini, natus est
sermo domini, et de sermone domini nata est magnitudo domini, et de magnitudine domini
nata est humilitas, ut cum peruenerit aliquis ad perfectum, dicat: non sum dignus uocari
apostolus, et illud in psalmis: domine, non est exaltatum cor meum, neque elati sunt oculi
mei. hucusque quasi prono lapsu, et per plana currentes, in eo quod chusi etiam aethiops
meus interpretatur, impegimus. nam post tantas uirtutes quomodo nomen aethiopis sonare
poterit in laudem? et siquidem scriptura dixisset chus, id est aethiops, uidebatur indissolubilis
quaestio; chus quippe natus est de cham. sed in eo quod ait, chusi, hoc est aethiops meus,
uidetur sonare mysterium; quod ille qui quondam aethiops fuerat, uersus in paenitentiam -
secundum illud quod dicitur: aethiopia praeueniet manus eius deo, et in alio loco: in
conspectu eius procident aethiopes -, dicat cum sponsa in cantico canticorum: nigra sum, et
speciosa filia hierusalem. legimus et in hieremia abdemelech eunuchum aethiopem placuisse
deo; et in actis apostolorum aethiopem eunuchum reginae candacis tantum habuisse studium
scripturarum et legis dei, ut in uehiculo legeret, et ad adorandum dominum in templo eius
ueniret hierusalem. unde talis fides digno praemio coronatur, et mittitur ad eum philippus
euangelista statim que docetur, credit, baptizatur et saluus est. et non solum eunuchus; sed
cum additamento uiri ponitur, eunuchus uir aethiops. quia enim eunuchus erat christi, et se
eunuchizauerat propter regnum caelorum, propterea uiri uocabulum non amiserat. recte
quoque sophonias quasi filius chusi, id est aethiopis, in consequentibus libri de paenitentia
scribit aethiopum: trans flumina, inquit, aethiopiae, inde deferent hostias mihi. haec de
genealogia sophoniae, qui prophetauit in diebus iosiae. quomodo autem dies dicuntur heliae
hi qui ab eo illuminati sunt, ita et dies iosiae qui se leuauerat ad dominum, quia iosias
interpretatur eleuatio domini; et fuit uir iustus et de laudibus eius, regnorum quoque et
paralipomenon scribit historia. et habuit patrem amon, auum manassen. legimus manassen
post multa scelera, et post captiuitatem in babylone, egisse paenitentiam, et ad meliora
conuersum domini misericordiam consecutum. unde et fidei suae, per quam crediderat deo,
filium uocauit epônumon~g, id est amon; siquidem amon fides interpretatur. simul que
considera, quod nequaquam ut supra reges decem tribuum, id est reges ponantur israel, sed
reges tantum iudae. iam enim decem tribus ab assyriis sub rege hiezechia patre manasse
deductae fuerant in captiuitatem. hoc in prooemio et in titulo sophoniae generationis et
temporis. nunc uideamus quid ipsa quoque prophetia contineat. congregans congregabo
omnia a facie terrae, dicit dominus, congregans hominem et pecus, congregans uolatile caeli,
et pisces maris; et ruinae impiorum erunt et disperdam homines a facie terrae, dicit dominus.
lxx: defectione deficiat a facie terrae, dicit dominus, deficiat homo et iumenta; deficiant
uolatilia caeli, et pisces maris; et infirmabuntur impii et auferam iniquos a facie terrae, dicit
dominus. hoc quod posuimus in septuaginta: et infirmabuntur impii, de theodotionis
translatione additum est, pro quo symmachus interpretatus est: et scandala cum impiis, ut
subaudiatur, congregabuntur, siue deficient; quinta autem editio: et infirmitas cum impiis
deficiet. debemus ergo, consuetudinem nostram sequentes, primum historiam texere, et
postea de sublimioribus disputare. extremum quippe regnum duarum tribuum, quae
uocabantur iuda et beniamin, sub iosia fuisse, nulli dubium est. illo enim interfecto, filii eius
qui postea regnauerunt, et nepotes, non tam regnasse credendi sunt, quam ludibrio habiti
fuisse ab aegyptio rege, et chaldaeis, et uariis captiuitatibus mortibus que cruciati. quia igitur
populus poterat se excusare in regibus malis et dicere: nos uolumus seruire deo, sed
prohibemur a regibus, datur rex iustus, quo zelante zelum domini, et populo nihilominus in
idolorum cultu perseuerante, iusta irae causa profertur a domino, et prophetatur de euersione
hierusalem, et captiuitate iuda, et uictoria nabuchodonosor. dicit que dominus per prophetam:
nequaquam ultra tribuam paenitentiam, sed a facie terrae uniuersa consumam; non homo, non
iumentum, non uolatile, non pisces maris remanebunt. iram quippe domini etiam bruta
sentiunt animalia, et uastatis urbibus hominibus que interfectis, solitudinem et raritatem
bestiarum quoque fieri et uolatilium piscium que, testis illyricum est, testis thracia, testis in
quo ortus sum, solum, ubi praeter caelum et terram et crescentes uepres, et condensa
siluarum, cuncta perierunt. hoc autem, inquit propheta, accidet, quia impiorum fuit nimia
multitudo. corruent itaque impii et disperdentur homines, et erit solitudo super faciem terrae.
sed et de consummatione mundi idipsum accipere possumus, quod et homines, et pecora, et
uolatilia, et pisces maris et uniuersa deficient, et infirmentur impii, et tollatur iniquitas a facie
terrae. quod si uoluerimus et altius aliquid intellegere - propter hoc quod dicitur a septuaginta:
defectione deficiat a facie terrae -, et defectionem in bonam partem accipere iuxta illud: et
deficiens mortuus est abraham in senectute bona, senex et plenus dierum, et appositus est ad
populum suum; et de his quae de isaac et iacob scriptura refert, uidebimus quomodo
defectione deficiant a facie terrae, et hoc eos implere praeceptum: qui habentes
conuersationem in caelis, et in carne, non secundum carnem militantes, eo quod sciant illos
qui in carne uiuunt, deo placere non posse, quantum in se est omnia agunt ne sint in carne,
sed in spiritu; et a terra recedentes aiunt: consuscitauit, et consedere nos fecit in caelestibus in
christo. quod si aliquis opposuerit aduersum hoc quod in bonam partem accepimus:
defectione deficiat a facie terrae, illud quod de ismael scriptum est: hi sunt anni uitae ismael,
centum triginta septem, et deficiens mortuus est, et appositus est ad genus suum,
respondebimus ei primum et ipsum ismael filium esse abraham, et accepisse dona et partes a
patre, secundum mensuram suam; deinde absolute scriptum: deficiens mortuus est, et non
addi, quod scriptum est de abraham: in senectute bona, senex et plenus dierum, et appositus
est ad populum suum. siue de isaac: fuerunt autem dies isaac quos uixit, anni centum
octoginta quinque, et deficiens isaac mortuus est, et appositus est ad genus suum senex et
plenus dierum. nec non et de iacob: et cessauit iacob praecipiens filiis suis, et leuans pedes
super lectum defecit, et appositus est ad populum suum. ex quo intellegimus aliud esse
tantum deficere, et aliud cum defectione plures pariter habere uirtutes. quod autem primum
dixerat generaliter: defectione deficiat a facie terrae, postea in partes diuisit scriptura diuina,
deficiat homo, et iumenta, deficiant uolatilia caeli, et pisces maris. quattuor sunt quae
iubentur deficere, primum homo rationabilis, deinde tria quae subiecta sunt homini, iumenta,
et uolatilia, et pisces quae puto et in octauo psalmo poni: insuper et pecora campi, uolucres
caeli et pisces maris, qui perambulant semitas maris. quod autem primum dixerat: oues et
boues uniuersas, quasi praecipua de iumentis separauit, et cum his quae mansere iumenta
numerare ea noluit. deficiat itaque homo, deficiant iumenta, deficiant uolatilia caeli, deficiant
pisces; et non dixit: deficiant bestiae, deficiant reptilia terrae. hae enim non debent deficere,
sed perire; uerum deficiant ea quae possunt habere correctionem. quomodo defecerunt sarae
muliebria, et iubetur abraham ut audiat quaecumque sara praeceperit. deficit quis ut homo, si
contemnat humana, et non ultra moriatur ut homo, et audiat: ego dixi, dii estis. deficit alius ut
iumentum, qui ad altiora conscendens non accusatur sermone prophetico: homo, cum in
honore esset, non intellexit; comparatus est iumentis insipientibus, et similis factus est illis.
deficit quasi uolatile caeli, qui facit sibi pennas aquilae, et reuertitur ad domum praeceptoris
sui diues, et omnem deserens paupertatem. deficit quasi piscis maris, qui comprehensus
sagenis domini, cum bonis piscibus separatur. cum haec iuxta praeceptum domini fuerint
perpetrata, infirmabuntur impii, non habentes tantum roboris quantum prius. sed et tollentur
iniqui - non dixit, occidentur, sed tollentur -, ut ad meliora conuersi, de impietate et iniquitate,
ad pietatem, iustitiam que translati, incipiant esse quod ante non fuerant. haec secundum
tropologiam. debemus enim et maiorum interpretationem ponere. iam in lectoris arbitrio erit,
utrum seueritatem, an clementiam uelit sonare quae dicta sunt. et extendam manum meam
super iudam et super omnes habitatores hierusalem; et disperdam de loco hoc reliquias baal,
et nomina aedituorum cum sacerdotibus, et eos qui adorant super tecta militiam caeli et
adorant et iurant in domino, et iurant in melchom; et qui auertuntur de post tergum domini, et
qui non quaesierunt dominum nec inuestigauerunt eum. lxx: et extendam manum meam super
iudam, et super omnes qui habitant hierusalem; et auferam de loco hoc nomina baalim, et
nomina sacerdotum cum sacerdotibus, et eos qui adorant super tecta militiam caeli, et eos qui
iurant in domino, et iurant in rege suo, et eos qui declinant a domino, et qui non requirunt
dominum, et qui non retinent dominum. post impiorum ruinas, et iniquorum ablationes a facie
terrae, consequenter aduersus iudam et aduersus hierusalem ex persona domini dicitur: et
extendam manum meam super iudam et super omnes habitatores hierusalem. extensio quippe
manus gestum percutientis ostendit. et disperdam de loco hoc reliquias baal. non quod
secundum lxx nomina baalim penitus eradenda sint, sed quod iuxta hebraicum cultores eius e
populo qui pauci de caede hostium remanserant in iuda et hierusalem, se comminetur auferre.
nomina quoque aedituorum cum sacerdotibus, quia in tantam iudas et beniamin uenerant
impietatem, ut in templo domini - iuxta quod scribit hiezechiel, et regnorum quartus liber
ostendit -, statuam baal, quam imaginem zeli dominus uocat, statuerint, et in eodem
sanctuario idola et dominum pariter uenerati sint. unde signanter idolorum sacerdotes, non
sacerdotes, sed temenitas~g, id est aedituos uel fanaticos appellauit quod hebraice dicitur
acchumarim. et aedituos ergo et sacerdotes quondam dei, et eos qui in domatibus adorabant
militiam caeli, solem et lunam et astra reliqua; et qui iurabant in nomine domini, et in nomine
idoli ammonitarum melchom - quod a lxx in regem uersum est -, auferet dominus de loco
hierusalem, siue disperdet, apo~g koinou~g enim subauditur. et disperdam de loco hoc
reliquias baal, et disperdam nomina aedituorum cum sacerdotibus, et disperdam eos qui
adorant super tecta militiam caeli, et disperdam eos qui adorant et iurant in domino, et iurant
in melchom, et disperdam eos qui auertuntur, siue declinant de post tergum domini, et qui
non quaerunt eum, siue non retinent. aduertuntur autem post tergum domini israel, qui
relinquentes cultum eius iurant in melchom, et adorant militiam caeli et uenerantur baal
idolum sidoniorum. hucusque historiae sensus expositus est, uideamus et anagogen. propter
dominum qui de tribu iuda ortus est, et propter hierusalem in qua regnauit iudas, hoc est
dominus atque saluator, dicamus quando multiplicata fuerit iniquitas, et refrixerit caritas
multorum, et ueniente domino rara fides apparuerit in terra, intantum ut temptentur etiam
electi dei tunc extendere dominum ad supplicia peccatorum manum suam super iudam, qui
sibi uidetur nomen domini confiteri, et super hierusalem, ecclesiam quae ex pace sortita
uocabulum est, et auferre de ecclesia nomina baalim, quod interpretatur in sublimioribus.
auferet autem dominus nomina uanae gloriae et admirationis falsae, quae uersantur in
ecclesia, in qua iuxta iacobum, ueneratur annulum aureum habens; et contemnitur pauper,
cum ad aduentum iudicis et senatoris, et in commune omnium diuitum, plebs uniuersa
consurgit, et sancto pauperi ne standi quidem inter cateruas potentium et concessiones eorum
tribuitur locus; sed et nomina sacerdotum cum sacerdotibus qui frustra sibi applaudunt in
episcopali nomine, et in presbyterii dignitate, et non in opere. unde signanter non ait, et opera
sacerdotum cum sacerdotibus, sed nomina, qui tantummodo falsa nomina praeferunt
dignitatum, et malis operibus sua nomina destruunt; et eos qui adorant super tecta militiam
caeli, qui eleuantur aduersus scientiam dei; et omne quod geritur in saeculo, fictam sibi
scientiam pollicentes, referunt ad ortus stellarum et occubitus, et mathematicorum sequuntur
errores, et eos qui adorant dominum et melchom, qui saeculo pariter et domino putant se
posse seruire et duobus dominis satisfacere, deo et mammonae; qui militantes christo,
obligant se negotiis saecularibus, et eandem imaginem offerunt deo et caesari, et cum christi
sacerdotes esse se dicant, filios suos consecrant melchom, id est, regi suo. recte enim habent
regem hominem, qui regem dominum perdiderunt, et qui per mala opera declinant a domino,
et non requirunt eum, retinent sua peccata fugientem. si quis autem uoluerit iuxta
interpretationem nominum iudae et hierusalem super anima uniuscuiusque hoc ipsum
intellegere, non errabit, quod auferat dominus uniuersa quae diximus uel in consummatione
mundi, uel in singulorum exitu, quando audient: stulte, hac nocte auferetur anima tua a te. et
extendat manum suam super eum qui dominum non confitetur, et super eum qui sensum pacis
se habere iactat, ut auferat atque disperdat de tali hierusalem omnem superbiam, et falsos in
deum cultus, et uariorum errores dogmatum, et seruitutem in deum pariter et mundum, et per
cotidiana peccata, auersionem a domino et neglectum in deum. silete a facie domini dei, quia
iuxta est dies domini, quia praeparauit dominus hostiam, sanctificauit uocatos suos. lxx:
timete a facie domini dei, quia iuxta est dies domini, quia praeparauit dominus uictimam
suam, sanctificauit uocatos suos. pro eo quod lxx transtulerunt, timete, et nos posuimus,
silete, in hebraeo interiectio est imperantis silentium, qua saepe utuntur et comici; sed et
absolute praecipitur in cunctis silentium, quod dies uentura sit domini. diem autem domini,
diem intellegamus captiuitatis et ultionis in populum peccatorem, et hostiam subuersionis
hierusalem, et sanctificationem eorum quos dedicauit interfectioni, secundum illud quod
dicitur in hieremia: sanctifica eos in die interfectionis eorum. et est sensus: uenit contra
impium populum olim praedicta captiuitas, iam prope est. sub iosia enim rege prophetia
texitur; hoc interfecto, timete a facie domini dei, quia iuxta est dies domini, quia praeparauit
dominus uictimam suam, sanctificauit uocatos suos. tota uastitas uenit, de qua et in
hiezechiel: uenit, inquit, finis; finis uenit, et cetera. haec mihi uictima placet, has mihi hostias
sanctificaui. potest autem hoc quod ait: sanctificauit uocatos suos, et de babyloniis accipi,
quos in ultionem populi etiam seruos suos uocat, uindicantes iniuriam suam. uocaui, inquit,
nabuchodonosor seruum meum. et in eodem uolumine, non solum seruum sed columbam
eum quoque uocat: a facie gladii columbae. porro secundum tropologiam, quia facies domini
est super facientes mala, ut perdat de terra memoriam eorum, et prope est iudicii dies, - quia
ad comparationem aeternitatis omne huius saeculi tempus breue est -, siue exitus singulorum;
timeant omnes, et sileant, ne facies domini - de qua sanctus ait: signatum est super nos lumen
uultus tui, domine -, peccatorum fenum, stipulam, ligna consumat. praeparauit enim dominus
hostiam suam, totum leuitici mysterium, quando per ignem et effusionem sanguinis, et ueram
oblationem salui fient, qui saluandi sunt, et sanctificabuntur uocati. quidam de nostris, diem
domini et hostiam eius, et sanctificationem uocatorum, in aduentu saluatoris intellegunt,
quando immolatus est agnus, et in sanguine eius sanctificati sunt apostoli, et ceteri qui per eos
uocati sunt. et erit in die hostiae domini, uisitabo super principes, et super filios regis, et super
omnes qui induti sunt ueste peregrina. et uisitabo omnem qui arroganter ingreditur super
limen in die illa, qui complent domum domini dei sui iniquitate et dolo. lxx: et erit in die
hostiae domini, et ulciscar super principes, et super domum regis, et super omnes qui induti
sunt uestimentis alienis; et ulciscar super omnes manifeste, qui sunt in uestibulis in die illa,
qui complent domum domini dei sui impietate et dolo. in die iudaicae captiuitatis, quando
totus populus immolandus est, uisitabit dominus, et super principes qui mane bibebant
siceram, et super filios regis uel omnes de stirpe regia, uel certe proprie filios iosiae, quos uel
occisos uel captos legimus; et super omnes qui induti sunt ueste peregrina, hoc est qui pro dei
cultu uenerati sunt idola. et super omnes quia arroganter ingrediuntur super limen in die illa,
hoc est aduersum superbos, qui cum quodam fastu et dignitatis supercilio, gradus templi et
sanctuarii limen ascendunt. porro qui in eo ubi nos interpretati sumus: qui arroganter
ingrediuntur super limen, potest intellegi secundum hebraicum, qui transiliunt limen; et hoc
historice sentiendum est, uindicabo super eos, qui iuxta regnorum primum librum non calcant
limen idolorum, superstitionibus seruientes, qui repleuerunt domum domini dei sui non solum
idolorum cultu, sed iniquitate et scelere et omni mendacio, ut ad errorem religionis iniquitas
quoque in subiectos et in proximos mendacium iungeretur. sed quia semel et tropologice
exponere coepimus: uisitabit dominus in aduentu et passione saluatoris, id est in die hostiae
filii sui super pontifices et sacerdotes populi iudaici et super domum regiam. usque ad illud
enim tempus perseuerauerunt reges iudae de stirpe dauid, secundum prophetiam iacob: non
deficiet princeps ex iuda, neque dux de femoribus eius, donec ueniat cui repositum est, et ipse
erit exspectatio gentium. post hostiam enim domini ablatum est regnum a iudaeis. et super
omnes, inquit, qui induti sunt uestimentis alienis, qui recesserunt a protectione et indumento
dei, et suo errore cooperti sunt. et ulciscar super omnes manifeste qui sunt in uestibulis, hoc
est qui egressi sunt de templo dei; et cum deberent esse intrinsecus, propter peccata sua
egressi sunt foras, et de ecclesia dei recesserunt, adimplentes templum eius impietate et dolo.
hoc intellectum sit in primo saluatoris aduentu. quia autem de consummatione mundi et die
iudicii, quem omnes in die interpretantur domini, semel exposuimus, scire debemus, quod illo
tempore uisitet dominus super principes et super pastores, qui lac de ouibus comedunt lanas
que tondentes, non curant de contritione gregis, et super filios regis qui se iactant christianos,
et quod regis christi sint filii, gloriantur, et super omnes qui induti sunt uestibus alienis. uestis
filiorum regis et principum indumentum, christus est, quod accipimus in baptismo, iuxta
illud: induite uos christum iesum, et: induite uos uiscera misericordiae, bonitatis, humilitatis,
mansuetudinis, patientiae, et cetera. in quibus praecipitur, ut induamur nouo homine caelesti,
iuxta creatorem nostrum, et proiciamus indumentum ueteris hominis cum operibus eius. cum
ergo debeamus talibus indui uestimentis, pro misericordia induimur crudelitate, pro patientia,
impatientia, pro iustitia, iniquitate. et ut semel dicam, pro uirtutibus, uitiis; id est pro christo,
antichristo. unde dicitur de istiusmodi homine: et indutus est maledictione sicut uestimento.
uindicabit quoque dominus manifestissime in aduentu suo, etiam super eos qui cum bonis
operibus in ecclesia esse deberent, eiecerunt se ob conuersationem pessimam; et traditi
satanae uersantur in uestibulis, immo nec in uestibulis, sed ante uestibula, quod significantius
graece dicitur epi~g ta~g propula~g. et super omnes uindicabit, qui uariis iniquitatibus atque
peccatis implent ecclesiam, et impietatibus atque mendacio, et miscent sanguini sanguinem.
quod si uoluerimus hoc ipsum accipere super animabus singulorum, principes et domum
regis, intellegamus logismous~g, id est cogitationes et sensus, et ipsam animam, quae debet
esse hospitium regis; et iuxta superiorem expositionem indumenta quoque aliena, et omnia
quae sequuntur, referamus ad unumquemque credentium, qui cum debuerant induti esse
christo, et semper uersari intrinsecus, uariis se peccatorum operuerunt uestimentis, et egressi
de ecclesia, id est congregatione sanctorum, pro uirtutibus impleuerunt templum corporis sui
iniquitate et dolo. et erit in die illa, dicit dominus, uox clamoris a porta piscium, et ululatus a
secunda, et contritio magna a collibus. lxx: et erit in illa die, dicit dominus, uox clamoris de
porta compungentium, et ululatus a secunda, et contritio magna a collibus. in die hostiae
domini quando extenderit manum suam super iudam et super omnes habitantes hierusalem, et
hostilis eam uallauerit exercitus, erit uox clamoris a porta piscium et ululatus a secunda, et
contritio magna a collibus. portam piscium eam uocabant, quae diospolim ducit et ioppen, et
uicinior mari erat inter cunctas uias hierusalem, de qua et esdras refert: portam uero piscium
aedificauerunt filii asnaa, ipsi texerunt eam, et statuerunt ualuas et seras et uectes. quod autem
ait: et ululatus a secunda, secundi muri in eodem climate portam significat, de qua et in
regnorum libro scriptum est: et iuit helchias sacerdos, et ahiham, et achabor, et saphan, et
asaias ad oldam propheten, uxorem sellum filii thecuae, filii haras, custodis uestium, et haec
habitabat hierusalem in secunda. contritionem autem magnam a collibus de monte sion et
excelsiore urbis parte loquitur, quia cum altiora et arx ciuitatis fuerint occupata, facilior est in
prona descensus. si autem diem illam quam dominus comminatur, diem iudicii ut supra
uoluerimus accipere, eo tempore quando uetustus dierum sessurus est, et aperiendi libri, et
pandendae conscientiae singulorum, tunc implebitur uox clamoris a porta compungentium.
prima enim porta oculorum erit, quando exhibebuntur nobis peccata ante oculos nostros, et
omnis pompa et imago antiquorum scelerum et uitiorum atque luxuriae proferetur in medium.
tunc illud erit uerum quod scriptum est: ecce homo et opera eius ante faciem eius. torquebit
igitur eum conscientia, et postquam compunctus clamauerit a prima oculorum porta, ululabit
etiam a secunda, quam et aures intellegere possumus. per hos enim uel maxime sensus,
quibus uitia illapsa fuerant, eorum poena sentietur, quando cernemus quod fecimus et
audientes sermonem docti, totum que ordinem peccatorum, in ululatum compellimur, et
conteritur, in nobis quicquid fuerat excelsum, et propter caecitatem et surdas aures
ignorabatur a nobis. uel certe cum uerba sublimia et eruditio de excelso ueniens, conteret nos
atque confringet, et opere complebitur: rugiebam a gemitu cordis mei, ut sit sacrificium deo
spiritus contribulatus in nobis, qui homines sumus, et non tam grandia peccata fecimus, ut
montibus comparentur, colles contriti sunt. in diabolo autem et angelis eius, excelsa montium
conterentur. multi putant iuxta historiam quod ad babyloniorum tempora retulimus,
intellegendum esse de primo saluatoris aduentu, quando propter peccata nimia, et clamorem
populi concrepantem: sanguis eius super nos, et super filios nostros, circumdata est ab
exercitu hierusalem, et a duobus ursis, uespasiano uidelicet et tito, irridentium puerorum turba
consumpta est. quae quidem intellegentia magis fidei nostrae conuenit, sed ita ut sciamus et
priori historiae posse congruere, uel certe priorem captiuitatem typum esse secundae et
perfectae euersionis hierusalem. nec non et hoc animaduertendum - quia adagim manifeste in
hebraeo, non portam compungentium, sed portam piscium sonat -, allegorice, portam piscium
esse in hierusalem, per quam inferuntur boni pisces qui a malis fuerint separati, et lugebunt
ceteris introeuntibus, qui foris remanserint. uel certe in fine mundi et in consummatione
lugebunt a porta piscium prima, qui suum baptisma non seruauerunt; lugebunt a secunda, qui
non egerunt pro peccatis dignam paenitentiam. et erit magna contritio super colles, qui nec
pro peccatis incuruati sunt ut ceruicem suam submitterent, et sua scelera deplorarent. per has
enim duas portas baptismi et paenitentiae in hierusalem, id est in ecclesiam dei uel introitus
uel reditus est. ululate, habitatores pilae, conticuit omnis populus chanaan. lxx: plangite qui
habitatis concissam, quia assimilatus est omnis populus chanaan. pila quae hebraice dicitur
machtes, et ab aquila uersa est, eis~g ton~g holmon~g, non per breuem syllabam prima
legenda est, ne sphairan~g putemus, sed productam, ut de pila sciamus dici, in qua frumenta
tunduntur, uas concauum, et medicorum aptum usui, in quo proprie ptisanae feriri solent.
dicat aliquis intellexisse se quid significat pila, sed scire uelle cur in praesenti loco assumpta
sit. quia semel descriptio est captae urbis, et dicitur: uox clamoris a porta piscium, et ululatus
a secunda, et contritio magna a collibus; nunc idem descriptionis ordo seruatur, et de ululatu
dicitur eorum, qui habitant in ualle siloe. et pulchre scriptura non dixit, qui habitatis in ualle,
qui habitatis in gurgustio, sed qui habitatis in pila, quod scilicet quomodo frumenta feriente
desuper uecte, contunduntur, ita de porta piscium, et de porta secunda, et de collibus proruens
in uos decurret exercitus. populum autem chanaan appellauit populum iudaeorum iuxta illud
quod legimus in daniele: semen chanaan et non iuda; et ad hierusalem: pater tuus amorrhaeus,
et mater tua cethaea; et in alio loco: chanaan, in manu tua, statera iniquitatis. quod si
uoluerimus iuxta utramque translationem, tropologiam texere, recte ad ululatum et planctum
concitantur qui in extremis peccatorum faecibus habitant, et in scelerum suorum ima demersi
dicunt: infixus sum in limo profundi, et non est, inquit, substantia. unde et additur: qui
habitatis concissam, hoc est animam multis iniquitatibus uulneratam, siue ecclesiam, quae
schismatibus haeresibus que lacerata est, et ad singula uulnera plangit filios interfectos. quod
autem dicit: conticuit, siue assimilatus est omnis populus chanaan, blasphemiam eorum in die
iudicii cessare significat; et os quod in altum posuerunt, linguam que ad terram usque
penetrantem, aeterno silentio conticescere. et quia peccatum peccauit hierusalem, et ideo in
commotionem facta est, populus dicitur chanaan, quod interpretatur commotio. non enim
potest dicere: statuit super petram pedes meos, sed incertus et fluctuans semper in motu est.
unde et noe uir sanctus, postquam euigilauit e somno, ex maledictione nomen imposuit
chanaan, dicens: maledictus chanaan puer, famulus erit fratrum suorum. non solum autem
chanaan assimilantur peccatores, sed pro qualitate et diuersitate peccati, alius assimilatur
pharaoni, alius nemrod giganti. et econtrario, per bona opera atque uirtutes, quia et uirtutum
itinera sunt diuersa, ille spiritum assumit abraham, hic moysi, alius heliae, quamobrem ab
apostolo dicitur: aemulamini charismata meliora. qui uero perfectus est, iuxta eam tamen
perfectionem quam humana conditio potest capere, similitudine dei signatur. disperierunt
omnes inuoluti argento. lxx: disperierunt omnes qui erecti sunt argento. qui sibi, inquit, in
diuitiis confidebant, et tantas habebant opes, ut se quasi inuolutos et septos suis diuitiis
aestimarent, uel certe secundum lxx, qui erecti erant in superbiam et pauperes despiciebant,
ira ueniente, uastati sunt. simul que considera quod non dixerit: peribunt qui erecti sunt
argento, sed iam nunc, antequam eis ueniat supplicii dies, in eo ipso quod superbiant, et
semper de thesauris suis cogitent et seruent eos, perierint atque corruerint. quod qui
intellexerit, puto eum non satis cupere diuitias, in quibus non peribunt, sed perierunt qui
erecti sunt. neque uero aestimandum est eos solos periisse, qui argento erecti sunt, sed iuxta
hanc definitionem peribit et ille qui in generis nobilitate se iactat. dignitatibus peribit qui
inflatur; peribit qui in fortitudine corporis gloriatur; peribit qui femineo languore mollitus
comam nutrit, uellit pilos, cutem polit, et ad speculum comitur, quae proprie passio et insania
feminarum est. si quis autem uult erigi et superbire sancta superbia, erigatur cum apostolis,
quando dignus fuerit pro nomine iesu christi contumeliam pati, glorietur cum apostolo, qui
exsultabat in tribulationibus, sciens quod tribulatio operetur patientiam, patientia spem, spes
autem non confundat. et erit in tempore illo, scrutabor hierusalem in lucernis, et uisitabo
super uiros defixos in faecibus suis; qui dicunt in cordibus suis: non faciet bene dominus, et
non faciet male. lxx: et erit in die illa, scrutabor hierusalem cum lucerna, et ulciscar super
uiros qui contemnunt custodias suas, et dicunt in cordibus suis: non faciet bene dominus, et
non faciet male. in tempore et in die captiuitatis hierusalem uel a babyloniis uel a romanis -
quia dereliquit legem domini, et impie egit in dominum creatorem suum -, scrutabitur
dominus cum lucerna omnia abscondita hierusalem, et nullum inultum patietur effugere.
legamus iosephi historias, et ibi reperiemus scriptum, de cloacis quoque et speluncis, et antris
et sepulcris, extractos principes et reges et potentes et sacerdotes, qui se in eis metu mortis
absconderant. et uisitabo, inquit, super eos, qui confidunt in corporibus suis et in uiribus suis,
quas diasurtikôs~g, faeces uocat, siue peccata, in quibus penitus fuere defixi; qui tollentes
prouidentiam, nec boni nec mali deum auctorem esse dixerunt, hoc est quod nec bonis bona,
nec mala malis redderet, sed quod fortunae cuncta regerentur arbitrio et casu ferrentur incerto.
in consummatione autem mundi, quia dies domini ipsa intellegitur, scrutabitur dominus
hierusalem, id est ecclesiam suam cum lucerna; et ulciscetur super uiros contemptores, qui
noluerunt suas seruare custodias, id est mandata domini contempserunt, et insuper ratione se
peccare, dicentes, blasphemauerunt in cordibus suis; quod nihil prodesset benefacere, nec
obesset male agere, quia nec bonorum operum praemium, nec malorum poenam restitueret
deus. recte autem hierusalem, id est ecclesia - quae prius iebus uocabatur, quod dicitur
conculcata -, quando conculcabatur a gentibus, et daemonum ludibrium erat, dicta est iebus,
et postquam coepit in ea pax habitare domini, et factus est in pace locus eius, nomen
hierusalem sortita est. quia igitur in nouissimo tempore, quod saepe iam diximus multiplicata
iniquitate, refrigescat caritas, et solis lumen recedet ab hierusalem, et tanta erit uastitas, ut
difficile saluentur etiam electi dei; tunc in lucerna sermonis sui atque rationis omnia uitia
scrutabitur dominus in hierusalem, et in medium proferet, et de otioso quoque uerbo fiet
iudicium et uindicta, non in peccatores - poterat enim et peccatum ueniam promereri -, sed in
contemptores, de quibus dicitur in abacuc: uidete contemptores, et aspicite, et in alio loco:
quare non respicis ad contemptores, ac deinde: qui autem arrogans est, et contemptor, uir
superbus, et cetera. super his fiet ultio, qui custodias domini non seruauerunt, et dicunt in
cordibus suis: non faciet dominus bene, et non faciet male; non quod male deus faciat, sed
quod mala uideatur ei poena esse qui patitur. alioquin et scalpellus medici malus erit, quia
resecat uulnera, et putridas amputat carnes. et pater malus, caedens filium, ut a uitiis corrigat,
et magister malus, corripiens discipulum ut erudiat: omnis enim disciplina ad praesens non
uidetur gaudii esse, sed tristitiae; postea autem fructum pacificum his qui per eam eruditi
sunt, reddet. et erit fortitudo eorum in direptionem, et domus eorum in desertum. et
aedificabunt domos, et non inhabitabunt, et plantabunt uineas, et non bibent uinum earum.
iuxta est dies domini magnus; iuxta est, et uelox nimis. lxx: et erit fortitudo eorum in
rapinam, et domus eorum dissipabuntur. et aedificabunt domos, et non habitabunt in eis, et
plantabunt uineas, et non bibent uinum earum, quia iuxta est dies domini magnus; iuxta et
uelox nimis. manifestum est quod iuxta utramque captiuitatem omnis eorum sit caesus
exercitus, et domus dirutae, et agri uineae que uastatae sint, nec ultra eos dei distulerit
patientia. sed cum dicerent ad prophetas, hoc in tempus erit, et in dies longos, uenerit eis dies
domini magnus et uelox nimis. iuxta tropologiam autem cum uenerit tempus iudicii, siue
uniuscuiusque mortis et egressionis a saeculo, tunc omnis fortitudo eorum in direptionem erit,
ut quod male ualebat, et erigebatur aduersus dominum, infirmum fractum que uertatur ad
melius. uelut si quis fortitudinem latronis et piratae et furis diripiat, infirmos que eos reddat,
prodest illis sua infirmitas; debilitata enim membra quibus prius non bene utebantur, a malo
opere cessabunt. quod autem sequitur: et domus eorum in desertum, multi sunt in ecclesia
aedificantes sion in sanguine et hierusalem in iniquitate, quibus prodest tales domus destrui.
legamus leuiticum, ubi leprosa domus destrui iubetur. et quia lepra permanens est et
diffunditur, lapides eius et ligna et omnis puluis extra ciuitatem in locum immundum proici
iubetur. sed et in hieremiae principio tale aliquid scribitur: ecce dedi sermones meos in os
tuum; ecce constitui te hodie super gentes et regna, eradicare et suffodere, et disperdere et
aedificare, et plantare. destruitur aedificatio pessima, ut postea aedificatio bona construatur,
eradicatur iniqua plantatio, ut plantatio iuxta ponatur. unde et in salomone legimus: melius est
habitare sub diuo, quam in calce litis cum iniquitate et in domo noua. quasi bonus ergo deus
domos eorum, qui erant defixi in faecibus suis, et dixerant in corde suo: non faciet bene
dominus et non faciet male; destruit, nec eos in leprosis et immundis domibus habitare
permittit, nec facit ut bibant uinum de uineis, quas plantauerant. si enim plantassent uineam
sorec, et uineam electam totam ueram, bibissent uinum suum, et inebriati essent cum
patriarcha noe et ioseph in meridie; sed quia dixerunt: non faciet bene dominus et non faciet
male, et: de uinea sodomorum erat uinea eorum et propago eorum de gomorrha. uua eorum
uua fellis, et botrus amaritudinis eis; furor draconum, uinum eorum et furor aspidum
insanabilis, propterea plantauerunt uineas et non bibent uinum earum. et mystice dicitur de
sodoma et gomorrha, quod omnis plantatio eorum perierit. si enim permansissent in eo quod
coeperant, ut essent quasi paradisus dei, et non finissent in malo, ut essent quasi terra aegypti,
plantatio eorum utique permansisset. tale quid et illud super aegyptiis sonat in psalmis:
occidit in grandine uineas eorum, et moros eorum in pruina. quasi clementissimus quippe
deus, omnem aegyptiam plantationem et arbusculas, quae in aegypto radicatae sanguineos
habent fructus, interfecit et subuertit, ne bibant qui male plantauerunt, et comedant ex eis
fructum. prope est dies domini magnus et uelox nimis, cui resistere nemo potest; prope autem
est uel propter aeternitatem, quia nihil ei longum est, uel propter poenae magnitudinem, quia
patienti numquam longum uidetur supplicium quod inferendum est. siue prope, ut supra
diximus, cum exierimus a saeculo, et uniuscuiusque mors consummationem mundi fecerit; et
non solum prope, sed etiam uelox nimis, ut uelocitas aduentus eius in eo quod additur, nimis,
ostendatur. uox diei domini amara, tribulabitur ibi fortis. dies irae dies illa, dies tribulationis
et angustiae, dies calamitatis et miseriae, dies tenebrarum et caliginis, dies nebulae et turbinis,
dies tubae et clangoris super ciuitates munitas, et super angulos excelsos. lxx: uox diei domini
amara et dura posita est fortis. dies irae, dies illa, dies tribulationis et necessitatis, dies
miseriae et perditionis, dies tenebrarum et turbinis, dies nebulae et caliginis, dies tubae et
clamoris super ciuitates munitas, et super angulos excelsos. iuxta superiora, uel de babylonica
captiuitate accipe, uel de extrema quam passi sunt a romanis, super qua et dominus fleuit
hierusalem, dicens: hierusalem, hierusalem, quae occidis prophetas, et lapidas eos qui ad te
missi sunt, et cetera. uere enim expetita uindicta est a sanguine abel iusti usque ad sanguinem
zachariae, quem occiderunt inter templum et altare, et ad extremum de dei filio, dicentes:
sanguis eius super nos et super filios nostros, experti sunt diem amaram, quia ad
amaritudinem dominum prouocauerant; diem a domino constitutam, in qua non imbecillis
quilibet, sed fortissimi uiri deprimentur, et ueniet super eos ira in finem. saepe quippe et ante
iram domini sustinuerunt, sed ira illa non fuerat consummationis et finis. quid necesse est
nunc describere quantas in utraque captiuitate sustinuerint calamitates, et quomodo qui lucem
domini respuerunt, in tenebris et caligine uersati sint, et qui noluerunt sollemnium dierum
audire tubas, audierint clamorem bellantium? de ciuitatibus autem munitis et excelsis angulis
iudaeae, qui ad solum usque sunt diruti, puto oculorum magis esse quam aurium iudicium,
nobis praesertim qui nunc in ista sumus prouincia licet uidere, licet probare quae scripta sunt.
uix ruinarum parua uestigia in magnis quondam urbibus cernimus. silo, ubi tabernaculum et
arca testamenti domini fuit, uix altaris fundamenta monstrantur. gabaa illa ciuitas saulis usque
ad fundamenta diruta est. rama et bethoron et reliquae urbes nobiles a salomone constructae,
parui uiculi demonstrantur. legamus iosephum et prophetiam sophoniae, illius cernemus
historiam; et hoc non tantum de captiuitate dicendum est, sed usque ad praesentem diem,
perfidi coloni post interfectionem seruorum, et ad extremum filii dei, excepto planctu,
prohibentur ingredi hierusalem; et ut ruinam suae eis flere liceat ciuitatis, pretio redimunt, ut
qui quondam emerant sanguinem christi, emant lacrimas suas, et ne fletus quidem eis
gratuitus sit. uideas in die quo capta est a romanis et diruta hierusalem, uenire populum
lugubrem, confluere decrepitas mulierculas, et senes pannis annis que obsitos, in corporibus
et in habitu suo iram domini demonstrantes. congregatur turba miserorum, et patibulo domini
coruscante, ac radiante anastasei~g eius, de oliueti monte quoque crucis fulgente uexillo,
plangere ruinas templi sui populum miserum, et tamen non esse miserabilem; adhuc fletus in
genis et liuida brachia, et sparsi crines, et miles mercedem postulat, ut illis flere plus liceat; et
dubitat aliquis, cum haec uideat, de die tribulationis et angustiae de die calamitatis et
miseriae, de die tenebrarum et caliginis, de die nebulae et turbinis, de die tubae et clangoris?
habent enim et in luctu tubas, et iuxta prophetiam, uox sollemnitatis uersa est in planctum.
ululant super cineres sanctuarii, et super altare destructum, et super ciuitates quondam
munitas, et super excelsos angulos templi, de quibus quondam iacobum fratrem domini
praecipitauerunt. haec de captiuitate dicta sint iudaeorum. ceterum si diem domini, ut supra
referamus ad consummationem mundi, siue ad uniuscuiusque exitum uitae, manifesta erit
interpretatio, quod uox diei domini amara sit, et necessitate plena et ira, et tribuletur ibi fortis,
cum etiam qui sancti sunt, saluentur quidem, sed tamen sic quasi per ignem. dies illa dies
tribulationis, et angustiae et calamitatis, et miseriae, in qua dicent: uae nobis, quia miseri facti
sumus. dies tenebrarum: omnis enim qui male operatur, odit lumen et non uenit ad lucem, et
necesse est ut qui lumen oderit, eum tenebrae consequantur. dies erit nebulae et turbinis;
ueniet enim super eum tempestas domini, et clangor tubae quam apostolus significat, dicens:
in nouissima tuba. erit enim dies tubae et clangoris super ciuitates munitas, quas sibi in
multitudine peccatorum cum cain aedificauerant. et super angulos excelsos, opera peruersa et
a recta uia domini declinantia. unde et a saluatore arguuntur hupokritai~g pharisaei, quod
adorent in angulis platearum. uia enim recta et tendens ad paradisum arcta, et angusta est quae
ducit ad uitam. uia autem fracta habens angulos et tortuosa, lata, et spatiosa est, quae ducit ad
mortem. simul que inter uerba seueritatis domini cerne clementiam, quod propterea amara sit
dies, et dies irae et dies tribulationis, et dies tubae et clangoris, ut ciuitates male munitae et
peruersi anguli destruantur. et tribulabo homines, et ambulabunt ut caeci, quia domino
peccauerunt; et effundetur sanguis eorum sicut humus, et corpora eorum sicut stercora, sed et
argentum eorum et aurum non poterit liberare eos in die irae domini; in igne zeli eius
deuorabitur omnis terra, quia consummationem cum festinatione faciet cunctis habitantibus
terram. lxx: et tribulabo homines, et ambulabunt ut caeci, quia domino peccauerunt, et
effundet sanguinem eorum sicut puluerem, et carnes eorum sicut stercus boum, et argentum
eorum et aurum eorum non poterit eruere eos in die irae domini; et in igne zeli eius
consumetur omnis terra, consummationem enim et festinationem faciet super omnes
habitantes terram. non est difficile iuxta priorem sensum haec fuisse perpessam dicere
hierusalem, quae propter crucem domini sustinuit; recessit enim ab ea uisitatio domini, et
tribulati sunt omnes homines in tota iudaea, et propter magnitudinem pressurae ambulauerunt
ut caeci, quid agerent ignorantes. et haec passi sunt, quia domino, id est dei filio peccauerunt.
nam quia fuderunt sanguinem prophetarum et sanguinem christi, fusus est sanguis eorum
sicut humus in tota regione, et corpora eorum remanserunt insepulta, sicut stercora super
faciem terrae. diuites quoque eorum qui argentum et aurum iniquitate nimia congregauerunt,
opibus suis de die irae domini non potuerunt liberari; ignis enim zeli domini succensus
aduersus eos, deuorauit omnem prouinciam. nec grande fuit tempus in medio, nam post
quadraginta et duos annos dominicae crucis, circumdata est ab exercitu hierusalem, et
consummatio illius facta est cum festinatione, et non solum illius, sed cunctis terrae iudaeae
habitatoribus. in consummatione autem uel mundi uel uniuscuiusque tribulabuntur omnes
homines, qui homines permanserunt, et mortui sunt quasi homines. et ambulabunt ut caeci,
quia lumen perdidere uirtutum, et locum paenitentiae non habebunt; et haec patientur quia
domino peccauerunt. si enim dominus iustitia est, ueritas, sanctitas, ceterae que uirtutes,
quisquis iniuste fecit, et mentitus est, et scorta uitia que sectatus est, domino peccauit. sed
quod sequitur: et effundetur sanguis eorum sicut humus, et corpora eorum sicut stercora
boum, uidetur absurdum, ut in resurrectione mortuorum, et in consummatione mundi atque
iudicio, dicamus effundi sanguinem et corpora iacere quasi stercora. igitur illud quod ad noe
dicitur: et sanguinem animarum uestrarum requiram de manu omnium bestiarum, et de manu
hominis, et de manu fratris requiram animam hominis, qui effuderit sanguinem hominis, pro
sanguine eius effundetur sanguis illius; et in resurrectione credere ridiculum est, et in uita
haec stare non potest. quanti enim effuderunt sanguinem, et sanguis eorum effusus non est? et
alii occiderunt hominem ueneno, uel suspendio, et tamen cum homo mortuus sit, non est
sanguis effusus? quomodo ergo dominus est effusurus sanguinem eorum in talionem, cum ille
qui occidit, sanguinem non effuderit? sanguis igitur hominis to~g zôtikon~g aitos~g, id est
uitale, quo uegetatur et sustentatur et uiuit, debet intellegi; quod qui effuderit, siue per
scandalum, siue peruersitate doctrinae, in die iudicii effundetur ab eo, id est quod sibi
uidebatur habere uitale, cogetur amittere. iuxta huiuscemodi sanguinem, et caro intellegitur,
de qua et esaias ait: omnis caro, fenum, et in genesi dominus: non permanebit spiritus meus in
hominibus istis quia caro sunt, et apostolus, de utroque: caro et sanguis regnum dei possidere
non poterunt, neque corruptio incorruptionem dei hereditabit. in die ergo consummationis, uel
generalis, uel specialis, omnis sanguis qui effusus est clamabit ad dominum, et apparebit in
medio, et opera sanguinis atque terrena sicut puluis iacebunt et stercora, et argentum et aurum
diuites de die irae non poterunt liberare, audiente eo, qui moritur: stulte, hac nocte tolletur
anima tua a te; quae autem parasti, cuius erunt? non quod negemus aurum et argentum diuites
liberare de morte - redemptio enim uiri animae, propriae diuitiae -, sed quod eo tempore
liberare non possint, quando diuitias necessitate dimittunt. omnis enim terra et uniuersa quae
terrena sunt, zelo domini deuorabuntur. et quod ait, zelo, intellege adhuc amantem dominum.
nisi enim amaret humanam animam, numquam zelaretur eam, et in similitudinem mariti,
peccatum ulcisceretur uxoris, qui, si non amaret, nec de adulterio eius irasceretur. et hoc
faciet dominus cum festinatione cunctis habitantibus terram, his qui se penitus terrae
dederunt, et non fuerunt aduenae et peregrini, sicut iustus qui loquitur: aduena sum ego in
terra, et peregrinus sicut omnes patres mei. et rursum alibi nolens diutius in tabernaculo carnis
habitare, lacrimabili uoce testatur, dicens: heu mihi, quia peregrinatio mea prolongata est.
etenim qui sumus in tabernaculo corporis huius, ingemiscimus conquerentes: miser ego
homo, quis me liberabit de corpore mortis huius?
Caput 2
conuenite, congregamini, gens non amabilis, priusquam pariat iussio quasi puluerem
transeuntem diem; antequam ueniat super uos ira furoris domini, antequam ueniat super uos
ira indignationis domini. lxx: congregamini et collegamini, gens inerudita, antequam sitis
sicut flos pertransiens diem, antequam ueniat super uos ira domini, antequam super uos irruat
dies irae furoris domini. post descriptionem malorum quae in die uentura sunt domini -
secundum duplicem captiuitatis expositionem, quam supra diximus -, populus ad
paenitentiam prouocatur, et dicitur ei: conuenite, et congregamini, siue, ut in lxx scriptum est:
colligamini, id est estote uobis, iuxta apostolum, caritatis uinculo copulati, gens non amabilis,
quae amore dei indigna es, siue gens inerudita, de qua dicitur in deuteronomio: populus
stultus, et non sapiens, et in hieremia: sine causa percussi filios uestros, disciplinam non
recepistis, antequam fiat quod prophetatum est, antequam praeceptum sequatur effectus, quod
ita facile ueniet quasi puluis pertransiens, antequam super uos furor domini compleatur. simul
que cerne dei clementiam, suffecerat prudentibus malorum uenientium impetum descripsisse;
uerum quia non uult inferre supplicia, sed tantum terrere passuros, ipse ad paenitentiam
prouocat, ne faciat quod minatus est. generaliter autem tota multitudo credentium, et eorum
qui dei populus nuncupatur, in ecclesiam congregatur, et dicitur ei: conuenite in ecclesiam,
sociamini uobis caritate et pace, o gens inerudita, quae non uis dei recipere disciplinam, nec
habere scientiam mandatorum eius, sed diuitiis et corporis sanitate et pulchritudine huius
saeculi, carnis quoque uoluptatibus delectaris, quae transit quasi flos qui in una marcescit die.
propterea autem dico uobis: conuenite, sociamini, ne cum iudicii tempus uenerit, et omnis
gloria uestra transierit, tunc uelitis agere paenitentiam, quando locus non erit paenitentiae, sed
poenarum. quaerat aliquis, quomodo hoc ipsum super unoquoque migrante de saeculo possit
intellegi. dicitur ergo ad singulos: o tu, qui saeculi negotiis occupatus, per diuersa discurris,
reuertere in sanctorum ecclesiam, et iunge te eorum uitae et coetui quos uides placere deo, et
dissoluta membra animae tuae nec sibi cohaerentia in unam sapientiae coge compagem, et
illius haere complexui, et audi mystice: confortamini, manus dissolutae; genua debilia,
solidamini; nec glorieris in bonis carnis, et eius flore qui praeterit: omnis enim caro foenum et
omnis gloria eius quasi flos foeni. aruit foenum, et flos decidit; uerbum autem domini manet
in aeternum. possumus hoc capitulo uti pro tempore, si quando uiderimus aliquem honoribus
saeculi et congregandis diuitiis occupatum, ad ecclesiam uel raro, uel numquam uenire, et
dicere ad eum, congregare et coniungere populo dei, qui domini praecepta non audis,
antequam gloria tua pertranseat, antequam dies tibi furoris domini adueniat. quaerite
dominum, omnes mansueti terrae, qui iudicium eius estis operati; quaerite iustum, quaerite
mansuetum, si quomodo abscondamini in die furoris domini. quia gaza destructa erit, et
ascalon in desertum. azotum in meridie eicient, et accaron eradicabitur. lxx: quaerite
dominum, omnes humiles terrae, iudicium operamini, et iustitiam, quaerite et respondete ea,
ut protegamini in die irae domini, quia gaza direpta erit, et ascalon in desertum; et azotus in
meridie proicietur, et accaron eradicabitur. humilis terrae appellatur, qui non humilitate, quae
uirtutem sonat, sed peccatis humiliatus est, nec potest cum christo dicere: discite a me, quia
mitis sum, et humilis corde. omnis enim qui se humiliat, exaltabitur. et in alio loco sermo ad
sanctum dirigitur: quanto maior fueris, tanto magis humilia teipsum, et coram deo inuenies
gratiam. qui autem peccatis humiliatus est, et aggrauatus conscientia delictorum, ac loquitur:
sicut onus graue, grauatae sunt super me, iste debet audire: uenite ad me omnes qui laboratis
et onerati estis, et ego reficiam uos. hoc dictum sit in principio secundum lxx interpretes.
ceterum iuxta hebraicum alter sensus est. dicitur enim ad sanctos: o uos, qui mea praecepta
custoditis, qui in terra positi et scientes, quoniam omnis qui se humiliat exaltabitur, imitati
estis mansuetudinem meam, et iudicium estis operati, quaerite dominum in mansuetudine
uestra. et si uultis scire quis iste sit dominus, quaerite iustum, quaerite mansuetum: pater
enim omne iudicium dedit filio, qui iuste iudicaturus est. et quia mansueti estis, propterea
quaerite mansuetum, ut quicquid in uestra mansuetudine minus est, ab eo qui fons est
mansuetudinis, impleatur. hoc autem dico uobis: si quomodo abscondamini in die furoris
domini, hoc est, si forte possitis ex eo quod quaesistis dominum, et iustitiam eius estis
operati, iram diei uitare uenientis et effugere captiuitatem, quae uel a nabuchodonosor, uel a
romanis inferenda est populo iudaeorum. si autem de his dubitat, qui eius iudicia fecerint,
dicens: si quomodo abscondamini in die furoris domini, quid fiet de peccatoribus? tanta enim
uastitas iudaeae terrae ueniet, et tam sublimis uictor huc babylonius ascendet exercitus, ut
etiam potentissimas urbes philistinorum, quae semper uobis aequo certamine restiterunt,
eadem captiuitas apprehendat. gaza enim destructa erit, et ascalon in solitudinem redigetur, et
azotum, non furto, sed bello, id est manifesta luce atque uictoria in captiuitatem trahent, et
accaron, quae interpretatur eradicatio, hoc sustinebit, quod in suo uocabulo sonat, id est
eradicabitur. hoc iuxta litteram et hebraicam ueritatem. iuxta septuaginta autem praecipitur
humilibus terrae de quibus supra dictum est, ut operentur iudicium et quaerant iustitiam,
quam non puto aliam esse praeter christum. et quia omnis qui quaerit, inueniet, id quod
inuenerint, aliis respondeant, hoc est, alios doceant: sapientia enim abscondita, et thesaurus
non comparens, quae utilitas in ambobus? et hoc, inquit, praecipio uobis, ut in die irae domini
protegamini, uel in consummatione mundi, uel in exitu uniuscuiusque de saeculo. gaza enim
et ascalon, et azotus, et accaron diuersa supplicia sustinebunt. gaza enim interpretatur
fortitudo eius. omnes ergo qui sibi applaudunt in fortitudine corporis et potentia saeculari, et
dicunt cum diabolo, fortitudine faciam, diripientur in die irae domini, et ad nihilum
redigentur. ascalon quoque, quae dicitur ponderata, uel ignis homicida, cum uenerit dies irae
domini, sceleris sui mensuram sentiet, et eodem quo operata est, pondere deprimetur. et quia
arsit ad effundendum sanguinem, et multas scandalizauit animas, et impletum est in ea: uirum
sanguinum et dolosum abominabitur dominus, non diripietur ut gaza, sed in solitudinem
redacta, gehennae ignibus usque ad puluerem cremabitur. nec non et azotus, quae hebraice
dicitur esdod, et in lingua nostra sonat ignis generationis, clara luce uastabitur; arsit enim
libidine, et generationis incendio debacchata est. et quia omnes adulterantes quasi clibanus
corda eorum, et sagittis ardentibus uulnerati sunt, non in tenebris, non in occulto iudicio, sed
in meridie, hoc est quando sancti plenam recipient claritatem, proicientur in tenebras, et
sanctorum consortium non habebunt. sed accaron, quae interpretatur sterilitas, uel eradicatio,
quia nullos fructus habuit et peruersitate doctrinae suae eradicauit plurimos, ipsa quoque
eradicabitur. has autem omnes uarietates intellege in animarum uitiis atque peccatis, et quia
uniuscuiusque opus quale sit, in die iudicii ignis probabit. uae qui habitatis funiculum maris,
gens perditorum; uerbum domini super uos, chanaan, terra philistinorum, et disperdam te ita
ut non sit habitator. et erit funiculus maris requies pastorum, et caulae pecorum; et erit
funiculus eius qui remanserit de domo iuda; ibi pascentur, in domibus ascalonis ad uesperam
requiescent, quia uisitabit eos dominus deus eorum, et auertet captiuitatem eorum. lxx: uae
qui habitatis funiculum maris, accolae cretarum; uerbum domini super uos, chanaan, terra
allophylorum, et perdam uos de habitatione. et erit creta pascua pastorum, et ouile pecorum,
et erit funiculus maris his, qui reliqui sunt de domo iuda; super ipsos pascentur in domibus
ascalonis, post meridiem diuertent a facie filiorum iuda quia uisitabit eos dominus deus
eorum, et auertet captiuitatem eorum. quantum ad historiam, non est difficile interpretari,
quia in superioribus dixerat: gaza destructa erit, et ascalon in desertum. azotum in meridie
eicient, et accaron eradicabitur. quattuor magnis palaestinae urbibus nominatis, nunc ad ipsam
generaliter prouinciam patet sermonem domini fieri, et praedici ei: uae qui habitatis
funiculum maris, babylonio ueniente, quia et ipsi qui iuxta mare habitant, perient atque
tollentur. quod autem terra palaestinorum terra sit chanaan, nulli dubium est. et disperdam te,
inquit, ita ut nullus sit habitator; et in tantam uenies uastitatem, quae laetabaris in euersione
iudaeae, ut omnes tuae urbes munitissimae in ouilia sint pastorum. et postquam dominus
uisitauerit populum suum, et fecerit eos regredi sub zorobabel et iesu, et aedificauerint
templum, et exstruxerint hierusalem, tu ita inculta eris; et sic uepribus urticis que operieris, ut
pastores de reliquiis iudaeorum in ascalone post meridiem requiescant, et in urbe quondam
nobili greges suos faciant accubare; et hoc fiet, quia dominus uisitabit plebem suam, et auertet
captiuitatem eius, quod factum nec ne sit, deus uiderit. neque enim nunc nobis propositum est
historiae texere ueritatem, sed ea intimare nostris, quae accepimus ab hebraeis. iuxta
spiritalem autem sensum et translationem lxx difficilis intellegentia est, maxime quia et in
interpretatione discordant. ubi enim nos transtulimus, gens perditorum, illi dixerunt aduenae
cretensium, et quod hebraice scriptum est goi chorethim, pro goi, id est gente, legerunt car,
hoc est, aduenam; et pro ghorethim, quod dicitur, perditorum, nomen cretae insulae
putauerunt. denique et aquila, et quinta editio interpretati sunt ethnos~g olethrion~g; et
theodotio ethnos~g olethrias~g; symmachus quoque ethnos~g olethreuomenon~g, quae omnia
cum interpretatione nostra faciunt. rursum, ubi nos diximus: et erit funiculus maris requies
pastorum, et omnes interpretes huic translationi congruerunt, scribitur in lxx: et erit creta
pascua gregis, et ouile pecorum. igitur spiritalibus spiritalia comparantes, et uulgatae editionis
coeptam semel tenentes semitam, quaerimus an alibi in scripturis sanctis nomen cretae
legerimus. et, ni fallor, illud in promptu est: cretenses semper mendaces, malae bestiae,
uentres pigri. testimonium hoc uerum est. qui fluctuant et circumferuntur omni uento
doctrinae in deceptione hominum, in uersutia erroris, isti cum debuerint in terra confessionis,
hoc est in terra habitare iudaeae, uoluerunt magis aduenae esse cretensium qui diuersis maris
fluctibus hinc inde tunduntur, et sonant aere corybantio, et sunt, iuxta apostolum: quasi
cymbalum tinniens. et quia aduenae sunt cretensium, ideo sermo dei, hoc est comminatio fit
ad illos, et dicuntur terra chanaan semper in fluctu, semper in motu, et terra allophylorum;
alieni enim a deo, in funiculo maris et in cretae regione uersantur. fit itaque ad eos sermo dei,
uel in consummatione et fine mundi, uel cotidie per ecclesiasticos uiros, et qui possunt cum
apostolo dicere: an experimentum quaeritis eius qui in me loquitur christus? ut eiciantur de
creta, et perdantur de pristinis habitationibus suis, et illa regio quae prius gregem perditum
continebat, incipiat esse ouile pecorum christi; et iudas, id est uera confessio, habitet in
funiculis maris. cum que iam coeperit esse mundus ad uesperam, et de multis uocatis pauci
electi, et qui nunc reliqui uocantur de domo iuda, pauerint eos qui primum in mari et in creta
et in mendacio pascebantur, declinabunt in domibus ascalonis, id est ubi prius ignis diaboli et
interfectorum manabat cruor. ascalon enim interpretatur ignis homicida. et hoc fiet quia
uisitabit dominus populum suum, et hi qui ante facile capiebantur sophismatibus
haereticorum, quasi de captiuitate uenientes, uincent aduersarios suos, et habitabunt in
tabernaculis eorum. quod autem legitur in lxx: a facie filiorum iuda, obelo praenotauimus,
nec in hebraeo enim, nec apud ullum fertur interpretum, et contextum capituli sensum que
conturbat non quod difficile fuerit quomodocumque et hoc posito sententiam texere; sed
semel decreuimus ueritatem interpretationis, et lectoris magis eruditi, quam uulgi iudicium
sequi. audiui opprobrium moab, et blasphemias filiorum ammon, quae exprobrauerunt populo
meo, et magnificati sunt super terminos eorum. propterea uiuo ego, dicit dominus deus
exercituum, deus israel, quia moab ut sodoma erit, et filii ammon quasi gomorrha, siccitas
spinarum et acerui salis, et desertum usque in aeternum, reliquiae populi mei diripient eos;
residui gentis meae possidebunt illos. hoc eis eueniet pro superbia sua, quia blasphemauerunt,
et magnificati sunt super populum domini exercituum. horribilis dominus super eos et
attenuabit omnes deos terrae, et adorabunt eum uiri de loco suo, omnes insulae gentium. lxx:
audiui opprobrium moab, et contumelias filiorum ammon, in quibus exprobrauerunt populo
meo, et magnificati sunt super terminos meos. propterea uiuo ego, dicit dominus, uirtutum,
deus israel, quia moab sicut sodoma erit, et filii ammon quasi gomorrha, et damascus
derelicta quasi aceruus areae, et dissipata usque in sempiternum, et qui reliqui fuerint de
populo meo diripient eos, et residui gentis meae possidebunt eos; hoc erit eis pro contumelia
sua, quia exprobrauerunt et magnificati sunt super dominum omnipotentem; manifestus erit
dominus super eos, et disperdet omnes deos gentium terrae, et adorabunt eum singuli de loco
suo, omnes insulae gentium. quod excepto daniele propheta, qui quattuor regnorum saepius
cernit uisiones, et eorum differentias sub aliis atque aliis imaginibus exponit esaias,
hieremias, hiezechiel faciunt, ut post uisionem iudae aduersum ceteras nationes, quae in
circuitu eius sunt, uertant uaticinium, et iuxta idiômata~g singularum, quae eis uentura sunt,
nuntient, atque in descriptione earum diutius immorentur, hoc nunc propheta sophonias,
quamquam breuiter, eodem tamen ordine facit. post philisthiim enim contra quos supra
comminatio praecucurrit, gaza, inquit, destructa erit, et ascalon in desertum, azotum in
meridie eicient, et accaron eradicabitur. nunc aduersus moab, et filios ammon, siue ut in lxx
additum est, contra damascum, quae in esaia dicitur aram, texitur prophetia, eo quod
praebentes auxilia nabuchodonosor, uastauerint iudam, conculcauerint sanctuarium eius,
templum quoque subuerterint, et subiugato populo israel, dominum blasphemauerint.
nabuchodonosor quippe atque chaldaei, iudaeorum urbibus subrutis, ceteras gentes
oppresserunt, et ita factum est, ut qui insultauerant populo dei, ipsi quoque eadem malorum
angustia premerentur, et haberent conseruum iudam, quem putauerunt se habere subiectum.
igitur antequam ueniat captiuitas sub iosia adhuc rege, necdum ierosolymis templo que
subuersis, dirigitur aduersum insultantes prophetia, ut mala quondam populi dei, ceterarum
gentium leuarentur malo. audiui, inquit, opprobrium moab, quae nunc areopolis appellatur, et
blasphemias filiorum ammon, quae et ipsa urbs arabiae secunda post bosram philadelphia
dicitur; in quibus exprobrauerunt populo meo, et eiectis iudaeis, dilatauerunt in terra eorum
fines suos. propterea quia blasphemauerunt me, et exprobrauerunt populo meo, ego dominus
exercituum, qui possum implere quod comminor, et deus israel, qui in populo meo ipse patior
iniuriam, faciam ut sit moab quasi sodoma, et filii ammon quasi gomorrha. legamus
huiuscemodi uisiones in esaia et hieremia, et eadem quae nunc hic legimus, reperiemus.
siccitas spinarum et acerui salis, et desertum usque in aeternum, pro quo nescio quid sibi
uolentes lxx: damascum euulsam et derelictam interpretati sunt, nisi fallor, uerbi ambiguitate
decepti; siccitas enim quod hebraice dicitur mamasac, excepta prima littera mem si mutetur,
et daleth accipiatur, easdem litteras reliquas habet quas et damascus, et potest legi pro
superiori uerbo damasec. quaeritur autem quomodo istae urbes, hoc est, moab et filii ammon,
redactae sint in sodomam et gomorrham, et quasi spinarum ariditas et acerui satis, usque in
aeternum non aedificentur? et quod quidem uastatae sint quasi sodoma et gomorrha,
exponendi nulla est difficultas. uerum hoc quod sequitur: desertae erunt usque in aeternum,
aut destructionem regni earum interpretabimur - quia postea subuersae a chaldaeis, regnum
suum perdiderunt, et deinceps uel ab antiochis, uel a ptolemaeis tentae, nouissime romano
imperio colla submiserint -, aut certe huperbolikôs~g dici accipiendum est, lolam quippe et
aeternitatem sonat et saeculum, ex quo et pro uno saeculo, et pro aliquanto tempore, et una
aetate accipi potest. et qui reliqui fuerint de populo israel, uastabunt eos, et blasphemantia
quondam chaldaeorum auxilia possidebunt. hoc autem eueniet eis pro superbia eorum, quia
blasphemauerunt, et magnificati sunt contra populum domini exercituum, qui dominus
exercituum erit horribilis super eos, et horror eius non interficiet superbos; non
blasphemantium sanguinem fundet, sed disperdet et attenuabit omnia idola eorum, ut qui
prius tenebantur errore, et domini beneficia non sentiebant, malorum necessitate pressi, sciant
idola nihil prodesse, et adorent eum unusquisque de loco suo omnes insulae gentium.
hucusque iuxta hebraicum. nunc ad lxx interpretes reuertamur, cogamus que iudaeos, qui
tantum sequuntur historiam, exponere nobis quando moab et filii ammon facti sint quasi
sodoma et gomorrha, et quasi acerui salis, et desertae usque in aeternum; debent monstrare
sulphureas pluuias, uineas, terram in cineres fauillam que conuersam, mare supra de puteis
quondam salis, quod nunc mortuum dicitur, inundasse, quando eos diripuerint iudaei, quando
residuae gentes israeliticae possiderint eos. aut quae indignatio domini est pro blasphemia et
contumeliis attenuare et disperdere eos? non moab et ammon, sed uniuersam terram, ut
adorent eum singuli de loco suo, omnes insulae gentium? quod magis pro beneficio tribuet
blasphemantibus, ut ab errore redeant ad salutem. quod si uoluerint dicere, post regressionem
de babylone has gentes populo israel fuisse subiectas, primum auctoritatem postulabimus
scripturarum, unde hoc factum probent; deinde cum minime potuerint demonstrare,
concedemus eis ex superfluo, atque dicemus: esto accidisse quod dicitis; quae iustitia dei
esset blasphemasse auos, et exprobrasse atauos, et postea nepotibus redditum? cum utique illa
sententia, qua antea dicebatur in lege, peccata patrum in filios in tertia et in quarta generatione
restitui, per hiezechielem soluta sit: uiuo ego, dicit dominus; nequaquam dicetur haec
parabola, sed anima quae peccauerit, ipsa morietur. et simul animaduerte, parabolam esse
quod dictum est, nec id sonare quod in superficie litterae proferunt. quod si iniustum est
nepotibus reddere quod deliquerint aui, quanto iniustius pro stultitia iudaeorum hoc ipsum
sperare in consummatione mundi fieri, quando non christus eorum, ut putant, sed est uenturus
antichristus. sicubi enim arctati fuerint in historia, ut doceant completum esse quod dictum
est, statim transiliunt ad futura christi tempora, et omnia quae non possunt exponere, post
multa saecula sibi repromittunt; et dicunt et moab et filios ammon, et aegyptum et philisthiim,
et idumaeam, quae nunc insultant iudaeis, eo tempore puniendas. interrogemus ergo eos,
quare has potissimum gentes deus puniat, et non totum orbem in quo iudaei longe late que
dispersi sunt. si enim meretur moab corripi, iudaeis insultans, et filii ammon et reliquae
gentes in circuitu, quare gallia non corripitur? quare britannias in comminatione non ponit?
cur hispaniae a poena alienae sunt? quam ob causam de italia nihil dicitur? de africa cur
tacetur? et ut semel dicamus, cum omnis orbis iudaeos captiuos teneat, quid solae gentes
tantum commisere flagitii, quae in circuitu eius sunt, ut solae potissimum nominentur? haec
contra iudaeos, et generalem in omnibus prophetis ubicumque aduersum gentes aliqua
prophetia dicitur, explanationem. nunc quod supra diximus, damascum hebraice non haberi,
nec apud quemquam alium interpretem, etiam ex ipso scripturae ordine comprobabimus. ad
id enim quod dixerat: audiui opprobrium moab, et blasphemias filiorum ammon, postea
retulit: quia moab ut sodoma erit, et filii ammon quasi gomorrha. quod ergo sequitur: et
damascus deserta, quasi aceruus areae, debuerat et de damasco aliquid praemisisse, ut
quomodo de duabus gentibus dixerat: moab ut sodoma erit, et filii ammon ut gomorrha,
quarum peccata ante iam dixerat. sic et damasci uel opprobria, uel blasphemias descripsisset,
ut postea digne supplicium uideretur inferre. sed et hoc ipsum quod dicitur: quasi aceruus
areae, quod graece dicitur hôs~g thimônia~g halônos~g, putamus lxx halos~g interpretatos, id
est salis; sed ab imperitis qui thimônian~g, hoc est aceruum frumenti uel frugum putauerunt,
pro halos~g, additis duabus litteris ô~g et n~g, quasi ad consequentiam frugum, halônos~g,
hoc est areae positum. hoc de interpretationis uarietate et errore sit dictum, et de difficultate
historiae. qui autem doctus uir est, et spiritalibus spiritalia comparat, et non quaerit quae
deorsum sunt, sed ea quae sursum, et cum christo resurgit ab inferis, et ueterem hominem
deponens induitur nouo, opprobria moab, et blasphemias filiorum ammon, ad magistros
contrariorum ecclesiae dogmatum referet, qui et ipsi uidentur de genere esse abraham, et
effugisse incendium sodomae et gomorrhae et habitare in segor paruula. sed quia generatio
eorum in tenebris est, et lumen ueritatis non possunt aspicere - declinauerunt enim a deo
patre, quod interpretatur ex nominibus lot et moab -, et dei esse filii cessauerunt, quod dicitur
populus meus, et in tenebrosa spelunca concepti de incestis nuptiis substiterunt, propterea
usque hodie simplicitati filiorum iudae insultantes, magnificare cupiunt super terminos eius
possessionem suam, de quibus in prouerbiis dicitur: non transferas terminos sempiternos,
quos posuerunt patres tui. uide haereticos in dialectica sibi et rhetorica et omnium
sophismatum dogmatibus applaudentes, contemnere ecclesiae rusticitatem, et quasi indignam
mysteriis suis, quae sibi quasi idola confinxerunt, despicere, et habere pro nihilo, et non
quaeres quae sint opprobria moab, et contumeliae filiorum ammon, in quibus exprobrauerunt
populo dei. iurauit itaque dominus per semetipsum dicens: uiuo ego, dicit dominus. et pulchre
ad distinctionem mortuorum deorum, qui appellantur idola, se uiuentem dicit deus israel, hoc
est populi uidentis deum; quod blasphemantes hae gentes, id est moab et filii ammon, de
quibus supra diximus: sicut sodoma et gomorrha erunt, uidentur quidem sibi in eo quod
gentiles non sunt, exisse de sodomis et gomorrhis, sed quia blasphemant populum dei, et
contra israel faciunt, in sodomam reputabuntur et gomorrham; et ita delebuntur ut illae
deletae sunt ante, nullum in se habentes uestigium uiroris et uitae. nec mirum si hoc de
haereticis intellegamus, quod reputentur quasi sodoma et gomorrha, cum etiam ad
ecclesiasticos, qui dei non obseruauere mandata, et egressi sunt a praeceptis eius, dicatur per
esaiam: audite uerbum domini, principes sodomorum, et attendite in legem domini, populus
gomorrhae. et ad presbyteros cupientes sub figura susannae ecclesiae corrumpere castitatem,
dicat daniel: hoc est iudicium dei, semen chanaan, et non iuda. et ut sciatis quotienscumque
sodoma et gomorrha et aegyptus nominantur, non de his dici prouinciis, quas oculis cernimus,
sed de aliis spiritalibus, quibus sermo propheticus comminatur, legite in apocalypsi ioannis:
locus autem in quo dominus crucifixus est, uocatur spiritaliter sodoma et aegyptus. si ergo
ierosolyma in qua crucifixus est dominus, uocatur spiritaliter sodoma et aegyptus, quare non
econtrario aegyptus et sodoma et gomorrha, si opera fecerunt hierusalem, et terrae iudae, in
terram sortis domini transferantur? denique et dauid non erat de sacerdotibus, nec licebat ei
comedere panes propositionis, sed quia per singula crescebat opera, et persecutio saul
uirtutum illius profectus erat, propterea in fuga sua dum nescit, subito antistes efficitur, et
accipit panes propositionis, et non uiolat mandatum dei. hoc totum diximus, quia moab ut
sodoma erit, et filii ammon, ut gomorrha. damascus quoque quae interpretatur, sanguinem
bibens, aut sanguis sacci, erit derelicta a dei misericordia, quasi aceruus salis. quia enim
princeps eius est rex aretha, et damasceni paulum occidere cupiunt, et per murum in sporta
dimittitur, non dicitur ad damascum: uos estis sal mundi; nec illud sal uocatur, quod semper
offertur in uictimis, sed quod infatuatum est, et de quo in euangelio scribitur: si autem sal
infatuatum fuerit, in quo salietur? ad nihilum est utile, neque in terram, neque in
sterquilinium, sed foras proiciunt illud, ut ab hominibus conculcetur. et moab igitur, et
ammon et damascus, qui sese aduersus domini scientiam parauerunt, et blasphemauerunt
populum dei, et dixerunt in eum plurimas contumelias, et uoluerunt dilatare terminos suos in
terra ecclesiae, et populum dei possidere, desertae erunt et destructae, et reliqui de populo dei,
hoc est uiri ecclesiastici in scripturis dominicis eruditi diripient eos, et residui gentis
dominicae possidebunt eos, et hoc eis erit pro contumelia, qua exprobrauerunt et magnificati
sunt contra dominum omnipotentem. uide clementiam, uide misericordiam domini;
contumeliam patitur, blasphematur, diripiuntur termini eius, et ille quid facit? mittit ad
reliquias populi sui, de quibus diximus, ut sibi blasphemantes diuidat, et in suam ducat
possessionem. multo enim stulto melius est seruire sapienti, et fatuitatem eius domini
sapientia corrigi, quam suae eum stultitiae derelinqui. ueniet itaque dominus omnipotens, et
manifestus erit super eos, quem nunc nesciunt, quem ignorant; et disperdet omnia dogmata, id
est deos eorum, et diuersarum gentium idola, ut postquam simulacra, quae de suo sibi sensu
composuerant, euersa fuerint, conuertantur gentes ad dominum, et unusquisque in loco suo
adoret eum quem nesciebat ante. sed et uos, aethiopes, interfecti gladio meo eritis; et extendet
manum suam super aquilonem et perdet assur; et ponet speciosam in solitudinem et in inuium
et quasi desertum. et accubabunt in medio eius greges, omnes bestiae gentium, et onocrotalus,
et hericius in liminibus eius morabuntur; uox cantantis in fenestra, coruus in superliminari,
quoniam attenuabo robur eius. haec est ciuitas gloriosa, habitans in confidentia, quae dicebat
in corde suo: ego sum, et extra me non est alia amplius; quomodo facta est in desertum cubile
bestiae? omnis qui transit per eam, sibilabit et mouebit manum suam. lxx: et uos, aethiopes,
uulnerati gladio meo eritis; et extendam manum meam super aquilonem et perdam assyrium;
et ponam niniuen in solitudinem et inaquosam quasi desertum. et pascentur in medio eius
greges et omnes bestiae terrae; et chamaeleontes et hericii in praesepibus eius cubabunt, et
bestiae clamabunt in foueis suis, et corui in portis eius, quia cedrus altitudo eius; haec est
ciuitas malis dedita, quae habitat in spe, quae dicit in corde suo: ego sum, et non est post me
amplius, quomodo facta est in solitudinem pascua bestiarum? omnis qui transit per eam,
sibilabit et mouebit manus suas. iudaei totum hoc capitulum et duo superiora contra
philisthiim et moab et filios ammon ad aduentum christi referunt, quem putant in
consummatione mundi esse uenturum, qui exstruat hierusalem, et populum suum liberet de
manu gentium, qua tenentur; et hoc sonare quod dicitur: et adorabunt eum uiri de loco suo,
omnes insulae gentium. non solum autem superiores gentes, sed aethiopes quoque et assyrios
et niniuen urbem assyriorum eo tempore ponendam esse in solitudinem, et cubaturas in ea
omnes bestias terrae, siue ut in hebraeo scriptum est: omnes bestias gentium, ex quo
significari putant de cunctis nationibus, quae euersurae sunt niniuen. et quia niniue, speciosa
interpretatur, in praesenti loco speciosam referunt ad babylonem. et omne quod sequitur:
onocrotalus et hericius in liminibus eius morabuntur, et cetera, babyloni potius conuenire,
cuius et in esaia eadem solitudo praedicitur. et econtrario alii affirmant, manifeste de assyrio
dici, de quo iam praecesserat: et extendet manum suam super aquilonem, et perdet assur, et
ponet niniuen in solitudinem. per assyrios enim magis niniuen intellegi, quam babylonem,
quae ciuitas chaldaeorum est. quod autem ait: onocrotalum et hericium in cardinibus eius, et
coruum in superliminari, solitudinis esse indicia; et onocrotalorum duo genera: aliud aquatile,
aliud solitudinis. et quod ait: uox cantantis in fenestra, uel daemones intellegi, uel uariarum
uoces uolucrum, quae solent in desertis urbibus commorari. praeterea quod et nos et lxx
similiter transtulimus: coruus in superliminari, in hebraeo ponitur hareb, quod secundum
lectionis diuersitatem, uel siccitas, uel gladius, uel coruus accipitur. unde et aquila, gladium,
alii siccitatem interpretati sunt. et post euersionem quasi insultans ruinae eius, sermo
propheticus loquitur: haec est ciuitas gloriosa, habitans in confidentia, quae dicebat in corde
suo: ego sum, et extra me non est alia amplius: quomodo facta est in desertum cubile bestiae?
omnis qui transit per eam, sibilabit et mouebit manum suam. iuxta hoc autem quod supra
diximus, aut uere in deserta urbe habitabunt bestiae, aut certe sub bestiarum figura multarum
nationum uarietas indicatur. quod si quispiam quaesierit, quomodo iuxta historiam ad
tempora nabuchodonosor haec prophetia referatur, aethiopibus etiam nuncupatis et assyriis,
quibus medi et persae nihil fecerint, legat historias, et uidebit assyrios quoque et aethiopes
medis fuisse subiectos, et cambysis regnum, et cyri potentiam, et omnia quae deinceps sint
secuta. haec iudaice dicta sint. ceterum si notauerimus in omnibus scripturis aethiopes eos
appellari, qui penitus in uitia sunt demersi, secundum illud quod in hieremia legimus: si
mutabit aethiops pellem suam, aethiopibus ad meliora conuersis spes erit, nullum qui uoluerit
agere paenitentiam, a salute alienum fore. unde et prius anima polluta, et delictorum sordibus
inquinata, dicit: nigra sum. et postea in fine cantici canticorum, de eadem iam purgata et lota
per paenitentiam scribitur: quae est ista, quae ascendit dealbata; moyses quoque, id est lex
domini spiritalis, aethiopissam de gentibus duxit uxorem. et maria, id est synagoga
iudaeorum; et aaron, id est carnale sacerdotium, et non secundum ordinem melchisedec,
murmurant aduersus legem, sed frustra. statim enim synagoga perfunditur lepra, et extra
castra proiecta, completo tempore, ipso orante moyse, in castra reducitur. aethiopiae enim
manus iam praeuenerat deum. comminatur itaque nunc sermo diuinus his qui peccatis
inhaerentes, et obliti sordibus delictorum, nolunt ad meliora conuerti, et tenebrosum colorem
eluere, et comminatur eis gladium, de quo puto scribi et in genesi: statuit cherubim, et
flammeum gladium, qui uertitur ad custodiendam uiam ligni uitae, et in esaia: inducet
gladium magnum et sanctum super draconem colubrum tortuosum, et interficiet eum in die
illa. et dicit eos uel uulneratos uel interfectos futuros gladio, ut timentes poenas, imitentur
niniuen, et agant paenitentiam, et non sustineant quae dominus comminatur. quod quidem et
hieremiae prophetia sonat: loquar, inquit, super gentem et super regnum, et auferam et
disperdam eos; et si paenitentiam egerint, et ego paenitentiam agam de omnibus malis quae
locutus sum, ut facerem eis. et ut sciatis propterea nunc dominum comminari aethiopibus
gladium, ut eos ad meliora conuertat, post paululum in hoc ipso libro de aethiopibus infert:
ultra flumina aethiopiae, inde supplices mei filia dispersorum meorum deferent munus mihi,
siue, ut in lxx habetur: de finibus fluuiorum aethiopiae suscipiam dispersos meos, et offerent
hostias mihi. post haec non loquitur dominus ut supra, sed propheticus spiritus de eo: et
extendet manum suam super aquilonem, et perdet assur. aquilonem de quo hieremias scripsit:
ab aquilone exardescent mala super omnes habitatores terrae. et de quo salomon
commemorat: aquilo durus uentus; nomine autem dexter uocatur. propterea autem extendit
inferentem supplicia deus manum suam, ut et aquilo sentiat poenas, et hi qui in terra eius
sunt, ad quam iuxta zachariam pergunt equi nigri, de quibus dicitur: erant equi nigri, ibant in
terram aquilonis. et pulchre qui mouerit pedes suos, et recesserit ab oriente, de quo idem
propheta ait: ecce uir, oriens nomen eius, et ad occidentem respexerit, statim pergit ad
aquilonem, qui non est dexter, sed nomine dexter uocatur. quod quidem et corporaliter
intellegitur, ut quicumque in oriente steterit, et uerterit se ad occidentem respiciens, ad
dexteram habeat aquilonem, quem dextrum uocant qui flatu illius refrixerunt, qui tantum
nomine dexter est, ceterum re et opere potius in sinistra est. postquam autem extenderit
manum suam super aquilonem dominus, perdet etiam assur, qui interpretatur euthunôn~g
quem multi putant dirigentem dici, sed falsum est; euthunôn~g enim coarguens dicitur, atque
conuincens. et quoniam diabolus ipse est inimicus et ultor, et ipse peccata suggerit, et postea
in peccatis coarguit peccatores, idcirco euthunôn~g uocatur. hunc ego esse reor principem
assyriorum, qui habitat ad aquilonem, et metropolim habet niniuem, et dicit in esaia:
fortitudine faciam, et sapientia intellectus auferam terminos gentium, et uires earum depascar.
porro quod sequitur de niniue uastata: et pascentur in ea greges, et omnes bestiae terrae,
chamaeleontes, et hericii in praesepibus eius accubabunt, et bestiae requiescent in cardinibus
eius, et corui in fenestris eius, et cetera, uidetur mihi iuxta illud intellegi debere, quod uel in
iona, uel in naum propheta scriptum est. et in iona quidem niniuen, id est speciosam, quae ad
praedicationem ionae, id est columbae, egerit paenitentiam, ecclesiam interpretati sumus de
gentibus congregatam. in naum uero super mundo intellegentiam temperauimus; et de mundo
quidem non difficile est interpretari et dicere, quod quando aethiopes uulnerati gladio domini
fuerint, et extenderit manum suam super aquilonem, et perdiderit assyrium principem mundi,
etiam ipse mundus cum principe suo pereat, et ad maximam solitudinem redigatur, et nulli
miserabilis sit, sed omnes ad ruinam eius sibilent, et moueant manus suas. de ecclesia autem
uidetur prima fronte esse blasphemum, quod ea futura sit inuia et deserta, et bestiae habitent
in ea, et postea ei cum insultatione dicatur: haec est ciuitas malis dedita, quae habitabat in
spe, quae dicebat in corde suo: ego sum, et non est praeter me amplius, quomodo facta est in
solitudinem, pascua bestiarum? sed qui considerauerit illud apostolicum in quo dicitur: in
nouissimis temporibus instabunt tempora pessima, et erunt homines sui amatores, auari,
arrogantes, superbi, blasphemi, parentibus non oboedientes, ingrati, scelesti, sine affectione,
sine pace, accusatores, intemperantes, crudeles, odio habentes bonum, proditores, temerarii,
inflati, uoluptatum amatores magis quam dei; habentes formam pietatis, uirtutem autem eius
denegantes. necnon et hoc quod in euangelio scriptum est, quod multiplicata iniquitate,
refrigescat caritas multorum, intantum ut in illo tempore compleatur: uerumtamen ueniens
filius hominis putas inueniet fidem super terram? non mirabitur de extrema ecclesiae
uastitate, quod, regnante antichristo, redigenda sit in solitudinem, et tradenda bestiis, et
passura quaecumque nunc propheta describit. si enim deus propter infidelitatem ramis
naturalibus non pepercit, sed fregit eos, et posuit flumina in desertum, et fontes aquarum in
sitim, terram fructiferam in salsuginem, propter malitiam habitatorum eius, cur non econtrario
eos de quibus dixerat: posuit desertum in paludes aquarum, et terram sine aqua in fontes
aquarum et habitare fecit ibi esurientes, et cetera, et quos inseruit de oleastro in radicem
bonae oliuae, si immemores beneficii recesserint a conditore suo, et adorauerint assyrium,
euertat et ad eamdem sitim reducat, in qua prius fuerant? quod cum generaliter in aduentu
antichristi, siue in fine mundi possit intellegi, tamen cotidie in his qui simulant se esse de
ecclesia dei, et operibus negant, auditores que legis sunt, et non factores, accipi potest qui
frustra speciosos se esse iactent, cum habitent in eis greges, uitiorum scilicet multitudo, et
bruta animalia corpori seruientia; et omnes bestiae terrae, quae corda eorum comedunt, et
chamaeleontes qui non habent unum colorem; sed diuersis peccatis, nunc auaritia, nunc
luxuria, nunc crudelitate, nunc libidine, nunc tristitia, nunc exsultatione per momenta
mutantur. et hericii in praesepibus eorum animal spinosum et plenum sentibus, et uulnerans
quicquid contigerit. sed et bestiae cubabunt in foraminibus, id est in cordibus eorum, et corui
immundae aues in portis eorum, uel in ore, uel in auribus, quo aut loquantur semper, aut
audiant mala. post quae infertur et dicitur: ideo ecclesiam haec passuram fore, uel esse
perpessam, quod in superbiam se eleuauerit, et quasi cedrus suum cacumen erexerit, malis
operibus dedita, et nihilominus futuram sibi beatitudinem repromittens, et in corde suo
ceteros despiciens, nec putans quemquam esse praeter se, et dicens: ego sum, et non est alia
praeter me ultra; quomodo ergo facta est in solitudine pascua bestiarum? ubi enim prius
habitabat pater, et filius et spiritus sanctus, et angeli eius ministeriis praesidebant, tunc
habitabunt bestiae, de quibus et propheta complorat dicens: ne tradas bestiis animam
confitentem tibi. omnis qui transibit per eam, sibilabit et mouebit manus suas. quod si de
angelis intellexerimus, ita interpretabimur: cum transierint per eam angeli, et non manserint
in ea, ut prius facere consueuerant, stupebunt et mirabuntur, et non eam fulcient, et
sustentabunt ruentem manu sua, sed leuabunt manus et pertransient. uel certe cum sibilo
attollent manus, et quasi plangentes in morem lugentium concrepabunt. si autem hoc de
diabolo et angelis eius uoluerimus accipere, qui uineam quoque, quae de aegypto translata
fuerat, uastauerunt, dicemus, per animam de qua christus recesserit, et quae prius templum
dei fuerat, et esse desiuit, transire serpentem, et sibilare in ea, et uenena suae malitiae
euomere, et non solum hoc facere, sed opera quoque sua quae tropikôs~g manus uocantur,
mouere. ac ne putes quia colubrum nominauimus, uiolenter nos manus colubri, pro opere
intellegere, accipe testimonium salomonis: mors et uita in manibus linguae. haec diximus, ut
potuimus interpretationi allegoricae seruientes. si quis autem magis uerisimilia, et habentia
rationem quam a nobis sunt disserta reppererit, illius magis lector auctoritate ducatur.
Caput 3
uae prouocatrix et redempta ciuitas, columba. non audiuit uocem, et non suscepit disciplinam,
in domino non est confisa, ad dominum suum non appropinquauit. principes eius in medio
eius, quasi leones rugientes, iudices eius lupi uesperae, non relinquebant in mane. prophetae
eius uesani, uiri infideles. sacerdotes eius polluerunt sanctum, iniuste egerunt contra legem.
dominus iustus in medio eius non faciet iniquitatem. mane mane iudicium suum dabit in luce,
et non abscondetur; nesciuit autem iniquus confusionem. disperdidi gentes et dissipati sunt
anguli earum; desertas feci uias eorum, eo quod non est qui transeat; desolatae sunt ciuitates
eorum, non remanente uiro, neque ullo habitatore. dixi, attamen timebis me, suscipies
disciplinam, et non peribit habitaculum eius propter omnia in quibus uisitaui eam.
uerumtamen diluculo surgentes corruperunt omnes cogitationes suas. lxx: o illustris et
redempta ciuitas columba, non audiuit uocem, non suscepit disciplinam; in domino non est
confisa et ad dominum suum non appropinquauit. principes eius in ea ueluti leones rugientes,
iudices eius sicut lupi arabiae, non dimittebant in mane; prophetae eius portantes spiritum,
uiri contemptores. sacerdotes eius polluunt sancta, et impie agunt in legem. dominus autem
iustus in medio eius, et non faciet iniquitatem. mane mane iudicium suum dabit in luce, et
non est absconditus, et nescit iniquitatem in exactione, nec in sempiternum iniustitiam;
detraxi superbos, dissipati sunt anguli eorum, destruxi uias eorum ut penitus non transeant;
defecerunt ciuitates eorum, eo quod nullus subsisteret, neque habitaret. dixi, uerumtamen
timebitis me, et suscipietis disciplinam, et non peribitis de oculis eius in omnibus in quibus
ultus sum super eam. praeparare, consurge diluculo, disperierunt omnes racemi eorum. multi
putant propter consequentiam sermonis dici aduersum niniuen, de qua supra: et perdet
assyrium, et ponet niniuen in solitudinem. sed numquam scriptura niniuen columbam uocaret,
licet in hieremia a facie gladii columbae de nabuchodonosor dictum quidam putent. sed
sciendum quod alii econtrario asserant, pro columba, ibi posse intelligi hellada~g, id est
graeciam, ut sit sensus: a facie gladii iona, id est a facie gladii graeciae. iona enim tam
columbam quam graeciam significat. unde et usque hodie graeci iones, et mare appellatur
ionium, et apud hebraeos permanet eorum uetus uocabulum. sed et principes romani apud
barbaras nationes antiquum uocabulum retinentes, caesares appellantur. omnis itaque contra
hierusalem sermo est:
uae ciuitas quondam columba, semper peccans, et captiuitatibus tradita, et rursum redempta a
domino. uae ciuitas prouocatrix, quod significantius hebraice dicitur mara id est
parapikrainousa~g, quod nos possumus dicere deum amarum faciens, id est tuo uitio dulcem
dominum atque clementem uertens in amaritudinem, ut qui misereri uult, punire cogatur. non
audiuit praeceptum domini, et correpta noluit suscipere disciplinam; nec prementibus malis
aliquando est confisa in domino deo suo; nec ambulauit post tergum eius; nec dicente eo: ego
dominus appropinquans, et non de longe, ipsa ei appropinquare uoluit. describuntur quoque
principes eius et iudices et prophetae et sacerdotes, ut in ciuitate populum et in his quae dixi
nominibus dignitatum principes accipiamus. principes igitur eius quasi leones semper
uersabantur in praedis, et ad effundendum sanguinem subiectorum; iudices eius rapaces, non
dimittentes aliis quod possint rapere. prophetae eius insanientes siue stupentes, quod hebraice
dicitur phoezim, et aquila transtulit thambeutai~g, loquebantur quasi ex ore domini, et omnia
contra dominum praedicabant, sacerdotes in loco sanctuarii commisere sacrilegium, et cum
contra legem facerent, ex lege uictimas offerebant. propterea quia illi egerunt iniuste,
dominus iustus non faciet iniquitatem, sed restituet urbi pessimae quae meretur. mane, mane,
id est manifeste et absque aliqua ambiguitate faciet de ea iudicium, nec erit quod ab eo possit
abscondi. et hoc faciet dominus, ut correpta ciuitas conuertatur ad melius. sed iniquus israel
non cognouit confusionem suam, nec intellexit idcirco sibi illatas plagas, ut ageret
paenitentiam. uindicaui te, inquit postea de gentibus, et destruxi imperia earum, ut qui per
plagas me non senseras, saltem per beneficia cognosceres. uel certe sic intellegendum:
disperdidi omnes ciuitates tuas, o iuda, et omnes subiectos tibi pagos et tribus, et diuersa
confinia, et tanta hominum uastitas fuit, ut non esset qui habitaret in urbibus tuis; et postquam
hoc feci, misi prophetas meos consurgens diluculo, et ad paenitentiam prouocans, dixi que:
feci quidem tibi haec, o hierusalem, sed feci ut timeres me, et susciperes disciplinam, et non
periret habitaculum tuum, hoc est templum, propter omnia scelera quae gesseras. at
econtrario, habitatores hierusalem, me eos ad paenitentiam prouocante, quasi de industria et
ex contentione diluculo surrexerunt, ut festinatione qua ad me redire debuerant complerent
omnes cogitationes suas, et opere demonstrarent, quod mente conceperant. hoc iuxta
hebraicum. ceterum illustris et redempta ciuitas christi sanguine, iuxta superiora perspicue
ecclesia intellegitur, quae et uocatur columba, propter simplicitatem multitudinis in ea
credentium. haec non audiuit uocem domini, neque suscipere uoluit disciplinam, nec confisa
est in domino, quia noluit appropinquare ad dominum deum suum, ut mereretur ueniam
peccatorum. frustra enim quis uocem domini dei sui audire se dicit, et confidere in domino,
quando operibus fidem destruit, et magis mammonae iungitur quam domino deo suo, et
duplici corde accedit ad eum, et duobus dominis, saeculo et deo militare posse se credit. huius
principes sunt sicut leones rugientes. non ambigimus de rugitu leonum et discursu, quando
uiderimus principes eius ita in subiectos populos detonare, et uoce tyrannica rabidis que
conuiciis plebem conterere, ut non pastorem in grege, sed leonem inter ouiculas putes
frendere. iudices quoque eius quasi lupi arabiae, occidentes uespere, et nil relinquentes in
mane; non aspicientes ad ortum solis, sed morantes semper in tenebris, et possessiunculas
ecclesiae, et ea quae in dei donaria conferuntur, uertentes in lucrum suum, ut non habeant
pauperes quod mane comedant, qui quasi in nocte et nullo uidente, omnia populantur; et cum
luporum more cuncta diripiant, ne paruos quidem cibos indigentibus derelinquunt. prophetae
etiam, id est magistri qui se putant docere populos, et de scripturis sermocinari,
pneumatophoroi~g, id est portantes spiritum, siue spiritales - et hoc eirônikôs~g legendum -,
sunt uiri contemptores; non enim docere, sed facere in ecclesia conuenit, non factis uerba
destruere. ceterum tu cum alium doceas, et ipse non facias, non tam doctor quam contemptor
uocandus es, de quo et in abacuc scribitur: uidete contemptores et respicite et admiramini
mirabilia, et disperdimini. sacerdotes quoque qui eucharistiae seruiunt et sanguinem domini
populis eius diuidunt, impie agunt in legem christi, putantes eucharistian~g imprecantis
facere uerba, non uitam, et necessariam esse tantum, sollemnem orationem, et non
sacerdotum merita, de quibus dicitur: et sacerdos in quocumque fuerit macula, non accedet
offerre oblationes domino. cum haec faciant principes, iudices, prophetae, sacerdotes
hierusalem, nihilominus clemens et iustus est dominus. clemens, in eo quod a sua ecclesia
non recedit; iustus, in eo quod reddit unicuique quod meretur. postquam enim aduenerit
mane, et nox huius saeculi pertransierit, dabit in luce iudicium suum, et non abscondetur uel
ipse, uel iudicium eius. et cum coeperit et a singulis exigere pecuniam quam eis commiserat,
non erit iniustus, nec faciet in perpetuum ualere iniustitiam, sed superbos principes, quibus
resistit deus, detrahet de cathedris suis, et de culmine quod tenebant, et dissipabuntur anguli
eorum, id est prauae uoluntates; et a recto itinere declinantes, in quibus semper et pharisaei
orare consueuerant, angulari lapide contempto. puto autem quod et superbis prosit detrahi eos
de arrogantia sua, et dissipari angiportus et angulos eorum, ut postea recto itinere gradiantur.
denique sequitur: et desertas faciam uias eorum, eo quod non sit qui pertranseat, secundum
illud quod in primo psalmo scriptum est: et iter impiorum peribit necnon et in osee, ubi de
hierusalem dicitur fornicante: ecce ego claudam uias eius spinis, et obstruam itinera eius, et
semitam suam non inueniet, et persequetur amatores suos, et non apprehendet eos, et quaeret
eos, et non inueniet; et dicet: uadam et reuertar ad uirum meum priorem, quoniam bene mihi
erat tunc magis quam nunc. animaduerte quod nisi clausae fuissent uiae, et obsepta itinera, et
nisi destruxisset dominus uias eius, numquam dicere potuisset anima fornicans: uadam et
reuertar ad uirum meum priorem. dissipantur ergo itinera superborum et anguli eorum, ne
ambulent in superbia et in prauitate, et urbes eorum quae male aedificatae fuerant in
arrogantia et superbia, destruuntur, ne subsistant et habeant habitatores pessimos. ac ne quis
putet nos uim facere scripturae, discat ex consequentibus. haec autem, inquit, feci ut dicerem
eis: ecce destructa sunt itinera malitiae; de cetero timete me, et discite disciplinam, ne et
disciplina mea pereat fructum in uobis conuersionis non inueniens; et omnia irrita sint, per
quae uos uolui corripere, et ille uobis sermo qui in hieremia scriptus est, possit aptari: sine
causa percussi filios uestros, disciplinam non recepistis. uel certe: timete me, et recipite
disciplinam, ut non pereant omnia de conspectu hierusalem, nec penitus ad solitudinem
deducatur super his malis, in quibus comminatus sum ei. nec moueat aliquem, ut saepe iam
dixi, quod haec aduersum ecclesiam dicta interpreter, cum sciat hierusalem in scripturis
sanctis semper typum habere ecclesiae, de qua qui peccauerit, uel in babylonem abducitur, uel
si sponte descendere uoluerit, in hiericho a latronibus uulneratur. quae est enim ita illustris ut
ecclesia, quae in toto orbe fundata est. ita redempta christi sanguine et columba propter
gratiam spiritus sancti, ut ecclesia de gentibus congregata? in qua plurimi qui se dicunt in
christum credere, nec audierunt uocem eius, nec receperunt disciplinam, nec iuxta eum esse
uoluerunt. quod autem dicitur: principes eius in ea sicut leones rugientes, scio offensurum me
esse plurimos, quod super episcopis et presbyteris haec interpreter, cum et presbyteri mali, qui
susannam uiolare cupierunt, ceteros presbyteros qui bene uixerint, non condemnent. et mali
principes, quos describit sermo propheticus, non sint bonis principibus contumeliae: stulto
enim flagellato, insipiens sapientior erit; si autem insipiens sapientior fit, quanto magis ille
qui sapiens est? sed iudices eius ac principes capientes munera, uendentes que iustitiam,
nonne recte appellantur lupi arabiae, uel uespertini, sicut symmachus transtulit? non enim
merentur lupi dici beniamin, qui mane rapiunt, et ad uesperam dant escam, sed lupi
uespertini, qui noctibus comedunt, et in mane nihil relinquunt. quod autem sequitur:
prophetae eius pneumatophoroi~g, id est, portantes spiritum, uiri contemptores, nullum
moueat quod super doctoribus interpretantes, eosdem et prophetas dicamus et contemptores,
cum et apostolus praecipiat: nolite contristare spiritum sanctum dei, in quo signati estis in die
redemptionis. et dauid loquatur in quinquagesimo psalmo: spiritum sanctum tuum ne auferas
a me. nisi enim spiritus sanctus contristatus fugere consueuisset prius hospitium, et dimittere
habitaculum suum, numquam et paulus praecepisset quod supra dixi; et dauid post adulterium
formidaret, ne perderet quod acceperat, de quo et ad hebraeos scribitur: quanto arbitramini
deteriora mereri supplicia eum, qui filium dei conculcauerit, et sanguinem testamenti
immundum duxerit, in quo sanctificatus est, et spiritui gratiae contumeliam fecerit? sed et in
tertio regnorum libro scriptum est, hominem dei, haud dubium quin prophetam, qui ad altare
dixerat in samaria: altare, altare, haec dicit dominus: ecce filius nascetur dauid, et cetera; quia
contempserit uerba domini, et comederit apud pseudoprophetam - sic enim locum istum
exponens iosephus interpretatus est -, interfectum esse a leone. et ne putaretur casus et non
iudicium domini, et pseudopropheta qui eum deceperat, hoc futurum esse praedixit, et ipse
leo contemptorem puniens, asinum reseruauit. non ergo mirum si doctores qui sancto spiritu
pleni fuerant, possint fieri contemptores, cum apud neglegentes non omni custodia
conseruantes cor suum, haec ipsa frequenter causa soleat superbiae in dominum et
contemptus exsistere, quod habeant scientiam dei, et nouerint multam bonitatem eius, quam
abscondit timentibus se, et contemnant diuitias bonitatis eius thesaurizantes sibi iram in die
irae et reuelationis. sacerdotes quoque, - qui dant baptismum et ad eucharistiam domini
imprecantur aduentum, faciunt oleum chrismatis, manus imponunt, catechumenos erudiunt,
leuitas et alios constituunt sacerdotes -, non tam indignentur nobis haec exponentibus et
prophetis uaticinantibus, quam dominum deprecentur, et studiose agant ne de sacerdotibus
qui uiolant sancta domini, esse mereantur. non enim dignitas et nomina dignitatum, sed opus
dignitatis, et principes, et iudices, et prophetas, et sacerdotes saluare consueuit: qui
episcopatum, inquit, desiderat, bonum opus desiderat. uidete quid dixerit: bonum opus
desiderat, non dignitatem. si autem, despecto opere, solam aspexerit dignitatem, cito corruit
turris in siloa, et excelsa cedri fulmine feriuntur, et erecta ceruix frangitur, et cygnus, extento
collo, et in sublime se tendens, inter immundas uolucres computatur. porro quod exposuimus
iuxta hebraicum: uerumtamen diluculo surgentes corruperunt omnes cogitationes suas, pro
quo in septuaginta scribitur: praeparare, consurge diluculo, dissipata est omnis frondositas
eorum, quia multum ab hebraico discrepat, et magis uidetur iuxta lxx cum posterioribus
concordare, in sequentibus exponemus. quapropter exspecta me, dicit dominus in die
resurrectionis meae in futurum; quia iudicium meum ut congregem gentes, et colligam regna;
ut effundam super eas indignationem meam omnem iram furoris mei; in igne enim zeli mei
deuorabitur omnis terra, quia tunc reddam populis labium electum, ut inuocent omnes nomen
domini, et seruiant ei humero uno. lxx: propterea expecta me, dicit dominus, in die
resurrectionis meae in testimonium, quia iudicium meum in congregationes gentium, ut
suscipiam reges, ut effundam super eos iram meam omnem, iram furoris mei; quia in igne
zeli mei consumetur omnis terra quia tunc conuertam in populis linguam in generationes eius,
ut inuocent omnes nomen domini, ut seruiant ei sub iugo uno. haec iudaei interpretantur in
aduentu christi, quem sperant uenturum esse, et dicunt uniuersis gentibus congregatis, et
effuso super eas furore domini, in igne zeli eius terram deuorandam. et sicut ante
aedificationem turris fuit, quando una lingua omnes populi loquebantur, ita conuersis
omnibus ad cultum ueri dei, locuturos hebraice et totum orbem domino seruiturum. nos
autem qui non sequimur occidentem litteram, sed spiritum uiuificantem, nec iudaicas fabulas,
audimus a domino: praeparare, consurge diluculo: dissipati sunt omnes racemi eorum, et
praeparati dicimus: paratum cor meum deus, paratum cor meum. audimus que in prouerbiis
imperatum: praepara in egressu opera tua. et illud quod in leuitico sacrate dicitur, ubi septimo
mense, decima die mensis offert aaron pro populo hircum emissarium atque uiuentem; et
ponens manus super caput eius, imprecatur ei cuncta peccata populi israel, tradit que eum in
manus hominis praeparati, et mittit in eremum, intellegimus in nobis, et praeparantes nos ueri
imperio sacerdotis, tollimus malum de medio ecclesiae. cum que haec fecerimus, nox
praeterit, appropinquat dies, et quasi in die honeste ambulantes dicimus: deus, deus meus, ad
te de luce uigilo. statim que inferimus: mane exaudies orationem meam, mane assistam tibi,
et uidebo. nisi enim praeparati fuerimus, non nobis orietur sol iustitiae. orto autem sole,
omnes racemi de uinea sodomorum dissipantur et pereunt, ut non solum grandes botri, sed
etiam quod paruum esse uidebatur in nobis christi lucerna radiante, dispereat. et pro his
omnibus mercedem nobis pollicens deus, ait: exspecta me in die resurrectionis meae in
testimonium; post uitia enim atque peccata deus resurget in nobis. et iuxta quod in alio loco
praecipit: estote mihi testes, et ego testis, dicit dominus deus; et puer quem elegi, testis est
nobis pater cum filio et spiritu sancto, ut in ore duorum uel trium testium, stet omne uerbum.
et magis mihi uidetur sic stare sententia, et sub his tribus testibus ueritas confirmari, quam per
litteram. duo enim fuerunt testes contra susannam, et contra ipsum dominum saluatorem, et
tamen non stetit uerbum in ore eorum. contra naboth quoque paene tota ciuitas dixit
testimonium, consensus que testium pessimorum non firmitatem habuit ueritatis, sed sceleris
coniurationem. quia iudicium, ait, meum in congregationes gentium, ut suscipiam reges, in
loco uidelicet suppliciorum suorum, ut effundam super eos iram meam, omnem iram furoris
mei. qui minor est, cito meretur ueniam, et misericordiae proximus est: potentes autem
potenter tormenta patientur. unde gentes et gentium multitudo congregatur ad iudicium; reges
autem, id est principes dogmatum peruersorum adducentur in poenam, ut effundatur super eos
omnis ira furoris domini. et hoc non crudelitate fit aliqua, ut arbitrantur sanguinarii iudaei sed
misericordia, et consilio medicantis. sequitur enim: in igne enim zeli mei consumetur omnis
terra. gentibus quippe ad iudicium congregatis, et regibus ad supplicium, ut effundatur super
eos ira, et non ex parte sed tota, et ira ac furore sociato, consumatur in toto orbe quicquid
terrenum est, quicquid ad opera terrae, id est carnis pertinet; omnes eius uepres et spinosa
fruteta uastans, zeli mei uorabit incendium. et tunc conuertam super populos linguam in
generationem suam, ut unusquisque errore deposito ad antiquum confessionis domini
eloquium reuertatur et in nomine iesu omne genu flectatur, caelestium, terrestrium, et
infernorum, et omnis lingua confiteatur dominum iesum in gloria dei patris. abiectis que
lateribus, et bitumine quae habebamus pro lapidibus et luto, quibus erroris nostri superbiam
exstruebamus contra dominum, recipiamus linguam quam ante perdidimus, et simus sub iugo
christi, dicentis: iugum meum suaue est, et onus meum leue est. notandum autem quod in eo
loco, ubi nos interpretati sumus: reddam populis labium electum, pro electo, septuaginta
dixerunt: in generationem eius, ut subaudiatur, terrae. et hinc error exortus est, quod uerbum
hebraicum barura quod aquila et theodotio electum, symmachus mundum interpretatus est.
septuaginta legerunt badura, res litteram daleth existimantes, propter elementi nimiam
similitudinem, quod paruo apice distinguitur. necnon ubi nos transtulimus: in die
resurrectionis meae in futurum, et omnes interpretati sunt: in testimonium. hebraeus qui me in
scripturis instituit, asserebat laed in praesenti loco magis eis~g eti~g id est in futurum, debere
intellegi, quam in testimonium. ed enim, quod scribitur per litteras ain et daleth, eti~g, et
marturion~g, id est et futurum et testimonium, intellegi. possumus hunc locum et de primo
christi aduentu exponere, quando, omni errore sublato, daemonibus que calcatis, et terrenis
operibus destructis, apostoli uniuersis linguis locuti sunt, et ueteri errore sublato, unum
confessionis redditum est labium. sed et reges qui destruuntur, et diuino consumuntur ardore,
peruersorum dogmatum principes sentiendi sunt. ultra flumina aethiopiae, inde supplices mei,
filii dispersorum meorum, deferent munus mihi. in die illa non confunderis super cunctis
adinuentionibus tuis, quibus praeuaricata es in me; quia tunc auferam de medio tui
magniloquos superbiae tuae; et non adicies exaltari amplius in monte sancto meo. et
derelinquam in medio tui populum pauperem et egenum, et sperabunt in nomine domini.
reliquiae israel non facient iniquitatem, neque loquentur mendacium; et non inuenietur in ore
eorum lingua dolosa, quoniam ipsi pascentur et accubabunt; et non erit qui exterreat. lxx: de
finibus fluminum aethiopiae suscipiam dispersos meos, afferent uictimas mihi. in die illa non
confunderis ex omnibus adinuentionibus tuis, quibus impie egisti in me, quia tunc auferam a
te detractionem contumeliae tuae, et ultra non adicies ut magnificeris super montem sanctum
meum; et relinquam in te populum mansuetum et humilem, et reuerebuntur nomen domini,
qui fuerint reliqui de israel, et non facient iniquitatem; et non loquentur uana et non
inuenietur in ore eorum lingua dolosa, quoniam ipsi pascentur et accubabunt, et non erit qui
exterreat eos. cum reddiderit dominus credentium populis labium electum, et inuocauerint
omnes nomen domini, et portauerint iugum eius, tunc etiam ultra flumina aethiopiae, unde
uenit regina saba audire sapientiam salomonis deferent uictimas domino: et aethiopia
praeueniet manus eius deo; uero que legifero, qui decem plagis percussit aegyptum, nubet
aethiopissa, inuidente synagoga hebraeorum. quod autem ait iuxta hebraicum: inde supplices
mei filia dispersorum meorum, deferent munus mihi, huiuscemodi est: o israel, o synagoga
quondam filia, quam in toto orbe dispersi licet inuideas, licet aemulatione crucieris, tamen de
aethiopia mihi uictimae deferentur, id est de gentilium populo. in die illa, id est quando
gentium crediderit multitudo, etiam tu non penitus confunderis super cunctis erroribus tuis,
quibus praeuaricata es in me, eligendo barabbam, et dei filium crucifigendo. tunc auferam de
medio tui scribas et sacerdotes, et pharisaeos, magniloquos superbiae tuae, et nequaquam te in
monte sancto meo ultra iactabis, sed habebis populum pauperem homines illitteratos, et
piscatores, qui sperabunt in nomine domini. reliquiae israel, non multitudo quae clamauit:
crucifige, crucifige eum, non pontifices et optimates, sed reliquiae nequaquam facient
iniquitatem, nec loquentur mendacium in christo, ueritati credentes; nec inuenietur in ore
eorum lingua dolosa, scientes quod omne mendacium de diabolo est; quoniam ipsi pascentur,
et dicent: dominus pascit me, et nihil mihi deerit; in loco pascuae ibi me collocauit. super
aquam refectionis educauit me, animam meam conuertit; et non erit qui exterreat, uincente
fide credentium persecutorum superbiam. hoc de primo aduentu christi intellectum sit, quod
iudaei sibi in fine promittunt, et sperant se habitaturos in hierusalem, et in morem pecorum
corporalibus donis iudae opibus que complendos et pascendos herbis uiridibus, et deletis
cunctis gentibus, sibi que subiectis, nullum posse residere qui eos exterreat. nos autem
accipientes ex hac fabula occasionem uerae historiae, dicemus, omnem nigredinem animae, et
tetrum colorem, ac draconis uenenum, quo tincti fueramus uitiis atque peccatis, reddito nobis
labio electo, siue mundo, et candido, ut interpretatus est symmachus, derelinquere nos in
fluminibus aethiopiae peruersorum dogmatum magistros, quibus ante irrigabamur, et cum
dispersis quondam israel christo munera delaturos. in die illa, qua nobis christi lumen fuerit
exortum, dicetur ad singulos nostrum: non confunderis ex omnibus tuis adinuentionibus,
cogitationibus uidelicet pessimis, quibus impie agebamus contra dominum, et tolletur
uniuersa superbia et contumelia per quam erigebamur contra dominum et contra montem,
sanctum eius dominum nostrum et saluatorem; et pro superbis uanis que nominibus
relinquetur in nobis populus mansuetus et humilis, ut nihil arrogans, nihil tumens, nihil quod
deo displiceat, cogitemus. simul que considera quod in die iudicii, et in consummatione
mundi tollantur uniuersa nomina dignitatum, et unus populus remaneat, et grex sub pastore
bono, qui sit mansuetus et humilis. tunc etiam populus israel, plenitudine gentium
subintrante, quia conclusit deus omnes sub peccato, ut omnibus misereatur, timebunt nomen
domini. et reliquiae israel non facient ultra iniquitatem, per quam dominum negauerunt, nec
loquentur uana, ineptas sibi fabulas promittentes; nec inuenietur in ore eorum lingua
mendacii, christo per eos, qui ueritas est, loquente. tunc enim pascentur, et ipsi in uno grege,
et accubabunt in ecclesia, et ueri nabuchodonosor impetus non timebunt. haec uidentes et
legentes tanta mysteria, clamemus cum apostolo, atque dicamus: o profundum diuitiarum
sapientiae et scientiae dei, quam inscrutabilia sunt iudicia tua, et inuestigabiles uiae tuae.
quod quidem et propheta sentiens, et se cum uoluens, de dei iudiciis suspicatur. in nocte cum
corde meo exercebar, et scopebam spiritum meum, et dicebam: numquid in sempiternum
abiciet deus, aut non addet ut misereatur ultra, aut continebit in ira sua misericordias suas? et
dixi: nunc coepi, haec est immutatio dexterae excelsi. et est sensus: hoc quod putabam
dominum in aeternum relinquere peccatores, et misericordias suas ira succedente cohibere,
intellexi idcirco factum, ut immutatione dexterae suae, quae excelsi est dextera, uniuersa
mutaret, et misereretur his quos ante proiecerat. et nos igitur et reliquiae israel, scientes quod
reddituri sumus rationem pro omni otioso uerbo, et quod disperdet dominus uniuersa labia
mendacia, non loquamur uanitatem. uanitas quippe uanitatum, et omnia uanitas, et: uniuersa
uanitas omnis homo uiuens. nec ore nostro mendacium proferamus, sed accepta potestate
calcandi super serpentes et scorpiones, et super omnem uirtutem inimici, nullam timeamus
formidinem, nec luporum christo custode, uereamur insidias, sed dicamus: dominus
illuminatio mea, et saluator meus; quem timebo? et cetera, quae in uicesimo sexto psalmo
continentur. lauda filia sion, iubila israel, laetare et exsulta in omni corde, filia hierusalem.
abstulit dominus iudicium tuum, auertit inimicos tuos; rex israel dominus in medio tui, non
timebis malum ultra. in die illa, dicetur: hierusalem, noli timere sion; non dissoluantur manus
tuae. dominus deus tuus in medio tui fortis ipse saluabit, gaudebit super te in laetitia, silebit in
dilectione tua; exsultabit super te in laude. nugas qui a lege recesserunt, congregabo, quia ex
te erant, ut non ultra habeas super eis opprobrium. lxx: gaude, filia sion; praedica, filia
hierusalem, exsulta et delectare de toto corde tuo, filia hierusalem. abstulit dominus
iniquitates tuas, redemit te inimicorum tuorum de manibus, rex israel dominus in medio tui,
non uidebis mala ultra. in tempore illo, dicit dominus hierusalem, confide, sion, non
dissoluantur manus tuae. dominus deus tuus in te fortis saluabit te, adducet super te laetitiam,
et innouabit te in caritate sua, et laetabitur in te in delectatione, quasi in die sollemni,
congregabo confractos tuos. uae qui accepit super eam opprobrium. non uideatur mirum, ut
saepe diximus, aliter hebraica capitula, et aliter lxx, graeca uidelicet latina que finiri. ibi enim
in sensu diuersa translatio est, ibi necesse est diuersa esse uel principia uel fines. iudaei cum
christo, quem putant esse uenturum, haec sibi omnia repromittunt, quae nos qui christum
suscepimus, iam cum ipso sumus omnia consecuti. si quis ergo christianorum, et maxime
nouorum prudentium, quorum nomina taceo, ne quemquam laedere uidear, existimat necdum
prophetiam esse completam, sciat falso christi portare se nomen, et iudaicam animam,
circumcisionem tantum corporis non habere. si enim haec necdum facta sunt, sed futura,
frustra credidimus saluatoris aduentum; frustra autem non credentes intellegimus in nobis
esse completum mysterium, quod temporibus aeternis tacitum est, et nunc manifestatum est
per scripturas propheticas et aduentum domini nostri iesu christi. denique consideremus
ordinem lectionis, et uidebimus, quod dicitur non ad iudaeos, sed ad christi ecclesiam
pertinere. post hoc enim quod praecesserat: iudicium meum in congregationes gentium, ut
suscipiam reges, usque ad eum locum, ubi ait: ut inuocent omnes nomen domini, et seruiant
ei sub iugo uno, et: ultra flumina aethiopiae suscipiam in dispersis meis qui afferent mihi
uictimas; et post reliquias populi israel, credentes in christo atque saluatas, de quibus dicitur:
et timebunt nomen domini qui sunt reliqui de israel, et non erit qui exterreat eos. spiritus
sanctus de generali mundi consummatione praedicans loquitur: gaude, filia sion, praedica filia
hierusalem, laetare et delectare de toto corde tuo, filia hierusalem. omnis quippe ecclesiastica
anima, quae in specula constituta est, et contemplatur pacem, laetatur et gaudet iniquitates a
se esse sublatas, et redemptas ab eo qui pretioso sanguine omnes redemit. christus enim factus
est sapientia nobis a deo, et iustitia, et sanctificatio, et redemptio, et redemit nos rex israel,
qui habitat in medio nostri, dicens: ego et pater meus ueniemus, et mansionem apud eum
faciemus. et: habitabo et inambulabo in eis; et ultra non uidebimus mala, solas uirtutes
cogitantes atque facientes. in illa die, dicit dominus, uidentibus nobis pacem, et in sublimi
positis, ne dissoluantur manus tuae, qui et per esaiam dixit: confortamini manus dissolutae, et
opera tua robusta sint. dominus enim fortis, cui nemo potest resistere, saluator tuus, ipse tibi
reddet laetitiam quam perdidisti, et ueteri homine proiecto, in nouo ambulare te faciet, et haec
faciet in dilectione sua, non tuo merito, sed misericordia sua. et laetabitur in te, et
delectabitur, quasi pinguissimam sollemnitatis tuae hostiam suscipiens salutem tuam; et ipse
tibi dicet: congregabo contritos tuos. cor, quippe, contritum et humiliatum deus non despiciet,
et: calamum contritum non confringet. haec interim si uoluerimus de secundo aduentu
accipere saluatoris. porro quia propheta zacharias ad similem laetitiam cohortatur sion et
hierusalem, et hanc ipsam prophetiam matthaeus dicit in primo aduentu christi esse
completam, necessitate compellimur, immo ordine ipso ducimur ueritatis, quod in sophonia
dicitur, non futurum sperare, sed factum. scriptum est enim in zacharia: gaude uehementer,
filia sion; praedica, filia hierusalem. ecce rex tuus uenit tibi iustus et saluator, ipse humilis et
ascendens super iugalem et pullum nouum. haec iuxta septuaginta dicta sint. ceterum iuxta
hebraicum, laudare iubetur ecclesia et iubilare israel, sensu uidens deum, et exsultare atque
laetari in omni corde locus pacis, ad quem dictum est: pacem meam do uobis, pacem meam
relinquo uobis. abstulit enim in fine et in consummatione mundi iudicium eius, nequaquam
eam iudicans atque corripiens, sed saluans, et auertit inimicos eius, daemonum turbas. rex
israel dominus in medio eius erit, non timebit ultra malum. in die illa dicetur ad hierusalem
liberam quae non seruit cum filiis suis, sed quae est mater sanctorum: noli timere, sion, ipsa
quippe est et hierusalem, nequaquam tua opera dissoluentur; nec facies quae te fecisse
lugebis. dominus deus tuus, qui saluabit te, fortis et potens, ipse habitabit in medio tui,
gaudebit super te in exsultatione et laetitia, et silebit peccata tua in caritate, qua te dilexit; et
exsultabit super te in laude, uel quia laudabilis sis, uel quia cum tuis laudibus canas. nugas,
siue, ut aquila interpretatus est, translatos, qui a te recesserunt congregabo, quia ex te erant;
hoc est: hi qui per uitia atque peccata de tuo sinu fugerant, et facti erant sub daemonum
potestate, redintegrato omnium statu, uenient ad te, et nequaquam ultra super perditis filiis
tuis patieris opprobria. id quod diximus nugas, sciamus in hebraeo ipsum latinum esse
sermonem, et propterea a nobis ita ut in hebraeo erat positum, ut nosse possimus linguam
hebraicam omnium linguarum esse matricem, quod non est huius temporis disserere. miror
autem aquilam et septuaginta, pro eo quod nos interpretati sumus erant, in eo uidelicet loco
ubi diximus: congregabo quia ex te erant: pro erant, interpretari uoluisse uae, siue oi~g, quod
semper aquila non pro plangendo, sed pro uocando et inclamando ponit. hai enim, cuius est
uerbi initium, sum, praeteritum tempus numero plurali significat, erant, uel fuerant. haec scio
molesta esse lectori, qui si animaduerterit non me controuersias et declamationes scribere, nec
in locis exsultare communibus, sed commentarios, et commentarios prophetarum,
reprehendet potius sicubi rhetorum more ludere uoluero, quam arguet in tantis obscuritatibus
ut dignum est immorantem. ecce ego interficiam omnes qui afflixerunt te in tempore illo et
saluabo claudicantem, et eam quae eiecta fuerat congregabo; et ponam eos in laudem et in
nomen in omni terra confusionis eorum. in tempore illo quo adducam uos; et in tempore quo
congregabo uos; dabo enim uos in nomen et in laudem omnibus populis terrae, cum
conuertero captiuitatem uestram coram oculis uestris, dicit dominus. lxx: ecce ego faciam in
te, propter te, in tempore illo, et saluabo expressam, et repulsam suscipiam, et ponam eos in
gloriam; et nominatos in omni terra. et confundentur in tempore illo quando bene uobis
fecero; et in tempore cum suscepero uos, quia dabo uos nominatos, et in gloriam in cunctis
populis terrae, quando conuertero captiuitatem uestram coram uobis, dicit dominus. et hoc
synagoga quae non claudicat sed utroque truncata est pede, pollicetur sibi in aduentu christi
sui quem sperat esse uenturum, et putat omnes gentes interficiendas a domino, quae
afflixerunt israel, et saluandam synagogam, et eam quae acceperat libellum repudii
colligendam, et ponendos eos in laudem et in nomen in omni terra captiuitatis suae, in qua
fuerant ante confusi. et hoc fieri tempore, quando captiuitas reducta fuerit hierusalem, et
exstructum templum, et reliquus caeremoniarum ordo seruatus. haec sibi repromittit, et
propterea non agit paenitentiam, et dum sperat incerta, perdit certam salutem. nec miror
synagogam haec dicere, quae quia non recipit christum, oculos dolet, et cum lia lippescit, et
non amatur a iacob et rachel succedente, neglegitur. christianos miror, immo semiiudaeos, qui
sibi uidentur esse de ecclesia, ita dicere et ea profiteri, quae si uera sunt, frustra credimus in
christum, et omne nostrum tollitur sacramentum, et miserabiliores sumus omnibus
hominibus, credentes eum uenisse, qui non uenit. quia autem spes nostra certa est, et
iudaeorum cassa sunt uota, secundum priorem intellegentiam iam texamus praesens
extremum que capitulum, et de iesu filio sirach testimonium proferamus: qui mittit lapidem
in excelsum super caput suum mittit. quia enim sion et hierusalem in excelso positae sunt,
quicumque sion detrahit et hierusalem et mittit in eam contumeliarum lapides, in suum eos
caput iacit, et reuertetur opprobrium eius in caput suum: et dolor eius et iniquitas super
uerticem eius descendet. quanti hodie exprobrant animae, dei mysteria consectanti uolenti que
uidere pacem eius, et dicunt: insanus est, et ebrius, et musto plenus, hominum coetus fugit;
delicias aspernatur, aurum pro luto computat, solam diligit paupertatem. qui autem infideles
sunt, etiam crucem christi exprobrant ei, et si quando eum in angustia uiderint et in
temptatione dicunt: ubi sunt misericordiae tuae, et iustitiae quas operatus es? quid loquar de
infidelibus, cum ecclesiarum nonnulli principes huiuscemodi hominibus exprobrent, et uitam
ipsorum arbitrentur amentiam et non praesentem laudent conuersationem, sed uetera peccata
exprobrent? nec audiunt esse praeceptum: noli improperare homini qui conuertitur a peccatis
suis. uae igitur ei, qui tulit opprobrium atque suscepit, et huiuscemodi se officio mancipauit,
ut detraheret sion, et ciuitati dei, quia pro hac iniuria urbis suae ultor est dominus, et dicet ad
sion: ecce ego faciam in te propter te, id est, faciam ultionem tuam, et saluabo afflictam, siue
ut in graeco dicitur, expressam, ut sit sensus: ego saluabo eam, quae in praesentiarum quasi
uua et oliua ita temptationibus atque pressuris, ut praelo et trabe pressa est et afflicta, ut
uinum faceret et oleum, et de uino biberet iesus in regno patris sui; de oleo autem ungeretur
prae participibus suis. ego puto propter expressionem talis uini et olei, iob multa perpessum;
postquam autem uinum, et oleum fecerat, audisse a domino: putas me aliter tibi respondisse,
nisi ut appareres iustus? quasi ad uuam et oliuam loqueretur: existimas me aliter te pressisse
et afflixisse atque contriuisse, nisi ut uinum de te et oleum exprimerem? sequitur: et eam quae
repulsa fuerat suscipiam. uidetur nos deus repellere quando relinquit temptationi. unde et iob:
uisitatio, inquit, domini respexit me. et non solum iusti loquuntur, et dicunt: nunc autem
repulisti et confudisti nos, sicut in quadragesimo tertio psalmo scriptum est, sed ipse dominus
atque saluator, ex persona hominis quem assumpserat: tu autem, ait, repulisti et despexisti,
distulisti christum tuum; subuertisti testamentum serui tui. quod autem iustorum persona sit
in quadragesimo tertio psalmo dicentium: nunc autem repulisti et confudisti nos, ex
sequentibus approbatur: haec omnia uenerunt super nos, nec obliti sumus te, neque inique
egimus in testamento tuo; nec recessit retro cor nostrum. eam igitur quae in temptationibus
uidebatur abiecta, suscipiet dominus in fine, et ponet eos in gloriam et nominatos in uniuersa
terra filios uidelicet expressae et repulsae, id est ecclesiae. quos autem alios possumus
intellegere filios ecclesiae nominatos, nisi apostolos? uide mihi petrum et paulum et
matthaeum et ioannem, et considera hoc quod ad abraham repromissum est: magnificabo
nomen tuum, in illis opere perpetratum. cotidie nominatur in ecclesia, cotidie magnificatur
nomen eorum, non quod ipsis prosit a nobis in ecclesia nominari, sed quod nos magnificantes
nomen eorum, et quae scripserunt lectitantes, consequamur salutem. in tempore, inquit, illo,
quando expressa et repulsa suscepta fuerit, et filii eius positi in gloriam - gloriatur quippe
dominus in athletis suis, cum eos uiderit coronari, sicut gloriatus est aduersus diabolum de
iob; unde et apostolus in profectu discipulorum suorum exsultans, ait: etiam per uestram
gloriam -, confundentur qui aduersarii uestri fuerant, et tulerant contra uos opprobrium; et
tunc uidebunt eos quos miseros putauerant, esse felices, et quos pauperes existimabant atque
deiectos, potentes fieri atque gloriosos; tunc cernent captiuitatem eorum per quam in hoc
saeculo duro fuerant imperio subiugati, reduci in caelestem hierusalem, se que resurgere in
opprobrium et in confusionem aeternam. tribue nobis, iesu christe, expressis et afflictis et
repulsis in isto saeculo, ut nos recipias et ponas in gloriam; confundatur in tempore excetra,
cessent sibila, uenena torpeant, et confusio eius proficiat ad salutem. haec iuxta septuaginta.
hebraicum autem quia excepto principio, de quo in fine superioris capituli diximus, non
multum ab eorum translatione discordat, indigere expositione non arbitror.